ባንካችን የአፖሎ መተግበሪያን ለማስተዋወቅ ካካሄደው ሽያጭ ዘመቻ ጋር በተያያዘ ዕድለኛ ደንበኞቹን ለመለየት የዕጣ አወጣጥ ሥነ ሥርዓት አከናወነ

ባንካችን አቢሲንያ ‹‹በአፖሎ ደንበኛ ይሁኑ፣ይቆጥቡ፣ለወዳጅ ዘመድ የአፖሎ የዲጂታል ባንክ መተግበሪያን ያጋሩ፣ይሸለሙ›› በሚል ከጥር 26 እስከ ግንቦት 25 ቀን 2017 ዓ.ም ድረስ ያካሄደውን የሽያጭ ዘመቻ መጠናቀቁን ተከትሎ በዛሬው ዕለት ዕድለኛ ደምበኞቹን ለመለየት በኢትዮጵያ ሎተሪ አገልግሎት የዕጣ ማውጣት ሥነ ሥርዓት አከናወነ፡፡
በዛሬው ዕለት ሰኔ 9 ቀን 2017 ዓ.ም ተጋባዥ እንግዶችና የኢትዮጵያ ሎተሪ አገልግሎት ታዛቢዎች በተገኙበት ለሽልማት ብቁ የሆኑ ደምበኞች ከጥር 26 እስከ ግንቦት 25 ቀን 2017 ዓ.ም ድረስ ከብር 1000 (አንድ ሺህ) ጀምሮ ተቀማጭ ያደረጉ፤ አዲስ ደምበኞች እንዲሁም ነባር ደምበኞች ለወዳጅ ዘመዶቻቸው የአፖሎ ዲጂታል መተግበሪያን በማጋራትና በተመሳሳይ የብር 1000 (አንድ ሺህ) ተቀማጭ ያስደረጉ ወይም አዲስ ደምበኛ ያመጡ ደምበኞችን ናቸው፡፡
በዚህም መሰረት የአንደኛው ዕጣ ማለትም ለሁለት ደንበኞች የባንኮክ ሽርሽር ጉብኝትን ጨምሮ ሌሎች ከ2ኛ እስከ 4ኛ የዕጣ ሽልማቶች አሸናፊ ባለዕድል ደንበኞች ተለይተዋል፡፡
በቀጣይም ባንካችን በሚያካሂደው መርሐ ግብር ሌሎች ዕድለኛ ደንበኞች ሽልማቶቻቸውን የሚረከቡ ሲሆን ለሽልማት ብቁ የሆኑ የዕጣ ቁጥሮችንም ይፋ የምናደርግ መሆኑን እናሳውቃለን፡፡

የባንካችን የመርቸንት ኢንጌጅመንት ካምፔይን ዕድለኞችን በሽልማት ማንበሽበሽ ጀመረ

ባንካችን አቢሲንያ የዲጂታል ክፍያ አጠቃቀም ሥርዓትን በማዘመን የደንበኞችን እርካታ ለመጨመርና የነጋዴዎችን ሽያጭ ለማሳደግ ያለመው የመርቸንት ኢንጌጅመንት ካምፔይን ዕድለኞችን መሸለም ጀመረ።

በዚህም የአቢሲንያ ባንክ ከወለድ ነፃ የባንክ አገልግሎት አቢሲንያ አሚን ደንበኛ የሆኑት አቶ ሙባረክ ሻፊ ባከናወኑት የዲጂታል ግብይት የብር ሃምሳ ሺህ ዕድለኛ ሆነዋል።

በሥነ ሥርዓቱ ላይ የአቢሲንያ አሚን ዋና ከወለድ ነፃ የባንክ አገልግሎት ኦፊሰር አቶ አብዱልቃድር ሬድዋን ደንበኞች ጊዜን በሚቆጥቡና ሕይወትን በሚያቀልሉ የዲጂታል ክፍያ አማራጮች በመጠቀም፤ ባንካችን በጀመረው የመርቸንት ኢንጌጅመንት ካምፔይን ተሳታፊ እንዲሆኑ ጥሪ ያቀረቡ ሲሆን፤ "የዲጂታል ግብይትን ከወትሮ በላቀ በማስፋፋት የደንበኞቻችንን ጊዜ መቆጠብና ተጠቃሚነታቸውን ማረጋገጥ ተቀዳሚ ዓላማችን ነው" በማለት የንቅናቄውን ዓላማም አብራርተዋል።

በርካቶችን በየዕለቱ በሽልማት እያንበሸበሸ በሚገኘው በዚህ ካምፔይን በተለያዩ የዲጂታል አማራጮች ግብይት ለሚያከናውኑና ክፍያ ለሚፈፅሙ ነጋዴዎች፣ ለተገልጋይ ደንበኞችና በሂደቱ ተዋናይ ለሆኑ ሁሉ የባለ ሁለት መኝታ ዘመናዊ አፓርታማን ጨምሮ ዳጎስ ያለ የገንዘብ ሽልማት፣ ዘመናዊ የስልክ ቀፎዎች፣ ላፕቶፕና ሌሎች አጓጊ ስጦታዎች የተዘጋጁ መሆኑን በሥነ ሥርዓቱ ላይ ተገልጿል።

በሽልማቱ ሥነ ሥርዓት ላይ የአቢሲንያ አሚን ዋና የወለድ ነፃ የባንክ አገልግሎት ኦፊሰር አቶ አብዱልቃድር ሬድዋንን ጨምሮ የአቢሲንያ አሚን የሥራ ኃላፊዎችና የብራንድ አምባሳደሩ ተገኝተዋል።