Без незалежнай Беларусі не будзе трывалай бяспекі ў нашым рэгіёне

«Не будзе трывалай бяспекі ў Цэнтральнай Еўропе, пакуль Беларусь застаецца пад расійскім ваенным і палітычным кантролем. Беларусь — гэта не перыферыя рэгіёна, а адзін з ключавых элементаў яго будучай архітэктуры бяспекі», — падкрэсліў спікер Каардынацыйнай Рады Арцём Брухан падчас XXXV Эканамічнага форуму ў Карпачы на панэльнай дыскусіі «Цэнтральная Еўропа — стратэгічная роля рэгіёна ў фарміраванні архітэктуры бяспекі».

У панэльнай дыскусіі таксама ўзялі ўдзел кіраўнік румынскай грамадскай арганізацыі Asociația Lupii Tricolori Адрыян Бэзэван, дырэктарка прадстаўніцтва Еўрапейскай камісіі ў Польшчы Катажына Смык, генеральны дырэктар венгерскай кансалтынгавай кампаніі Caroberto Advisory Міхай Рашончы-Ковач і былы намеснік дырэктара Дэпартамента Цэнтральнай Еўропы МЗС Чэхіі Марцін Свароўскі.

Падчас дыскусіі Арцём Брухан адзначыў, што пасля 2020 года Лукашэнка фактычна абмяняў частку дзяржаўнага суверэнітэту на гарантыю захавання ўласнай улады, а пасля 2022 года гэта залежнасць набыла яшчэ і прамое ваеннае вымярэнне. Дзеля ўтрымання ўлады рэжым аддаў Крамлю ваенны, палітычны, эканамічны, энергетычны, інфармацыйны і культурны суверэнітэт Беларусі.

«Аднак гэты працэс не з'яўляецца незваротным. Беларусь дагэтуль мае ўласныя дзяржаўныя інстытуты, грамадства, нацыянальную ідэнтычнасць і моцнае імкненне грамадзян да незалежнасці», — падкрэсліў спікер КР.

Каб Беларусь мела дэмакратычную перспектыву, важна інвеставаць у беларускае грамадства:

«Вы інвестуеце ва ўласную абарону і абарончыя праекты, і гэта, безумоўна, вельмі важна. Але не менш важна інвеставаць у тое, каб Беларусь стала часткай бяспекі рэгіёна, а не крыніцай пагрозы.

«Будучыня Беларусі — гэта пытанне не толькі свободы беларусаў. Гэта пытанне бяспекі Польшчы, Украіны, краін Балтыі і ўсёй Еўропы. Без незалежнай Беларусі не будзе трывалай бяспекі ў нашым рэгіёне», — падкрэсліў Арцём Брухан.

Каардынацыйная Рада і дэпутаты Вярхоўнай Рады Ўкраіны абмеркавалі сыстэмнае супрацоўніцтва

Адбылася сустрэча працоўнай групы Каардынацыйнай Рады па ўзаемадзеяньні з Украінай з прадстаўнікамі міжфракцыйнага дэпутацкага аб’яднаньня Вярхоўнай Рады Ўкраіны «За дэмакратычную Беларусь».

Украінскі бок прадстаўлялі народныя дэпутаты Ўкраіны Вадзім Галайчук, Ігар Гузь і Мікіта Патураеў. Да сустрэчы таксама далучыўся пасол з асаблівых даручэньняў Міністэрства замежных справаў Украіны Яраслаў Чорногор, які адказвае за ўзаемадзеяньне зь беларускімі дэмакратычнымі сіламі.

Ад беларускага боку ўдзел у сустрэчы ўзялі Дзьмітрый Шчыгельскі, Юрась Зянковіч, Вадзім Кабанчук, Вольга Зазулінская, Мікіта Сямяненка і Павал Мар’еўскі. У сустрэчы таксама ўзяў удзел Сьпікер Каардынацыйнай Рады Арцём Брухан.

Асноўнай тэмай стала стварэньне сыстэмнага фармату ўзаемадзеяньня паміж працоўнай групай КР і міжфракцыйным аб’яднаньнем Вярхоўнай Рады. Бакі абмеркавалі магчымасьці рэгулярных кантактаў, каардынацыі пазыцыяў і рэалізацыі супольных ініцыятываў.

Асобная ўвага была нададзеная супрацоўніцтву на міжнародных парлямэнцкіх пляцоўках, у тым ліку ў Парлямэнцкай асамблеі АБСЭ, Парлямэнцкай асамблеі Рады Эўропы і Кангрэсе мясцовых і рэгіянальных уладаў Рады Эўропы.

Таксама былі разгледжаныя заканадаўчыя ініцыятывы Вярхоўнай Рады Ўкраіны, зьвязаныя зь Беларусьсю, і магчымыя напрамкі далейшага беларуска-ўкраінскага палітычнага ўзаемадзеяньня.

Сыстэмны дыялёг з украінскімі парлямэнтарыямі мае асаблівае значэньне ва ўмовах вайны Расеі супраць Украіны і глыбокай залежнасьці рэжыму Лукашэнкі ад Расеі ў сфэры бясьпекі. Незалежная і дэмакратычная Беларусь адпавядае ня толькі нацыянальным інтарэсам беларусаў, але і доўгатэрміновым інтарэсам бясьпекі Ўкраіны і ўсяго рэгіёну.

Каардынацыйная Рада разглядае разьвіцьцё непасрэдных сувязяў з Вярхоўнай Радай Украіны як адзін з практычных мэханізмаў умацаваньня беларускай міжнароднай суб’ектнасьці і беларуска-ўкраінскага партнэрства.