​​Жиззах шаҳрида янги йил байрами арафасида креатив безатилган автобуслар аҳолига хизмат кўрсатар экан. Ўша автобусларни қорбобо кийимларини кийиб олган ҳайдовчилар бошқаришар экан
Бу ҳақда sangzor.uz хабар бераяпти

Жиззах шаҳрида 22 декабрдан бошлаб янги йил байрамига мос безатилган автобуслар ҳаракатланишни бошлайди. Қорбобо кийимидаги ҳайдовчилар йўловчиларни манзилларига етказиб қўйишлари режалаштириляпти.

Қойилмисиз?
Сизларни билмадим-у, мен қайсидир шаҳарда, бутун шаҳар бўйлаб ҳаракатланаётган автобусларни бошқараётган ҳайдовчиларнинг ёппасига Қорбобо кийимини кийиб олиб автобус бошқаришини энди эшитаяпман. Адашмасам тарихимизда бундай ҳодиса бўлмаган.
(Каналда бу ҳақда хабар берётганимни сабаби ҳам шу. Аммо, каналдан узоқлашиб кетиб қолманглар, Бир-биридан қизиқарли постлар, шунингдек Халқ таълими муаммоларига дахлдор постлар навбатини кутиб турибди)

Эътибор бераяпсизларми, бу йил Янги йил байрамини ўтказишга ҳар йилгидан кенгроқ, ўзгачароқ тараддуд кўрилаяпти.
Бундан бир неча кун олдин Тошкентда 505 нафар Қорбобони йиғиб шаҳар бўйлаб айлантиришгани ва Янги йилда улар ёрдамида шаҳар маҳаллаларида турли инсонларни табриклаб чиқишни мўлжаллашгани ҳам шундан далолатдир.

Битта ҳазиллашай: Қорбобо ва Янги йилни нишонлаш бошқа жойларда ўйлаб топилган бўлса ҳам агар шундай кетаверсак яқин йилларда Қорбоболар юртига айланиб кетамиз-ов. 😊😊😊

https://t.me/joinchat/AAAAAFDsqn0uS_lzEcmvbw

Полиция офицери сув тошқини даврида Аптекани талончилик ва ўғирликдан ҳимоя қилиб қўриқлаб турибди. 1974 йил, Канада.
Қийин шароитга қарамай унинг ўз ишига маъсулият билан ёндашиши таҳсинга сазовор👍

​​Телефоним экранидаги "Е" ча ёки Марсга учмоқчи бўлаётган ғарбликлар.

Охирги пайтларда юқори технологияли қурилмалар, 5G, осма метро, электрон навбат каби сўзларни эшитиб энсам қотадиган бўлди. Сабаби, мен ўз маҳалламда ҳанузгача ибтидоий шароитда яшаяпман. Кўчамиз гарчи республика аҳамиятига эга йўл бўлса-да дабдаласи чиқиб кетган. Чироғимиз кунлар совуши билан светофотдай ўчиб-ёниб турибди. Антеннамиз эса ҳанузгача 2G билан ишлайди. Ҳозир ана шу антеннамиз билан боғлиқ иш ҳақида ёзмоқчиман.

Охирги пайтларда "электрон навбат", "электрон рўйхатга олиш", "электрон имзо" каби гаплар кўп гапирилаяпти. Аммо бизни маҳалламиздаги антеннага ўрнатилган 2G билан электрон ишларни қандай бажариб бўлади, ҳайронман. Буёғда 21-асрнинг 19-йилига ўтаётган бўлсак. Қолаверса чет элларда аллақачон G5 ўрнатиш ҳақида гап бўлаяпти. Биз эса 2G да юрибмиз.

Боя Ucell нинг сайтига кириб компаниядан маҳалламиздаги антеннага 3G ўрнатиб беришларини илтимос қилиб(!) ёзиб юбордим.
Орадан ярим соат ўтмасдан бегона бир номердан қўнғироқ келди. Кўтарсам ёқимли овозда бир ходима "Боя Ucell компаниясига сиз ёзиб  мурожат қилган эдингизми?" деб сўради. "Ҳа" деб жавоб бердим.
Шундан кейин у "Мени мурожатим Ucell компаниясининг режалаштириш бўлими томонидан кўриб чиқилганини ва маҳалламиздаги антеннага 3G ўрнатиш режаси 2019-2020 йилги дастурларга киритилишини ва бу масала атрофлича ўрганилиб "агар лозим топишса ўрнатилишини" айтди. Унга "охирги пайтларда турли ишлар электрон кўринишга ўтаётгани, интернетни ривожлантириш ҳақида Президент қарорлари чиқаётгани ва ўша қарорлар юзасидан ҳам маҳалламиздаги антеннага 3G ни яқин муддатларда ўрнатиб беришлари лозимлигини" айтдим. Шунда у "антеннамизга 3G ўрнатиш осон иш эмаслигини, бу учун яхшигина маблағ шартлигини, қолаверса 3G ўрнатиш учун тегишли ташкилотлардан рухсат олиш ҳам осон иш эмаслигини" гапирди. Унга "интернет сифатини қанча яхшиласанглар одамларнинг интернетдан фойдаланиши ортидан шунча кўп фойда оласизлар-ку!" деб энди савол бермоқчи эдим ходиманинг бироз диққати ошди ва "мен режалаштириш бўлимини жавобини сизга етказдим, қолганини билмайман" деб гапни тугатиб қўя қолди.

Қаранг, компания бизни маҳалламиздаги антеннага 3G ўрнатишни 2019-2020 йиллардаги дастурга киритар экан ва кейин агар лозим топишсагина 3G ўрнатиб берар экан. Тасаввур қилайлик; улар лозим ҳам топишди ва 2020 йилнинг қайсидир ойида бизнинг маҳалламиздаги антеннага 3G ни ўрнатишди. Барака топкурлар, унгача Илон Маск ёки унга ўхшаган яна кимдир Марсга учиб бўлади-ку! Ёки яна қайсидир компания дунёнинг ривожланган давлатларида 6G ни ҳам жорий қилиб юбориши мумкин.
Қолаверса компания ўзининг ҳудудий антенналарида интернет хизмати кўрсатишни қанча яхшиласа одамларнинг интернетдан фойдаланиши ортидан компания шунча кўп фойда қилади-ку.
Кейин компания ходимасининг антеннага 3G ўрнатилиши учун яхшигина маблағ керак бўлиши ва қандайдир ташкилотлардан рухсат олишнинг қийинлиги ҳақидаги гапи ҳам анча ғалати. Чунки компания битта антеннага 3G ўрнатиш учун маблағни баҳона қиладиган даражада камбағал эмас. Шунингдек Президент мамлакатимизда интернет хизматлари кўрсатишнинг сифатини ошириш ҳақида фармон чиқариб қўйган ҳолатда Ucell нинг қандайдир ташкилотлардан маҳалламиздаги антеннага 3G ўрнатиш учун рухсат олишнинг қийинлиги ҳақида гапириши бу ҳам ўхшамаган баҳона деб ўйладим. Умуман олганда биз юқори технологиялар, инновацион лойиҳалар, турли электрон ишларни жорий этишни тезлаштиришни хоҳлар эканмиз нафақат Ucell компанияси, балки бошқа интернет хизмати кўрсатадиган уяли алоқа компаниялари ўз антенналарига кейинги йилнинг баҳорига қолдирмай 3G тизимини ўрнатиб бўлишлари керак. Шу жумладан уяли бўлмаган компаниялар ҳам ўз интернет хизматлари кўрсатиш сифатини кўтаришлари керак. Акс ҳолда биз телефонимиздаги 2G нинг белгиси бўлган "Е" чага термулиб кимларнидир Марсга учаётганини кузатиб ўтираверамиз.
(Эслатма:бу пост Ucell сотилиши ва интернет тезлиги 10 баравар ошиши ҳақидаги ваъдадан олдин ёзилган эди)
 
https://t.me/joinchat/AAAAAFDsqn0uS_lzEcmvbw

​​Муҳташам сарой ёки келиб-кетган Ленинлар

Кунлардан бирида самарқандлик таниқли тилшунос олим, профессор Худойберди Дониёрий билан гурунглашиб қолдик. Домла билан учрашдик дегунча, орамизда баҳс қўзғаларди. Негаки, у ҳаётда ва илмда кечаётган ҳар қандай мураккаб вазиятларни фавқулодда ўткир нигоҳ билан ойдинлаштириб берар эди. Ҳар қандай одамга ҳам бирон савол билан мурожат қилсангиз, унинг қандай жавоб қайтаришини олдиндан тақрибан биласиз. Аммо домланинг жавобини олдиндан сира билиб бўлмас эди.

Ўша галги тортишув Тошкентда янги қурилган Ленин музейи ҳақида бўлди.
- Ўзбекистон пойтахтида саройдай Ленин музейининг бўлимини очишга бало борми! - деб ҳайрон бўлиб савол берар эдим мен. - Бу ёқда халқимиз қишлоқ жойларида тутдай тўкилаётган харобаларда ўтирса-ю, шаҳар марказида Ленинга деб мармардан муҳташам бино қурсак. Бу қандай мантиқ? Ўзбекистон ва халқимиз олдида Лениннинг нечук алоҳида хизмати бор, айтингчи? Эҳтимол ана шундай бир маҳобатли мақбара қуриб, унга Лениннинг лаҳадидан намуна ҳам кўчириб келармиз!...

Худойберди домла, парвои фалак, Ленин музейи қурилгани учун Шароф Рашидовга роса мақтовлар ўқиди. Гўё Ленинга музей қурилиши тўғри иш бўлган эмиш. Унинг фикрича..., "Ленинлар келиб-кетаверади"... Аммо шундай муҳташам ва ажойиб бино ўзимизники бўлиб қолади ва халқимизга тоабад хизмат қилади. Бу иморат Лениндан ҳам кўра унинг бош меъмори Шароф аканинг ўзига ўрнатилган жонли ёдгорлик сифатида қад кўтариб тураверади.

Ана холос. Юрак ютиб Шароф акани бир танқид қилиб, шаккоклигим учун Худойберди домла мени роса койийдиган бўлди-да , деб буёқда хавотир олиб турсам-у, домланинг Ленин музейи ҳақидаги "теша тегмаган" талқини меникидан ҳам ошиб тушди. Қулоқларимга ишонмадим. А? "Ленинлар келиб кетаверади" дедими? Қаёққа кетади? Ахир у мангуликка даъвогар-ку. Домланинг бу гапидан қўрқиб кетиб атрофга олазарак бўлиб қарадим. Битта-яримта нокас бу гапларни эшитиб қолмасин-да деб.

Худойберди домла эса парвойига келтирмай сўзлашда давом этарди. У шу қадар даҳшатли башоратларни айтди-ки, тахта бўлиб қолдим.
Унинг айтишича гўё: бу фоний дунёда ҳеч нарса абадий эмас, Ленинлар ҳам. Ёвуз қизил салтанат бир кун келиб албатта емирилади. Бирон бир иқлимда, бу салтанатнинг ҳам, бошқа мустамлакачиларнинг истибдоди ҳам сақланиб қолмайди. Халқимиз кишанлардан озод бўлади. Республикамиз ёруғ, мустақил тараққиёт йўлига чиқиб олади.

Ҳозир бу гаплар ҳеч кимни ажаблантирмайди. Аммо, мустақиллигимиздан 15-20 йиллар олдин бу гаплар ҳар қандай ўткир башоратчининг тушига ҳам кирмаган, бошимиз узра пахта сабабли Қизил империянинг зулми кучайган пайтлар эди. Ўшанда профессор устозимнинг юзига қараб ажабланиб қолдим. Бу одам ё телба, ё даҳо! Ўша ҳолатда ундан қанча ажаблансам шунча яхши кўриб кетдим. Қаранг-а. Шу қадар ойдин ниятли, мутлақо ишониб бўлмайдиган, чўпчаксимон ҳақиқатларни соғиниб яшайдиган улуғ зотлар ҳам бор экан бу дунёда.

Шу-шу бўлди-ю Шароф Рашидовнинг ҳар бир ишига алоҳида синчковлик билан қарайдиган бўлдим. Унинг ҳар бир сўзидан маъно излайдиган бўлдим.
Орадан йиллар ўтди. Мамлакат раҳбари Леонид Брежнев Тошкентга келганида Ленин музейини томоша қилишга ҳам таклиф этилади. Ҳойнаҳой ўшанда унинг хаёлидан "Оббо, ўзбек мардум-эй. Сенлар Ленинга музей қура оласанларми? Пастқамгина бино қуриб пештоқига Лениннинг суратини илишган-у музей шу деб юришгандир-да" деган гаплар ўтган бўлса ҳам ажабмас. Айтишларича у чиндан ҳам Ленин музейининг бу қадар ҳашаматли қилиб қурилганини тасаввур ҳам қила олмаган экан. У ярақлаган мармар саройни кўриб ҳанг-манг бўп қолади ва шундай дейди:
- Ну Шарафчик, ну ты да-ё-щ. Ўшанда Шароф ака ўйлаган ишининг миси чиқиб қолишидан қўрқиб шошиб қолади, аммо сир бой бермайди.
Ҳа, Шароф ака еб-тўймас юҳо Марказни, Кремлнинг хўжайинини боплаган эди.
Орадан йиллар ўтиб Худойберди домла ва Шароф ака орзу қилган кун келди. Мустақилликка эришдик. Аммо, минг афсуски улар Ленинни келганини кўришди-ю кетганини кўриш уларга насиб этмади.

Ғайбуллоҳ ас-Саломнинг "Эй умри азиз" китобидан.

https://t.me/joinchat/AAAAAFDsqn0uS_lzEcmvbw

​​Бизни емираётган маҳаллийчилик ёки сиз оппоқ-у, бошқалар айбдорми?

Кеча группалардан бирида маслаҳат сўраб ёзиб қолишди. Россияда Сурхондарёнинг Шўрчи туманидан бўлган бир болани ўласи қилиб калтаклашади. Болага ўша ёқда 1-тиббий ёрдамни кўрсатиб Тошкентга учадиган самолётга ўтқазиб юборишган. Тушган заҳоти уни операция қилиш керак экан. Болани аҳволи оғир, уни самолётдан тез ёрдам машинасига олиш керак экан. Аэропортга тез ёрдам машинасини чақирса уни самолётни олдигача қўйишадими, буни тартиби қандай, шу масалада маслаҳат сўрашган.

Эрталаб қарасам қисқа тафсилотини ёзишибди. Яхши одамларнинг кўмагида болани 16- шошилинч тиббий тез ёрдам касалхонасига олиб боришибди. Маълум бўлишича уни ўша ёқда ўзимизнинг болалар тожик болаларга урдирган экан. Жараён видеога олинган ва бу ҳақда ҳуқуқ-тартибот идораларига мурожат қилинган. Буёғи энди бошқа мавзу.

Охирги йилларда "қуш пирр этса ҳам" турли янгилик сайтларда чиқаяпти, бизда ҳам, Россияда ҳам. Ҳозир Гуглга кириб "массовие драки" деб ёзинг, қатор бўп Россия сайтларидаги маълумотлар чиқиб келади: "Фалон шаҳарда ўзбеклар ва тожиклар ўртасида оммавий муштлашиш бўлди, фалон шаҳарда ўзбеклар ўртасида ўзаро оммавий муштлашиш бўлди".
Бу хабарларни ўқиб афсус қиламан. Ўз элида эл бўлмаган юртдошларимиз,  ўзга элда ҳам бир-бирини гўштини емоқда. Ўз минтақасида шу пайтгача эл бўлмаган марказий осиёликлар ўзга юртларда ҳам қирпичоқ.
Бундан ортиқ кулфат борми?

Яна ўша Гуглга кириб қидирсангиз россиялик айрим миллатчиларнинг ўзбек ва тожикларга зўравонлик қилиб, уларни уриб, кейин видеосини интернетга жойлаши ортидан эҳҳе қанчалаб видеолар чиқиб келади. Хўш, тожик ёки ўзбек ўша ёқларда ўзаро қирпичоқ бўлиб турганида россиялик миллатчилардан яна нима кутиш мумкин?

Бир маҳалла иккига бўлиниб бир-бири билан ёвлашиб юрган жойларни биламан. Бир қишлоқда яшаб ярми қолган ярмини ўзидан паст кўриб камситиб юрганини биламан. Энди вилоят марказида ва пойтахтда яшайдиган айримларни вилоят ва туманлардан келганларга қандай муносабатда бўлиши ҳаммамизга маълум. Шундай экан, биз ўзаро аҳил бўла олмаган ҳолатимизда россиялик миллатчилардан марҳамат кутиш қанчалик тўғри?

Ҳаммамизга маълумки, кўпчилик пойтахт Тошкентда яшовчи айримларни "маҳаллийчилик қилади, вилоятдан борганларни камситади" деб доим айблашади. Бу гапда ҳам жон бордир. Пойтахтда яшовчи айримлар шунақадир. Аммо пойтахтликларни айблайдиган одамларни мундоқ суриштирсангиз аксарияти ўзлари ҳам қўшни маҳалласидагиларни, қўшни қишлоқдагиларни камситиб, одам ўрнига кўрмайдиган маҳаллийчи бўлиб чиқади.

Бундан бир неча йил олдин узоқ туманлардан бирида яшовчи йигит билан ҳамсуҳбат бўлиб қолдим. У ўзини туманида, қишлоқларда яшайдиганларни "ёввойи даштликлар" деяпти. Ҳайрон қолдим. Шунингдек ўзим яшайдиган жойларда ҳам бир маҳалла иккинчи маҳалладан, бир қишлоқ иккинчи бир қишлоқдан ўзини катта тутиб юрадиган жойлар бор.

Хўш жаноблар!
Ўзингиз маҳалладошингиз ёки қишлоқдошингиз билан эл бўла олмаган ҳолатингизда бошқаларни ўзингизни эл кўрмаганликда қандай айблайсиз? Қани мантиқ?
Демак, ўша сиз айблаётган тошкентликни ўрнида сиз яшаганингизда аниқ биламан сиз бошқаларни камситишда ҳаммадан ўзар эдингиз. Ҳа, шундай. Тан олаверинг. Бир ҳаводан нафас олиб ёнингизда яшаётганларни камситиб юрибсиз-у, бошқаларни камситмайсизми?
Шундай экан бошқа бир жойни одамини айблашдан олдин ўзингизга бир қараб қўйинг, балки энг ёмон маҳаллийчи тошкентлик эмас, балки сиздирсиз.

Умуман олганда бизда маҳаллийчилик ҳамма жойда бор. Юртни, миллатни бирлаштирмайдигани ҳам шу. Шу учун ҳам бир пайтлар Чор Россияси бизни оз сонли қўшини билан осонгина босиб олган. Улар ёнимиздаги қишлоқни босиб олаётганида боболаримиз "баттар бўлинглар" деб томоша қилиб тураверишган. Навбат ўзларига келганда эса нариги қишлоқ шундай қилган. Балки Чингизхон босқини даврида ҳам шундай бўлган бўлса ажабланмайман.

Биз маҳаллийчиликни йиғиштирмас эканмиз, муаммоларимиз камаймайди, аксинча кўпаяди. Шу учун яхшилаб ўйлаб кўрайлик ва бошқаларни ҳам биздай ОДАМ эканлигини унутмайлик.

https://t.me/joinchat/AAAAAFDsqn0uS_lzEcmvbw

​​Эркпарвар шоир Асқар Қосим ҳақида

Асқар Қосим деган шоирни ёш авлод ҳам, ёши катталар ҳам, кўпчилик билмас. Билганлар ҳам Тоҳир Малик домланинг интервьюларини ўқиб билишди.
Бу шоирни ижоди ҳозир адабиёт китобларда ўрганиладими ёки йўқми билмайман. Аммо, фикримча ўрганилиши керак. Чунки бу шоир қисқа яшаган умрида фақат эркни куйлади. Баъзи шоирларга ўхшаб "Россия она ватаним, Ленин менинг бобом" деб куйламади. Фақат эркни куйлади, озодликни куйлади. Бу шоирни шеърларини ўқиганлар, шеърий китобларини кўрганлар уни биронта ҳам СССРни ҳам, уни машҳур шахсларини ҳам мақтаб шеър ёзмаганини айтадилар.

Шоир 1946 йилда туғилган. ТошДУнинг филология факультетида таҳсил олган. Шоирнинг “Фаввора”, “Мовий осмон”, “Замин кўрки”, “Толбаргак”, “Кўнгил кабутари”, “Сирлар” номли тўпламлари нашр қилинган. У таржимон сифатида Еврипиднинг “Медея”, Эсхилнинг “Қабр олдидаги қурбонлик” асарларини ўзбек тилига ўгирган.
Шоир 1986 йилда вафот этган.

Ёзувчи Тоҳир Малик шоирнинг дўсти бўлган. Домларнинг эсдаликларида ўқиймиз:

"Йигирманчи аср ўзбек шеъриятининг забардаст вакилларидан бири шоир Асқар Қосим билан яқин дўст эдим. Тақдирнинг ўзи бизларни ҳаётнинг кўп нуқталарида бирга қилди. Мен 1963 йили пойтахтдаги 40-мактабни тугатиб, ТошДУнинг кечки журналистика бўлимига ўқишга кирдим. Асқар шу мактабни 1964 йили тугатиб, шу университетнинг кундузги факультетига ўқишга кирди. Мактабда яқиндан таниш бўлмаганмиз.

1967 йили болалар газетасида ишлаб юрган чоғим Асқарни ўша даврнинг машҳур шоири Абдулла Орипов билан бирга кўрдим. «Бу йигит Абдулла аканинг энг яқин шогирди, ўзи зўр шоир» деб таништиришди. Асқарни атрофдаги ёшлар шоир сифатида тан олишган, мен эса болалар учун ҳикоялар ёзиб юрган, танилмаган ёш адиб эдим. 1969 йилда икковимиз университетдаги таҳсилни тугатиб, республика радиосида учрашдик. Икковимиз адабий-драматик эшиттиришлар таҳририятида ишлаш учун ҳужжат топширдик. 2 ҳафта бирга ишладик. Сўнг Асқарни пахта теримига жўнатишди, мен ҳарбий хизматга кетдим. Орадан ярим йил ўтиб, Асқарни Капяр деб аталувчи ҳарбийлар шаҳарчасида учратдим. Асқар мен хизмат қилаётган қисмга, ротамизга келди. Бунақа тасодиф камдан-кам юз берса керак. 2 ой хизматда бирга бўлдик, кейин Асқарни бошқа қисмга жўнатдилар.

Уйланганимда Асқар менга куёвжўра бўлган, куёв ошини чойхонада ўзи дамлаган. Кейинчалик у билан Ғ. Ғулом номидаги нашриётда бирга ишладик. Ҳатто хонамиз ҳам бир эди.
«Ўзбек бўлиб туғилмасайдим, кўрмас эдим бунчалар хорлик» деган сатрларни катта мушоирада ўқигани учун КГБ таъқибига тушган пайтда ҳам нашриётда бирга ишлаётган эдик. Демоқчиманки, унинг руҳий азоблари менга яхши таниш. «Шайтанат»ни ёзишни бошлаганимда Анвар қиёфасида Асқарни кўрдим. Асқарнинг шеърларидан фойдаландим. Шу боис ҳам Анвар тақдирини Асқар билан боғладим. Анварнинг ўз жонига қасд қилгани ҳам бадиий тўқима эмас. Юраги аламу зардобга тўлиб кетган шоир ўзини осган эди...

«Шайтанат»да Асқар Қосим шеърларининг айрим сатрларигина берилган, китобхон шоирнинг қалб фарёдлари билан қисман бўлса-да танишади. Асардаги Анварнинг видолашув хитобини ҳам Асқар Қосим ёзган. Мен шеърнинг фақат 4 сатрини олганман:

Бошгинамга ағанаган, катта
тоғлар алвидо!
Мен кетарман ҳасратланиб,
руҳи соғлар алвидо!
Бу дунёнинг шўришига
нав-ниҳоллар тебранинг,
Эслироқ боғбони йўқ,
қолди боғлар алвидо.

Сталин қатағонлари пайтида эрксевар адибларимизни отиб ўлдиришган бўлса, Сталиндан кейин эрксеварларни йўқ қилишни "маданийроқ" йўлига ўтишган ва уларни мажбуран жиннихоналарга тиқишган. Асқар Қосимни ҳам эркни куйлаганини кўриб хавотирга тушган манфур тузум уни бир неча бор жиннихонага тиққан. Шу билан уни овозини ўчиришмоқчи бўлишган. Охир-оқибат улар ўз мақсадларига етдилар. Шоир руҳий қийноқлар натижасида ўз жонига қасд қилади.

Бугун, қаердаги "Рус оға"ларини мақтаб ёзган қандайдир шоирларни номи азиз бўлганда Асқар Қосимни номи етарлича эсланмаслиги бу шоирга нисбатан адолатсизлик деб биламан. Ёзувчилар уюшмаси бу шоирни, ижодини, номини етарлича тарғиб қилиши керак. Зеро у шу юрт озодлиги учун қурбон бўлганлар билан бир сафда туради.

https://t.me/joinchat/AAAAAFDsqn0uS_lzEcmvbw

​​Эътироф ва қашшоқлик даражаси

Охирги пайтларда арзимаган маошга ёки нафақага яшовчи инсонларни кўпроқ тушунаяпман. 400-500 минг маошга ёки нафақага қандай қилиб 1 ой яшаш мумкинлигига ҳайрон қолаяпман.

Эсимни таниганим менда пул муаммоси бўлмаган. Бой оила бўлмаганмиз, оддий оила. Шунчаки бозорларда ўралашиб юрганим учунми ҳеч ҳам пулдан қийналиб қолиш ҳолати бўлмаган.
Аммо, 2016 йилнинг баҳорига келиб ҳамма ишлар тескари бўлиб менда пул муаммоси бошланди.
Энди ҳар бир тийинни тежаб сарфлашга мажбур бўла бошладим.

Охири шу йилнинг сентябрь ойидан бошлаб Тошкентдаги кватирамни ижарага бердим. Турли тўловлардан ортиб қўлимга 700-800 минг пул тегади.
1-ой келган пулни етказа олмай бир танишимдан 300 минг қарз олдим. 2-ой келган 800 минг пулни қўлга олгандан ўша қарзни узишга шошилдим. Қўлимда 500 минг қолди. Бу пул рўзғорга 10-12 кунга ҳам етмади. Яна бориб 300 минг қарз олдим. У ҳам ойнинг 20-санасигача етмади. Бўлди, уёғи кейинги ойни бошигача 10-15 кун нима қилиб бўлса ҳам чидаш керак.

Ана шундай ҳолатларда ҳатто маҳалламдаги бўлаётган наҳор ошига ҳам боролмайман: бир қоринтўяр ош еб чиқиш учун 10 минг сўм тўёна пулини тўйхона эшигидан киришда бериб кириш керак. Менда эса ойни охирларига бориб 10 минг уёқда турсин 10 сўм ҳам бўлмайди. Шу туфайли наҳорга бормай қўя қоламан.

Ҳозирча эртанги кундан умид қилиб ана шундай тарзда яшаяпман. Гоҳида ўзимга ўзим "пулсиз яшаса ҳам бўлар экан-а" деб қўяман.
Бу постни нолиш деб тушунмасликларингни хоҳлардим. Шунчаки миллионлаб одамларни дардини ҳис қила бошлаганимни ўз ҳолимни ёзмасдан тушунтириб бера олмас эдим.

Айтгунча "Адлия вазирлиги ўтказган танловда ютиб олган телефонни нима қилдинг?" деб сўрамайсизларми?
Уни, бир дўстимдан қарз бўлган эдим, "ҳозирча шартмас" деганига қарамай унга ҳисоблаб бердим.

Квартирамни ижарага бериб, ижара ҳаққини ойма-ой кутиб яшашни бошлаганимдан кейин мен юртимиздаги арзимаган маошга яшаб юрган инсонларнинг дардларини, муаммоларини яхшироқ тушуна бошладим. Уларнинг ойдан-ойга маъошларини етказа олмай қийналиб, эзилиб яшашларини мен ўз танамда ҳис қилаяпман.
Мен 700-800 минг сўм ижара пулини рўзғоримга 15-20 кунга етказа олмаяпман. Унда 400-500 минг маош оладиганлар қандай қилишаяпти? Қандай яшашяпти?
Улар-ку, қўл-оёғи бутун, бир жойда ишлаб олаётган маоши етмаса қўшимча иш топар. Аммо арзимаган нафақа пули оладиган ногиронлар, нафақахўрлар қандай қилишаяпти? Болаликдан ногиронлар бугун "нон пули" деб бериладиган компенсацияни қўшиб ҳисоблаганда 400 минг атрофида нафақа оладилар. Уларни орасида оилалилари бор; Улар рўзғорини қандай ўтказаяпти? Хўш, ўшандай инсонлар давлат берадиган арзимаган маошини ўзининг ҳар ой олиши лозим бўлган дори-дармонига сарфласинми ёки рўзғоригами?
Буни ўйлашни ўзи даҳшат.

Ўйлаб кўрсам ҳозир бизнинг шу шароитимизда 3-4 нафар фарзанди бор оилага ўртача ва ундан бироз паст даражада яшаш учун 3 миллион сўм атрофида пул етарли бўлади. Аммо, минг афсуски ҳаммада ҳам ундай маош олиш имконияти йўқ.

Яқинда Жаҳон банки ўз ҳисоботларини эълон қилди. Унга кўра Ўзбекистоннинг 62 фоиз аҳолиси кунига 1.9 доллардан кам харажат қиладиган одамлар экан. (Қўйида шу ҳақдаги статистиканинг суратини қўйяпман).
Мен ўша статистикага ишондим.

1.9✘8300=15.770 сўм. Бир кунга.
15.770✘30=473.100. Бир ойга.

Буларни нега ҳисоблаяпман, нега бошингизни қотираяпман?
Сабаби: агар сиз умумий ҳисоблаганда ҳар бир оила аъзоларингиз учун кунига 1.90$, сўмда ҳозирги курсда 15.770 сўмдан, бир ойга ҳисоблаганда 473.100 сўмдан кам ишлатаяпсизми демак Жаҳон банкининг ўлчови бўйича сиз қашшоқсиз.
Энди ойига 400-500 минг сўмга яшаб юрганлар ким? Қашшоқларнинг қашшоғи бўладими?
Хоҳ бюджет ташкилотларида, хоҳ хусусий иш берувчилар қўлида бўлсин аксарият юртдошларимиз бугун 1 миллиондан кам бўлган маошга яшамоқдалар.
Шундай экан Жаҳон Банкининг ҳисоботини ёлғон дейишга менда асос йўқ. Омон бўлинглар.

https://t.me/joinchat/AAAAAFDsqn0uS_lzEcmvbw

​​#Ҳуқуқингни_бил_ва_талаб_қил

#Биласизми?

Транспорт воситаси тўхтатилганида ҳайдовчи "йўл-патруль хизмати ходими айнан тўхтатилган ҳудудда дислокацияга асосан хизмат ўтаётганлиги ҳақида белгиланган шаклдаги тасдиқланган дислокациянинг кўчирмаси билан шу жойнинг ўзида" танишиши мумкин.

Бу ҳақда Адлия вазирлигининг "Ҳуқуқий ахборот" телеграм канали хабар бермоқда

Бу хабардан шуни тушундим-ки мабодо сизни йўлда машина бошқариб кетаётганингизда ЙПХ ходими тўхтатса, сиз уни айнан ўша жойда фаолият олиб боришга дислокация билан тасдиқланган рухсатномасининг нусхаси бор-йўқлигини сўрашга ҳаққингиз бор.
Агар ЙПХ ходимининг ёнида айнан турган жойида фаолият олиб боришига рухсат берадиган дислокация билан тасдиқланган ҳужжат бўлмаса у белгиланмаган жойда турганини англатади. Бундай ҳолатларда адашмасам Ички Ишлар Вазирлигининг 1102 Ишонч рақамларига қўнғироқ қилиш керак бўлади.

Боя эрталаб постни шу ергача👆👆👆 ёзиб хабардан чиқариб ёзган хулосам тўғрими ёки йўқми деб иккиланиб турган эдим. Мени тушунишим тўғри экан. Буни ҳозиргина Адлия вазирлигининг "Ҳуқуқий ахборот" телеграм каналида қўйилган ушбу пост👇👇👇тасдиқлаб турибди
.

#Биласизми

ЙПХ ходими томонидан ўзига бириктирилган ҳудуд дислокациясидан ташқарида қоидабузарликлар бўйича маъмурий ҳуқуқбузарлик тўғрисида баённомалар расмийлаштириш тақиқланади.

Демак, юқорида ёзганимдай ЙПХ ходимининг ўзига бириктирилган ҳудуд дислокациясидан бошқа ҳудудда фаолият кўрсатишга ҳаққи йўқ.

#huquqingni_bil_va_talab_qil

Каналга уланиш👇👇👇

https://t.me/joinchat/AAAAAFDsqn0uS_lzEcmvbw

​​Тиниб-тинчимаган одамлар нималарни ўйлаб топишмайди-я.
Телеграмдаги "Водители Намангана" гуруҳи янги йилда Наманган шаҳридаги Отчопарда 500 та машинадан иборат улкан арча шаклини ясашмоқчи экан. Қўйидаги видеода ўша жараёнга тайёргарлик жараёни тасвирланган экан.
Шунча машинани бир жойга тўплаб, тартиб билан териб чиқиб, синхрон равишда навбати билан уларни ёритиш чироғини ёқиш ҳам санъат, мен сизларга айтсам.
Қойил 👍

Каналга уланиш:👇👇👇

https://t.me/joinchat/AAAAAFDsqn0uS_lzEcmvbw

​​Руслан Нуриддинов, Допинг, Ўт ёки Абдулла Тангриев ҳақида

2012 йилги Лондон Олимпиадасида иштирок этган беш нафар оғир атлетикачидан олинган таҳлиллар Халқаро Олимпия Қўмитаси томонидан қайта ўтказилган допинг текширувида ижобий натижа берди. Бу ҳақда Халқаро оғир атлетика федерацияси (IWF) матбуот хизматига таяниб, ТАСС хабар қилди.

Қайд этилишича, допинг тестига ижобий реакция берган намуналардан бири ўша мусобақада 105 кг вазн тоифасида тўртинчи ўринни олган ўзбекистонлик Руслан Нуриддиновга тегишли. Ундан ташқари яна тўрт нафар спортчининг допинг тести ижобий натижа кўрсатган ва Халқаро Оғир Атлетика Федерацияси уларни вақтинчалик фаолиятдан четлаштирган.

Аввалроқ сўнгги олимпия ўйинлари давомида допинг истеъмол қилиш ҳолатлари оғир атлетикачилар орасида кўплаб кузатилаётгани туфайли спортнинг бу тури Олимпиада дастуридан чиқариб юборилиши мумкинлиги маълум бўлганди. Ушбу масала ноябрь ойи охирида Халқаро Олимпия Қўмитаси Ижроқўмида муҳокама қилинди, аммо якуний қарорни қабул қилиш кейинроққа қолдирилди.

Руслан Нуриддинов ҳақидаги бу хабарни ўқир эканман ўша пайтда 2012 йилда Лондонда бўлиб ўтган олимпиада бошланиши арафасида яна бир сплртчимиз Абдулла Тангриевдан олинган қон таҳлил қилинганда ундан марихуана гиёҳвандлик моддаси чекканлик аломатлари топилиб Абдулла Тангриев мусобақалардан четлатилган эди. Ўшанда Абдулла Тангриев ўз-ҳатти ҳаракатлари учун халқимиздан узр сўраган эди.

Руслан Нуриддиновнинг қонидан ҳам айнан ўша олимпиада арафасида олинган қондан допинг топилиши ғалати-я?!
Ўшанда Руслан допингни қандай туридан фойдаланган экан: Абдулла Тангриевга ўхшаб ўтдан тайёрланганиданми ёки бошқароқ туриданми? Бу ҳақда ҳам хабар чиқиб қолар.

https://t.me/joinchat/AAAAAFDsqn0uS_lzEcmvbw

Норқўзи..., бу номни эшитсам доим кўз ўнгимда ёш ва навқирон бола ҳолида ҳаёт нималигини англаб, англамай вафот этиб кетган бир бола ва унинг золимдан ҳам золим, раҳмсиздан-да раҳмсиз отаси кўз ўнгимга келади.


Норқўзи..., у биздан икки синф пастда ўқирди. Йўқ, уни "ўқирди" дейишим ҳам нотўғри, у мактабга умуман бормас эди. Мен шунчаки ёшлигимизда болаларнинг ёшини қайси синфда ўқигани билан ўлчаганимиз учун ҳам уни "биздан икки синф пастда ўқирди" деяпман. Аслида у биздан икки ёш кичик эди. 

https://telegra.ph/Bugunning-gapi-12-24

​​Бизни еб битираётган маъракалар

Ўзбекистонликларни биласизми нима еб битиради? 
Аёлларини ҳам,  эркакларини,  ёшини ҳам, каттасини ҳам турли маъракалар еб битиради.
Бу халқ шундай халқ эканки битта кераксиз маъракасини насиҳат қилиб,  ўртага домкомларни аралаштириб,  ҳокимият тарғибот мажлислари ўтказиб йўқотса, булар уни ўрнига иккитасини жорий қилади.

Қойил қоламан....

Кузи билан бошимиз тўйдан чиқмади. Маҳалламизда ҳатто бир кунда учтагача тўй бўлди. Эрталаб наҳор. Тушда соатбай айтилган қандайдир зиёфат ёки эҳсон. Тушдан кейин кечроқ эртага бўладиган наҳорнинг "Сабзитўғрар"и.
Маълумот учун: Биз томонларда сабзитўғрарда ҳам камида 50-60 кг гуруч дамланади, шунга яраша камида 250-300 нафар одам келади.
Эртаси куни эрталаб яна наҳор, яна зиёфат, яна сабзитўғрар.
Ишонасизми,  икки ой: октябрь, ноябрни шу тахлит тўйхўрлик билан ўтказдик.
Декабрь ойига келиб тўйлар енгиллади. Хўш, "ошга ўрганиб қолган эркаклар,  тўй маъракаларига ўрганган аёллар энди нима қилишаяпти?" дейсизми?
Эркаклар гап-гаштакни бошлаб юборишди. Шунингдек маҳалламиз марказида Собиқ Иттифоқ давридан қолган чойхонамиз бор, ўша ерда кўпчилик бўлиб ҳар кун тушда йиғилиб уч сўм-уч сўм ташлаб ош қилиб ейишади. Ўшандай ҳолатда кўчада чойхонадаги ошни еб кекириб қайтаётган баъзи ҳаддим сиғадиган чолларга "мунча ошни еб қандай ҳазм қиласизлар, бунча ошни еб сизларда қон босими, ошқозон яллиғланиши каби дардлар бўлмайдими?" десам уларни баъзилари "болам, бизники Советни ошқозони, яхши ишлайди, Хитойники эмас" деб қўйишади кулиб.
Аёллар эса "дийдор ширин"ни бошлаб юборишади.

Юқорида бу халқ бир маъракасини йўқотсанг иккитасини ўйлаб топади дедим. Янги йил яқинлашаверса ана ўшандай маъракалар мавсуми бошланади.
Бу ҳам бўлса йил давомида қиз узатган оналар янги йилда байрами арафасида бир нечта қариндош аёлларини йиғиб, ўшанга яраша тоғоралар қилиниб, камига эса ҳар ким ўзини имкониятига қараб битта жиддийроқ совғани кўтариб қизини кўргани бориши керак. Бу биз тарафларда мажбурият даражасига чиқиб бўлди.

Бу иш олдинлари ҳам бўлар эди. Ўша пайтларда қизни онасини ўзи битта тўрхалтада бир-икки хил мевадан 1 кг.дан, 2-3 шиша салқин ичимлик, битта кичикроқ торт, 4 та нон олиб бориб қизини кўриб келар эди. Бугун ана шу иш эҳееее, роса ривожланиб, урф-одат ва янги маърака даражасига чиқди. Энди тоғора-тоғора нарсалар, блок-блок салқин ичимликлар, турли мева-чевалар, пишириқлар, катта торт ва совғага кимдир телевизор, кимдир яна нимадир олиб 10-15 та бўлиб боришади. Қуда томон ҳам қариндош-уруғдан аёлларни чақиради ва қарабсизки катта бир маърака бўлаяптида.
Энг ёмони бугун бу иш мажбурият даражасига чиқиб бўлди. Қўлида йўқлар қарз олиб бўлсада албатта қилиши лозим бўлган мажбурият даражасига.
Уйдаги боласи оч қолса қолсин, қишки кийими бўлмай совуқда совқотиб мактабга борсин аммо ўша мажбуриятни бажармаса бўлмайди.

Шу учун айтаман: Бу элни қачон бўлса ҳам турли маъракалар еб битиради. Аёлини ҳам, эркагини ҳам, ёшини ҳам, қарисини ҳам.

(Маъракалар мавзусида ҳали яна теша тепмаган постлар бор, канални кузатишда давом этинг)

https://t.me/joinchat/AAAAAFDsqn0uS_lzEcmvbw

​​Мажбурий обуна учун берилаётган дори пули ёки уни оқлаётган "журналист"

Бундан бироз олдин Хушнудбек Худайбердиев ўзининг телеграм каналида Бухоронинг Пешку туманида арзимаган маошга ишлаб юрган ишчи-хизматчилар обунага мажбурланаётгани ҳақида ёзиб чиққан эди

Бугун асли-насли номаълум бўлган бир валломат (мақола остига Умидбек Арслонбеков деган исм-шариф турибди, аммо уни негадир уни ҳеч ким танимаяпти) Хушнудбекдан ўша иши учун аламини ўзича олмоқчи бўлиб "Пешку туман ҳокими "жиноят" устида қўлга тушди" деган фисқу-фасод ва гўнг ҳиди уфуриб турган "мақола"сини ёзибди.
Мақола "Халқ сўзи" ва ЎзА сайтларида эълон қилинди. Бироз ўтиб иккаласидан ҳам ўчирилди.

Мақоланинг интернет сайтларини, айниқса блогерларни ҳақорат қиладиган, уларнинг шаънини асоссиз булғашга ҳаракат қилинган, ҳатто оналаримиз эслаб ўтилган айрим жойларини эълон қиламан:

"2018 йилнинг 20 ноябрида эндигина тетапоя бўлаётган блогерлардан бирининг “Пешку тумани ҳокими ташкилотларни айрим нашрларга мажбурий обуна бўлишга топшириқ беряпти” номли иддаоси эълон қилинди.
Ҳа, чиндан ҳам ёзишга мавзу тополмай қолган айрим сайтчилар-у блогерлар учун обуна мавзуси ўзини халқпарвар, адолатпарвар қилиб кўрсатиш учун зўр важ-карсонга айланди"

Жиддий айблов, шунақамасми?
Давом этамиз:

"Бухоро вилояти ҳокими 2019 йилнинг сайловлар йили эканини инобатга олиб, йирик ташкилотларда 2 донадан сиёсий партия нашрларига обуна бўлиш тўғрисида фармойиш чиқарган экан, эртага айнан ана шу газеталарда номзодлар ва уларнинг дастурлари эълон қилинишини назарда тутган бўлса, бундан фожиа ясашни мантиқан тўғри, деб бўладими?"

Ҳокимни шундай фармойиш беришга ҳаққи борми? Асло йўқ. Пешку ҳокими одамларни сиёсий саводхонлигини оширишни ўйлар экан ташкилотларни обунага мажбурламай ўша обуна пулини ҳокимиятни ҳисобидан тўлаб юборсин эди.

"..Бугун “мажбурий обуна” ҳақида сафсатабозлик қилаётганлар онасининг қорнида ҳам йўқ пайтларда юқорида номлари тилга олинган устозларимиз миллий матбуотимизнинг нималарга қодир эканини амалда исботлаганлар."

Ўша валломат Арслонбеков ўзини танитса юқоридаги шу гаплари учун жавоб гапларим бор эди.

"...Бурнининг тагидан нарини кўрмайдиган айрим блогерлар эса интернет имкониятларига таяниб, бутун дунёга аюҳаннос солишга уриняпти. Ўзини халқпарвар қилиб кўрсатишга жон-жаҳди билан ҳаракат қиляпти. Мақсад аниқ – қандай йўл билан бўлса-да, ўзларининг обуначилари сонини ошириб, лайк йиғиш ва пул ишлашдан иборат. Саводи ҳаминқадар сайтлар, ўпкаси йўқ блогерлар даври эртами-индин ўтади. Аммо улар келтираётган зарарни қоплаш учун анча вақт сарфлашимизга тўғри келади, холос..."

Блогерлар нима зарар етказаётганини ўйлаб тополмадим, шу тобда.

".Битта саводсиз сайтда билдирилган мулоҳаза, танқид ёки фикрдан чўчиб, ўз сўзидан қайтган айрим ҳокимлардан фарқли ўлароқ Пешку тумани ҳокими ўз газетасини қўллаб-қувватлашда давом этмоқда."

Бу мақола менга 1937-йилларни, 1952-йилларни, 1985-йилларни эслатиб юборди. Сизларгачи?

Бу валломат "журналист" "Пешку туман ҳокими ўз газетасини қўлдаб-қувватлашда давом этмоқда" деб ёзганида олаётган арзимаган маошининг бир қисмини "ишимдан айрилмай" деб обунага бериб, касал ётган боласини дорисига пул етказа олмаётган ота-оналарни аҳволини ўйлаганмикин?
Ёки қишнинг совуқ кунларида узоқ йўл босиб, совқотиб мактабга бориб келаётган боласига иссиқ кийим олиб беришни мўлжаллаган ўша ота-оналарнинг ўша пулларини мажбуран обуна учун ушлаб қолганларида улар чорасиз қолаётганини ўйлаётганмикин?
Қачон мажбурий обунадан гап очилса "ҳа энди қанчалаб пулни аллақайерларда еб-ичишга сарфлаб ҳам юборишаяпти" деб мажбурий обунани оқлашади. Аммо мажбурий обунага жалб қилиниб пули тортиб олинаётганларнинг аксариятини ҳар ой оладиган маошини тийинигача тежаб сарфлаётганлар, рўзғорига етказа олмаётган одамлар ташкил этади.
Қолаверса биз демократик давлатда яшаймизми, сиз минг матбуот керак деманг фарқи йўқ, барибир ҳеч ким ҳеч кимни пулини тортиб олишга, обуна бўладими, бошқа бўладими мажбурлашга ҳаққи йўқ. Ҳа ҳаққи йўқ.

https://t.me/joinchat/AAAAAFDsqn0uS_lzEcmvbw

​​Пастдарғомда фоҳишаларга кўмаклашган профилактика инспектори 11 йилга қамалди
Жиноят ишлари бўйича Самарқанд шаҳар судида судья Марат Эргашев раислигида номусига текканликда айблаш йўли билан ўзгаларни қўрқитиш орқали уларнинг пулларини ўзлаштириб келган профилактика инспектори ва жиноий гуруҳ аъзоларининг ноқонуний ҳаракатлари юзасидан суд иши бўлиб ўтди, дея хабар бермоқда "Севимли" телеканалнинг "Замин" янгиликлар кўрсатувида.(видеоси қўлимда бор)

Тафсилотлардан маълум бўлишича Пастдарғом туман профилактика инспектори лавозимида ишлаб келган Аслиддин Муратов 2017 йилнинг август ойидан 2018 йилнинг июнь ойигача мўмай даромад топиш мақсадида ўзи ва Д.Т. билан биргаликда уюшган жиноий гуруҳ тузиб, унга Ш.Т., М.Т., Д.Т., Ф.Н., Л.Ж., Ф.Т. исмли шахсларни жалб қилган ва жиноий шериклари билан олдиндан тузилган режа асосида бировнинг номусига текканлик айбини қўйиш орқали фуқароларга таҳдид қилиб келган.

Жиноий гуруҳ таркибидаги она ва қиз М.Т ва Ф.Т яна бир шериклари Ф.Н билан биргаликда Пастдарғом туманидаги Кимё заводи атрофида ва Самарқанд шаҳридаги Кимёгарлар қўрғонида  эркакларга жинсий алоқада бўлишни таклиф қилиб, Д.Т. истиқомат қилиб келган дала ҳовлига ёки унинг хонадонига олиб боришган. Эркаклар билан ихтиёрий равишда жинсий алоқада бўлишганидан сўнг, телефон орқали Аслиддин Муратов ва унинг ҳамтовоқлари Д.Т., Ш.Т., Д.Т. ва Л.Ж.ларга хабар беришган

Гуруҳ аъзоларининг режасига кўра,  гуруҳдаги эркаклар уларнинг устига бостириб кириши, содир бўлаётган ҳолатни видео тасвирга олиши, тузоққа илинган шахсларга ўзини М.Т., Ф.Т. ва Ф.Н.ларнинг акаси ёки турмуш ўртоғи сифатида кўрсатиб, хиёнат устида ва уй-жойга ғайриқонуний бостириб кирганликда айблаб туҳмат қилиб, ўзларини гўёки Пастдарғом туман ИИБ навбатчилик қисмига қўнғироқ қилгандек кўрсатиб, аслида олдиндан келишилган жиноий режага кўра, профилактика инспектори Аслиддин Муратовни чақиришган.

Аслиддин Муратов тузоққа тушган шахсларга қонуний чора кўриш баҳонасида хизмат хонасига олиб бориб, у ерда қўлга тушган "ўлжалар"дан 1000 АҚШ долларидан 2000 АҚШ долларигача ёки 20 миллион сўмгача бўлган пул маблағини билан олиб келган. Шунингдек агар сўралган пулни беришмаса видеоёзувларни оила аъзоларига етказиш билан пўписа қилган.

Аслиддин Муратов Жиноят Кодексининг 139-моддаси 3-қисми «а,г» бандлари, 165-моддаси 3-қисми «в» банди ва 237-моддаси 2-қисми «б,в» бандлари билан айбли деб топилиб 2 йил муддатга муайян ҳуқуқдан, яъни ички ишлар тизими ҳамда корхона, муассаса ва ташкилотларда моддий ҳамда мансабдорлик лавозимларида ишлаш ҳуқуқидан маҳрум қилиниб, 11 йил 6 ой муддатга, худди шу моддалар асосида Д.Т. 9 йил муддатга, Ш.Т. 10 йил 6 ой муддатга, Л.Ж. 10 йил 1 ой муддатга, Д.Т. 5 йил 1 ой муддатга озодликдан маҳрум қилиш жазоси тайинланди.

Жиноий гуруҳ аъзолари ҳисобланган М.Т., Ф.Н. ҳамда Ф.Т.ларга нисбаттан белгиланган озодликдан маҳрум қилиш жазоси Жиноят Кодексининг 72-моддасига асосан шартли ҳисобланиб 3 йил синов муддати белгиланди.

Фоҳишага бориб яхшигина пулга тушганларни ахлоқи алоҳида мавзу, аммо ИИ ходимининг тўдабоши бўлиши, она эса бу ишга ўз қизини ҳам жалб қилиб фоҳишаликни ҳам, ундан кейинги жараёнларда ҳам шерик бўлиб юриши шунчаки даҳшат.
Одамлар пул учун нима ишларга қўл уриб юборишмаяпти. Афсус.


https://t.me/joinchat/AAAAAFDsqn0uS_lzEcmvbw

​​Зиқна Миттал ёки Гиннессга киргулик натижамиз ҳақида

Елкамизда тоғдай бўлиб бизни босиб эзаётган маъракалар ҳақида кўп ёзаяпман. Бу мавзу жонларингга ҳам тегиб кетди шекилли. Аммо, нима қилай: Аксарият муаммоларимиз ана шу маъракапарастлигимиздан келиб чиқаяпти.

Биз турли маъракалар ўтказишда роса зўрмиз. Кеча ўтириб ўйлаб кўрсам айнан маърака ўтказишда, бир кўрсаткич бўйича дунёда ягона эканмиз. Тўғри, ўша масалада бир неча йил олдин тожикистонликлар ҳам биз билан бир хил кўрсаткичга эга эдилар. Аммо, уларда ҳукумат томонидан маъракаларни қисқартириш ҳақидаги қонун чиқиб, буни натижасида улар анча орқада қолиб кетдилар ва биз мутлоқ чемпионга айландик.
Чемпион сўзи қулоқларга ёқади а? 

Агар сиз янгиликларни доим кузатиб борсангиз уларда миллионерлар, миллиадерларнинг тўйлари ҳақида, ўша тўйларнинг ҳашамати-ю, уларга қанча миллион доллар сарфлангани ёзилади.
Эсланг, ҳиндистонлик "пўлат қироли" Митталнинг қизини турмушга чиқиш тўйи: Францияда қайсидир қасрни ижарага олиб 100 миллон доллар(!) сарфлаб шоҳона қилиб ўтказишган эди. Ўзи ҳинд миллиадерлари ўшанақа шоҳона тўйларни "мана кўриб қўйларинг" деб Европадаги қасрларда ўтказишади. Гоҳида Қозоғистон ва Россияда ҳам миллионерларни турли тўйлари ҳақида шов-шув билан ёзишади. Яна кимларнидир тўйларини шунақа шоҳона ўтганини ўқувдим, ҳозир эсимга келмаяпти. Майли буни аҳамияти йўқ.

Қизини никоҳ тўйига 100 миллион доллар сарфлаган Миттал ҳам, ану Қримда шов-шувли тўй қилган ўзбекистонлик ҳам, Қозоғистон ва Россияда тўй қилаётган турли миллионерлар ҳам тўй учун салмоқли маблағ сарфлаяптилар. Мен, масалан,  ўзбекистонликларни Тошкентда миллионлаб доллар сарфлаб тўй қилишини тасаввур ҳам қила олмайман. Россия эстрадасининг юлдузларини олиб келиб тўй қилса ҳам унча пул кетмайди-да.
Аммо,  ана ўша Миттал ҳам,  бошқаси ҳам 100 миллионлаб доллар сарфлаб тўй қилса ҳам айнан юқорида ёзганим бир кўрсаткич бўйича ўзбекистонликларга ета олмайди.

У нима кўрсаткич экан деб ўйлаяпсизми? Унда эшитинг:
Ўзбекистонликларни аксарияти қўлида бор пулни, охирги тийинигача сарфлаб тўй қилади. Етмаса камига қарз олиб бўлса ҳам қилаётган тўйида ишлатади. Тўйдан кейин секин-секин узилади-да.
Аммо Миттал ҳам, бошқаси ҳам хасислар, зиқналар фақат қўлидаги пулини озгинасини сарфлаб тўй қилади. Миллиадери 100 миллонгина сарфлайди. Қўлида 10 минг доллар пули бори 1000-2000 сарфлаб тўй қилади. Қўлида йўғи эса бизга ўхшаб қарз олмайди, никоҳ ўқитиб яшаб кетаверади.(беникоҳ яшаб кетадиганларини бу ерда гапирмадим, ҳам гуноҳ, ҳам уят бўлади) У зиқналар ҳеч қачон бизга ўхшаб қўлида борини сарфлаб, етмаганига қарз олиб тўй қилмайди. Зиқна-да, зиқна.

Зиқна бўлмаса қўлида миллиарлаб доллар пули бор одам, тўйга бор йўғи 100 миллион сарфлайдими? Номард, оғилхонангда битта чўчқанг йўқ, ундан бошқа ҳамма нарсанг бор, а мундоқ битта космик кемани оволиб, осмонга учиб чиқиб, кейин келин-куёв капсулага жойлашиб олиб , учиб чиққан ракетангни портлатиб, салют отиб тушмайсанми, биз томоша қилсак.
Ўрганиб қўй биздан. Агар қўлимизда сеникидай миллиардларимиз бўлса сен зиқналарга космосда ракета портлатиб салют отилишини кўрсатиб қўяр эдик.

Гапимдан ҳам чалғиб кетдим, нима деяётган эдим? Ҳа дарвоқе дунёда ягоналигимиз, ўхшашимиз йўқлиги ҳақида ёзаётгандим.
Биз айнан ана шу кўрсаткичда дунёда ягонамиз. Исталган давлатдаги,  исталган миллатни олинг,  ҳеч қачон қўлидаги бор-йўқ пулини сарфлаб, етмаганига қарз олиб тўй қилмайди. Аммо биз қиламиз. Биз дунёда танҳомиз-да.
Бизни айган шу масалада бемалол рекордчи деб Гиннесснинг Рекордлар китобига киритаверса бўлади.
Худо хоҳласа яқинда тўйларимизга Гиннессчиларни чақириб, тўй қилган хонадонда уларни тўйдан кейин ҳам бироз яшатиб, тўй қилган оиланинг тўйга охирги маблағигача ишлатганини,  етмаганига қарз бўлганини уларга кўрсатиб (тўйдан кейин бироз яшаса уёқ-буёқдан одамлар қарз қистаб келаверса кўрар, билар тўй соҳибларини охирги тийинларигача ўша тўйга сарфлаганларини) кейин ушбу рекордни қайд этиб қўйишларини сўраб ариза ташламоқчиман. Зора шу номинация бўйича рекорчи бўлиб Гиннессга ёзилсак, нима дединглар? 😊

https://t.me/joinchat/AAAAAFDsqn0uS_lzEcmvbw

​​Халқ ўз қаҳрамонларини билиб қўйиши керак

Хабарларинг бор кеча мажбурий обунани ёқлаб, шунчаки ёқласа ҳам майли, ўзининг гўнг ҳиди келиб турган "Пешку ҳокими "жиноят" устида қўлга тушди" деган мақоласида блогерларга роса тош отган, уларни ҳатто ҳақорат қилган валломатнинг кимлиги аниқланди.
Бу ҳақда Хушнудбек Худайбердиев ўзининг Xushnudbek.uz телеграм каналида маълум қилди

"Ўша мақола муаллифи сифатида кўрсатилган Умид Арслонбеков аслида тахаллус экан, бунақа одам йўқ эмиш. Суриштирувларим натижасида аниқландики, бу мақоланинг асл муаллифи «Иқтисодий газета» номли газетанинг бош муҳаррири Миродил Абдураҳмонов экан.

Муаллиф ҳимоя қилаётган миллий матбуот, наҳот шу бўлса?
Тахаллус ортига бекиниб олиб, ўзгаларни ҳақорат қиладиган, совет давридаги «юмалоқ хатлар» билан ўзгалар шаънини ерга уришга интиладиган журналистлар миллий матбуотни белгилаб берадими? Йўқ, миллий матбуот тушунчаси анча юқорида! Бунақа чиқишлар унинг нуфузини тушуради холос.

Ҳали мана шунақа, ёзган мақоласида ўз номини ошкор қилишга қўрқадиган айрим журналистлар учун шифокор ёки ўқитувчилар, талабалару бошқа миллионлаб ишчиларнинг ҳалол ишлаб топган пулларини қароқчилардай мажбуран тортиб олишни оқлашимиз керакми?
Бошқаларга балки бунақа «қароқчилик» маъқулдир, лекин шахсан мен бунга рози эмасман.

Пешку туман ҳокимининг мажбурий обуна ҳақидаги фармойишида юқоридаги мақола муаллифи муҳаррирлик қиладиган газета ҳам рўйхатга киритилган экан.
Масалан, ўша Пахта
тозалаш заводига юборилган хатда «Иқтисодий газета»га  4 дона мажбурий обуна бўлиш ёзилган.
Ҳаммаси тушунарли... No comment"


Бугун ўша туҳмат мақолани ёзган муаллифнинг каззоб ёлғончилиги ҳақида янги маълумотлар чиқди:

Кечаги мақоладан парча:

Пешку тумани ҳокими ночор аҳволдаги туман газетасини қўллаб-қувватлаш ниятида 200 та обуна уюштириш тўғрисида фармойиш чиқарганини гўёки «жиноят»га тенглаштираётган «дўстларимиз» Бухоро вилоятининг чекка бир туманидаги ана шу нашрда бор йўғи биргина олий маълумотли журналист ишлашидан хабардормикин? 500 минг сўм атрофида ойлик олаётган 4 нафар техник ходим минг бир қийинчиликларга қарамай «Пешку овози»ни чиқармоқда.

АСЛИДА:
Аниқланишича, "Пешку овози" газетасида бирорта олий маълумотли журналист ишламас экан. Бош муҳаррири бўлган Ҳ.Шаропова мутахассислиги бўйича кутубхоначи экан. Кейин таҳририятда 4 нафар эмас, 2 нафар техник ходим ишларкан холос. Мақолани ёзган муаллиф жаноби олийлари ёлғон гапирмасдан ёзса, бўлмасмикин?

Қаранг, Пешку туман ҳокими 4 дона газетасини мажбурий обуна ортидан обуна қилиб бергани учун ҳокимни оқлаб мақола ёзаяпти. 4 дона газетанинг обунаси учун ўз мақоласида кўплаб инсонларга туҳмат қилиб, мақоласида ёлғон маълумотларни ёзиб виждонини сотаяпти.

"Мана матбуотнинг юзи дей" десам бу ёлғончи ва бунга ўхшаганлар ҳеч қачон матбуотнинг юзи бўла олмайди. Аммо..., матбуотни обрўсини яхшигина тушириб юрибди. Матбуот бундай одамлардан тезроқ қутилиши керак, акс ҳолда мисқоллаб йиғилган озгина обрў ҳам бир пул бўлади.

https://t.me/joinchat/AAAAAFDsqn0uS_lzEcmvbw

​​"Ўзбекэнерго" тараққиёт кушандаси(ми)?

Охирги пайтларда "Тошкент Сити, "Тез ёрдамга авиация хизматини жорий қилиш", "Электрон шаклда иш юритиш" каби гапларни ўқиб энсам қотадиган бўп қолди.
Сабаби бугун ҳанузгача оғир аҳволда қолаётган қишлоқларда одамлар қийналиб яшаётганда ундай хабарлар энсани қотиради-да.

Масалан: Бугун чироқ соат 6 да ўчган эди, соат 10 бўлаяпти ҳали ёнгани йўқ. Чироқ йўқлиги сабаб маҳалламиздаги антенна ишламаяпти ва алоқа умуман йўқ. Интернет+қўнғироқлар билан боғлиқ ишларим борлиги учун соат 7 яримларда маҳалла марказига чиқдим. Баъзида узоқлардан антенна келар эди. У ерда ҳам алоқа йўқ. Ана шу антенна 30 минг аҳолиси бор қишлоққа хизмат қилишини инобатга олсак, унинг муҳимлик даражасини ўзингиз чамалаб олаверинг. Хўш, 4 соатдан бери чироқ йўқлиги ортидан алоқа йўқ, бундай ҳолатларда интернет ва қўнғироқ билан боғлиқ иши борлар нима қилсин? Қўққисдан тез ёрдамга муҳтож бўлиб қоладиганлар-чи? Иссиқ кабинетда котибаси дамлаб берган чойни ичиб турли орзулар қилиб ўтирганлар олдин шу ҳақда ўйлашлари керак эмасми?

Бир пайтлар суткасига 4 соат чироқ берилганда аксарият антенна қурилмалари қуёш панеллари ёки движоклар билан жиҳозланган эди. Шу сабабли чироқ бўлмаган пайтда ҳам алоқа бўлар эди. Энди эса чироқ панд бераяпти. Қуёш панеллари ва движоклар таъмирталаб бўлиб ётибди. Оқибатда эса халқ қийналаяпти.
Чироқсиз ўтиришни яна бир ёмон томони музофотимиздаги аксарият ичимлик суви артезиан қудуқларидан олинади. Чироқ йўқми, демак сув ҳам йўқ. Буни эса ўйлашни ўзи даҳшат.

Тошкент пропискаси ҳақида кўп ва хўп гапирилаяпти. Агар қишлоқларда ҳам инфратузилма, йўллар, алоқа яхши қилиб қўйилса, турли муаммолар бўлмаса Тошкентга бориб яшаб қолишга ҳеч ким зормас. Халқ ўз ҳудудида шароит йўқлиги учун Тошкентга қараб интилаяпти. Агар турли муаммолар бўлмаса ҳавоси тоза қишлоғини ҳавоси заҳарга айланиб бўлган шовқин шаҳарга ким алмашади? Ҳеч ким.

Яқинда "Ўзбекэнерго" раҳбари Афғонистонга экспорт қилинаётган электр энергияси ҳақида гапириб "Биз фақат қўшнилардан олган электр энергияни Афғонистонга бераяпмиз. Ўзимизда ишлаб чиқарилгани ўзимизга берилаяпти" деди. Хўш, ўзимизни халқ чироқ йўқлиги оқибатида турли муаммолар остида қийналиб яшаётганда Афғонистонга электр энергиясини экспорт қилиш қанчалик тўғри?
(Шу йил баҳорда Ўзбекэнерго Афғонистонга экспорт қилинаётган электр энергияси миқдорини оширишини маълум қилган эди. Қолганини ўзларинг тушуниб олаверинглар)

"Ўзбекэнерго" раҳбари кўзини каттароқ очиб қарасин-чи, дунёнинг қайси давлатида халқига зарур бўлган нарсани бермай, уни бошқа давлатга экспорт қилиб, буни оқибатида ўз халқини оғир аҳволга солиб қўйиш ҳолати бор? 

Ўтган даврда 20 йил ит азобида чироқсиз яшадик. Буни муаммо сифатида кўтариб чиқишни иложи ҳам бўлмади. Бугун биз бошқа даврда яшаяпмиз. Энди ўша қийин кунлар жон-жонидан ўтиб кетган халқ бир кун ҳам чироқсиз ўтирмоқчи эмас.
Шундай экан "Ўзбекэнерго" раҳбари ё халққа чироқни етказиб берсин ёки ишни эплай олмаса ўрнини бошқа эплаб бажарадиганга бўшатиб берсин.

МИБ хизмати ташкил этилганидан сўнг аҳоли ишлатган чироғини пулини олдиндан тўлашга ўрганди.
Ҳозир аксарият одамларда қарздорлик йўқ. Шахсан мени хонадонимда ўрнатилган ҳисоблагич олдиндан пул тўласамгина ишлайди. Шундай экан энди чироқ учун олдиндан пул тўлаётган аҳолини "чироғимни ёқиб қўй" деб талаб қилишга ҳаққи бор.

Қолаверса биз режалаётган ишларни ҳаммаси чироқ билан бажарилади. Чироқсиз тараққиётга ҳам эришиб бўлмайди, бошқа ишларни ҳам қилиб бўлмайди. Уйда фақат товуқ боқиб ўтирса бўлади. Айтгунча уларни дон-дуни ҳам қиммат. Демак фақат бекорчиликда, "Эй Худо, шуларга ҳам инсоф бер" деб "Ўзбекэнерго"ни дуо қип ўтирса бўлади. Бошқа чора йўқ.

П.С. Эрталаб  6 да ўчган чироқ ҳозир 11 да ёнди. Мен кетдим. Постни каналга жойлай.🏃🏃

https://t.me/joinchat/AAAAAFDsqn0uS_lzEcmvbw

​​"Ўзбек кўрса қизиқар" ёки байроқлар ва қорбоболар пойгаси

Сиз тарафларда билмадим-у, биз тарафларда "Ўзбек кўрса қизиқар" деган ибора бор. Буни маъноси шу-ки биров бир нарсани ёки бир ишни кўрмаса эсига тушмайди, аммо кўрганидан кейин дарров ўша ишни қилгси, олгиси келади. Ана шундан келиб чиқиб ўша ибора ишлатилган.

Энди иборани ўзига келсак, роса топиб айтилган ибора. Аксариятимизда ана шу "кўрса қизиқар" характери бор.
Узоққа бормайлик: Байроқ ўрнатиш иши. Олдинига Тошкентда, кейин эса бошқа вилояларда мусобақадай баланд устунларга байроқ ўрнатиш бошланиб кетди.

Ёки яна бир иш: Яқинда Тошкент шаҳар ҳокимлиги шаҳар кўчаларида 505 нафар қорбоболарни йиғди. Ўшанда ОАВларда "Тошкент шаҳар ҳокимлигининг ташаббуси билан йиғилган бу қорбоболар янги йил байрами арафасида Тошкент маҳаллаларида кам таъминланган, ногирон шахсларни янги йил билан табриклаб чиқишади" деб Тошкент шаҳар ҳокимиятига асосланиб хабар тарқатишди. Ўшанда ўша хабарни ўқиб, "ишқилиб шу янгиликни бошқалар ҳам кимўзарга ўзлаштириб олмасин-да" деб ўйлавдим. Бежизга ўйламаган эканман. Мана, кеча Андижон тарафлардан дарак чиқди. Нима эмиш: "Ёшлар Иттифоқи Андижон вилоят кенгаши ташаббус кўрсатиб Янги йилда 1000 та қорбобо лойиҳасини ташкил этибди ва ўша қорбоболарни 600 нафарини тўплабди"

Лойиҳадан кўзланган мақсад "31 декабрь кунига қадар 12 ёшгача бўлган болаларга байрам шукуҳини улашиш учун ҳар бир маҳаллада, кўп қаватли уйлар олдида ва болалар майдончаларида байрам тадбирларини ташкил этиш, имконияти чекланган ўғил-қизлар, кам таъминланган оилалар фарзандларининг кўнглини олиш, уларга ҳомийларнинг байрам совғаларини етказиб бериш" экан.
Қойилмисиз?

Ҳали байрамгача 5 кун бор. Қани, энди эстафетани қайси вилоят давом эттириб, қорбоболарини сонини Андижондаги қорбоболар сонидан ошира олар экан?
Ёшлар Иттифоқининг бошқа вилоятлар кенгашлари, сизларни Андижон вилояти кенгашидан нима кам жойингиз бор? Ҳеч қандай. Агар сизлар хоҳласангиз қорбоболар сонини 2000 нафардан ошира оласизлар.

Хабарларинг бор, яқинда Наманган отчопарида 400 та машинадан улкан арчани ясашди. У ҳали тайёргарлик жараёни эди. Асосий тадбир 31 декабрь куни соат 00:00 га мўлжалланган. Ўшанда 500 та машина чироқларини ёқиб арча кўринишини ясаб бу иш ортидан наманганлик ҳайдовчилар рекордлар қўйишмоқчи.

Энди наманганлик ҳайдовчиларни ўша ишларини кўриб "кейинги йил эстафетани ким қўлга олар экан ва 1000 та машинадан иборат улкан арчани ким ясар экан?" деб ўйлаяпман. Самарқанд, Қарши, Тошкент, ким "ташаббус" кўрсатаркин?

Энди бу ишларга келсак Навоийда ўрнатилган байроққа 1.5 миллиард сўм ишлатилиши
ёки Тошкентдаги 500, Андижондаги 1000 нафар қорбобонинг кийими учун сарфланаётган пуллар, менга пулни исроф қилиш бўлиб туюлади.
Масалан: Агар ҳар бир қорбобонинг кийими учун ўртача 200 минг сўм сарфланса(Яктаги, бош кийими, соқоли, калтаги, қопи учун сарфланади, шунча пул) 500 та кийимга 100 миллион сўм кетади. 1000 тасига эса 200 миллион сўм сарфланади. Тошкентдаги қорбоболар кимни ҳисобидан кийинади, бу бошқа мавзу. Аммо Андижондаги Ёшлар Иттифоқи вилоят кенгаши лойиҳасидаги қорбоболар кимни ҳисобидан қорбобо бўлаяптилар? Ёшлар иттифоқи ўша қорбоболарнинг кийими учун сарфланадиган тахминий 200 миллионни бошқа биронта фойдалироқ ишга сарфласа бўлмасмиди?
Айтишингиз мумкин: "Балки ўша пулни Ёшлар иттифоқи бермай ёшлар етакчилари ўзини ёнидан сарфлаётгандир" деб. Хўш, ўша етакчилар пулни ота-онасидан олиб ишлатадими ёки иттифоқдан олган маъошиданми фарқи йўқ, ҳар қанақасига ўша пулларни исроф бўлиш аҳамияти йўқолмайди.
Шундай экан Иттифоқ ва унинг вилоят кенгашлари "ўзбек кўрса қизиқар" иборасини ҳақлигини исботламай бошқа бирон фойдалироқ иш билан шуғуллансалар ва совғаларини қорбоболарсиз тарқатсалар ҳам бўлар эди. Ёки мен адашаяпман-у, улар йиққан қорбоблар кўнгиллилармикан?

https://t.me/joinchat/AAAAAFDsqn0uS_lzEcmvbw