📄 Сяброўка Ліліі Лукашэнкі перапісала свае актывы ў Еўропе на давераную асобу. Перад гэтым беларуская бізнэсвумен перапрадала расійскую даччыную кампанію сама сабе і выплаціла сабе дывідэнды

📌 «Бюро» высветліла, што Людміла Няронская перапісала сваю кампанію ў Польшчы на давераную асобу. Да лютага 2023 года сяброўка сям’і Віктара Лукашэнкі Людміла Няронская сумесна валодала кампаніяй у Польшчы – Transexpedition Polska. Кампанія займалася лагістыкай, пастаўкамі звадкаванага вуглевадароднага газу (LPG) і чыгуначнай экспедыцыяй.

Людміла Няронская даўно звязаная з сям’ёй Віктара Лукашэнкі. Дзеці Няронскай і Лукашэнкі вучыліся разам у прэстыжнай мінскай гімназіі № 16. Дарэчы, там жа Няронская і Лілія Лукашэнка былі разам у папячыцельскім савеце. У 2019 годзе Няронская з жонкай і дзецьмі Віктара Лукашэнкі лётала на прыватным бізнэс-джэце з Мінска ў Дубай. На шляху назад да іх далучыўся і сам Віктар.

Не так даўно «Бюро» расказвала пра тое, што Людміла Няронская пачала сумесны бізнэс з сынам Віктара Лукашэнкі Аляксандрам Лукашэнкам – малодшым.

Transexpedition Polska была заснаваная ў 2019 годзе беларускім бізнэсоўцам Артурам Зубарыкам (50%) і набліжанай да сям’і Лукашэнкі бізнэсоўкай Людмілай Няронскай (50%). Узначаліла польскі актыў беларускіх бізнэсоўцаў іх суайчынніца Ганна Машэра. Да гэтага прызначэння яна працавала ў беларускай кампаніі Няронскай «Захадтрансэкспедыцыя».

📌 Мы высветлілі, што Ганна Машэра не проста супрацоўніца структур Няронскай, а сяброўка сям’і і блізкі чалавек. У яе інстаграм-акаўнце мы знайшлі ўзаемныя падпіскі з самой Людмілай Няронскай, маці Няронскай Клаўдзіяй Мінаковай і дзецьмі шлюбнай пары Няронскіх. Дочкі Няронскай і Машэры разам адпачывалі ў Італіі.

У лютым 2023 года Ганна Машэра стала адзінай уладальніцай кампаніі Transexpedition Polska. Дамоўленасці з былымі ўладальнікамі былі такія: спачатку яны заплацяць за купленую імі расійскую дачку, а потым атрымаюць дывідэнды ад польскай кампаніі.

📌 З-за санкцый Transexpedition Polska давялося пазбавіцца ад долі ў расійскай кампаніі. З 2021 года яна валодала 99,9% долі ў фірме «Грузавая служба», зарэгістраванай у Смаленску. Пасля пачатку ўварвання польская кампанія прадала яе Людміле Няронскай і Артуру Зубарыку, то бок уласным уладальнікам.

Пры гэтым нягледзячы на продаж кампаніі, Transexpedition Polska дагэтуль застаецца як «партнёр» на сайце групы кампаній «Сыравінныя рэсурсы-бел», якая належыць Людміле Няронскай і Артуру Зубарыку.

Цяперашняя ж уладальніца Transexpedition Polska Ганна Машэра працягвае развіваць бізнэс у Польшчы. У чэрвені 2025 года яна зарэгістравала новую фірму ў Беластоку – Krafttrade. Кампанія плануе займацца экспедыцыяй, лагістыкай і неспецыялізаваным гуртовым гандлем.

📌 Падрабязней пра тое, якія схемы выкарыстоўваліся па выплаце дывідэндаў і продажы расійскай кампаніі чытайце на сайце.

📌 Калі вы хочаце падтрымаць "БЮРО", то можна падпісацца на наш "Patreon". Таксама ёсць іншыя спосабы падтрымаць рэдакцыю.

👨‍👩‍👦 Увага, дзеці! Як Лукашэнка заблакаваў міжнародныя ўсынаўленні – і 200 сірот з Беларусі не аддаюць прыёмным бацькам.

Каля 200 беларускіх дзяцей чакаюць сустрэчы з італьянскімі бацькамі. Пра гэта «Бюро» паведаміла арганізацыя Associazione Adozioni Alfabeto, якая займаецца міжнароднымі ўсынаўленнямі.

Большасць гэтых беларускіх сірот, высветліла «Бюро», старэйшыя за 12 гадоў і маюць праблемы са здароўем. З прытулкаў іх не адпускаюць, таму што рэжым Лукашэнкі бачыць у іх інструмент для палітычных маніпуляцый.

📌 Што адбываецца з беларускімі сіротамі і міжнародным усынаўленнем у Беларусі – ў новым расследаванні «Бюро».

📌 Калі вы хочаце падтрымаць "БЮРО", то можна падпісацца на наш "Patreon". Таксама ёсць іншыя спосабы падтрымаць рэдакцыю.

🎧 Аудыёверсія расследавання «Бюро» @buroby "Увага, дзеці! Як Лукашэнка заблакаваў міжнародныя ўсынаўленні – і 200 сірот з Беларусі не аддаюць прыёмным бацькам".

Аудыёверсіі нашых расследаванняў дасяжны на асноўных падкаст-платформах:

📌 Youtube

📌 Youtube podcast

📌 Spotify

📌 Apple podcast

📌 Podbean

«Кашалькі» Лукашэнкі працягваюць будаваць «Мінск-Свет» нягледзячы на санкцыі. Каб пазбегнуць праблем, сербскія бізнэсоўцы Карычы аформілі новыя кампаніі на блізкага сябра

Сербскія бізнэсоўцы Карычы стварылі сетку кампаній, каб працягнуць будаўніцтва буйнога шматфункцыянальнага комплексу «Мінск-Свет» пасля таго, як замоўца праекта – кампанія «Дана Астра» – падпала пад еўрапейскія санкцыі.

📌 Увесну 2021 года ў Мінску былі зарэгістраваныя чатыры новыя фірмы: «Луксуда», «Дубай Інвестмент», «Гранд Атрыум Дэвелапмент» і «Джы Файв Канстракшн». «Бюро» высветліла, што за ўсімі гэтымі фірмамі стаіць бізнэсовец Мустафа аль-Тобгі. Гэты 44-гадовы брытанскі падданы – блізкі сябар сям’і Карычаў.

Сербскія бізнэсоўцы Карычы і іхныя актывы аднымі з першых падпалі пад заходнія санкцыі за сувязі з рэжымам Аляксандра Лукашэнкі. У снежні 2020 года ЕС уключыў у «чорны спіс» беларускія кампаніі «Дана Астра» і «Дана Холдынгз».

У жніўні 2021 года да санкцый ЕС далучыліся ЗША, абвясціўшы Карычаў будаўнічымі «кашалькамі Лукашэнкі». Пад амерыканскія абмежаванні падпалі беларускія кампаніі «Дана Астра», «Эмірэйтс Блю Скай» і «Дубай Вотэр Фронт», а таксама кіпрская кампанія Dana Holdings і яе былы бенефіцыяр Небайша Карыч. У чэрвені 2022 года ЕС увёў санкцыі супраць Багалюба Карыча, бацькі Небайшы Карыча.

📌 Але сербскае сямейства зрабіла захады на апярэджанне за два тыдні да ўвядзення самых першых абмежаванняў. У снежні 2020 года беларускія бізнэсы Карычаў адышлі пад кантроль таго самага Мустафы аль-Тобгі, а бенефіцыярам кіпрскай фірмы Dana Holdings стаў яшчэ адзін сябар сербскіх бізнэсоўцаў – Нагіп Бехлулі.

Карычы абскардзілі еўрапейскія санкцыі ў судзе, але не дасягнулі поспеху. У ЗША сітуацыя склалася іначай.

📌 У жніўні амерыканскае Міністэрства фінансаў зняло абмежаванні з кіпрскай кампаніі Dana Holdings і Небайшы Карыча. Выявілася, што ў чэрвені гэтага года кіпрская фірма Dana Holdings была ліквідаваная, што магло паслужыць падставай для выключэння яе з «чорнага спіса». Чаму знялі санкцыі з Небайшы Карыча, не зусім зразумела.

«Сіла і цэласнасць нашых санкцый залежаць ад нашай здольнасці ўключаць людзей у адмысловы спіс, але таксама і ад нашай гатоўнасці выключаць людзей з гэтага спіса, бо канчатковай мэтай санкцый з’яўляецца не пакаранне, а змена паводзінаў і заахвочванне адказнасці», – патлумачыў «Бюро» амерыканскі чыноўнік.

📌 Беларускія кампаніі «Дана Астра», «Эмірэйтс Блю Скай» і «Дубай Вотэр Фронт» застаюцца пад амерыканскімі санкцыямі. У кастрычніку 2023 года «Дубай Вотэр Фронт» перайменавалі ў «Аркора Дэвелапмент», а «Эмірэйтс Блю Скай» – у «Лайбрары Лэйн». Першая кампанія пабудавала ў Мінску жылыя комплексы «Чайкоўскі» і «Вівальдзі», а таксама бізнэс-цэнтр Capital Palace на Кастрычніцкай плошчы. Другая – жылыя комплексы «Маяк Мінска» і «Парк Чалюскінцаў», а таксама гандлёва-забаўляльны цэнтр Dana Mall.

Мы накіравалі запыты Багалюбу Карычу і прадстаўнікам сербскага сямейства, але не атрымалі адказу.

Цалкам чытайце на сайце

Хто купляе кнігу пра Аляксандра Лукашэнку? Міністэрствы, сілавыя ведамствы і навучальныя ўстановы.

Дакументальна-біяграфічны нарыс пра Лукашэнку «Наш прэзідэнт» прэзентавалі ў студзені 2025 года. Аўтарская група гэтага жыццяпісу – прапагандысты: Аляксандр Радзькоў, Наталля Эйсмант, Уладзімір Пярцоў і Аляксандр Карлюкевіч.

Неўзабаве пасля выхаду кнігі, прапаганда рапартавала, што ўвесь наклад раскуплены і ўжо рыхтуецца новы. «Бюро» вывучыла дадзеныя дзяржаўных закупак і высветліла, што біяграфію Аляксандра Лукашэнкі «Наш прэзідэнт» масава закупляюць беларускія дзяржаўныя органы.

📌 Згодна з тэндарнай дакументацыяй, са студзеня па кастрычнік 2025 года дзяржаўныя ўстановы ва ўсёй краіне набылі прыкладна 1,3 тысячы асобнікаў жыццяпісу Лукашэнкі амаль на 260 тысяч беларускіх рублёў (каля 75 тысяч еўра). Крыніца фінансавання – бюджэтныя сродкі.

Напрыклад, абсалютны лідар дзяржаўных закупак – цэнтры па забеспячэнні дзейнасці бюджэтных арганізацый: сукупна 45 установаў ва ўсёй краіне закупілі 623 біяграфіі Лукашэнкі. Яшчэ 247 экзэмпляраў набылі абласныя выканкамы і іх падраздзяленні.

Агульным лікам 132 кнігі пра Лукашэнку купілі сілавыя ведамствы: Генеральная пракуратура, Следчы і Мытны камітэты, дэпартамент выканання пакаранняў МУС, вайсковыя часткі і іншыя.

Падобна, што біяграфія Лукашэнкі карыстаецца попытам дзякуючы загаду зверху – масава закупляць «усенародны бэстсэлер» дзяржаўным органам і ўстановам. А фінансуюць яго «папулярнасць» падаткаплатнікі.

📌 Цалкам чытайце на сайце

Калі вы хочаце падтрымаць "БЮРО", то можна падпісацца на наш "Patreon". Таксама ёсць іншыя спосабы падтрымаць рэдакцыю.

🏆 Алімпійскія «рэзервы». Колькі атрымлівае кіраўніцтва НАК

«Бюро» высветліла, якую налічаную заработную плату атрымліваюць намеснікі Віктара Лукашэнкі ў Нацыянальным алімпійскім камітэце (НАК) – Дзмітрый Даўгалёнак і Ксенія Санковіч.

📌 Дзмітрый Даўгалёнак – віцэ-прэзідэнт НАК са студзеня 2025 года. Гэтую пасаду ён сумяшчае з пазіцыяй начальніка аддзела па развіцці алімпійскага руху НАК.

За 9 месяцаў 2024 года яму сукупна налічылі крыху больш за 91 тысячу беларускіх рублёў. Яго сярэдняя заработная плата да выліку падаткаў і ўнёскаў у ФСАН за месяц склала 10,1 тысячы беларускіх рублёў, або прыкладна 2,9 тысячы еўра.

📌 Ксенія Санковіч працуе генеральным сакратаром НАК з 2024 года. У алімпійскім спорткамітэце экс-фаварытка Аляксандра Лукашэнкі працуе аж з 2015 года. Да таго як заняць пасаду генсакратара, Санковіч адказвала ў НАК за міжнародныя дачыненні. Акрамя таго, яна дагэтуль застаецца сябрам камісій «Жанчыны і спорт».

У 2024 годзе Санковіч за 9 месяцаў сумарна налічылі 91,5 тысячы беларускіх рублёў да выліку падаткаў і ўнёскаў у ФСАН. Яе сярэдні «брудны» штомесячны аклад склаў амаль 10,2 тысячы беларускіх рублёў, або 2,9 тысячы еўра.

📌 Цалкам чытайце на сайце

Нагадаем, нядаўна мы расказвалі пра зарплату ў НАК і самога Віктара Лукашэнкі. За 9 месяцаў 2024 года яму налічылі прыкладна 97 тысяч беларускіх рублёў брута.

📌 Калі вы хочаце падтрымаць "БЮРО", то можна падпісацца на наш "Patreon". Таксама ёсць іншыя спосабы падтрымаць рэдакцыю.

🎈Кантрабанда на шарах. Толькі паветранымі шарамі ў Літву даставілі каля мільёна пачкаў цыгарэт з Беларусі

Жорсткія захады на мяжы вымусілі кантрабандыстаў шукаць новыя спосабы дастаўкі цыгарэт у Літву. Хіт сезону – кантрабанда на метэаралагічных шарах. «Бюро» разам з калегамі з LRT разбіралася, як уладкаваны гэты нелегальны бізнэс.

📌 Сёлета літоўскія мытнікі і памежнікі затрымалі больш як шэсць мільёнаў пачкаў цыгарэт з беларускімі акцызнымі маркамі. Гэта амаль удвая больш, чым за ўвесь мінулы год.

Кантрабандысты хаваюць вялікія партыі цыгарэт у грузавіках і чыгуначных вагонах. У якасці тавараў прыкрыцця выкарыстоўваюцца харчовыя прадукты (агуркі, перцы, рыбныя кансервы), тавары для дома (цеплаізаляцыйныя матэрыялы, кандыцыянеры) і будаўнічыя матэрыялы (друз).

На фоне міграцыйнага крызісу Літва пабудавала агароджу на мяжы з Беларуссю і закрыла чатыры з шасці пунктаў пропуску для барацьбы з кантрабандай і абыходам санкцый. Літоўская мытня ўзмоцнена правярае кожны аўтамабіль. У такіх умовах кантрабандысты шукаюць новыя маршруты і спосабы дастаўкі цыгарэт праз мяжу.

📌 Сёлета літоўскія памежнікі перахапілі каля 550 метэазондаў і 50 дронаў з кантрабандай з Беларусі. Канфіскавана больш як 890 тысяч пачкаў цыгарэт.

Метэазонды залятаюць у паветраную прастору Літвы, дзе курсіруюць самалёты. З-за гэтага некалькі разоў прыпыняў працу вільнюскі аэрапорт. Літоўскі прэзідэнт Гітанас Наўседа назваў прылёты кантрабандных шароў «беспрэцэдэнтнай гібрыднай атакай супраць Літвы». У адказ літоўскі ўрад цалкам закрыў мяжу з Беларуссю да канца лістапада.

Каб зразумець, як працуюць кантрабандысты, мы разам з партнёрамі з LRT вывучылі афіцыйныя зводкі і судовыя дакументы, пагаварылі з афіцыйнымі і ананімнымі крыніцамі.

📌 Кантрабандысцкая супольнасць – закрыты калектыў. Каб патрапіць туды, трэба круціцца ў пэўных колах. Адны маюць выхад на тытунёвую фабрыку, дзе можна набыць вялікую партыю цыгарэт. Іншыя шукаюць магчымасці, каб пераправіць гэты тавар праз мяжу. Трэція знаходзяць знаёмых, якія прададуць цыгаркі ў той жа Літве і перададуць грошы ў Беларусь.

«Ланцужок склаўся, і паехалі працаваць. Гэта свая супольнасць, свой калектыў. Проста ў гэтым таварыстве трэба мець зносіны і там круціцца. Цябе проста павінны ведаць. Кожны шукае свой пралаз як адправіць – хто шарамі, хто цягнікамі, хто машынамі, хто па блоку праз мяжу вязе. Людзі стараюцца зарабіць грошай», – расказаў «Бюро» былы кантрабандыст.

Усяго ў гэтым годзе літоўскія пагранічнікі затрымалі больш за 100 чалавек, падазраваных у кантрабандзе. Некаторыя затрыманыя атрымалі турэмныя тэрміны, а некаторыя – вялізныя штрафы.

«Што да беларускага боку, то мы можам сказаць толькі тое, што ў прыгранічнай зоне на тым баку без дазволу памежнікаў і іншых структур ніхто не мог бы ажыццяўляць такую дзейнасць. Іх бы затрымалі і закрылі», – зазначыў намеснік кіраўніка САДМ Антанас Монтвідас.

📌 Як арганізаваная нелегальная дастаўка цыгарэт з Беларусі ў Літву чытайце ў сумесным расследаванні «Бюро» і LRT

Рэха вайны. Хто забяспечвае дронамі войскі Карпянкова? Малазаўважная кампанія «Хобі-Парк» стала асноўным пастаўшчыком беспілотнікаў для ўнутраных войскаў і іншых сілавых ведамстваў

📌 Унутраныя войскі пад камандаваннем генерал-маёра Мікалая Карпянкова закупілі больш за 80 дронаў за апошнія два ў паловай гады. На гэта з бюджэту патрачана 215 тысяч рублёў.

Ва ўсіх брыгадах і асобных батальёнах унутраных войскаў створаныя падраздзяленні спецыяльнага прызначэння па выкарыстанні беспілотных лятальных апаратаў. Іх ужывалі на вучэннях – аператары па кіраванні дронамі навучаныя весці разведку і кідаць бомбы.

📌 У сярэдзіне сакавіка 2023 года на ўзбраенні ўнутраных войскаў было звыш 100 дронаў – разведвальных і разведвальна-ўдарных. З мая 2023 года, згодна са звесткамі электроннай гандлёвай пляцоўкі, для ўнутраных войскаў закупілі яшчэ як мінімум 81 беспілотны лятальны апарат.

Больш за ўсё дронаў закупіў беларускі спецназ – вайсковая частка 3214, што базуецца ў мінскім мікрараёне Уручча. Яе вайскоўцы душылі мірныя пратэсты ў Беларусі ў 2020 годзе. Для іх набылі 21 беспілотнік за 34 тысячы рублёў.

📌 Усе дроны для ўнутраных войскаў набывалі паводле працэдуры закупкі з адной крыніцы, якая лічыцца больш простым і неканкурэнтным спосабам выбару пераможцы. 14 з 15 тэндараў выйграла кампанія «Хобі-Парк».

Камандуючы ўнутранымі войскамі Мікалай Карпянкоў асабіста развозіў дроны па раённых аддзелах міліцыі ў Хойніках, Лоеве, Ельску, Нароўлі, Брагіне і Мазыры для навучання атрадаў народнага апалчэння. Прычым у паведамленнях прэс-службы ўнутраных войскаў падкрэслівалася, што гэта менавіта беспілотнікі ад «Хобі-Парка».

Кампанія таксама называлася ў ліку пастаянных памочнікаў вайскова-патрыятычных клубаў, створаных паводле рашэння Карпянкова. У лістападзе мінулага года ён перадаў вайскова-патрыятычнаму клубу «Рысь-Нароўля» тры квадракоптары ад «Хобі-Парка».

📌 Падрабязней пра «Хобі-Парк» і сувязі з сілавікамі чытайце на сайце «Бюро».

📌 Калі вы хочаце падтрымаць "БЮРО", то можна падпісацца на наш "Patreon". Таксама ёсць іншыя спосабы падтрымаць рэдакцыю.

🧴Скандальны функцыянер і сенатар Баскаў заходзіць на рынак рытэйлу. У планах – сетка крамаў ва ўсёй краіне

Паводле звестак «Бюро», Дзмітрыю Баскаву належыць 50% фірмы «ДНЦ-Маркет», яшчэ 50% – у малавядомага бізнэсоўца Анатоля Прыгодзіча. Юрыдычная асоба зарэгістраваная ў лютым 2025 года ў Жодзіне.

📌 У планах «ДНЦ-Маркета» запусціць сетку ва ўсёй краіне. На дадзены момант адкрыліся дзве кропкі – у Мінску і Жодзіне, але кампанія ўжо наймае персанал «у сувязі з адкрыццём новых крамаў сеткі» ў Гродне, Пінску, Баранавічах, Бярозе і Маладзечне.

Мяркуючы па ўсім, экспансія новай сеткі ідзе і праз памяшканні, дзе раней працаваў «Востраў чысціні і смаку». Адрас мінскай кропкі супадае з адрасам адной з былых крамаў сеткі.

📌 Адзін з трымальнікаў кропак сеткі «Востраў чысціні і смаку» – кампанія «ПрадХімМаркет» – у маі 2024 года перайшла да Анатоля Прыгодзіча, цяперашняга партнёра Баскава. Дзякуючы «Кіберпартызанам» мы здолелі даведацца, што Анатоль Прыгодзіч каля дзесяці гадоў прапрацаваў на розных пасадах у структурах групы кампаній «Ромакс», былых уладальнікаў сеткі «Востраў чысціні і смаку».

Падрабязней чытайце на сайце: https://buromedia.io/be/news/skandalnyy-funkcioner-i-senator-baskov-zakhodit-na-rynok-riteyla

Санкцыямі па шкле. Як для Лукашэнкі пабудавалі новы завод з еўрапейскім абсталяваннем у абыход санкцый

Гродзенскія шкляры здольныя ствараць цуды, калі трэба дагадзіць Аляксандру Лукашэнку. За два з паловай гады пабудавалі новы завод і абуладкавалі яго сучасным еўрапейскім абсталяваннем. Як гэтае абсталяванне трапіла ў Беларусь ва ўмовах санкцый, шырокай публіцы не паведамілі.

«Бюро» сумесна з выданнямі IrpiMedia і Siena раскрывае таямніцы маштабнага праекта, завершанага толькі за кошт абкатаных кантрабандных схем.

Мы здабылі звесткі і дакументы, якія разкрываюць схемы паставак падсанкцыйнага абсталявання ў Беларусь. Як усё адбывалася?

Чытайце ў новым расследаванні «Бюро» — «Санкцыямі па шкле».

🎧 Аудыёверсія расследавання «Бюро» @buroby "Санкцыямі па шкле. Як для Лукашэнкі пабудавалі новы завод, абуладкаваўшы еўрапейскім абсталяваннем у абыход санкцый".

Аудыёверсіі нашых расследаванняў дасяжны на асноўных падкаст-платформах:

📌 Youtube

📌 Youtube podcast

📌 Spotify

📌 Apple podcast

📌 Podbean