Ҳукумат босими остида бўлган журналист Давлат Назар машина уриши оқибатида ҳалок бўлди

Хоразмдаги оғриқли мавзуларни ёритиб келган журналист Давлатназар Рўзметов (Давлат Назар) 6 ноябрь оқшомида машина уриб кетиши оқибатида ҳалок бўлди.

Бош прокуратура журналист Рўзметовни йўлни кесиб ўтаётганида "Газель" машинаси уриб юборгани ҳақида ёзди.

48 яшар Давлат Назар кейинги икки йил ичида танқидий қарашлари сабаб бир неча бор ҳибсга олинган.

Озодлик билан яқин ҳамкорлик қилиб келган Давлат Назар кейинги пайтда мунтазам кузатувда экани ҳақида айтганди.

Мудҳиш хабар

Танқидий мақолалари ва мухолиф қарашлари билан танилган, кейинги икки йил давомида бир неча бор ҳибсга олинган журналист Давлат Назар 6 ноябрь куни ярим тунда машина уриб кетиши оқибатида ҳалок бўлди.

Журналист яқинларига кўра, давлат Назарнинг жанозаси у истиқомат қилган Қўшкўпир туманида 7 ноябрь куни соат 15.00 да ўқилди.

Мобил мухбир сифатида Хоразмдаги оғриқли мавзуларни ёритишда Озодлик билан яқиндан ҳамкорлик қилиб келган Давлат Назар кейинги пайтда мунтазам кузатувда экани ҳақида айтганди:

- Уйдан чиқа олмай ўтирибман. Кўчанинг икки томонида икки поспон ўтирибди, деганди жумладан 12 октябрь куни Давлат Назар Озодлик билан суҳбатда.

Расмий баёнот

Ўзбекистон Бош прокуратураси журналист Давлат Назар "автоҳалокат қурбони бўлгани" ҳақида зудлик билан расмий маълумот эълон қилди:

"2019 йил 06 ноябрь куни соат 23:55 ларда фуқаро С.У. ўзи ишлаб келаётган корхонасига тегишли бўлган “Газель” русумли автомашинани “Урганч-Хива” йўлининг 4-километрида бошқариб бораётганида, йўлни кесиб ўтаётган “Жамият” газетаси мухбири Давлатназар Рўзметовни уриб юборган.

Натижада Д.Рўзметов бош қисмидан жароҳат олиб, воқеа жойида вафот этган".

Бош прокуратура маълумотига кўра, журналист ўлими бўйича Урганч тумани ИИБ томонидан терговга қадар текширув ҳаракатлари олиб борилмоқда.

Расмий ҳамдардлик

Президент Администрацияси ҳузуридаги Ахборот ва оммавий коммуникациялар агентлиги директори Комил Алламжонов​ ўзининг Фейсбук саҳифаси орқали Давлат Назар ўлими юзасидан ҳамдардлик пости ёзиб қолдирди:

«Жамият» газетасининг Хоразм вилояти мухбири, таниқли журналист Давлатназар Рўзметов бахтсиз ҳодиса туфайли бевақт вафот этди.

Агентлигимиз номидан марҳум журналистнинг яқинлари ва оила аъзоларига ҳамдардлик билдирамиз.

Ҳибс ва қамоқлар

Давлат Назар тахаллуси билан ижод қилган қўшкўпирлик 48 яшар Давлатназар Рўзметов олдин “Ёшлар овози” газетасининг Хоразм вилояти бўйича мухбири бўлган.

Кейинчалик у “Хоразм ёшлари” газетасида фаолият юритди.

Сўнгги пайтда "Жамият" ижтимоий-сиёсий газетаси​ мухбири сифатида Давлат Назар фаолият юритган.

У ўзининг Фейсбукдаги саҳифасида Ўзбекистонда бўлаётган воқеаларга фаол фикр билдириши билан ҳам машҳур эди.

Давлат Назар танқидий мақолалари ва мухолиф қарашлари сабаб кейинги икки йил ичида бир неча бор қамоққа ташланди.

Жорий йилнинг 5 октябрь куни пахтада мажбурий меҳнат масаласини ёритиб келган Давлат Назар ҳибсга олиниб, Урганч милиция бўлинмасида беш соат ушлаб турилгач қўйиб юборилди.​

милиция бўлимида беш соат ушлаб турилган
Ўтган йилнинг 29 октябрь куни "Хоразм ёшлари" газетаси муҳаррирининг ўринбосари сифатида ишлаётган пайтида Давлат Назар пахтага оид йиғилишни ёритмоқчи бўлгани учун ҳибсга олинди.

Қўшкўпир туман ҳокимлигининг пахта бўйича йиғилишини видеотасвирга олаётган пайтда олиб кетилган Давлат Назарни суд майда безориликда айблаб, 7 суткага қамади.

Ўша пайтда журналист Давлат Назар милиция ходимлари уни калтаклаб, мажбуран иқрорнома ёздириб олишгани ҳақида гапирганди.

https://t.me/bugunuz/28113

Ўзбек ҳукумати босими остида бўлган журналистни машина босиб ўлдирди

Танқидий мақолалари ва мухолиф қарашлари билан танилган, кейинги икки йил давомида бир неча бор ҳибсга олинган журналист Давлат Назар 6 ноябрь куни ярим тунда машина уриб кетиши оқибатида ҳалок бўлди. Давлат Назарнинг жанозаси у истиқомат қилган Қўшкўпир туманида 7 ноябрь куни соат 15.00 да ўқилди.

BUGUNUZ kanali - tezkor va eksklyuziv

Cенатор Светлана Ортиқова Бош прокурор ўринбосари этиб тайинланди

BUGUNUZ kanali - tezkor va eksklyuziv

Daryo.uz сайтининг ўз манбаларига таяниб хабар беришича, Ўзбекистон сенати раисининг ўринбосари Светлана Ортиқова мамлакат бош прокурори ўринбосари этиб тайинланди.

Светлана Ортиқова 1962 йил 1 январда Наманган вилоятининг Учқўрғон туманида туғилган.

1987 йилда Тошкент давлат университети юридик факультетини тамомлаган.

Светлана Ортиқова кўп йиллар прокуратура тизимида фаолият юритган.

2014 йилда у Ўзбекистон Марказий сайлов комиссияси раиси ўринбосари лавозимида ишлаб, айни йили парламент сайловини уюштиришда бош-қош бўлди.

2015 йилдан 2019 йилга қадар Сенатга раислик қилган Ниғматилла Йўлдошевга ўринбосарлик қилди.

Ниғматилла Йўлдошев 2019 йил июнидан бери Ўзбекистон бош прокурори этиб тайинланган эди.

Мирзиёев МДҲ мамлакатлари махсус хизматлари раҳбарлари билан учрашди

Президент Шавкат Мирзиёев 7 ноябрь куни Мустақил Давлатлар Ҳамдўстлиги (МДҲ) хавфсизлик органлари ва махсус хизматлари раҳбарлари кенгашининг Тошкентдаги йиғилишида иштирок этадиган делегация бошлиқларини қабул қилди.

Бу ҳақда президент матбуот хизмати хабар берди.

Хабарга кўра, учрашув пайтида Шавкат Мирзиёев мамлакати МДҲ доирасида "замонавий таҳдид ва хатарларга қарши кураш борасидаги ҳамкорликни кенгайтиришга муҳим аҳамият қаратилаётганини" айтган.

"Ташкилотга аъзо давлатлар махсус хизматлари ўртасидаги яқин ҳамкорликни давом эттириш, шу жумладан тезкор ахборот алмашиш ҳамда терроризм, экстремизм, наркотрафик ва уюшган жиноятчиликни бартараф этиш бўйича қўшма тадбирлар ўтказиш зарурлигига алоҳида эътибор қаратилди," дейилади Ўзбекистон президенти матбуот хизмати хабарида.

Шавкат Мирзиёев ва МДҲга аъзо давлатлар махсус хизматларининг учрашуви Тошкентда хавфсизлик органлари кенгашининг навбатдаги 47-йиғилиши рамкасида бўлиб ўтди.

Учрашув пайтида "кибержиноятчиликка қарши курашда, интернет ва бошқа ахборот-коммуникация технологияларидан зўравонлик ва радикал қарашларни тарғиб қилиш мақсадида фойдаланишга чек қўйиш борасида саъй-ҳаракатларни бирлаштириш муҳимлиги таъкидланди," дея таъкидланади хабарда.

https://t.me/bugunuz/28117

Жерар Депардье: «Ўзбекистон мусулмон дунёси учун инсонпарварлик ривожланиш моделининг пойдеворини қўймоқда»

Гулнора Каримова билан қўшиқ айтган Жерар Депардье яна Ўзбекистонга келди. Бу сафар у Ўзбекистон ҳақидаги ҳужжатли фильмни суратга олиш жараёнида иштирок этади. Бугун актёр Ислом цивилизацияси маркази қурилиш жараёнлари билан танишди.

«Мен ушбу марказни барпо этиш ташаббуси билан чиққан мамлакатингиз президенти Шавкат Мирзиёевнинг ушбу ёндашувига қўшиламан... Бугунги кунда кўплаб экспертларнинг таъкидлашича, Ўзбекистон мусулмон дунёси учун инсонпарварлик ривожланиш моделининг пойдеворини қўймоқда»

Жерар Депардье постсовет ҳудуди диктаторлари билан яқин алоқаларга эга шахс саналади.

2012 йили ўшандаги президентнинг тўнғич қизи Гулнора Каримова таклифига мувофиқ Ўзбекистонга борган Депардье Каримова ëзгани айтилган қўшиқни у билан бирга куйлаган эди.

Депардье¸ шунингдек¸ Чеченистоннинг инсон ҳақларини мунтазам топтаб келаëтган президенти Рамзан Қодиров таклифи билан 2013 йили Грознийга бориб¸ ундан квартира совғасини олган.

Айни йили Владимир Путин унга Россия фуқаролигини ҳадя қилган эди.

Фото: Ўзбеккино

https://t.me/bugunuz/28119

Экология расмийлари “бирни кессанг, ўнни эк” маталига амал қилишмоқчи

Тошкентда куз охиригача кесишга рухсат берилган 4955 туп соғлом дарахт ўрнига товон ўлароқ 55 минг туп чинор, эман ва шумтол экилади. Бу ҳақда шаҳар экология ва атроф-муҳитни муҳофаза қилиш бошқармаси бошлиғи Нодиржон Юсупов чоршанба куни бўлиб ўтган брифингда маълум қилди, дея хабар қилади Газета.уз.

Мулозимга кўра, пойтахтни кўкаламзорлаштириш ва ободонлаштириш ишида иштирок этиш истагини билдирган ташкилотлар кўпайиб кетгани учун экиладиган кўчатлар сони 100 минг тупга ҳам етиши мумкин.

Юсупов 1 ноябрдан қимматбаҳо дарахт навларини кесишга мораторий эълон қилинганига тўхталар экан, Фанлар академияси мутахассислари қимматбаҳо дарахт навлари рўйхатини кенгайтирганини, ҳозир бу рўйхат тасдиқланиши кутилаётганини билдирди.

BUGUNUZ kanali - tezkor va eksklyuziv

7.11.2019

📣 Бугунги дастуримизда: 📣

✅ Ҳукумат босими оcтида қолаётган хоразмлик журналист Давлат Назар автоҳалокатда ўлди.

✅ Самарқанддаги қурилиш майдонида ўзбек ва турк қурувчилари ўртасида катта жанжал чиқди.

✅ Ишдан олинган “Нархоз” ректори жиноят иши фигурантига айланди.

✅ Ғойиб бўлган туркман доктори Қосимберди Гараев озодликка чиқди, яқинларидан кечирим сўради.

✅ Cенатор Светлана Ортиқова Бош прокурор ўринбосари этиб тайинланди.

✅ Мирзиёев МДҲ мамлакатлари махсус хизматлари раҳбарлари билан учрашди.



🎧 Бу ва бошқа мавзудаги хабар ва лавҳаларни тинглаш учун қуйидаги аудиони юклаб олинг!


https://t.me/bugunuz/28124

Ўзбек олигархи Москвада ҳафтасига 10 муҳожирга тиббий ёрдам кўрсата бошлади

Москвада муҳожирлар ва қочқинлар учун бепул тиббий ёрдам хизмати ташкил этилди. Фаттоҳ Шодиев халқаро жамғармаси ва Рус православ черкови моддий кўмагида ташкил этилгани айтилаётган тиббий ёрдам олдиндан тузилган рўйхат асосида кўрсатилади.

Бироқ, хизматни кўрсатаётган Авлиё Алексий Марказий клиник шифохонаси маъмурияти тиббий ёрдамдан ҳафтасига 10 кишидан ортиқ одам фойдалана олмаслигини Озодликка билдирди.

Россиядаги айрим оммавий ахборот воситаларида Москвада “Рядом дом” Мигрантлар ва қочқинларга кўмаклашиш маркази ва Авлиё Алексий Марказий клиник шифохонаси ҳамкорлигида ёрдамга муҳтож хорижлик гражданлар учун бепул тиббий ёрдам кўрсатиш хизмати йўлга қўйилгани эълон қилинди.

“Фарғона.ру” нашри хабарига кўра, шифохонада умумий амалиёт врачи қабули ва диагностика хизмати кўрсатилади.

Бу хайрия лойиҳаси Фаттоҳ Шодиев халқаро жамғармаси ва Рус православ черкови моддий кўмаги эвазига амалга оширилади.

Тиббий ёрдам хориж гражданлари бўлган мигрантлар, қочқинлар, уй-жойсиз қолган одамларга кўрсатилиши ҳам белгиланди.

Шодиев халқаро жамғармасидан янги лойиҳа тўғрисида қўшимча маълумот олиш имкони бўлмади.

Озодлик Авлиё Алексий шифохонаси ходимларидан бундай хизмат ҳақиқатан кўрсатилаётгани, фақат ундан саноқли одамларгина фойдалана олиши мумкинлигини билдирдилар.

- Ҳақиқатан, бепул хизмат кўрсатаяпди терапевтимиз. Болалар ва катта ёшдагиларга чекловларсиз. Фақат одам сони бўйича чеклов бор: ҳафтасига икки кун 5 кишидангина қабул қилишимиз мумкин, холос. Олдиндан телефон орқали ёзилиш зарур. Сиз бу хабарни бутун Ўзбекистонга тарқатмоқчимисиз? Кераги йўқ бутун Ўзбекистонни бизга юбориш – кимга ёрдамимиз зарур бўлса бизни топиб олади, деди бепул хизмат ҳақида хабарни тарқатмасликни сўраган шифохона навбатчиси.

Ўзини Евгения деб таништирган ходима Озодлик Радиоси орқали тарқатилган бу хабар “рўйхатга ёзила олмаган, аммо ёрдамга муҳтож бўлган мигрантлар ҳафсаласини пир қилиши” мумкинлигидан огоҳлантирди.

Озодлик билан суҳбатлашган Авлиё Алексий клиникаси ходимаси 6 ва 7 ноябрь кунлари бу лойиҳа асосида биринчи мурожаат қилганларга ёрдам кўрсатилганини қўшимча қилди.

У тиббий ёрдам сўраб келаётган ва суғурта полисига эга бўлмаган хориж гражданларига кўрикдан ўтиш учун паспортдан бошқа ҳужжат зарур эмас, деди.

Шифохона врачи чекловлар масаласида саволларимизга муассаса референтлари ё котибияти жавоб беришини айтди.

Тиббий ёрдамга муҳтож муҳожирлар ва қочқинлар ҳафтанинг иш кунлари давомида соат 08:30дан 16:30гача +7(495)952-11-41 рақамли телефон орқали рўйхатга ёзилишлари мумкинлиги, клиникада берилган йўриқнома ёрдамида эса улар Москванинг 64-шифохонасида ҳафтанинг чоршанба ва пайшанба кунлари кўрикдан ўтишлари мумкинлиги маълум қилинди.

2018 йилда иш бошлаган “Рядом дом” Мигрантлар ва қочқинларга кўмаклашиш маркази мигрантлар ва қочқинлар фарзандларига бепул рус тилини ўргатиб, уларга логопед хизматини ҳам кўрсатиб келади.

Россия Мигрантлар федерацияси расмий маълумотига кўра, ўтган 2018 йил давомида Россияга расман 3,5 миллион ўзбекистонлик кириб келган.

Улар ва нолегал ҳолатда қолаётган бошқа ўзбекларнинг энг катта қисми Москва ва Санкт-Петербург мегаполисларида ўрнашиб қолмоқда.

https://t.me/bugunuz/28125

OzodLive: Журналист Д. Назарнинг шубҳали ўлими, Божхона Каримов даврига қайтадими, "неомустамлака"га қарши чопонлар

Ҳукумат босими остида қолган журналист автоҳалокатда ўлди. Мирзиёев чегарадаги аввалги чекловларни қайтармоқчи. Совет мустамлакасини қоралаган рассом кўргазмасидаги чопонлар. Ozodlive дастурининг бугунги сонида ана шу мавзулардаги экскюзив лавҳалар билан танишасиз. Бугун 7 ноябрь куни Тошкент вақти билан соат 22.00да Озодликнинг Facebook ва YouTube саҳифаларида томоша қилинг.

BUGUNUZ kanali - tezkor va eksklyuziv

@sizdantelegram Ҳайдовчи, транспорт вазирлиги инспектори ва унинг холиси ўртасидаги жанжал. Ким ҳақ, ким ноҳақ? – Хулоса чиқариш ва изоҳ ёзиш сиздан

STга йўлланган видеода Транспорт вазирлиги инспектори, холиснинг сўзларига асосланиб, ҳайдовчини йўловчига лицензиясиз пуллик хизмат кўрсатганликда айблагани акс этган. Аммо, ҳайдовчи видеодаги холиснинг доим инспектор ёнида юришини айтиб, вазирлик ходими ҳолатни исботла олмай, унга туҳмат қилаётганини иддао қилади. Холис нима дейди? Исбот борми?

Халқаро юк ташувчилар Қозоғистондан ўтиш муаммосида Мирзиëевга мурожаат қилди (ВИДЕО)

Президент Шавкат Мирзиëевга қилган видеомурожаатида андижонлик Сардорбек Мадумаров ўзининг Россия¸ Украина¸Молдова¸ Беларус¸ Литва¸ Польша каби давлатларга юк ташувчи ўзбекистонликлар номидан гапираëтганини айтади.

Озодликка 7 ноябрь куни юборилган мурожаатда Мадумаров¸ бу давлатларга юк ташишнинг Қозоғистон ҳудудидан ўтиши ва транзит муаммоси ўзи ва касбдошларини қаттиқ қийнаëтганини тушунтиради.

Қиш мавсумида Қозоғистон чўлларидан беш кун ичида ўтиб бўлмаслигини айтган ҳайдовчи¸ Ўзбекистон Транспорт вазирлиги ва Президент порталини муаммога ечим сўраб қилинган мурожаатларни жавобсиз қолдирганликда айблайди.

Ўзбекистон Транспорт вазирлиги¸ Халқаро юк ташувчилар ассоциациясининг Ўзбекистондаги намояндалари Озодликнинг бу видеомурожаатга муносабат билдириш сўровини жавобсиз қолдирди.

Қозоғистон Транспорт қўмитаси расмийлари эса ўзбекистонлик юк ташувчиларнинг мамлакат ҳудудидаги транзити Ички ишлар вазирлигининг Миграция хизмати томонидан белгиланган тартибда амалга оширилаëтганини билдирди.

Президентга видеомурожаат

Ўзини Андижон вилояти Бўз туманида яшовчи юк машинаси ҳайдовчиси Сардорбек Мадумаров деб таништирган ëш йигит президент Миризëевга “Ўзбекистондаги жамики халқаро юк ташувчи шофëрлар номидан гапираëтганини”айтади.

“Ҳозирги кунда бизни қийнаëтган муаммолардан бири¸ мана ҳозир Қозоғистонда катта қор ëғиб¸ йўллар бекилиб қолди¸ йўллар музлама. Қозоғистон миграционний картага¸ яъни Қозоғистоннинг бу бошидан у бошигача ўтиб кетишимиз учун бизга срок қўяяпти. Бу срок беш кун. Йўлда ҳар хил ҳолат бўлади¸ беш кун муддат умуман етмаяпти шофëерларга. Ҳозирги кунда мана йўл бекилиб 6-7 кун қолиб кетди шоферлар¸ сроги ўтиб бўлди. Ўзбекистон чегарасига етганда Қозоғистон таможняси штраф солаяпти – 45 минг¸ 50 минг¸ 60 минг тенгегача. Бу дегани 150 долларга яқин пул бўлади”¸ дейди ҳайдовчи Сардорбек.

Россия ҳудудида машина ҳайдаб кетаëтиб гапирган Сардорбек¸ ўзи ва касбдошлари бу муаммога ечим топишни сўраб Ўзбекистон Транспорт вазирлигининг Телеграмда махсус очилган каналига кўп марта мурожаат қилганини таъкидлайди.

“Минтранс шоферларга махсус группа очиб берган Телеграмда. Шоферларни эшитамиз¸ нима муаммоларинг бор¸ деган маънода. У группада вес Ўзбекистон бўйича шоферларимиз ўзининг муаммоларини айтаяпти¸ айтаяпти¸ лекин ҳеч нарса ҳал бўлмаяпти! Умуман ҳеч нарса ҳал бўлмаяпти! Кўриб чиқаяпмиз деяпти¸ бўлди. Нима сабабдан очти бу группани билмайман!”¸деб давом этади ëш ҳайдовчи.

Транспорт вазирлигидан умидини узган ўзбекистонлик ҳайдовчилар¸ Мадумаровга кўра¸ президент номига хат ҳам ëзган.

“Сизга етиб боргани йўқ ëзган хатларимиз. Нимага қопкетаяпти йўлда – таниш-билиш бўлиб қопкетаяпти¸ бекил-бекил бўлаяпти ҳаммаси”¸ деб изоҳлайди бу самарасиз уринишларни ҳайдовчи.

Мирзиëевга қилган видеомурожаатида Сардорбек Қозоғистондаги транзит муаммосидан ташқари перевал (афтидан Тошкентни Фарғона водийси билан боғлайдиган Қамчиқ довони назарда тутилмоқда – таҳр.) даги тарози муаммосини ҳам ҳал қилиб беришни сўрайди.

Озодлик 7 ноябрь куни Сардорбек Мадумаровнинг ўзи билан боғланишга муваффақ бўла олмади.

Аммо бу видеомурожаатни Озодликка юборган ўзбекистонлик халқаро юк ташувчилар¸ уни юзлаб ҳайдовчилар номидан қилинган сўров сифатида жамоатчиликка тақдим этиш¸ биринчи галда эса¸ муаммога президент ва Транспорт вазирлиги эътиборини жалб қилишда ëрдам сўради.

Транспорт вазирлиги “алоқадан ташқарида”

7 ноябрь куни Ўзбекистон Транспорт вазирлиги мулозимлари¸ хусусан¸ матбуот хизматига ажратилган телефон рақамларига кун давомида ҳеч ким жавоб қилмади.

Шу боис айнан шу каби муаммоларга ечим топиш иддаоси билан янги ташкил этилган бу вазирликдан ҳайдовчилар сўров-саволларига жавоб топишнинг имкони бўлмади.

Халқаро юк ташувчилар ассоциацияси(АсМАП)нинг Ўзбекистондаги вакиллари ҳам Озодликнинг видеомурожаатига муносабат билдириш сўровини жавобсиз қолдирди.

Қозоғистон Саноат ва инфраструктурани ривожлантириш вазирлиги ҳузуридаги Транспорт қўмитаси расмийлари эса¸ ҳайдовчилар тилга олган муаммонинг Ички ишлар вазирлиги ваколатида эканини билдириш билан чекланди.

“Ўзбекистон ва Қозоғистон ўртасида юк машиналарида халқаро ташувларга оид махсус келишув йўқ. Ҳайдовчилар айтган муаммо миграция картасига тааллуқли. Қозоғистон ҳудудига кирган ўзбекистонликларнинг вақтинча рўйхатдан ўтиши учун 5 кун муҳлат берилган. Рўйхатдан ўтмаса¸ чегарадан чиқишда жарима солинади. Бу бизнинг компетенциямизга кирмайди”¸ деди қўмитанинг Озодлик гаплашган мулозими.

Ўзбекистонлик ҳайдовчилар аҳволи

Ўзбекистон транспорт тизимига яқин мулозимлардан бири Сардорбек Мадумаров видеомурожаатини кўриб чиқиб¸ шундай фикр билдирди.

“Автотранспортнинг тепасида бу соҳани умуман билмайдиган одамлар ўтирипти. Автотранспорт бўйича вазир ўринбосари Деҳқонов автотранспорт соҳасида 0. Бир умр темир йулларда ишлаган одам. Минстранс автотранспортчилар учун эмас¸ уларга қарши ишлайди. Улардан сўраладиган лицензиялар, қанақадир кераксиз ўқишлар¸ ҳаммаси кимларнингдир чўнтагини тўлдириш учун ўйлаб чиқилган. Ҳақиқий муаммоларга келганда¸ ҳеч ким ишлашни хоҳламайди. Фақат постсовет давлатлари эмас¸ Туркия¸ Эрондан транзит ҳам худди шундай аҳволда. Уларнинг юк машиналари Ўзбекистонда 3 ой туриши¸ йўлда истаганча маишат қилиши мумкин. Лекин Ўзбекистон юк машиналари Эрондан 7 кун¸ Қозоғистон ва Беларусдан 5 кун ичида чиқиб кетиши шарт. Ҳамма давлатда ўзбекистонлик юк ташувчиларни қийнашади¸ таъмагирлик¸ зўравонлик қилишади¸ лекин ҳукумат даражасида улар манфаатини ҳимоя қиладиган ҳеч ким йўқ”¸ дейди Транспорт вазирлигини бу соҳадаги ислоҳотларнинг энг катта тўсиғи деб атаган Озодлик суҳбатдоши.

Бу мулозим автотранспорт соҳасида қилиниши лозим ислоҳотларга оид қатор қарор ва қонун лойиҳалари ишлаб чиқилгани¸ аммо улар қабул қилинмай¸ қабул қилингани эса¸ амалга ошмай қолаëтганини таъкидлади.

https://t.me/bugunuz/28129

Андижонлик деҳқон Дилмурод Тоҳиров вилоят ички ишлар бошқармасининг юқори мартабали амалдори машинаси билан йўл ҳодисаси содир этган 20 ёшли ўғлининг қаердалиги ҳақида Бош прокуратура ҳам Ички ишлар вазирлиги ҳам 12 кундан буён маълумот бермаётганини айтди.

Дилмурод Тоҳировнинг даъво қилишича, ўғли Абдуллоҳ 26 октябрь куни "Ласетти" машинасида Андижон вилояти ИИББси терроризмга қарши кураш бошқармаси бошлиғи Қаҳрамон Эргашев бошқариб кетаётган "Некция-2" машинага бориб урган.

Кечқурун ички ишлар ходимлари Абдуллоҳ Тоҳировни ходимлари уйидан олиб кетган.

Озодлик Абдуллоҳ Тоҳиров тақдири борасида ИИВдан изоҳ ололмади.

Дилмурод Тоҳировнинг айтишича, 26 октябр куни ўғли Абдуллоҳ Тоҳиров Андижон вилояти ИИББси терроризмга қарши кураш бошқармаси бошлиғи, полковник Қаҳрамон Эргашев бошқариб кетаётган машина билан йўл транспорт ҳодисаси содир этган ва шу куни ички ишлар ходимлари Абдуллоҳни уйидан ушлаб кетишган.

- Бугун 12 кун бўляпти Абдуллоҳнинг қаердалиги ва нимада айбланаётгани ҳақида бизга маълумот беришмаяпти. Ўзбекистон Бош прокуратураси, Ички ишлар вазирлиги, Ўзбекистон президенти халқ қабулхонасига бу ҳақда ёзма мурожаат қилганман. Мурожаатингиз қабул қилинди, деган жавобни олдим, лекин ўғлим ҳақида маълумот йўқ, - дейди Дилмурод Тоҳиров.

Озодлик юқори лавозимли милиция амалдори машинаси билан йўл-транспорт ҳодисаси содир этган Абдуллоҳ Тоҳировни милиция ходимлари уйидан олиб кетгани ҳақида 2 ноябр куни қисқа хабар берган эди.

Дилмурод Тоҳиров ўшанда авария ўғлининг айби билан бўлгани сабаб улар милиция амалдорига машинасини таъмирлаб беришини ва устага кўрсатиш учун машинасини видеотасвирга олганини айтганди.

- Кейин билсак, бу машина Андижон вилоят ИИБси Терроризмга кураш бўлими бошлиғининг машинаси бўлиб чиқди, машина ичидан "VSF" категориясидаги давлат рақами ҳам чиқди. Улар видеога олганимизни билиб қолиб, ўғлимнинг кетидан тушишди. Ҳозир ўғлимни қаердалигини ҳам билмайман, ҳеч ким ҳеч нарса айтмаяпти, - дейди Тоҳиров.

Дилмурод Тоҳиров ўғлининг қаердалигини сўраб Андижон вилояти ИИББси Терроризмга қарши кураш бошқармаси бошлиғи Қаҳрамон Эргашевга ҳам боғланганини айтди.

- У Абдуллоҳни Тошкентга олиб кетишгани, бунинг аварияга алоқаси йўқлигини айтаяпти. Тошкентдан буйруқ бўлган, Россиядалиги пайти катта оилани аъзоларини сўкиб ёзган интернетда, деб айтаяпти, лекин мен бунга ишонмайман, - дейди Тоҳиров.

Дилмурод Тоҳиров ўғлининг милиция томонидан ушлаб кетилишини машина багажидаги давлат рақамини тасвирга олгани билан боғламоқда.

Аммо, Ички ишлар органи ходимлари нега видеони олган отани олиб кетмасдан ўғлини олиб кетган бўлиши мумкин, дея сўраганида Дилмурод Тоҳиров "улар видеони ўғлим олган деб ўйлашяпти, мени олганимни билишмаяпти", дея жавоб қилди.

- Ўғлимни олиб кетишган куни уйимизни тинтув қилиб телефонларни ҳам олиб кетишди. Лекин, машина видеосини ўчириб ташлаган эдим, - дейди Тоҳиров.

Дилмурод Тоҳировнинг айтишича, ўғли Абдуллоҳ 2018 йил ноябрида маҳалладаги таниш-билишлари билан бирга Россияга ишлагани кетиб, шу йил май ойида қайтиб келган.

Жалақудуқ туманида у деҳқончилик билан шуғулланган.

Абдуллоҳ Тоҳировнинг адвокатига кўра, вилоятдаги барча суд идоралари унга нисбатан маъмурий қамоқ қўлланилмаганини айтишган.

"Андижондаги маҳбусларни вақтинча сақлаш муассасаларига ҳам сўровнома бердик, улар ҳам Абдуллоҳ Тоҳиров исмли шахс уларга олиб келинмаганини маълум қилишди", - деди адвокат.

Дилмурод Тоҳиров ўғлининг тақдири ҳақидаги сўровига Ўзбекистон Бош прокуратураси, Ички ишлар вазирлиги ва Президент халқ қабулхонасидан жавоб кутаётганини айтади.

-Ўғлинг мана бу холат бўйича айбланяпти ва шу жойда ёки мана бу ертўлада сақланяпти, деб айтишса кўнглим таскин топарди, ҳозир ҳар куни стресс билан яшаяпмиз, - дейди Дилмурод Тоҳиров.

Озодлик Абдуллоҳ Тоҳировнинг тақдирига ойдинлик киритиб беришни сўраб Ички ишлар вазирлигига мурожаат қилди.

Телефон гўшагини кўтарган вазирлик расмийси матбуот хизматига боғланишни тавсия қилди.

Вазирлик сайтидаги матбуот хизмати телефон рақамларига Озодлик кун давомида қўнғироқ қилди, лекин телефонни ҳеч ким кўтармади.

https://t.me/bugunuz/28132