السلام عليكم ورحمة الله تعالى وبركاته

نعلن على أول خطوة فعليه نحوَ المُطالبة بحقوقنا ،والسعي من أجل بداية السنوات السريرية وفك الإعتصام ؛ نطلب من طلبة الدفعتين 48 -46 الحضور يوم الأحد عند مكتب الاتحاد الطلابي لغرض التجمع وجمع التوقيعات ،بعد المحاضرة العلمية حول اليوم العالمي للضغط ( الساعة 11 صباحًا )
حيث سيكون هناك اجتماع من مندوبين الدفعتين مع الاتحاد لمناقشة تقديم الطلب الاساسي لحل المشكله من جذورها بشكل عام..
ومناقشة طلب الدفعه 48 بشكل خاص الذي ينص على البدء بالسنه رابعه القديمه وجعل الجديده مع بداية الخطه الدراسية للسنة الخامسة كحل استثنائي وسيتم اجتماع مجلس الكلية لطرحه والموافقه عليه في حين بدء الدراسه ، وسيتم تغطية التجمع لتوضيح الصورة للعامة بأن تم الانطلاق في الخطوات الفعليه ⏳

لذا ندعوكم لحضورالمحاضرة العلمية لليوم العالمي لإرتفاع ضغط الدم بمدرج سناء من الساعه 9 إلى 11 صباحاً وبعدها التوجه إلى مكتب الاتحادات والتجمع امامه للتوثيق ثم التوقيع وسنعلمكم بالتفاصيل للتوضيح في المنشور القادم

الوقتُ لا ينتظرنا . . . ❗️⏱

السلام عليكم ورحمة الله وبركاته.
دفعة كيف حالكم ، ان شاء الله الجميع يكون بخير .

《 بخصوص التجمع أمام مكتب الاتحاد  !! 》

- طبعا كيف م عارفين نحن طالبنا حقنا من العميد ومن الناس المسؤوله عن بدء الدراسه ..
بس كل لقاء  معاهم  يتم إعطاء وعود بالبدء بالدراسه وبالبدء ب رابعه القديمه   ، ولكن لم نرى الا التأخير والمماطله !

ف الموضوع زاد عن حده ، ومحتاج وقفه جديه ! ..

ف تعاونا مع مندوين دفعه 46 وهيكون لنا تجمع أمام مكتب الاتحاد ..

شن هيصير وليش ضروري نجي !!!

يلي هيصير كالتالي :
- هيتم الاجتماع مع وكيل الاتحادات الطلابيه لكليات الطبية جامعه بنغازي وهيتم اعلامه بالتعطيلات والعراقيل يلي يعاني منهن الطالب  في الجامعه  والمطالبه ببدء الدراسه.  ونحن ك دفعه 48 هنطلبو بالبدء ب رابعه القديمه كما تم الاتفاق مع العميد ، ونحن على ثقه ان الاتحاد مع الطالب .

- هيتم التوقيع على مطالبنا ( البدء برابعة القديمه ) ..

======
الرجاء التعاون والحضووووور ي دفعه ..

هيتم تصوير لقطات من الوقفه  ، لإصال صوتنا عبر التواصل الاجتماع..

الزملاء يلي ديما يكتبو على التيلي نبوها تبدأ هضا وقتكم ، حافظكم 😁🤞🏻.

معا_للمطالبه_بحقنا_بشكل_سلمي

نتلاقو ساعه 11.00 أمام مكتب الاتحاد ✨️
#حضورك_معانا_هيفرق

التفاصيل مذكورة فوق ..
نسأل الله التوفيق والسداد ❤️.

السلام عليكم ورحمة الله وبركاته.

《  توضيح بعض النقاط المهم بخصوص تجمع بكرا 》

- طبعا بكره مش هيكون فيه بيان ولا شعارات هيكون مجرد تجمع أمام مكتب الاتحاد ..
ف الرجاء انها  تكون وقفه منظمة  ، ويلي يقدر يجيب بالطو بكره في الحمو هضا تقعد انت احسن واحد 😁🤞🏻..
م تبش تقعد احسن واحد عادي تعال بلاه 😂😁.

-  هيكون في اجتماع مع وكيل الاتحادات الطلابيه بخصوص كتابه طلب للعميد ( وطلبنا البدء برابعه القديمه مع وضع خطه في أقرب وقت ) .. ونحن واثقين جداا ان الاتحاد مع الطالب ومساعده الطالب في اصال مطالبه .

ولكن ، إذ لم نتفق على كتابة الطلب   ، سوف لن يكون هناك اي تويقعات  😁 .
وسوف يكون هناك خطه بديله.
نسأل الله التوفيق والسداد ❤️.
💡 #حضورك_معانا_هيفرق
ف انتظاركم مع ساعه 11.00 ✨️

السلام عليكم ورحمة الله وبركاته.

《 توضيح بخصوص يلي صار اليوم وشن هيصير ... 》

- اليوم كان في اجتماع مجلس الكلية ، وكان في تجمع لدفعتنا ودفعه ال 46 أمام مكتب الاتحاد ..

=======
1. بخصوص اجتماع مجلس الكلية :

- عميد الكلية طلب يكون في حضور طالبين من كل دفعه ( 48 , 46 ) للاجتماع ..
على اساس يتم الاتفاق على حل جذري !

حضرنا الاجتماع و كان في حضور كل رؤساء الأقسام للمرحله السريرة ، ورئيسة قسم الجودة ..
وبعد تم فتح النقاش بخصوص الاعتصام ، وضح العميد موقف الطالب من الاعتصام وطلب ببدء دراسه !!!
( ولكن المشكله في اعضاء هئيه التدريس )

رؤساء الأقسام يبو دراسه تبدأ ، ولكن اعضاء هئيه التدريس يبو مستحقاتهم ورافضين البدايه .

الزبده من الاجتماع !!!
-تم الاتفاق ان العميد يدير مراسله لكل قسم ويشوف دكاترة يلي يبو يتعاونو ويقرو الطلبه بدون م ينزلن مستحقاته ، وهيجيب تقريبا دكاترة دراسات العليا .

المهم موضوع معقدد جدااااا وحلول ليست جذريه ، والضحيه الطالب ..
قالو ان بدايه دراسه يوم 6.1
ولكن للآن ، م فش اي بوادر نقدرو نقولو انها هتبدأ !!
=====
يلي يجي يقولي لو بدينا , ب شن هنبدو !!!

طبعا للاسف بعد فتحنا موضوع ان نبدو رابعه القديمه ووضحنا ان درنا اجتماع مع العميد وقال هنبدو رابعه القديمه !

كل اعضاء المجلس رفض الاقتراح وعارض عليه ، وللأسف العميد م قال شي !

طبعا عشان تكونو في الصورة ، رئيسة قسم القايني بدت اول وحده وقالت مستحيل تصير !!!
قالت درناها لدفعه قبلكم وجونا بدون اي محصله علميه ..

- والرد متاعنا وضحنا ان نحن من خلال ال 3 شهور يلي قريناهن كلناا نعرفو ناخذو هستوري .

ولكن نواجهو في صعوبه ان كل طالب يتحصل الفرصه ان يدير اكزامينشن!!
وضحنا ان م فش نظام معين يضمن تعليم كل الطلبة بالشكل المطلوب !!!
ف مرات تبدو ب رابعه الجديده وم نستفيدوش منها !!!!!

ف قالو بإذن الله هنعلموكم وكلام كيف هالكلام..

المهم بعدها جت دكتورة سارة المسؤوله عن مكتب الجوده في الجامعه، قالت طلبكم هذا مستحيل لان ضد لوائح الاعتماد ..

- الرد : توقيف الطالب عن دراسه يساعد على الاعتماد !!!

بعدها دكتور صالح الأوجلي :

قال لو بديتو ب رابعه القديمه في 7 وكملتو تقريبا في 5 !!

قال هتلقو دفعه 49 باديه رابعه الجديده!!
على اساس تبدأ في شهر 4 !!
وقال هيكون دفعتين اخرا 46, 47 في خامسه !!!
كيف نقدرو نقروكم !!
قال الأفضل تبدو جديده توا .
الحسبه يلي فوق مش متاكد منها ، وباذن الله هنفهم اكثر بكره من دكتور صالح ..

ورئيس قسم العيون دكتور حماد الجازوي رفض ان نبدو رابعه القديمه ...

يعني الصورة الواضحه ، ان حاليا م فش حد مصبي معانا في بدايه رابعه القديمه .

======
《 الزبده للآن الدراسه مش معروفه امتى تبدأ!!! وقالو على اساس 6.1 وهتبدا رابعه الجديده لمده شهرين بدون امتحانات نظرا للظروف 》


《 باهي والحل !!! 》

الحل ان لازم الدفعة تدير وقفه جاااده ، لان عدد يلي جاء اليوم مقارنه بعدد دفعه ضعيف جدااااا !!!!
لان صوتكم ووووصللل ، وضحنا ان نحن ضحيه وان نحن في نص الطريق، والطريق مش سالكه بكلللل حتى بعد التخرج !!
م فش مسؤول مهتم بمصحله الطالب!!!

وين يلي يبوهاااا تبداااا !!!

ف المطلوب منكم يلي م قدرش يجي يوقع اليوم ، يجي بكره ..
ويلي برا بنغازي او عنده ظروف في المواصلات يتواصل معانا ..

هيتم التعاون مع دفعه 46 وهنركزو مبدأياااا في بدايه دراسه فقط.. لان عمرنا ضاااااع في اعتصامات ، ومش معروف امتى يفكو الاعتصام .

ف المطلوب منكم التعاون وادارك الوضع قبل فوات الاوان ،، وهنمشو بخطوات قانونيه منظمه تحت مساندة الاتحاد ..
وهينزل توضيح أكثر في قناه هذي ، وشن هنا الخطوات الجايه

https://t.me/About_Clinical_study48_46