((زمزم ضمه))


نياشين العطش إسمك
يــنورس عـــالنهر ذابل
مبلل بس متـت ضامي
يالزَمّزَمّ ضــــمه شــايل

يــاســيـدي
منين ابتدي
مـن العطش .. من الذبح

مــاينعقل
هذا الفعل
أجمل نحر .. فوگ الرمح

انته اول گمر ... شاخ اعله المناير
يا اطـول نهر ... يالتروي الضـماير

حـــزنك للأبد
مارحموك ابد ..

"""""""""""""""""""""""""""''''''''''''"""""

شحلاتك وانتــه بالخيمه
ونده شعرك على امتونك
وشريد احتار لو وصـفك
وربك عــــاشگ اعـيونك

ضيم البچي
مـــاينحچي
تــهضـم تره .. من تلچم

تالي الوكت
حيره عشت
وين الــگمر .. رب الزلم

باچر مـن تجي ... يرحبون بخناجر
من اللّٰه ارتجي ... مــايلفينه بــاچر

ديره بـــلا صلح
بس تلگه الذبح ...

"""""""""""""""""""""""""""''''''''''''"""""

العطش من الحرگ اهوّن
يـشــاتل بـالـگـلب مـــأتم
باچـــر كـــلـــها تــتــولاك
حتى الــمو عـــرف يلتم

كلشي جرى
بطف نينوى
وماضل اخو .. يعنيك بعد

كـــلـــها غــرب
شحجي صعب
بــصــدرك شمر .. ويلي گعد


بــــاچر والعبي ... محــترگه تـجيلك
ويادرب السبي ... ياخذ حتى حيلك

باچر كلشي دم
منهوبه الخــيم ...

"""""""""""""""""""""""""""''''''''''''"""""

يظل بس الدمـع ذكره
وانــته ولا شــبر سالم
وملهوفه تجيك الخيل
ومذبوحه ولــد هاشم

عيونك هذن
يــتــرتــلـــن
مـــــاتنسگي .. بنار الخيم

اصعب حزن
مـــن بلجفن
صعبه وعلي .. يگعد سهم

بعد روحي وهلي ... ذبـــــاحك لفانه
صعبه انته وعلي ... تموت وابقه انه

ياراعي الشيم
مصيوب العلم ..

"""""""""""""""""""""""""""''''''''''''"""""

الــعطر بعــيونك ايخبل
حرگ نــشــتم ولآ ترهم
يعشگ المايخربه افراگ
ويــنه البالعشگ يــفهم

اول صـدگ
مـــاينعشگ
وحده يضل .. وينسحگ

تالي العمر
تبقه الضهر
فوگ الترب .. تشبع حرگ

يــاتالي الدهر ... ويـــاتالي الهضيمه
مايشفي القهر ... وانت ابلايه خيمه

تبقه الوحدك
ياهو الوسدك



حيدر فهد الابراهيمي

حن يگلبي ..حسين يستاهل محنه
حن يگلبي.. حسين بي ريحة اهلنه
حن يگلبي الدنيه شراية علل
الماله اخو بالدنيه ماعنده اهل
……………………………………
ليل اليفارگ مو ليل
لو جاني چن حافر خيل
ماتغفه عيني …انطر يجيني

بس الحسين من ايموت
مت عيني مامش تابوت
جابو حصيره…وهاي الدهيره

مطشر اكبالي اليحبني وجيب اليشيله ويلمه
التفطر عطش چبده شكثر هسه الماي يمه
ابو الخير حسين هذا حسين بس محد يفهمه

اه يكلبي .. حسين هذا الفارگيته
اه يكلبي.. اكبالي هوا ومالگيته
المن اتدگ ضال وحسينك رحل
الماله اخو بالدنيه ماعنده اهل
…………………………………………………………
الغربه اخوك من ايروح
كامل مشه ورد مذبوح
هاي شكبرها…ومحد عبرها

التهضمني حته العباس
من راح رد ابلا راس
وگطعو يمينه ..ومعميه عينه

عيني متعوده اعله خوتي شلون اقنع عيني تنسه
امس ملمومين كلنه منين طب الموت هسه
الدمعه من تنزل تعور موش حافر من يرفسه

شلون هسه..وابو فاظل راح مني
شلون هسه..وتعبن اعيوني وعمني
حسين راح ومني هم راح الكفل
……………………………………………………………
المن يروح اليشتاگ
الفاگد تره ايكتله افراگ
ويهدله حيله… وكلش ثگيله

ليهضمك انت من اتشوف
حافر سحگ فوگ اجفوف
ويكسر اسهام …وتزيد اللام

فارگيت الچان كلشي وابانيه اسنيني اعله عشگه
زغير من السحگ صاير حته ما اگدر اشبگه
الينتظر واحد تعطل هذا والله ايكتله ملگه

مانسيته …دوم وي روحي لگيته
مانسيته…والله خويه مانسيته
بيه عايش دوم مني ولا ارحل
……………………………………………………………
يدرون كون اليمشون
ماضلت اعليه اعيون
خلص دمعهن… وجيب اليردهن

حن ياگلب عالمجفين
يستاهل اتحن لحسين
الفارگته گوه…الكاسرلي خوه

حسين يستاهل محنه وياهو غير حسين عندي
حسين اخوي وكلشي اليه حسين ابديه اعله ولدي
يمته مايوكف اكبالي گلبيي ابدگاته يبدي

شصار بيه..ياحزن ليكفي اخوتي
شصار بيه..من مشو عني تجوتي
ما اضل ياخويه هالجاني الاجل


حيدر فهد الابراهيمي

طبها المرجله
والمزامط حله
يريد ابكربله
يذل القاده

ترخص من الحسين …وابو الرايه الثگيله
وحالف يگلب الكون…ويردهم بالهزيله
وذا گدامه سبعين…عليّ كلش قليله

أنه الاكبر أنه القسور آنه البالحرب حيدر
تعرفني الحرايب ادوس اعله الشوارب

من اطب الها. تذلها كلها . اطلابه وجيب اليحلها
اخليهم ابحيره وردهم لو عشيره

اطب مثل الحلم
وشردها الزلم
وليضل منعدم
وأنه ابن الساده
…………………………………………………………
هد وكونك اتشوف ….بله السبعين بلوه
زلمه وگله عباس ….كفو وبعد ايدي تگوه
يهد والموت ويا….يهد ويگله فدوه

فحل گدها. لزم حدها. زلم والخيل مددها
وگف شامخ عليهم. وطم الماي بيهم

الگمر عمه. منو ايهمه. ينعد الشرد زلمه
يحيونه الهواشم. هلا بشيخ الصوارم

ابن حيدر بعد
وگف چنه اسد
بألف فارس يُعد
صبح تعداده
……………………………………………………………..
اخذلك زلمه من صال….على السبعين عازم
يطلب روس الكبار….سهل بكر ابن غانم
وحده وخلص الجيش….وضل عالحومه حاكم

الحرب عيده. يحب صيده. يلوح الغيم چف ايده
ودگ بالحومه رايه. وعلن بيها النهايه

ضوه الخيمه ابو الشيمه. الجثث شمرها بالهيمه
سبه الوادم ابحيله. دخيل الله ودخيله

وگف چنه نهر
ومثل عمه الگمر
يلوح البالظهر
وهذن امجاده
……………………………………………………………..
تفاخر كلش احسين ….لمن شاف ابنه الاكبر
تخربط موقع الجيش…..وخرب حته المعسكر
اليشرد لازم ايطيح …. الابو ضل ببنه يعثر

يهابونه. اليشوفونه. ومحد تارس اعيونه
العدو حط بيه خوفه. ركضهم جزه الكوفه

حچي ويرهب اذا يغنتب يطر اثنين اذا يضرب
يطر اثنين سيفه. وتره الشارد يجيبه

بقه بچفه العلم
القضا بيها انحسم
ومنو المنه سلم
عليهم ناده
………………………………………………………………..
تحزم بالطف احزام …. ومحد يمه يگرب
يدور وين الثگال…..بس القاده يرغب
نَزل راية الجيش ….ورد ايام مرحب

فحل دومه. الحرب يومه. ذل الجيش والحومه
يطب بيهم ويرجع. وصار الحچي مربع

علي الهيبه ورث سيفه. الموت وصاير ابكيفه
يطگ اصلابهم ضل مثل ماسوه حيدر

شجاع الموزمه
وبقه يطشر الدمه
ولا ضل ازلمه
علي رداده


حيدر فهد الابراهيمي

ايعينچ الله زينب عالجره اوياچ
ونومه اخوانچ او وحدچ تركضين
الماشافو خيالچ هسه وياچ
ايعينچ الله انتي وگلب الحسين

ركضت اوگفت بالوسط صارت
ودارت لهلها واخ من دارت
المهضومه تركض لازم لهله
وتركض عليمن زينب احتارت

الماعدها والي ايبين كسرها
صاحو اسمها وهاي شكبرها
الميت اخوها تشاگف بديها
الچان محد شايف خدرها
…………………………………………
مامعقوله هاي ام الخدر هيج
وسفه وصارت اللا مو اميره
عندچ ياگلب يتحمل الصار
بيوم وليله راحولج عشيره

تعبوو گلبها من حاوطوها
مو بالسلامه زينب خذوها
برماح هوسو كسرو گلبها
50 عام وبس تعبوها

ماعدها راي وماعدها كافل
والرمح روس وراحتها شايل
جا وين تكعد غربه اجوها
ماعدها واحد مثل ابو فاظل
…………………………………………..
جم خاطر لزينب كسرت الناس
بت حيدر افا التركض غريبه
الماطلعت لخوها تطلع اهنا ؟
هسه منين ابو فاظل اجيبه

اليا خيمه تركض حرگو خيمها
وضلت وحيده وماتو زلمها
من آل هاشم فزعه ترجت
بس آل هاشم طايح علمها

الله واكبر ركضت يوادم
هاي المثلها الما تمشي لازم
بخيول هدو ياكلب زينب
شلعو كلبها ونومه الهواشم
……………………………………………
المن تبچي المن تلطم الراس.
شيفيد البچيي وزينب خذوها
حيره العاشر الخلاها تنشاف
وتمشي وي الزلم زينب حجوها

زينب خذوها بويه انهبنه
وصاحت ابنصهم فزعو يهلنه
هاي المصيبه المحد عبرها
يم بيت ابوي وعمداً شتمنه

ماضلي واحد حته اشتكيله
يوميه اموت وليله اعله ليله
ابگاع اهلنه وادخل غريبه
ويا موت اخوي المابيه حيله



حيدر فهد الابراهيمي

القصيده بحب مولانه علي الاكبر


لگد مهره وغيمت صار الرعيد
وعزم عنده وماشفت مثله عزم
عدنه حيدر شاگها الكعبه واليوم
عدنه الاكبر شاگ احلوگ الزلم

عدنه الاكبر چنه حيدر بالسوالف والفعل
صوته غاره وبالمعاره دومه تلگا مشتعل
هوا الها ويعرفلها مايطگ بس النذل

جر سيفه والسبعه طاحت
والوادم بالحومه ظاعت …. وحسين ابراسه

يالماخذ من عمه شمره
والخيل كاسرله ضهره …. ياحي نوماسه
………………………………………………………
الفارس تعرفه شجاع من النزال
وعلي الاكبر وين متباوع شجاع
تغمض تشوفه علي تفتح تشوف
هم علي تشوفه لذلك كلشي ضاع

بروحه عمته وياضربته لو تگله بس هله
كلها تعثر والمعسكر عبراهم كربله
بجف يمينه وحمره عينه وخله الگبور بفله

ياقائد مامثله قائد
ياواحد ماچنه واحد …. چنه العباس

تنشد والاكبر يحلها
وزلام الماحبها سلها …. وضلت تنداس
………………………………………………………
ايكيف اعله العركه حطام الروؤس
علي الاكبر كاسر اعيون الكفر
كاسر اضهور العده لا كبل هاي
هسه كاسرهن تره اضهور المهر

ياغلاته وشحلاته لو يرفرف بالعلم
ياسطرته وبمهرته لو يطب جنه حلم
الكل تهابه وبعذابه كاسر اخشوم الزلم

محسومه العركه اليطبها
يدخل للحومه ويظبها…. والرايه ابئيده

لو زامط بزماطه زلمه
ويتفاخر بي هذا عمه….والحومه تريده
……………………………………………………
اسد واكف مايميل شما تميل
من اليمين ايجيبها اعله الميسره
الجيش متخربط ولو طبها الشجاع
حته موتاهم ترد توكف سره

ياوسامه والقيامه چنها لو طبهم تره
گباله كلهم وبزلمهم مو زلم جنهم مره
هوا واحد هوا قائد ياهو بيهم يگدره

جر سيفه ولو جر رسنها
ولو مالت من ايده فنها ….ياواحد هاشم

يتباها بأبنه وعضيده
ولواء حسين اعله ايده…..مرفوع الصارم


حيدر فهد الابراهيمي

لسان مولانا الحسين عند مصرع علي الاكبر


علي اوليدي الحچي ايتعب
علي اوليدي الگلب شَيّب
علي وليدي وگف گلبي
علي وليدي الظهر حدب

اجيتك ردت اكلك ناس تتشمت
متت انته وعليه الوادم التمت
الحوافر طولك المحسود شو طمت

يبني كوم ..انه ابوك.. كوم ماريد ابقه وحدي
يبني ليش.. تروح ليش.. غيرك انته ياهو عندي
…………………………………………………………..
اول مره اجي ومحتام
اجيته وشو علي ماگام
وگف گلبي ونزل دمعي
ووليدي الي مادام

علي وليدي حلو والحافر مخربه
اضل عايش بدونك ياعلي صعبه
بنص اهلي وعشت يوليدي بالغربه

راح اطيح..راح اموت..اركاض اجيت وماگمتلي
انه وين .. ضعت وين..علي يبني دوهنتني
…………………………………………………………..
كوم امشينه كوم اوياي
كوم ولاتهم بالماي
كوم امك تره اتانيك
كوم ولا تضحك اعداي

گوم الحگ عليه وردني للخيمه
جا ترضاها اضل الوحدي بالهيمه
عفتني المن علي ياگلبك وضيمه

ليش هيج ..يالحنين..گوم ردلي ادموعي طاحن
هايه خيل.. وهايه نار ..گوم گللهن شجاچن
………………………………………………………………
علي بويه وكف كلبي
ما اندل بعد دربي
المن ضال وا احچي
اخذها الروح ياربي

حرت مابين اعوفك لو اضل يمك
ارد للخيمه وحدي جا شكل لمك
ماتلم يبويه اتطيح لو المك

تعبي راح .. وليدي راح ..راح الاكبر راح مني
اا يناس .. وليدي راح .. مات مايرضه يهدني



حيدر فهد الابراهيمي

يشاتل بالگلب مأتم
دمع وبمجلسك ألتم
...............................
يكافل ذنبي يالتارسني خيرات
ادموعي التنزل الغيرك حرامات
حروف أسمك يبو السجاد لچمات
اسمك يطلع من الروح شوغات

تمدد طفك بعيني كمت ماشوف بس انته
كمت لآ اخذ وانطي شفتك من تون سكته
وشفت واحد نذل يحسين خاتم مـڼـڱ ايعته

بخدمتك يفتخر جرحي
بسمك لو بده صبحي
................................................
يا اترف نحر واحساسك هواي
الترافه البيك مثل الماي عالماي
مارايد ابد من كلشي يحسين
بس خدمه ومجالس وامشي مشاي

بّصورك من افز مذعور ادور صوت ما الگه
عايش يمي وبچيلك احبنك بحب حرگه
اذا مو صورتك بالبال والله البال احس خنگه

احبك يا وتر صوتي
وكون بمجلسك موتي
.....................................
اذا مو مجلسك نرتاح جا وين
وذا تبچي اعله غيرك اعمي العين
حچو عن المجالس وحنه شنگول
محد يسوه مجلس غير الحسين

ألف هندس يمر بيه وشوفن مجلسك شمعه
انته بكلشي تسعالي لَوّن آنه اريد اسعه
وصيتي الاهلي وبگبري رشو أعله الگبر دمعه

اسمعوني يهل الوادم
انه ازغر بشر خادم
...............................................
اهيم بحبك من امچان لمچان
نسولف بسمك وأسمك القرآن
تره والحاربونه ساوو الگاع
اليحبك فاز والعاداك خسران

انته اول بشر متعوب ونته توزع بحيلك
وانته أَتَچي للوادم وماواحد يتچيلك
من اتذكر انه الخيل بجروحي اصليلك

اعوفك شنهو تاليتي
ويمك انه روحيتي
.................................................
حزني من الصبح ويزيد باليل
لو كالو حبيبك سحگته الخيل
مثل دخان اطلع ماندل وين
اليگعد يم حبيبه تشم عطر هيل

انته الحزن البروحي المونسني بحزاني
من بيتي احس مخنوگ وبيتك اعيش اني
يَ يوسف گلبي يالمتعوب انته محلي وجداني

انته العايش بگلبي
يالمسهل أمر دربي




حيدر فهد الابراهيمي

رسالة ندم واعترافات لا تقال الى للكريم الذي سيفتح ذراعهُ حتماً
ياحسين ...


اخر غلطه
والزلمه تكضه من الكلمه
واليرجع يغلط وياكم ماينعد وياكم زلمه
بكد ماحلوه الدنيه تعثر
وانه انغريت وعثرتني
واتذكرت ادموعي اعليكم
صارتلي جفوف وشالتني
انه ابحبكم دوم ايمثل
وانه الماتنعد اغلاطه
من اذكركم الا ابشده
ومااذكركمً وكت الراحه
خل نفرض زعلت ابنادم
انه اللو زعلت ابنادم
يبقه ايام ايهم بزعله
ولو زعلت احد من عدكم
انساكم وتفض بسهله
وي غيرك وتزيد الورطه
اخر غلطه

المايتعلم يچوونه اهله
وانتم اهلي ودللتوني
الخاطر وادم چنت انساكم
وبعين الوالد شفتوني
آنه السد اعيونه اعليكم
وبصعب شده وماعفتوني
جيت وذنبي بهاي الرگبه
يالمو حر .. بس حر حسبوني
وبحبكم عندي اعظم صلطه
اخر غلطه

خوب الماي الشالع گلبك
الچان السهم الاول ماي
البلل كلشي وعافك ضامي
والركض اهلك حفاي
لا والله انه الشالع گلبك
الماي ارحم من عندي اهواي
انه الماي المالح شطه
اخر غلطه

إلصعبه التهضم بس بوحده
وادري اتطيح وبس تهضمكم
خاف الوادم تشكيني الكم
هذا الخادم لمتعبكم
هذا الخادم الكم شطه
اخر غلطه

فوگ الحافر واركاض اهلك
وفوگ العلتل وتنخاكم
صح أذنك ذني اهوايه
بس ذنبي الاكثر اذاكم
ويانار ابخيمه ومتوسطه
اخر غلطه

خل اتحاسب عن اذنوبي
هاي اذنوبي وانه اتحمل
وخل تزعل من عندي الدنيه
بس كونك راضي وماتزعل
الطير اشاف ويمك أمن
لو مثلي وگاعد يتوسل
شو من طبلك ردت روحه
شو يشبهني اهواي امدلل
انه الطير ويمك ربطه
اخر غلطه

انه اوداعت امك واهلك
جيتك عن اذنوبي ونادم
إلهمتني اتشوف اعيونك
وماهمتني اتشوف الوادم
شتسوالي الوادم من تمدح
وخوش اخدم وبحبكم هايم
ولمن عني ايسألوك انته
وماعرفه اتگلهم مو خادم
بس ابثوبك ذنبي اتغطه
اخر غلطه

اخر غلطه بحيل الزهره
وماتنعاد اغلاط الماضي
جيت امدنگ كاره روحي
واتمناك اعله ابنك راضي
هاي اذني التوبه وماعودنها
آخر غلطه



حيدر فهد الابراهيمي