‏يا صاحبٍ ما حفظت الود وقت البعاد
‏ما اقسى من الطعنة ألا كف من جابها

‏وش جاك مني؟ بجاه اللي رفع هالشداد
‏أنشدك .. وأنا عزيز .. و نفسي أدرابها

‏لو كان غيرك .."رزق ربي فجوج البلاد"
‏ماني بـ محتار في الضيقة ولا أسبابها

‏وأنت تعرفني وتعرف نظرتي في العباد
‏وتعرف شرهاتي ، ولا تحسب حسابها !!

"في قلبي ما أتمنى ..
وفي قدرك ماهو خير"

‏يقول الأديب محمد الماغوط
‏"ما من موهبة تمر بلا عقاب!"
‏ويقول د. غازي القصيبي
‏"ما من موقف يمر بلا ثمن!"
‏ويقول الفقير إلى الله بدر عايض
‏"ما من واجب يمر بلا تصوير!"
-

‏.
سؤالك المطلوب .. والأوْلى
‏وان غاب عني يوم ، يا ويلك!

‏لاتقول لي (حولك مجي) أو لا ؟
‏قل بس مشتاق لْك وأجي لك (:
.

‏-

آآآخ يا فرقى غيابك والخبر بالحيل صادم
‏لا قدرت أسج عنه ولا عرفت أحسن ظنوني

‏وأنت ما مثلك حبيب ولا صديق ولا بنادم
‏كيف يا واحد سكنت عيوني .. تبكّي عيوني ؟

-

‏-
كاني ألحقت المقفين الحسوفة
‏ما يحق ليَ : الفخر و الإعتزازي

‏وابك أنا علمي ليا صمّل تشوفه
‏فيه طنخة عودي و قفلة حجازي
-

-

لا تهملني .. وتستعجل غيابك
ولا تسلمني فديتك للحسايف

ذكريات الحب والعطر وكتابك
لا تحسب انها من صغار الكلايف

-

‏رحلت وما توقعتك كذا ترحل وكنك تشوم!
‏قصيرة سالفتك ومشيَتك عجلة .. وذاكرها .

.
‏الإندفاع اللي بلا علم و سياسة
‏طيحة ٍ من عالي الرجم روّاسي!

‏والسوالف كانها كذب و بلاسة
‏جعلها تفدى طناختك يا راسي!
.

‏.
كل ما جيتك وانا ضامي" بيرك
‏رحت أدور في مخاسيري أرباحي

‏بالعيون تديرني كني .. صغيرك
‏لو تلحّ بـ عينك أضيّع إلحاحي

‏والله إن زينك من أولك لـ أخيرك
‏يستحق أسهر معه سهر صبّاحي
.

..
لي صاحبً يالربع جاهل ومطفوق
وانا تعبت أزنّده .. بالنصايح

ان جيت له من باب الأخلاق والذوق
راح يتناوش .. بايكات الفضايح

العلم يا برقا وأبا العلم يا روق ؟
والعلم ياللي تكسبون المدايح ؟

خوفي لا يبلاني مع الناس بحقوق
لا صار هو دايم معي جاي/رايح!
..

‏-
يا نديمي خل عنك ( يصير و ما يصير )
‏وأخذ علمٍ من تجارب و روس مكفّيه..


‏لا ابتلاك الله و حبّيت بإحساس و ضمير
‏لا تسولف عن "كرامتك" وَهْي مقفّيه ..!!
-

‏-
م أقدر أنساك وأنسى عشرتك لو يوم
‏والله اللي ذبحني فيك .. وأحياني
‏َ
في محبتك أنا المعطى وأنا المحروم
‏ياحبيب ٍ .. صفيت لـ واحد ٍ ثاني!
-

-


مانيب داري عن اللي ما درى عني
لو هو من أحبابي الغالين وأصحابي

أنا و طاريه .. مثل الذيب والجني
من عقب ما كان مثل العطر بثيابي!


-

-

رجلٍ ما حصّل في زمانه شيّ
ألا .. مُعانـاتـه و كم بسمة

طوَته .. الأقدار العنيدة .. طيّ
ومعاركه ، ماهيب .. منحسمه

ممرورة ٍ كبده .. و وضعه سيّ
ويحنّ .. للأجواد و النسمة

وشاعر عشان انه ماهوب شويّ
توصل لك أبياته بدون ( اسمه )

-

.

يا محمود لو بيديني أجيك يوميًا
لكن جيةٍ من دون لازم ما تلزمني

مدام الأمور مسنعة معك .. حاليًا
أنا في رجا الله لين الأسباب تخدمني

علشان أشوف اللي لعب فيّ نفسيًا
من الزين فيه.. أفكر شلون يفهمني؟

عشقته جنونيًا . . و أعامله سلميًا
والأخلاق دايم عند الأحباب تحرمني

.

‏-
يا عبث روحي و يا سِرّ اختلافي
‏مع شعوب الأرض و نجوم المجرة

‏لو تحبين الشعر .. ماهوب كافي
‏ولو تحبين السكوت أموت حرة !
-

-
من قلة الحيلة و من ضيعة السُبل
وش عاد أقول من التجارب وأخلي؟

أحيان أقول الله على عيشة الخبل
اللي ما يعقل غير .. لا جاء يصلي
-