— Сибэкки олордуутугар Снежана, Николай Чемезовтар уоҕурдуу буорунан хааччыйан, улахан көмө оҥордулар. Олохтоохтор ыытыллар үлэни күүскэ өйөөннөр маассабайдык кыттыбыттарын бэлиэтиэх тустаахпын. Парасковья Шамаева айылҕа маанылаах көтөрдөрүн икки кубаны оҥорон, бэлэх уунан үлэбитин ситэрдэ. Үлэбит тахсыылаах буоларыгар улуус баһылыгын Гранын ылбыппыт улахан өйөбүл буолла.

Дьоннорбут улаханныын-кыралыын сибэккилэри бүөбэйдэһэн, оҕолуу көрөн-истэн, биир да күнү көтүппэккэ уу кутан, сквербит көмүс күһүнү сайыҥҥылыы көрүстэ. Онон үөрүүм муҥура суох. Сибэккилэргэ уу кутуутун уулуссаларынан арааран, график оҥорбуппут үтүө өрүттэрдээҕин көрдөрдө.

Түгэнинэн туһанан, түөлбэм бары олохтоохторугар үлэҕэ көхтөөхтүк кытталларын, саҥа сүүрээннэрин киллэрэн, олорор сирбит кэрэ көстүүлээх, ыраас, тупсаҕай буоларыгар кыһамньылаах үлэни ыыталларыгар, өйүүллэригэр ис сүрэхпиттэн махталбын тириэрдэбин, — диэн түөлбэ салайааччыта Светлана Лю-Фа санаатын үллэһиннэ.