الشجرة الما تصير ابيت للطير
اذا طار وهجرها منين ينلام !؟

ما عاتب بعد غالين مو غالين
شيفيد العتب لل ما يجي بوكته !؟

شمدريني الغراب الفوگ بيتك جان
ينذّر بالرحيل لفرگتك ينعگ !؟

ناوي انساك بس من يا وكت ناوي !

صح مشتاگ بس خايف يفشلني !

صرتلك ماي زمزم من كلت عطشان وانه بعز العطش ما كتلك ارويني !

دام الحچي بمكفاي ما اشدله رايه
لو من صدگ ما چان ذبوا ورايه !

لهنا وانتهت ما رايد اشتاگ
وبدروبك بعد ما تخطي الاجدام !

ليلُ الشتاء الطويل ، وحدهُ من يستطيع أن يثبت لك كم انت وحيد ،
وهو قادر أن يجعلك تشعر بأنهُ محق في كل ليلة .

ثم تكتشف انك لم تتخطى يوماً !!

رحت ليش -يالغالي دارك تهجره
رحت ليش - هم تدري بالصار وجره

انلچم بويه أذا طخني الهوه
رايح وعايف جرح ماله دوه
رحت ليش -رحت ليش

نعشك ال بل دار دار -
جمره ويچوي الصغار
،وانته تدري ،

اذني بس تسمع ونين
بويه رايح يل حنين
،شنهو صبري ،

صاير العالم ظلام
من بعد خير الصيام
، بويه ذخري ،

كاعد ويبجي الحسين
ويمه كل الفاگدين
، اه يكسري ،

اويلاه -بعدك اصبح عاليتم
اويلاه -عگب الولي موتي حتم

شصبر وآنه بعد گلبي انچوه
رايح وعايف جرح ماله دوه
رحت ليش -رحت ليش
——————————-

طشر بروحي السنين
هذا يا سيف اللعين
مسممينه

الدنيا ما ظل بيها لون
راسك اليسواله كون
مطبرينه

شيبك الچنه النهار
لونه احمر كله صار
مخضبينه

ساكن بروحي الضياع
من عشت هذا الوداع
گلبي وينه

خسارات - لا ما يعوضهن ربح
خسارات - ضحكه شمس وجه صبح

موحشه الدنيا بعد موت الضوه
رايح وعايف جرح ماله دوه
رحت ليش
——————————

ساجد لصومك نويت
تالي بدماك ارتويت
ما كملته

المشهد گبالي يصير
والدي هذا الامير
وهايه جثته

عيني ماظل بيها ماي
والحنين بلايه راي
تبجي سكته

يذبح احساس اليتيم
يجرحه حتى النسيم
ما حملته

احاسيس - بيه ابد ما تنشرح
احاسيس - حس جني طيره بفد جنح -

وشلون گلبك على فراگي نوه
رايح وعايف جرح ماله دوه
رحت ليش
——————————

رحت لمجانه اعتنيت
هنا كعد وهنا بجيت
وتخيليته

گبالي كاعد جنه اشوف
واني طيره ويمه اطوف
وعاتبيته

رايح وعايف وراه
گلب ما يحمل جفاه
وحشميته

عيني تحرس على الباب
واسال وانطر جواب
وما لكيته

وتانيه -يرجع يكحل ناظري
وتانيه - وادري يعزه خاطري

وتنتهي الفركه وسجلها ينطوه
رايح وعايف جرح ماله دوه
رحت ليش
—————————-

لحظه واصحه من الخيال
لواقعاً مابي جمال
بلا املنه

وارجع بلايه شعور
صوتك بذهني يدور
بنص اهلنه

كلشي بالدنيا نسيت
ابالي بس انت بقيت
وانجمعنه

بحضنك الدافي الكريم
بجفك تمسد يتيم
وتمحي حزنه

تمنيت - يابويه اعيشن بالوهم
تمنيت - يابويه ماصحى من الحلم

وبصدى صوته عطش شوگي ارتوه-
رايح وعايف جرح ماله دوه
رحت ليش

—————————


امنة اياد