"Turmush" profilaktik tadbiri doirasida Jondor tumanida IIB masʼul xodimlari va hamkor tashkilotlar ishtirokida fuqarolarning huquqlarini himoya qilish hamda jinoyatchilikning barvaqt oldini olishga qaratilgan tizimli ishlar olib borilmoqda.

Mahalla faollari, profilaktika inspektorlari va xotin-qizlar faollari hamkorligida qator amaliy choralar ko‘rilmoqda. Fuqarolarga o‘z huquq hamda manfaatlarini qonuniy himoya qilish mexanizmlari tushuntirilib, huquqiy maslahatlar berilyapti. Shuningdek, og‘ir ijtimoiy vaziyatga tushib qolgan xotin-qizlar bilan yakka tartibda suhbatlar o‘tkazilib, ularni kasb-hunarga yo‘naltirish va bandligini ta'minlashga ko‘maklashish orqali turli huquqbuzarliklarning oldi olinmoqda.

Tazyiq, zo‘ravonlik hamda firibgarlik holatlarining oldini olish, shu bilan birga, oilaviy nizolarni barvaqt hal etish maqsadida xotin-qizlarga psixologik va yuridik yordam ko‘rsatish tizimi yo‘lga qo‘yilgan. Xususan, har bir mahallada "Xonadonbay" ishlash tizimi asosida ijtimoiy himoyaga muhtoj oilalar yashaydigan xonadonlarga tashrif buyurilib, yuzma-yuz muloqot orqali muammolarga amaliy yechim izlanmoqda.

Amalga oshirilayotgan bu kabi manzilli chora-tadbirlar hududda sog‘lom ijtimoiy muhitni barqarorlashtirish, oilalar totuvligini ta’minlash hamda xotin-qizlarning xavfsiz va farovon hayot kechirishi uchun xizmat qiladi.

Respublikamiz bo‘ylab o‘tkazilayotgan «Xavfsiz va sog‘lom yurt» keng qamrovli profilaktik tadbirlari doirasida, Buxoro viloyatining Shofirkon tumanidagi 2-son politexnikumida ahamiyatli uchrashuv tashkil etildi.

Ushbu tadbirda Shofirkon tuman IIB boshlig‘i, tuman Jinoyat ishlari bo‘yicha sud raisi hamda tergov sudyasi ishtirok etdilar. Tashrifdan ko‘zlangan asosiy maqsad, yoshlar o‘rtasida jinoyatchilik va huquqbuzarliklarning oldini olish, ularning huquqiy savodxonligini oshirish hamda xavfsiz va sog‘lom muhitni mustahkamlashdan iborat edi.

Politexnikum talabalari va o‘qituvchilari bilan o‘tkazilgan «Rahbar va yoshlar uchrashuvi» ochiq va samimiy muloqot ruhida o‘tdi. Tadbir davomida talabalar o‘zlarini qiziqtirgan, jumladan, huquqiy masalalar, jinoyatchilikning oldini olish usullari, kiberjinoyatchilik xavfi, giyohvandlikka qarshi kurashish hamda yoshlarning huquq va majburiyatlari borasidagi savollarini o‘rtaga tashladilar.

Tuman IIB boshlig‘i va sud sohasi rahbarlari yoshlarning har bir savoliga amaliy misollar va amaldagi qonunchilik normalariga tayanib, atroflicha javoblar berdilar. Uchrashuvda yoshlar orasida jinoyatchilikni kamaytirish nafaqat davlat organlari, balki butun jamiyat, ayniqsa, kelajak egalari bo‘lgan yoshlarning ham mas’uliyati ekanligi ta’kidlandi.

Joriy yilning 16-mart kuni Buxoro viloyati Ichki ishlar boshqarmasida hududda xavfsiz muhitni yaratish va jamoat tartibini saqlash masalalariga bag'ishlangan kengaytirilgan videoselektor yig'ilishi bo'lib o'tdi.

Yig'ilishni viloyat IIB boshlig'i ochib berib, so'z navbatini viloyat hokimiga topshirdi. Viloyat hokimi o'z ma'ruzasida joriy yilning o'tgan 2 oy va 10 kuni mobaynida sodir etilgan jinoyatlar tahlilini shahar va tumanlar kesimida batafsil muhokama qildi. Xususan, mahallalarda sodir bo'layotgan jinoyatchilik holatlariga alohida e'tibor qaratilib, har bir shahar va tuman hokimlariga har oy yakuni bilan jinoyatchilik holatini shaxsan muhokama qilib borish vazifasi yuklatildi. Shundan so'ng tegishli mas'ullarning hisobotlari eshitildi.

Tadbir davomida viloyat prokurori so'zga chiqib, G'ijduvon tumanidagi mahallalardan birida sodir bo'lgan oila-turmush doirasidagi o'ta og'ir jinoyat xususida to'xtaldi. Ushbu holat yuzasidan o'z xizmat vazifasiga sovuqqonlik bilan yondashgan mansabdor shaxslarga nisbatan jinoyat ishi qo'zg'atilganligini alohida ta'kidladi. Shuningdek, mahalla mas'ullari tomonidan sodir etilgan boshqa qonunbuzarliklar ham tanqidiy ko'rib chiqildi.

Yig'ilish kun tartibidan raqamli xavfsizlik masalalari ham o'rin oldi. Viloyat IIB Axborot texnologiyalari sohasidagi jinoyatlarga qarshi kurashish boshqarmasi boshlig'i sohadagi jinoyatlarning oldini olish maqsadida yaratilgan maxsus tizimlar, xususan "Cybershielduz_bot" hamda boshqa tarmoq botlarining faoliyati bo'yicha taqdimot qildi. Shuningdek, kiberjinoyatlarning oldini olishda Jizzax tajribasini qo'llash va bu borada viloyat hokimining maxsus qarorini ishlab chiqish taklifi ilgari surildi. Shu bilan birga, mas'ullar tomonidan hududda raqamlashtirish jarayonlarini jadallashtirish bo'yicha taqdimot va takliflar eshitildi.

Tadbir davomida, viloyat IIB boshlig'i tomonidan yaqinlashib kelayotgan muborak "Ramazon hayiti" hamda "Navro'z" umumxalq bayramlarini ko'tarinki ruhda va xavfsiz o'tkazish, tadbirlar davomida jamoat xavfsizligini to'liq ta'minlash borasida ko'rilishi lozim bo'lgan qat'iy choralar aytib o'tildi.

Yig'ilish so'nggida viloyat hokimi tomonidan barcha mutasaddi rahbarlarga jinoyatchilikni jilovlash va aholi osoyishtaligini ta'minlash bo'yicha aniq muddatli vazifa va topshiriqlar berildi.