Kan beekuutu maalkaa toohee loon obaasa jatte O'n tiyya.

“Dhaba roobaa - hongeen
Qotiyyoon koo du’e
Ameessi koos gatatee
Bineensa afaan bu’e
Ittiin qotee galchee
Kanin maatii sooru
Dallaan koo oneera
Har’a homtuu hin jiru!
Maal taate hin jedhiinaa
Isin kan jiraattan mataan sin boqotee
Ani dhala koo sooruufan
Dhala kootiin qote!
Dhalli koo beela’ee
Lubbuu dhabuuf jiraa
Maaloo naaf birmadhaa
Maaloo na gargaaraa…”

Jedhee yoo dhaammatu
Qonnaan bulaan Booranaa, Kan Baaleefi Gujii
Warra aangoo qabu
Yoom argeree iji?
Warri quufee bulu
Warri cooma muru
Gidiraa uummataa
Quba hin qaban duruu…
Quuqqaa uummataatiif
Hin quuqaman yoomuu
Dhuunfaatti badhaadhu
Dhuunfaatti duroomu!

Uummata keenya sababa hongeetiin Gujii, Boorana, Baalee, Harargeefi bakka addaa addaatti beelaan lubbuu dhabaa jiraniif waan dandeenyuun haa birmannu!
Leta Kenei Aga

Yaa Allaah!!!!!!

Harargee maa teessaa
Birmadhu Karrayyuu
Saamamaa jirakaa
Qe'een warra hayyuu
Sabni qe'een guutuu
Harka namaa ilaale
Arsii maaf callifta
Birmadhu yaa Baalee

Tokko tokkoon cabuun
Nu gaha warrana
Dubbadhu yaa Gujii
Waa jedhi Boorana
Yeroo ati duutu
Taa'eeraa Harargee
Anoo waanan qabu
Hammaareen siif ergee

Maal ta'e sabnikoo
Maaliif natti ilaalee
Maa callifta Amboo
Waa jedhi Salaalee
Nuti wal harcaafnaan
Alagaan nuun hilu
Birmadhu Beddellee
Maa callifta Iluu

Maaf callifta Jimmaa
Birmadhu Adaamaa
Isiniim qomoonkoo
Eenyuttimmoon dhaama
Maaf teessaa Gullallee
Callifteem Buraayyuu
Kalee si'iif dhiigee
Dhiiguma har'ayyuu

Akka firan qabne
Anoo duruu beeka
Maaloo naaf birmadhaa
Isin ilmaan Leeqaa
Silaa galma tokko
Qabna jechuu beekna
Maaliif hanga dhumaa
Callifnee wal eegna!

Qomoo maa calliftan
Baadiyaa magaala
Egaa humnan qabu
Ani kana caalaa..........."

Jettee boossi #Horroo_Guduruun!