حقيقه انا كنت سمعت المقطع ده قبل يوم من الامتحان من بوص يوسف جزاهو الله خير وصادفت انو جانا في الاستيشن حق الكاونسليغ مره عندها abdominal cancer فنفعني شديد
فاخدو منو الفكره وكده فكونو تعرفو صبة الكاونسلينغ فهي سهله وهي هي نفس الهيئه لكل مرض بس بتحور في شرحك للمرض ولو في معلومه ما عرفتها ما تقول ما عارف تقول لي الاستميوليتر انا ح ارجع لي الاخصائي واسالو واوريك بالتفاصيل فيما بعد عن الحاصل وعموما حيكون معاك رقمي وكده وبرضو ما تنسي اهم شي انو تخلي الاستميوليتر انو هو الي يتكلم ما انت ومع كل مره والتانيه تقول للاستميوليتر هل عندك اي استفسار؟
لانو كده بتيح ليك فرصه انو يذكرك لو نسيت شي وعموما ما تركزو مع الموضوع الكاونسلينغ ده اسهل شي ولعبة اي زول بعرف يطلس بي ادب 😹💝
او اي انسان بعرف يطلع المعلومات بكل اراحيه ويسر 💚🌺

السلام عليكم ورحمة الله وبركاته
يوم الوداع ❤️❤️ نمتنى يكون يوم جميل وكلكم تطلعو مبسوطين بإذن الله تعالى خلوكم قدر المسؤلية وما تخذلونا ❤️❤️🔥
بعض النصائح
خليكم ثابتين في الاكزامنيشن وما تخلو الاكزامنير يحس انكم متوترين حتى لو كنت متوتر خليك ثابت
دي أهم حاجة بداية تكون ثابت في شغلك وحتى ثابت في أنك تقول الفايندنغ
خليكم ريلاكس وما تخافو اليوم بعدي ان شاء الله
دخلت استيشن خليه وراك وما تفكر ولا تتذكر وامشي لقدام وركز في الجاي ما يأثر عليك استشبن شغلك كان فيهو كعب حتى ولو الاكزامنير كان صعب معاك وما حسيت انو اداك درجات

ثبتو الجنرال في كل الاكزامنيشن وما تنسو تفتشو عن الdependancy كويس


ما في زول يدخل الامتحان ما لم يظبط الدسكشن حق ال TP in and out من تشخيصو والعلاج والمضاعفات

ما تنسى في النيورو to Complete your examination بال back gait roumberg sign upper and cranial nerve

عيان ال herditory spastic paraparesis ركز على ال Family history وحاول استعبد ال Tb من الاول

ما تنسى تسأل اي عيان عندو spastic paraparesis عن ال back pain
للمره التانيه ما تنسو الدسكشن حق ال TB لانو في النيورو بتحتاج ليه

لو جاك عيان hemiplagia بدت معاهو من عمر صغير غالبا cerebral palsy

ظبطو البورتال هيبرتنش وال liver cirrhosis in and out
سبب الأنيميا فيهم blood loss from variese

ممكن يجي liver cirrhosis with portal hypertension + splenomegaly

Managment plane حق upper GI bleeding

اسال من الالم وما تنسى في الابدومن

راجعو ال mitral stenosis aortic stenosis valve replacemnt



انتو قدرها ان شاء الله ❤️❤️❤️
بالتوفيق ❤️❤️

♥♥🌺الناس الطيبه والرايقه حمد لله علي السلامه وان شاء الله امتحان مكلل بالنجاح والتوفيق ويا رب نشوفكم كلكم في خامس ونشوفكم مبسوطين وقدوه لغيركم ان شاء الله ♥

بخصوص الامتحان (حقيقه ذي ما أسلفت سابقا انو امتحان الكلينك ده عقبه حيمر بيها كل طبيب وطبيبه في مسيرتو وحتكون تجربه مليئه بالذكريات والعقبات من الBenign examiner لي الToxic examiner وانو قدرتو تتخطوهم كيف وانو كيف اتلبشتو وكيف هنا ما ركزتو وهنا جلطو وهنا نجحتو وسبحان الله اي استيشن بكون ملئ بالتجارب الي ح تذكرو بيها غيركم وتنبيهم منها سوا كانو برالمه او اهل او حتي اقارب فالعايزو منكم شنو؟

انكم تتقبلو بالي حصل اليوم سوا كان الامتحان صعب او ساهل او متوسط عايزكم من جوه قلوبكم تتقبلهو وتتاكدو انو ربنا ما ح يضيع تعبكم والحاجه دي ح تلاحظو ليها والله في النتائج وما نمشي بعيد انا دي كان اول استيشن لي long case وكنت خايف واشتغلت اكعب من المتوقع وقلته خلاص اني ح اسقط لانو الاكزمنر كان والله مصحح لي صاحين بس في الورقه الي هم الاوائل🤣💔 وحقيقه كان toxic شديد لمه دكتوره عزه جزاها الله عنا كل خير قامت بدلتو 🤣💝 بس والله ما ختيت في بالي شي وقلته يا علاء لو اشتغلت كعب او لا انا عملت العلي فاحاول ابدع في الاستيشن الجايي وبالفعل والله الاستيشن البعدو كان لي GI وظبطو لدرجه اني اتكيفت من نفسي والاكزمنر زاته اتكيفت وبقت تتونس اكتر مما تسال🤣💝واهو مشيت البعدو وكان كاونسلينغ وظبطو لابعد درجه بحمد الله رغم اني في البدايه اتلخمت وبدل اوضح للعيانه انها عندها سرطان قلته ليها عندها ورم 🤣🤣💔شي مبهم كده رغم انو كتير من السناير نبهني بس برضو الشلاقه لابد منها بس تاني لمه الاكزمنر صححتني تاني لا خليت بحمد الله لا شارده لا وارده 🤣💝واهو هكذا لين وصلت الاميرجنسي وكانتDKA وحقيقه ده الاكزمنر الوحيد الي ترك فيني انطباع حسن وانو فعلا همو يطلعنا من جوه الاستريس اكتر مما يمتحنا 💝اسمو كان بوص كمال الدين حقيقه كان النقاش عباره عن ونسه وعن انو اعمل شنو واصل لشنو وقال لي مقوله كده للان راسخه في زهني انو ( يا ابني ان مقتنع انو اي طالب جاني هنا جاني قاري ومجتهد فعشان كده نهائي ما بنقصو من حقو اذا نسى لي ونحن هنا ما عشان نقيمكم وبس بل عشان نعلمكم) فبالله شوفو من toxic examiner ربنا رزقني في الختام بي شخصيه طيبه خففت عني الكتير الكتير فالحمد لله من قبل ومن بعد ♥💝

ولمه نحكي ليكم كده اكيد بنحكي ليكم عشان تفهموا انوو الامتحانات دي هي فتره وحتعدي وحتبقي فيها الذكريات فخلو الذكريات السمحه تلمكم وابعدو من السلبيات 💚 واتذكرو والله ربنا ما ح يضيع حقكم مهما مر عليكم من toxic examiner او غيرو ☺️♥🌺
وانا والله واثق انو حتجيبو نتائج تبسطكم وتفرحونا بيها ان شاء الله ونقول كده مبارك التخرج من الباطنيه لانوو الطب كلو باطنيه وذي ما اتعودنا علي الجمله دي نختم بيها كمان Medicine is Medicine 💝
وباذن الله من بعدو ما تلقو اي صعوبه بس استبشرو وخليكم متفائلين وما توفيقنا الا بالله💚☺️

صباح الخير 🙊🤣🤣🤣

السلام عليكم ورحمة الله وبركاته،

نحن مجموعة من طلاب الطب في جامعة أم درمان الإسلامية، وندعوكم للمشاركة في استبيان بحثي بعنوان:

"تصورات طلاب الطب في السنة النهائية حول المهارات السريرية المكتسبة قبل التخرج بجامعة أم درمان الإسلامية (فبراير–أبريل 2025)"

📌 الفئة المستهدفة: الدفعة 30 و الدفعة 31.
🕒 مدة الاستبيان: 4 - 5 دقائق.

نقدّر وقتكم ومساهمتكم في إنجاح هذا البحث، وشكرًا لكم.

https://forms.gle/rgK2iPLicGgo16jk6

شباب 31 الراقيين بالله ما تقصرو معانا في الموضوع ده زمنا ضاق شديد ويداب جازفناهو 😔💔

حاولو املوهو وانشروهو لناسكم كلكم وجزاكم الله كل خير.

وكمان حمد لله علي سلامتكم وبداية موفقه ان شاء الله ومكلله بالانجازات العظيمه الي انتو اصلا مستحقنها 🤍🔥

شباب جمعتكم سعيده معليش شدو معاي الهمه 🥲♥

وورو اصحابكم عشان زمنا ضاق شديد والله وجزاكم الله عنا كل خير عارفنكم اهل واجب 💕

السلام عليكم ورحمة الله وبركاته

نحن أخوانكم من الدفعة 30 عاملين بحث بعنوان The extent of nutritional deficiency and its impact on medical student in the period from January 2024 to January 2025 at Omdurman Islamic university (OIU) faculty of medicine and health science
مدى نقص التغذية وتأثيره على طلاب الطب في الفترة من يناير 2024 إلى يناير 2025 بكلية الطب والعلوم الصحية بجامعة أم درمان .

دا بحث تخرجنا وطالبين مساعدتكم في ملء هذا الاستبيان
المشاركين في هذا البحث من الدفعتين 30 و 31
وجزاكم الله خير مقدما♥️♥️
https://forms.gle/HGgzU9Bq6mxxDpmi8

محتاجين مساعدتكم يا شباب
زمنا ضايق ويدوب بدينا للاسف

البيملى يعمل تم ولكم جزيل الشكر وربنا يعظم اجركم ❤️❤️

شباب
السلام عليكم ورحمة الله وبركاته
معليش اعفوا لينا بس زمنكم محتاجين وفقفتكم معانا ما فضل كتير

السلام عليكم ورحمة الله اهلنا واخوانا بالدفعة 31 كيفكم عساكم بخير وبنتاسف انو ما لقينا فرصه نكون معاكم في تخرجكم ومبارك عليكم كمان ونسال الله لكم التوفيق والسداد في الجايي 🖤✨
حقيقه الرساله دي كان يفترض تكون بدري شديد وتكون ذي بداية ليكم ومعبر للشي الراجيكم بعد التخرج
لكن شاء الله انو نمر بظروف تمنعنا من انو نرسله ومن منطلق ان تاتي متاخرا خيرٌ من ان لا تاتي فانا بحاول ابسط ليكم الشي الي عايز اقولو اولا انا ما عارف منو فيكم الي نزل اتاش طوالي ومنو الي ما نزل بس عموما بالرغم من انو النزول في زمنا ده بقا مرتبط بالظروف المحيطه الا انوو انا دائماً بحبذ انو الزول ينزل طوالي لانو وانت خريج جديد ومعلوماتك قريبه وفريش افضل بمئات المرات من انو تنزل بعد شهور وتلاقي نفسك ما فاهم بتعمل فشنو ومحتاج تراجع تاني من اول وحتي ثقتك بنفسك ما ياها الاولي ديك فعليه فكرة انك تنزل وتتحدى الظروف دي انا بؤمن بيها شديد الا انو يكون عندك شغل ظابط (وده استثناء بسيط، شغل بديل وكفيل بانو يطور من احلامك ويساعدك في المرحله الجايه دي فممكن تبدا بيهو لحدي ما تنتظر التوزيع) لكن الافضل والاحوط انك تنزل وتتحدى اي شي وخلي في بالك حاجه انو انت حاليا مافي فرق بينك وبين الطالب غير انو انت خريج
لكن لسه في مرحله ما عيب انك تاخد شويه من اهلك فيها لانو براك صعبه تحققه لانو الطريق الي انت خاشي عليهو ده للاسف ح ياخد منك اكتر مما يديك لحدي ما تصل مرحله الطبيب العمومي وتعتمد علي البنقلات(اي الشغل في المراكز) لتغطيه تكاليف الحياه فبالله ما تختشي انك تاخد اليسير من اهلك ولا هم زاتم ما اعتقد ح يمنعوك من انك تعمل كده لانو قروش الاتاش يا صديقي ما بتاكل عيش نهائي في سودانا ده فدي نصيحه اخده مني واوعاها كويس

نجي للمهم 📌📌
وانت في مرحلتك دي بتكون مشوش انك تبدا من وين الاتاش او ابدا وين او حتي تبدا من شنو ودي منطقيه ..
وبجاوب ليك اسئلتك دي في مساله بسيطه..
فالبداية ما مقتصره علي شفت معين ولا حتي علي رغبه بل بتعتمد كليا علي الظروف الي انت فيها وعلي مقدرتك الذهنيه وانك قادر تواصل او لا فعلي سبيل المثال انا لمن اتخرجت كنت بفكر انزل وين او ابدا من شنو فلقيت انو في الوقت الراهن اقرب شي انزلو كان البدياترك لانو الفرصه فيهو كبيره ولانو بدو فيهو قروش ما بطاله فلقيت نفسي دخلت طوالي وربنا اكرمني بعد التخرج بيومين نزلت بدياترك 🌿 وقس علي ذالك..
فمن منطلق تجربتي اولا اختيار المنطقه مهمه فلازم وانت نازل اي شفت لازم تختار منطقه بتعتمد علي اسلوب الTeaching اكتر من اسلوب الضغط والهبلسه (وهنا تعني التمشيه وانك تواصل علي شي ما فاهمو ) واعرف انو تجربتك دي ما بتتجاوز ال3 شهور في اي شفت فما تطلع منها الا وانت خاتي target لنفسك انك تصل لي نص المضمار بها عشان تكون Safe doctor في مرحلتك الجايه فاذن لابد من انك تختار بيئه مساعده وما يكون فيها هبلسه وتختار وحده معروفه بانها طلعت دكاتره ممتازين وفيها رجتسرار وميدكال يسدو عين الشمس من العلم 🖤✨وده مربط الفرس فكل ما نزلت في وحده ظابطه كل ما اتميزت انت في المجتمع واخد انطباع كويس امام نفسك واهلك وخلونا نتفق كمان انوو الدعاء هنا سلاح ذو حدين فانا ساعدني شديد والله في انو ربنا يصطفيني باني اكون في وحدات من اميز الوحدات علي الاطلاق اتعلمت فيها الكتير والكتير ونهائي ما حسيت اني فيها غريب او مهبلس او حتي ما بعرف بسوي في شنو بل طلعت منهم بحمد الله بشهادات الزول يفتخر بيها وبي اخوان واخوات ممكن الزول يحتاج ليهم في الحياه ويستشيرم في اي شي بواجهو في مجالو وعلي راسهم البوصات كانو خير معين بعد الله عز وجل فالدعاء الدعاء يا اخواني 🖤🌿

عارف كلامي حيكون كتيييير شديد بس استحملو اخوكم لاني بختزل ليكم خبرة سنين (الا وهي سنه و3 شهور من التخرج 😃) بس برضو مثمره لحد ما فالمهم نرجع لكلامنا ونقول
انو اختيار الشفت مهم شديد ذي اختيار المنطقه والوحده لكن هي مدرسه ذي ما قلت واي زول فيها بطريقتو بس يستلزم فيها انك تسال وتستشير عشان تجارب الناس تكون مرساة لشراعك وتكون شي مميز تستفيد منو لبعدين فانا من تجربتي بحمد الله اولا شفت ربنا رزقني فيهو كان البدياترك وكان من افضل الشفتات الي ربنا اكرمني بيها فكان ذي البصر بالنسبه لي كشف لي حاجات كتيره وكتيره فاولا ممن مميزاتو انو شفت واضح وجميل وكلو بعتمد علي الprotocols وعلي الGuidelines الي بحتاجه الطبيب في حياتو ودي ممكن نخصص ليها وقت عديل لانو
ما كل الشفتات فيها guidelines بمشو بيها كل الدكاتره او مركزين عليها
بالاخص الميدسن الي حتلاقي فيها كل شي مختلف حسب البوص ومعلوماتو..
فالبدياترك من حسناتو انو الطفل ما بشكي ليك بل علاماتوو واعراضو بتتحدث ليك عن نفسها براها واقل شي لاحظت ليهو امو بوصلك لي نتيجه بعكس الميدسن الي انت محتاج فيهو details hx حتي تصل لي spot diagnosis وكدي نبسطه ليكم البيدو يا اخواني بعتمد بشكل كلي علي قوة الملاحظه وعادي وانت قاعد في كرسيك تلقي نفسك شخصته الطفل قبل يصلك سوا بصوت كحتو الغريبه (ك ال barking cough in V. croup) او بصوت نفسو الي تحس كانوو طالع منو صفافير (ك الhappy wheeze in Bronchiolitis) وهكذا
ده غير انو ممكن طفل مولود حديث يجيك وهو لونو مخطوف وتحسو كانو حيموت فبتلاقي نفسك لا اراديا قمت وجريت وعملت ABC ليهو وعلي راسها ختيتو في Oxygen وانقذتو باقل المكونات وابسطه فالشاهد يا اخواني انو البيدو الحسنه الي فيهو انو الطفل برجع بطريقه سريعه شديد حتي ولو وقفت دقاات قلبووو فبمجرد ما تعمل الاساسيات وتعمل good CPRحتلاقي رجع ذي العجب ودي شفناها كتير وشديد كمان وفي البيدو اول ما تجي حتلاقي الوحده الي انت نازل فيها وحده حنينه ولطيفه وهمته عاليه من صغيره لي كبيره بل بالعكس حتلاقيهم خير معين ليك واول اورينتيشن بتلقيها عندهم انو يعرفوك علي طبيعة المستشفى ثم علي الEmergency situation الي حتواجهك من طفل يلاقيك convulsive ومحتاج منك تدخل او طفل يجيك shock وداير منك تبليص عشان تنقذو فهنا المفارقه العجيبه فبالرغم من انو الاطفال برجعو بسرعه الا انهم كمان بموتو بسرعه اذا ما لقو منك رعايه كويسه فعندك ذي اقل من ثواني الي دقائق تنقذ فيها الطفل ده وترجعو الي حضن امو بسلامه والا يكون شفيع لي اهله وهنا الشي الصدمه الي بتجيك صدقوني حتتخطوها بعد اسبوع لكن. تاني ح تتمرسو فيها وتبقو واعيين وتتعلمو منها دروس كتيره (وده باختلاف الميدسن الي اي واحد للاسف جاك arrested فانت محتاج قبل تبدا CPRانك تعمل كاونسلينغ للاهل انو حالتو صعبه لانو الرجوع هنا شبه مستحيل الا يتغمده ربه برحمة من عنده فانا شخصيا ما لاقاني بيشنت كبير مات ورجع تاني) فاللهم البدياترك عباره عن مصفوفه تبدا بيها حياتك المهنيه ده لو عاوز تبدا صصح وتكون ماشي بي برتكول وماشي بفهم واهم شي ده لو عاوز ترتاح موقتا لانو بتيح ليك فرصه تقرا وتجتهد. علي نفسك وفيهو مصادر بسيطه ومعينه ليك واهم شي انو حتلقي وسطك كل االعلامات الي ممكن ترجع ليهم لو ما فهمت والاظبط ع الاطلاق انو الوحده بكون فيها ناس بساط بعكس الميدسن العشروميه وهكذا

pr?🤣🤣💔اوووف حنتكلم لبتين اصلو يلا نواصل فانا مهما اتكلمت عن البدياترك ما بوافي حقو والله لاسباب كتيره ولانو صحح لي حاجات كتيره كانت غايبه عني فانت لو عاوز تبدا صح فاحسن تبدا بيهو ومن ثم تجي علي الميدسن وهنا نقف شامخا علي عظمة الميدسن وذي ما زمان بوصنا صهيب بقولو Medicine is medicine فما هي الا حقيقه حتلاقوهو في شفت من احلا الشفتات الي انتو حتمرو بيها بيد انو الشفت ده
بحمل عيوب صغننه عليكم بس متاكد ح تمرو منها بسلام وده بعتمد. علي الوحده الظابطه الي حتنزلو فيها عشان كده الله يرضي عليكم اختارو صح 🌚😃🌿
فالميدسن انا كان نزلت مع بوص جواهر وهي استشارية مخ واعصاب باطنيه ✨ فكانت خير معين لينا في هذه الرحله فبعد ما انت تطلع بتاسيس ممتاز من البدياترك من برتكول واميرجنسي وتفحيص وانتباه حيلاقيك الميدسن بحلوه ومره
وحتلاقي قدر شنو انت طلعت من العسل لي النحل فيا اما تمرق منو غير ملدوغ او تستحمل وبرضو حتمرق بس بشوية خسائر فالميدسن فيهو عشوائية ما بظبطه ليك الا الوحده الظابطه ده غير انو بتتحمل فيها مسؤلية فوق طاقتك البشريه لانو هنا بعاملوك كانك متمرس ويمسكوك حياة بيشنت انت محتاج فعليا تخفف عليهوو وتطلعو من مضاعافات ومن بلاوي زرقه انت زاتك الفيك مكفيك لمن تجي تطبطب علي غيرك 🤣
فصح هنا الprotocol يضيع هباء منثورا الا انو في بعض الوحدات محترمنو وماشين بجزء منو فلمه تغارن بين البيدو والميدسن حتلاقي الحاجات الي بتعمله في البيدو بوضوح هنا حتعمله بشوية تعديلات خاصه بالتجارب الي مرو بيها البوصات
فلمه تلاقي عيان بتاع Meningitis مثلا في الاطفال بنديهو اول حاجه Dexamethazone من اول ما يجينا كحماية ليهو من تاكل الطبقات ولانها بتدي خصائص عده في التجديد الا انو في الميدسن ما بدو الاستيرويد عشان بقولو ليك الزول ده لحدي ما جانا بكون قاعد في بيتم قريب شهر محومنو من مستوصف لي مستوصف بملاريا وتايفويد وابي يصحى ليهم فلحدي ما يجيك بكون فات المده الزمنيه الي لازمه لي الاستيرويد فعليه ببدو طوالي مضادات حيويه وcover لي البيشنت سريع سريع عشان ما يخش في مضاعافات وقس علي ذالك
لكن ما يهم انو الميدسن بعلمك الانضباط اكتر من اي شي فقرارك ما بكون بيدك بكون بيد النوائب والميدكال اكتر وهم حتلقاهم معاك في كل حته وكل زاوية وتلفونم فاتح ليك في كل ثانيه وكلو لمصلحة المريض وعيوبو هنا بتتمثل في شوية تشتت الا لو كان في وحده كويسه بتراجع ليكم بالتيوريلات وعندها ايام معينه بتتكلم ليكم فيها عن الemergency فهنا بتظبطو لكن برضو حيشغلوك زول مراسيل ساي 🤣شي امشي جيب الblood وشي امشي vital العيان وشي امشي مع العيان الdialysis وهكذا بس تشغيله ممتعه صدقوني بعد تتخطوها حتفرحو بيها لكن جد
ما حتلاقي فرصه تقرا الا مع الجماعات وفي اوقات التيتوريال وحتلاقي نفسك في وضع stressful شديد بس حتتخطاهو بالجماعه فالموت مع الجماعه عرس بس خلي ببالك انو يكون عندك target ما تطلع من الميدسن الا وانت عارف تقراECG صح او تقراChest x ray صح او تقراCT scan صح. لانو دي ما حتلاقيها تاني الا في الميدسن وشوية بيداترك غير انو البيدو البوصات براهم بقرو الاشعه وبحللوها اما الميدسن هم الي بخلوك انت تقراها وهكذا.. ونجي لي الراوند المفضل وهو الmajor round وده بحتوي علي كمية علم يا انسان ما عاديه فحتستمع بالميدسن حرفيا فيهو 😃🌿
اما بالنسبه لي مصادرو حيكون عندكم البرتكول السوداني وبرضو شيت الجزيرة وكذالك بعض المصادر الي بتلقوها عند سنايركم وهنا في الميدسن ماف بخل في العلم بل بالعكس بدوك اكتر ممما يشيلو منك✨

ولسه نحن ماشين في الشفتات وانت بعد ما تخلص الشفتين ديل بتلاقي نفسك بقيت راكز وبقيت فاهم بتعمل في شنو والاهم انك بتلاقي نفسك وعيت وبقيت تعرف تتصرف كيف في حالات الemergency بشتى انواعه وحتلاقي نفسك قادر تتعامل كيف مع الحاجات دي وهنا يا بنقلات جاك زول 🤣❤ فممكن هنا تنزل في مراكز عشان تقوي المرحله بتاعتك دي وانت ماشي ع الشفت البعدو بس ما تسرح يا صحبي عشان البنقلات مثمره وهي حوض فيهو اسماك كبيره لو سرحته كتير بتغرق وبتلاقي نفسك موحل في البنقلات دي وما معروف تطلع بتين
فحاول واصل طوالي ما تقيف ..
فحيجيك تاني الاوبسي وهنا لي اخترت الاوبسي عشان معظمنا بنتهو بيهو في الاخر الا انو انا فضلت اخليهو محشور في النص عشان فيهو فايده معظمنا ما منتبه ليها وبالاخص لي ناس البنقلات عشان معظم المراكز بقا فيها شي ثابت US فمحتاجين زول متمرس يقدر يشتغل بالجهتين ودي ما بتلقاها الا في الاوبسي وكذالك برضو لانو الحالات البجيك بالليل لربما تكون صعبه وانت في مركز نائي فمحتاج منك مهاره تعرف تتعامل مع النزيف كيف او مع الحالات الحرجه كيف وبصراحه الاوبسي باب كبير وبعتمد هو والجراحه علي الskills والتجارب المثمره وخفة اليد وسرعته علي قدر ما انو بعتمد علي العلم كمان والعلم الكتير فالموضوع ما بس افتح وامسك واشرط وطلع الجنين لا يا اخوي في Gyna وانت محتاج تاخد. hx كويس عشان اختك الجاتك دي ما تضيع منك ساي او عشان خالتك وهي جاياك وحاسه انها حامل ما تبشره وتمشي البيت تجيك تاني بمضاعفات حاده
فانت لازم في الاوبسي تقرا كتير وتتعلم كتير وما تركز ع مهارة الخياطه. عشان حتتعلمه حتتعلمه بل ركز علي انك تعرف تفرق كيف بين الstabel والunstable وهنا خلوني. اشيل نفس واقول بمنطلق العباره يا جماعه نحن في مجتمع سوقي جدا والله فكتير مننا بتعامل مع المهن بانو هي مصدر قروش وبس ما انسانيه فبتلاقي اخصائي اوبس عمل عملية لي بنت مستعجله ما لانها حاسه انه بتتوجع او انها تمت اسابيعه المحدده لا بس عشان ما تمشي لي دكتور تاني ويشربه منو ولاقتنا كتير والله فهنا الطفل يطلع preterm وامورو تجوط ويحتاج لي الف حاجه وكلو بسبب استعجال الاخصائي ده
وكتير الكتير من الاخطاء الي بتتلفق للمريض او بنلاقي واحد يقول للبت انتي ما عندك شي وولادتك لسه وتلقيها اول ما وصلت البييت الالم زاد عليها وولدت في البيت او في الشارع لحد ما تصلك. ودي حكاوي كتيره بنسمعه ونشوفه للاسف فراعو حق العيان يا جماعه لانكم مسائلين والله عنهم فاقرو كويس ولاحظ كويس وافهم انت بتعمل فشنو وما تخلي كل تفكيرك بس في عملية وسع افقك شويه وان شاء الله بتتوفق (واصلا الاوبسي ده ما حق رجال نتفق علي النقطه دي وبس يعني)
المهم الاوبسي حيواجهكم فيهو مخاوف جمه علي راسها نفسنة الكوادر الطبيه والله يجيركم من نفسنة الكوادر الطبيه فيهو فمصطلح التوكسيك بتلقاهو هنا في الاوبسي الا انو ربنا برضو يكرمك ذيي وتقع بحمد الله في وحده. متفاهمه وظابطه تمرق منها بتجارب حلوه بس برضو ما بتلاقيهم كلهم واحد لازم تلاقي واحده او واحد يكرهك الشفت ويكرهك كل الشفتات والحياه زاتووو بس 😂
نقول الحمد لله ما هي الا تراكم ذنوب وربنا بغفر لينا بيها علي قول صحبي
قال لي وقت ما الدنيا تعاكسك اعرف انو ذنوبك كترت فكتر استغفارك. عسي ولعل تخفف عنك ❤🌿
فالاوبسي ظابط يخواناااا بس محتاج بدل الصبر صبرين وبدل الدعاء دعائين
واهم شي انك تتعامل كيف مع الemergency وتتعامل كيف مع السنائر باسلوب يحترم وتحترم فيه
وبكده حتمرق ذي الشعره من العجينه بعلم كتير من البوصات وباحترام ظابط من السنائر وبي حاجه محترمه من فهم الUS والتفاصيل المحيطه بيها ✨

ونقول اخيرا ختامه مسك فنجي علي اخر شي وهي الجراحه وهي لغير الناطقين بها مرتع الرجوله 🤣😂❤
(فمع احترامي لي اخواتي الا انو الجراحه ابدا ما مقياس ليكم لانو بتقلل من قيمتكم في المجتمع وده منظور سوقي من جهتي بس لكن بحترم اي زميله دخلت معانا وواصلت في الجراحه وهي رغبه فوق كل شي بس والله بتسرق من عمرك الكتير وبتعلمك الحقاره والبشتنه وبالاخص في التخصصات الي فيها بكون قوه اكتر من علم ذي الاورثو والجراحه العامه وغيره من الكوابيس الي بتلاقينا فيها من دق وخطف ومن ده سكير طعنوهو وده ضربوهو بعربيه فحفصوهو)
فخلونا نسترسل فيها 🤣🤣🤣😂💔
فهو كشفت حتعرفو فيهو الشماته والنضمي والهريج والكافوتي اكتر من انو تتعلمو فيهو ودي مدرسه برضو لكن نحن سمعنا درامات كتيره وعشناها بالاخص مع اخوانا في الميدسن 😂💔الي هم بالنسبه لينا الشحمه والنار
فده مريضكم ودي ما تبعي حتسمعوها كتير والله يقدرك انك تدخل عيان حق ميدسن في الشفت بدون ما توري سنيرك لانو ح تسمع بهدله عمرك ما سمعتها في حياتك 🤣😂💔فديل ما عندهمش يمااا ارحميني صدقوني 🤣
بس والحق يقال النرجسيه خلقت لتتربع في عرش الجراحين فيا جماعه اي زول نفسو يتعلم صح ويتهزأ عشان يهزئ بعدين يخش طوالي جراحه من اول الشفتات تحت عنوان من يهن يسهل الهوان عليه ما لجرح بميت ايلاما 😂😂😂🤣💔
فالجراحه طريق وعره بس والله ظابطه وفي أنفه كده عجيبه وطاغيه
وبتحسسك كانك مالك الكون وما دون ذالك مجرد شفتات ساي 🤣💔او علي قول ناسنا الجراحين ناس ميدسن ساي فالمهم هو طريق واضح وبحبثوهو كل الرجال عشان قروشو كتيره ونقتو حبه وكلو اكسح امسح والسلام عليكم بس برضو ما بخلو من العلم والتعلم من الاغلاط وهنا انت بتعتمد فيهو اعتماد كلي وركز في كلي دي علي سنايرك عشان بالجد ما هو مهاره بس بل تشبث بالخطر وادراك لواقع انت محتاج فيهو قلب قوي عشان تواصل وعشان ما تدقااا😂🤣
فلو وحدتك ظابطه صدقني حيكون من احسن الشفتات لانو علي قدر الصراخ الي فيهو الا انو بخليك واثق من نفسك اكتر وبخليك تركز علي تفاصيل كتيره انت محتاج ليها ذي الشخص الي ببحث عن اللغز فهو شي كده مستور محتاج انك تكشف عنو عشان تصل لي حقائق كتيره منها اورام ومنها خبايا ومنها حاجات كتيره
حتتعلمه ان شاء الله والله ما كتر فيهو من المصادر فانا خليتو اخر شي لي عشان هو رغبتي البستعوض فيها ربنا خير انو يجزيني بيها الجنه في انو مستحمله غصب عني وعن كل شي
وكلو عشان نكون نفسنا بسرعه 😂
فاستفدته منها كتير والله بس حتواجهك فيهو عقبات حتتخطاها بمفهوم التجاوز صدقني لانو ما حيكون فيك طاقه عشان تقيف وتبكي
لانو اللسته ما بتنتظر زول ولانو اهل العيان مترصدين لي الخطا بس تاني اي شي بمر وحتبقا اكبر مكنه فيك يا دنيا ولغتك زاته حتختلف بين الناس
وكلامك زاتو حيبقي مسموع ولبسك شياكه وهلموا جرا🤣🌿✨

وبختم بي كتاب صغنن كان هو بعد الله عز وجل خير دليل لي في انو الزول يفهم هو بعمل في شنو او المطلوب منو شنو في الاتاش او الامتياز ده لانوو حقيقيه انت في عالم الكبير بدوس فيهو علي الصغير والصغير بدوس علي الاصغر منو فمحتاج تعرف اكتر واكتر عن قدراتك وعن حقوقك كطبيب امتياز وده بتمثل في كتيب لطييف وظريف بحكي ليك عن الامتياز وعن البلاوي السوده فيهو وعن حقوقك وعن واجباتك وعن الحاجات الي حتتعلمه بكل تفاصيله واذهابه ❤🌿

ارجوا اني ما اطلت الكلام عليكم وسامحوني في نقطة الجراحه دي بس البدياترك سيرجري للبنات كويس 🌚🖤وهنا ما رافه بيهم لكن شايف معظم الي خشو ابدعوو فيهو لكن برضو والله الجراحه عاوزه صبر لكلانا سوا ميل او فيميل والله الموفق وبتمني اكون وصلت معلومات مفيده ليكم وبتمني اي زول يقرا الكتيب الي ح ارسلو ده وينشرو لكل زول يداب نازل
الامتياز او نزل وما فاهم بعمل فشنو عشان يتسفيد منو وان شاء الله دايما موفقين ونسمع بيكم هولدر كبار في كل تخصصات الحياه ولو احتجتو لاي شي تلقونا ان شاء الله معاكم لانو البينا ما مجرد سنير وبرلوم بل اسرة بنفيد ونستفاد من بعض في سائر مجالات الحياه ان شاء الله وكل التوفيق يا اخواني ودعواتكم لينا كمان 🖤🌿

No one
لمن تكتشف انو النور الي كان في اخر النفق ظوط ساي وانو الي جاء ده كوووم والي جايي كوم تاني خالص🤣🌚💔

فالناس تستحمل وترمي قدام 🤣📌

اخوانا الي حاسين انو كلامي عن الجراحه غلط اجمعو هنا وروني انا غلطته فشنو 🌚
والبنات والله بقوله لمصحلتكم شغل الectomy ده ابدا ما جايي فيكم 🏃