تسكّر باب لكن للفرج أبواب
‏يزيّنها .. لنا الله من بعد مدّة

‏أنا أدري طالت وكلٍ تعب وإرتاب
‏وأنا أدري إن الفرح مقبل بعد شدّة

عثى فيني الحزن وازريت ادوّر فالحياة ضماد
على الوجه المليح احزان مقريّه ومكتوبه

بعد ما كانت الضحكات تسبقني رضا وعناد
شفاتي عقبها صارت على الضحكات مغصوبه

دخيلك لا تشحّين القصايد يا حروف الضاد
من اللي يسعف الشاعر اذا ضاقت به دروبه؟

بعد ما ناحت الورقى وغنّت بالشعور الحاد
تأرجح قلبي المنهك ما بين الذنب والتوبه

طلبتك، وانت غفّار الخطايا رازق النشّاد
تفيض برحمتك عاللي هلَك من كثرت ذنوبه

انا ياربّ احبك حبّ مايطري على العبّاد
واخافك خوف لو وزّع على اهل الأرض ماتوا به

الافراح بحياتي دائمًا تلبس ثياب حداد
متى ياربّ تفرجها وْ أبدّل للفرَح ثوبه

تعبت اساير الأيام و اوطى جمرة المعتاد
والأيام السعيده من كِتاب العمر مسلوبه

احايل دمعتي من خوف اشمّت فيني الحسّاد
سنه واكثر وانا اجاهد دموع العين بصعوبه

ظميتك يا ملذات الحياة ونورها الوقّاد
انا ايامي قبل لا القى الفرج ماهيب محسوبه

اشتقت أسولف معاك و اخذ اخبارك
أسامر بالهوى لين تغفى عينك

اشتقت احس إني اقرب و اجمل اسرارك
تذكرني كل ما رفعت بدعوة يدينك

قبل اتمنى لو إني من نسل جارك
وارافق اللي يورث جينهم جينك

قبل احَسد من عظيم الشوق من زارك
من عقب ماصار بُعدي عنك روتينك

يوم إني اقرب لقلبك من اهل دارك
ما بينكم كثر ما بيني و ما بينك

وما ينبض لغيري اللي ساكن يسارك
وان غبت عني دقيقه قلتلي وينك

تشرعت ليّ القلوب و جيت مختارك
ما دل قلبي سوى سكة عناوينك

يا كنت عن جنه احبابي أبي نارك
وافدي سنيني جميعاً فدوة سنينك

حليّتها من غلاك مروره أمرارك
ومشيت جمر المشاعر بين نارينك

حتى و لو ما اقنعتني حجه أعذارك
أسامحك و اعذر جروحك ولا أدينك

لكن بعد ما الفراق بدربه أختارك
ما بيننا غير - أميني و امينك -

بدعي لك الله " عسى الله يسعد اقدارك "
وانت أدع لي " يا عسى الله عقبي يعينك "

حزن والدمع يكسى القاع طول بعرض
يا جفني . . . كان مالك حيلةٍ ثنّه

انا ما عاد تاسعني رحاب الارض
ولا به ضيق ما جيته على ظنه

تثاقلت اقنع بما صار واصبر وارض
حزينٍ ما ضحك حول السنة سنه

دعيت الله يعجل بي ليوم العرض
نذر ماعدت ادرى شي واحنه

انا بوجهك حبيبي لا تطوّف فرض
ولا تترك بعد ما ينقضي سنه

عسى اللي ما كتبنا نجتمع فالأرض
يقدر نجتمع ونعيش فالجنّه

ان شح كف الليالي موت ياظامي
لا تنحني للشعور ، أقلب موازينه

ما تحرق النار لولا ان الجمر حامي
جروح الانسان تقسى احيان من لينه

ماني بأعمى بصيره بس متعامي
انا اللي يشوف في قلبه قبل عينه

والله حتى من التبرير لآلامي
قلبي يداري عن الشرهه محبينه

رتبت قلبي قبل ترتيب هندامي
ما اذكر انه لعب مره بحبلينه

من لا تربيه نفسه ماله لجامي
ما هو مربى و لو ناسه مربينه

الحب رميةً مشاعر ما لها رامي
من دور أسبابها تاهت عناوينه

جفت صحف حيلتي وارتفعت اقلامي
الحمدلله على الزينه و على الشينه

كبرت لين صغرت بعيوني أحلامي
ما عاد أبي فالحياه الا الطمأنينه ..

تنهدّت روحك البارح . . وحسّيتك
‏مجروح منّي ، ولاا فكّرت تجرحني

‏طيّب ؟ على شان زعلتك و بكّيتك
‏ابعتذر لك وامانة .. لاتسامحني !

لا يُعْرَف الأصيل ببداية المصاحبة ، فالكل أصيل في البداية ، بل يُعرف مع الوقت ، حيث تتجلّى أصالته ببطء ، كتجلي الفَلق ساعة الغداة ، ستعرفه مع وحشة الترحال وتبدل الأحوال وهجير الدروب واشتداد الكروب ، من نزاهة بطانته ، وحصافة عقله ، ورأفة قلبه ، وريث خُطاه ، وسعة صدره ، وطول صبره ..

لا كبر عمري و لا تغيّر مكاني
‏ليه أحس إني أنا ماني بـ آنا ؟

‏صرت أصور واحفظ الصوره عشاني
‏واجمع الذكرى على العشره ضمانه

‏و صرت آحب الحزن بالحان الاغاني
‏من عقب طيران لحن الخيزرانه

‏و صرت أخاف البرق وادعي في مكاني
‏بعد ما اركض للمطر و أغرق شطانه

‏و صار عندي للمجامل وجه ثاني
‏من بعد ما صرت اخاف من الميانه

‏و اعشق الوحده و احس انها أماني
‏من لقى في وحدته غيري امانه

‏اهلي خلاني و ربعي أخواني
‏والبشر كلً وله قدرة و شانه

‏لي متى واهم البحر و انا المواني
‏لي متى روحي من الشرهه جبانه

‏مشكلةْ قلبي على طارف لساني
‏" يوم كلً حاجته تحكم لسانه "

‏من خذا مني ، تجمّل لو نساني
‏في زمن رد الجمايل بـ الاهانه

‏ما يعيش بـ هالزمن غير الاناني
‏صارت الانفس تميّل للخيانه

‏لازم اربي على القسوة حناني
‏دام عاب الوقت بالطيّب حنانه .

- دقايق اهتمام -
اكسر جمود الصمت بسيوف الكلام
و سلّم و ردّ الصوت من باب الأجر

مالي سوى روحك أبادلها السلام
مصافحك يذيب قلبٍ من حجر

عطني من اوقاتك دقايق إهتمام
قلبي من اشواقه شويّ وينفجر

ياما سهرتك لين جافاني المنام
وياما احتريتك لين صادقني الفجر

رغمًا عن اتعاب المجافى والغرام
محبّتك كنزٍ من ينوله تجر

عاتب، تكلّم؛ ما على الغالي ملام
حتى لو ان قلبي من عتابك ضجر

لكن حبيبي لا تطرّي لي خصام
لي روح تقوى كلّ شيّ -الا الهجر-

عمر انتظر لحظة مجيّك كلّ ليل
‏لين الظلام بساعة المشرق غشا

‏سولفت للغيمه عن البعد الطويل
‏ودمع السما في ديرة الفقد انتشى

‏يا غايب ، يا حاضر ، للـ صبر كيل
‏صبري من الفرقى تعذّر واختشى

‏لا تسألني .. وش تغيّر بالرحيل
‏سرّ الحزن في وجه راعيه انفشا

‏بير الهوى عذب وجفافه مستحيل
‏دلو الوصال الحين مقطوع الرشا

‏ما قلت لك حظّي مع الدنيا قليل ؟
‏سيف الوداع يدلّ عنوان الحشا

‏من قال باقي .. عزم للـ حمل الثقيل
‏عزمي معك سلّم على القلب ومشى

‏لو صدق ودّك بالجواب وبالدليل
‏كلّشي تغيّر بسّ حبّك ؟ : لا حشى!

متغيّرة ماني بـ أنا .. من هو اللي نحّل وقفتي ؟
هذي المرايا كاذبه .. والا أنا ماني بـ أنَاي ؟

مّن عوّد ايديني على التلويح ، واضْرَى خطوتي :
تمشي دروبٍ غصب عن قلبي .. وعيني في قفاي !

مَن كّرب أيامي ونسّاني ملامح ضحكتي ؟
مَن دسّ في صدري ..
حنين
وذْكريات
وصوت ناي ؟

مَن استباح الضيق في وجهي وبهّت صورتي !
مَن غيّب البسمَه عن عْيوني ومَن طرّف بكاي ؟

من علّم شْعوري الشعر يوم اختنقت بْعبرتي ؟
من رقّق يْديني وحَدّد حرفي وْقسّى حكاي ؟

مَن ثقّل الكلمة على لْساني وضخّم نبرتي
مَن طلّع مْن احساسي الناعم ومن ليني قِساي ؟

متغيّرة .. ماني بـ أنا ولا بـ هذي هيئتي !
مدري من اللي عاث في عمري وقلّل من حلاي

يوم ارفع يديني إلى الرب الغفور
شفت فـ دعا الانسان مشهد شاعري

بين الرجا والياس دعوات وشعور
و وحدك ياربي أعلم بمشاعري

هذا الحزن عيّا يفارقني شهووور
مجتاحني من أولي لين آخري

لو ما تكلّمت انكتب بين السطور
ولو ما ذرفته انقرا في ناظري

صرت اكتبه شعرٍ عن القلب الصبور
وملّ .. الصبر منّي ومن دفاتري

يالله يالعالم بما تخفي الصدور
محتا جتك، وانت العليم بخاطري

ياما عطيت القدم لمتوّهات الطريق
‏ وياما عطتني الليال الغبر مرسولها

‏ياما هقيت اني الناجي وصرت الغريق
‏والناس لولا التجارب غابت عقولها

‏وانا مع العز لي سيره وحبلٍ وثيق
‏ وثيابي اللي علي .. طولي وأنا طولها

ما قلت تكفى لأحد حتى وانا مستضيق
‏من خوف لا يحسب اني دايم اقولها

‏منابت النفس والورث العريق
‏يزود من صبرها ويكثر حمولها

‏يا حظ من حط ذكر الله لجوفه رفيق
‏زهداً بالابواب فاتحها ومقفولها

‏الأرض لله والانسان حرً طليق
‏ والله يحاسب عباد الله بفعولها

يا رب لا تختبر نفسي بما لا تطيق
‏ ورضاك يا رب غايتها ومدلولها

‏الحمد لك والثناء اللي في جلالك يليق
‏يالله عفوك ومغفرتك وما حولها

وش يْخفِّف شعور الخيبة ومن يضحك البكَّاي؟
‏اذا كان الجواب اقسى من احساسي واسئلته

‏وانا مانيب لا ناكر ولا جاحد ولا نسَّاي
‏لو اتظاهر بقوَّة قلبي المُنهك وسلطنْته

‏لو تْهون الليالي في عيونك مثل شرب الماي
‏علي! ماهانت اوَّل ذكريات الحبّ وآخرته

‏يجوز اسرفت فآمانك وفي حبِّي وفي هقواي
‏ولكن خيبتي اكبر من اللي قد تصورته

‏يفرِّط بي عزيز اصحابي وْواحد من هلي،وعْداي
‏ولكن قلبك اللي حبَّني ؟ ماقد توقعته.

‏" يا ودود يا ذا العرش المجيد يا فعالاً لما تريد أسألك بعزك الذي لا يرام وبملكك الذي لا يضام وبنورك الذي ملأ أركان عرشك أن تكفيني هم الدنيا والأخرة ، يا مغيث أغثني يا مغيث أغثني يا مغيث أغثني "

‏-الوتر🤍.

كريهه .. رحلة الجرح لـ ملاذ الطبّ
‏مُملّه .. قصّة ( المظلوم والظالم )

‏رميت اغلا المشاعر في غياهب جُبّ
‏وقلت اسلَم على راس الهوى السالم

‏عسا ماهو غرور ولا كِبر .. يا رَبّ
‏كثر ماهو ثِقه .. في قلبي الحالم

‏بعد كثر التجارب فالعَطا والحُبّ
‏انا واجد على ( واجد من العالم )

يالله أنا قلبي عزيز وحياويّ
‏شيء يهين النفس لاتقسمه لي

‏حتى لو إني له شفوقٍ وشفاوي
‏تغسل فؤادي منه قبل أغسل يديّ

لو وحشتك عشت بعدي في شتات
‏جمّع أحلامك بتلقى فيها فرْح
‏عدني ذكرى مدام الذكريات
‏حيلة الخسران ان ماصار ربح

‏قلت لك ولّى زمان التضحيات
‏حتى وجهي ماهو مثل الغيم سمح
‏ايه صدّيتك و عاكست الجهات
‏اللي ممكن تنتهي فينا بصلح

‏ما رجعت أدوّر اللي فيك مات
‏جيتك آردّ الأمانة جرح ، جرح
‏صعب تلقى مثل قلبي لك حياة
‏وما أظن بعدي بيشرق فيك صبح

‏على ذكرى مسافات الرحيل اللي مشى بي لين
‏وقفت وما لمحت الّا السراب يعانق احداقي

‏مشيت اربع سنين و ما بقى كثر السنين سنين
‏كبرت و ما بقى من رغبة ايّام الصِبا باقي

‏عقب ما لوّحَت كفّ الوداع و راحوا المقفين
‏رجعت و لا معي غير الحنين ودمعة فراقي

‏دعيت انّ العوض يآتي كبير و ما ذخرت آمين
‏عسى الله يطفي اوهام الشموع بلحظة احراقي

‏يمرّ العمر والحزن يتلاشى والطريق يزين
‏واغنّي كلّ ما يلمس شعوري لهفة اوراقي

‏أعرف انّ العوض دايم يجي لكن يجي بعدين
‏أنا ما كنت اظنّ إن العوض يستاهل إرهاقي

‏حبيبي جيت في خوفي شعورٍ يفرض التطمين
‏مثل ما غيبتك تفرض على درب الهوى اشواقي

‏أشوفك نور ما بين اليقين ، و عتمة التخمين
‏تجي مثل الصباح اللي يصادف موعد إشراقي

‏أحبك ليه أنا مدري ولا ادري جيتني من وين
‏أحسّك في خفوقي عابرٍ مستوطن أعماقي

‏تمادى في حضورك والغلا ، يفدونك الباقين
‏تعال و غَنّ احبك ، غَنّ أحبك واطرب آفاقي

‏اللهُم أخرجني من أشد الضيق إلى أوسع الفرج ، اللهُم لا تُبليني فيما لا أستطيع عليه صبرً ا، اللهُم زِد قلبي أمنًا وأماناً وزد عليه سكينةً واطمئنانًا ، اللهُم إني أسألك أن تصرف عني شتات العقل والأمر والتفكير ، اللهُم احرمني لذّة معصيتك وارزقني لذة طاعتك🤍.