الإسقربوط Scurvy:
مرض ناتج عن نقص فيتامين C، الّي مصدره الأساسي الفواكه والخضراوات، طبعًا الناضجة منهن تحتوي على كميات أكبر من هالفيتامين مقارنة بالمجمدة أو المعلبة، بس الجود من الموجود، فلو هذا المتوفر أنعم الله.

زين شنو فائدة هذا الفيتامين؟
تقريبًا أهمها يساهم بتكوين الكولاجين، بأن يشتغل كـcoenzyme، بعملية إضافة OH للبرولين proline فينتج hydroxyproline، وهاي عملية مهمة بتصنيع الكولاجين [البروتين الرئيسي بالأنسجة الضامّة].

أعراض المرض:
الإرهاق والتعب والضعف وآلام بالمفاصل والعضلات، وفقر الدم وتورم ونزف اللثة وووقوع الأسنان، وتقل إلتئامات الجروح، بحيث حتّى الجروح القديمة تنفتح! حتّى لو أُصيب بها المريض من ٥٠ سنة! لأن ماكو بعد كولاجين كافي يسدها!
#أمراض

السل الرئوي Tuberculosis, TB:
مرض تسببه البكتريا العصوية Mycobacterium tuberculosis [+] أو عصيات كوخ (اكتشفها روبرت كوخ في سنة ١٨٨٢).

أكو ٣ مراحل للمرض:

¹ العدوى الأوّلية: تنتقل هذي البكتريا من الشخص المصاب للصاحي من خلال الهواء/الرذاذ.

² العدوى الكامنة: أوّل ما تدخل من خلال المسار التنفسي وتروح للرئتين فراح تحاربها الخلايا المناعية، فتصير البكتريا غير نشطة وما تكدر تنقل العدوى، يكولك ٩٠% من المصابين بالسل عدواهم كامنة.

³ المرض النشط: راح هنا تنتظر البكتريا لحد ما جسمك يضعف (هم نازل وهم يدبج ع السطح) ببعض الحالات أو الأمراض المناعية علمود تستغل الفرصة وتتنشط (بين كل ٥ حالات وفاة بمرض الإيدز وحدة منهن سببها السل الرئوي).

طبعًا ممكن تمتد البكتريا بعدين لأجزاء أخرى من الجسم مو بس الرئتين.
#أمراض
#مرض_بكتيري

للأسف تشخيص العدوى الكامنة صعب، بس نمشيها مدام غير معدية، بس النشط شوية صعب التعامل وياه، لأن غالبًا الأدوية الموصوفة هواي وعلى مدة طويلة (تصل ل٩ أشهر) وتظهر أعراض جانبية تخلي المصاب ييأس ويقطع العلاج بمنتصف الطريق.

وهاي الحركة مالت ما ينهي كورس العلاج مالته مؤذية مو بس إله لا، للبشر بصورة عامة، لأن البكتريا راح تقاوم الدواء وبعدين يجوز تنتشر لغيره وتتكاثر وتظهرلنا سلالات مقاومة للبكتريا، وهي أصلا هالبكتريا مشهودلها بالتكيف مالتها ومقاومة العلاجات وقيس أنت.

هسة أنت مكيف عبالك هاي بس بالعصور الفيكتورية وناس ماتت وخلصت، أكولك تدري ثاني أكثر مرض معدي بسنة ٢٠٢٢ ورا كوفيد ١٩ هو السل الرئوي 💀

شلون يشتغل الأسبرين؟
الأسبرين دواء مثبط لإنزيم الـcyclooxygenase.
وظائف هذا الإنزيم:
¹ يشارك بتصنيع هرمون الـprostaglandins (هرمون جدا مهم ومفيد بالالتهاب يسبب الانتفاخ والألم والحمى) بالتالي الأسبرين ح يقلل الأعراض هذي.
² يشارك بتصنيع الـthromboxane A2 (TXA2) أيضًا (يساعد بتجمع الصفيحات الدموية) بالتالي الأسبرين همات يقلل من هالشيء، فتشوف يوصفون الأسبرين بالـheart attacks (تجمع خثر الدم بداخل الشرايين وتضييقها ومنع مرور الدم للقلب) لأن يقلل خاصية تخثير الدم بالصفيحات الدموية.

Human genome project:
بسنة ١٩٩٠ بدوا مشروع تسلسل الحمض النووي البشري، معرفة تسلسلات النيوكليوتيدات المكونة للحمض النووي البشري DNA وجيناته، من خلال sequencing الجينوم (كل الـhuman DNA) مالت عدة أفراد وانوب نجمعها معًا، علمود ينكال سوينا تسلسل جينوم بشري مو تسلسل شخص واحد (كل شخص له تسلسل خاص بيه) وبدعم حكومي ومشاركة العديد من العلماء من عدة دول (الولايات المتحدة، المملكة المتحدة، اليابان، فرنسا، ألمانيا، كندا والصين) وبعد صرف ٣ مليارات دولار نجح المشروع وخلص بسنة ٢٠٠٣، وجانت هذي نقطة تحول بالطب والبايوتكنولوجي.

تجديد الأطراف في بعض الحيوانات:
تخيل تنقطع ذراعك وتنقهر عليها وبعد فترة تشوف طالعتلك ذراع جديدة ولا عبالك صاير شيء، حلوة الدنيا هيج مو؟

بعض الحيوانات تجدد أطرافها وبعض المرات حتى أعضاءها الحيوية، حيوان الـAxolotl سمندل المكسيك عنده قدرة تجديد الأطراف والأعضاء الداخلية مثل القلب! وحتى الحبل الشوكي، القرش على الطرف الآخر ميكدر ع ذني بس يكدر يجدد سنونه لحد ما تحين ساعته (لاحظ الفائدة التطورية بالنسبة لكونه حيوان مفترس).

زين شنو الميكانيكية ورا هالشيء؟ الجواب سالفة بين سالفتين، ¹ الخلايا المتجددة ممكن تكون ناشئة من الخلايا الجذعية، بأن تتمايز الخلايا الجذعية إلى النوع المطلوب.
² أو فد نوع خلايا معينة يلغي التمايز مالته ويرجع إلى كونه خلية جذعية ومن ثم تتمايز إلى النوع المطلوب، باختصار تتحول الخلايا من نوع معين إلى نوع آخر مختلف، يعني العملية لو خطوة وحدة مثل أول نقطة لو خطوتين مثل هنا.

بالنسبة إلنا كبشر، الكبد هو العضو الوحيد القادر طبيعيًّا على التجديد regeneration حتى بعد فقدانه جزء كبير منه، ولاحظ أكو فرق بين تجديد يعني يكمل النقص بدون آثار scars، وبين إصلاح الخلل repair بحالة التئام الجروح مثلا، تجديد الكبد معقد هنا، يعتمد على كل الخلايا الكبدية مو على الجذعية.

هل بيوم من الأيام البشر ح يتوصلون إلى تنمية الأطراف؟ ع الأغلب لا بس الله العالم.

الاكتشاف هذا كلش عظيم أكثر مما تتصور، تكدر تاخذ خلايا منك وبيك autologous بحيث من تعيد زرعها ما تصير أي استجابة مناعية عكس مما تنزرع خلايا شخص آخر allogeneic وتعال اكبت المناعة.
وتكدر تجري عليها تجارب الأدوية وتشوف تطور المرض على خلايا بشرية حقيقية بالمختبر مو بداخل شخص وتعال اجرب بيك، وطبعا بدل ما تستخدم خلايا جذعية جنينية.