Инстаграм ва менинг фикрларим…

Инстаграмда эътибор берсангиз, айрим аёлларда талабчанлик ошиб бораётгандек туюлади. Айниқса эркакларга нисбатан катта моддий талаблар қўйиш ҳолатлари кўпаяётгандай: уйи, машинаси, катта даромади бўлса кейин турмуш қураман, ёки эрим қимматбаҳо совғалар бермаса эътиборсиз, деган фикрлар.

Аслида эса солиштириш инсонни энг кўп хато қилишга олиб борадиган омиллардан бири. Чунки биз фақат кўрсатилган нарсани кўрамиз. Ижтимоий тармоқлардаги совғалар, саёҳатлар ёки “бахтли ҳаёт” ортида реклама, уюштирилган саҳна ёки биз билмаган синовлар бўлиши мумкин. Ҳеч ким ўзининг оғир кунларини оммага чиқармайди.

Ҳар бир оиланинг ички дунёси бор. У ердаги синовларни энг яхши эр ва аёлнинг ўзи билади. Қийин пайтда бир-бирини қўллаб қувватлаш, солиштирмаслик ва садоқат мустаҳкам муносабатнинг асоси. Шундай муҳитда эркак ҳам ўзини қадрланган ҳис қилиб, янада масъулиятли ва ҳаракатчан бўлишга интилади.

Турмуш қураётган қизлар учун ҳам муҳим жиҳат фақат мол-дунёга эмас, балки иймон, масъулият, ҳаракатчанлик ва интилишга қарашдир. Чунки 20–25 ёшли йигитдан катта мол мулк ёки қимматбаҳо машина кутиш ҳар доим ҳам мантиқий эмас. Бу ёш аслида ўқиш, тажриба тўплаш ва ўзини топиш вақтидир.

Албатта, ҳар кимнинг ўз мезони бор. Фақат ўлчамларимизни реал, фикрлашимизни эса кенг қилиш кўпроқ тинчлик ва барқарорлик олиб келади, деб ўйлайман.

Бу шунчаки менинг шахсий фикрларим. Қўшилиш ёки қўшилмаслик ўзингизга боғлиқ.

Басрия 🌸