‏والناس ويش عاد يرضيها ويقنعها
‏ لو تقطع البحر شرهانه ولوامه.

‏ي مجرب سدود الرجال تبيح ولّا ماتبيّح
‏ماتسنَد الشرهه على اللي لبّس الذل وقبل

‏مافيه أمل مادام حتى راعي الوجه الفليح
‏تاخذني الشرهه على بيته واخليها قبَل

‏قد قلت له تكفى تجوّد في عيوني لاتطيح
‏ايلين طاح تقول كنّه طايحٍ له من جبل.

‏لا بارك الله بشوف النفس والزومه
‏تغر الانسان لين يهمش اخوانه

‏من اول الخبل خبل وتردعه قومه
‏واليوم صار الخبل ماينشف لسانه .

‏احرص على الطيّب ودورله اعذار
‏اصنع عذر لرضاه واستر خماله

‏من دوّر الزله على كل عثار
‏تجفاه خلق الله ويبقى لحاله

‏خلك على غلطات الاجواد ستـار
‏تكسب بها أجر وغنيمــه وجماله

‏الطيب يرجع لك إلى صار ما صار
‏من يزرع المعروف يحصد مثاله .

‏اكبر وفاء تذكر لك انسان ميّت
‏غالي ولكن الليالي سرت به

‏مافي يدك دام المقادير عيّت
‏الا الدعاء ما دمت باقي تحبه .

‏من عادة الدنيا تخون المواثيق
‏تدور مكرتها سواة المحاله

‏ولولا اللوازم ما عرفنا المخاليق
‏مانعرف الرجال لين انعناله

‏الكفو تظهر فزعته حزة الضيق
‏يبان بالشده بعين العداله

‏نسل الرجال متعبين الملاحيق
‏متوسطٍ ما بين عمه وخاله

‏واللي يطيق وليا بغى قال ماطيق
‏تحرم عليه المرجله والشكاله.

‏الوجيه اثنين متبسم وعابس
‏لا حداك الوقت لارقام الشريحه

‏فيه رقمٍ لا قبس للنار قابس
‏وفيه رقمٍ للسواليف المليحه

‏الدليل تشوف معلاق الملابس
‏مايقوم بدور معلاق الذبيحه .

‏من لا يصلي ، خاطره دايماً عمس
‏ولا خير في عبداً لهى عن صلاته

‏مسكين ياغافل عن فروضه الخمس
‏خسران حي وخاسرٍ في مماته .

‏ما فينا غرور بس نعرف قيمة نفوسنا
‏صدقني نعجبك ولكن صعب تعجبنا.

‏من لاتركد بالهدف قبل مرماه
‏ترميه نـاسٍ رمـيها بالركادي.

‏لا تشوف الناس ضعفك وانكسارك
‏لو عظامك تنكسر ما جبروها

‏انتصب كنك طلعت من المعارك
‏ماخذٍ ثار القبيله كلبوها .

‏والله اني قمت اصد من العرب جبريه
‏خايف من عثرة اخطاها وسوم اخطاها

‏كل ما واجهتها قلت السلام تحيه
‏وادعيت الله لا يبلاني بما يبلاها

‏الوجيه اللي عطتنا البغض تاخذ زيه
‏والوجيه اللي تقدرنا نحب لحاها.

‏النشاما عن مقاصد بعضهم يعرفون
‏والردي لو صبوا العلم فـ اذنه ماعرف.

‏لاتامن الدنيا ترا مافوقها مبنى شموخ
‏إن لوحت بيدينها وإن أشرت بحجاجها

‏مغير تلعب بك على الحبلين لين أنك تدوخ
‏وترميك في وسط البحور اللي تعوم أمواجها.

‏المعلّم يحتقر عقله مناهل علمه
‏لالقى اللي عنده دروسٍ مهيب دروسه

‏صاحبك ماهوب محتاجك تحقّق حلمه
‏بس في حاجة من يصحّيه من كابوسه

‏يحزنك شوف السيوف القاطعه منثلمه
‏ويوجعك بالذات شوف الرايه المنكوسه

‏يسكت الوجه الكريه ولا يورّد علمه
‏الكلام المتّزن ماهوب في قاموسه

‏يُتقى شرّ الحليم ايلين يفقد حلمه
‏وان فقد حلمه تضيع جهوده الملموسه

‏الكلام يهون كله ،، والبلا ؟ من كلمه
‏تطلع من الغيض مطلاع السهم من قوسه.

‏من يشوف المبتلي ويفصل اثياب الشماته
‏ مايموت الا الثياب اللي مفصّلها لبسها.

اتعبتنا الحياه ودوختنا الظروف
وااه يا نفسي اللي وصلت حدها.

‏لا صار بشتك ما يلحف قرابتك
‏لفّه وخلّه مع عباة الحليلة

‏الناس ماتنظر لوجهك وصورتك
‏لا صار ثقل الحمل ماترتكي له

‏ترا المراجل وانت نايم تعدتك
‏وراحت لمن حملك وحمله يشيله .

‏عرفنا دواء نقص الفيتامين والاملاح
‏لكن وش دواء اللي ينقصه عَرف ومروه؟.

‏اهل الحسد لا غاضهم طيّب الراس
‏عجزوا به وسبوه من دون سبه .

‏يارب ياللي رحمتك تشمل وسترك راس مال
‏عفوك وغفرانك ولطف منك يارب الملا

‏انا مجاهد نفسي الإماره اللي لا تزال
‏تذنب واخاف انها مع الايام تاخذها حلا

‏نار الفتن قامت تواقد فالدقاق وفالجلال
‏وجهلو عواريف الرجال اللي ماكانو بـ جهلا

‏يالله دخيلك من حرام يمحق بركة الحلال
‏ومن منة الانذال والحاجه لاجل شرب وكلا

‏مايوجع زحول الرجال اللي يضدون الرجال
‏إلا الفقر لا ردهم لـ الهاويه بعد العلا

‏تجبرهم العازه على الصده وحب الانعزال
‏من موقف التقصير في واجب معارف وزملا

‏الوقت متغير وحتى الناس جا فيها هبال
‏متغيرين وكل شي شان يا داافع البلا

‏اللي من اول كنت اعده فالمواقف راس مال
‏ماعاد اعده راس مال ولاهو بـ مثل اولا

‏حتى الهبوب اللي تزيح الضيق لاجت من شمال
‏صارت تجيب الضيق معها من شمال ومن الى

‏وريمية الوادي ذعرها الصوت واخذتها الليال
‏من جوف صدرٍ ذيرت من مرتعه ريم الفلا

‏مدري خذاها الطيش من بعد القصايد والدلال
‏ولا تبي تقفي وتختبر المحبه والغلا

‏خلتني ابدع في مجال الفقد لا جاله مجال
‏واقاول المشراف والدربيل وفجوج الخلا

‏امر مدهال اللقى واقرى مراسيل الوصال
‏واعزم انساها ولا عزمت جددت الولا

‏ودي بعد طول البطى مره تعاود الاتصال
‏وتسمع قصيدة ،، ياحبيب الروح ،، قلبي ماسلا

‏وان شدة رحال الجفى لـ البعد شديت الرحال
‏و ودعتها اللي ماتضيع وداعته جل وعلا.