🍁 Бына шундай көн дә бар икән, рәсми билдәләнмәй, әлбиттә. Ә шулай ҙа кәйефтәрҙе күтәрергә, төрлө сәскәләргә һоҡланырға, матур гөлләмәләр йыйырға һәм бүләк итергә бер шәп сәбәп.

Аллы-гөллө гөл-сәскәләргә күмелгән тормош юлы үтегеҙ - һәр көнөгөҙ бәхетле, шатлыҡ-ҡыуаныстарҙан ғына торһон ❤️

Төшкө ашығыҙ тәмле булһын!

Талҡанға май ҡушып әүәләп ашарға яратаһығыҙмы, әллә ошолай һөт һәм шәкәр ҡушып, "коктейль" яһап эсәһегеҙме? Ҡайһылай за файҙалы инде үҙебеҙҙең башҡорттоң ризығы 🥰

Видеоны Иҙел Хәкимов төшөргән. Тәүгә күрәм, ғәжәпләндем, ти егет.

Башҡорт донъяһы МАХ-та: https://max.ru/channel_bashkortdonja

📌Уҡыусылар Өфөгә "Тел мөхите"нә йыйылған.

Ошо көндәрҙә мәктәп уҡыусылары өсөн беренсе тапҡыр "Тел мөхите" тигән форум ойошторолған.

🔥 Проекттың төп идеяһы - башҡорт телен дәрес йәки айырым уҡыу предметы ғына түгел, ә аралашыу, ижад итеү һәм фекер алышыу мөмкинлеге биргән тере мөхит булдырыу.

🔹 Өс көн дауамында йәштәр төрлө ҡыҙыҡлы осрашыуҙар, мауыҡтырғыс лекциялар, сағыу концерттарҙа ҡатнашҡан. Сөнки форум йәштәрҙе башҡорт телен тормошта ҡулланырға этәрә.
🔹 Бының өсөн программаға лидерлыҡ, йәмәғәт алдында сығыш яһау, медиа һәм блог алып барыу, ижад һәм команда менән эшләү буйынса саралар индерелгән.

🔹 Башҡорт телен һаҡлау һәм үҫтереү ойошмаһы директоры Гөлназ Йосопова билдәләүенсә, Башҡортостанда мәктәп уҡыусылары өсөн тап ошондай форматтағы тел форумы тәүге тапҡыр үткәрелә.

💯"Бында балалар башҡорт телен өйрәнеп кенә ҡалмай, ә уны аралашыу, ижад итеү, үҙ фекерен белдереү һәм яңы дуҫтар табыу өсөн ҡуллана. Тел мөхите тап ошондай тере аралашыу аша булдырыла",

— ти Гөлназ Рауил ҡыҙы.

📍 Проект Башҡортостан Республикаһы Башлығы гранттары аҡсаһы иҫәбенә тормошҡа ашырылған.

❓ Туған тел уҡытыусылары нимәгә ҡыуанған?
✅ Башҡортостан Республикаһы Башлығы Радий Хәбиров менән осрашыу һөҙөмтәләренән.

Быйыл Рәсәйҙә беренсе тапҡыр Халыҡтарҙың туған телдәре көнө билдәләнде. Быны Рәсәй Президентының илдәге күптеллелекте, халыҡтарҙың үҙенсәлектәрен һаҡлауға етди иғтибар бүлеүе, тип ҡабул иттек. Глобалләштереү заманында был айырыуса әһәмиәтле.

🔹 Кисә республиканың йәш туған тел уҡытыусылары менән осрашҡанда Башҡортостан Республикаһы Башлығы Радий Хәбиров та ошо хаҡта һөйләне. Был ил етәкселегенең бик етди, беҙҙең өсөн мөһим аҙымы, тип билдәләне ул.

🔹 Республика етәксеһе Башҡортостанда туған телдәрҙе, айырыуса башҡорт телен үҫтереү һәм һаҡлауға йүнәлтелгән системалы эш алып барылыуы тураһында белдерҙе. Милли кейем көнө, Ҡурай көнө, Милли бейеү көнө, "Урал батыр" эпосы көнө, яңы музейҙар, төрлө форумдар һәм хатта депутаттарҙан башҡортса доклад һөйләүҙе талап итеү ҙә телебеҙҙе йәшәтеү өсөн.

🔹 Бөгөнгө заманда илебеҙгә ҡаршы асылған мәғлүмәт һуғышында дошман өсөн тел мәсьәләһе - иң "төшөмлөһө". Шуға республикала

"Туған телдәрҙе һаҡлау өлкәһендә йәмғиәтебеҙҙе бүлгеләргә һис бер мөмкинлек бирмәҫтәй грамоталы дәүләт сәйәсәтен булдырырға тырышабыҙ",

- тине Башҡортостан Республикаһы Башлығы Радий Хәбиров.

🔹 Осрашыу барышында башҡорт теле һәм әҙәбиәте уҡытыусылары, милли балалар баҡсалары тәрбиәселәре, телсе-студенттар һорау бирә алды - береһе лә яуапһыҙ ҡалманы. Республика етәксеһе мөмкин тиклем ярҙам итергә тырышасаҡбыҙ, ҡатмарлы осор мәңгелек түгел, тине.

💯 "Беҙҙең бөгөнгө осрашыуҙа ҡатнашыусыларҙың иңендә илебеҙ киләсәге өсөн ҙур яуаплылыҡ ята. Улар балаларҙа әсә һәм ата теленә ҡарата һөйөү, башҡа халыҡтар һөйләшкән телдәргә ихтирам тәрбиәләй. Был оҙаҡ йылдарға тыныслыҡ һәм татыулыҡ нигеҙе",

- ти Радий Хәбиров.

МИЛЛИ КЕЙЕМ

Милли кейем – ул халҡымдың
Сағылышы, йөҙө.
Оҫта ҡулы, көс-ҡеүәте,
Сәсәнлеге, һүҙе.
Ҡыҙҙарының гүзәллеге,
Ир-атының сәме.
Ағинәйҙәр аҡылы ла,
Аҡһаҡалдар ғәме.
Милли кейем – ул халҡымдың
Ҡабатланмаҫ йәме.
Бал-ҡорото, сәксәгенең,
Ҡымыҙының тәме.
Меңдәр янында танытҡан
Рух осошо, йәне.
Һаҡла, халҡым, үҙ йөҙөңдө,
Һис таплама, йәме!
Милли кейем – ул халҡымдың
Еҙ ҡурайҙар моңо.
Уралтауы, Шүлгәнташы,
Аҡ ҡылғандар сыңы.
Һомайғоштоң ҡөҙрәте лә,
Аҡбуҙаттың һыны.
Быуаттарҙан ауаз һалған
Ата-баба тыны.
Киләсәккә бурысыбыҙ –
Беҙ һаҡлайыҡ уны.
Милли кейем – бөйөк биҙәк,
Онотмайыҡ шуны!

Айзилә МОРТАЕВА.

Башҡортостан Республикаһы халыҡтарының милли кейеме көнө менән! ❤️
Был байрам 2020 йылда Башҡортостан Республикаһы Башлығы Радий Хәбиров указы буйынса булдырылды.

Фото: Аделия Lulu Weightless.

📌 "Ватан көсө - Сила Отечества" форумы башланды.

Бишенсе тапҡыр үткәрелгән форум меңдән ашыу кешене берләштерҙе.

🔹 Бында "Атайсал" проектында ҡатнашыусылар: меценаттар, ирекмәндәр, МХО геройҙары, әүҙем йәштәр, Башҡортостан яҙмышына битараф булмаған барлыҡ яҡташтар илдең төрлө төбәктәренән йыйылды.

🔹 Форумда 8 тематик майҙансыҡ эшләй һәм улар яҡташтар ойошмаларын көсәйтеү, МХО-ла ҡатнашыусыларға ярҙам, мәҙәни код һәм туған телде һаҡлау, урындағы башланғыстарҙы һәм йәштәрҙе хуплау кеүек мөһим мәсьәләләргә бағышлана.

🔹 "Атайсал" проекты 2021 йылдан Башҡортостан Республикаһы Башлығы Радий Хәбиров башланғысы менән бойомға ашырыла.

Ул Башҡортостанда тыуып-үҫкән һәм тыуған төйәгенә ярҙам итергә теләгән кешеләрҙе берләштерә.

🔹 Юбилейлы форум үҙәгендә илде берләштергән теләк - "Бөтәһе лә Еңеү өсөн".

📌 Башҡортса яңы фильм сыҡҡан!

"Фәрзәнә көнбайышҡа бара" фильмының рәсми трейлерын киң тамашасы иғтибарына тәҡдим иттеләр.

Фильм 2025 йылдың декабренән бөгөнгәсә төрлө махсус сараларҙа күрһәтелгән. Уны бөгөнгәсә уҡыусылар, студенттар, сәнғәт һәм мәҙәниәт эшмәкәрҙәре ҡараған, Өфө һәм Астана ҡалалары тамашасылары баһалап өлгөргән.

💯 "Ошоға тиклем фильм буйынса эш дауам итте. Монтажлау бүлмәһенә инеп, ҡабаттан ҡараныҡ, камиллаштырҙыҡ. Хәҙер киләһе этап башлана. Бөгөн беҙ "Фәрзәнә көнбайышҡа бара" фильмының тәүге рәсми трейлерын тәҡдим итәбеҙ - прокатҡа сығырҙан алда фильмға киң ҡараш",

- тип яҙған авторҙар.

🎬 Фильм ысын тарихи ваҡиғаларға нигеҙләнеп төшөрөлгән: 1944 йылда Башҡортостандан меңәрләгән баш һыйыр малын фашистарҙан ҡотҡарылған Украинаға ҡыуып алып баралар.

📍 Фильм Башҡортостан Республикаһы Мәҙәниәт министрлығы һәм Башҡортостан Республикаһы Башлығы гранттары фонды ярҙамында төшөрөлгән.

🔹 Ҡуйыусы режиссеры - Булат Йосопов
🔹 Ҡуйыусы операторы - Валерий Просвиров.