-

يا كثر الأرقام عندي مير ما فيها
غير 4 ارقام .. والباقي نسيناها

ماهوب في ساعة الشدة وطاريها
حتى [ على دلةٍ ] فالنار مركاها .!

-

طال الصبر والشوق ما جاء بـ غالين
حتى انخطف لون المحبة وانا أشوف..

-
غايبي .. يا قرب غيباتك و قربك مني
لا تساورك الظنون و رغبتك معروفة

أدري انك ما تحب .. ولو يحبك جني
غير من تحلف عليه ويضربك بالطوفة!

قلت لك بتروح لكن .. منته بـ متهني
خابرٍ حبي عذاب و نظرتك منصوفة

وانت ما صدقتني وأخلفتني مع ظني
مادريت الا مكانك فاضي و رح شوفه

غبت مدري وين أنا عنك وّينك عني ؟
الليالي ميـّـته .. والقلب زايد خوفه

كني اللي شيّبت فيه السنين.. و كني
واحد ٍدوب الزمان يقالبه بـ صدوفه

ولو أعيش العمر كله " عاشق و متمني "
أفضل من أعيش شايل فالضمير حسوفة
-

..

يا ولد عمي .. بذكرك كان انك نسيت
ابن عمك لا قسى الوقت مزبان و غناه

والله ان أشرّ عذرٍ ما عندي له (ياليت)
عذري لـ بن عم أغليه وأدور رضاه ..!

..

..

ليتي أحسب ذنوبي مع حسَناتي
أبرك من الحسابات التجارية

الدراهم .. لو تحقـق مسرّاتي
خابر انها ما تسوى عين حورية

والله أني ما غير أخاف وآحاتي
وأذكر الله وأشوف الناس مبلية

بلوةٍ ماهي بـ شفي و مشهاتي
وان تكلمت قالوا : فيه نفسية !

أخسر الناس لكن ما أخسر ذاتي
وش حياتي لا صارت غير شرعية ؟!

جعلني .. ما أتهنى في ملذاتي
كان ماهي ملذات ٍ سماوية

..

-

ازعل صحيح ولا يراضونك بماش
وساع الحلوق مكبرين العلابي ..!!

-

افرح و معك أفراحنا دوم تزداد
يا سيّد الملعب .. زعيم الرياضة

انت الزعيم العالمي فخر الأمجاد
اللي ما جات بطَرْس يبكي بياضه

وصيف للعالم على روس الأشهاد
يصعب على الزعلان حتى اعتراضه

بس الهلالي لو زعل منك ، وش عاد!
بأقرب ( بطولة ) حب خشمه و راضه (:
.
.
.
بمناسبة حصول الهلال على دوري روشن السعودي لعام 24 / 23 .🤍💙

إلى الطفلة "مها" :
.
.
.
يا سميّ الظبي في صدري فياضٍ لك وسيعة
جارها الله من صواديف الزمان و من كروبه

لو يشوفوني بعض الأحيان "قاسي" بالطبيعة
أبغي أحمي ما بقى مني لـ "مزيونة و عوبـة "

عيد أضحى مبارك على الجميع.

..

انا ليا ضاق بالي حزة عصير
دورت لي خط فالدار وعطيته

فوق اشقح ماعليه من المشاوير
كنه عضيدي ليا ضقت ونخيته

ثم قام والراس فيه من السعاطير
ما يجعل الصعب هيّن لا بكيته

لو حاجتي من ورى ثهلان والنير
عزايمه فالجمالة مستميته

ماهوب مثبـورٍ ربايـة مثابير
عبد المرَه ما يفارق شق بيته

يشري و يبتاع في سوق المعاذير
وانا يا كم عذر طيّب ما شريته

فرقاه عني جعل ماله مداوير
واعطوني سويك جيبي لا بغيته

خلوني اسج وادله وانقل الطير
واحرق مع التتن همٍ ما شكيته

يامعذربين الvtc لجل المخاسير
خسايره ما تساوي ربـع صيته

هذا ليا قيل " مركوب المناعير "
ماهوب مركوب للّاش و خويته

ولا يركبه واحدٍ نفسه شمنصير
و ريال يحيـيه .. و ريالٍ يميـته

يفداه مـوتـر يسوقنّـه غنادير
ما تعرف اللي بوسطه لا لقيته

بدر عايض
2023 \ 6 \ 21

,,

بيّاعة الدين بالدنيا
ياجعل ماهم ربوعٍ لي

عزومهم دايماً ونيا
وواحدهم حمارٍ مفلّي!

،،

وانتم بكرامة ..