📌 Башҡортостан Башлығында ҡунаҡта

Күмертау ҡалаһынан башҡорт халыҡ йырҙарын башҡарыусы һәм ҡурайҙа уйнаусы малай Әнүәр Вәхитов Башҡортостан Республикаһы Башлығы Радий Хәбировтың эш бүлмәһендә булды.

🔹 Был теләген ул республика етәксеһе III Бөтә Рәсәй балалар фольклориадаһында ҡатнашыусылар менән осрашыуҙа еткергәйне. Һуңынан Башҡортостан Хөкүмәтендә үткән оператив кәңәшмәлә Башҡортостан исеменән сығыш яһаған коллективтарҙы бүләкләүҙә Әнүәр ҡурайҙа уйнаны.

🔹 Әле Әнүәр Вәхитов 6-сы класта уҡый. Күп балалы ғаиләнән, төрлө ижади конкурстарҙа ихлас ҡатнаша, йырлай, ҡурайҙа һәм ҡумыҙҙа уйнай.

💯 "Мин быны тиккә генә эшләмәйем. Был осрашыуҙарҙы беҙҙең киң күләмле һөнәри йүнәлеш биреү эшенең бер өлөшө тип иҫәпләргә була. Бындай йәштәр - республика киләсәге. Ваҡыт үтеү менән Әнүәр ҙә Башҡортостандың идара итеү командаһының бер өлөшө булырға теләһә, ҡыуанасаҡмын",

- тине Радий Хәбиров.

📌Мәсетле районы энциклопедияһының өсөнсө китабы донъя күргән.

Ошо көндәрҙә Оло Ыҡтамаҡ ауылының Мәҙәниәт йортонда яңы китаптың исем туйы булған.

Был - Башҡортостанда ике телдә - русса һәм башҡортса нәшер ителгән тәүге район энциклопедияһы.

🔹 Мәсетле районына арналған китап 920 биттән, 1600-ҙән ашыу мәҡәләнән һәм 1300-гә яҡын төҫлө һүрәттән тора. Унда аҡлы-ҡаралы фото юҡ, яһалма зиһен ярҙамында барыһына ла "яңы һулыш" биргәндәр.

🔹 Энциклопедияла тарих, фольклор, йолалар, тәбиғәт объекттарына, ауылдарға арналған мәҡәләләр айырым урын биләй. Уларҙы 100-ҙән ашыу автор әҙерләргә ярҙам иткән. Ауыл халҡы шәхси архивтарынан фотолар һәм иҫтәлектәр менән бүлешеп, эште күтәрмәләһә, ВТБ банкы һәм меценат Владимир Крючков аҡсалата ярҙам күрһәткән.

🔹 Был энциклопедия Мәсетле районына арналған өсөнсө ошондай йыйынтыҡ: беренсеһе Илдар Мөхөтдинов һәм Юлай Ниғмәтуллин тырышлығы менән донъя күргән, икенсеһе - 2010 йылда Юнир Солтанов етәкселегендә райондың 80 йыллығына арнап әҙерләнә.

💯 "Ата-бабаларыңдың, ауылыңдың тарихын белмәй тороп, ил тарихын төшөнөп булмай. Был китап мөһим мәғрифәтселек һәм тәрбиәүи әһәмиәткә эйә. Тәү сиратта ул йәштәргә - балаларыбыҙға һәм ейән-ейәнсәрҙәребеҙгә тәғәйенләнгән",

- тине Мәсетле районы хакимиәте башлығы Әнис Әсәҙуллин.

🔹 Энциклопедияның тәүге даналары район китапханаларына һәм мәктәптәргә таратыласаҡ, шулай уҡ Пионерҙар һәм мәктәп уҡыусылары йорто, музей, Балалар сәнғәт мәктәбе, ауыл биләмәләре хакимиәттәренә, мәҙәниәт һәм мәғариф бүлексәләренә тапшырыласаҡ.

🔹 Тыуған яҡ тарихына арналған китаптың исем туйы Башҡортостан Республикаһы Башлығы иғлан иткән Милли кейем көнөнә тап килеүе тантаналыҡ өҫтәгән: матур концерт ойошторолған.

📌 Мәҙәниәт эшмәкәрҙәренә дәүләт наградалары тапшырылған.

Кисә "Башҡортостан" Дәүләт концерт залында бер төркөм мәҙәниәт һәм сәнғәт әһелдәре Рәсәй Федерацияһы һәм Башҡортостан Республикаһы дәүләт наградалары менән бүләкләнгән. Улар араһында шаршау артында ҡалған һәм тамашасыға күренмәһә лә, эше үтә әһәмиәтле хеҙмәткәрҙәр, район һәм ауыл мәҙәниәт йорттары белгестәре лә булған.

✅ "Башҡортостандың халыҡ артисы" тигән маҡтаулы исемгә лайыҡ булдылар:

🔹Артур Ҡунаҡбаев - М. Ғафури исемендәге Башҡорт академия драма театры артисы,
🔹Хәсән Усманов - билдәле йырсы, Республика инженер лицей-интернаты педагогы,
🔹 Алик Зәйләлов - Туймазы дәүләт татар драма театры артисы.

🔸 14 кешегә "Башҡортостан Республикаһының атҡаҙанған артисы",
🔸 3 кешегә "Башҡортостан Республикаһының атҡаҙанған сәнғәт хеҙмәткәре",
🔸 26 кешегә "Башҡортостан Республикаһының атҡаҙанған мәҙәниәт хеҙмәткәре" маҡтаулы исемдәре бирелде.

Шулай уҡ ведомстволарҙың Почет грамоталары һәм Рәхмәт хаттары тапшырылды.

Лайыҡлы баһа алған яҡташтарыбыҙҙы ҡотлайбыҙ! 👏👏👏