‏الوقت غالي ثمن ، باهظ تكاليف
‏واقداره اللي ( تمرّ ) .. تمرّ عجله

‏يمكن يسرّك عدوّك في مواقيف
‏ويبور من كنت تستذبح من اجله

‏آصدّ عن كل رغبة .. صدّة مْعيف
‏وتصير روحي .. من الأيام ، وجله

‏يوم يْتشمّت ، على راع المعاريف
‏ضعيّفٍ . . ما يساوي ، ظفر رجله.

‏حب المغاتير مايرحم صخاف القلوب
‏وقلوبنا اللي ذبحها الحب وش ذنبها

‏من حبها ماقدرت اصد عنها واتوب
‏خذيت قلبي وعلقته على جنبها.

‏اثنين ماني بهضمهم من قديم
‏ومن طاح منهم ماحسبنا طيحته

‏اللي لاسولف كل حكيه فالحريم
‏واللي يصور ل للعرب ذبيحته.

‏بنتٍ تداعبني بـ قرص الاصابيع
‏ياليت قرصات الزمن ، قرص يدها.

‏تنطحت ليل ينقذ المشتحن مسراه
‏الى مل من شوفة هل المدن والصجه
‏َ
‏سريته وسبل طارف العين راهي ماه
‏وغدى لضلوع العوج من ونتي لجه
‏َ
‏احسب ان قلبي سج عن همه وطرياه
‏واثر عاده بسكة هل الغي متوجه
‏َ
‏لو يطيب راعى الفقد من جرحه وذكراه
‏والله مايطيب من الهواجيس والسجه ).

حنا كبرنا على المشروه والانتقاد
سمه تغافل تجاهل سمه اللي تبيه

حتى الرفيق السنافي والرفيق الحشاد
من خيب الظن منهم ماشرهنا عليه

يمرنا يعتذر عقب الزعل والعناد
ويروح من عندنا ماسمع شرهه وليه

ان قال كبوة جواد نقول كبوة جواد
وان قال طيحة جمل قلنا جمل ماعليه.

‏حمدتك على خير وحمدتك على مكروه
‏وسبحانك اللي لا ألتجى عبدك، أنصفته

‏أجي لك بوجهٍ ساير الناس ما شافوه
‏على شان وجهٍ ساير الناس عارفته.

‏نجوم السماء سامرتها لين راح الليل
‏ولا فقت لين ان المواذين نادتني

‏سرى فكري البارح وانا بين حط وشيل
‏تقول اني اشيل الكواكب على متني

‏ظروف الليالي متعبه والزمان بخيل
‏تحديتها بعد انها ماتحدتني

‏انا نسل عودً فالمواقف يعدل الميل
‏ليا عاينت بعيونها زين شافتني.

بعض البشر لا صار كافيك شره
‏كأنه مسوي بك ثمانين معروف

‏والا الردي لو راح خلف المجره
‏لاتأمنه لو ينتف الجلد والصوف

‏بس الكفو قربه يجيب المسره
‏تلقاه نشمي فالمواقيف قرنوف

‏ما تلحقك فالوقت منه مضره
‏واليا ندهته فز مايلحقه خوف. ⁩

‏والناس ويش عاد يرضيها ويقنعها
‏ لو تقطع البحر شرهانه ولوامه.

‏ي مجرب سدود الرجال تبيح ولّا ماتبيّح
‏ماتسنَد الشرهه على اللي لبّس الذل وقبل

‏مافيه أمل مادام حتى راعي الوجه الفليح
‏تاخذني الشرهه على بيته واخليها قبَل

‏قد قلت له تكفى تجوّد في عيوني لاتطيح
‏ايلين طاح تقول كنّه طايحٍ له من جبل.

‏لا بارك الله بشوف النفس والزومه
‏تغر الانسان لين يهمش اخوانه

‏من اول الخبل خبل وتردعه قومه
‏واليوم صار الخبل ماينشف لسانه .

‏احرص على الطيّب ودورله اعذار
‏اصنع عذر لرضاه واستر خماله

‏من دوّر الزله على كل عثار
‏تجفاه خلق الله ويبقى لحاله

‏خلك على غلطات الاجواد ستـار
‏تكسب بها أجر وغنيمــه وجماله

‏الطيب يرجع لك إلى صار ما صار
‏من يزرع المعروف يحصد مثاله .

‏اكبر وفاء تذكر لك انسان ميّت
‏غالي ولكن الليالي سرت به

‏مافي يدك دام المقادير عيّت
‏الا الدعاء ما دمت باقي تحبه .

‏من عادة الدنيا تخون المواثيق
‏تدور مكرتها سواة المحاله

‏ولولا اللوازم ما عرفنا المخاليق
‏مانعرف الرجال لين انعناله

‏الكفو تظهر فزعته حزة الضيق
‏يبان بالشده بعين العداله

‏نسل الرجال متعبين الملاحيق
‏متوسطٍ ما بين عمه وخاله

‏واللي يطيق وليا بغى قال ماطيق
‏تحرم عليه المرجله والشكاله.

‏الوجيه اثنين متبسم وعابس
‏لا حداك الوقت لارقام الشريحه

‏فيه رقمٍ لا قبس للنار قابس
‏وفيه رقمٍ للسواليف المليحه

‏الدليل تشوف معلاق الملابس
‏مايقوم بدور معلاق الذبيحه .

‏من لا يصلي ، خاطره دايماً عمس
‏ولا خير في عبداً لهى عن صلاته

‏مسكين ياغافل عن فروضه الخمس
‏خسران حي وخاسرٍ في مماته .

‏ما فينا غرور بس نعرف قيمة نفوسنا
‏صدقني نعجبك ولكن صعب تعجبنا.

‏من لاتركد بالهدف قبل مرماه
‏ترميه نـاسٍ رمـيها بالركادي.

‏لا تشوف الناس ضعفك وانكسارك
‏لو عظامك تنكسر ما جبروها

‏انتصب كنك طلعت من المعارك
‏ماخذٍ ثار القبيله كلبوها .