O‘zbekiston Respublikasi Ichki ishlar vazirining 2026-yil 12-yanvardagi 16-son buyrug‘i bilan tasdiqlangan “Ichki ishlar vazirligida doimiy faoliyat yurituvchi komissiyalar ishini tashkil etish to‘g‘risidagi nizom”ning 10-ilovasiga muvofiq, ichki ishlar organlari tizimida “Eng namunali ekspert-kriminalistika jamoasi” hamda “Eng yaxshi ekspert-kriminalist” ko‘rik-tanlovlarini tashkil etish va o‘tkazish tartibi belgilangan.

Mazkur ko‘rik-tanlov xodimlar o‘rtasida sog‘lom raqobat muhitini shakllantirish, ularning bilim va kasbiy mahoratini yuksaltirish, intellektual hamda professional salohiyatini oshirish, tashabbuskorlik va yetakchilik fazilatlarini rivojlantirish, shuningdek, xizmat faoliyatida yuqori natijalarga erishgan xodimlarni aniqlash va munosib rag‘batlantirishga qaratilgan.

2026-yil 5-sentabrda Buxoro viloyati Ichki ishlar boshqarmasi Ekspert-kriminalistika markazi hamda uning hududiy bo‘linmalari xodimlari o‘rtasida “Eng yaxshi ekspert-kriminalist” ko‘rik-tanlovining viloyat bosqichi tashkil etildi.

Ko‘rik-tanlov davomida ishtirokchilarning nazariy bilimlari, kasbiy tayyorgarligi va amaliy ko‘nikmalari bir necha yo‘nalish bo‘yicha sinovdan o‘tkazildi.

Dastlab, ishtirokchilarning ekspert-kriminalistika faoliyatiga oid nazariy bilimlari, sohaga doir me’yoriy-huquqiy hujjatlarni bilish darajasi hamda kasbiy tayyorgarligini aniqlash maqsadida test sinovlari o‘tkazildi. Belgilangan vaqt davomida xodimlar taqdim etilgan savollarga javob berib, o‘zlarining kasbiy bilim va tayyorgarlik darajasini namoyon etdilar. Test natijalari belgilangan mezonlar asosida baholanib, ishtirokchilarning to‘plagan ballari qayd etildi.

Ko‘rik-tanlovning navbatdagi bosqichida ishtirokchilarning jangovar va xizmat tayyorgarligi bo‘yicha amaliy ko‘nikmalari sinovdan o‘tkazildi. Xususan, xodimlar Kalashnikov avtomati hamda Makarov pistoletini belgilangan tartibda to‘liqsiz qismlarga ajratish va qayta yig‘ish bo‘yicha o‘z mahoratlarini namoyish etdilar. Ushbu jarayonda topshiriqlarni to‘g‘ri va izchil bajarish, qurol bilan muomala qilish ko‘nikmasi hamda belgilangan vaqt me’yorlariga rioya etish kabi jihatlarga alohida e’tibor qaratilib, har bir ishtirokchining natijasi komissiya a’zolari tomonidan baholab borildi.

Shuningdek, suhbat jarayonida ekspert-kriminalistlarning huquq va majburiyatlari, xizmat faoliyatini tartibga soluvchi me’yoriy hujjatlarni bilish darajasi, sohaviy xizmatlar bilan o‘zaro hamkorligi, tergov-tezkor guruhi tarkibidagi vazifalari, xizmat faoliyati davomida erishgan ijobiy natija va yutuqlari, shuningdek, kriminalistika sohasidagi maxsus bilim va amaliy ko‘nikmalari komissiya a’zolari tomonidan atroflicha baholandi.

Qizg‘in va murosasiz kechgan bahslar yakuniga ko‘ra, Buxoro viloyati IIB Ekspert-kriminalistika markazi katta eksperti leytenant Idiyev Nodirbek Nutfulloyevich faxrli uchinchi o‘rinni, Jondor tumani IIB Ekspert-kriminalistika guruhi katta eksperti katta leytenant Shukurov Davlat Elyorjon o‘g‘li faxrli ikkinchi o‘rinni egalladi.

Buxoro viloyati IIB Ekspert-kriminalistika markazi katta eksperti kapitan Islomov Shoxzod O‘tkirjon o‘g‘li esa o‘zining yuqori kasbiy tayyorgarligi, nazariy bilimlari va amaliy mahoratini namoyon etib, faxrli birinchi o‘rinni qo‘lga kiritdi.

Bu kabi ko‘rik-tanlovlar ekspert-kriminalistika xizmati xodimlarining kasbiy bilim va mahoratini yanada yuksaltirish, ilg‘or tajribalarni ommalashtirish, jamoada sog‘lom raqobat muhitini shakllantirish hamda o‘z kasbiga sadoqatli, bilimli va professional xodimlarni munosib rag‘batlantirishga xizmat qiladi.

Buxoro viloyati Ichki ishlar boshqarmasi boshlig‘ining o‘rinbosari, Jamoat xavfsizligi xizmati boshlig‘i rahbarligida Shofirkon tumanida ijtimoiy-ma'naviy muhitni sog‘lomlashtirish maqsadida nizoli oilalar holati chuqur o‘rganildi. Ushbu o‘rganishlar jarayonida oilaviy kelishmovchiliklarning barvaqt oldini olish, ularning tub sabablarini aniqlash va bartaraf etishga alohida e'tibor qaratildi. Mutasaddilar tomonidan har bir holat yuzasidan fuqarolar bilan yakka tartibda profilaktik suhbatlar olib borilib, ularga kerakli huquqiy tushuntirishlar va maslahatlar berildi. Oilalarda totuvlikni ta'minlash hamda ijtimoiy barqarorlikni mustahkamlash jamiyat tinchligining asosiy garovi ekanligi ta'kidlab o‘tildi.

Tadbirlar davomida fuqarolarga oilaviy munosabatlarni to‘g‘ri yo‘lga qo‘yish bo‘yicha tegishli tavsiyalar berilib, mavjud muammolarni qonuniy hal etish yuzasidan yo‘l-yo‘riqlar ko‘rsatildi.