استشهاد الامام الحسن العسكري ع


الهل تعزيه اتعنينه نستخلف المهدينه
البقاء في حياتك سيدي
****
عدنه عاده الفاتحه من نعتنيها
ايگوم للوادم ابوها ايحيي بيها
انته وينك سيدي شو ما تجيها
نظره منك يابو صالح نرتجيها

لازم وجودك بيها غيرك منو راعيها
البقاء في حياتك سيدي
****
فقط نترحم لون رحنه الفواتح
تختلف فاتحتك وجينه بنوايح
الوالدك يالمهدي مره الدمع سايح
ومره لفراگك دمعنه يابو صالح

متروسه ونه ضلوعك ندري تهل ادموعك
البقاء في حياتك سيدي
****
ايعينك الله وعظم الباري مصابك
ادفنت ابوك وبالعجل اصبح غيابك
شما تطول اسنينك ايطوّل عذابك
بالفرج إدعولي يا شيعه خطابك

مرفوعه والله ايدينه عجل فرج والينه
البقاء في حياتك سيدي
****
شگد مصايب اه يمهدينه ابدليلك
هدّي من روعك يبو صالح دخيلك
دموع حمره سيدي تارس شليلك
فوگ گبر العسكري هديت حيلك

بنفاسك المجروحه دموعك حمر مسفوحه
البقاء في حياتك سيدي
****
من غبت لليوم دمعك بس تصبه
هل عزاء اشگد بعد رايد تنصبه
بيا زمن سيفك يبو صالح تخظبه
تسكت وثارك يتاني اهواي صعبه

يمته تجرد سيفك وتاخذ يغالي بحيفك
البقاء في حياتك سيدي
****
ثار ابوك وثار اهل بيتك ينطرك
ابتدائن من ضلع فاطم نخبرك
ماكو داعي بنحر ابو اليمه نذكرك
بلوعة الطف عايش انته سنين عمرك

عندك بعد رزيه ثار المشت سبيه
البقاء في حياتك سيدي
****

الشاعر اياد الديراوي

مولد الرسول ص

يا شمس والدنيه بيك اتلالي
****
الدنيه گبلك ظلمه چانت يالنبي
إندعت جمّلني ربي ابهل صبي
بنور وجهك گلها يالله اتحجبي
انه سويتچ لجل هل غالي

يا شمس والدنيه بيك اتلالي
****
انته لو لاك الضوه ما بي ضوه
گبل يومك چان مخنوگ الهوه
يالله بسمِ الله گلتلهن سوه
بيچن اشرگ عالارض يحلالي

يا شمس والدنيه بيك اتلالي
****
انته فوگ الگاع اجمل من نزل
بالصفات وبالكرامه وبالعمل
چان گبلك يالنبي مر العسل
تصفه گتله من تصف ابجالي

يا شمس والدنيه بيك اتلالي
****
انته عن كل الخلائق تنفرد
بورده نتعنه ونگصده الينولد
لاچن انته اليوم زينت الورد
كل عطر عايد الك بالتالي

يا شمس والدنيه بيك اتلالي
****
الليله كون الله ابجمالك ينفرش
يالنبي مهدك صبح ساگ العرش
والسماء انجوم الك ظلت تطش
عالي يابو الزهره شانك عالي

يا شمس والدنيه بيك اتلالي
****
لاربعينك امي لا ما اقتنع
ابمهده عيسى يسولف ابين الجمع
بصدرك الله طابع آيته طبع
الله گلك بيك ابث اقوالي

يا شمس والدنيه بيك اتلالي
****

الشاعر اياد الديراوي

هوسات مولد الرسول ص


نزع بالجنه هادينه النبي إكليله
يزفه للارض جبريل هالليله
دخيل الخالق عيون النبي ادخيله

شمس الله اتغار امن عيونه
****
نبي گبل الولاده خالقه الرحمان
من دون البشر يتگمط اب قرآن
تصلِ اعليه هالليله الانس والجان

والكعبه اويانه اتصليله
****
سطع نور الرسول وغابت الگمره
شعاع الكون كله بخير ابو الزهره
الهوه من صار هادينه انگلب عطره

جايب عطر الجنه بثوبه
****
ابقدوم المصطفى المختار هادينه
چكليت او ورد بالفرحه طشينه
نهني انريد ونبارك يمهدينه

واليومك فرحه امحضريها
****


نبارك للزچيه انريد ونهنيها وجب مرتين
بميلاد النبي المختار والصادق حفيد حسين
الدنيه اتبرگعت هاليوم من اتلاگن النورين
خسران الاجه وما راد ويانه يصفّگ زين

كل احزانك خليها والچفين اصفگ بيها
فرحتنه ما ننطيها والهلهوله انعليها
هاي الليله نحييها حتى الزهره انهنيها
غنوة شوگ انغنيها تنسر بينه ندريها

والما غنه الليله اوياي
ما يعشگ بيت الزهره
****


الشاعر اياد الديراوي

ابو ذيات مولد الرسول ص


بآن المصطفى نوره ورسمه
شمس عينه اخطنها ورسمه
محمد من يمر اسمه وره اسمه
نصلي ابعالي صوت اعله سويه
****
الحزن هالليله اطلگنه وحِجبه
تاه الكون بعيونه وحجبه
انه حروفه اطوفنها وحج به
للكعبة شرف سيد البريه
****

الشاعر اياد الديراوي

استشهاد الزهراء ع



يالزهره فرگاچ اشعمل بسنيني
بس الله يدري اشگد بچتلچ عيني
متنه سويه اتمنيت بعدچ ولا يسوه البيت
يالزهره
****
مات الحيل كله ولا هوه ابريتي
دفنت اوياچ يم حسين عافيتي
من دونچ يزهره شلون تاليتي
اول مره اكره ادخل البيتي

ما يندخل داري بعد يالزهره
بعدچ وحگ عشرتنه صار امگبره
ياوسفه وحدي ظليت بعدچ ولا يسوه البيت
يالزهره
****
عالحلوه اتفقنه انعيش والمره
وعالَمْنه بصلاة الليل نختصره
نرفض چنه كلمن يختلي بگبره
مو گلنه سويه انموت يالزهره ؟

متّي ورفضتي ابلحدچ اتخليني
مو ذاك حيدر راح اظل تدريني
فوگي ترايب هليت بعدچ ولا يسوه البيت
يالزهره
****
دفنتچ وانه صرت ابمشيتي اعثر
مو چني علي ذاك اليهد عسكر
استعديت إلمحن دنياي اتصبر
لچني الفرگتچ يالزهره ما اگدر

انه اقتنع بس گلبي شنهو ايقنعه
عايش زماني الخاطرچ يالبضعه
حزام المصايب شديت بعدچ ولا يسوه البيت
يالزهره
****
خلص بيچ الالم من ساعة الدفنه
كسر ضلعچ اكيدن طاب بالجنه
وجب هجرچ اخلصه ابدمعه والونه
عشرين وتسع اعوام اعيشنه

كل لحظه من دونچ تمر احسبها
عل حايط البي دم ضلع اكتبها
ما ينفع اشما كتبيت بعدچ ولا يسوه البيت
يالزهره
****
يمچ كل مسه يم الحسن انعه
ورشنّه الگبر يا فاطمه بدمعه
النفس يصعد لون إبايدي ما رجعه
اليعيش بلا حبيبه الدنيه متنفعه

اشتنفع بعد هالدنيه وانتي ابعيده
عمر اليخلص بس بچي ما ريده
من دم مدامع صبيت بعدچ ولا يسوه البيت
يالزهره
****
الچ مدري اليه الفاتحه اقراها
زينب كل مسيه ابابي الگاها
احضنها واطيحن انه وياها
يفطر الكون يم حسين مبچاها

نبچي ونصيح ابدونچ اتيتمنه
اتطرشنه غيرچ لا ابد ميلمنه
الگعدتنه ذيچه حنيت بعدچ ولا يسوه البيت
يالزهره
****


الشاعر اياد الديراوي

استشهاد الزهراء ع


بالمدمع تجاره إقراها الزياره
****
سلم واهمل دموع .. صوتك عدها مسموع .. وترده سلامك
لتگلي الگبر وين .. ابكل بقعه ام الحسين .. تتردد علامك

ما حاجه مناره اتشوف ابني ابگلبك الگبه
واتخيل تطب لحسين هيچ المدمع اتصبه

من تبني المناره إقراها الزياره
****
ربح الزهره مو مال .. اتنجيك امن الاهوال .. ربحك بالقيامه
اشتنفع بالله دنياك .. تتخلد تره اهناك .. اهنا ماكو سلامه

لو نوح النبي عمرك هم تخلص تره سنينك
غير الزهره يا مسكين ياهو اللي يگر عينك

مفهومه العباره إقراها الزياره
****
وياها ابني مشروع .. سمي دمعه وضلوع .. ولطماتك بضاعه
ابمشروعك تحط باب .. وارسم فوگه المصاب .. وحدره اكتب شفاعه

كونك تنچوي بالباب وصدرك ينترس دخان
واسيها بنفس مجروح واغرگ حيل بالاحزان

بابك ويه ناره إقراها الزياره
****
عيش بوضع الجنون .. واعمي اعليها العيون .. وجرحهن خدودك
نايم بيها مسمار .. حيل ابچي عله الصار .. اخلص من قيودك
مسمار الكسر الضلوع طيّح محسن اعله الگاع
طلعت من گلبها الآه من ام حسن كلشي ضاع

وبهاي الحراره إقراها الزياره
****
من انسطرت العين .. ما صاحت يبو حسين .. اتصورها الفجيعه
ظلت دمعه تجري .. عنده اوصيه تدري .. ويلي اعله الوديعه

ما همها الالم والنار دين الهادي كل همها
ما ندبت علي الكرار رغم الضلع لاچمها

ما جرد فقاره إقراها الزياره
****
حيدر عاش الاحزان .. ودع اغلى انسان .. آهاته چبيره
غسلها بالجروح .. روح وفارگت روح .. فارگله عشيره

علي من غسل البضعه انلچم وياها ابو الحمله
يطيح امن البچي ويگوم مصاب الزهره شيحمله

صار أظلم نهاره إقراها الزياره
****

الشاعر اياد الديراوي

استشهاد الزهراء ع


إدعيلي .. يزهراء
شفعيلي .. يزهراء
****
للمجلس تعنيت وعيوني جريه
ضايع يم الحسين لزميهن اديه
شغلت فكري دنياي والتمت عليه
غيرچ مالي والله من تلفي المنيه

إدعيلي .. يزهراء
شفعيلي .. يزهراء
****
اشكر رب الأكوان شيعي من خلقني
صح ابذنبي انعاب بس حبكم رزقني
من تلتم الاحزان دهري الكم يذبني
اشما ابعد مسافات مجلسكم يردني

إدعيلي .. يزهراء
شفعيلي .. يزهراء
****
بدموعي احس روح يطول بيها عمري
وأشعر املك الكون كل ما لطمه صدري
مو من فارغ البال واقع هذا امري
بالمجلس تحضرين وتنظريلي ادري

إدعيلي .. يزهراء
شفعيلي .. يزهراء
****
مني ادري اشتريدين من احضر عزائچ
ما ردتيها الدموع بس تبچي المصابچ
اذكر دوم الحسين هذا اول رجائچ
اوليدچ باب الاحزان يعني هوه بابچ

إدعيلي .. يزهراء
شفعيلي .. يزهراء
****
ضلعچ طره مسمار يا ويلي اعله ضلعچ
هاي السيره تنعاد يساعد الله گلبچ
بالطف عشرة خيول تنهد اعله ابنچ
مصابه مصابچ حسين ينحز يمه نحرچ

إدعيلي .. يزهراء
شفعيلي .. يزهراء
****
امصابچ چنه عاشور مفهومه الفجيعه
بابچ خيمة اطفوف شافته الوديعه
محسن لونه ينشاف چن لون الشريعه
باچر يوگع اعضيد چفينه گطيعه

إدعيلي .. يزهراء
شفعيلي .. يزهراء
****

الشاعر اياد الديراوي

استشهاد الزهراء ع


يمته طلعتك .. تاخذ بثار الزچيه .. يمته طلعتك
****
يمته يا غايبنه تظهر طولتها الغيبه
لو صبرنه انسان والله الك چا شگ جيبه
محزمين وفزعه وحده هالشباب وشيبه
ويه راية ابو فاضل سيف حيدر جيبه

ندري يمنتك .. تاخذ بثار الزچيه .. يمته طلعتك
****
الكسر ضلوع الزچيه بعده يفخر بيها
ذوله احفاده تراهم رايته امعليها
امك الها جروح كثره انته التداويها
حان وكتك آل اميه بصارمك تمحيها

هسه فزعتك .. تاخذ بثار الزچيه .. يمته طلعتك
****
يبو صالح هذا صبرك ما عرفنه اسبابه
البيده حارگ باب امك يمته تحرگ بابه
اطلعه من گبره نريدك اجه وكت احسابه
هوه لو ما چتف حيدر ما نعيش ابغابه

نرجه همتك .. تاخذ بثار الزچيه .. يمته طلعتك
****
حرگه بينه الضرب فاطم گبره واضح وينه
وامك الزهره گبرها ضايع اويه اسنينه
انته لو ما تظهر النه ياهو ليدلينه
ندعي اللهم عجل خل يجي والينه

عازه عازتك .. تاخذ بثار الزچيه .. يمته طلعتك
****
ماهو ثار وگلنه تخلص فاجعه ثاراتك
والشعار انعرفه كلنه كاتبه ابراياتك
طف ابو اليمه مصيبه منه كل آهاتك
ويه خيل السحگ صدره نستمع شوغاتك

ويه شوغتك .. تاخذ بثار الزچيه .. يمته طلعتك
****
حسين ماكو مثل يومه دمعه اله يوميه
راسه فوگ الرمح ويلي وجثته مرميه
ان چان تصبر للفجيعه ولوعتك مخفيه
شلون صابر بالله گلي عمتك مسبيه

ندري غيرتك .. تاخذ بثار الزچيه .. يمته طلعتك
****


الشاعر اياد الديراوي

استشهاد الزهراء ع


من يجي المهدي غداً ينتقم لام الحسن
ما بين الملاين يصلب بيده الثنين
ينتقم لام الحسن
****
ابقائمته الامام اهواي وادم بس كتبها اذياب
من عمق السنين بسيف يحاسبهم گبل الاحساب
الجمّع حطب للزهره ايجيبه ايعلگه فوگ الباب
يا أهل الأرض شوفو من ذوله ابتده المصاب

تنجمع كل البشر ايعاينون المنتظر
يطلبهم تره دين يصلب بيده الثنين
ينتقم لام الحسن
****
وي صوت الوحي جبريل المهدي يصيح ومتاني
بچف حيدر تره اتعنيت حان الوعد يالجاني
من صحن النبي المختار ايطلع جثة الثاني
وينادي برفيع الصوت هذا اكثرهم اذاني

گلبي حيل امألمه هذا ضارب فاطمه
بجرحه عايش سنين يصلب بيده الثنين
ينتقم لام الحسن
****
يبدي احسابه غايبنه اهناك بفدك عالشجره
الباگ الگاع من امه بخزرة حيدر ايخزره
بسوط البي وگف عالدار واتكشخ عله الزهره
بنفس السوط ابو صالح يجلد حيل بي ظهره

انه محكمة العدل ها هنا حان القتل
احسابهم حسابين يصلب بيده الثنين
ينتقم لام الحسن
****
ابذاك اليوم كلها شهود باب الدار والمسمار
شبوني يصيح الباب واحرگت الزچيه ابنار
والمسمار تالي يصيح دفعوها علي بصرار
بضلوع ام حسن طبيت وبيها الزهره كلشي انهار

إلنفس منها انگطع وعالارض محسن وگع
ما يكفّن سيفين يصلب بيده الثنين
ينتقم لام الحسن
****
الزهره ابين موت ونار تنخه الوصي ما تگدر
بين ال وإن والشتمات بالمحسن غدت تعثر
مجبور الوصي الكرار عن الزهره يتعذر
حيدر بالوصيه انگاد وتالي چتفوا حيدر

المهدي ثاراته اشكثر ايقدموله يا عذر
حيدر حگه چا وين يصلب بيده الثنين
ينتقم لام الحسن
****
يصلبهم ولكن ثار هذا الما طفت ناره
المهدي يصيح اه يحسين ورايه ايشيلها الثاره
احفاد الهذول اهواي هد كلمن ابّتاره
بيوم العاشر بعاشور جده دمومه تتجاره

بخنجر انحز النحر وصدره بالخيل انكسر
هذا ثار الحسين يصلب بيده الثنين
ينتقم لام الحسن
****

الشاعر اياد الديراوي

الى ام البنين ع


مو بعيد الموت عني ساعه ويچفنوني
نلتقي يم الزچيه يالعميت عيوني
واحسيناه واحسيناه
****
راح اموت وعيني حمره نعمه هاي امن الإلاه
انه مبخوته وبچيتك يبني هذا اعظم بلاء
الزهره من تسالني عينچ ليش متروسه دماء
بكل فخر اوگف وگلها عمت عيني كربلاء

كون حمره دموعي تبقه وابد ميغسلوني
نلتقي يم الزچيه يالعميت عيوني
واحسيناه واحسيناه
****
بكل وكت يحسين انته حچايتي وموضوعي
اي لطمت اهواي بعدك وما هجعلك روعي
لا تظن لجلك يغالي تشفي صدري دموعي
هوه لو جائز وحگك كسريت اضلوعي

انه من اسنين ميته بس بقه يدفنوني
نلتقي يم الزچيه يالعميت عيوني
واحسيناه واحسيناه
****
يبني ما مر ليل بيه اله وانه اعله الترب
خذت من البيت كلشي چا بعد المن اطب
الديره انته الماهو بيها مايها ما ينشرب
لا هواها اليطب ريه ولا يدگ بيها الگلب

سلني حيل افراگك انته إخفيفه لو شيعوني
نلتقي يم الزچيه يالعميت عيوني
واحسيناه واحسيناه
****
حيل اخاف الباب اسده وابد ما سديته
حتى عطرك من يسبگك ما يتيه بيته
اگبال بابي دموعي كلها وچم اثر خليته
ورمش عيني الشاب كله عالارض طشيته

ايست تاليها وادري خيبيت اضنوني
نلتقي يم الزچيه يالعميت عيوني
واحسيناه واحسيناه
****
اهنانه لو بالجنه يبني ابچي الك متعلمه
كلمن بجرحه يسولف انه وامك فاطمه
انه راح الزم قميصك إلبعده يتگاطر دمه
وامك بچفين تلطم عله ضلوع امهشمه

ذني چفين ابو فاضل ابني بي فجعوني
نلتقي يم الزچيه يالعميت عيوني
واحسيناه واحسيناه
****
للخلگ ماكو خفايه اهناكه كلشي يتضح
نلتقي وادري اشوفك توه چنك منذبح
بالحشر كلشي يغالي بيك حتماً ينجرح
شنهو يبني بصدرك الگه سهم لو نابت رمح

بدالك انته يبو اليمه وسف ما ذبحوني
نلتقي يم الزچيه يالعميت عيوني
واحسيناه واحسيناه
****

الشاعر اياد الديراوي

ام البنين ع

بنتظارك بنتظارك يبني عذبني انتظارك
كبّرت واصرخ تعال جرحي اذن مو بلال
****
واگفه ومحنيه يالغالي اعله بابك
اشهدُ انّ الكسر ظهري غيابك
چم شمس طلعت وتاني ايمر سحابك
بس يجيني الليل اشتم بترابك

ما تجيني ما تجيني يمته يالغالي تجيني
شوفتك صارت محال جرحي اذن مو بلال
****
رحمة الله اتجمعت كلها بنظرتك
وانا محتاجه يبو اليمه الرحمتك
بين اموتن بين اناطر يبني جيتك
شوف طبع اخدودي يوليدي بعتبتك

شگد اتاني شگد اتاني موتي خطوه وانا اتاني
دمعة عيوني سؤال جرحي اذن مو بلال
****
مراقبه دروبك وتاني وعلْتي عله
لا نفس لا دمعه هجرك بيه خله
قابض الارواح لا ما ينطي مهله
من يجيني الموت يوليدي اشأگله

هسه يرجع هسه يرجع ابني ما ينساني يرجع
يمه هجرك چنه طال جرحي اذن مو بلال
****
بصيغة الام اعتب اعليك او اكلمك
گبل حيدر الله لختارني امك
يبني اشتاگ وعله الحيطان ارسمك
انتبه والگه الرسم بي فيض دمك

چنه واقع چنه واقع خاف موتك يبني واقع
شنهو حل بيك النزال جرحي اذن مو بلال
****
مستجابه الدعوه مني وحيره امري
گبل لا ادعي تردلي يضيگ صدري
چفوفي من وحدها تلتف اعله نحري
وچني اسمع يمه ابنچ كسر ظهري

ابو فاضل ابو فاضل گطعو چفوف ابو فاضل
ونترس جسمه نبال جرحي اذن مو بلال
****
لا نطرت ولا حسبت اترد بنيني
ما يهموني المهم انته تجيني
ان ما كفوك امحظرتلك كل سنيني
يبني بس ارجع وانه الانطيك عيني

اخذ مني اخذ مني عيني چفي اخذ مني
انا اناطر لا ازال جرحي اذن مو بلال
****

الشاعر اياد الديراوي

هوسات
مولد الزهراء ع

الأرض من مولد الزهره ولا جفّت
بهيئة كوثر بحضن النبي نزلت
مو ماي السمه نور ام حسن مطرت

جبريل ايطش نور بايده
****
ابولادتها الفلك والكون يتعطل
بعد هالليله هيهات الورد يذبل
تره الحنظل عسل من صارت اتبدل

ميلاد ام حسين اعجوبه
****
بنت الهادي حگه النور لو شعشع
ثمار الجنه طينتها اشبعد تطلع
من الكون صوت المصطفى يسمع

لأبن العم بنتك محجوزه
****
عشگ رباني وأهل البيت يدرونه
علي للهادي بارك والخجل دونه
تره متانيها والفرحه عله عيونه

هاي ام حسين المحروسه
****

الشاعر اياد الديراوي

مولد الزهراء ع

مولاتي .. انتي نور ما يشبهچ ثاني
مولاتي .. ظل يفور عطرچ الرباني
مبروكه يزهراء مبروكه يزهراء
اللهم بارك للهادي الهاشمي
*
يالزچيه ابهل ولاده الله وزع نوره
سورة الكوثر بدونچ ما تصح! مبتوره
الدنيا گبلچ يالوديعه امغيمه ومكسوره
إلوحي بشرها صرتي وعكست النه الصوره

دنيانه .. تضوي دوم لجل هاي عيونچ
دنيانه .. بيها عين منها شفناه نورچ
مبروكه يزهراء مبروكه يزهراء
اللهم بارك للهادي الهاشمي
****
انتي دون الناس كلها صوره شغلت بالي
اندلع المولود عدنه بالذهب والغالي
يالزچيه من يثمنچ غير ربنه العالي
انتي من الله هديتچ ابو حسين الوالي

بس حيدر .. كفو صار آيه تشبه آيه
بس حيدر .. ما يلوگ الچ غيره امرايه
مبروكه يزهراء مبروكه يزهراء
اللهم بارك للهادي الهاشمي
****
ابو العتره الهادي احمد ما تصح ابدونچ
انتي ما بين الرساله والامامه اعيونچ
وصل انتي وسلسلتهم گعدت اعله امتونچ
انتي اول مره صرتي ام ابو مضمونچ

يالزهره .. اچبيره دوم رغم زغر اسنينچ
يالزهره .. الله نور ودّع ابچفينچ
مبروكه يزهراء مبروكه يزهراء
اللهم بارك للهادي الهاشمي
****
بسمة الهادي اشحلاها بيها ضوه الديره
ابمولدچ يالزهره يدري اكتابه حل تفسيره
لوله انتي واهل بيتچ چا فلكنه ابحيره
لا شمس لا بحر يجري الهوه منهو ايديره

بارينه .. سوه كون چي يحبكم ثاري
بارينه .. سوه نور والعرش والذاري
مبروكه يزهراء مبروكه يزهراء
اللهم بارك للهادي الهاشمي
****

الشاعر اياد الديراوي

استشهاد الامام الهادي ع


حگها دموعي يا شيعه جريه
دومه ابالي يوم الغاضريه
كل هاي السنين اصرخ يا حسين
دومه ابالي يوم الغاضريه
****
اليريد ينوح لمصابي اخبرنه
الدمع لتهله كله اعليه واتأنه
صحيح الچبده مسمومه والي ونه
ولكن يوم ابو اليمه فلا منه

صح الچبده هالليله خضيبه
بس يوم الطفوف اكبر مصيبه
جرحه ما يلين اصرخ يا حسين
دومه ابالي يوم الغاضريه
****
اشما زادت جروحي وكثرت همومي
اقارن بين يوم العاشر ويومي
ما طحت اعله خدي وتنزف دمومي
محد هد عليه وسلب اهدومي

شنهو الچبده هذ آنه بسلامه
ما مچفي اعله وجهي بلا عمامه
گطعوله الوتين اصرخ يا حسين
دومه ابالي يوم الغاضريه
****
الدمع لحسين نعمه وفايز الينحب
يستاهل دمه مو دمعه لتسلب
صحيح الينذبح بالسيف يتعذب
اشحاله البل سهم دلاله يتصوب

بسهم امثلث اتفطر دليله
محد يمه يتعنه ويشيله
مفضوخه الجبين اصرخ يا حسين
دومه ابالي يوم الغاضريه
****
فوگ الغبره جدي بآخر انفاسه
دار عيونه گوه الصوب عباسه
چنه يگله خويه الحگني باحساسه
لحظات ويرفعون برمح راسه

اول مره عمي ما يطيعه
ميت ويلي وچفوفه گطيعه
مبتوره الادين اصرخ يا حسين
دومه ابالي يوم الغاضريه
****
يمي العيله واحبابي بسلامتهم
لا شتموهم ولا حرگو اخيمهم
الشمر بالسوط ما هد ويلاحگهم
ولا بالخيل هاي أطفالي يسحگهم

الزينب عمّتي متوجره ناري
ويه العيله فرّت بالبراري
ما الها معين اصرخ يا حسين
دومه ابالي يوم الغاضريه
****
الحسن يمي وبعد ساعه يغسلني
يچفني وبعدها بگبري يدفني
ولكن جدي وضعه بطفه حيرني
شلون اعله الترب ظل عاري دوهني

حگه لو ترس دمعي شليلي
اثلاثه اعله الرمل نايم يويلي
للضامي حزين اصرخ يا حسين
دومه ابالي يوم الغاضريه
****

الشاعر اياد الديراوي

مولد الامام علي ع


من عالم الذر حبينه حيدر
نادينه بسمه علي علي علي علي
****
وي علي حبنه ابتده گبل الولاده
ابغير عشگه ندري متفيد العباده
ابذاك عالمنه علي شفناه قياده
انطقنه عالفطره تره ثالث شهاده

ابنص هاي الگلوب والينه منصوب
اشمحلاته رسمه علي علي علي علي
****
ابعالم الارحام صرنه وعلي بينه
وچان حبل الحب فرض ملتف علينه
نستمع نبضات تهتف يا ولينه
من گلب امنه عشگ صافي يجينه

حبه شربناه واسمه عرفناه
وصرنه نشمّه علي علي علي علي
****
سيرة الحب بس علي ما عدنه غيره
افتحنه ناظرنه وبدت هاي المسيره
نذكر اتبارك لاهالينه العشيره
هذا ابنكم حيدري واضح مصيره

واضح دربنه ربونه اهلنه
واجب نفهمه علي علي علي علي
****
يكبر الحب بينه ظل كل ما كبرنه
لقبونه رافضيه ولايگ النه
غير حيدر ابد والله ما عشگنه
النار حصتهم لچن حصتنه جنه

الما حبه خسران تنتظره نيران
والينه رحمه علي علي علي علي
****
ياللي ما تفهم عشگنه اهواي معذور
چي نحبه حيدره تكرهنه مجبور
كل وكت عندك سؤال ابراسك ايدور
الكعبه ليش الهل وكت حايطها مفطور

ابيت الله نيشان للوالي عنوان
من الله نعمه علي علي علي علي
****

الشاعر اياد الديراوي

السيده زينب ع


غريبه غريبه غريبه
الزمن بيه اشعمل بقيت ابلا اهل
****
أنه زينب تراني بت نبينه
عجيبه الدنيا شو دارت علينه
شمسها وكلشي فوگاها امن ادينه

اشعجب متفارگ عيوني دمعتي
غريبه ابيا وكت صارت نظرتي
مثل جمر الخيم والله حسرتي

الما يضوگ الغربه مثلي حگه ما شايف الم
ديره ديره اعله الهزيله دخلوني اويه الحرم

غريبه غريبه غريبه
الزمن بيه اشعمل بقيت ابلا اهل
****
ابوي المرتضى وامي العظيمه
تره اتشتم وحگ حيدر هضيمه
يگيدوني بحبل اكبر جريمه

ذبح لخوان شافته عيوني
واگول الله اليصبرهن جفوني
بس اشمعنه ضربوهن متوني

فوگ ما ذبحو اخوتي بسوط ورم هالمتن
حزني ما مر اعله غيري مفصل اعليه الحزن

غريبه غريبه غريبه
الزمن بيه اشعمل بقيت ابلا اهل
****
تمنيت المنيه ابيوم عاشر
بهذاك اليوم ما ظلت ضماير
كتاب الله تمزگ بالحوافر

دليلي يا وضع بالله اليجرعه
ترس اذني ضحك شمات اسمعه
انوليت وما بعد تنفعني دمعه

اشگد تمنيت المنيه چا خلص جرح الطفوف
عايشات ابالي لسه ارماح وسهام وسيوف

غريبه غريبه غريبه
الزمن بيه اشعمل بقيت ابلا اهل
****
الحرگوها الخيم وآدم ذئابه
ما كفاهم الطف ومصابه
جابونه ورمونه بهل خرابه

ملتويه علينه هل سلاسل
عازتنه اشكبرها انريد كافل
ما فارگ لساني اسم ابو فاضل

اشگد اصيحن يبو فاضل ما يرد بس الصده
والله لو عباس يمي ما يطگوني العده

غريبه غريبه غريبه
الزمن بيه اشعمل بقيت ابلا اهل
****
جرح المتون يلتم وادري يخفه
وجفني الجرّحته طفوفي يشفه
ولكن بالقصر وگفاتي كلفه

نظرتهم سيوف اتصد عليه
اذا للحرمه ما عدهم سجيه
اشذنبها بالله فهموني رقيه

حنّت ورادت ابوها والطشت جابه الحرس
حضنت الراس اليتيمه صاحت ومات النفس

غريبه غريبه غريبه
الزمن بيه اشعمل بقيت ابلا اهل
****

الشاعر اياد الديراوي

استشهاد الامام الكاظم ع


يم الجسر نهر نهر
عنك ابو فاضل وين
****
نزف چبدك .. چنت وحدك .. ولا عندك
واحد يساندها قضيتك

ردت كافل .. يجي ايقاتل .. ابو فاضل
تتمنه اله چانت حميتك

بينك وبين الممات احچايه
كون ابو فاضل يجي بالرايه
تنگلب بغداد طف الثاني
اشگد تمنيته الگمر ويايه

يم الجسر نهر نهر
عنك ابو فاضل وين
****
على وضعك .. يهل دمعك .. منو يسمعك
غربه ولا يمك مناصر

نهر شفته .. وتذكرته .. الكفل اخته
ابوضعك صرت ياموسى حاير

ما ردت سبعين تلفي اتعينك
صحت ياعباس عمي وينك
هوه چان الوحده جيش ابكربله
غيره محد يطفي نار اسنينك

يم الجسر نهر نهر
عنك ابو فاضل وين
****
اذا يمك .. الگمر عمك .. منو ايسمك
بچفوفه سجانك منيته

عله المهره .. يجي ابخزره .. منو يگدره
سيفه عليه راسم هويته

بالحرايب تشتعل انفاسه
هز طفوفه وهز يزيد وساسه
ريته هارون الحظه ابعباسك
حدر جسرك والله يدفن راسه

يم الجسر نهر نهر
عنك ابو فاضل وين
****
اشعمل دهرك .. اشتعل صدرك .. خلص عمرك
ابطاموره وانفاسك حزينه

تصد إلهم .. عساكرهم .. منو يردهم
زمرة شمر هاي ولعينه

الگمر لو موجود ميسجنونك
بالسلاسل حاشه ميچتفونك
يبسط اچفوفه ويشد احزامه
الكون كله ايگلبه لجل عيونك

يم الجسر نهر نهر
عنك ابو فاضل وين
****
يالمعذب .. الگلب يلهب .. مثل زينب
الراحت عله الهزله سبيه

ابمخيمها .. كثر همها .. لچن يمها
عباس ابن حامي الحميه

بيوم صاحت عمتك عطشانه
راح للشط وفتح ذرعانه
الماي شاله وكله حطه بجوده
وأربعة آلاف طم بمچانه

يم الجسر نهر نهر
عنك ابو فاضل وين
****
الجسر لا شك .. صبح عرشك .. انوضع نعشك
بس عيلتك عنك بعيده

ابو اليمه .. انسفك دمه .. لچن يمه
ضحاله بانفاسه عضيده

ابو فاضل ما يعز جروحه
هامته الهاذ الوكت مفتوحه
ايقدم انفاسه الك يالغالي
مثل ما لحسين ضحه بروحه

يم الجسر نهر نهر
عنك ابو فاضل وين
****


الشاعر اياد الديراوي

استشهاد الامام الكاظم ع


سلاسل بيدك وعشت بظلام
عله جروحك يمولاي السلام
****
يا غريب بنص قيودك والظلام اصبح وطن
دمعت عيونك اسيره والهوه اوياك انسجن
عندك آهات اشكبرها فوگ صدرك غيّمن
مو سنه وسنتين جرحك جرحك بگد الزمن

مِحِنْتك ما يوصفها الكلام
عله جروحك يمولاي السلام
****
يا سلام الله اعله گلبك الما حضه برحمة بشر
مو كأن جدك محمد اشماله وياك الدهر
النبي أيوب حتما حاشه گدك ما صبر
المحنتك يبن الزچيه ناح وانطر الحجر

سنينك عالحجر خلصت تنام
عله جروحك يمولاي السلام
****
دمعت احبابك جريه هاك اخذ كل الدمع
الليله من دون اليالي الك ونه تنسمع
فوگ ما بالظلمه عايش چبدك بسم ينگطع
حگها لگلوب المصابك يبن جعفر تنفجع

الك دمعتنه يا سابع امام
عله جروحك يمولاي السلام
****
دم چبدتك يبن جعفر ويه الدموع انمزج
ضاگت الوسعه وقرارك تلتقي برب الحجج
بيوم جمعه الشيعه تنطر وفرفحت كل المهج
من كثر ما محنه شايف موتك اتسمي فرج

جسر بغداد ياموسى الختام
عله جروحك يمولاي السلام
****
موعدك محد يخلفه للجسر كلها اعتنت
ما لگوك احبابك انته منطرح نعشك لگت
ويه دمعات الغياره السمه كلها بچت
ميت ولابس قيودك شمسك اهناك انطفت

عله جسرك مدامعها ازدحام
عله جروحك يمولاي السلام
****

الشاعر اياد الديراوي

مولد الامام الحسين ع


انكشف لو منكشف نورك عليه
ماْ ازددتُ يقيناً يبو ارقيه
مو توّه العشگ يحسين وياك
سالفتي گبل خلق البريه
امتحان ارواح صار بعالم النور
گبل آدم لگيتك انته بيه
الزهره ام الحسن وزعت الأوراق
واحس الجنه صارت كلها ليه
چان اول سؤال اتحب الحسين؟
اكتبت هوه النفس صبح ومسيه
بديت اقره واجاوب كلشي مكتوب
نعم اشطب صرت بثنين اديه
اگلبتها الصفحه والگيت الختام
نحسبك خادم اعله ابن الزچيه ؟
بچيت امن الفرح يحسين مولاي
خلقني الباري انه الهل قضيه
سلمت الصحيفه وانطر اجواب
واجت من امك الزهره الهديه
النتائج طلعت وگلتلي مبروك
نجحت بهل عشگ ميه بالميه
****

الشاعر اياد الديراوي

مولد الامام الحسين ع


يا ربيع ايامي
يا رسم بأحلامي
عشگي انت سيدي اليوم المنيه
****
حسيني . انت محبوبي . امنور ادروبي . عشگك هويه
گلبي . بالگلب شوفك . ينبض حروفك . صبح ومسيه

تدري . خيري من خيرك . ما احب غيرك . تشهد عليه
عنك . ما يبعدوني . انت بعيوني . يبن الزچيه

اغلى من كل غالي
اول انت وتالي
عشگي انت سيدي اليوم المنيه
****
هايم . والله مجنونك . ظمني بعيونك . دخيلك إمامي
آنه . فطرس الليله . حزني هفيله . ردلي سلامي
روحي . بيها ضميتك . كعبه سويتك . قبلة غرامي
انت . مصحف الباري . ودمعة اشعاري . مالك كلامي

يا شعِر بشفافي
حيرتها اوصافي
عشگي انت سيدي اليوم المنيه
****
صوره . اگبالي راسمها . دوم اكلمها . هايم خيالي
شامه . تضوي بخدودك . نسخه من عودك . وجهك يلالي
هيبه . اشمحلى هالنظره . اعمامتك خضره . وصفك حلالي
نسمه . ابرمشك اتغازل . ناظرك شايل . منظر خيالي

وجه الله ونوره
انجمعن ابهالصوره
عشگي انت سيدي اليوم المنيه
****
لوحه . عالعرش اسمك . وانطبع رسمك . نقشة خصالك
الجنه . الله خالقها . حتى يرزقها . شوفة جمالك
الدنيا . شعشعِت بيها . انت ضاويها . رادت وصالك
نورك . من علي وفاطم . والنبي الخاتم . واضح دلالك

والشمس والگمره
مولدك تنتظره
عشگي انت سيدي اليوم المنيه
****
عمري . اوهبته تدريني . انطيتك اسنيني . اقبل هديتي
عايش . انت بانفاسي . بروحي وحساسي .ساكنها ريتي
طلبه . منك ارجيها . سيدي اگضيها . تعرف قضيتي
خادم . ابقى لعيونك . والله من دونك . وحشه منيتي

يا مليك اسنيني
بالگبر لاگيني
عشگي انت سيدي اليوم المنيه
****

الشاعر اياد الديراوي