Kogon shahar IIB xodimlari tomonidan maktablar, texnikum, jamoat joylari va tashkilotlarda uchrashuvlar tashkil etilib, yoshlar hamda ularning ota-onalari bilan tushuntirish ishlari o‘tkazilmoqda.

Unda giyohvandlikning salbiy oqibatlari, uning inson salomatligi va kelajagiga ta’siri haqida ma’lumotlar berilib, yoshlarni hushyorlikka chaqirishga alohida e’tibor qaratilmoqda. Shuningdek, mutaxassislar ishtirokida savol-javoblar tashkil etilmoqda.

Mazkur tadbirlar yoshlar o‘rtasida huquqbuzarliklarning oldini olish va sog‘lom turmush tarzini targ‘ib etishga xizmat qilmoqda.

Buxoro viloyati IIB JXX XPB Voyaga yetmaganlarga ijtimoiy-huquqiy yordam ko‘rsatish markazida yoshlar o‘rtasida huquqbuzarliklarning oldini olish, ularning huquqiy ongi va ijtimoiy faolligini oshirishga qaratilgan profilaktik tadbirlar muntazam o‘tkazib kelinmoqda.

Ana shunday amaliy tadbirlar doirasida Buxoro davlat universitetining “Ijtimoiy ish” ta’lim yo‘nalishi talabalari ishtirokida markazda sayyor o'quv mashg'uloti tashkil etildi. Mashg‘ulotlar davomida bo‘lajak mutaxassislarga markaz faoliyati, bolalar bilan olib borilayotgan ijtimoiy-huquqiy ishlar, profilaktika choralari hamda ularning ahamiyati haqida batafsil ma’lumot berildi.

Markazda tarbiyalanayotgan voyaga yetmaganlar bilan turli qiziqarli o‘yinlar, psixologik treninglar va amaliy mashg‘ulotlar o‘tkazildi. Asosiy e'tibor bolalarning jamiyatga tezroq moslashuvi, jamoada sog‘lom muloqot qilish ko‘nikmalari hamda ijobiy fikrlash qobiliyatini rivojlantirishga qaratildi.

Talabalar tomonidan yoshlarni to‘g‘ri yo‘lga boshlash, sog‘lom turmush tarzini shakllantirish va ularda shaxsiy mas’uliyat hissini uyg‘otish borasida ta'sirchan tushuntirish ishlari olib borildi.

Bu kabi maqsadli tadbirlar kelajak avlodning ijtimoiy faolligini oshirish, ularning bo‘sh vaqtini mazmunli tashkil etish hamda jamiyatda o'z o'rnini topishi uchun zarur bo'lgan huquqiy madaniyatini yuksaltirishda muhim poydevor bo‘lib xizmat qiladi.