🗳 Այսօր Ազգային ժողովի հերթական ընտրություններն են։

🕗 Ժամը 08։00-ին Հանրապետության ողջ տարածքում տեղամասերը կբացվեն 2 մլն 485 հազար 851 ընտրողների առաջ․ թե նրանցից քանիսը կմասնակցի քվեարկությանը, կիմանանք դրա ավարտից հետո։

📈 Իսկ մինչ այդ Infocom-ն, ի թիվս այլնի, ձեզ պարբերաբար կներկայացնի մասնակցության ընթացիկ ցուցանիշները եւ նախնական արդյունքները։

📃 Այս տարվա ԱԺ ընտրություններին մասնակցում է 18 քաղաքական ուժ։

☝ Երբ ընտրատեղամասում ձեզ տրամադրեն 18 քվեաթերթիկ, եւ դրանցում 13 համարը բացակայի, չզարմանաք․ այդ համարի տակ եղած «Ալյանս» կուսակցությունը ինքնաբացարկ է հայտնել։

📌 Քվեարկությունը կավարտվի 20:00-ին։

📱 Հետեւեք մեր հարթակներին՝ բաց չթողնելու օրվա զարգացումներն ու ստանալու ստուգված տեղեկություններ. մենք ողջ օրվա ընթացքում աշխատելու ենք ձեզ համար։

👮 Ոստիկանները հայտնաբերել և ընտրական իրավունքի իրականացմանը խոչընդոտելու կասկածանքով ձերբակալել են մեկ անձի: Նա ներկայացվել է Քննչական կոմիտե:

[ՀՀ ՆԳՆ ոստիկանություն]

📣 ՀԱԿ ընտրական շտաբը հայտարարում է՝ հունիսի 6-ին ՔՊ կուսակցության ղեկավար անդամներ Վահագն Ալեքսանյանը, Արսեն Թորոսյանը, ինչպես նաև «Անկախ դիտորդ»-ի ղեկավար Դանիել Իոանիսյանը, հանդես են եկել տեսաուղերձներով, որտեղ «շինծու քրեական գործեր հարուցելու բացահայտ սպառնալիքներ են հնչում այս օրերին ՀՀ վերադարձող և ընտրություններին մասնակցելու մտադրություն ունեցող համաքաղաքացիների հասցեին»։

🗣️ «Ավելին, հիշյալ անձինք բացահայտ հրահանգներ և ցուցումներ են տալիս իրավապահ մարմիններին՝ ժամանող քաղաքացիներին ձերբակալելու և նրանց վերադարձի նպատակները «պարզելու» համար։

📌 Այս գործելաոճը ոչ այլ ինչ է, եթե ոչ պետական ու իրավապահ մարմիններին սահմանադրական կարգը տապալելուն ուղղված գործողությունների մեջ ներքաշելու բացահայտ փորձ՝ սեփական պաշտոնական դիրքի և կուսակցական պատկանելության չարաշահմամբ։

🔸 Գտնում ենք, որ իրավապահ մարմինները, եթե իսկապես ուսումնասիրության և քրեաիրավական գնահատական տալու առիթ ունեն, ապա դա հենց վերոնշյալ անձանց հակաօրինական հայտարարություններն ու գործողություններն են», - հայտարարում են կուսակցության շտաբից։

🗳 Թեեւ քվեարկության մեկնարկից անցել է ընդամենը մեկ ժամ, սակայն արդեն որոշ արձանագրումներ են արվում։

📌 Երեւանի 4/38 տեղամասը, որ տեղակայված է երաժշտական դպրոցում եւ ունի երկար աստիճաններ, առանց թեքահարթակի է՝ անմատչելի հենաշարժողական խնդիրներ ունեցող անձանց համար:

🔸 Այս տեղամասում վնասված դրոշմանիշի դեպք է արձանագրվել, գրանցում է կատարվել մատյանում։ Չնայած վնասված դրոշմին՝ հանձնաժողովի նախագահը ընտրողի քվեարկության ծրարը համարել է վավեր։

🔸 Քվեատուփի պատասխանատուն դրոշմանիշերը ծրարներին փակցնում է ոչ թե ընտրողի ձեռքում, այլ դրանք հերթով վերցնելով ընտրողի ձեռքից. պատճառաբանությունն այն է, որ դրոշմանիշի որակը վատն է, առանց դիպչելու դժվար է փակցվում։

🔸 Այս տեղամասում ընտրելու իրավունք ունի 1266 անձ, 9:27-ի դրությամբ քվեարկել է 83 ընտրող։

📣 «Ուժեղ Հայաստան»-ի ցուցակը գլխավորող Նարեկ Կարապետյանը խորհրդարանական ընտրություններում քվեարկեց Տաշիր քաղաքի դպրոցում։

📌 Նա նշեց, որ քվեարկում է հանուն Հայաստանի վերակառուցման:

🗣 «Քվեարկել եմ հանուն Հայաստանում մեծ փոփոխության, վերակառուցման և Հայաստանի, որտեղ մարդիկ զբաղված են իրենց երկիրը շենացնելու, ոչ թե վատություն անելու համար»,– լրագրողների հետ զրույցում ասաց Կարապետյանը։ |arm.sputniknews.ru|

🗣 Ժամը 08։00-ի դրությամբ գործընթացը ընթանում է բնականոն, այս ընթացքում ինչ-որ տեխնիկական խնդիրներ են եղել, որոնք հընթացս արագ լուծվում են․ ԿԸՀ նախագահ

📣 «Ժամը 8-ի դրությամբ բացականեր ենք ունեցել 2 005 տեղամասերից 48–ում։ Ընդամենը 3 դեպքերում 2 նախագահ և մեկ քարտուղար է բացակա եղել։ Ընտրական օրենսգիրքը հնարավորություն է տալիս, որ եթե ընտրական հանձնաժողովից որևէ մեկը բացակա է, միևնույն է գործընթացը շարունակվում է», - նշել է ԿԸՀ նախագահ Վահագն Հովակիմյանը։

📣 Շենգավիթի 8/37 և 8/38 ընտրատեղամասերում առավոտից հերթեր են։ Մանկապարտեզի մուտքի մոտ ոստիկանները հերթով քաղաքացիներին թույլ են տալիս մտնել ներս, որպեսզի քվեարկության սենյակում կուտակումներ չլինեն։

🔸 Քվեախցիկների հետևի մասում պատուհան կա, որտեղից երևում է մանկապարտեզի փակ բակն ու այլ պատուհաններ։ «Հետք»-ը փորձել է պարզաբանում ստանալ հանձնաժողովի քարտուղարից, հետո նախագահից։ Սկզբում նշել են, որ առավոտյան են կահավորանքը փոխել և իրենց որևէ դիտողություն չեն արել պատուհանի ու քվեախցերի մասով։

🔸 «Դրսից պատուհանի մուտքերը բոլորը փակ են, ոչ մեկ դրսից չի մոտենալու,- նշել է հանձնաժողովի նախագահը՝ վստահեցնելով, որ մուտքերը կողպեքով և ժապավեններով փակ են թե դեպի բակ, թե դեպի երկրորդ հարկ, որտեղից ևս տեսանելի կլինի քվեախցիկը։ Ըստ Սոֆյա Խաչատրյանի, ոստիկանները ևս հսկում են՝ բացառելու դեպի այդ հատվածներ մուտքը։

🗣 «Դեպի բակ դռները փակ են»,- ասել է «Անկախ դիտորդ» դաշինքի անդամ Հասմիկ Վահրամյանը, անձամբ է ստուգել։ Ասում է՝ ինքն էլ է այդ մասին հարցրել, բայց հիմա խնդիր չի տեսնում։ |hetq.am|

«ՀայաՔվե» միավորումը [«Ուժեղ Հայաստան» դաշինք] հայտարարում է, որ 8/14 ընտրատեղամասում բաց քվեարկության դեպք է եղել։

Տեսանյութը՝ «ՀայաՔվե»-ի

🗳 Վարչապետ Նիկոլ Փաշինյանն իր ընտրությունը կատարեց 8/20 ընտրատեղամասում։

Նա ծրարը քվեախցիկում դնելուց հետո ցուցադրեց իրենց նախընտրական ժեստը՝ սրտիկ։

Նիկոլ Փաշինյանն իր ընտրությունը կատարելուց հետո պատասխանեց լրագրողների հարցերին։

Լրագրողներից մեկը հարցրեց՝ ինչու է նա ճնշումներ գործադրում ընդդիմության վրա, օրինակ՝ փորձում էին «Ուժեղ Հայաստանին» դուրս թողնել ընտրապայքարից։ Նիկոլ Փաշինյանն արձագանքեց՝ իսկ ո՞վ է փորձել։

«Դրանք գործընթացներ են, որոնք իրականացվում են՝ համապատասխան Հայաստանի Հանրապետության ընտրական օրենսդրության։ Դուք գիտեք՝ ցավոք, շատ փաստեր կան ընտրակաշառքների վերաբերյալ, և ՀՀ պետական մարմինները պարտավոր են արձագանք տալ»,- ասաց նա։

📣 9/51 ընտրատեղամասում տպված կտրոնի թիվը չի համապատասխանում մատյանում գրված համարին, որոշվել է՝ արդեն տպված կտրոններով ընտրողները քվեարկեն մատյանի անուններով, սակայն ընտրական պրոցեսի հետագա ընթացքը դեռ անհայտ է։ Այս մասին հաղորդել է «Ազատության» թղթակիցը:

🗳️ Արտաշատի թիվ 12/7 ընտրատեղամասում Զոյա Զաքարյանը քվեախցում փորձում էր քվեարկել, բայց ասաց, որ իր նախընտրած թեկնածուի անունը չկա քվեաթերթիկների վրա։

📣 Հանձնաժողովին ասաց, որ օգնության կարիք ունի։ Հանձնաժողովի նախագահ Անժելա Սահակյանն ասաց, որ իրենք օգնել չեն կարող, առաջարկեց դրսում գտնվող մարդկանց օգնությանը դիմել։ Զոյա Զաքարյանը քվեաթերթիկները ձեռքին դուրս եկավ սենյակից և քվեարկության եկած քաղաքացիներից մեկին խնդրեց գտնել իր նախընտրած թեկնածուի անունը, գտնելուց հետո վերադարձավ և կատարեց իր ընտրությունը։ 

📌 Հանձնաժողովն այդ պահին արձանագրություն չկազմեց, նախագահ Անժելա Սահակյանն ասաց, որ օրվա ընթացքում ԿԸՀ-ից կճշտեն եւ կկազմեն։ 

📌 12/7 ընտրատեղամասում  գրանցված 1725 ընտրողից ժամը 9:40- ի դրությամբ ընտրությանը մասնակցել է  118 ընտրող։ |hetq.am|

🗣 Լրագրողներից մեկը Նիկոլ Փաշինյանին հարցրեց՝ մեծամասնություն չկազմելու դեպքում պատրա՞ստ է ընդդիմություն դառնալ։ Փաշինյանն արձագանքեց՝ ժողովուրդը կորոշի։

🇦🇲🇷🇺 Մեկ այլ հարցի, թե արդյո՞ք լարվածություն կա Ռուսաստանի հետ հարաբերություններում, ՔՊ վարչապետի թեկնածուն պատասխանեց․ «Ես լարվածություն չեմ տեսնում․ դա արհեստական լարվածություն է, Ռուսաստանի հետ մեր հարաբերություններն ունեն ինստիտուցիոնալ խորք և հենված են փոխադարձ հարգանքի վրա։ Հայաստանում գործող որոշ ուժեր փորձում են լարվածություններ ստեղծել Հայաստան-Ռուսաստան հարաբերություններում։ Այդ լարվածություններ չեն ստեղծվում այն պարզ պատճառով, որ ՌԴ նախագահի հետ մենք ունենք շատ սերտ հարաբերություններ»։

🗳 Թիվ 9/24 ընտրատեղամասի քվեախցիկներից մեկն այնպես է տեղադրված, որ նստած տեղից երևում էր, թե ինչպես են քվեարկում քաղաքացիները։ «Ազատության» դիտարկումից հետո նախագահը այն հրեց դեպի պատը: |azatutyun.am|

❔Լրագրողներից մեկը Փաշինյանին հարց ուղղեց այն հրապարակումների մասին, համաձայն որոնց՝ ՌԴ նախագահի աշխատակազմի պաշտոնյաներից մեկը սխեմաներ է մշակում Հայաստան մարդիկ բերելու, ընտրությունների վրա ազդեցություն ունենալու։ Լրագրողի հարցին, թե պատրաստվո՞ւմ է Փաշինյանն այս թեման քննարկել Մոսկվայի հետ, նա պատասխանեց․

🗣 «Գիտե՞ք՝ այն սխեմաները, որոնք չեն համապատասխանում ՀՀ օրենսդրությանը, պետք է արժանանան Հայաստանի պետական ինստիտուտների գնահատականին։ Իսկ ընդհանուր առմամբ՝ բոլոր հարցերն էլ քննարկվում են՝ ըստ անհրաժեշտության։ Թույլ տվեք կանխատեսել, որ ընտրությունների արդյունքներով նման հարցի քննարկման անհրաժեշտություն չի առաջանա»։

📃 ԶԼՄ-ներում տեղեկություն է տարածվել, որ Վանաձորի 23/58 ընտրատեղամասում ոստիկանը քվեարկելուց հետո իր հետ դուրս է բերել քվեաթերթիկներ:

🗣 Պարզաբանում ենք, որ ոստիկանը իր հետ ընտրատեղամասից դուրս չի բերել քվեաթերթիկներ։

📌 Միջադեպը հանձնաժողովի կողմից արձանագրվել է, քվեախցիկի մոտ պարզաբանվել է կարգը, ինչից հետո իրականացվել է օրենքով սահմանված քվեարկություն:

[ՀՀ ՆԳՆ ոստիկանություն]

📣 Ամենայն Հայոց կաթողիկոս Գարեգին Երկրորդը քվեարկել է 14/11 ընտրատեղամասում։

🗣 «Աստված օրհնի ժողովրդին՝ հաղթահարելու մեր կյանքում առկա, այս ծանր, դժվարին փորձությունները։ Մենք կատարեցինք մեր ընտրությունները, որ Աստված անսասան պահի հայոց պետությունը, օրհնի ժողովրդին` հաղթահարելու մեր կյանքում առկա, այս ծանր, դժվարին փորձությունները և կերտելու հզոր, ապահով, անվտանգ, օրինահարկ և բարօր երկիր։

📌 Աստված օգնական և պահապան ազգիս հայոց։ Տիրոջ սերը, շնորհը և ողորմությունը թող լինի մեզ և ողջ աշխարհի հետ»,- ասել է Կաթողիկոսը։

📣 Երեւանի թիվ 9/23 ընտրական տեղամասում քվեարկության խցիկները տեղադրված են այնպես, որ կողքից նայելիս ամբողջությամբ տեսանելի է դրանց հետնամասը։

🗣 Հանձնաժողովի նախագահը «Ինֆոքոմի» թղթակցի հետ զրույցում ասաց, որ իրենք երեկ ստուգել են ու մտածված այդպես դրել քվեախցիկները, և քանի որ գործողությունը քվեախցիկի ներսում է կատարվում, ինչքան էլ կողքից նայեն, չեն կարող քվեաթերթիկները տեսնել։

«Ականատես» դիտորդական առաքելությունը ընտրատեղամասերում արձանագրվել է 5 էական միջադեպ․

🔸 7/6 ընտրատեղամասում հանձնաժողովի նախագահը մերժել է դիտորդի պահանջը՝ քվեարկության գաղտնիության խախտման ռիսկի վերաբերյալ գնահատականը գրանցամատյանում արձանագրելու մասին։ Ըստ դիտորդի՝ քվեախցիկի տեղադրման վայրում առկա ելումուտի պատճառով տեսանելի էր դառնում քվեախցիկում կատարվող գործընթացը։
🔸 8/61 ընտրատեղամասում հանձնաժողովի նախագահը մերժել է դիտորդի պահանջը՝ քվեարկության սենյակի կահավորման խնդիրն արձանագրելու վերաբերյալ։ Դիտորդի գնահատմամբ՝ քվեախցիկների ետնամասում գտնվող սանհանգույցների պատճառով այդ հատվածում տեղի ունեցող անցուդարձը կարող էր խախտել քվեարկության գաղտնիությունը։
🔸 8/38 ընտրատեղամասում տեղամասային ընտրական հանձնաժողովի նախագահի ուշացման պատճառով տեղամասային կենտրոնը մինչև 07։18 չի բացվել, և այդ ընթացքում որևէ անձի մուտքը տեղամասային կենտրոն չի թույլատրվել։
🔸 14/6 ընտրատեղամասում արձանագրվել է քվեարկության գաղտնիության խախտման ռիսկ․ քվեախցիկների ետևում առկա վարագույրը ցանկացած պահի կարող էր բացվել։ Դիտորդի առաջարկից հետո անհրաժեշտ գործողություններ չեն ձեռնարկվել, իսկ գնահատականը գրանցվել է ՏԸՀ գրանցամատյանում։
🔸 4/54 ընտրատեղամասում արձանագրվել է չհրկիզվող պահարանի հետ կապված խնդիր․ այն բացված է եղել դեռևս 06։55-ի դրությամբ՝ նախապատրաստական աշխատանքների մեկնարկից առաջ։

🗳 «Շնորհապետական» կուսակցության վարչապետի թեկնածու Գուրգեն Սիմոնյանը մասնակցեց քվեարկությանը։ Լրագրողների հետ զրույցում նա ասաց՝ իրենք պատրաստ են հնարավոր երեք սցենարներին՝ և՛ հաջողություն գրանցելու և արտախորհրդարանական կարգավիճակում աշխատելու, և՛ խորհրդարանական կարգավիճակում աշխատելու, և՛ հաղթանակի։ Սիմոնյանը հնարավոր համարեց երեք սցենարներն էլ։

🤝 Գուրգեն Սիմոնյանի կարծիքով՝ իրենց՝ խորհրդարան անցնելու շանսերը շատ մեծ են: Ինչ վերաբերում է այլ ուժերի հետ համագործակցություններին, նա հիշեցրեց՝ հայտարարել են, որ նախկին երեք նախագահների ու ներկայիս վարչապետի քաղաքական ուժերի և «նրանց սպասարկող արբանյակ ուժերի» հետ կոալիցիան բացառվում է։

🗳 «Միասնության թևեր» կուսակցության վարչապետի թեկնածու Արման Թաթոյանը քվեարկեց 7/50 ընտրատեղամասում։ Լրագրողների հետ զրույցում նա ասաց, որ այս ընտրությունները պատմական նշանակություն ունեն և այսօր որոշվում է երկրի ապագան։

🗣 «Ինձ համար կյանքում այսպիսի սկզբունք է գործել․ շատ ավելի վատ է, որ ունենում ես հնարավորություն արդարադատություն հաստատելու, քայլ անելու և բաց ես թողնում այդ հնարավորությունը, հետո էլ չի լինում վերականգնել։ Ես ուզում եմ՝ այս ընտրությունները չլինեն բաց թողնված հնարավորություն մեզ համար։ Խնդրում եմ մեր քաղաքացիներին, որը ընտրելիս հաշվի առնեն՝ ով է հասկանում, թե ինչ է նշանակում պետական կառավարման համակարգը, նրանց, ովքեր դժվար պահին ապացուցել են, որ կարող են ժողովրդի հետ լինել»,- ասել է Թաթոյանը։

📌 Թաթոյանը նշել է, որ բոլոր ընտրամատեղամասերով շրջելու են, հետևելու են, որ քաղաքացիների քվեն չգողացվի։

🗳 7/43 և 7/44 ընտրատեղամասերը տեղակայված են Մալաթիա- Սեբաատիա վարչական շրջանում՝ Սեբաստացի կրթահամալիրում։ Ինչպես հայտնում է «Ինֆոքոմի» թողթակիցը, մոտ մեկ ժամ ընտրողների հոսքը տեղամաս չի դադարել, դռան մոտ կուտակված հերթ է եղել։

🗣 7/43 տեղամասի «Հայաստան դաշինքի» վստահված անձը ասաց, որ հատկապես տարեց ընտրողների մոտ կա ընտրության կարգի վերաբերյալ ինֆորմացիայի պակաս։ 7/44ում էլ տարեց կինը, չիմանալով, որ պետք է կտրոնը պահի, կորցրեց այն, հետևաբար կտրոնը մարվեց, կազմվեց արձանագրություն։

📌 Մեկ այլ ընտրող, անցնելով բոլոր փուլերը, քվեատուփի մոտ միայն պարզվեց, որ նրան չեն գրանցել, իսկ կտրոնը կնքված է։ Վերադարձավ, ստորագրեց ու նոր միայն գցեց քվեատուփի մեջ։

🔸 7/44 ընտրատեղամասում կա գրանցված ընտրող 1932, ժամը 10:42 դրությամբ ընտրել է 256 մարդ։ 7/43 ընտրատեղամասում կա գրանցված 1918 ընտրող, ժամը 10:42 դրությամբ ընտրել է 238 մարդ։