У Парламентскай асамблеі Рады Еўропы сёння, 23 красавіка, адбыўся сайд-івэнт
«Як працуе “Рускі свет”: ідэалогія і практыкі гібрыднай агрэсіі супраць Еўропы».

Мерапрыемства падрыхтавала Дэлегацыя беларускіх дэмакратычных сілаў у ПАРЭ, сфармаваная з членаў Каардынацыйнай Рады.

Адбылася сапраўдная дыскусія, арыентаваная на пошук рашэнняў. Галоўная мэта — даць дэлегатам ПАРЭ разуменне пагроз, якія сыходзяць ад “рускага міру”: як ён працуе і якія інструменты выкарыстоўвае. Спосабы барацьбы з гэтай з’явай абмяркоўваліся асобна.

Галоўны дакладчык — Павел Церашковіч, член Дэлегацыі дэмакратычных сіл Беларусі ў ПАРЭ, дарадца Святланы Ціханоўскай па пытаннях адукацыі і навукі. У сваёй прамове ён засяродзіў увагу не толькі на гісторыі пытання і асноўных ідэолагах “рускага міру”, але і на сродках яго распаўсюджвання. На канкрэтных прыкладах было паказана, як гэтая ідэалогія сёння працуе ў Беларусі.

— Беларуская мова сёння — мова свабоды, дэмакратыі і супраціву, — адзначыў Церашковіч. — Мы размаўляем з рэжымам на розных мовах.

— Жыве Беларусь! — завяршыў свой каментар пасля выступу Церашковіча спадар Густаў Гётберг, член шведскай дэлегацыі, першы намеснік старшыні Камітэта па прававых пытаннях і правах чалавека.

Спадарыня Яўгенія Краўчук, член пастаяннай дэлегацыі Украіны ў ПАРЭ (АЛДЭ), старшыня падкамітэта па СМІ і інфармацыйным грамадстве, распавяла пра асаблівасці “рускага міру” ва Украіне. Яна адзначыла ролю рускай мовы як інструмента ўплыву, а таксама РПЦ як канала распаўсюджвання гэтай ідэалогіі.

Доктар Адам Боднар, член пастаяннай дэлегацыі Польшчы ў ПАРЭ (ЕНП/ХД), сенатар, засяродзіў свой выступ на шляхах дэстабілізацыі ў Польшчы: сітуацыі на мяжы, міграцыйным крызісе, шпіянажы і сабатажы. Паводле яго, гэтыя дзеянні накіраваныя на дэстабілізацыю сітуацыі ў краіне і стварэнне атмасферы страху. Асобна ён адзначыў шырокае выкарыстанне дэзінфармацыі і псеўданавуковых тэорый.

Важныя каментары таксама прагучалі ад Паўла Латушкі і Валера Мацкевіча.

— Мы разумеем стратэгію ЕС і краін-суседак Беларусі — Польшчы, Літвы, Латвіі, якія інвестуюць значныя сродкі ў будаўніцтва абарончых збудаванняў і павышэнне абароназдольнасці. Аднак, на маю думку, неабходна двухпланавая стратэгія. Важна значна больш інвеставаць у супрацьдзеянне “рускаму міру” ўнутры беларускага грамадства, бо менавіта яно можа стаць гарантам бяспекі для суседзяў, — адзначыў Павел Латушка.

Валер Мацкевіч, кіраўнік фракцыі “Еўрапейскі выбар”, засяродзіў увагу на візавым пытанні для беларусаў:

— Сёння гэта не пытанне камфорту. Гэта пытанне магчымасці бачыць сваіх блізкіх, захоўваць сувязь з грамадствам і падтрымліваць альтэрнатыўныя погляды. Зніжэнне мабільнасці стварае небяспечны парадокс: людзі, якія падтрымліваюць дэмакратыю і Еўропу, выступаюць супраць расійскай агрэсіі, маюць менш доступу да Еўропы. Гэта ўжо пытанне бяспекі самой Еўропы, бо барацьба ідзе не толькі за тэрыторыю, але і за грамадскую думку.

Сёння на палях ПАРЭ прагучала не проста аналітыка, а спроба сфармуляваць канкрэтны адказ на сучасныя пагрозы.