.

اذا قالوا ان الليل يجحد جميل النور
تلفّت وراك ، و دوّر وجيه منجحدة ..

-
كثر ما آصل ديـار اقـول ما رحـت ديرة
ومن نشد عن علومي قلت هذا مكاني

ليـن قابـلـت نـقـّال العـلـوم الخطيرة
واحــدٍ لـو أعـلـمـه بالخـفـايا .. بلاني

بـكـرة اللابــة تــدوّر وراي العـشـيـرة
وان دروا عـنـها الحكّام جـاك ابن ثاني

ثم عـقـلي من اللي يجوّده عن مطيره؟
والله إن العَشِـر لتـروح خمس و ثماني

وأنا عـاشـق و فيّ حمـيّـة و فيّ غِـيـرة
وأحرص من القعيطي في هواي الأناني

بـدويٍ ركـب وأبـعـد مـعـشّى بعيـره
والعـويّـد شـريـطيّ البهـم وين جاني

خـابـره ما يـروح و كـان راح لـ قصِيره
لا سـواقـة يـسـوق ولا مـزاج ٍ يـداني

قلت وش عندك؟ وقال المطالب كثيرة
قال وش عندك؟ وقلت البهم والدناني!

كشّـر و طيّـر حجاجه و جاء فـيـه حيرة
ميـر صديـت عنـه أخـاف " زلة لساني "

ضايقٍ صدري و مشـغول فكري بـ غيره
قال لي ما تبـاني ؟ ، قلت " لا ما تبـاني "

بدر عايض

يا اللي على بعض المقاهي تمرّون
والكل منكم ماسـكٍ تيلـفونـه ..


أنا من اللي لا اطلعوا بـ يتمشّون
راحوا وسط جـوٍ تطارد جنونـه ..

-

يا كثر الأرقام عندي مير ما فيها
غير 4 ارقام .. والباقي نسيناها

ماهوب في ساعة الشدة وطاريها
حتى [ على دلةٍ ] فالنار مركاها .!

-

طال الصبر والشوق ما جاء بـ غالين
حتى انخطف لون المحبة وانا أشوف..

-
غايبي .. يا قرب غيباتك و قربك مني
لا تساورك الظنون و رغبتك معروفة

أدري انك ما تحب .. ولو يحبك جني
غير من تحلف عليه ويضربك بالطوفة!

قلت لك بتروح لكن .. منته بـ متهني
خابرٍ حبي عذاب و نظرتك منصوفة

وانت ما صدقتني وأخلفتني مع ظني
مادريت الا مكانك فاضي و رح شوفه

غبت مدري وين أنا عنك وّينك عني ؟
الليالي ميـّـته .. والقلب زايد خوفه

كني اللي شيّبت فيه السنين.. و كني
واحد ٍدوب الزمان يقالبه بـ صدوفه

ولو أعيش العمر كله " عاشق و متمني "
أفضل من أعيش شايل فالضمير حسوفة
-

..

يا ولد عمي .. بذكرك كان انك نسيت
ابن عمك لا قسى الوقت مزبان و غناه

والله ان أشرّ عذرٍ ما عندي له (ياليت)
عذري لـ بن عم أغليه وأدور رضاه ..!

..

..

ليتي أحسب ذنوبي مع حسَناتي
أبرك من الحسابات التجارية

الدراهم .. لو تحقـق مسرّاتي
خابر انها ما تسوى عين حورية

والله أني ما غير أخاف وآحاتي
وأذكر الله وأشوف الناس مبلية

بلوةٍ ماهي بـ شفي و مشهاتي
وان تكلمت قالوا : فيه نفسية !

أخسر الناس لكن ما أخسر ذاتي
وش حياتي لا صارت غير شرعية ؟!

جعلني .. ما أتهنى في ملذاتي
كان ماهي ملذات ٍ سماوية

..

-

ازعل صحيح ولا يراضونك بماش
وساع الحلوق مكبرين العلابي ..!!

-

افرح و معك أفراحنا دوم تزداد
يا سيّد الملعب .. زعيم الرياضة

انت الزعيم العالمي فخر الأمجاد
اللي ما جات بطَرْس يبكي بياضه

وصيف للعالم على روس الأشهاد
يصعب على الزعلان حتى اعتراضه

بس الهلالي لو زعل منك ، وش عاد!
بأقرب ( بطولة ) حب خشمه و راضه (:
.
.
.
بمناسبة حصول الهلال على دوري روشن السعودي لعام 24 / 23 .🤍💙

إلى الطفلة "مها" :
.
.
.
يا سميّ الظبي في صدري فياضٍ لك وسيعة
جارها الله من صواديف الزمان و من كروبه

لو يشوفوني بعض الأحيان "قاسي" بالطبيعة
أبغي أحمي ما بقى مني لـ "مزيونة و عوبـة "