Koʻpchilik mendan muqobil darsliklarni koʻrsak boʻladimi deb soʻrayapti. Afsuski, buning hozircha imkoni yoʻq.

Ushbu darsliklar hozircha tajriba sinov uchun ishlab chiqilgan boʻlib, oxirgi nuqta emas. Muqobil darsliklarni ham XTV tasdiqlashi kerak, ana shundan keyingina ommaviy e'lon qilishim mumkin boʻladi. Shuning uchun elektron nusxasini soʻrashdan foyda yoʻq. Tajriba sinov uchun Sirdaryo hamda Namangan maktablari tanlangan ekan, sentabr oyida shu hududlarga borib qoladi.

P.S.: aynan qaysi maktablarga borishini bilmayman.

@birgap

Hayotga qarashimni oʻzgartirgan voqea

Talabalikda nimalarni koʻrmaydi odam. Men ham turli yutuqlar, quvonchli kunlar qatori qiyinchiliklarni ham boshdan oʻtkazganman.

Bir safar ana shunday qiyin kunlarning birida na bir soʻm pulim, na yeyishga narsam qoldi. Yotoqxonada turardim, xonadoshlarning ham choʻntagi qurigan payt ekan. Boshqalardan qarz olishni yoqtirmayman, gʻurur yoʻl qoʻymaydi. Shu payt bir kursdoshimdan “Humo” arenasida oʻgʻil bolalarni mardikor sifatida ishlatishayotganini eshitganimni eslab qoldim. Ertalabdan “Humo”ga borishni reja qilib och qoringa uyquga ketdim.

“Humo”ga borsam odam juda koʻp. Bir nima qilib roʻyxatdan oʻrin oldim. Oʻzlari tushlik berishlarini eshitib bir quvongan boʻlsam 8 soat ishlaganing uchun 50.000 berishlarini eshitib sal oʻylandim. Boshqa nima iloj bor, ishga kirishdim.

Ish juda ham oddiy – ustalardan qolgan narsalarni tashib tashqariga olib chiqib mashinaga ortish kerak. “Humo” arenasi ochilishiga oz qolgan, quruvchilar esa ulgurmayotganidan shunday usulda ishlatisha boshlashgan ekan. Bundan foydalangan “tadbirkor”lar esa qurilish kompaniyasi bilan “shartnoma” tuzgan, unga koʻra u ishchi topib keladi, evaziga har bir ishchi uchun 70.000 dan oladi. “Tadbirkor” esa 20.000 ni oʻziga olib qolgan 50.000 ni ishchiga beradi. Eng yomon koʻrgan ishim shu.

Tushlik payti boʻldi. Hammani tushlik tarqatilayotgan joyga chaqirishga. Bordim. Qoʻlimga yarim “palka” dudlangan kolbasa, bitta non va yarim litr gazsiz suv tutqazishdi. Hamma istagan joyiga oʻtirib “totli” tushlikni uryapti. Men chetroqqa, odamlar koʻzidan nariga oʻtdim. Tushlik qilishga tutindim-u qoʻlimdagi kolbasini tanib qoldim. Doʻkonda sotuvchilik qilgan paytlarimda oʻris xolalar shu kolbasini iti, mushugi uchun olib ketardi. Negadir boʻgʻzim qizib ketdi, koʻzimdan yosh chiqib ketdi. Xoʻrligim keldi.

Oʻsha payt oʻzimga vaʼda bergandim, hamma kuchimni miyaga yoʻnaltiraman, bitta sohani tanlayman-da hamma narsani yigʻishtirib shu sohani egallayman. Men kuchimni emas, aqlimni sotaman. Mana bilak kuchini sotishning ahvoli. Bu ish men uchun emas.

Xudoga shukr, oʻsha kunlar ham oʻtib ketdi, lekin bugungi kunlarim ham oʻtib ketadi, shuning uchun oʻrganishdan toʻxtamasligim kerak. Sizga ham shuni maslahat beraman.

@birgap

Lingvodidaktikaning dolzarb masalalariga bagʻishlangan xalqaro konferensiya tashkil etildi. Ushbu konferensiyaning ilk ishi 2022-yil 18-may kuni boshlanadi. Tashkilotchilarning xabar berishicha, bu har yili takrorlanadigan konferensiyaga aylanadi.

Lingvodidaktika - til oʻqitish demakdir.

Til oʻqitish metodikasi yangi bosqichga chiqayotgan bugungi kunda mana shunday ilmiy konferensiyalar tashkil etilishi juda quvonarli.

Ushbu konferensiya tilni ona tili, chet tili va ikkinchi til sifatidagi oʻqitish masalalariga bagʻishlanadi.

P.S.: barcha ma'lumotlarni yuqoridagi rasm va quyida yuboriladigan axborot xatidan olishingiz mumkin,

@birgap

Yuqoridagi xalqaro konferensiyaning axborot xati

P.S.: Konferensiyada umumta'lim maktabi oʻqituvchilari, magistrantlar, mana shu yoʻnalishda ilmiy ish olib borayotgan izlanuvchilar, professor-oʻqituvchilar bakalavr talabalar (ilmiy rahbari bilan birgalikda) qatnashishlari mumkin.

@birgap

Bugundan boshlab uch kun davomida Vestminster xalqaro universitetida oʻqiyman. Bu yerda Kembridj tajribasi asosida yangi pedagogik bilimlarni oʻzlashtirishni reja qilganman. Oʻsha bilimlarni umumtaʼlim maktablari oʻqituvchilariga yetkazish vazifam boʻladi.

Shu yerda bir maslahat berib ketay:

Hech qachon oʻrganishdan qochmang, oʻrganish va savollarga javob topish miyaning quvvatini oshiradi, uning foydali ish koeffitsiyenti koʻtariladi.

P.S.: har bir maʼlumot bu pul. Bugun oʻrgangan narsangiz qiymatingizni oshishiga xizmat qiladi.

@birgap

Juda uzun hikoya

...Uning toʻyi boʻlyapti...

@birgap

Doʻstlar, TEDTalks (TEDSuhbatlar) nimaligini bilsangiz kerak. 2016-yilda Hindistonlik Sima Bansal “How to fix a broken education system ... without any more money” (Buzilgan taʼlim tizimini qanday tiklash mumkin ... katta mablagʻ sarflamasdan) degan maʼruzasi bilan qatnashgan ekan. Juda yaxshi gaplar aytilgan. Tarjima qilib chiqdim. Faqat u ayol kishi boʻlgani uchun ovozlashtira olmadim. Taglavha sifatida joylashtirib chiqqandim, hozir shu videoni topib oldim. Sizlarga ham ilindim.

Hindistonda ham bizdagiday holat ekan, undan chiqish uchun juda oddiy yechimlarini biz bilan oʻrtoqlashmoqda.

P.S.: Tarjima soʻzma-soʻz qilinmadi, oʻzbekchalashtirildi.

@birgap

Oʻylashimcha, bizga ham mana shunday bir jamoa kerak, byurokratiyadan holi qilingan, erkin ishlay oladigan, tadqiqotlar uchun maydonga ega.

Ta'limni oʻzgartirish juda ham qiyin ish, lekin yetib boʻlmas choʻqqi emas.

Hozir Respublika ta'lim markazida ishlayman, ish jarayonini ichkaridan bilganim uchun bu tashkilotni doim maqtayman (ishchisi boʻlganim uchun emas, gʻoyalari uchun, harakatlari uchun). Ta'lim markazi ikki yildirki, ta'lim mazmunini oʻzgartirish haqida bosh qotiradi (moliyaviy tomonni bu tashkilot hal qila olmaydi). Asosiy urgʻu darsliklarga qaratilgan, chunki bizning ta'lim kontekstimizda darsliklarning oʻrni katta.

Normal ishlaydigan ta'lim tizimida darslik degan tushuncha mavjud boʻlmaydi, lekin bizga yana 10 - 12 yil darslik kerak, busiz iloji yoʻq.

Ta'lim mazmunini oʻzgartirishga hissa qoʻshayotgan barchaga, shu jumladan, RTMdagi jamoadoshlarimga rahmat aytaman. Ular bilan faxrlanaman. Ular nimaniki qilayotgan boʻlsa hammasini yaxshi niyatda, kelajakda hozirgidan yaxshiroq boʻlishini oʻylab qilishadi. Men mana shu jamoada ekanimdan xursandman.

Yana 20 yildan keyin bugungi oʻzgarishlar natijasini koʻrish barchamizga nasib etsin.

@birgap

Baʼzan tilimning zaharlilik darajasi kobra ilonining zaharlilik darajasiga toʻgʻri proporsional boʻlib qoladi🤦‍♂

Bu kerak deb oʻylayman, ammo doim shunaqa boʻlmaslik kerak. Senga zahar sochishyaptimi har doim ham shakar tutish toʻgʻri boʻlmaydi, andishaning oti qoʻrqoq boʻlib ketishiga yoʻl qoʻymaslik kerak.

P.S.: doim zahar boʻlish ham toʻgʻri emas

@birgap

Maktub bu matn turlaridan biri, bir janr, insho ham matn turlaridan biri, boshqa bir janr.

Ikkisini qoʻshish baliqni sut bilan yeyishday gap.

P.S.: yozma topshiriq berganda janrlar, matn turlarini bir-biriga asossiz aralashtirmanglar. Maslahat oʻrnida qabul qilasizlar endi.

@birgap

Universitetlar uchun Til oʻqitishga oid pedagogika masalasini yoritib beradigan fan boʻlishini istayman. Mana shu yoz shu ustida ishlamoqchiman, sizga shu masaladagi qaysi mavzular qiziq? Izohlarda qoldiring.

P.S.: mayli, bu fanni tasdiqlab, roʻyxatga qoʻshishsa ham, qoʻshishmasa ham yaratib qoʻyaveray, qachondir kerak boʻlib qolar. Hech boʻlmasa, metodika yoki umumiy pedagogikaning moduli sifatida ishlatilishi mumkin-ku.

@birgap

👉 Darsliklar yozish

👉 Malaka oshirishdagi treninglarni olib borish

👉 Avloniy institutidagi loyiha ishi

👉 RTI darsliklarini tahlil qilish

👉 Baholash boʻyicha qoʻllanma yozish

👉 Magistraturadagi darslar

Diqqat savol: men qanday qilib haliyam tirikman😁

@birgap

#paradoks

18-avtobus:
Oʻzim tengi bir qiz keling, amaki oʻtiring deb joy berdi.

13-avtobus:
Turishidan men 5-sinfni tugatganimda tugʻilgan qiz menga qarab qosh uchirib jilmayib qoʻydi.

P.S.: 13-avtobusda yuraverish kerak😊🙈

@birgap

Hozirgina Alisher Qodirov degich deputatning oʻqituvchilarni saralash, adashib kelib qolganlardan tizimni tozalash va bunda XTV Milliy tiklanish partiyasi bilan hamkorlik qilishi kerakligi toʻgʻrisidagi taklifini eshitib qoldim. Avval ham buni aytgan ekan, yana aytibdi.

Tozalash uchun avval kadr yetarli boʻlishi kerak. Baʼzi hududlarda kadr yetishmovchiligi borligidan xabardormikin Alisher Qodir?

Kadr yetarli boʻlishi uchun oʻsha kasbning hurmati, izzati boʻlishi kerak, oʻziga oʻxshagan deputatlarning chiqargan qarorlari, kamida vaziyatga koʻz yumishlari sabab oʻqituvchilar jamiyatda xor boʻlganini bilarmikin Alisher Qodir?

Oʻqituvchining oyligi qanchaligidan xabardormikin Alisher Qodir?

Bitta erkak oʻqituvchilik qilib oila boqolmayotganini bilarmikin Alisher Qodir?

Yana bu kishim adashib kelib qolganlarning maktabda ishlashi kelajakka xiyonat deganiga oʻlaymi. Vey, oʻsha sifatsiz ishchini sizga oʻxshagan deputatlar kengashi tayinlagan maktab direktori ishga oladi-ku! Shundan ham bexabarmi deyman-da bu Alisher Qodir.

XTV har yili ikki martadan oʻqituvchining oyligini oshirish haqida soʻrov kiritib, Moliya rad etganda XTVning yonida turib berarmikin shu Alisher Qodir?

P.S.: Senatga, Oliy Majlisga ham adashib kelib qolgan deputatlar talaygina, balkim tozalovni oʻsha yerdan boshlash kerakdir Alisher Qodir!

@birgap

"Orzular sari olg'a!" deb nomlangan vebinarning audio yozuvi.

— Almashinuv dasturi asosida 2-10 oy davomida xorijda o'qib kelishga qiziqasizmi?
— Magistratura yoki doktorantura bosqichini chet elda o'qimoqchidirsiz?
— Ishni nimadan va qay tartibda boshlashni bilmayapsizmi?
— IELTS sertifikatim yo'q-ku hali deb ikkilanyapsizmi?

Yuqoridagi savollarga vebinarning audio yozuvida javob berilgan.

Albatta tinglab ko'ring. Mohiyaga esa katta rahmat

🚀 Bizning auditoriya: @fakultetFilologiya

Vebinarning elektron taqdimot shakli. Audiosi bilan yaxshi ketadi.

Yoqimli ishtaha😊

🚀 Bizning auditoriya: @fakultetFilologiya

​​Hayotimiz davomida juda ko‘p yasama so‘zlarga duch kelamiz, xuddi shuningdek yasama yuzlarga ham.
. . .
Orzular biz bilan birga yashashi emas, Ular ushalishi kerak...
. . .
Men sevgi yo‘q, u faqat ertaklar-u kinolarda bo‘ladi deb yurardim. Keyin... Seni ko‘rib qoldim...
. . .
Biz, odamlar shunchalik parishonxotir bo‘lib ketganmizki, juda ko‘p hollarda OQIBAT yodimizdan chiqib qoladi...
. . .
URUSh deya atalmish "tansiq taom"ga necha ming yillardan buyon to‘ymaydi bu odamzot...
. . .
"Ayolini boshida ko‘tarib yurish" boshqa, "Ayolini boshiga chiqarib olish" boshqa...
. . .
Bu dunyoda faqat o‘lim hech qachon kechikmaydi va manzilni adashtirmaydi...
. . .
Sensizlikda aprel oyi ham oxirlab qoldi... Lekin hanuz hovlimdagi bodom gullamadi...
. . .
Bir parcha go‘shtdan nima farqi bor mehr-muhabbatsiz yurakning...
. . .
Kuchuk bolasining ko‘zi 7 kunda ochiladi, odam bolasining ko‘zi esa boshi devorga urilganda...
. . .
Ona tili darsida sinonim so‘zlarga misol yozish topshirig‘i berildi. Men birinchi bo‘lib YOLG‘IZLIK va SENSIZLIK so‘zlarini yozdim.

Shokir Yo‘ldosh

Mavlon Marasulov akamiz “qoʻrqmoq” maʼnosini beruvchi 40 ta soʻz va iborani saralabdilar.

qoʻrqdi
seskandi
xavotirlandi
hadiksiradi
hayiqdi
hurkidi
xavfsiradi
rangi oqardi
yuragi orqaga tortdi
kapalagi uchdi
yuragi yorildi
oʻtakasi yorildi
choʻchib ketdi
ichi oʻtib ketdi
tahlikaga tushdi
dahshatga tushdi
vahimaga tushdi
sarosimaga tushdi
titrab ketdi
yuragi taka-puka boʻldi
ishtonini hoʻllab qoʻydi
qoʻrquvdan qaltiradi
dagʻ-dagʻ titradi
koʻzi kosasidan chiqdi
joyidan jilolmay qoldi
tili kalimaga aylanmay qoldi
kayfi uchib ketdi
ichiga gʻulgʻula tushdi
rangi dokadek oqardi
yuragi shuvilladi
oyogʻiga qaltiroq turdi
nafasi chiqmay qoldi
sovuq ter bosdi
labiga uchiq chiqdi
yuragi tushdi
rangida rang qolmadi
bir sakrab tushdi
dami ichiga tushdi
yuragi tovoniga tushdi

@birgap

Muhokama uchun savol:

Harflarni bir-biriga ulab yozish bizga nima uchun kerak? Bu usulda yozish bizga nima beradi? Harflarni ulamasdan, bosma shaklga oʻxshatib yozaversak nima boʻladi, qanday muammolarga duch kelishimiz mumkin?

Oʻylaymanki, hamma oʻz tajribasidan kelib chiqib javob beradi. Javob beradiganlarga oldindan rahmat!

P.S.: diqqat, munozarada bir-biringizni hurmat qiling.

@birgap

​​Bizda yangi rukn #olim_qizlar

Bugun yana bir (boʻlajak) olim qiz haqida gapirib bermoqchiman.

Mohiyaxon Uzoqova. Bu qizni necha yildan beri tanishimni, qachon tanishganimni eslolmayman, adashmasam, Yosh filolog olimlar jamiyatida kordinatorlik qilib yurgan paytlarim tanishgan boʻlsak kerak.

Eslashimcha, boshida etimologiya va til tarixiga qiziqib yurardi. Hozir yaxshigina kompyuter tilahunosi deya olaman.

Mohiyaga oʻxshagan tirishqoq qizlar koʻp, lekin ularning jamiyatga mahsulot sifatida yetib kelishiga toʻsqinlik qilayotgan odatlarimiz ham koʻp.

Ayollardan ham yaxshi olimlar chiqishi mumkinligiga minglab misollar keltirish mumkin, nega biz ana shu keyslarni koʻrib turib ham olim ayollarga gʻalati qaraymiz, ularning ilmiy karyerasi uchun har doim ham imkon yaratib bermaymiz. Iloyim Mohiyaga mana shu toʻsiqlar duch kelmasin.

Bu qizning jamiyat muammolarini tahlil qilishi, ilmga yondashuvini hurmat qilaman. Jamiyatning intellektual shaxslaridan biri deb hisoblayman. Kelajagi bor. Havas qilaman. Mohiyani koʻrganimda oʻzbek olim ayolining siymosini koʻrgandek boʻlaman.

Oʻzi nega bu qiz haqida yozyapman? Odamlar ongida ayollar ham ilm qila olishi haqida maʼlumot hosil qilish. Avvalroq boshqa bir qiz haqida ham yozgandim.

Endi Mohiya haqidagi rasmiy ma'lumotlar bilan tanishing:

✅ 2018-2021-yillar oralig‘ida universitet, Respublika va xalqaro miqyosda tashkil etib kelinayotgan ilmiy konferensiyalarda maqolalari bilan faol ishtirok etib kelmoqda. Shu kunga qadar 9 ta ilmiy maqola hamda tezislari chop etilgan

✅ 2020-yil ingliz tilidan IELTS imtihonini topshirib, umumiy 7.0 ballni qo‘lga kiritgan.

✅ 2021-yilda BMTning O‘zbekistondagi vakolatxonasi bilan bevosita hamkorlikda tashkil etilgan xalqaro Tashkent Model of Unitetd Nations (TIMUN) konferensiyasida muvaffaqiyatli ishtirok etgan.

✅ 2021-yili “Filologiya masalalari yosh tadqiqotchilar nigohida” respublika ilmiy-amaliy konferensiyasida “Eng yaxshi ilmiy asoslangan maqola” yo‘nalishida g‘olib bo‘lgan.

✅ 2021-yil hammualiflikda yozilgan “Transport terminlarining o‘zbekcha-ruscha-inglizcha izohli lug‘ati” kitobi nashrdan chiqdi.

✅ 2021-yildan beri O.Abdullayeva rahbarligi ostida “O‘zbek tilining internet axborot matnlari korpusini shakllantirishning nazariy va amaliy asoslari” ilmiy tadqiqoti doirasida bajarilayotgan Tug'ro nomli o'zbek tili axborot matnlari korpusi platformasi jamoasi a’zosi hisoblanadi.

@birgap