Batch 29

لما تلاقي ابنك سكره عالي قبل ما تقوله " اتحرك عشان الحركة بتساعد ع حرق سكر " اتأكد الأول إنه مفيش أسيتون بالبول ، لإن كون الجسم يكون أسيتون ، فده معناه إنه مش قادر يستخدم الجلوكوز للحصول على الطاقه ، وده بسبب نقص أو عدم وجود الانسولين
وبالتالي ف الحالة دي الجسم هيلجأ لتكسير الدهون للحصول على الطاقة ، وناتج تكسير الدهون هو الأسيتون
فكونك تخلي الطفل يتحرك ، بكده هيضطر يكسر دهون أكتر للحصول ع الطاقه اللازمه للحركة ، وطالما هيكسر دهون أكتر ، الأسيتون هيزيد أكتر ، فانت كده جيت تكحلها عمتها
عشان كده مهم جداً إننا نعرف إنه ممنوع تماماً الحركة أو أي نشاط ف حالة وجود الأسيتون
--------------------------------------------------------------------------
طيب امتى أقيس الأسيتون بالبول ؟
1- إذا كان معاه أعراض بغض النظر عن رقم السكر كام ...
يعني سواء كان السكر [ عالي ، طبيعي ، منخفض ]
والأعراض زي مغص ، ترجيع ، غثيان ، زيادة عدد مرات التبول ، شرب ميه كتير هتلاقيه ملهوف ع الميه
ريحة أسيتون بالفم زي ريحة التفاح الفاسد ، زيادة ف سرعة التنفس أو ضيق ف التنفس ، عدم القدرة ع التركيز .....
2 - إذا كان السكر أعلى من 300 مجم
-------------------------------------------------------------------------
شريط الأسيتون بيتحط ف عينة البول لمدة 40 أو 60 ثانيه
--> إذا كان الأسيتون بلس 1 هيتصحح ف البيت عن طريق 1 - شرب كمية ميه كبيرة ، وليكن ربع لتر كل ربع ساعة ، وده لتعويض الجفاف وكمان لطرد الاسيتون ف البول
2 - جرعة انسولين سريع المفعول تجارياً
Humalog , Novorapid , Apidra
أو جرعة انسولين مائي زي Actrapid ، وطبعاً فيه كذا طريقة لحساب الجرعة وأسهلهم هي 10% من وزن الطفل
فلو وزنه 30 كيلو مثلاً ، ياخد 3 وحدات تحت الجلد ف منطقة البطن وده لإنها أسرع مكان ف الامتصاص
3 - نقيم السكر والأسيتون بعد ساعة ، إذا كان فيه تحسن يبقى كده تمام ، ولو مفيش تحسن يتوجه للمستشفى
--> إذا كان بلس 2 أو 3 لازم التوجه للمستشفى
--------------------------------------------------------------------------
طبعاً قياس الأسيتون بالدم أدق - وده للأسف مش متوفر عندنا - لكن نادر إذا كان فيه أسيتون بالبول ومع ذلك الشريط طالع Negative ، لكن برضو من باب الاحتياط بنقول :-
" ف حالة عدم وجود أسيتون بالبول مع استمرار الترجيع أو المغص لابد من التوجه للمستشفى "
For patients with DKA, the urine dipstick test is highly positive for glucose and ketones
Rarely, urine is negative for ketones
-------------------------------------------------------------------------

Recommended by our course coordinator.

1.07K viewsترتيل إسماعيل, 18:01