ELITE ACADEMY 2025

المهم، خدمت بزاف ديال اللمتحانات السابقة، شفت بزاااف ديال الحالات، وكل حالة كفاش نتعامل معاها، وكل مرة كنكتاشف شي حاجة جديدة كنطبقها وهي غادة، كنت مسالي المادة فالبدية ديال شهر 4، وبقيت من ديك الفترة مرة مرة كنشد شي امتحان وطني، مرة كنجيب 19، مرة كنجيب 18.5 ولكن معمر النقطة مهبطات على 18، وكنت كنسالي الامتحان فساعتين

اوا كلشي كان غادي مزيااان وانا فرحان حتى قري الجهوي وهنا ركزت على المواد اللي فيه ونسي شي حاجة سميتها مواد الوطني ومنهم الفيزيك وفاش دوزت الجهوي وساليتو، قلت اجي نستارح واحد النهار عاد نبدا المراجعة ديال مواد الوطني، حينت عييت بزاااف، مقدرت نهار الثاني نتحرك والو، الكاو بمعنى الكلمة، يعني حتال النهار الثالث عاد نويت نهز شويا داك الكتاب ونراجع هاد الفيزيك، لقيت راسي شي حاجة مبقيتش عاقل عليهم

وايلي اش طرا؟ كنحس بعقلي خاوي، هنا جبت الملخصات ديالي كاملين وبديت كندوز درس بدرس وكنشوف شنو شاد مزيان واشنو اللي لا، كنكتاشف بلي 40٪؜ فيها مشكل، يعني تقريبا النصف، بدات كتشدني الدوخة وبديت كنحس براسي عامر بزاااااف، وهادشي عااادي جدا وغادي اقدر اطرا ليك حتى انت خصوصا فمادة الفيزياء اللي مكتساليس، نقدر نقوليك بلي هاد المادة بزااااف، بالدروس ديالها بالعلاقات بالحالات اللي فيها …

المهم، كنت بغيت نراجع الSVT والفلسفة والانجليزية، صدقت غاع ماطليت عليهم، بقى واحل غير مع الفيزيك، كنحاول نرجع داكشي اللي ضاع، حتى وصل نهار قبل من الامتحان عاد فهمت البلان وفهمت اشنو طاري

القضية ومافيها، العقل ديالي عامر ببزاف ديال المعلومات، ماشي خاوي كيفما كتخيل ليا، غير حينت كنكثر عليه بزاااف د المعلومات دقة وحدة كتبلوكا وحينت باغي نراجع بزاف ديال الدروس دقة وحدة داكشي علاش هادشي طرا

صافي تكالميت وجلست مكندير والو، بقيت غير كندعي بدعاء التيسير، وحطيت الملخصات اللي كنحس بلي عندي فيهم مشاكل باش نشوفهم مع 5 د الصباح قبل مانشد الطريق ندوز الوطني

داكشي اللي كان، فقت بكري، شفت الملخصات (والله منكدب عليك، الا الاقمار كنت حاس بيهم بزااف ايتحطو معرفتش علاش، وخا مخدمتش فيهم تمارين بزااف، عرفت اشنو هما الحاجات الاساسية اللي خاصني نكون عارف وآخر حاجة شفت قبل منخرج من الدار كانت هي علاقات ديال داك الدرس)

مشيت الامتحان، توكلت على الله، تفرقو اوراق الامتحان، قريت الامتحان كامل، مكين حتى سؤال جديد، جميع الاسئلة فالمتناول، نقدر نجاوب على كلشي، خاص غير الاجابات تكون صحيحة

بالمناسبة، تبعت المنهج ديال الامتحان، يعني تبعت الترتيب، الكيمياء هي اللولة، موراها الموجات، من بعي النووي، الكهرباء وآخر حاجة اللي كتعجبني هي الميكانيك

فاللول خديت راحتي وبديت كنكتب بسويا وكنزوق واللعيبات، واحد شويا شفت الوقت داز بزاف وانا غير فالكيمياء، وانا مبدا نزيد فالسرعة، زيرني شويا السؤال الأخير ولكن قدرت نجاوب عليه

كملت عادي سؤال مورا سؤال، تمرين مورا تمرين، متبلوكيتش والو، حتى ساليت الامتحان كامل كانت بقات شي 10 دقايق بحال هكاك، درت مراجعة خفيفة لنكون نسيت شي سؤال وسنيت وخزجت وانا فرحان

علاش؟

حينت تمتعت وانا كندوز داك الامتحان، حينت حسيت بلي الخدمة وداكشي اللي ركزت عليه تحط وخدمتو مزيان ومتأكد النقطة اتكون مابين 19 و 20 فغالب الاحيان

وفالآخير كنكتشف بلي مابين أحسن النقط اللي جبت فالباك ليبر وعاونتني نجيب 18 هي مادة الفيزياء والكيمياء اللي جبت فيها 19.5 والمعامل ديالها 7 يا سلاااام

كانت هذه قصة التحول من واحد كاره الفيزيك وجايب فيه 8 الى كنبغي هاد المادة وجايب فيها 19.5 تبارك الله

ملاحظة : مدرت حتى عرض عند شي أستاذ، فقط المراجعة فاليوتوب وصاحبي غوووغل

تانتا ممكن ديرها ومازال عندك الوقت

يتبع ….

______________

الا كنت استافدت شي حاجة من هاد القصة ولا من الرسائل اللي فاتو، متنساش تجاوبني وتقوليا اشنو اللي أثر فيك بزاااف واشنو عجبك فيها وتقدر الا بغيتي بالتأكيد تشاركها مع شي صاحبك باش تموتيفيه وتقدر تشارك معاه حتى القناة ديالي

: رابط التسجيل في الرسائل الصباحية

CLICK HERE

: رابط القناة BY EL BADAOUI

CLICK HERE

شكرا ليك حينت قريت هاد الرسالة كاملة

وعطيني اقتراح المادة اللي تبغي نهضر عليها فالرسالة القادمة ؟

مبقى والو وغادي تحقق الهدف ديالك وتجيب الباك

تيق فراسك وفي الله سبحانه وتعالى

كنتمنى ليك التوفيق والنجاح

تحرك اليوم قبل غدا

البدوي

رفيقك في رحلة الحصول على الباك بميزة حسن جدا

Youssefelbadaoui

اللائحة الخاصة

4.4K views06:18