📌Мәсетле районы энциклопедияһының өсөнсө китабы донъя күргән.

Ошо көндәрҙә Оло Ыҡтамаҡ ауылының Мәҙәниәт йортонда яңы китаптың исем туйы булған.

Был - Башҡортостанда ике телдә - русса һәм башҡортса нәшер ителгән тәүге район энциклопедияһы.

🔹 Мәсетле районына арналған китап 920 биттән, 1600-ҙән ашыу мәҡәләнән һәм 1300-гә яҡын төҫлө һүрәттән тора. Унда аҡлы-ҡаралы фото юҡ, яһалма зиһен ярҙамында барыһына ла "яңы һулыш" биргәндәр.

🔹 Энциклопедияла тарих, фольклор, йолалар, тәбиғәт объекттарына, ауылдарға арналған мәҡәләләр айырым урын биләй. Уларҙы 100-ҙән ашыу автор әҙерләргә ярҙам иткән. Ауыл халҡы шәхси архивтарынан фотолар һәм иҫтәлектәр менән бүлешеп, эште күтәрмәләһә, ВТБ банкы һәм меценат Владимир Крючков аҡсалата ярҙам күрһәткән.

🔹 Был энциклопедия Мәсетле районына арналған өсөнсө ошондай йыйынтыҡ: беренсеһе Илдар Мөхөтдинов һәм Юлай Ниғмәтуллин тырышлығы менән донъя күргән, икенсеһе - 2010 йылда Юнир Солтанов етәкселегендә райондың 80 йыллығына арнап әҙерләнә.

💯 "Ата-бабаларыңдың, ауылыңдың тарихын белмәй тороп, ил тарихын төшөнөп булмай. Был китап мөһим мәғрифәтселек һәм тәрбиәүи әһәмиәткә эйә. Тәү сиратта ул йәштәргә - балаларыбыҙға һәм ейән-ейәнсәрҙәребеҙгә тәғәйенләнгән",

- тине Мәсетле районы хакимиәте башлығы Әнис Әсәҙуллин.

🔹 Энциклопедияның тәүге даналары район китапханаларына һәм мәктәптәргә таратыласаҡ, шулай уҡ Пионерҙар һәм мәктәп уҡыусылары йорто, музей, Балалар сәнғәт мәктәбе, ауыл биләмәләре хакимиәттәренә, мәҙәниәт һәм мәғариф бүлексәләренә тапшырыласаҡ.

🔹 Тыуған яҡ тарихына арналған китаптың исем туйы Башҡортостан Республикаһы Башлығы иғлан иткән Милли кейем көнөнә тап килеүе тантаналыҡ өҫтәгән: матур концерт ойошторолған.

📌 Мәҙәниәт эшмәкәрҙәренә дәүләт наградалары тапшырылған.

Кисә "Башҡортостан" Дәүләт концерт залында бер төркөм мәҙәниәт һәм сәнғәт әһелдәре Рәсәй Федерацияһы һәм Башҡортостан Республикаһы дәүләт наградалары менән бүләкләнгән. Улар араһында шаршау артында ҡалған һәм тамашасыға күренмәһә лә, эше үтә әһәмиәтле хеҙмәткәрҙәр, район һәм ауыл мәҙәниәт йорттары белгестәре лә булған.

✅ "Башҡортостандың халыҡ артисы" тигән маҡтаулы исемгә лайыҡ булдылар:

🔹Артур Ҡунаҡбаев - М. Ғафури исемендәге Башҡорт академия драма театры артисы,
🔹Хәсән Усманов - билдәле йырсы, Республика инженер лицей-интернаты педагогы,
🔹 Алик Зәйләлов - Туймазы дәүләт татар драма театры артисы.

🔸 14 кешегә "Башҡортостан Республикаһының атҡаҙанған артисы",
🔸 3 кешегә "Башҡортостан Республикаһының атҡаҙанған сәнғәт хеҙмәткәре",
🔸 26 кешегә "Башҡортостан Республикаһының атҡаҙанған мәҙәниәт хеҙмәткәре" маҡтаулы исемдәре бирелде.

Шулай уҡ ведомстволарҙың Почет грамоталары һәм Рәхмәт хаттары тапшырылды.

Лайыҡлы баһа алған яҡташтарыбыҙҙы ҡотлайбыҙ! 👏👏👏

Хәйерле көндө гүзәл тәбиғәтебеҙгә һоҡланып ҡарауҙан башлайыҡ әле 😍

Нуриман районының иң матур урындарының береһе - Ҡыҙыл ҡая башынан асылған күренештәр был. Сыуаҡ көндәр торһа ла, көҙ һулышы һиҙелә...

📍 Нуриман районы

Фото: Светлана.

Һайлауға һәр кем үҙ транспортында килә, тип хәбәр итәләр райондарҙан 😀

Һайлауҙың беренсе көнөндә Башҡортостан халҡының 31,89 проценты килгән, тип хәбәр итә Үҙәк һайлау комиссияһы. Айырыуса Нефтекама һәм Салауат ҡалалары, Асҡын, Благовар, Ейәнсура, Салауат һәм Яңауыл райондары әүҙемлек күрһәткән. Башҡалар ҙа ҡалышмай.

Иртәгә лә тауыш биреп өлгөрөргә була, әммә ял тип йоҡлап ятмау хәйерле😉

📌Башҡорт театрының йөҙөк ҡашы булған актрисаларҙың береһе Гөлли Мөбәрәкованың тыуыуына - 90 йыл.

🔹 Гөлли Мөбәрәкова - СССР-ҙың һәм РСФСР-ҙың халыҡ, РСФСР-ҙың һәм БАССР-ҙың атҡаҙанған артисы, Башҡортостандың Салауат Юлаев исемендәге дәүләт премияһы лауреаты, Почёт, Халыҡтар дуҫлығы һәм Салауат Юлаев ордендары кавалеры.

🔹 Ул 1936 йылда Өфөлә тыуған. Атаһы - СССР-ҙың халыҡ артисы Арыҫлан Мөбәрәков, әсәһе - РСФСР-ҙың атҡаҙанған, БАССР-ҙың халыҡ артисы, шағир һәм драматург, СССР Яҙыусылар союзы ағзаһы Рәғиҙә Янбулатова.

🔹 Гөлли Мөбәрәкова актер һөнәрен үҙләштергәс, хеҙмәт юлын Башҡорт дәүләт академия драма театрында башлай һәм ғүмер буйы ошо сәхнәгә тоғро ҡала.

Ул 2019 йылдың 20 февралендә Өфөлә вафат булды.

❤️ Гөлли Арыҫлан ҡыҙы менән һоҡланып, бик күп һәм оҙаҡ һөйләргә була.

Әммә уның тормош иптәше, шағир Рафаэль Сафиндан да арттырып әйтеү мөмкин түгел...


Хоҙай һине, ахыры, һине шулай
Һоҡландырыр өсөн яратҡан.
Яратҡан да, ситтән ҡарап тороп,
Һоҡланғандыр үҙе аҙаҡтан.

Хәтеремдә: мин йәш егет инем,
Һин еткән ҡыҙ инең ул саҡта,
Һиңә күҙем төшөп йөрөй ине.
Тик үҙеңә генә ул хаҡта
Әйтә алманым. Түҙҙем. Тыйылдым.
Буйым етмәҫ кеүек тойолдоң.

Инде хәҙер ир уртаһы булған
Һине күҙләп йөрөгән егеттәр.
Ә һин һаман шул уҡ,
Һаман шул уҡ,
Шул ут күҙҙәр,
Шул уҡ керпектәр.
Тылсымлылар һаман...

Һине күргәс,
Мин тағы ла һиңә уҡталам,
Ялҡын эргәһендә туҡталғандай,
Барып етә алмай, туҡталам.

Мөмкин түгел яҡын бармауы ла,
Барыуыла хәтәр, бик хәтәр...
Инде хәҙер һине күҙләп йөрөй
Миңә ҡусты тейеш егеттәр.

Минең инде йәшем үткән кеүек.
Үтер кеүек шулай күп йылдар,
Һиңә һаман һоҡланырҙар кеүек,
Һиңә һаман ғашиҡ булырҙар.

Хоҙай һине, ахыры, һине шулай
Һоҡланһындар өсөн яратҡан,
Яратҡан да, ситтән ҡарап тороп,
Һоҡланғандыр үҙе аҙаҡтан.