Ҡоролтайҙың 30 йыллығында ҡатнашыусылар "Ҡоролтай нимә ул?" тигән һорауға яуап биргәндәр

Йөҙәтмәһен әжәл юраусылар,
Беҙ булғанбыҙ, барбыҙ, буласаҡбыҙ,
Үҙебеҙҙең йырыбыҙҙы йырлап
Тарих арбаһында барасаҡбыҙ.
Әммә һис ҡасан да бирелмәбеҙ
Күкрәк һуға торған мин-минлеккә,
Табынырбыҙ башҡорт илендәге
Татыулыҡтар менән именлеккә.

Мостай Кәрим шиғыры – Беренсе бөтә донъя башҡорттары ҡоролтайына ҡотлау сәләме ул. Шунан бирле 30  йыл ғүмер үткән. Был шиғыр әлегебеҙгә– башҡорт халҡы, башҡорт йәмәғәтселеге һуңғы бер нисә йылда кисергән һынылышлы мәлдәргә лә ауаздаш. Күкрәк һуға торған мин-минлектән халҡыбыҙҙы яр ситендә бейетеп, хатта бәләгә тарытҡандарын да үткәрҙек. Ситтән өрөп ятҡан эттәр ише, диңгеҙаръяғына ҡасып, "былай барһа – халҡыбыҙ бөтә" тип әжәл юраусыларыбыҙ ҙа юҡ түгел. Милли темала бысраҡ сәйәсәт ҡороусылар өлөшө ул. Әммә уртаҡ кәмәбеҙҙе сайҡалдырыусыларға ҡараш аныҡ һәм ҡәтғи булды.  Бөгөнгөбөҙ ҙә, киләсәгебеҙ ҙә күкрәк һуға торған мин-минлектә түгел, татыулыҡтар менән именлектә – иң ауыр мәлдәрҙә тап ошо юл һайланды, ошо юлдың хаҡлығы тураһында һүҙ барҙы. Аңлатҡанды  ла аңламаған провокаторҙарға халыҡ башын туҡтауһыҙ бутарға юл ҡуйылманы.

Ҡоролтайҙың 30 йыллығына арналған сара ана шул осорҙоң хәҙер ысын мәғәнәһендә артта ҡалыуын күрһәтте. Ул төрлө өлкәлә эшләгән, уңыш ҡаҙанған башҡорт зыялыларын тупланы. Халҡым тип тамаҡ ярып яр һалғандарға алмашҡа шым ғына үҙ эштәрен алып барған, мөмкинлектәренә файҙаланып, халҡы, йәштәргә реаль ярҙам күрһәткән яңы башҡорттарҙы йыйҙы. Сараға ижтимағи эштәрҙән, милли һорауҙарҙан бөтөнләй ситтә торған, әммә эш-ҡаҙаныштары менән милләтебеҙ бәҫен күтәргән шәхестәр ҙә саҡырылды.
Республика етәксеһе Радий Хәбиров үҙ халҡы менән бергәлеген күрһәтеп, төрлө район-ҡалаларҙан, илбеҙҙең төрлө төбәктәренән йыйылған милләттәштәре менән йәнә осрашты. Әгәр ҙә былтыр үткән Бөтә донъя башҡорттары ҡоролтайындағы сығышында ул шул уҡ Баймаҡ ваҡиғаларына, һатлыҡйән ҡасаҡтар темаһына туҡталып үтһә, быйыл –юҡ. Былтыр тел, мәҙәниәтебеҙ үҫеше өсөн алып барылған күп эштәрҙе барлаһа –быйыл юҡ.

Сөнки, халыҡ эмоциянан арынды - аҡты- ҡаранан үҙе айырҙы хәҙер. Һуңғы йылдарҙа телебеҙ, рухиәтебеҙ өсөн алып барылған эштәрҙе лә белеп, хуплап тора. Иң мөһиме, тап әлеге шарттарҙа берҙәмлектең көсөн, татыулыҡ менән именлектең мәғәнәһен аңлайбыҙ.

Яҡташыбыҙ, донъя сәнғәтендә танылыу яулаған опера йырсыһы, Башҡортостандың халыҡ артисы Илдар Абдразаҡов "Рәсәйҙең халыҡ артисы" исеменә лайыҡ булды. Рәсәй Президенты Владимир Путин бүләкләү тураһындағы Указға ҡул ҡуйҙы.

Ихлас күңелдән ҡотлайбыҙ!

Башҡорт теле көнө менән!

Тел байрамы, рух байрамы менән, дуҫтар!

Видео: Башҡорт телен һаҡлау һәм үҫтереү ойошмаһы

Яңы йылға һәм оҙайлы ялдарға тиклем тағы ике генә дүшәмбе ҡалды, дуҫтар!

Күтәренке кәйеф теләйбеҙ! 🥰

📍 Әйткәндәй, был фотолағы шәп егеттәр кисә "Мега" сауҙа үҙәгендә Башҡорт теле көнө уңайынан үткән матур сарала ҡатнашҡан. Байрамды ойоштороусы Башҡорт телен һаҡлау һәм үҫтереү ойошмаһы төшөрөп алған.

Балалар һәм уларҙың атай-әсәйҙәре Республика халыҡ ижады үҙәге, БР Халыҡтар дуҫлығы йорто һәм Х. Әхмәтов исемендәге Башҡорт дәүләт филармонияһы хеҙмәткәрҙәре үткәргән оҫталыҡ дәрестәрендә ихлас ҡатнашҡан. Берәүҙәр Башҡорт дәүләт ҡурсаҡ театры артистары алып килгән "Ямаҡай бәпкә" спектаклен ҡараған, икенселәр музыка ҡоралдарында уйнарға өйрәнгән, ҡул эштәре серҙәренә төшөнгән.

HAZINA төркөмө, "Тамыр" балалар вокаль ансамбле, М. Кәрим исемендәге 158-се гимназияның "Дуҫлыҡ" өлгөлө ансамбле, "Ғаилә" башҡорт балалар баҡсаһы тәрбиәләнеүселәре, йырсылар Әлфиә Ғәлләмова һәм Әлиә Исҡужина сығыш яһаған.
Балалар уйнап та алған, шунһыҙ булмай.

🔥Үәт, шулай бик күңелле генә үткән был көн баш ҡалала. Ә һеҙ нисек билдәләнегеҙ был көндө?

БАШҠОРТ СӘЙЕ☕

Сәй яратмаған башҡорт юҡтыр ул, көнөнә әллә нисәне самауырҙы йығырға ризабыҙ, шулай бит?

☕Өләсәйҙәр ҡара сәйҙе бигерәк яратты инде, хәҙер йәшел сәй эсеүселәр ҙә күбәйҙе. Беренсеһе "дәүлинйә"не күтәрергә ярҙам итһә, икенсеһе - төшөрә. Ҡайһыһы ла дауа инде! Бигерәк тә үҙебеҙҙең яҡта үҫкән төрлө үлән-япраҡтар, емеш-еләк ҡушып бешерелгән сәйҙең сихәте баһалап бөткөһөҙ.

☕Башҡорттар борондан сәй эсергә яратҡан халыҡ булып танылған. Өйгә ингән бер кешене лә сәй эсермәйсә сығармағандар. "Сәйгә ин", тип саҡырһалар, тимәк, хужабикәнең тәм-том тулы өҫтәле әҙер тора.
☕"Ҡоро сәй эсергә", тиһәләр, тимәк, бишбармаҡ йә итле ризыҡ ҡына юҡ бындай табында.
🔥Башҡорттарҙың бындай ҡунаҡсыллығы тураһында шундай риүәйәт йәшәй: Хоҙай бер көндә кешеләргә байрамдар таратҡан, ти. Әммә башҡорттарға был хәбәр һуң килеп етә: тауҙар араһында йәшәгән башҡорттар ҡасан йыйынғансы, барғансы, байрамдар таратылып та бөткән. Бик ныҡ ҡайғырғандар, ти. Хоҙай быны күреп: "Ярай, мин һеҙгә ҡунаҡтар ебәрермен, йортоғоҙға ҡунаҡ килеүен байрам тип иҫәпләрһегеҙ. Ҡәҙерләп ҡаршы алырһығыҙ", - тигән.

☕Сәйгә бәйле бик күп байрамдарыбыҙ һәм йолаларыбыҙ ҙа бар: Кәкүк сәйе, килен сәйе, кейәү сәйе, бишек сәйе, йома сәйе һ.б.

☕Үҙебеҙҙең башҡорт сәйе мәтрүшкә, боланут, һары мәтрүшкә, ҡарағат һәм ҡурай еләге япраҡтарынан, ер еләге, сейә япрағы һәм, иң мөһиме, һөттән тора.

📍Сәй әҙерләүҙең рәте шулай:
✅самауырға йомшаҡ һыу һалып, ҡайнатабыҙ;
✅сәйнүккә ҡара сәй һәм төрлө үләндәр һалабыҙ һәм ҡайнар һыу ҡойоп, самауыр мөрйәһенә ултыртабыҙ;
✅ике-өс уртлап эсерлек каса йә сынаяҡҡа тәүҙә бешерелгән сәй, шунан һөт, шунан ҡайнар самауыр һыуы ағыҙабыҙ.

❓Ни өсөн тәүҙә бешерелгән сәй шунан һөт һалырға кәрәк?
✅Сөнки тәүҙә ҡара, шунан аҡ килергә тейеш. Тормошоғоҙҙа аҡлыҡ-паклыҡ, бәхет өҫтөнлөк итһен өсөн.

Бал, йыуаса, сәк-сәк, ҡыҙыл эремсек, сейәле май, муйыл ҡорото, ҡаҡ һәм башҡа үҙебеҙҙең тәмлекәстәргә ҡушып, "һөрпөлдәтеп" эсәбеҙ!

Сәйегеҙ тәмле булһын!❤

Тормошоғоҙҙа ниндәй генә хәл-ваҡиғалар булмаһын, ниндәй эшкә тотонһағыҙ ҙа - БИСМИЛЛА менән башлағыҙ! 🤲

Балаларыбыҙға быны йыр аша өйрәтеү - бик хуп.

Видео: Шәһит Хамматов.

📌2026 йыл - Башҡорт ғаиләһе йылы

Был хаҡта Бөтә донъя башҡорттары ҡоролтайы Президиумы рәйесе Эльвира Айытҡолова хәбәр итте.

Нәҡ ғаиләлә халыҡтың теле, йолалары, мәҙәниәте һаҡлана һәм киләсәге тәрбиәләнә, тип билдәләгәндәр Ҡоролтайҙа.

📍Рәсәйҙә Хәлыҡтар берҙәмлеге йылы тип иғлан ителгәндән һуң, ошо берҙәмлеккә нигеҙ һалынған, бер-беребеҙгә ҡарата ихтирамлы ҡараш тәрбиәләнгән йәмғиәт ячейкаһы - ғаиләгә иғтибарын йүнәлтәсәк йәмәғәт ойошмаһы.

Әйткәндәй, быға тиклем Башҡортостан Башлығы Радий Хәбиров та ил президентының халыҡтар дуҫлығын нығытыуға йүнәлтелгән сәйәсәтен хуплағайны.

📌Санкт-Петербургта «Яҡташлык көсө — сила отечества» йәштәр форумы үтәсәк.

Сара 18 декабрҙә Санкт-Петербургтағы Милләттәр йортонда уҙа. Унда Санкт-Петербург ҡалаһында уҡыған һәм йәшәгән Башҡортостан студенттары һәм йәштәре ҡатнашасаҡ.

Форум дәүләт органдары, мәғариф учреждениелары һәм йәмәғәт ойошмалары вәкилдәре менән йәштәр араһында бәйләнеш булдырыу, танышыу, йәштәрҙе борсоған мәсьәләләрҙе ишетеү маҡсатында уҙғарыла. Шулай уҡ республика мәнфәғәтендә эшләү, үҫеш, эш табыу тураһында ла һөйләшәсәктәр.

⚡Форумға саҡырылғандар:
✅Рәсәй Дәүләт Думаһы депутаты Эльвира Айытҡолова,
✅Башҡортостандың РФ Президенты эргәһендәге тулы хоҡуҡлы вәкиле Ринат Фәйзуллин,
✅Санкт-Петербург тау университеты ректорының махсус вәкиле, академик партнерҙар менән бәйләнеш буйынса проректор Сергей Новиков,
✅Санкт-Петербург Жуков хәрби орденлы РФ милли гвардияһы ғәскәрҙәре институты етәксеһе, генерал-майор Андрей Кийко,
✅Санкт-Петербург ҡалаһының Кронштадт районы хакимиәте башлығы Андрей Кононов.

📍Инеү ирекле, әммә мотлаҡ теркәлеү үтергә кәрәк:
forms.yandex.ru/u/693856b2...

Һуңғы бер аҙнала республикала 4 социаль объект асылды.

✅Башҡортостан Республикаһы Башлығы эргәһендәге мәҙәниәт һәм сәнғәтте үҫтереү буйынса Совет ултырышы сиктәрендә Ишембай, Хәйбулла һәм Мәсетле райондарында яңы мәҙәниәт йорттары асылғайны.

✅ Кисә Асҡын районында өр-яңы поликлиника сафҡа инде. Уны асыу тантанаһында (ВКС форматында) Рәсәй Хөкүмәте Рәйесе урынбаҫары Татьяна Голикова һәм илдең һаулыҡ һаҡлау министры Михаил Мурашко ҡатнашҡан.
Шулай итеп, Асҡын районында беренсе медицина ярҙамы күрһәтеү системаһы тулыһынса яңыртылып бөткән. Бығаса райондың ауылдарында иҫке ФАПтар урынына заманса фельдшер-акушерлыҡ пункттары асылғайны - һуңғы бер нисә йылда өр-яңы медпункттар Иҫке Ҡаҙансы, Ключи, Ҡубыяҙы, Мутайылға , Ҡарткиҫәк, Упҡанкүл, Яны Ҡара, Билгеш ауылдарында барлыҡҡа килде. Заманса йыһазландырылған ҙур поликлиника Асҡында һаулыҡ һаҡлау системаһын модернизациялау буйынса ҙур эштең йомғаҡ өлөшө. Заманса бина менән бер рәттән төпкөл райондарға көн талабына тура килгән йыһаздар ҙа ҡайтарыла, сифатлы медицина хеҙмәтен күрһәтеү мөмкинлектәре тыуҙырыла. Әйткәндәй, әлеге мәлдә республикала бер юлы тағы ла бер нисә район поликлиникаһын төҙөү эше алып барыла.

Халыҡ-ара кимәлдәге спорт объекты йә Кампус ише республика өсөн мөһим әһәмиәткә эйә булған учреждениелар менән бер рәттән ябай халыҡ өсөн мөһим объекттар асылыуы күп нәмә хаҡында һөйләй. Был тыуған еренә ерегеп йәшәгәндәр хаҡындағы хәстәрлек тә, төбәктең киләсәген үҙ ҡулына алыр йәш быуын өсөн шарттар тыуҙырыу сәйәсәте лә. Бөгөн шул уҡ ауыл клубтары йә ФАПтарҙы күҙ уңында тотҡанда, республикала уҙған быуаттың 70-се йылдарында төҙөлгән социаль инфраструктура яңыртылыуын һыҙыҡ аҫтына алырға кәрәк. Йәғни бөгөн ауыл-райондарҙың иң кәмендә алдағы илле йыллығы хәстәрләнә.

"Башҡорт теле", Башҡортостандың халыҡ яҙыусыһы Зәйнәб Биишева шиғыры.

Уҡый: Башҡортостандың атҡаҙанған артисы Рәзилә Билалова.

Видео: Нурзилә Усманова.