کۆبوونەوەیەک لەگەڵ وەزیری پەروەردەی هەرێمی کوردستان

✍️عەبدولهادی
  2023-11-14
ڕۆژی سێشەممە ڕێکەوتی ١٤ی ١١ی ٢٠٢٣، «ئالان حەمە سەعید ساڵح» وەزیری پەروەردەی حکومەتی هەرێمی کوردستان، پێشوازی لە ئەندامانی گرووپی ئاسۆسۆفت، «عەبدولهادی عەباس» و «سابات محەممەد» پەرەپێدەرانی سیستەمی گۆڕینی دەنگ بۆ نووسین و مامۆستا لە زانکۆی سۆران کرد.
لە دیدارەکەدا بڕیار درا کاری پێویست بە هەماهەنگیی وەزارەتی پەروەردە ئەنجام بدرێت لەسەر پرۆژەی سیستەمی دەنگ بۆ نووسین. هەروەها لە پلاتفۆرمی «ئی-کتێبخانە» و بەشێک لە پرۆگرامەکانی خوێندن سوود لە بەرهەمی ئاسۆسۆفت وەربگیرێت.

ڕۆژی یەکشەممە ڕێکەوتی ۲۰۲۳/۱۲/۰۳، ڕێکخراوی جەمال نەبەز لە شاری بێرلین لە ئەڵمانیا یەکەم خەڵاتی جەمال نەبەزی پێشکەش بە خاتوو زارا محەممەدی مامۆستای زمانی کوردی کرد.

گرووپی ئاسۆسۆفت بە وتارێک لەسەر دۆخی سەرچاوەکان و تەکنۆلۆژییەکانی زمانی کوردی لەو ڕێوڕەسمەدا بەشدار بوو. پوختەی وتاری پێشکەشکراو بەم شێوەیە:

وێڕای هەبوونی ژمارەیەکی زۆری ئاخێوەران، زمانی کوردی بە هۆی بەربڵاویی زاراوەکانی و بارودۆخە سیاسییەکەی، زمانێکی کەم-سەرچاوە ئەژمار دەکرێت. مەبەست لە زمانی کەم-سەرچاوە زمانێکە کە داتای زمانیی کۆمپیوتەریی پێویستی نییە کە مۆدێلەکانی ژیریی دەستکردیان لەسەر ڕابهێنرێت. لە دەیەی ڕابردوودا چەندین هەوڵ بۆ پەرەدانی سەرچاوە و تەکنۆلۆژییەکان بۆ زمانی کوردی هاتوونە ئاراوە. ئێستا کاتی ئەوەیە کە بەراوردێکی نوێ بکەین و جارێکی تر دۆخی زمانی کوردی هەڵسەنگێنین: ئایا هێشتا کوردی زمانێکی کەم-سەرچاوەیە؟ پێشکەوتنەکان لە لقە جیاجیاکانی پێواژۆی کۆمپیوتەریی زمانی کوردی چی بوون؟ کام سەرچاوانە لە پێشترن بۆ ئەوەی لە ئێستادا ئامادە بکرێن؟ چۆن دەتوانین پشتگیریی زاراوەکانی وەک هەورامی و کوردیی خواروو بکەین کە کەمتر بایەخیان پێ دراوە؟