يمة اگلك
هااك دين اهلك وروح افخر بنسلك
گول أمي انطتني دين
وامي چانت مو نبي
عدها فطرة اتشوف حيدر كلة (دين)

عاگدة بشيلتها عگدة
آنة حسبالي نذر يگظي الها شِدة
ولنها گالت يمة هاي امراد تاليتة عطيتي
اشما اصيحاً يا علي اطاني اعلة نيتي
وچان تارسها ابو حسين

يمة وآنة اسگيك مني
حُب علي.. تالي الحِليب
يمة اريدك تكره الدنيا بكبرها وبس علي اتشوفة حبيب
وانة اهز مهدك والولي (ابيا علي يا علي)
لان تالي الدنيا غربة وبس علي الگلبك جريب

يمة دومك شيل راسك
يمة دومك ماشي الايحبون حيدر
ذول تلگاهم غيارة
واليسألك
گلة امي اتگول ذول اُولاد جابتهم عِفيفة
وحُب علي سر الطهارة

ويبني لا تغفة اعلة ذكرة
الينسى حيدر ساعة ما يسواش ذكره
الينسى حيدر ساعة ما يلگالة عِبرة
يمة تالي اتشوف عينك
انت گدرك وين من تلهج بحيدر
واليضدك وين ذكرة

يمة ما اگدر اوصفة
حُب علي كلش چبير أيريد ناس اتحب تعبها
أيريد الاگلوب التِنَديّ امحبتة امن اوجوه سمرة
يمة حيدر
شفتة يهوى الناس الاتحبة عالفطرة


علي الفيصل


#انا_غديري

١
ابباب الخيم صار الغدير
والبيعة بالدم حُب چبير
وطه الحُسين وشال اديه
والكافل ابدور الأمير

حامل لوائي انت يا اخي الساقي
كلشي يزول واسمك ابفعلة باقي
وحدك شريك العصمة واكبر دلالة
عين أمي انت وراكب اعلة البُراقي

أحدًُ أحدْ موقفك والعلم
صَمَدُاً صَمدْ ترجمان الشيم
زلمة يصير الصاح بسمك فقط
المدد المدد يا ساقي الخيم



٢
فر ايدة حب ايد الحُسين
واتجسد الحُب باليقين
ضل للخيم گلة انت ماي
وآنة افرس اسياد العرين

طبلها غاضب يفتل ابهالشوارب
وياهو اعلة عين الزهرة يتسمة حاجب
مثل السنابل لونة صار اليفكر
ينزل يقاتل وانت بالحومة غالب

مو طين ابد چفة مِن السقر
وهذا العدد من خيالة اندثر
مثل الشمس زال غيم العدة
وبسيفة حد اسرع امن النظر



٣
حانت بعد ماضل سلام
والسبط نادى بالقيام
داروا مثل جمع اليهود
وصارت مدينتة الخيام

لا خندق الينفع نحفرة ابمخيم
وابشر يطه الطف جمعهم مُحَطم
والراية منطيها الكلف مو مُكلف
المخلي روس الدنيا تحت المُطهم

جَبِلُاً أشم يلوي كل الرگب
ابچفة العلم سد هواها العرب
رف عالزلم چن لواء الحمد
لاهل الخيم چفة عِز الطلب



٤
اهل الخيم من نصبووك
شي حيدر ابكلهن لگوك
ساقي وكفيل انت وامير
يم تاجك اتطخ الملوك

بيعتنة بالدم بيعة الطف شريفة
العودك خوالك صاروا اهل السقيفة
هاي الولاية ابرايتك يا ابو فاضل
ونصراً من الله وفتحاً حليفة

سُلماً لِمن رايد الطاعة الك
حرباً لِمن لليعطش هَلك
اشهد يربي علي بايعت
رب الوفة والوصي والملك



علي الفيصل

١
حسرة اتلاگت بحسرة
وثكلة اتحاچي بالثكلة
النريدة انشوفة بالعثرة
موش ابسرعة نندلة

الرباب اتگلها ابني بيد ابوه راح بضمة وحر
وليلى اتگلها ابني الوحدة راح وتِطشر

شوغة شوغة اتبدن ابگاع المصيبة
دمعة دمعة اتسولف اعيون الغريبة
ويلي ويلي يا گلب ضل ليه حبيبة

شاء الطف بأمرة ايموتنة ابعذابة
وياهو الما فاگد لو هين مُصابة


٢
نظرة اتناشغ ابنظرة
ودمع كل ذِكرى ينزل شط
تعب ليل الربة ابصحرة
انشال وعالرماح انحط

شسولف يم الاكبر عالرمح مو گد مقاسة
ادور يم ابوه هلبت سهم يحملي راسة

غربة غربة…ابثوبي نار وامشي ادور
حيرة حيرة…امن الگة غالي ابجسمة اعثر
بلوة بلوة…ضاگت وانة امشي بالبر

عاد انة ابني ازغير انتي ابعز شبابة
وياهو الما فاگد لو هين مُصابة



٣
گمرة انذبحت وگمرة
وظلام الطف نشر خيلة
بعد ما يستلذ عمرة
اليشوف اعلة الترب حيلة

شسولف يا رباب امن العطش تالي انروي ابدم
قمر ليلى اليشع بين الخيم بالذاري ينلم

گطعة گطعة…اموذر وياهو اليلمة
شمعة شمعة…اتلالي دمعاتي انة يمة
هظمة هظمة…نحرة وين ارد انة اشمة

شمس الله ابخدة وطفوها ابخضابة
وياهو الما فاگد لو هين مُصابة




٤
الضنة يذبح هلة ابهجرة
وهلة ماترا بقينة احنة
جفاهم بالگلب جمرة
ما تطفيها لو مِزنة

وكت خلة العطش يذبح شملنة ابلا خواطر
نروح اعلة الهزل گوة التضل يسحگها حافر

تالي تالي…الدمعة تعمي النة النواظر
كسرة كسرة…اتدوس بينة چن حوافر
يمة يمة…اثنينة انصيح ونكابر

كاتب النة الله الون وسط الخرابة
وياهو الما فاگد لو هين مُصابة




علي الفيصل

هايلّة يا مضمام ابوك الهاليوم هايلّة هايلّة
يدريك ابو محمد توفيلة اعلوم هايلّة هايلّة

١
هايلّة يبني الدنيا ضاگت بحسين هايلّة
غير اعلة جنح الريح واسطر كل عين هايلّة
لك لامة امانة ومعضد ايشد چفين هايلّة

من عودك هاي اعمامة
وياهن سيف ولامة

وادريك يبني اعلة الحرايب جيدوم هايلّة هايلّة



٢
هايلّة جاسم ما ردت منك ماي هايلّة
بس ردت تنطي اعلوم من حگ ارباي هايلّة
عمك وحيد انغر يبزر الغزاي هايلّة

يبني ارفع راسي بيومك
هد يالناشف زردومك

وخليه فحلهم من سطرتك مندوم هايلّة هايلّة


٣
هايلّة يبني اعلة النسة ارد افخر بيك هايلّة
عرسك جزيتة وللحرايب نطريك هايلّة
شوباشك اسهام العدة اطيح اعليك هايلّة

فعلك ما خيب ضنة
عوف العرس والحنة

كون الحنا ابچفك ترايب وادموم هايلّة هايلّة


٤
هايلّة يا تالي الضنا العمك غير هايلّة
والموت حگ واجب ولو انت ازغير هايلّة
بس لو نغرت العمك اتصير اچبير هايلّة

عالموت اوليدي اشزغرك
لاچن بالحومة اشكبرك

خليني اگولن فدوة الك يالمضلوم هايلّة هايلّة




علي الفيصل

١
سارج مهرتة الشهلة
وعالغيم راسة يتعلة
وزينب صاحت بمگفاه
حياك خوية ابو فاضل

شعرة اوية هب الريح فلها الجدايل
متعلي شگرتهن رچيب الاصايل
شفنة الخصم يقرة اعلة روحة العديلة
من يسمع ابعباس نازل يقاتل

وحسين…گلالة حارب
عالموت طب صدرة راحب
يا ثار ضلع امة طالب…عباس

بركان…بعيونة يلهب
ماهاد لوگتلة زينب
للثار وبحگة يطلب…عباس


٢
اشمحلاه طولة وافنونة
امكحل الخيمة بعيونة
وهاشم گالوا ابحگة
عباس شيخ المراجل

مغرب يحول اعلة العساچر بريجة
يظفر رسنها ابچفة يوم الضجيجة
يتخير اخيار الزلم و ايعگبها
وخلاه فحلهم للمداين بغيجة

مزيون طولة اشحلاتة
وبالضيج نخوة خواتة
بالشوف تلمح غلاتة…عباس

لو غار شحچي اعلة حيلة
ما يوم غدالة عيلة
فصام ظهر الثگيلة…عباس


٣
غادي ابسطوة اجناحة
وناثر طفها مرواحة
جيب الزلمة الايگبلة
لو غاض ياهو الاينازل

شوشگ نسلها وگلگلاها الفوارس
والعندة صوت اشمالة بالحومة خانس
تيه علمهم من رجز بالمعارة
أني أنا العباس رب العوابس

يا زين بيكم يگبلّة
بيه حيل عود ويگلّة
للدوم محد وصلّة…عباس

خيال گومة وفخرهم
بالصيد سابگ علمهم
عباس هاشم نچرهم…عباس



٤
يرهب من يشن غارة
اچفوفة امعزبة سطارة
امحير الدنيا بأوصافة
من كلشي الگمر كامل

حِسنة وصفاتة وعلمة حل الصعايب
وبزهدة وارث علي ابن ابو طالب
جايبتة حرمة حسين عدها الديانة
والهالسبب عباس فاق العجايب

سُبحان أمة ولبنها
التنخاك وتصير ابنها
أمك لا ماكو منها…عباس

شفناك للخوة راعي
وللدين بالدنيا داعي
گضاي كل المساعي…عباس




علي الفيصل

١
عگب نار الخيم والفزعة
الاجتنة الما تفرق احد
نطوف اعلة النهر وانكابر
صبح چف النهر مرقد

من صار الحرگ ستر الله بالخيمة
طلع من شوغتة وضيمة من فيّ الله للهيمة…تشيلة

رگضن والزلم لاگتهن املاگة
وحبلهم فَـرّع أشباگة من وضحتنة للناگة…الهزيلة


٢
بلغ للشاطي حد ركضتنة
الخدر حگة اعلة كفالة
نشوفة ابدمة ضل يتلوة
الركض بالحومة شل حالة

الما شافاها اخوها وتركض ابحومة
شني ايعينة على الگومة اذا غرگان بدمومة…وجروحة

ايتگوة ابلا چفوف وحيرتة حيرة
اعلة زينب گايل اچبيرة وعلي مو كلش ازغيرة…اعلة روحة



٣
يبعد السلهمن بفراگك
يبعد اهلي اشبقة امن اهلي
چنت گبل الهمس الگاكم
شجاكم محد اوصلي

اول تالي احشم والستر غاية
طحتوا وطاحت الراية واجتنة الگوم غزاية…وگوية

نسوان اشبدينة وخاطر انردهم
ولا واحد نهض منكم طحتوا اعلة الترب كلكم…سوية


٤
ولتنة الوادم وما گاموا
الاهل لو ما اجو صعبة
اجة الحادي ابهزل وابحيلة
وبدت قصة السبي ودربة

وصعدنة ابنوگ عرجة وكلفة ممشاها
ابغرب ماعرفة منواها اختكم محد وياها…هضيمة

وبدت شمس الضحى لون العبي اتبوگة
وبنات احسين مشبوگة ازغيرة اچبيرة مخنوگة…هضيمة




علي الفيصل

١
مثل ما فاك گلبة الملگة خطارة
لليبغضون حيدر فاك بتارة
حل خيط المعصية ابچفة حلاها
وأبو الحسنين چان الحسن فقارة

مُقيم ألزلزلة
عظيمُ المنزلة
فتى ألحرب هوَ
مُقيل المُعضلة

ابمكارم معتلي
والاول عد علي
الحسن رب الحِسن
ولي ونعم الولي


دُر من فاطمة اعيونة
عابر جيلة ماعونة…واصل للسمة

سُبحانة طول القامة
هيئة علي ابهندامة…مُهجة فاطمة




٢
اذا حيدر يعاين للصليل اشتد
يگلط عالثگال اعگال ابو محمد
ما محتاج حيدر واحد ايجاريه
بس رايد يوضح حيدر أشوّلد

كصوت القارعة
يُزيح الزعزعة
أذا في القوم شَدْ
تُقل المسمعة

أثر بيهم طبع
ولا زلمة الطلع
البزر الابظهر ابوه
أبوه وابنة أنشلع

حار اطلابتة اطلابة
سيفة امطلگ اگرابة…ترباتك علي

سطرة چفة طرگاعة
يا زلمة الوصل گاعة…غير ابن الولي



٣
اهي امن الله الچبير اتنومس اعلومة
وچبيرك يا علي اتريس على الحومة
شنو ايردة اذا چانت يمنتة احسين
مغضب يرهب ومستبشرة ارسومة

بوقعِ أم الجمل
أناخَ بِما حَمل
حميراء الفتن
فناها وارتجل

انة ابن الما يرد
أصم صَمّ العرد
حرز من فاطمة
علي ابزندي يشد

حطة بسدرة واتباها
نوخ هوة وياها…أم الفتن

دخيلة يا علي دخيلة
ابنك حيلك ابحيلة…مهيوب الحسين




٤
دحاها العاديات ابفتلة امتونة
امذهب سيف والشافة صفر لونة
نثر محصادها وكوّر رفايعها
الجبل يهتز واهو ما ترمش اعيونة

فقادَ مَن كَفّر
الى دركِ السقر
هو الليثُ الابي
ومِن فارس مُضر

كلف حيلة كلف
يُعد بچم ألف
اذا يغضب صعب
ابو الملگة الترف

مِنة الحومة ميالة
لو بس لمحت اخيالة…ما تركد أبد

وچفة المحد اليردفة
زين ويعشگ الكلفة…گضاي الشدد



علي الفيصل

١
والله بلوة
وينني اووين المصايب
أزغيرة وامضيعتلي خوة…والله بلوة

جيت من داري وغريبة
وباگ أبوي الموت گوة

راسي ياهو ايمسحة هسة
الجابني اگبالي ايتلوة…والله بلوة

يالجبتني أتردني بيدك لو متت
آنة ذيچ الگتلي بوية وم
آنة ادري ابوالدي وذاك القصر
الطاح ابوي انت شجاك وما گمت




شلون كسرة
ابنادم من ايوادع اهلة
ومامش ابنادم يجبرة…شلون كسرة

أچودر الدمعة اعلة جفني
والضحك بسنيني عثرة

كلها راحت روحي واهلي
آخ حيل الفرگة مرة…شلون كسرة

مالي حيل الفرگة وعيوني تصب
الهجر مو بس حيل رايدلة گلب
المالة واهس بالدرب يبعد عليه
وكل درب يبعد اذا چان ابغرب

حگنة امن انميل…واتصب العين
ما ضل كل حيل…بس راح حسين


هاا يهلنة
يا هلا المنكم بقتلي
وانكسر عود المحنة…هاا يهلنة

وركضت الآخ اعلة صوتي
ازغار عالضيم اشكبرنة

وتاهت أجدام التجيكم
يالگطعتوا ابگلبي ضنة…هاا يهلنة

ألنار من بينت طولي ومستحاي
ردنة أهلنة أترد أبد ما ردنة ماي
الماهي متعودة اعلة بر ابلا خيام
تنكسر كل ما يمر طاري الفياي

والعلويات…بالبر اشلون
عالگاع اتبات…والناس اعيون




شلون تالي
بس دروا رايتنة طاحت
ذبحوا اليخطي اعلة بالي…شلون تالي

وگطعوا اچفوف التلمنة
وبانن اسنيني وخيالي

وشاخت الحسرة اعلة صدري
ما تشيخت ابدلالي…شلون تالي

عزنة راح وفرهدوا ذاك الدلال
وداروا الغربة مثل دور الحبال
ألضايع ومنهوب كل همة يموت
الداري لو رديت ما تجبرلي حال

ما ردنة انعود…شي فات الفوت
عگبك ياجود…نروة الة ابموت




علي الفيصل

١
كسروا ظهري ابهاي
گالو مات عالماي
افياي وما الة افياي…حُسيـــــــنآه


العطش ناهب ضوة الجود
وكسر بخيامي عاموود
يحزنك ما الة احدود…حُسيـــــــنآه


الطف يبن امي عطشانك وبدمك شفاه بللة
اشتترجة الضعن عگبك خذوو بالگوة من كربلة
الغرب مدري الرمح شالك وراسك قدوة للقافلة

يا ضواي
انتة تدري وليها جاي
تنذبح والسِبّة ماي
وگطعوا ابنحرك هواي…يا ضواي


هية هاي
لو اعوفك ماكو راي
انسبي واجزي الفياي
اولا اخو ايگلي تعاي…هية هاي




٢
جرحك ينسمع مووت
عجافك ذابح الصوت
وبچينة اعليك بسكوت…حُسيـــــــنآه


وجرس ناگتنة باگوه
الرگاب الخيل شدوه
شگول وخدري ذبحوه…حُسيـــــــنآه


وحيلي اتبدة بخيامي ولميت الدمع للجفة
عطشهم واصل العيني الدمع بعيوني هم نَشفة
ودلالي اتگول چن صوتك وي ذبحك يخوية اختفة


وين اروح
والضعن قصة جروح
والرمح بالدم يفوح
وآنة عالهزلة وانوح…وين اروح


مالي روح
انذبحت ابطاري النزوح
وانت عالي اشلون الوح
خاطر احچيلك وأبوح…مالي روح




٣
اليعوفك يمشي عطشان
وتلاگي ابرسمة دخان
وريحة نار صيوان…حُسيـــــــنآه


ويخنگة ابكلشي طاريك
اذا كلهن صفن بيك
الذبح والماي واليك…حُسيـــــــنآه


ما نتهنة خوية ابماي وانت اشفافك امفطرة
جرحك بينة عاش اهوااي وبكل لحظة نتذكرة
رمح شيبلي روس ازغار من ضعنك ترة ابمنظرة


والزغار
تمشي كلها بالنهار
والرمل يچويها حار
وآنة بية الهسة نار…والزغار


گلبي فار
وآنة ما عندي خيار
والرمح صاير مزار
شوفتك صارت أجار…گلبي فار




٤
الغرب مستفحل اهنااه
افراگك هذا معناه
دمع وامرافگ الآه…حُسيـــــــنآه

شهلن يا دمع عين
وآنة امودعة الحسين
يكون ابچيلة عمرين…حُسيـــــــنآه


اليهاجر والدموع امتاع تلگة كربلة ابدمعتة
ومن يفرش شليلة اوجاع يشرح للخلگ قصتة
عايف چم غريب ابگاع بس ما تنتهي غربتة


يا مُصاب
من اشوفك بس عذاب
يا حضن فوگ التراب
رمح شايب وانت شاب…يا مُصاب


سدلي باب
شيبك ولون الخظاب
والوطن صاير سراب
وآنة بس حِزن الرباب…سدلي باب



علي الفيصل

گضينة من الذبح والعاشر الباگ
هلي من اعيوني حتة ابشوف الاحلام

ورجع سجادنة من الدفنة منهوب
دفن وين العليه ينعض الابهام

ولميت الاعيال الصوت اجة ايگول
شكو مذبوح أخوها اتروح للشام

وراي ادروب يابو ادروب للموت
وراح افگد بنات ازغار وأيتام

آخر ليلة بالكوفة بعد وين
ياخذني الغرب للموش الي اولام

احَشّم چنت ابوي ومسلم وياه
لمن يجي الليل واسمي ينسام

احَشمّن بعد صحرة وبلا فياي
ولا ريحة هلي ولا عندي مضمام

ضعن يمشي ابگفة افياي المچاتيل
وين الفاگدة امن اخوانها احزام

هلي شيب الابگلبي يريدلة اچفوف
هلي نِفسي انگطع عباس ما شام

هلي باچر نكود الضيم عالضيم
هلي اعيون الشماتة اببتكم اسهام

١٥ محرم
خروج الضعن من الكوفة
إلى الشام 💔



علي الفيصل

((منهج الحب))

١
عاشر الدمعة ابخطوتك من تمشي بدروب العشگ
وانصب مآتم للخيم بَيِن على ارسومك حرگ
يستاهل حسين التعب ولغيرة ما يرهم صدگ

وارسم درب دموعك هيمة وميل بممشاك
وعيش ابغربة ضعنة وظيمة وسايرها وياك

عيش ابجرح وارسم على دروبك ضعن
وساجي ابحزن درب المعاناه والمحن
خدامك انضل نمشي الك طول الدهر
هذا الشعار الما نغيرة ابكل زمن

نمشي ابدرب ضعونك كل خطوة ابعمر
تدري انتة ابخدامك ما تحمل هًجر
واليعشگ للملگة ما عندة صبر




٢
انذر شكو بروحك دمع واحرگ شكو بروحك عطش
واسگي الجرح دمعة غرب وخل مشيتك مشية نعش
شايلتك اچفوف الخلگ بالياهلا ابدربة انفرش

ولا تاخذ عينك عالدنية وتنسى العُريان
ولو گدامك شفت امية وِن عالعطشان

نزل الدمع كل ما يمر طاري الرمح
واذكر حبيبك فوگة ضامي ومنذبح
وخلي بمشيتك عثرة وي طاري الهزل
ساير حُسينك بالقليل امن الجرح

حسراتك وآهاتك خلهن بس الة
ولغير اسم حسيني المدمع ما حِلة
التكسرك وتهظمك خل بس كربلة




٣
يالماشي وتواسي الضعن طول سجدتك عالارض
رغم الجرى ابطف كربلة زينب ولا عافت فرض
امشي اعلة نهج اهل الجرح واترك كلام اليعترض

ونگع السجادة من ادموعك مثل السجاد
واتخيل ترسمها اظلوعك للخيمة اوتاد

تلگة ابتربتة وقصتة ادروب النجة
عالحب يعلمك والحقيقة ابمنهجة
واتمعن ابذيچ السبية ام الخدر
تقرة ابكلام الله اعلة ناگة امعرجة

ثبتهن اوتادك بالحب والدمع
واشتات امر الامة بالطف تنجمع
تسري افلاك الدنيا اعلة الناقص صبع




٤
سير اعلة منهاج الضعن واتغرب ابهذا الدرب
وحزم دمعتك عالجرح واحرگ صفنتك بالغرب
وحس بألم طفلة انولت بين التخوزر والضرب

وحس ابروحك بين الظلمة ازغير وتنعاف
وطفلة اتصيح وينچ يمة من الظلمة تخاف

كل ما تغمض صور اجروح السبي
وحرگ غفلتك حرگة اطراف العبي
وخلي الدمع دايم على جروح الضعن
ابمشيك تهدة هنة يتماشن حبي

ساجي اجروح السادة وسلطان العصر
وعيش ابهزلة وتلة وچويات الجمر
لو ما جرح الغالي ما يسوة العمر



علي الفيصل

١
ترجمان البلاغة
الله صاغة صياغة
غايتة وابتلاغة…يا علي يا علي

يا مُعز السيادة
وانت اهل القيادة
بالعزم والارادة…يا علي يا علي

يا اشراع اسلامها ومقدامها امحير التاريخ من صنع ايدك
الحرب كل أرناناها وميدانها تعجز اتوصف ثقل تمجيدك

يا راهب الدين وعمادة وعصامة
وسيف المحمد انت مدري القيامة
لم الشرك والطاغي مثل الاصابع
ودين الله ثابت من علي وانتقامة



٢
يا مُذل بني طارق
ما مشوا عالنمارق
جندلتها الزنادق…يا علي يا علي

وزومعة والمغيرة
عود روس الچبيرة
لمها لمة حصيرة…يا علي يا علي

يالامفحط اسيادها وقوادها مكة ما ضل بيها واحد ماذر
ومن كثر طخ روسهم واتدوسهم هالبغض بين ابيوم العاشر

لا سادة ضلت عد قريش وشعبها
بس انت سيد تبقى تاج العربها
وعام الفتح يشهد علي اشسوت ايدك
جايبهم اسرة وموتة محد حسبها




٣
زلزليت الملاحم
يأ اسد بني هاشم
ما ترد من تهاجم…يا علي يا علي


بالغزو وبالمعارك
چم خشم بيها فارك
انت وحدك تشارك…يا علي يا علي

اسمك ايضل فوگها وخافوگها وما تعلة اعليك اسم يالعالي
علي يا ريالها وخيالها الله گايل بس علي اليحلالي


حامل لواء الله وعظمتة وجلالة
وبعينة غيرك صعبة واحد حلالة
يا سيفة يا صوتة ونحت عرشة بسمك
والباشط الما صحلة نِد ابنزالة



٤
حاني ظهر الاصايل
علي رب المراجل
ضدة ما صح منازل…يا علي يا علي

سيفة يعشگ صليلة
ويستلذ بالثگيلة
ويطلب المستحيلة…يا علي يا علي


يالامگعد افحولها اعلة اريولها وطبعة اچفوفك ترس بوجوهم
علي يا نغارها وكرارها الگاع تشرد لو نويت اتدوسهم

طرگاعة حيدر بالسطر ما يجامل
چم شارب امطيح حدر جدمة مايل
لو نادى بالحومة وشرد منة واحد
ما يسلم ابظهرة يلاگي ابو فاضل



علي الفيصل

١
واحة مووت ضلمة وصوت ضل نيشان
چم محراب صابة الباب چم قران
هذا الليل بيه چم جيل ضل ذبلان
لو مسموم لو مهظوم لو عطشان

هذا اول اجروحي وقرباني
طاح الندى بس مو باحضاني
الگاع اتـِلگة الطايح عادة
بس ابني ردتة ابسد ذرعاني

فتحوا ابواب الذبح بوليدي
وچان بسمارة رمح تقليدي
كلهة هدت وانة آدافع بيدي
وشنهي ذنبي حتة يفرغ جيدي


٢
فجري الجاي چن مگفاي صاير ليش
عمري اهناا. اتناثر آه مثل الريش
محسن گوم بعدة النوم ضل بس عيش
آسمع آه وآمآه موش افيش

تنمد ايادي الگاع ابحرگة
بعدة جنين وتنوي اتشبگة
كسروا أذان الدين ابضلعي
وصوت المنابر ضل بيه خنگة


الله عن كل البشر فضلني
ويبغض النيتة الصدگ يبغضني
الحقد مو بسمارهم كاتلني
ومن كثر شد الدفع طاح ابني


٣
للبستان چم دفان مالك صار
آنة الدين والثقلين والمختار
آنة اشلون باليفتون حرگوا الدار
بابي الچان للقرآن شو بيه نار

واهل الخوارج طلقوا دعوة
منچ فدك ناخذ بالگوة
هذا دليل الجاهل دينة
وجهة ظهر مستسلم گوة

البيه سطرة من علي شد حيلة
وفازع البابي يحرگة الليلة
ما قروا بالمُحكم وتنزيلة
انكسر ظلعي وانعدم ترتيلة



٤
ليل وخوف ما بيه شوف بس دخان
ابلا تابوت چان الموت عالحيطان
حيدر صاح گلبي وناح بالحرمان
سيفك وين وأمر الدين ليه سجان

چان ابوصية السيف اموصة
بگرابة يبقى الدين وحرصة
لآخر زمن يطلبلي ابثاري
قائم بأمر مو باقرب فرصة

حتى تتبين ظلامة بيتي
وبس على اولادي كتبت اوصيتي
شيل نعشي يا علي وتعزيتي
الشيعة تحيي البايعت ذريتي




علي الفيصل

جاءَ نَصرُ اللهِ والفَتحُ بدى
يا منصور أمت

دقت الساعة والمهدي أتى
يا منصور امت

هو للثأر مُطالب وِعدا
يا منصور أمت

وسَيبنيها قِباب الغرقدى
يا منصور أمت

عالراية عالراية…كاتب على الراية
قد جاء أمر الله…للزهرة مشاية

يا ايها العالم……قد اشرق القائم
وأول بشارة اتگول……أظهر قبر فاطم



٢
اليوم كسر الظلع حتماً ينجبر
يا منصور أمت

ظهرَ السيف العزيز المُقتدر
يا منصور أمت

فترى الكُفرَ كَسَيلٍ يَنحدر
يا منصور أمت

في مَصبْ النار يغدي مُستعِر
يا منصور أمت

طباها طباها……فانيها طباها
مصلوبة فوگ اجذوع…زمرتها خلاها

صوت الثأر دوى…سيفاً بِما يهوى
للنكروا البيعة…ما صح أبد منوى



٣
فَلِحَ مَن كانَ يَدوّي بالعَجلْ
يا منصور أمت

قَدّر الله وما شاء فَعل
يا منصور أمت

جاء من يمحي رذاذ ام الجمل
يا منصور أمت

قائمُ الإمر بإذن الله حَمل
يا منصور أمت


يبنيها يبنيها……دولتنة يبنيها
دولة عدل حيدر…بس چفة يحييها

اتحقق وعد الله…بالكوفة من صلّة
الجاييلة ثار وياه…ياهو اللي يوصلّة



٤
كذب الطاغوت فيما يجتهد
يا منصور أمت

قد غَنىٰ الله بنفسي اعتقد
يا منصور أمت

أنني مُنتظُر الوعد بِجد
يا منصور أمت

وعلى الحق بأمري أستند
يا منصور أمت


أدركنا أدركنا……جاوبنة من صحنة
هذا أنا الموعود…وأدينة كل احنة

البيعة الولي العِصمة…كل احنة حدر اسمة
صلى عليك الله…يا خاتم اليِمة



علي الفيصل

١
انت الاول
دومك اعلة الصدارة والمواقف شعارة…فارس اول

ماكو واحد
نِدك اعلة الامارة قمة فوگ الغيارة…وتبقى الاول

شنهي هاي الوادم وانت بزرة هاشم كاسر گفاها
غيرة علي وحيلة ما يرضة عالعيلة ومسلم وراها
امحيرهة بفنونة وبفتلة امتونة امنكس لواها

اخذ حيل…من علي وابو فاضل
اخذ حيل…بالزلم والمراجل
اخذ حيل…خلة عسكرها مايل




٢
يابو طاهر
زيد غيض الحواجب بين آل ابو طالب…من تقاتل

والمراجل
خيط بيدك تحلها وكفو بس انت اهلها…من تنازل

يا زلمة يدنالة وعلى عمة افعالة وارث شمرتة
من شمر اچفوفة زلزلها بالكوفة حيد ابسطرتة
متفرد ابنوعة وشيم اسم طوعة لمن نختة

الميادين…طاح من طب ثمرها
الميادين…عرفاها ابگدرها
الميادين…صال بيها وكسرها




٣
ابو فاضل
چان اخية ورفيجة يعني كلش غميجة…الصحبة هاية

بيها تلگة
علي شمربية ايدة وين ذاك الرعيدة…بالمناية

يا صاحب الكافل فوگ الزلم صايل دومك كفوها
يمصفن الواهم وامخلي الوادم تنسة اسم ابوها
طب ابطن نيتة الابظهرة بزريتة ترجف لگوها

شواهين…تهوة صيد المعالي
شواهين…بالرگب ما تــُبالي
شواهين…گطعوا المالة تالي




٤
هِد عليها
الكوفة هية وزلمها فوت وافرك خشمها…يا نچرها

وخلي طوعة
اتهلهل اعلة الضواحي دوس دوس المساحي… وطگ ظهرها

اوجوه الزلم صفرة ابچفيتك الخضرة امخرب رسمها
من شد على الغارة خلاها محتارة هية وزلمها
كلش صعب يومة ترهبهم علومة وتاخذ علمها

ونعم بيك…يبو الصولة الرهيبة
ونعم بيك…هاشميتك عجيبة
ونعم بيك…جندليت النديبة



علي الفيصل

١
هلا بساقي المُخيم رب الزلم
كلف وصل علمنة ابعلو النجم
تعلة اعلة المُهر واتعلت بديه
رواياها الهواشم الف ونعم

شال الراية ودگها ابسد المسناية وگال اليوم الگصاية
سطرتنة اتعور بالحومة

هاي الساحة اتريد اليرهب بصياحة الحر اليكتل بجناحة
الصيد ايسولف بعلومة

عيد الهم يومك فوگ المعبر واخنگ واديها
عباس القادة ابصفك ريش وضل طشر بيها



٢
هلا ابشارب علي ورعاب الوغة
يصمصامك عجيب وعالطف طغة
أنگطع صوت الصهيل ومحد لكد
ابفنونك بالحرب محتارة اللُغة

شد احزامة وحل اعلة الطف ألثامة ابن امة اليثبت جدامة
لو شمر عالشط ازنودة

حيد اخوانة الشيخ امبين عنوانة ايطب ويرهب ميدانة
ما شال البالطف مصيودة

اشراع السادة وسطرة چفة اتدونها الحومة
عباس الزلمة الزين ابحيهن گاضي الملزومة




٣
مثل طبگ الرياگ الوادم طبگ
السمع نازل بوفاضل للطف شهگ
نفض عرج الهواشم بيه وارتعد
طلگ حرمة اببچرها الشافاه طلگ

يا خيالة التثبت لو تندالة خيرهم محتار ابحالة
من شافوا رعدن ريشاتة

فتلة ازنودة واتلوح الصيدة المريودة حيرها البالطف موجودة
ومن غار ابحيلة وصولاتة

أرياح الصرصر تجفل منك لو شلت انگابك
تتماوج هاي الوادم كلها امسودنها اصوابك



٤
كفيل وللمراجل طولة أنوجد
مُحامي اهل الخيام ابعزمة انفرد
گطع ذچر الزلم من شد الگمر
وخسف ظهر المهر من غار ولكد

شال ارحاها من هد عالگوم وعتاها اتميل الگوم ابمسراها
وايسير بالناس ابكيفة

حي افنونة وطولة وشارات اعيونة وحيل الشايل بمتونة
والحيل البين من سيفة

انت الماجاني اگراب السيفك يزماط احسينك
انعرف الوادم تسطر باچف بس انت ابعينك