📣 Քրիստոնեա-ժողովրդավարական կուսակցությունը Կոտայքի մարզում է քարոզարշավ արել։ Եղվարդի Սբ Սարգիս եկեղեցու բակից նա տեսանյութ է հրապարակել, որ դիտողները լսեն պատարագը՝ կտրվելով «ոչ քաղաքական քաղաքականությունից»։

🗣 «Այսօր մեր աշխատանքային խմբով եղանք Բյուրեղավանում, Զովունիում, Արզնիում, Նոր Հաճնում եւ հիմա Եղվարդում։ Ընդհանրական ասեմ՝ ձեզ շնորհակալություն եմ հայտնում ձեր ջերմ ընդունելության համար, այն պարագայում, որ մենք չունենք գովազդ, կռապաշտություն, ավելորդ ծախսեր, անհեթեթություններ, այսինքն՝ չենք բերել Հայաստան օտար մշակույթ, օտար բարքեր, հակառակը՝ պատարագի զմայլությամբ եւ համեստությամբ ձեզ բերում ենք մեր քաղաքական մշակույթը»,- ասել է կուսակցության վարչապետի թեկնածու Լեւոն Շիրինյանը։

🗳«Ալյանս» կուսակցության ղեկավար Տիգրան Ուրիխանյանը հայտարարել է, որ մերժելով Նիկոլ Փաշինյանի քաղաքական համագործակցության առաջարկը՝ հայտնվեց Հայաստանի սահմաններից դուրս՝ «սկսելու սրանց դեմ անզիջում, իսկական պայքար»․

🗣 «Ոչ թե նրանց նման, ովքեր հերթով-շարանով գրանցվել են էս ընտրություններին մասնակցելու համար, որ խաբեն, ձեր ձեները տանեն։ Համարյա բոլորը նախկինների մոտ պաշտոնյա են եղել, Նիկոլի մոտ աշխատած պաշտոնյաներ են եղել, գործից ազատվել են եկել, դառել են ընդդիմադիր, ու հիմա ձեր քվեն են ուզում։ Ես դուրս եմ եկել Հայաստանից՝ մերժելով Նիկոլի քաղաքական համագործակցության առաջարկը»,- ասել է Ուրիխանյանը։

🔸 Ուրիխանյանը պնդում է, որ այս իշխանությունները միայն զանգվածային շարժմամբ պիտի հեռացվեն․ «Պիտի վռնդվեն, ձերբակալվեն, բանտում սպասեն, մինչեւ Հայաստանում փոխվի օրենսդրություն, եւ ենթարկվեն Հայաստանում նորից վերականգնված մահապատժի»։

📌 Հիշեցնենք, Ուրիխանյանը հետախուզման մեջ է, նա մեղադրվում է ՀՀ-ում սահմանադրական կարգը բռնի տապալելու առերևույթ հրապարակային կոչ հնչեցնելու համար։

📣 «Նախընտրական այս օրերին ընտրական գործընթացը որոշ շրջանակների կողմից կրկին փորձ է արվում վերածել քաղաքական առևտրի՝ ընտրողի ձայնը գնելու, վաճառելու և գողանալու անթույլատրելի գործարքի»,- հայտարարել է ԴՕԿ կուսակցության շտաբի պետ Լևոն Բաղդասարյանը՝ անդրադառնալով ընտրակաշառքի մասին Հակակոռուպցիոն կոմիտեի կողմից հրապարակված ձայնագրություններին։

🗣 «Ավելին՝ այդ կեղտոտ գործընթացներում, ըստ հրապարակված ձայնագրությունների և լիազոր մարմինների արձագանքների, ներգրավված են նաև հանցավոր խմբեր։ Որոշ «աշխուժակների» կողմից միջնորդավորված ուղերձներ են փորձ արվել հասցնել նաև ԴՕԿ Կուսակցությանը՝ իբրև թե «սատարելու» առաջարկներով։

🔸 Հստակ հայտարարում եմ․ ԴՕԿ կուսակցությունը, Վարդան Ղուկասյանի առաջնորդությամբ, մերժում է նման ցանկացած «ծառայություն»։ Մենք իշխանության չենք գալու ընտրողի ձայնը գնելու, հանցավոր խմբերի հետ գործարքի գնալու կամ որևէ մեկի առաջ ստվերային պարտավորություն ստանձնելու ճանապարհով»,- ասված է հայտարարության մեջ։

📌 ԼՀԿ վարչապետի թեկնածու Էդմոն Մարուքյանն առաջարկում է սահմանել բոլոր տեսակի վարկերի տոկոսադրույքների առավելագույն թույլատրելի շեմ։

🔸 «Ավելին՝ կսահմանափակվեն նաև տոկոսադրույքին ուղիղ չառնչվող բոլոր հավելյալ վճարները։
Թույլ չենք տալու, որ մեր ժողովրդին թալանեն։ Թույլ չենք տալու, որ մարդիկ դառնան բանկային համակարգի զոհը։

🗣 Կենտրոնական բանկից մոտ 6.7% տոկոսադրույքով ներգրավված միջոցները առևտրային բանկերը քաղաքացիներին տրամադրում են 16%, 18% կամ նույնիսկ 20% տոկոսադրույքով։

🔸 Մինչդեռ Կենտրոնական բանկում կարծում են, որ բանկային տոկոսադրույքները նվազեցնելու անհրաժեշտություն չկա։ Սա նշանակում է, որ հասարակ մարդու խնդիրների մասին մտածող իշխանություն չկա»,- ասել է Մարուքյանը։

🗳 «Հայաստան» դաշինքն այսօր Աջափնյակում է անցկացրել քարոզարշավը, որի ժամանակ դաշինքի վարչապետի թեկնածու Ռոբերտ Քոչարյանը նշել է, որ աշխարհագրորեն անհնար է համարում տեսանելի ապագայում Հարավային Կովկասի ընդգրկումը Եվրոպական Միությունում։

🗣 «Տեսանելի ապագայում դա հնարավոր չէ։ Հնարավոր է՝ եթե Թուրքիան դառնա, Վրաստանը դառնա ԵՄ անդամ, դրանից հետո էլ մի 20 տարի, 25 տարի հերթում կանգնես՝ եթե մինչ այդ Եվրամիությունն այս տեսակով դեռ պահպանվի։ Սա է իրականությունը»,- ասել է նա։

🔸 Փոխարենը, ըստ Քոչարյանի, հնարավոր է Հայաստանը դարձնել եվրոպական երկիր՝ իր արժեքային համակարգով, բարեկեցությամբ, տնտեսական զարգացվածությամբ ու ազատություններով։ |armenpress.am|

🗳 Այսօր ԱԺ հերթական ընտրությունների քարոզարշավի 7-րդ օրն էր։

🔸 Կարդացեք՝ Ինչպես են անցկացրել քաղաքական ուժերը քարոզարշավի 7-րդ օրը

❗️«Հայաստան» դաշինքի Սպիտակի գրասենյակում ՀՀ հակակոռուպցիոն կոմիտեի խուզարկությունից հետո ձերբակալված գրասենյակի ղեկավար Մացակ Մաթոսյանը դատական նիստերի դահլիճից ազատ է արձակվել։

📌Այդ մասին «Ֆեյսբուքի» իր էջում գրել է փաստաբան Ալեքսանդր Կոչուբաևը։

❗️Բլոգեր Արտակ Ավետիսյանը կալանավորվեց 1 ամսով։ Այս մասին 1lurer.am-ին հայտնել են ՔԿ-ից։

📌 Հիշեցնենք, որ Երևանի Շենգավիթ համայնքում Փաշինյանին «դավաճան» անվանած բլոգեր Արտակ Ավետիսյանի նկատմամբ կալանքը որպես խափանման միջոց կիրառելու վերաբերյալ միջնորդություն էր ներկայացվել դատարան:

🔸 Հայաստանում կայանալիք խորհրդարանական ընտրությունների նախընտրական քարոզարշավի շրջանակներում «Հանրապետություն» կուսակցության ներկայացուցիչները մայիսի 15-ին Երևանի Քանաքեռ-Զեյթուն վարչական շրջանում են։

📌 Կուսակցությունը վարչական շրջանում իր քարոզարշավը սկսել է ժամը 11։00-ից և կշարունակի մինչև ժամը 17։00-ն։Կուսակցության ներկայացուցիչները մայիսի 14-ին քարոզարշավ էին անցկացրել Երևանի Ավան և Աջափնյակ վարչական շրջաններում։ Բնակիչների հետ հանդիպմանն Արամ Սարգսյանը ելույթ է ունեցել՝ խնդրելով պարտադիր գնալ ընտրությունների և քվեարկել «Հանրապետություն» կուսակցության օգտին։

🗣Արմավիրի մարզի Գայ բնակավայրում «Քաղաքացիական պայմանագիր» կուսակցության քարոզարշավին ներկա են երեխաներ։ Նիկոլ Փաշինյանը երեխաներին հորդորեց վերադառնալ դասի․ «Երեխեք, էս դասից փախե՞լ եք։ Դուք լրիվ իմ հետևից եք ընկել, հեսա ընդդիմությունն էլի սկսելու է։ Երեխեք, հիմա արագ վազքով դպրոց, միանգամից դասի», - քարոզարշավի ժամանակ ասել է Նիկոլ Փաշինյանը Արմավիրի մարզի Գայ բնակավայրի երեխաներին, որոնց տեսանյութի վերջում Փաշինյանը թխվածք բաժանեց և ճանապարհեց դպրոց։

📌 Հիշեցնենք, որ երեկ Նիկոլ Փաշինյանը անդրադառնալով քարոզարշավին ուսուցիչների ու երեխաների մասնակցությանը` նշել էր, որ դպրոցի 4 տնօրենների հրահանգել է աշխատանքից հեռացման դիմումներ գրել։ ԿԳՄՍ նախարարությունն էլ արձագանքել էր՝ քննություն կանցկացնի Արագածոտնի մարզում քարոզարշավին դպրոցների մասնակցության գրանցված դեպքերով։

📌 «Միասնության թևեր» կուսակցության վարչապետի թեկնածու Արման Թաթոյանը ուղերձով դիմել է երիտասարդներին՝ շեշտելով, որ բարձրագույն կրթությունը պետք է հասանելի լինի բոլորին՝ անկախ սոցիալական վիճակից։

🗣 «Ես հասկանում եմ ձեզանից շատերին։ Ես ինքս անցել եմ բազմաթիվ դժվարությունների միջով, առաջ եմ գնացել, պայքարել եմ, ապավինել եմ միայն սեփական ուժերիս, բայց ես չեմ ուզում, որ դուք ևս ստիպված լինեք անցնել այդ նույն դժվարություններով։ Ես երբեք չեմ ընդունի, որ Հայաստանում երիտասարդի ապագան որոշվի ոչ թե նրա գիտելիքով ու կարողությամբ, այլ ծնողի դրամապանակով»,- հայտարարել է վարչապետի թեկնածուն։ |aravot.am|

🔸 Արման Թաթոյանը դիմել է պետական համակարգի աշխատակիցներին՝ նշելով, որ պատրաստվում են պետական աշխատողների համար ներդնել հատուկ սոցիալական ծրագրեր։

🗣 «Աշխատավարձերը կբարձրացվեն, առաջխաղացման հիմք կլինեն արդարությունը, գիտելիքն ու կարողությունը, հայրենիքի նկատմամբ սերը և պետականության հանդեպ նվիրումը»։

🎞 Հակակոռուպցիոն կոմիտեն գաղտնալսումներ է հրապարակել քաղաքացիների ընտրական իրավունքի ազատ իրականացմանը խոչընդոտելու նախապատրաստման դեպքերի շրջանակում։

📌 Դեպքերը վերաբերում են «Ուժեղ Հայաստան» դաշինքին։

💬 Արտաքին միջամտություն կա, և այդ միջամտությունը բացառապես «Քաղաքացիական պայմանագիր» կուսակցությանն է, և աջակցողներն էլ Թուրքիան ու Ադրբեջանն են։

🗣 Այս մասին հայտարարեց ԲՀԿ խոսնակ Իվետա Տոնոյանը՝ արձագանքելով Փաշինյանի՝ արտաքին ազդեցությունների վերաբերյալ հայտարարություններին։

🔸 «Առ այս պահը միակ քաղաքական ուժը, որին աջակցել են այլ երկրների տարբեր ներկայացուցիչներ, ՔՊ-ն է, որին պարբերաբար աջակցություն են հայտնում Թուրքիայի և Ադրբեջանի իշխանությունները։ Որևէ արտաքին ուժ կամ օտարերկրյա պետություն կամ նրա ներկայացուցիչ հանդիսացող չինովնիկ աջակցություն չի հայտնել ընդդիմության որևէ ներկայացուցիչ կուսակցության, մասնավորապես՝ «Բարգավաճ Հայաստան» կուսակցությանը»,- ասաց Տոնոյանը։

🔸 ԲՀԿ խոսնակ Իվետա Տոնոյանը հայտնել է՝ քարոզարշավի առաջին շաբաթվա ընթացքում ձևավորվել է ԲՀԿ-ի նոր քաղաքական կարգախոսը՝ «Պատրաստվեք լավ փոփոխությունների, պատրաստվեք նոր փոփոխությունների»։

🔸 Անդրադառնալով քաղաքական մթնոլորտին՝ Իվետա Տոնոյանը կոչ է արել ընտրապայքարին մասնակցող քաղաքական ուժերին պահպանել քաղաքական կոռեկտությունն ու կառուցողականությունը։

🗣 «Գագիկ Ծառուկյանը քարոզարշավի մեկնարկին քաղաքական թիմի հետ հանդիպման ժամանակ հստակ նշել է՝ որևէ օպոնենտի նկատմամբ ցեխ չշպրտել։ Սակայն եթե լինեն անարդար քննադատություններ կամ վիրավորանքներ, բնականաբար դրանց տրվելու են համարժեք պատասխաններ»,- նշել է նա։ |news.am|

🔸 Էլինար Վարդանյանը հայտնել է՝ Ախուրյանի ու Չարենցավանի փոխքաղաքապետերը, որոնք ընդգրկված են «Առաջարկ Հայաստանին» նախընտրական ցուցակում, հեռացվել են աշխատանքից։

📌 Որոշումները կվիճարկվեն դատարաններում, բայց, բանախոսի պնդմամբ, սա խոսում է նախընտրական հակաիրավական գործողությունների, սպառնալիքների մասին։

🗣 «Ինչպես բազմաթիվ դեպքերում, այնպես էլ բարեգործության արգելքի պարագայում հոդվածը գործում է բացառապես ընդդիմադիրների գործողությունները կանխելու, ընդդիմադիրներին պատժելու համար»,- կարծում է Վարդանյանը՝ հավելելով, որ ընդդիմադիր ուժերի համակիրների նկատմամբ կիրառվում են նաև ազդեցություններ օգտագործելու միջոցներ։ |aravot.am|

ℹ️ «Հայաստան» դաշինքը տեղեկություններ է ստացել, որ պետական և ՏԻՄ մարմինների աշխատակիցներին հարկադրում են ընտրություններում քվեարկել իշխող կուսակցության օգտին աշխատանքից ազատելու սպառնալիքով։

📄 Այդ գործընթացն առավել արդյունավետ կազմակերպելու և վերահսկողության տպավորություն ստեղծելու նպատակով կազմվում են աշխատակիցների ցուցակներ։

🔍 «Հայաստան» դաշինքը նմանատիպ հանցագործությունների բացահայտման և կանխարգելման նպատակով իրականացնում է փաստահավաք գործունեություն։

[«Հայաստան» դաշինք]