ASD AJ LAH

መዳን!
በአላህ ስም - ተከተበ ከFLSI

በጠዋት በስልኬ ከሚደርሱኝ እለታዊ መልእክቶች አንዱ 86/87 ቀን ስለቀረው ረመዷን የሚያወራ የጁምዓ ማስታወሻ ነበር። ትናንት ኢድ ብለን ያከበርን ያህል ያልራቀብኝ የትናንት ረመዷን ትውስ ቢለኝ ትዝብቱ እየታየኝ ተሳቀቅኩ።
«
ወንጀልህ ተወዝፎ ሲያበቃ፣ 'ተውበት' ይሉት አጥር አልባው የጌታህ ደጃፍ መኖሩን ስትዘነጋ፣ የዳኢም ኗሪ መሆንህን ባመንክ ጊዜ ከአዘቅትህ ደርሼ አውጥቼህ አልነበር?
እንኳን የሌት ስግደት የብርሐኑንም ስግደት መፈፀም የማትችለውን አንተን፥ ወደተሐጁድ ሶላት ያስገሰገሰህ ኑረቴ አልነበረም?
ከነፍስያህ እኩል እየተስገበገበ ለሐራም የሚያበጃጅህ ጠላትህ ታስሮ የራቀህ በኔ አልነበረም?
እጅ እግርህ ወደሐራም ከመሮጥ ታቅቦ በሐያእ የጌታህን መሐርታ እንዲለምንልህ አልረዳሁህምን?
እድፍ መኖሪያው እንዲሆን የፈረድክበትን የጌታህን ውድ ቃል ዳግም ታነበው ዘንድ የሆነው በኔው መኖር አልነበረም?
ከአንድ ሺህ ወራት በላጭ የሆነችውን ለሊት ያገኘኸው፤ ከውጥንቅጥ አለም እረፍት የተሰጠኸው በኔው ከሆነ ኋላ ውለታዬን ቀርጥፈህ ዳግም ያገኘሁህ ቦታ መገኘትህ ስለምን ነው? ነፍስህን ከሐጥእ አላቅቄ ወደኸይር ያደረስኩህ መስሎኝ ለኔ ብቻ እየኖርክ እንደነበር ሲገባኝ እርግጥ አዝኛለሁ።
ቢሆንም ድጋሚ ነፍስህን ከማደስ አልሰንፍምና እየመጣሁ ነው።
»
የሚለኝ ይመስለኛል። አይሆኑ ቦታ ላይ መሆኔ ይታወቀኛል'ኮ። ግን ከነፍሲያ ልቆ ትክክለኛውን መርጦ ማድረግ ረሱሉ ﷺ እንዳሉት ጂሐድ ኾነብኝ።

ከሱ መምጣት የኔ መሞት ቢቀድምስ የሚለው ሐሳብ እንደፈራሁት ተከትሎ አእምሮዬን ያናውጥ ያዘ። ከአምዋት መንደር ስለሚፀፀቱበት ነገር ሲጠየቁ አንድ ረመዷንን ድጋሚ ማሳለፍ ቢችሉ ብለው እንደሚመኙ ስሰማ ማደጌ ይሁን ወይም እኔም የሚሰማኝ የረመዷን ጥልቅ እድሳት ስሜት ... ብቻ አንዱ ረመዷንን ቆሽሼ ለመንፃት የምጠባበቀው ሳይሆን በጦሀራ እንድቀበለው ይወተውተኝ ያዘ።
ክረምት ክረምት ረመዷን በሚሆንበት ዘመን አያታችን ጋር የመሔድ እድሉን ስናገኝ አያቴ ሁሌም የሚመክሩን ሐሳብ ሽው አለብኝ።
«ረመዷንን ዝግጁ ሁነህ ከተቀበልከው ሠላሳውንም ቀን ትጠቀምበታለህ። እንዲያዘጋጅህ ሁነህ ከተቀበልከው የመጨረሻዎቹ ቀናት ላይ ትነቃና 'ረመዷን ሮጠብኝ' እያልክ ለመጠቀም ስትፍጨረጨር ያልቅብሐል የኔ ልጅ። 'የተቆጠሩ ቀናት...' ሲል አሏህ የነገረንኮ ቀናቱ እንዳጀማመራቸው ኹሉ ማለቃቸውም አይቀርም ሊለን ነው።» ይሉን ነበር።

እንግዲህ የማይደርስ ቢመስልም ወደጌታችን ይበልጥ የምንቃረብበት ረመዷን ከሩቅ መአዛው እያወደን ነው። ነገ ቃል አልተገባልንምና ዛሬንም ነገንም ኸይር እየሞከርን ረመዷንን መጠበቁ ሳይበጀን አይቀርም። መለከል መውትም ይሁን ረመዷን ቀድመው ቢያገኙት ግድ የማይሰጠው ሰው ከመሆን በላይ እድያ ይኖር ይሆን?

194 viewsASD AJ LAH, edited 19:54