Биг Сэм «Лидс Юнайтедті» Чемпионшипке қайта құлаудан құтқаруға тырысып жатса, мен «Лидстің» сол Чемпионшиптік кезеңінде пайда болған Жан-Кевин Огюстенге қатысты дауды талқылайын.

Жан-Кевин Огюстен 2017 жылдың жазында «РБ Лейпцигке» ауысып, 2019 жылдың жазына дейін командада ойын көрсетті. Осыдан кейін шабуылшы алдымен «Монакоға» (2019 жылдың қыркүйегінен 2020 жылдың қаңтарына дейін), содан кейін 2020 жылдың қаңтарынан бастап «Лидс Юнайтедке» жалға берілді. Ол кезде «Лидс» Чемпионшипта, ағылшын футболының екінші дивизионында, өнер көрсеткен болатын.

Жалдау шартында «Лидс Юнайтед» Премьер Лигаға шыққан жағдайда ойыншының ағылшындық клубқа ауысуы туралы ереже болды. Коронавирустық пандемияға байланысты 2019/20 маусымы 2020 жылдың 30 маусымынан асқан, яғни жалдау мерзімі өткеннен кейінгі уақытта аяқталған. Осы жағдайға байланысты «Лидс» Огюстенді сатып алу туралы келісімшарты жарамсыз деп шешті, өйткені клубтың пікірінше, олардың АПЛ-ға көтерілуі келісімшартта белгіленген мерзім ішінде орын алмаған.

Осыдан кейін «РБ Лейпциг» ФИФА-ға шағым түсіреді. 2021 жылдың 1 маусымында ФИФА «Лидс Юнайтед» келісімшартта көзделген және келісілген трансфер сомасын «РБ Лейпцигке» төлеуі керек деген шешім шығарды.

«Лидс» бұл шешімге шағымданды, алайда, CAS-та тағы бір жеңіліске тап болады. Шешім ағылшын клубы ешқашан иелік етпеген ойыншы үшін қомақты соманы төлейтінін білдіреді. Оған қоса, «Лидс Юнайтед» ойыншымен келісімшартты бұзғаны үшін кінәлі деп танылғаннан кейін Жан-Кевин Огюстенге 24,5 миллион фунт стерлинг өтемақы төлеуге міндеттелді.

Себебі Огюстен мен «Лидс» арасындағы контракт шарттары алдын-ала келісіліп қойған болатын, бұл контракт жалға алу келісімі негізінде көшкен кезде күшіне енетін. «Лидс» трансфер жүзеге асу үшін жалға алу келісімі шарттарына сәйкес орын алмады деген дәйектері заңсыз болғандықтан, француз ойыншысының 5 жылдық, апта сайынғы 80 мың фунт стерлинг жалақы төлейтін келісімшартын бұзған болып тұр. Осыған байланысты клуб жоғарыда келтірілген соманы төлеуге міндетті.

«Лидс» ойыншымен неліктен алдын-ала контрактты келісіп қойды деген сұрақ туындаса, олар өздерін максималды түрде сақтандырғысы келді. Мұндай жағдайларда ойыншымен алдын-ала контракт жасасу қисынды әрі кең таралған практика. Бұл ойыншы жалға алу кезінде жақсы ойын көрсетіп өсіп кетсе, жоғарырақ сомадағы жалақыны төлемеу амалы.

Басқаша айтқанда, тұрақты трансфер жүзеге аспай жатып, ойыншымен жеке келісімшарт жасалмаса, трансфер орын алғаннан кейін ойыншының жеке шарттары жайындағы келіссөздерде футболшы ұтымды жағдайға иеленеді. Өйткені ол үшін ақша төлену міндеттемесі алынып қойған, сәйкесінше өз шарттарын күштеп таныту мүмкіндігіне иеленеді.

Алайда «Лидс» басшылары неліктен Огюстеннің алдынғы ойындарына қарамастан, 5-жылдық 80 мың фунт стерлинг жалақысымен қамтылған контракт бергені басқа сұрақ.

«Лейпцигте» 2 жыл ішінде 67 ойын ойнап, командасына 20 гол және 8 нәтижелі пас берген. Лидске қосылмай тұрып Ромада жарты сезон уақытында 13 ойынға қатысқан, гол және пас бойынша 1+1 ұпай жинаған. Қаншалықты қисынды шешім болғанын өздеріңіз бағалаңыздар.

Қазіргі күні Жан-Кевин Швейцариядағы «Базель» клубы сапында ойын көрсетеді

Пенальти ережесі қалай пайда болды?

Бірнеше сағаттан кейін басталатын «Реал» мен «Сити» арасындағы текетірес тағдыры пенальтимен шешілуі әбден мүмкін. Сондықтан бүгін пенальти соққысының пайда болу тарихын зерделейік.

1891 жыл 14-ші ақпан, «Трент Бридж» стадионы, Ноттингем, Англия. Льюис Баллам бір көзімен доптың қону траекториясын есептеп, соққы жасауға дайын; екіншісімен ол «Ноттс Каунти» қақпашысы Джеймс Трейвстің құлағанын көрді.

«Сток» үшін есепті теңестіруге керемет мүмкіндік пайда болды: енді Баллам Англия Кубогінің ширек финалында гол соққалы тұр. Шабуылшы соққы жасады, доп дәл сол жылдары қақпаға бекітіле бастаған торға ұшты, алайда доп қақпа сызығынан енді өтейін деп жатқанда, «Ноттс Каунтидің» сол жақ қорғаушысы Джон Хендридің оң қолы доптың жолына түсті.

Хендри ойын ережесін әдейі бұзғандықтан, «Сток» клубының барлық он бір ойыншысы төрешімен дауласа бастады және одан голды санауды сұрады. Қызу шағымдарға қарамастан, төреші ережелерге берік болып, қақпадан бірнеше метр қашықтықтағы айып добын тағайындады. Бұл соққыны Трейвс тізе бүгіп, қақпа ішінде бір-бірінің иықтарын тіреп тұрған он командаластарымен оңай қайтарды. Есеп өзгеріссіз қалып, «Сток» жеңіліске ұшырайды.

Жеңілгендер тікелей ФА штаб-пәтеріне барып, олар орын алған әділетсіздікке байланысты тағы бір рет шағымданды. Наразылықтар аяқталғаннан кейін ұйым өкілдері Ноттингемде ережелермен қорғалған айқын әділетсіздік болғанын мойындап және болашақта мұндай масқара жағдай қайталанбауы үшін бірдеңе істеу керек деп келісті.

Көп ойланғаннан кейін басшылық ирландиялық делегат әрі қақпашы Уильям Маккрам ұсынған ережені енгізу туралы шешім қабылдады. Маккрам пенальтиді, 11 метр қашықтықтан (қатаң айтқанда, 12 ярд, 10,97 метрге сәйкес келетін) қақпаға дейін тікелей айып добын ұсынды.

Осылайша, доп әлі ойында болған кезде өз қақпасының жанында дөрекілікке жол берген команда үшін "максималды жаза" пайда болды (айып алаңы тек 1902 жылы пайда болған). «Сток» менеджерлері спорт кодексіне адалдық қосқанына жақсылып қуанды. Бірақ олар істің аяқталмағанын әлі білмеді.

Сол жылы 21 қарашада «Вилла Парк» стадионында «Сток» ойыншылары тағы да жаңа сәтсіздікке тап болды. Матчтың аяқталуына бірнеше секунд қалғанда қонақтар өздерінің басты қарсыластарының бірі «Астон Виллаға» 2-1 есебімен ұтылып жатқанда пенальти тебу құқығына иеленеді.

Льюис Баллам Англия Кубогіндегі ең өкінішті жеңілісі үшін тағдырдан реванш алуға тамаша мүмкіндік алды. Алайда, алаң иелерінің қақпашысы Джимми Уорнер төрешінің беделіне қарсы шығуға бел буды. Ол допты алып, оны стадионның сыртына жойқын соққымен шығарып жіберді.

Неліктен екені түсініксіз, төреші Уорнерді жігітсіздік әрекеті үшін жазаламады; сонымен қатар, басқа доп болмағандықтан, ол ойынды аяқтады. Сол кезде матч уақытының әр таймының соңында пенальтиді орындауға мүмкіндік беретін қосымша уақыт қосатын ереже әлі пайда болмағандықтан, «Сток» үйге қайтадан бос қолмен оралды.

«Сток» ойыншылары орнында болсаңыз, қандай әрекет жасаушы едіңіздер?

2023 жылғы 6 ақпанда Премьер Лига «Манчестер Ситидің» қаржылық ақпарат беру ережелеріне қатысты жүзден астам болжамды бұзушылық туралы ақпаратты Премьер Лиганың сот алқасының тәуелсіз төрағасы тағайындаған тәуелсіз комиссияға бергенін хабарлады.

Бұл Ағылшын Премьер Лигасы жүргізген төрт жылдық тергеудің нәтижесі, тергеу «Манчестер Сити» Премьер Лиганың барлық жиырма командасы ұстануға міндетті ережелерді қаншалықты адал түрде орындағанын тексерді.

Мақалада АПЛ «Ситиге» қатысты қандай жаза қолдана алатыны және бұл істің қандай саяси себептерге байланысты басталғаны туралы жазылған.

https://telegra.ph/APL-Man-Sitidі-zhazalaj-ma-05-18

Ла Лигада қызыл қағаздар тасып жатса, Бундеслигада голдар ғажабы орын алуда.

Статистика көрсетіп тұрғандай, Бундеслигада басқа топ чемпионаттарымен салыстырғанда үнемі көбірек голдар соғылады.

1992 жылдан бастап топ-5 лига арасындағы ең көп гол соғылған 11 маусымның 9-ы Германияда болды, оның ішіне 1 ойында орташа есеппен 3,17 гол соғылатын Бундеслиганың осы маусымы да кіреді. Үздік бес маусымның барлығы — неміс жоғары дивизионының маусымдары, ал олардың төртеуі соңғы бес жылда орын алған екен.

Холланд, Левандовски секілді голеадорлар кеткенімен неміс футболы гол соғу қарқынын азайтпауда.

Бундеслигада неге сонша көп гол соғылады?

Бундеслигада көп гол соғылуы командалардың ашық, жоғары прессингті көздейтін ойын үлгісін көрсетумен байланысты. Бұл лиганың «нәтижелілік» формуласының басты қоспасы. Командалардың жоғары прессинг жасау жиілігі матчтарды өте ашық етеді, сәйкесінше қорғаныс аймағында үлкен зоналар пайда болады. Ашықтық көптеген қауіпті сәттердің туындауына алып келеді, ал қауіпті сәттердің көптігі өз кезегінде, голдардың жиі соғылуына тікелей әсер ететіні анық.

Бундеслигада жоғары нәтижелі көрсеткішке иеленген футболшыларды сатып алу кезінде ойыншының бірден сондай жоғары деңгейді жаңа лигаға өткізетінін қатты күтпеу керек. Оны көптеген мысалдармен дәлелдеуге болады: Тимо Вернер, Джейдон Санчо, Кай Хавертц деп тізімді ары қарай жалғастыра беруге болады. Аналитиктер шабуыл шебінде ойнайтын ойыншылардың өз нәтижелігін Бундеслигадан АПЛ-ға өткізе алмау құбылысын «Бундеслигалық салық» деп атап кеткен. Келесі маусымда Кристофер Нкункудың нәтижелігін тексеріп тұруды ұмытпаңыздар.

***
Холланд: «Бундеслигалық салық? Бірінші рет естіп тұрмын».

Жасанды интеллект бүгінгі күні, ChatGPT, Midjourney немесе басқа да нейрондықтардың кең таралып кеткен қолданысының әсерінен, ешкімді аса таңқалдырмайды. Бұндай құралдар футболда да жиі қолданылып, үлкен пайда алып келуде.

«Тулуза» футбол клубы жасанды зиятты қалайша өзінің трансферлік кеңесшісіне айналдырғандығы туралы оқиға төмендегі сілтеме бойынша.

https://telegra.ph/Tuluza-zhәne-zhasandy-intellekt-05-20

«Ньюкасл» Чемпиондар Лигасында

Біріншіден, менеджменттің жасаған жұмысын “өте жақсы” деп бағалау керек.
3 трансферлік кезеңде - 240 миллион фунт жаратып, команда құрамын таңдаулы әрі қажет ойыншылармен күшейтті. Орынсыз және жоғары сомадағы ақша құртылған жоқ, оған қоса жұлдызды футболшыларға жүгіру де орын алмады.

Атап айтқанда, Бруно Гимарайнш орталық шептегі ең маңызды ойыншы болды. Бразиялық жарақат алған кезде, Ньюкасл ойын сапасы мен нәтижелері нашарлап кетті. Свен Ботман осы маусымдағы ең сенімді қорғаушылардың бірі, «Ньюкасл» нидерландықты ұлы Миланмен жарыса сатып алғанын ұмытпау керек. Киран Трипье, көшбасшы, плеймейкер және капитан деген 3 сөз жеткілікті.

Екіншіден, Эдди Хау ойынның сапасы жағынан жоғары деңгейдегі, стиль жағынан бірден танылатын команда құрды. Агрессивті, тұншықтыратын жоғары прессингтен доппен иелік еткісі келетін командалар зардап шексе, лигадағы ең мықты стандартты жағдайлардан барлық командалар зардап шекті.

Оған қоса, клубтағы бар ресурсты керемет пайдаланды, Альмирон ең мықты маусымын өткізді, Жоэлинтон шабуылшыдан бокс-ту-бокс позициясына ауысып маңызды рөл ойнады және Шер өзінің барлық қасиеттерін толыққанды ашатын жүйеде жарқырап кетті.

Үшіншіден, «Ньюкаслға» жаңа маусымға жақсылап бейімделу қажет. Апта ішінде енді бір ойын ғана емес екеу болатындықтан, маусым бойы екі майданда интенсивті ойын көрсету қиын болады, сондықтан Хауға осы мәселені шешу қажет. Тағы осы себепке байланысты құрамды күшейту қажет, Гимарайнш, Трипье сияқты көшбасшыларға сапалы ауысым керек.

Осы мәселелерді шеше алса, Чемпиондар Лигасындағы орын үшін таласуда өзін фавориттер қатарында сезінуі қажет.

Почеттино «Челсиді» шыңға көтере ала ма?

Бұл сұраққа жауап берудің екі жолы бар. Біріншісі – Почеттино «Челсида» жиналған көптеген жас ойыншыларды «Тоттенхэмдегідей» дамытып, өзінің стиліне тән команда құрады деген сенім. Алайда аргентиналық бапкер солтүстік Лондонда жақсы нәтижелерді бірден көрсете бастаған жоқ, сәйкесінше, оған сеніп уақыт беру - маңызды фактор. Бұл бізді екінші жолға алып келеді, оның аты – Тодд Боули.

«Челси» қайтадан жаңа жоба бастағалы жатыр. Тек айырмашылығы жаңа бапкерде, өйткені Грэм Поттер кезінде де дәл осындай жағдай болған. Көптеген жас ойыншылар, жаңа ойын бағытына ауысу және нашар нәтижелер. Нәтижелердің болмауын Поттердің өзіндік ойын үлгісін енгізу үшін қажетті сенім мен уақыттың болмауымен байланыстыруға болады, оған қоса маңызды ойыншылардың жарақат алғандығы да бар. Ең қызығы – Поттер енді тұрақты жүйе мен құрамды тауып, оңтайлы ойын көрсете бастағанда «Астон Виллаға» әділетсіз жеңілісі үшін қуылуы. Бұл эмоционалды шешім болғаны анық.

Маурисио барлық бапкерге сияқты өз стилін енгізу үшін уақыт керек. Футболда өз ойынын бірден қоятын бапкер – Антонио Конте ғана сияқты, бірақ 1,5 жылдан кейін бәрімен жанжалға түсіп клубтан кетіп қалуы да бар. Почеттиноның бапкерлік қызметінің басында да әділетсіз, өкінішті ұтылыстар болатыны айқын, бірақ Поттермен болғандағыдай Боулидің ашулық шешімдері қайталанбайды дегенге кім кепіл?

Боулидің рационалды шешім қабылдайтынын не қабылдамайтынын біз болжай алмаймыз, ал қазіргі құрамның Почеттино ойын тұрғысына қаншалықты сәйкес келетіні жайлы әңгіме құруымызға болады.

Почеттино Бьелса шәкірті болғандықтан, интенсивті әрі жоғары прессинг міндетті түрде қолданылады. Құрамда жас ойыншылардың көптігі бұл жағдайда қосымша артықшылық береді, өйткені жас футболшылар тезірек үйренеді, көп және жоғары қарқынмен жүгіре алады. Аргентиналық, әрине, Гвардиола деңгейінде емес, бірақ өзіндік позициялық шабуыл жасау жүйесін ұйымдастырады.

Сол кездегі «Тоттенхэмнің» негізгі жүйесі 4-2-3-1 болды. «Челси» сапында да аргентиналық өзінің сүйікті схемасын қолдану керек. Қақпада Льорис ойын көрсетті, Кепа мен Менди Уго деңгейіндегі "шотстоппер" болмағанымен, екі қақпашы да аяқпен жақсы деңгейде ойнай алады.

Қапталдағы қорғаушылар жиі-жиі соңына дейін көтеріліп, шабуылға көмектесетін. Ол рөлдерді Кайл Уокер мен Дэнни Роуз атқаратын. Рис Джеймс пен Бен Чилуэлл бұндай функционалды орындай алады, бір ағылшындық дуэт екіншісін алмастырады.

Орталық қорғаушыларда пас беру шеберлігі мен алаңның жоғары желісінде ойнай алуы керек. Тоби Алдервейрельд пен Ян Вертонген құрған бельгиялық дуо орнын енді жас француздықтар Уэсли Фофана мен Бенуа Бадьяшил басу қажет. Екеуі де әлі тұрақты түрде ойнайтын қорғаушылар болмаса да, осы позицияда ойнау үшін барлық қабілеттері бар. Неге Сильва емес десеңіз, бразилиялықтың жасы да келіп қалды және үздік ойынын үштікте Тухель кезінде өткізген болатын.

Екі орталық жартылай қорғаушы ретінде Матео Ковачич пен Энцо Фернандес ойнауы қажет. Ковачичтің дриблингпен өту қабілеті оны Мусса Дембелемен салыстыруға итермелейді. Ал Энцо Виктор Ваньяма болмаса да, допты алу қабілеті жақсы дамыған, прессинг жүйеде де ойнау ол үшін мәселе емес. Прессингтен ешқашан бас тартпайтын Рогер Шмидтан сұрап көрсеңіздер болады.

Сол қапталда қорғаушылардың артына жүгіріп кіретін Сонның рөлін Стерлинг немесе Мудрик орындай алады. Деле Алли сияқты шабуыл шебіне көтеріліп, қосымша шабуылшы ретінде Мэйсон Маунт та («МЮға» ауысатын сияқты), Кай Хавертц те және Нкунку да ойнай алады. Бірақ франциялықтың керемет әмбебаптық қасиеті үшін, оны он қапталдан ортаға ойысып, мүмкіндіктер ұйымдастыратын Кристиан Эриксен орнына қоямыз.

Осы маусымда гол соға алатын нағыз 9-дық болмаған «Челсиден» Харри Кейн орнын басатын ойыншыны қайдан таппақшысың деген сұраққа Ромелу Лукаку деп жауап беремін. Ромелу өз бабында болса керемет ойыншы. Барлық физикалық көрсеткіштері жоғары деңгейде, шебер пасты да бере алады, соғылған гол статистикасы көптеген жанкүйерлермен жете бағаланбаған. Маурисио дұрыс мотивация беріп сенім танытса, бельгиялық жақсы ойынмен жауап беруі керек.