١
خطف لوني غرام الماهو متواجد
يلوموني واگول ابعهدة متعاهد
قضيتنة العجل يا صاحب البيعة
اتخذنة الخط على اسم المنتظر قائد

صاحب امري في زماني وفوضت ليك الأمر
قائمُ النصر الالهي ابچفك اتقود النصر
مالة ذات وماهو طاهر سيدي الما منتظر

الحد يا زمان انتظر
گاضي العمر والصبر
چا يمتة يالمنتظر…بيك أنجمع

( ٣١٣ )
سيف اعلة ثارك غبش
هاا يالثار العطش…وية الضلع

عجل يمولاي امرك
باب وعطش ماي ثأرك يا داعي الله العجل

هيئة علي وسيف شايل
وابصفك انشوف كافل يا داعي الله العجل




٢
يراي الله القبل آدم والف مِنّة
انتظارك سُر ما يتحجم ابمعنة
بقيع أمك تجي وترفع مناراتة
ونلاگيهم كلمن گبتة وصحنة

هذا يومك وانت قادم والوعد چنة أقترب
بيدك اتحول القِباب امن الترابة للذهب
وبصحن زين العباد انطلب امراد وترب

من تِعتلي مُهرتك
تلگانة وي صيحتك
رف گلبي وي رايتك…قبل الهوى

هنيالي بيك أقتدي
وبيك أنختم وابتدي
يا سيدي ومسندي…ورب الضوى

چا يمتة مولاي اسمع
للزهرة مشاي أطلع…يا داعي الله العجل

موگد ثأر شاب حرگة
ابصدر اليحب هيچ تلگة يا داعي الله العجل




٣
أقم بأمرك وأرفع بيدك الراية
وعلى أم البنين اعلنها مشاية
ومواكبنة ننصبها بحجاز اهلك
واضن تدري الخدم من تحچي وفاية

كالنحل أهل الخدامة ابطلعتك الهم دوي
ونبني دولتنة العظيمة وكل حكمهم ينطوي
وعاصمتنة الكوفة تبقى ويبقة خطنة مهدوي

جُند القيام الخدم
والثورة عادتها دم
نرفعها دولة وعلم…دولة علي

والغرقد وغربتة
بيدك تدگ گبتة
وتفتيها مشايتة…وانت الولي

يا مُدرك الثار…عَجل
عالحرگوا الدار…احمل يا داعي الله العجل

خل نسمع الصوت…يدوي
فتح الله قد جاء…مهدي يا داعي الله العجل




٤
ولا يبرد دم البينك وبيني
برائي أسمي الولاية منهجي وديني
يجي المهدي ونهب وياه نقيم الحد
فكُد كيدك ولا عن عزمي تثنيني

باللعن خاتم هويتي وبالبرائة امن السُقف
الرجل كلمة التقيمة وبالمواقف ينعرف
والزمن چان اختبارك والعجل عبرت جرف

الما عجل ابطلعتة
وما قانع ابغيبتة
يتفند ابحجتة…وبكتبة هم

صحنة ابمجالس هلك
يالمهدي بيعتنة الك
مُنقذنا نتأملك…سيد الامم

بالمجلس اتشوف كلنة
يا داعي الله صحنة…يا داعي الله العجل

خط الموالات يمك
فخر الشعارات بسمك…يا داعي الله العجل



علي الفيصل

١
اقرأ…ابمحتوى التنزيل
أقرأ…من صحف وانجيل
اقرأ…عن سراج النيل
اقرأ عن وجود الذات وعِلة وجود الكائنات

مية وأربعة وعشرون
مِن طه ومِن ذا النون
الكُل بالولاية ايجهرون
خص الله قانون الولاء فحوة نزول المُرسلات

بَرِحَ الخفاء وانجلة
وطارق الحُب اعتلة
صوتة توحيد ومِلة العالم ضوى

والرواسي السُيرت
والبحار الزُجرت
من علي واسمة ابتدت حتة الهوى

نزل وحي الله ندائة معتلي
بكلاماً يخشى منهُ الجبلي
لا ولي الا فتى الله علي



٢
أتمعن قصة المِعراج
يا حُب بالسَحر وَهاج
تاج الكل الرسالة وباج
نافذ بصيرة الله چان وبوحية كل علم الكتاب

كل مُرسل وما وآلآه
ثق هذا مو ربة اوحاه
سر الكل وِصال الله
الينكرها الولاية ايصير مُنكَر الى يوم الحساب

اسمة بالطور انبثق
عطرة احلى امن العبق
للعشگ ناقوسة دق…مو للحرب

فطحل الله الأشم
اعلى من كل القمم
أسمة عاللوح انختم…معناها حُب

يبدي بيك الراد حسن الخاتمة
رايتك بيضة مثل لون السمة
أنت اول سر وصول الفاطمة



٣
ينبع من وحي الآيات
الامهدم هُبل واللآت
اعجوبة ويثير ألفات
امحاربها الانس والجان وبسيفة فتح الله المُبين

السر العظيم المخزون
ان قال للشيء يكون
دُر وبالفعل مكنون
سُبحانك چبير اهواي يعجز وصفك التدوين

علي عالي ومؤتمن
علي يا جنة عدن
علي مسرة ابكل زمن…لاهل العلم

علي ماي وما يشح
علي نور ومتِضَح
علي الصدر المنشرح…لاجل الامم

أسد الله أمير البررة
منبع الدُرّ وجود المفخرة
آية الله العظيمة حيدرة




٤
لازم للسفينة اشراع
يقطع دابر الاقناع
بالدم حُبة ما ينباع
الما حب علي في كُل زمان منبوذ من دون الرجال

قاضي ومُظهِر الإعجاب
إن لَمْ يَـكُـنْ لم يَـنّآب
رب حُبي دون استرباب
العاشگ اذا مسة الهيام يتخطة كل حد للمحال

كلمن ايحب يحترگ
حب علي رايد صدگ
أول وآخر عِشگ…ما يبتعد

علي ديني ودُنيتي
علي يا سُر نشأتي
علي خالق طينتي…طينة عبد

سلسبيلك دين بالدم ينكتب
ابلا أرادة اعليك كُل شي مُنجذب
يا دليل الكل حبيب ومغترب


علي ألفيصل

١
بسم الله نبدي ونقرة صُحف المراجل
نقرة ونعاين ضِدة مامش مُنازل
فقارة بُركان وخزرتة الصواعق
وبزندة حرز الزهرة لمن يقاتل

شال السمة ودگها على الگاع
من طب علي طم صيت الاسباع
لو ضهضب وغيم على الگوم
شاراتة تطلع چن ضوى اشعاع

دگاها بعد ايدي دگ
والعرب شبعها طگ
يا زلمة الله الگوي
واچفوفة تارسها حگ

يزهقُ الباطل في انتقامة
ضربة الحق ضربة حُسامة
فارس الهيجاء المُحنك
يرتديّ اسمُ اللهِ لامة




٢
حاجبة اليذبح چنة شفرة حُسامة
مِن شارة اعيونة تصير القيامة
يصهل صهِيل الخيل التلمحة عينك
لا عانن اجدامة ويفر ابزمامة

يا قسور وفراسة يمناه
غطاهن السبعة علي الواه
والجابة حضة اگبالك يتيه
حتى اسمة من گد خوفة ينساه

ما يلگة ملفى بأرض
ماليها طول ابعرض
طولك يحادي الزلم
مو بالسهل يِنفض

لا يضاهي الحيدر مبارز
كفهُ قد هز الركائز
هوو علياً ليثُ الملاحم
من فِعلهِ تُحكى الرجائز



٣
ابلون السنابل وجهة اليلاگي حيفك
ومن تشهر الصارم يعمهم خريفك
سقر الله بعيونك يبين لهيبة
وريشاتك اتشابه ملامحهة سيفك

يا فارس الله وعروة الدين
حاير شوصفك وانت ابو حسين
اليخلف الكافل الة اشهود
روس الزلم الامثگلة صِفين

چفة سطار العرب
والطه عِز الطلب
يستلذ بالموزمة
هذا شراي الرگب

كل فتوح الدين المُبينة
قدد اتت من عرِقة جبينة
سرُ ربي وأمان أحمد
وكنوز الله الثمينة



٤
يا سورة الفتح وعظيم الجلالة
الظاهر الباطن سهل في وِصالة
الله ابكتابة اووحية يذكر مقامك
حُجة حجج خلقي واصدق مِثالة

الحق هو والحق مع الله
سر للرسالة ربة أوحاه
سيد وصيين الله ابو اتراب
بس الله يعرف شنهي معناه

عالعرش لمن كتب
الله بحروف الذهب
لافتى الا علي
هوة عبدي وانة رب

العابدُ الزاهدُ في العِبادة
سيداً تحلو لهُ السيادة
باسلًُ مغواراً مُجهاد
يسري في الشُركِ الى الابادة


علي الفيصل

ليلة قدر والقدر مكتوب
ياهو ابصلاتك عنك اينوب

وين الحسن خ ايحضر اچفوفة ودمعتة
ويفتح مضيفة ويگعد ايعزب غربتة


١
يبومحمد يراعي الهااك مد چفك يالامعزب
هالمرة الچفوف اتشيل مو زادك اذا ترحب
تشيل ادموع من زينب ونعش بيه موقف المغرب
من يطلع تشوفة الناس ينهب بالضوة ويسلب

جية المغرب بالنعش ذاك
يا علي جايّ ايحمل اضواك

والنعش عن زينب خفوه جابوه سكتة
ويفتح مضيفة ويگعد ايعزب غربتة




٢
اجة وحط النعش وايگول يومك كون ما شفتة
اجة مو محني ظهرة اعليه لا محنية سالفتة
وكت والما تشيلة الگاع لوح اخشاب شايلتة
يا عيش الهني اخلافك بعد بس الحزن ردتة

حتة النفس بفراگ ايموت
وارسومي راحن هنة والصوت

وحيلي اعلة تابوتك وگع بالآه فگدتة
ويفتح مضيفة ويگعد ايعزب غربتة


٣
گعدت اگبالك ابلا راي أجر حسرة واناوبها
اذا سألتني زينب وين حيدر بيش اجاوبها
افراگك خلة بية هوااي آه ودمعها ساچبها
آنة ايسموني راعي الخير بس الدمعة طالبها

آنة الامد للكل سِماطين
بفراگك اطلب دمعة العين

مو بس دمع موت ابعجل عگبك طلبتة
ويفتح مضيفة ويگعد ايعزب غربتة

٤
حدر نعشك احط يا گاع خاطر تحمل اتشيلك
الدهر والموت خلة امتون يا حيدر تتچيلك
وأجت كل اليتامة اتصيح هم ننطر بعد ليلك
اذا قِل الخبز والخير نجي الگبر نشاكيلك

يا بوية احنة الصرنة أيتام
وبدموعنة اعلة افراگك اننام

بالبيت ماكو ابلا دمع الينام شفتة
ويفتح مضيفة ويگعد ايعزب غربتة

علي الفيصل

علي ألدر المُصفى الكون كلة ايقر
علي ابجيت الحسن خلف سرور الدر

الحَسن شگة شمس من علي وقيس اضواه
الصبح ما طر بعد وجه الحسن الايطر

مو كارورك سووالة علي ديوان
طولة امن العرش واصل لآخر بر

وكبر والشجر ضل بالديرة ما ينشاف
حرگ يابسهة كلة وكور المثمر

وفارش للعلم سفرة أعلة گد النور
ومن وحي ألزچية ابمجلسة ايفسر

ومن باب الشجاعة الوصف ما نحتاج
الطالع من علي اشتلگاه من يسطر

واكدها ألرمح بالجمل من خلاه
شاهد عن ابو الحسنين شيبزر

وسُبحان الله مدري اشكثر يرسم بيه
الگمر يم طَلِتة ايحمل الضوة ويدبر


علي الفيصل

ركن وصل الإله الليلة ينــطَر
وبعد ياهو اليُجيب اليدعي مُظطر

انطبرت هامت الله وفَرّع ألدين
والمعروف راح ويطغة مُنكر

والمحراب شنهي ابلايا ابو حسين
تخنگ حيل عگبك لَيْلَةُ الْقَدْر

وما دام النفس بعدة ابعلي ايدور
سَلامٌ هِيَ حَتَّى مَطْلَعِ الْفَجْر



آجركم الله بعلي💔

صَبّح محط جدم الرِحل بفياي الأرماح
عطشان ضعنك من مشة وذباحة الاصياح

چان الصوت
بأذن المشن مثل الموت
والهودج الهن تابوت…چان الصوت

١
بدت قصة غرب تلتم
سولفها العطش والدم
آمراياتك علي اعلة النوگ
وجههة اعلة الثرة امهشم

مشن لاچن مشن بس العباية
اشتضل يا عافية وصارن سباية
اليعوف اعلة النهر عشگ الصِبة ايموت
يضل عطشان عمرة ويجزي ماية

طبع اليفارگلة گمر يستاحش الليل
ويموت بعيونة الضوة وعالمامش ايميل

راح اضواي
صاحت يلب هاي وهاي
يا مايي باگك الماي…راح اضواي


٢
ينز بيهن ضمة العينك
احذاك ودورن وينك
الحبل هين كلف فگدك
گدتهن ليك بونينك

اليشوغ وينچفي ابهمّة اعلة الارماح
يفزع يا رمح لجروحة لو صاح
تتلگاه غربتة وذيچ الاعيون
الابچفة الحبل شيعينة لو طاح

بالغربة ضل حتة الهوة ايحط عينة وايفوت
بالشهگة صاحت يا هلي ما عدها كل صوت

راح الحيل
فك حزنة برسومي الليل
شِمآتة بالشوف اتعيل…راح الحيل



٣
نشغ گلب الضعن لهفة
جرح بس بالدمع يشفة
الفاگد ينتظر بالليل
على هلبت حلم يغفة

اليتاني ومالة أخو الايصبر وياه
يعاشر غربتة وامناشغ الآه
المتعود يكحل عينة بعزاز
يعوفونة ويضل حتة اسمة ينساه

يا فَيّ هلك رد للضعن واروي المداليل
متعودة زينب عالخِدر مو مشيت الليل

رد وشوف
العافالة عالشط اچفوف
امن اولاية لولاية ايطوف…رد وشوف



٤
المُدن عگبك تتانيهم
ابثوب احمر تلاگيهم
صوت الشام طلعوا عيد
أجت بت حيدر اعليهم

تطب والوادم اتلاگيهة بالماي
هذا الخلة اخوچن عالرمح جاي
وتعاين زينب وبيها الحِزن كود
تصيح الله ولحد محد وياي

يحسين تدري ابطيحتك بيها الدمع فاض
ويا رايحة اختك عالهزل يا رادة اركاض

آخ الشام
مدري شبعد ليهن ضام
سوگ وحچي ايطيح اسهام…اخ الشام



علي الفيصل

أبدي بسمة ابشيبتة ابعلمة الجليل
أنقل العشتة ابوِصالة امن الحياة
*
*
شفتة واگف عالهرم رُغم القليل
ابزمن راعي الشان حالة امن الحُفات

صَلّة ابزمن بيه السِجَدْ ينولي
وما صَلّة بس لا ثورة چان وفِكر

صَلّة أبزمن ما بيه حكم مِن علي
وبس منبرة ابمنهج علينة يقر

چا ليش بس صوتة اللِذي يعتلي
وكل العمايم سَلّمت للأمر

چان بس هوة المُثابر في سبيل
يحيي أمة اتمهد الركب النجاة
*
*
چان بس هوه المواجه والدليل
چنة صوت حسين لَمّن داعة مات

لو مات صوت الدم يسولف يضلّ
والثورة تشهد للثبت موقفة

ومن گال (كلا)انخلست اهل العَگلّ
كلمن عباتة الحوزة متلفلفة

اللِسن تِگصر من يزيد الثگلّ
وبس صدرة شال الثورة والمعرفة

چان ما يهتم منو الضِدة قبيل
قادم وما شفتة مارس ألتفات
*
*
هاشمي وما صار وقت الذِل ذليل
بالعكس يفركهن أخشوم الطغاة

معنى الشجاعة ومُختصر (للزلم)
مرجعنا زلمة وزلمة گول وفعل

مثل الرواسي ابريح ابد ما يهم
ابوكت المواقف عالشدد يرتجل

هوة اعلة ناگة ثورتة مبتسم
وذيچ العمايم صاعدة اعلة الهِزل

ومن رحت ضل جدم شيعتنة يميل
بين ساكت بين جوة أعصِيّ الرُعاة
*
*
للأسف مولاي نكران الجميل
هوة هذا الخَلّة شيعتنة شُتات

علي الفيصل

١
يا عِصام اخيامي ويا شعاري الدامي يبو فاضل

يا أمير وساقي ابكلشي كلش راقي يبو فاضل

انت رب الغيرة وانت للحب ديرة يبو فاضل


حامل لوائي وغيرة الله بجبينك
زلزل بوادي الصحرة تسلم يمينك
ثلثينك الحيدر يموش الخوالك
يعمامة العزة ويكعبة حُسينك

بالخيمة محلة اعيونة
بالحومة كلفة افنونة
حيل الله حيل امتونة…ماچن ولا رد

صگر الوغى امن اجناحة
ما شايف الطف راحة
ذَرة الزلم مرواحة…بالحومة لو هد



٢
يا قراري الحاسم يا قمر بني هاشم يبو فاضل

رايتي ابميدانك تفخر ابعنوانك يبو فاضل

اسمي كلة وصيتة وحيدرة وتربيتة يبو فاضل

نذرتك امك للخيم چف مُحامي
وامفصلة عينك جربة تروي بخيامي
يا سلسبيل اعيوني يا نهر اخوتك
يا كوثر الحرة وخدرها و سلامي

ليثُ الشرى امبچيها
مثل المطر چافيها
غيمة وخزر واديها…بركانة يلهب

صدر الحچي وراعية
ما خابت البدوية
ضمتة للحربية…ويحامي زينب




٣
يا هلا بريشاتة چن علي بحملاتة يبو فاضل

للمخيم كاهل للمراجل كافل يبو فاضل

منبع الوفاية وللمواقف راية يبو فاضل


حي الله اخوي ورايتة الترعب الطف
گلبك ختم حُبة ابعلي وبيه تِشـَرَف
شاب ومُقاتل قائد انت اشحلاتك
حاويها كلهة الزينة صعبة اتوصف


بعيونة ليل وگمرة
وبغيضة لون الصحرة
والشارة تطلع حمرة…كون ايتنافر

شيخ ومضيفة الحومة
ويعزب امن اعلومة
وين الكلف عد گومة…خلاه يشاخر



٤
هذا اخوي وحيفة امبين ابحد سيفة يبو فاضل

حاجبك چن صارم طيح اشگد وادم يبو فاضل

زلمة من اخيالة تشرد الخيالة يبو فاضل


عفية ابن ابوي اليستلذ بالحرايب
غار وتهلهل لاجلة كل النجايب
ما طلگن ايتعبن يجيبن مثيلك
انت الوحيد التشبه ابن ابو طالب


حيدر نعاين طولة
بالحومة نفس الصولة
كون ايتعلى اذلولة…ايهد الرواسي

شحچي وشسولف عنة
نار الله تبرد منة
ما خيبنة الضنة…رافعلي راسي



علي الفيصل

يمة اگلك
هااك دين اهلك وروح افخر بنسلك
گول أمي انطتني دين
وامي چانت مو نبي
عدها فطرة اتشوف حيدر كلة (دين)

عاگدة بشيلتها عگدة
آنة حسبالي نذر يگظي الها شِدة
ولنها گالت يمة هاي امراد تاليتة عطيتي
اشما اصيحاً يا علي اطاني اعلة نيتي
وچان تارسها ابو حسين

يمة وآنة اسگيك مني
حُب علي.. تالي الحِليب
يمة اريدك تكره الدنيا بكبرها وبس علي اتشوفة حبيب
وانة اهز مهدك والولي (ابيا علي يا علي)
لان تالي الدنيا غربة وبس علي الگلبك جريب

يمة دومك شيل راسك
يمة دومك ماشي الايحبون حيدر
ذول تلگاهم غيارة
واليسألك
گلة امي اتگول ذول اُولاد جابتهم عِفيفة
وحُب علي سر الطهارة

ويبني لا تغفة اعلة ذكرة
الينسى حيدر ساعة ما يسواش ذكره
الينسى حيدر ساعة ما يلگالة عِبرة
يمة تالي اتشوف عينك
انت گدرك وين من تلهج بحيدر
واليضدك وين ذكرة

يمة ما اگدر اوصفة
حُب علي كلش چبير أيريد ناس اتحب تعبها
أيريد الاگلوب التِنَديّ امحبتة امن اوجوه سمرة
يمة حيدر
شفتة يهوى الناس الاتحبة عالفطرة


علي الفيصل


#انا_غديري

١
ابباب الخيم صار الغدير
والبيعة بالدم حُب چبير
وطه الحُسين وشال اديه
والكافل ابدور الأمير

حامل لوائي انت يا اخي الساقي
كلشي يزول واسمك ابفعلة باقي
وحدك شريك العصمة واكبر دلالة
عين أمي انت وراكب اعلة البُراقي

أحدًُ أحدْ موقفك والعلم
صَمَدُاً صَمدْ ترجمان الشيم
زلمة يصير الصاح بسمك فقط
المدد المدد يا ساقي الخيم



٢
فر ايدة حب ايد الحُسين
واتجسد الحُب باليقين
ضل للخيم گلة انت ماي
وآنة افرس اسياد العرين

طبلها غاضب يفتل ابهالشوارب
وياهو اعلة عين الزهرة يتسمة حاجب
مثل السنابل لونة صار اليفكر
ينزل يقاتل وانت بالحومة غالب

مو طين ابد چفة مِن السقر
وهذا العدد من خيالة اندثر
مثل الشمس زال غيم العدة
وبسيفة حد اسرع امن النظر



٣
حانت بعد ماضل سلام
والسبط نادى بالقيام
داروا مثل جمع اليهود
وصارت مدينتة الخيام

لا خندق الينفع نحفرة ابمخيم
وابشر يطه الطف جمعهم مُحَطم
والراية منطيها الكلف مو مُكلف
المخلي روس الدنيا تحت المُطهم

جَبِلُاً أشم يلوي كل الرگب
ابچفة العلم سد هواها العرب
رف عالزلم چن لواء الحمد
لاهل الخيم چفة عِز الطلب



٤
اهل الخيم من نصبووك
شي حيدر ابكلهن لگوك
ساقي وكفيل انت وامير
يم تاجك اتطخ الملوك

بيعتنة بالدم بيعة الطف شريفة
العودك خوالك صاروا اهل السقيفة
هاي الولاية ابرايتك يا ابو فاضل
ونصراً من الله وفتحاً حليفة

سُلماً لِمن رايد الطاعة الك
حرباً لِمن لليعطش هَلك
اشهد يربي علي بايعت
رب الوفة والوصي والملك



علي الفيصل

١
حسرة اتلاگت بحسرة
وثكلة اتحاچي بالثكلة
النريدة انشوفة بالعثرة
موش ابسرعة نندلة

الرباب اتگلها ابني بيد ابوه راح بضمة وحر
وليلى اتگلها ابني الوحدة راح وتِطشر

شوغة شوغة اتبدن ابگاع المصيبة
دمعة دمعة اتسولف اعيون الغريبة
ويلي ويلي يا گلب ضل ليه حبيبة

شاء الطف بأمرة ايموتنة ابعذابة
وياهو الما فاگد لو هين مُصابة


٢
نظرة اتناشغ ابنظرة
ودمع كل ذِكرى ينزل شط
تعب ليل الربة ابصحرة
انشال وعالرماح انحط

شسولف يم الاكبر عالرمح مو گد مقاسة
ادور يم ابوه هلبت سهم يحملي راسة

غربة غربة…ابثوبي نار وامشي ادور
حيرة حيرة…امن الگة غالي ابجسمة اعثر
بلوة بلوة…ضاگت وانة امشي بالبر

عاد انة ابني ازغير انتي ابعز شبابة
وياهو الما فاگد لو هين مُصابة



٣
گمرة انذبحت وگمرة
وظلام الطف نشر خيلة
بعد ما يستلذ عمرة
اليشوف اعلة الترب حيلة

شسولف يا رباب امن العطش تالي انروي ابدم
قمر ليلى اليشع بين الخيم بالذاري ينلم

گطعة گطعة…اموذر وياهو اليلمة
شمعة شمعة…اتلالي دمعاتي انة يمة
هظمة هظمة…نحرة وين ارد انة اشمة

شمس الله ابخدة وطفوها ابخضابة
وياهو الما فاگد لو هين مُصابة




٤
الضنة يذبح هلة ابهجرة
وهلة ماترا بقينة احنة
جفاهم بالگلب جمرة
ما تطفيها لو مِزنة

وكت خلة العطش يذبح شملنة ابلا خواطر
نروح اعلة الهزل گوة التضل يسحگها حافر

تالي تالي…الدمعة تعمي النة النواظر
كسرة كسرة…اتدوس بينة چن حوافر
يمة يمة…اثنينة انصيح ونكابر

كاتب النة الله الون وسط الخرابة
وياهو الما فاگد لو هين مُصابة




علي الفيصل

هايلّة يا مضمام ابوك الهاليوم هايلّة هايلّة
يدريك ابو محمد توفيلة اعلوم هايلّة هايلّة

١
هايلّة يبني الدنيا ضاگت بحسين هايلّة
غير اعلة جنح الريح واسطر كل عين هايلّة
لك لامة امانة ومعضد ايشد چفين هايلّة

من عودك هاي اعمامة
وياهن سيف ولامة

وادريك يبني اعلة الحرايب جيدوم هايلّة هايلّة



٢
هايلّة جاسم ما ردت منك ماي هايلّة
بس ردت تنطي اعلوم من حگ ارباي هايلّة
عمك وحيد انغر يبزر الغزاي هايلّة

يبني ارفع راسي بيومك
هد يالناشف زردومك

وخليه فحلهم من سطرتك مندوم هايلّة هايلّة


٣
هايلّة يبني اعلة النسة ارد افخر بيك هايلّة
عرسك جزيتة وللحرايب نطريك هايلّة
شوباشك اسهام العدة اطيح اعليك هايلّة

فعلك ما خيب ضنة
عوف العرس والحنة

كون الحنا ابچفك ترايب وادموم هايلّة هايلّة


٤
هايلّة يا تالي الضنا العمك غير هايلّة
والموت حگ واجب ولو انت ازغير هايلّة
بس لو نغرت العمك اتصير اچبير هايلّة

عالموت اوليدي اشزغرك
لاچن بالحومة اشكبرك

خليني اگولن فدوة الك يالمضلوم هايلّة هايلّة




علي الفيصل

١
سارج مهرتة الشهلة
وعالغيم راسة يتعلة
وزينب صاحت بمگفاه
حياك خوية ابو فاضل

شعرة اوية هب الريح فلها الجدايل
متعلي شگرتهن رچيب الاصايل
شفنة الخصم يقرة اعلة روحة العديلة
من يسمع ابعباس نازل يقاتل

وحسين…گلالة حارب
عالموت طب صدرة راحب
يا ثار ضلع امة طالب…عباس

بركان…بعيونة يلهب
ماهاد لوگتلة زينب
للثار وبحگة يطلب…عباس


٢
اشمحلاه طولة وافنونة
امكحل الخيمة بعيونة
وهاشم گالوا ابحگة
عباس شيخ المراجل

مغرب يحول اعلة العساچر بريجة
يظفر رسنها ابچفة يوم الضجيجة
يتخير اخيار الزلم و ايعگبها
وخلاه فحلهم للمداين بغيجة

مزيون طولة اشحلاتة
وبالضيج نخوة خواتة
بالشوف تلمح غلاتة…عباس

لو غار شحچي اعلة حيلة
ما يوم غدالة عيلة
فصام ظهر الثگيلة…عباس


٣
غادي ابسطوة اجناحة
وناثر طفها مرواحة
جيب الزلمة الايگبلة
لو غاض ياهو الاينازل

شوشگ نسلها وگلگلاها الفوارس
والعندة صوت اشمالة بالحومة خانس
تيه علمهم من رجز بالمعارة
أني أنا العباس رب العوابس

يا زين بيكم يگبلّة
بيه حيل عود ويگلّة
للدوم محد وصلّة…عباس

خيال گومة وفخرهم
بالصيد سابگ علمهم
عباس هاشم نچرهم…عباس



٤
يرهب من يشن غارة
اچفوفة امعزبة سطارة
امحير الدنيا بأوصافة
من كلشي الگمر كامل

حِسنة وصفاتة وعلمة حل الصعايب
وبزهدة وارث علي ابن ابو طالب
جايبتة حرمة حسين عدها الديانة
والهالسبب عباس فاق العجايب

سُبحان أمة ولبنها
التنخاك وتصير ابنها
أمك لا ماكو منها…عباس

شفناك للخوة راعي
وللدين بالدنيا داعي
گضاي كل المساعي…عباس




علي الفيصل

١
عگب نار الخيم والفزعة
الاجتنة الما تفرق احد
نطوف اعلة النهر وانكابر
صبح چف النهر مرقد

من صار الحرگ ستر الله بالخيمة
طلع من شوغتة وضيمة من فيّ الله للهيمة…تشيلة

رگضن والزلم لاگتهن املاگة
وحبلهم فَـرّع أشباگة من وضحتنة للناگة…الهزيلة


٢
بلغ للشاطي حد ركضتنة
الخدر حگة اعلة كفالة
نشوفة ابدمة ضل يتلوة
الركض بالحومة شل حالة

الما شافاها اخوها وتركض ابحومة
شني ايعينة على الگومة اذا غرگان بدمومة…وجروحة

ايتگوة ابلا چفوف وحيرتة حيرة
اعلة زينب گايل اچبيرة وعلي مو كلش ازغيرة…اعلة روحة



٣
يبعد السلهمن بفراگك
يبعد اهلي اشبقة امن اهلي
چنت گبل الهمس الگاكم
شجاكم محد اوصلي

اول تالي احشم والستر غاية
طحتوا وطاحت الراية واجتنة الگوم غزاية…وگوية

نسوان اشبدينة وخاطر انردهم
ولا واحد نهض منكم طحتوا اعلة الترب كلكم…سوية


٤
ولتنة الوادم وما گاموا
الاهل لو ما اجو صعبة
اجة الحادي ابهزل وابحيلة
وبدت قصة السبي ودربة

وصعدنة ابنوگ عرجة وكلفة ممشاها
ابغرب ماعرفة منواها اختكم محد وياها…هضيمة

وبدت شمس الضحى لون العبي اتبوگة
وبنات احسين مشبوگة ازغيرة اچبيرة مخنوگة…هضيمة




علي الفيصل

١
مثل ما فاك گلبة الملگة خطارة
لليبغضون حيدر فاك بتارة
حل خيط المعصية ابچفة حلاها
وأبو الحسنين چان الحسن فقارة

مُقيم ألزلزلة
عظيمُ المنزلة
فتى ألحرب هوَ
مُقيل المُعضلة

ابمكارم معتلي
والاول عد علي
الحسن رب الحِسن
ولي ونعم الولي


دُر من فاطمة اعيونة
عابر جيلة ماعونة…واصل للسمة

سُبحانة طول القامة
هيئة علي ابهندامة…مُهجة فاطمة




٢
اذا حيدر يعاين للصليل اشتد
يگلط عالثگال اعگال ابو محمد
ما محتاج حيدر واحد ايجاريه
بس رايد يوضح حيدر أشوّلد

كصوت القارعة
يُزيح الزعزعة
أذا في القوم شَدْ
تُقل المسمعة

أثر بيهم طبع
ولا زلمة الطلع
البزر الابظهر ابوه
أبوه وابنة أنشلع

حار اطلابتة اطلابة
سيفة امطلگ اگرابة…ترباتك علي

سطرة چفة طرگاعة
يا زلمة الوصل گاعة…غير ابن الولي



٣
اهي امن الله الچبير اتنومس اعلومة
وچبيرك يا علي اتريس على الحومة
شنو ايردة اذا چانت يمنتة احسين
مغضب يرهب ومستبشرة ارسومة

بوقعِ أم الجمل
أناخَ بِما حَمل
حميراء الفتن
فناها وارتجل

انة ابن الما يرد
أصم صَمّ العرد
حرز من فاطمة
علي ابزندي يشد

حطة بسدرة واتباها
نوخ هوة وياها…أم الفتن

دخيلة يا علي دخيلة
ابنك حيلك ابحيلة…مهيوب الحسين




٤
دحاها العاديات ابفتلة امتونة
امذهب سيف والشافة صفر لونة
نثر محصادها وكوّر رفايعها
الجبل يهتز واهو ما ترمش اعيونة

فقادَ مَن كَفّر
الى دركِ السقر
هو الليثُ الابي
ومِن فارس مُضر

كلف حيلة كلف
يُعد بچم ألف
اذا يغضب صعب
ابو الملگة الترف

مِنة الحومة ميالة
لو بس لمحت اخيالة…ما تركد أبد

وچفة المحد اليردفة
زين ويعشگ الكلفة…گضاي الشدد



علي الفيصل