Injenerlar (muhandislar) qanisiz?

Kuni kecha bir tanish do’stim menga qo’ng’iroq qilib Epam kompaniyasida suhbatdan o’tganini gapirib berdi. Hali ishga kirish kirmasligi haqida hech gap yo’q, ammo meni qiziqtirgan narsa boshqa. Uning aytishicha, suhbat davomida berilgan savollarning deyarli hammasida do’stimning o’zi bilgan hamma tushunchalar so’ralgan. Lekin savolning o’zi — “Falonchi tildagi falonchi narsani bilasizmi?” — ko’rinishida bo’lmagan, aksincha, savol ancha chuqurroq bo’lgan. Ya’ni suhbatchi do’stimdan nafaqat tushunchaga egaligini, balki shu so'raluvchi mehanizmning kompyuter ichida qanday ishlashini, mohiyatini so’ragan. Ko’rinib turibdiki, kompaniya o’ziga faqat injener qidirgan. Ularga oddiy kod teruvchi odam kerak emas.

Umuman, keling oldin Injener so'zini aniqlab olamiz. Kim u? Nima qiladi?... Muhandis yoki injener, texnikaning muayyan bir sohasiga ixtisoslashgan mutaxassis, hamda muhandislik sohalaridan biri boʻyicha oliy maʼlumotli kasb egasi.

Bu degani agar siz muhandis bo'lishni o'zingizga maqsad qilib, shu yo'nalishda izlansangiz, sizning imkoniyatlaringiz yanada ko'proq bo'ladi. Albatta, oddiy dasturchilikni o'rganib olib katta daromadli ishga kirib olsa bo'ladi. Lekin bir narsani unutmaslik kerak -- oddiy dasturchi faqat aytilgan ishni qiladi, muhandis esa o'zi o'sha ishni o'ylab bajaradi.

Yana bir narsaga e'tiboringizni qarataman. Tepadagi misolda keltirilgan Epam kompaniyasi o'ziga jahon talablariga javob beruvchi dasturiy mehandislarni izlamoqda. Bu kompaniya dunyo bozorida o'z o'rniga ega, chunki Ukrainada o'qib yurgan damlarimda ham eshitganman. Bunday darajaga ega kompaniya o'zi kirib kelgan bozorni o'zgartira olish qobiliyatiga ega. Bu bilan nima demoqchiman: O'zbekiston bozoridagi kompaniyalar Epam kirib kelgandan buyon (tahminan 5-6 oy) o'z talablarini jahon talablari darajasiga chiqarib olishdi va suhbatga chaqiriluvchi dasturchilarning hammasini muhandislik qobiliyatlariga tekshira boshlashdi. Bu degani, yaqin (tahminiy) 6-10 oy ichida bozor shunday o'zgaradiki, kompaniyalarga oddiy "frontend"chi yoki JSchi kerak bo'lmay qoladi.

Siz nima qila olasiz?
Juda oddiy! Izlanishdan to'xtamang, masalaning, texnologiyaning negiziga borishni o'rganing. Har bir mexanizmning ishlash tartibini o'rganing. Albatta, bu narsa boshida qiyin bo'ladi, chunki mohiyatni o'rganish har doim qiyinchiliklardan iborat bo'lgan. Lekin o'rganilgan mohiyat keyinchalik sizga shunday zo'r tajriba olib keladiki, siz o'zingiz bilmagan holda Craig Federighiga o'xshab ulkan proyektlarni qila boshlaysiz! Bu esa naqadar qiziqarli ishki, uning natijasi hayotingizni 1.000.000 dollar ishlab topishdan ham ma'noli yo'lga aylantiradi! Bunday hayotiy yo'ldan zavq olish esa hammamizning qo'limizdadir!

Ilm olishga, huddi yoz chillasida suv qidirgandek chanqoq bo'ling! Omad!

@a_kasimovv

​​Nonni arralaymiz va daraxtni pichoqlaymiz

Tasavvur qiling sizga bir ish buyurishdi: sizni bir yigirma yillik daraxt oldiga olib kelib, “Shuni kesib, o’tin qilish kerak!” - deyishdi. Oldiniga qo’lingizga oddiy pichoq berishadi.
Diqqat, savol: Pichoqda butun boshli daraxtdan o’tin tayyorlay olasizmi?
Javob: Ha! Bemalol! Faqat bu ish kami bilan bir oyda bitadi… Agar bitsa…

“Hop, unda bu arrani ol!” - deyishsa, ishingizning unumi bir oydan uzog’i bir haftaga qisqaradi. Agar benzinda ishlaydigan arra berishsa, besh-olti soatda butun daraxtni 20 santimetrlik kichik kubiklarga bo’lib chiqa olasiz.

Keling, misolni boshqa obyektga nisbatan olamiz. Non. Nonni kesish kerak nonushtaga. Xuddi o’sha pichoq, arra va benzinda ishlovchi arra bizning yordamchilarimiz bo’ladi. O’ylaymanki, benzinda ishlovchi arrani hech bir odam tanlamasa kerak. Axir stol butun qolishi kerak-ku!

Dasturlash tillari ham huddi shunday, do’stlar! Siz tilni emas, balki, yo’nalishni tanlang! Shunda kerakli til o’zi oyog’ingiz ostidan chiqadi, chunki har bir tilning o’z o’rni bor. Har bir til o’z yo’nalishida juda zo’r ishlaydi, lekin agar ushbu til boshqa yo’nalish uchun ishlatilsa, uning tizimga foydasidan ko’ra zarari ko’proq bo’ladi. Hammasining o’z o’rni bor!

@app_hbs

​​#blitz_information

Prosessor gigagertslari nima?

Guruhlarda ko’pincha men odamlarning “Men yangi kompyuter olmoqchi edim — Intel Core i5, 3.2 gigagerts. Shu yaxshimi?” deb so’raganlarini kuzatganman. Hamma Intel Core i7 zo’rligini, 3 GHz tez ekanligini biladi-ku, ammo ko’pchilik shu GHz, MHz’larning aynan nimaligi bilmaydi. Keling bugun shu haqida suhbatlashamiz.

Albatta, bu mavzuni bunday kichik maqolada yoritib bo’lmaydi, lekin harakat qilamiz tushunarli ma’lumotni berishga. Oldiniga shu tezlikning o’zi nimaligini bilib olamiz.

Chastota — bu maʼlum vaqt ichida takrorlangan harakat yoki tebranishlar soni (Salom, Fizika!). Chastota gertslarda o’lchanadi va bir soniyaga nisbatan olinadi, ya’ni 10Hz — bu bir soniya ichida 10 ta tebranish degani.

Takt generatori — prosessor qurilmasi bo’lib, muayyan tebranishlar keltirib chiqarib, prosessorning umumiy chastotasini keltirib chiqaradi. Uning har bir tebranishida prosessor bir necha unga qo’yilgan amallarni bajarib beradi.

Shu ma’lumotlardan kelib chiqadiki, prosessor tezligi, yoki aniqroq va to’g’ri qilib aytganda prosessor chastotasi — bu prosessorning bir soniya ichidagi bajara oladigan amallar sonidir.

Hozirda prosessor chastotalar GHz’larda o’lchanadi. Agar siz prosessorning 3.2GHz chastotasiga ko’zingiz tushsa, bilingki bu prosessor bir deganda 3200000000 (3 mlrd 200 mln) operatsiya bajara oladi deganidir.

Lekin bir narsani aytib o’tish lozim, kompyuter yaxshi ishlashida faqatgina chastotaning o’zi kifoya emas. Tezlikka yadrolar soni, RAM o’lchami, tezligi va chastotasi (unda ham bor chastota 🙃), Cache xotira tezligi va o’lchami, ona plata shinalari tezligi va chastotasi (ha, u yerda ham bor bu narsa 😅) va boshqalar ta’sir qiladi. Kelasi maqolalarda shu ma’lumotlarni berishga harakat qilamiz.

Ilm izlashda to’xtamang!

@app_ahbs

Ilm haqida.

​​Men Python’ni yomon ko’raman!

Assalomu alaykum! Albatta, katta tanaffusni shunday qo’rqinchilik sarlavha bilan boshlash kerak edi. Havotir olmang, men Python’ni sarlavhachalik yomon ko’rmayman, faqatgina uning ko’pchilik yosh dasturchilarning birinchi va oxirgi dasturlash tili bo’lib qolayotganini yomon ko’raman. Keling, bugun shu haqida batavsil to’xtalib o’tsam.

Python web uchun o’ylab topilmagan til.

Ko’pchilik bu tilni web uchun o’rganishini kuzataman, vaholanki tilning haqiqiy o’rni umuman Web yo’nalishida emasdir. 1991-yili Guido van-Rossum tomonidan bu til o’ylab topilayotgan paytda Sun’iy Ong (Artificial Intelligence) ustida katta ishlar olib borilayotgan bo’lgan. Ayni o’sha damlarda Pythondek sodda til kerak bo’lgan. Uning vazifasi — Matematikaga oid bo’lgan Sun’iy Ong yo’nalishida kod yozish jarayonini soddalashtirsh bo’lgan. Agar Siz ham Pythonni Sun’iy Ong yoki Ma’lumotlar Ilmi (Data Science) yo’nalishda ishlatmoqchi bo’lsangiz, uni haqiqiy kuchidan foydalangan bo’lasiz. Web esa Python’da bir kichkinagina bo’limdir.

Python haqiqatda oson til emas.

To’g’ri unga kirishib olish oson, ya’ni birinchi kichik algoritmlarni dasturlash Python’da juda tez kechadi. Lekin vaqt o’tgani sayin aniq bo’ladiki, Python unchalik oson emas ekan. Bunga ayni bir sabab bor — Python’ga yuklatiluvchi vazifalar murakkablashgani sayin, til juda ko’p bajariluvchi amallarni dasturchi ko’zidan berkita boshlaydi (uning tabiati shunday). Bu hislat dasturlashga endigina kirib kelgan odamni qo’rqitib qo’yadi.

Shaxsan mening taklifim — Dasturlashni pastroq qatlamda turuvchi, har bir ishni aniq va shaffof ko’rsatib beruvchi tildan boshlash (C, C++). Shunda dasturchi tilni va kompyuterni haqiqatda his qila boshlaydi.

Python hamma yerda ham tez emas.

Kod yozilish davri Python’da boshqa tillarga nisbatan juda qisqadir. Tilning tuzilishi shunday-ki, u ko’p narsani o’zi bajarishga harakat qiladi, va agar dasturchi ayni shu kuchdan foydalanishni o’rganib olsa, haqiqatda yaxshi Python-dasturchi bo’lib yetishadi. Lekin tajribali Python-dasturchi o’zi ishlaydigan tilning hamma yerda ham kuchli emasligini biladi. Python’ning asosiy ishlatilish joylari quyidagilar:

- Data Science (Ma’lumotlar Ilmi);
- Artificial Intelligence (Sun’iy Ong);
- Neural Networks (Neyrotizimlar);
- Rapid Prototyping (Taqdimot uchun dasturning boshlang’ich prototiplari ham shu tilda yasaladi);
- DevOps (Ko’pchilik DeOps dasturchilar ayni shu tilni DevOps vazifalarini bajarishda ishlatadilar);
- Web (Django, Flask)

E’tibor bergan bo’lsangiz, tilni Webdan boshqa juda ko’p joylarda ishlatish mumkin, va shu ishlatilish joylarida Python o’zini Webdan ko’ra yaxshiroq tutadi.

Shuning uchun Python’ni tanlash niyatingiz bo’lsa, uning kuchli tomonlari ishlatiladigan yo’nalishlarga e’tibor bering. Agar faqat Web yo’nalishida qolmoqchi bo’lsangiz — Web uchun juda yaxshi bo’lgan NodeJS, PHP kabilarni o’rganganingiz ma’qulroq, chunki Python Webdan ko’ra ko’proq ishlarga qodir til, uni uvol qilgandan ko’ra, o’rganmagan ma’qul.

​​Daraxt bargi nega yashil rangda?

Hech shu savol bilan qiziqib ko’rganmisiz? Nima uchun yashil? O’zi umuman olganda rang tushunchasi qanday paydo bo’ladi?

Umuman bu savol haqida oramizdan hech qaysi birimiz yaqin orada o’ylanib ko’rmaganimiz tabiiy hol. Lekin tasavvur qiling Sizga shu savol bilan murojaat qilishdi. Sizning birinchi javobingiz qanday bo’ladi?

Kuni kecha bir dasturlash dunyosida yaxshi tajribaga ega odam bilan suhbatlashib qoldik. Ular bir fikrni aytdilar:

“Rus dasturchi bola bilan o’zbek dasturchi bolaning nima farqi bor deb o’ylaysizlar? Bilim darajasidami? Yo’q, bilim saviyasi bir. Umuman olganda ularning professional bilimlari orasida farq yo’q. Lekin nima uchundir istalgan kompaniyada ko’pincha rus bolasiga yon bosish kuzatiladi. Nima uchun deb o’ylasiz?

Sababi juda oddiy! Bizning bolada qiziquvchanlik yo’q. Agar unga ‘Daraxt bargi nega yashil rangda?’ — deb savol bersangiz, ko’p hollarda uning javobi ‘Bilmayman!’ — bo’ladi.

Rus bolasi shu holatda Google’dan qidirib topib bo’lsa ham javobini aytadi. Aksar hollarda esa, u savollarga javobni oldindan biladi.

Nima uchun bunday? Qiziquvchanlik! Rus bolasi hamma narsaga qiziqib ko’raveradi, o’zbek bolasi esa bu ishni qilishni xohlamaydi. Erka-da!”

Albatta, bu gaplar bilan men hammani shunday demoqchi emasman. Lekin ishga kira olmayotgan do’stlarimiz bir o’zlariga nazar solib ko’rishlarini xohlar edim. Ilm dunyosi juda qiziqarlidir, uni o’rganish, izlanib savollarga javob topish esa undanda qiziqarlidir.

Qiziquvchanligingizni oshiring! Shu Sizni boshqalar oldida ustun qiladi!😉

@app_hbs

Bu канАлda y0z!1gAn gAp1ArgA iw0nmAng

#havfsiz_internet

G’alati nom bilan boshlangan bu postni men yangi turkumga kirish sifatida ishlataman. Bunday turkumni boshlash niyati menda ancha vaqtdan beri bor edi, lekin hech bu narsaga vaqt ajratolmay yurgan edim.

Yaqin 5-6 oylardan beri men bir narsani guvohi bo’ldim. Shu narsa meni juda qo’rqitib qo’ydi.

Bilamiz, o’zbek tilida Internet tarmog’ida resurslar o’ta kam. Biror ma’lumot qidiraman deb kirsangiz o’zbek tilida deyarli hech narsa topa olmaysiz. Onlayn tarjimonlar haqida-ku umuman gapirib bo’lmaydi — ingliz tilidagi so’z tog’dan kelsa, o’zbekcha tarjimasi bog’dan keladi. Shuning uchun ham Internet tarmog’idan hozirgacha ayni rus yoki ingliz tilini hech bo’lmaganda tushunish darajasida bilgan odam foydalana olgan.

Lekin yaqin yarim yil ichida meni bir narsa juda qo’rqita (ha, aynan qo’rqishni boshlaganman) boshladi.

Bir kuni do’stlarim bilan suhbatlashayotib shoshilinch bir ma’lumotni Internetdan izlash kerak bo’lib qoldi. Do’stlarim o’zbek tilida suhbatlashayotgan bo’lganim uchun ma’lumotni ham e’tibor bermay o’zbek tilida Google amakidan so’radim. Shu payt meni ajablantirgan narsa — ma’lumotning o’zbek tilida borligi bo’ldi. Shu paytgacha men aniq bilardim-ki, bunday ma’lumotlar o’zbek tilida Internetda yo’q edi.

Bir necha kundan keyin menda yana o’zbek tilida ma’lumot izlashga muhtojlik paydo bo’ldi va shu maqsad bilan Google amakiga murojaat qildim. Bu gal menga o’zbek tilida Protsessor ichki tuzilmasi haqida ma’lumot kerak bo’lib qoldi. Topilgan ma’lumot deyarli yaxshi edi, lekin mening e’tiborimni matn grammatikasi o’ziga tortdi. U unchalik yaxshi emas edi. Keyin men ochilgan vebsayt havolasiga nazar soldim va shu payt men g’alati bir ahvolga tushdim.

Bu .ru domenidagi rus sayti edi: https://fighters.ru/uz/functions-of-the-processor-and-its-main-characteristics-processors/

Ya’ni Google amaki avtomatik ravishda, menga ko’rsatmagan holda butun boshli vebsaytni men uchun tarjima qilib, oldimga huddi o’zbek saytidek ko’rsatdi…

Yolg’onning birinchi qadami.

Albatta, Siz aytishingiz mumkin — “Ha, Alisher, bu juda qulay narsa-ku! O’ylanib ham o’tirmaysiz, hamma narsa Siz bilgan tilda bo’ladi!”, — deb. Bu to’g’ri gap, lekin aynan shu joyda yolg’onni aralashtirib yuborish umuman qiyin ish emas. Google amaki algoritmlari ichiga “O’zbek tilini ko’rsang ‘Falonchi odam kashfiyotchi’ degan gapni ‘Falonchi odam muttaham’ deb tarjima qil” — degan buyuruqni yozib yuborish kimningdir hayoliga kelishi mumkin. Bunday holatda O’zbekistonning biror viloyatida o’tirgan, o’z ko’zi bilan ko’rib, qo’li bilan ushlab tekshirib ko’rishga imkoni yo’q odam ‘Falonchining muttahamligiga’ ishonib qolaveradi.

Bu juda muhim mavzu. Internetda ma’lumot o’ta ko’p, lekin shu ko’plik ichida ayni qaysi so’z haqiqatligini aniqlash tobora murakkablashib bormoqda.

Mening Sizdan bir iltimosim bo’ladi — Ma’lumotni ko’rganingizda, uni yaxshilab tekshirishni o’rganing.

Hech qachon aytmagan gapimni aytaman — Postni iloji boricha do’stlaringiz bilan bo’lishing. Internet ilgarigidek xavfsiz yer bo’lmay qolmoqda.

@app_hbs

Assalomu alaykum! Hammangizni Ramazon Hayit ayyomlari bilan muborakbot etaman!

Alloh barchamizning tutgan ro’zalarimizni qabul aylasin! Kelasi Hayit ayyomlariga bag’ri butunlikda, sihat-salomatlikda yetib borishni nasib etsin!

@app_hbs

​​Odamzod tushungan eng oxirgi til

Hech o’ylab ko’rganmisiz — Assembler nima? Nima uchun u mavjud o’zi? Qayerda ishlatiladi va hozir o’rgansa bo’ladimi? Bugun Siz bilan shu “til” haqida gaplashamiz.

Umuman, bu til birinchi bo’lib 1949-yilda birinchi o’ylab topilgan. Bu til raqamli har bir qurilmada ishlaydi va “Low level language” deb yuritiladi, ya’ni bu til “Pastki qatlam tili” deb tan olinadi.

“Pastki qatlam tili” nima degani?
Avvalo, biz qurilma qanday ishlashini bilib olishimiz kerak. Har bir raqamli qurilma kamida bitta markaziy protsessordan tashkil topadi. Bu protsessor 0 va 1’lar qatorini o’ziga qabul qiladi, ya’ni bir deganda bir nechta 0 va 1lar yig’indisi protsessor ichiga kirib boradi, natijada esa boshqa 0 va 1lar yi’gindisi chiqariladi. Qatordagi 0 va 1lar soni 2, 4, 8, 16, 32 yoki 64ta bo’ladi (64, 32bit protsessor degani ham shundan kelib chiqadi).

Bitta 64ta 0/1dan tarkib topgan qator uch xil tipda bo’ladi:
1. Buyuruq (Command — Protsessor nima qilishi kerakligi).
2. Ma’lumot (Data — Buyuruqni bajarishda ishtirok etuchi foydalanuvchi ma’lumoti).
3. Adres (Address — Natija qayerdan/qayerga yozilishi kerakligi).

Demak, protsessor keluvchi ma’lumotga nisbatan o’z ishini boshqara olar ekan. Aynan shu narsa “Eng pastki qatlam tili” deb yurutiladi, chunki aynan 64ta 0/1lar biror ma’noga egadir. Bitta 0 yoki 1 ma’noga ega bo’lmagan ma’lumot birligidir.

Assembly’mi yoki Assembler?
Endi yana ham qizig’i boshlanadi. Biz shu 64ta 0/1larni aniqlashtirib olishimiz protsessor ishlab chiqaruvchisiga bog’liqdir, ya’ni aynan Intel yoki AMD (va boshqalar) protsessorni shu aniq tartiblarni tushunadigan qilib qurilma arxitekturasini ishlab chiqaradilar. Aynan shu narsa Assembly language (o’rnatilish tili) yoki Machine Language deb ataladi, chunki u protsessor ishlab chiqarilganda, qurilmaga bog’lab chiqariladi.

Albatta, har bir 64ta 0/1ni eslab qolish mushkul ish. Shuning uchun yuqorida sanab o’tilgan kompaniyalar shu 0/1larga ekvivalent so’zlarni bog’lab chiqishadi:

10110000 01100001
MOV AL, 61h

Bu osonlashtirilgan so’zlar yig’indisi esa Assembler deb ataladi. Siz shu so’zlarni ishlatganingizda Siz so’ragan buyuruq 0 va 1lar yig’indisiga aylantirilib, protsessor tomonidan ishlatiladi.

Shining uchun ham Assembler tili — odamzod tushunishi mumkin bo’lgan eng oxirgi til hisoblanadi.

Ilm izlashdan to’xtamang!
@app_hbs

​​Click — 3 oy. Payme — 5 oy. Udevs — 8 oy.

LinkedIn vebsaytida oxirgi ikki uch oy ichida bir g’alati narsani guvohi bo’ldim. Bu narsaga oldinlari e’tibor bermas edim. Hozir bu narsa meni o’ylantirib qo’ydi.

LinkedIn — bu ish qidiruvchi va ish beruvchi orasida aloqani bog’lab beruvchi ijtimoiy tarmoqdir. Ish qidiruvchi o’z profilini o’zi egallagan bilim va ko’nikmalar bilan boyitadi. Ish beruvchi esa, agar unga ish qidiruvchining malakasi yetarli bo’lsa, shu odamni ishga olish uchun suhbatga taklif qiladi.

Ish topgan payt LinkedIn’da huddi Facebook’ga o’xshab “I’m excited to start my new job!” mavzusida post chiqarish urf bo’lib qoldi. Qolganlar esa bu postga Like qo’yib o’z tabriklarini bildirishadi.

Men e’tibor bergan narsa shunda-ki, o’zi bir ish joyiga ishga kirganiga 2 oygina bo’lgan odam, yana yangi ish joyida ish boshlaganini hammaga ovoza qiladi. Shu odam profiliga kirsangiz, uning har bir kompaniyada uzog’i 8 oy ishlaganini guvohi bo’lasiz.

Shu payt bir necha savollar paydo bo’ladi:
Bu CVni to’ldirishga harakatmi? Yoki kompaniyalar shunchalik yomonmi? Nima uchun yoshlar kompaniyalarda ko’p ishlay olishmayapti? Muammo qaysi tomonda?

Yana ham qizig’i shunda-ki, aynan shunday dasturchilar tufayli — kompaniyalar saviyali, ish ko’zini biluvchi, jonkuyar bolalarni ishga olmay qo’yishmoqda. Bu tabiiy narsa, bir dasturchi bir joyda bir yil ham o’tira olmasa, kompaniya undan keyingi dasturchiga ham ishonmay qo’ya qoladi. Axir dasturchini ishga olib ish bilan ta’minlash ham alohida katta mablag’ talab etadi. Agar hamma oz-ozdan o’tirib ketaversa, unda hech kimni olmagan yaxshi!

Shuning hisobiga ham suhbatlar murakkablashib ketdi. Shuning hisobiga ham hamma vakansiyalar “Middle kerak” degan so’zlardan boshlanadigan bo’lib qoldi, chunki Juniorga ishonch yo’q. U o’sishni xohlamadimi, kompaniyalar ham uni ishga olgisi kelmaydi. Shundan keyin ham kuchli filterlar kelib chiqaveradi.

Gaplarim oxirida bir narsani aytaman — Kompaniya rivoji, undagi Sizga bo’lgan e’tibor Sizga bog’liq narsa. Hech kim o’zidan o’zi “Mana shu bolani qiynaymiz” — demaydi. Kompaniyada uzoqroq ishlab o’zingizga yaxshi nom va tajriba yig’ishga uruning. Shundagina yaxshi oylik maosh ham, Seniorlik darajasi ham bo’ladi.

Ilm izlashdan to’xtamang!
@app_hbs

O'zbekistondagi raqamli akademiyalaridan biri Najot Ta’lim markaziga dasturchi assistent ustoz kerak.

Biz kimmiz?
Biz 250 dan ortiq jamoa a'zolariga ega raqamli akademiyalaridan biri sifatida O'zbekistonda axborot texnologiyalarini o'rgatish va qayta kashf etishda muvaffaqiyat qozonyapmiz. Ayni damda Toshkent shahrida 2000 dan ortiq o’quvchi bilan birgalikda ish faoliyatimizni yurityapmiz.

Talablar:
- O'zbek tilida erkin muloqot qila olishi;
- Tajribasi: 6 oy +;
- C dasturlash tilini bilishi;
- Windows va linux tizimlari bilan ishlay olishi;
- Python dasturlash tilini bilishi;
- Database(Mysql) bo'yicha ko'nikmalarga ega bo'lishi;
- Data structure ma'lumotlarini ishlashi bo'yicha tushunchaga ega bo'lishi;
- Git va github bilan ishlay olishi;
- Darslarni qiziqarli o’ta olishi.

Bizning takliflarimiz:
- Farg'onadagi zamonaviy hi-tech ofislarida qulay ish muhiti;
- Part-time ishlash imkoniyati mavjud;
- Samimiy va ahil jamoa;
- Kuchli mutaxassislar bilan hamkasb bo'lishingiz mumkin;
- O'zingizni rivojlantirish imkoniyati;
- Texnik va yumshoq ko'nikmalar uchun bepul treninglar;
- O'zbekiston bo'ylab jamoaviy sayohatlar.

Murojaat uchun: +998 99 515 00 11;
@najottalim_recruiting

Nega aynan videokarta (GPU)?

Hech o’ylab ko’rganmisiz — nima uchun aynan blokchain texnologiyalari, mining uchun aynan videokarta ishlatiladi? Nima uchun aynan Bitcoin, Etherium paydo bo’lishi bilan videokartalar tanqisligi va o’ta qimmatlashishi hodisalari kuzatilmoqda? Keling, shu savollarga bugun javob izlab ko’ramiz.

FLOPSlar. CPUni bir chetga surib qo’ygan ko’rsatkich.

FLOPS (Floating-point operations per second) — bu biror hisoblash qurilmasining (dasturiy ta’minotdan holi holda) bir soniya ichida “nuqtali” (misol, 1.2, 45.12e10) sonlar o’rtasida amalga oshiruvchi matematik amallar soniga aytiladi. Bu holatda qurilmaning boshqa bajaradigan vazifalari hisobga olinmaydi, ya’ni xotiraga yozish/o’qish, koderlash/dekoderlash vazifalari hisobga olinmaydi.

FLOPSlarning Protsessor chastotasidan farqi — FLOPS faqat hisob-kitobning sonini o’lchasa, Chastota ko’rsatkichi bir soniyada Protsessorning umumiy bajargan vazifalar sonini ko’rsatadi.

FLOPSlar ham huddi chastotaga o’xshab mega-, giga-, terra-larda o’lchanadi. Ya’ni misol uchun hozirda eng kuchli protsessorlardan (CPU) biri sifatida AMD kompaniyasining EPYC 7H12 (Zen 2) Protsessorini keltirsa bo’ladi, va uning tezligi 4.2 TerraFLOPS (TFLOPS). Videokartalar (GPU) orasida esa misol qilib — Nvidia RTX 3090ni keltirsa bo’ladi. Uning tezligi — 36 TFLOPS.

GPU eng qudratli qurilmami?

Yuqoridagi raqamlar sizni taajublantirishi tabiiy hol. Nega hamma yerda Protsessor kuchli qurilma, kopyuterning eng asosiy qurilmasi deb gapiriladi-yu, lekin hozirgi videokartalar FLOPS tezligida bir necha barobar o’zib ketdi?

Bu yerda gap aynan tezlik o’lchashdagi uslublarga borib taqaladi. Gap shundaki, FLOPSlar qurilmaning aynan faqat hisob-kitoblar sonini belgilaydi. Chastota esa — qurilma bajarishi mumkin bo’lgan barcha ammallar sonini. Videokarta protsessorining asl vazifasi esa aynan faqat hisob-kitobdan iborat.
Kompyuter markaziy protsessori (CPU) esa juda ko’p vazifalarni amalga oshiradi. Uning qo’lida ma’lumotlar va qurilmalar boshqaruvi, ichki va tashqi tartiblarni belgilash kabi katta-katta vazifalar ham yotadi. Shuning uchun ham FLOPSlarni hisoblashga kelganda CPU o’ta sekin ishlovchi qurilmadek ko’rinadi.

Bitcoin faqat hisob-kitobni talab etadi

Videokartalar faqat hisob-kitoblarni amalga oshirilishini tushunishning o’zi Bitcoin uchun shu qurilmaning qimmatliligini belgilab beradi. Umuman olganda, Bitcoin mining (o’zbekchada — mayning) bu bir soniyada bir necha trillion hisob-kitob amallari yig’indisidir. Shuning uchun ham Bitcoin bilan ishlash maqsadida yurgan odamlar aynan videokartalar yordamida “ferma” qurishadi.

Artificial Intelligence

Yana ham qizig’i shundaki, Sun’iy ong, Neyrotizimlar ham aynan faqat matematik hisob-kitobdan iborat yo’nalishlardir. Shuning uchun AI bilan shug’ullanish niyatida bo’lgan odamga Videokartasi kuchli bo’lgan kompyuter tavsifa etiladi. Chunki Markaziy protsessor kuchiga tayanib AI yo’nalishida ish bajarish o’ta ko’p vaqt va kuch talab etishi mumkin. CPUning boshqa vazifalar bilan “chalg’ib” qolishi, uning bu yo’nalishlarda GPU oldida kuchsizligini belgilab beradi.

Ilm izlashdan to’xtamang!
@app_hbs

​​Mening o’zgaruvchim. Sening o’zgaruvching.

——
Dasturlashni o’rganayotgan bo’lsangiz, Siz o’zgaruvchilar (variables) haqida aniq o’qigansiz. Shunda ko’pchilik o’rganadigan standart o’zgaruvchi a = 5 bo’ladi. Shunda ko’pchilikda savol paydo bo’ladi:
Men o’zgaruvchimni a = 5 deb qilsam, boshqa biror dasturda ham a o’zgaruvchisi bo’lsa, kompyuter qanday qilib adashib ketmaydi?
——

Aslida ham, o’zgaruvchilar aralashib ketmasligiga kim javob beradi? Kompyuter ularni qanday ajratib oladi? Keling, shuni aniqlab olamiz.

Tarjimonlar fokusi
Birinchidan, Siz yozgan dastur tarjimon bo’lgan kompilyator yoki interpretator tomonidan kompyuter tiliga tarjima qilinganida unda a, b, c deb nomlangan o’zgaruvchilarga o’rin qolmaydi. Ya’ni dastur machine code’ga o'tkazilgan payt unda faqat protsessor va operativ xotira registrlari nomlari qoladi.

Virtual muhitlar
Ikkinchidan, har bir dastur virtual muhitda ishga tushiriladi. Ho’p, bu nima degani?

Dasturlash birinchi paydo bo’lganida o’zgaruvchilarni nomlash, ularni qat’iy tekshirib borish katta muammolarni keltirib chiqargan. Boshida har bir dasturchi e’lon qilayotgan o’zgaruvchisini shunday atashi kerak edi-ki, u butun tizim ichida unikal bo’lishi va uni qurilmaning o’zi tushuna olishi shart edi.

Lekin Virtuallash mexanizmi o’ylab topilganidan keyin hamma dasturchilar yengil nafas ola boshladilar. Texnik tomondan Virtulization — bu biror dasturiy ta’minotni alohida virtual muhitda ishga tushirishdir. Ammo bu nima degani?

Bu degani, Operatsion Tizim Sizning dasturingizni ishga tushirish vaqtida uni to’g’ridan-to’g’ri xotiraga yubormaydi. Aksincha, Tizim muhitida virtual RAM xotira, virtual CPU ishga tushiriladi va Sizning dasturingiz aynan shu virtual xotiraga yuboriladi. Bu degani Sizning dasturingiz hech qachon haqiqiy qurilma bilan ishlamaydi (istisnoli holatlar albatta bor) degani. Shuning uchun ham o’zgaruvchilar bir-biri bilan hech qachon aralashib ketmaydi, va dasturlardagi ma’lumotlar bir-biriga ta’sir qila olmaydi.

Kelgusi maqolada Virtualization haqida batafsilroq gaplashamiz.

Ilm izlashdan to’xtamang!
@app_hbs

​​Cybersecurity vs Information Security

Juda ko’pchilik Cybersecurity, ya’ni Kiberxavfsizlik nimaligini yaxshi biladi, lekin Information Security, ya’ni Ma’lumot xavfsizlik nimaligini bilmaydi. Ba’zan bu ikki tushunchalar haqida odamlar to’liq ma’lumotga ega emaslar. Keling, bugun shu mavzuni qisqacha maqolada yoritib olamiz.

Information Security
IT dunyosida xavfsizlik yo’nalishlarining eng asosiy qismi hisoblanadi.
Information Security — InfoSec — Ma’lumotlar Xavfsizligi — bu qimmatli ma’lumotlarni, qanday ko’rinishda bo’lishidan qat’iy nazar, himoyalash uslub va amallari. Qanday ko’rinishda bo’lishidan qat’iy nazar deganda biz ma’lumotlarning istalgan ko’rinishini, ya’ni raqamli, ovozli, vizual, matnli, fizik ko’rinishini nazarda tutamiz. Bu degani, InfoSec mutaxassisi kompaniyaga yoki biror mijozga tegishli bo’lgan istalgan ma’lumotni himoya qilish uslublarini qo’llashi ko’zda tutladi. Bunga xatto server kompyuterlarining binodagi himoyasini ham misol qilsa bo’ladi.

Cybersecurity
InfoSec’ning bir qismi bo’lgan Cybersecurity (Kiberxavfsizlik) esa aynan raqamli ma’lumotlarning kiber-hududda himoyasi haqida qayg’uradi.
Kiber-hudud (cyberspace) deganda kompyuter tarmoqlari orqali aloqa sodir bo'ladigan muhit tushuniladi. Bundan kelib chiqadiki, kiberxavfsizlik mutaxassisi biror kompaniya yoki mijozga tegishli ma’lumotlarni, mijozning xatti-harakatlarini tarmoqda himoya qilish choralarini.

…
E’tibor berayotgan bo’lsangiz, yo’nalishlar bir qaraganda bir-biriga juda o’xshaydi, lekin ularning ta’sir doirasi aniq belgilangan. Albatta, ITda xavfsizlik yo’nalishlari bu bilan to’xtab qolmaydi.

Bu ikki yo’nalishdan tashqari Network Security (Tarmoq Xavfsizligi) ham mavjuddir. Tarmoq xavfsizligi yo’nalishi o’z o’rnida Kiberxavfsizlikning bir qismi hisoblanadi.

Bitta odam qila oladimi?
Ilgari tarmoq texnologiyalari hali kuchli rivojlanmagan paytlarda Information Security’ning o’zi yetarli bo’lgan edi. Lekin vaqt o’tishi bilan, Internet tarmog’i, Cloud texnologiyalar va boshqalar juda rivojlanib, odamlarning tarmoqdagi xatti-harakatlarini himoya qilish o’ta murakkablashib ketdi. Shuning uchun ham ilgari bitta deb tan olingan InfoSec Cybersecurity yo’nalishini o’zidan ajratib chiqardi. Bu degani bir yo’nalishdagi mutaxassis, boshqasida ishlab ko’rishiga vaqti ham yetmasligi mumkin.

Albatta, bu kompaniya ma’lumotlarining qimmatliligiga, Internet tarmog’iga bog’liqlik darajasiga borib taqaladi.

O’ylaymizki, maqola manfaatli bo'ldi va asosiy savollarga javob bera oldi.

©: techdifferences (Rasm)

Ilm izlashdan to’xtamang!
@app_hbs