السلام عليكم ورحمة الله وبركاته.

《 توضيح بخصوص يلي صار اليوم وشن هيصير ... 》

- اليوم كان في اجتماع مجلس الكلية ، وكان في تجمع لدفعتنا ودفعه ال 46 أمام مكتب الاتحاد ..

=======
1. بخصوص اجتماع مجلس الكلية :

- عميد الكلية طلب يكون في حضور طالبين من كل دفعه ( 48 , 46 ) للاجتماع ..
على اساس يتم الاتفاق على حل جذري !

حضرنا الاجتماع و كان في حضور كل رؤساء الأقسام للمرحله السريرة ، ورئيسة قسم الجودة ..
وبعد تم فتح النقاش بخصوص الاعتصام ، وضح العميد موقف الطالب من الاعتصام وطلب ببدء دراسه !!!
( ولكن المشكله في اعضاء هئيه التدريس )

رؤساء الأقسام يبو دراسه تبدأ ، ولكن اعضاء هئيه التدريس يبو مستحقاتهم ورافضين البدايه .

الزبده من الاجتماع !!!
-تم الاتفاق ان العميد يدير مراسله لكل قسم ويشوف دكاترة يلي يبو يتعاونو ويقرو الطلبه بدون م ينزلن مستحقاته ، وهيجيب تقريبا دكاترة دراسات العليا .

المهم موضوع معقدد جدااااا وحلول ليست جذريه ، والضحيه الطالب ..
قالو ان بدايه دراسه يوم 6.1
ولكن للآن ، م فش اي بوادر نقدرو نقولو انها هتبدأ !!
=====
يلي يجي يقولي لو بدينا , ب شن هنبدو !!!

طبعا للاسف بعد فتحنا موضوع ان نبدو رابعه القديمه ووضحنا ان درنا اجتماع مع العميد وقال هنبدو رابعه القديمه !

كل اعضاء المجلس رفض الاقتراح وعارض عليه ، وللأسف العميد م قال شي !

طبعا عشان تكونو في الصورة ، رئيسة قسم القايني بدت اول وحده وقالت مستحيل تصير !!!
قالت درناها لدفعه قبلكم وجونا بدون اي محصله علميه ..

- والرد متاعنا وضحنا ان نحن من خلال ال 3 شهور يلي قريناهن كلناا نعرفو ناخذو هستوري .

ولكن نواجهو في صعوبه ان كل طالب يتحصل الفرصه ان يدير اكزامينشن!!
وضحنا ان م فش نظام معين يضمن تعليم كل الطلبة بالشكل المطلوب !!!
ف مرات تبدو ب رابعه الجديده وم نستفيدوش منها !!!!!

ف قالو بإذن الله هنعلموكم وكلام كيف هالكلام..

المهم بعدها جت دكتورة سارة المسؤوله عن مكتب الجوده في الجامعه، قالت طلبكم هذا مستحيل لان ضد لوائح الاعتماد ..

- الرد : توقيف الطالب عن دراسه يساعد على الاعتماد !!!

بعدها دكتور صالح الأوجلي :

قال لو بديتو ب رابعه القديمه في 7 وكملتو تقريبا في 5 !!

قال هتلقو دفعه 49 باديه رابعه الجديده!!
على اساس تبدأ في شهر 4 !!
وقال هيكون دفعتين اخرا 46, 47 في خامسه !!!
كيف نقدرو نقروكم !!
قال الأفضل تبدو جديده توا .
الحسبه يلي فوق مش متاكد منها ، وباذن الله هنفهم اكثر بكره من دكتور صالح ..

ورئيس قسم العيون دكتور حماد الجازوي رفض ان نبدو رابعه القديمه ...

يعني الصورة الواضحه ، ان حاليا م فش حد مصبي معانا في بدايه رابعه القديمه .

======
《 الزبده للآن الدراسه مش معروفه امتى تبدأ!!! وقالو على اساس 6.1 وهتبدا رابعه الجديده لمده شهرين بدون امتحانات نظرا للظروف 》


《 باهي والحل !!! 》

الحل ان لازم الدفعة تدير وقفه جاااده ، لان عدد يلي جاء اليوم مقارنه بعدد دفعه ضعيف جدااااا !!!!
لان صوتكم ووووصللل ، وضحنا ان نحن ضحيه وان نحن في نص الطريق، والطريق مش سالكه بكلللل حتى بعد التخرج !!
م فش مسؤول مهتم بمصحله الطالب!!!

وين يلي يبوهاااا تبداااا !!!

ف المطلوب منكم يلي م قدرش يجي يوقع اليوم ، يجي بكره ..
ويلي برا بنغازي او عنده ظروف في المواصلات يتواصل معانا ..

هيتم التعاون مع دفعه 46 وهنركزو مبدأياااا في بدايه دراسه فقط.. لان عمرنا ضاااااع في اعتصامات ، ومش معروف امتى يفكو الاعتصام .

ف المطلوب منكم التعاون وادارك الوضع قبل فوات الاوان ،، وهنمشو بخطوات قانونيه منظمه تحت مساندة الاتحاد ..
وهينزل توضيح أكثر في قناه هذي ، وشن هنا الخطوات الجايه

https://t.me/About_Clinical_study48_46

رابط بوست من صفحة جامعة بنغازي بخصوص اجتماع مجلس الجامعة برئاسة د عزالدين الدرسي رئيس جامعة بنغازي

نرجو من الطلبه التعليق على البوست بتعليق محترم لا يمس اي مسؤول في شخصه وبدون ذكر اسم لأي مسؤول ، فقط تعليق أثبت بيه انك كطالب مش راضي على التعطيل اللي صاير ليتم اتخاذ مشكلتك كأولويه فقط... 👍

بخصوص تجميع التوقيعات ..

للطلبه اللي ماقدروش يجو اليوم ، يجو بكرا لمكتب الاتحادات الطلابيه من الساعه 10 حتى الساعه 11:30 كأخر موعد
بعدها ح نسلمو الطلب مرفق بالتوقيعات قبل نهاية الدوام

للطلبه خارج بنغازي او من لديهم ظروف قاهره تمنعهم من الحضور والتوقيع فقط 👀
يرجى مراسلة هذا الحساب
@batch4648
بإرسال الأسم الثلاثي
رقم الدفعه (48 او 46)
وإرسال التوقيع في صوره

" ان تتحمل مسؤوليتك تجاه نفسك في كل شيء ، هذا هو الاستثمار الحقيقي 👌"