يساجيني
أمد چفي أرتوي ابمايك
انة الضايع ابحلگ الناس
گد ما لذت بفيايك
انة المنك والك ما ساوماني اغروب
شي كل صبح شرايك

انة اليعطش أنُس ليلك
آنة اليّمك وما شفت لون الناس
شي آسرني كل حيلك

جبت كل عمري واگف وانت احنيلك
جبت عمري الزم الشباچ واشكيلك
انة اليسمع ابزينب واركض ابچيلك
اعلة كلهن صايح ادخيلك

انة المنك والك ديني
انة اليتذلل ابابك رغم ما كلشي منطيني
يتارس صفنتي وعيني

طفل گلبي ويضيع ابساع بعيونك
اضيع واسمك اعلة اسمك يدليني

يصاحب خاطري وكلشي

انة اللو زاد حملة ابابكم نواخ
احط اسمك درب واعلة الدرب امشي

انة بالطيف شفتك ما غمض رمشي

وارجعلك الضامي الميت الملگاك
آنة المادلك كل وكت چفيني

يتارس صفنتي وعيني

قَليلٌ مِنكَ يَكفيني


علي الفيصل

ليالي الفرگة ترسم دمعتي اعلة البوب
اليفارگلة عِشگ يگظي العمر منهوب

ابدليلي افطور حايط طين
اشيردچ ي ام حسن وحسين


١
الشيب دچ موش ابلحيتي الشيب دچ بظامري
فجة مو كسرة ابفرگتچ وشيسدها ابخاطري
حاذري ايطول الامفارگ ي ام ضحكتي حاذري
كلشي ظلمة اخلاف عينچ ما يطَيّب ناظري

غيابچ لا تعوديني عليه چتال
كثر ما دنگت عالبير صرت اهلال

تِحـَدب واهس العشرين
اشيردچ ي ام حسن وحسين



٢
فاطِمَــة يا وجه ربچ گوة اديراً راسي
شاخت الآخ اعلة صدري ابروح أجر انفاسي
الدنيا لو مابيها عينچ غربة يا كل ناسي
الناي لو ون من حنينة وآنة اون بأحساسي

الونين ابروحي عگبچ جازي ون الناي
يا تالي العِشگ وأول سهم بحشاي

علي صار الصبح ليلين
اشيردچ ي ام حسن وحسين


٣
اشما افتحة الباب يفتح طر چبير ابروحي
الگاع لو كزبر جِلدها من صِليل اجروحي
الصوت ذابل گبل عودي وچمليتة ابنوحي
آحاه يمن ليلة افراگچ حدبتلي اسفوحي

الدار ابلا ضواچ الظلمة بيها اتعيل
عالمامش علي بجفاچ ضل ايميل

كسرتي من علي أجناحين
اشيردچ ي ام حسن وحسين


٤
آنة اول فاگد اعلة الملگة تِلگاه ضامي
الليل يلفي وعمري يگصر دمعي لاح اجدامي
النوم شح الما يجيني ابضحكتچ باحلامي
شوغة شوغة ابلايا صوتچ تگضي چنها ايامي

ألموت ولا وحشتچ لو لفاني اغروب
شوگي امن السهر موش الجفن متعوب

الفجر لونة ابجفون العين
اشيردچ ي ام حسن وحسين


علي الفيصل

١
ذو المَعرِفة العجيبة
والقُدرَةُ الرهيبة
والقامةُ المُهيبة…ولي الله علي

ذو الحِنكةَ الرصينة
والعِدةُ الكمينة
وليُّ الحق وأمينة…ولي الله علي

يسبحان جبروتة القلع باب باصبعة و قلع عرج الارض
عليم ابلا مُعلم شجُاع وما تخاذل يشد طول ابعرض

واستقام الدين بحسامة
وبقرارة اتقوم القيامة
ضيغم الله وبعل فاطم
ماكو اي نِد صاير امامة

ولي الله علي ولي الله علي…



٢
الراسياتُ تَندك
في الحربِ إذ تَحرك
القائدُ المُحنَك…ولي الله علي

اولَ القومِ يُنازِل
إذ هاجت المَقاتِل
الفارِسُ المُناضِل…ولي الله علي

اببدر تشهد رگبهم ب اُحد يشهد جبلهم شرط سيفة شرط
والايشوفة ايتحير يرد سالم بعيدة نعام ابراسة غط

ابن ابوه التِنشف لهاتة
تلگة حيدر ماخذ حياتة
سيفة ما يشبه طگتة بالحد
احچاية وحدة ويلبس عباتة


ولي الله علي ولي الله علي…



٣
الطارِقُ المُبَجّل
والباعِثُ المُكلّل
كامِلاً ليس مُكَمّل…ولي الله علي

يا درةُ العِبادة
يا معقل السيادة
والمُبتغىٰ جِهادة…ولي الله علي

حكم چفة الاراضي وسماها وكل فلكها ولي ونعم الولي
شبع طيرة ابزمانة والاجبال وثمرها اعتلت من چف علي

خيرة مالة اول مالة تالي
خيرة مثلة اسمة ابكلشي عالي
الدنيا صبخة وخضرها چفة
چفة ينطي وقط ما يُبالي

ولي الله علي ولي الله علي…



٤
يا فِلذة النباغة
والفَصح والبلاغة
يا مُبهِرَ الصياغة…ولي الله علي

يا عِزة القبائل
يا جوهر الرسائل
يا لُـبّة الدلائل…ولي الله علي

اسامي الله ابصفاتك علي باب المدينة وعلمها ابحوزتة
والاسلام وكتابة ألنزل طه يبلغة العلي وذريتة

سلماً اوية الشايلة راية
وحرباً اوية الضد الولاية
المولى بس حيدرة ماكو مولى
ماكو واحد جوة العباية

ولي الله علي ولي الله علي…




علي الفيصل

١
يماخذني بضوة عيونك
أنة الميت على اضعونك
بهت كلشي ولمع لونك
حلى بعيني

لگيتك صاحب اعيوني
الچبير السادها اديوني
فضل والناس يدروني
الك ديني

لگيتك بالعشگ دنيا وسواليف الصبا ابعينك
العشگ دين اليحب اسمك وانة وگلبي على دينك
يتارس روحي بمغازل گلب ينبض نياشينك

بس انتة تحلى ابعيني اشوفك
كعبة غرامي ابعشگي اطوفك
منطيني كلشي ابلايا مُقابل
وينبض دليلي شفتة ابحروفك



٢
گدتني بدمعي لعتابك
علگ شديتني ابابك
عمر خلصتة ب ارحابك
يفي روحي

درب بجروحي خطيتة
الجفن عالدمعة ربيتة
فتحلي اجروحة وانطيتة
انة جروحي

جبتني من العطش للماي صحرة وترتوي بجودك
وصرت (آنة) والية امچان رغم ما خاذل اوعودك
ذابل كلشي گبلك چان ريع اسنيني من عودك

يابو نعمتي الما صح مثيلك
گلبي ابحماك وصايح دخيلك
جيتك مُناجي اتلمني بحنانك
وتنطي اليطلبك لو ما يجيلك



٣
يضل عطشان الايعوفك
وعطشنة وطحنة بجروفك
وسگيت اعيوني بچفوفك
دمع هايم

آنة البس هذن عندي
حزني ودمعتي ابخدي
يبلسم كل جرح يّـِدي
وتضل دايم

عشگت امناطرك باليل سيرلي بحلم مصلوب
طيفك من يمر مولاي يلگاني بشر متعوب
اليلهف على عيونك صار حيلة من العشگ منهوب

تلگاني ضايع دلاه غرامة
ويروي سوالف حبة وهيامة
فضحتني عيني وياك ابعشگها
الايحب يفضحة الشوگ وكلامة


٤
يتالي الما الة تالي
غالي وما بداه غالي
مُصلح غفلتي وحالي
ابثمن دمة

عذب نهرة وهِني ابحزنة
الحنانة ابچفة ياخذنة
مثل لمة الخيم لمنة
بحروف اسمة

خذتنة امن العدم للشوف ضي واتدلي بالضايع
ينجاس وتعيشة الروح حزنك مو حچي السامع
شمس ما عاشريت اغروب دومك عالعبد طالع

كل عمري اگلك ماليني خيرك
صاحب نعمتي وسموني اسيرك
هاي الخلگ تحسدني اعلة عشگي
هنيالك ايگلولي بأميرك



علي الفيصل

١
مُنيراً ضيائِهُ قد فاق القمرْ
جميلاً خِصالهُ مِن نسلِ الدُررْ
عظيماً إبائهُ ملكوت السُررْ
هوة الساقي

لآل الطُهرِ في الطِف حِما باقي
عظيم ابجود چفة من نبع راقي
دخيلة من اكتب اسمة ترجف اوراقي

يا وارث علي وحي اسمك عيشني حُب
الما شافك نهج طريقة ايضيع الدرب
عين الزهرة يا حاجب اليعلة عليك
بيك انت الشمس مثل لا ما تنضرب



٢
وسيماً تلألأ كالبَدرُ الأتم
بَـهّـيُ الملامحِ كالصَرح الأشم
عَجيبُ الشمائِلِ إذ لاح العلم
كفو اخوانة

الگال حسين بيه ما ضيع اربانة
اليونس خاطر اختة ابروج ميدانة
امن ايعت الفرس وايگطع اعنانة

يمحدب المُهر يگاطع نِفس العدو
ثلثينك علي وثلث بَيّن للبدو
شمرضعتك أمك انت وهيچي تصير
اشما مر طاري اسمك اهلك صاحو كفو



٣
قَويِمُ ألسَوّاعدِ نِبراسُ ألولي
لِواءَ الحُسينَ في الطف إذ يعتلي
مُهيباً حِسامهُ ويجسد علي
هو الباسل

هوة الزين ابن الزين ابو فاضل
عدل والكون من وگفتة ضل مايل
چبير وكلشي عالي ابصفة بالنازل

يا ساس الوفة يصورة وعن حيدرة
الشالعها الزلم مثل شلع الگنطرة
يومك يا فحل ولا ينعاد ابزمن
رب للمعارك كفو شبل القسورة



٤
كفيل العقائلي والخِدرُ الأبي
فريد الخصائلِ من آلِ النبي
علوياً قيامهُ فذاً طالبي
هو الغالب

طاري اسمة يطول الصيت والشارب
الشافة ايگول هذا ابن ابو طالب
يفسر فعلة معنى الطاعن الضارب

عاداهن بدر واحُد بالطف الكلف
الشد راية بالف لچن حلها بچم الف
يا قدرة علي يقانون المرجلة
يمحير الزلم قبل ليحير الوصف




علي الفيصل

١
يا صـاحب الثأر بسخطاً مُريب

نَحنُ لدعوى الله خيرُ المُجيب

فــكان لايَــصّمتُ فيــنا النِـداء

نَصۡرٞ مِّنَ ٱللَّهِ وَفَتۡحٞ قَرِيب

يَرَوْنَهُ بَعيداً… وَنَراهُ قَريباً بإذن ام الحسن
مُطالِباً عَنّيِدَاً…وببأسً مُريباً تنصاع فيه المحن

فرع فقارك وغير وهزهم بالصايح
مصخت دنيانة ل اللوحة وبس سيفك مالح
چا يمتة الساعة يالمهدي الدم فاير بينة
خنخلي اطاير ابجوهم يشبع بالطايح



٢
قُم زَلزلّ الأرض وسَبعِ الشِداد

قد جارت الارض وحان المعاد

لثأر مُحسن فاطِمَــة والرضيع

متى بنار الثأر يهفو الرماد

بكفك المُقاتل…ستمحي ما تبقى من نسل ام الجمل
يا عزة البواسل…في عرشك ترقى انت ابن خير العمل

دولة حيدرنة يالقائم بيدك تبنيها
وثورة اجدادك ودمهم بالدم نحييها
هاي اللطامة بالمجلس تلگاها انصارك
وادم شراية للموت ولاهلك نفديها



٣
للجبت والطاغوت حان القِصاص

قد جاء نَـصّـرُ الله لا مِن مَناص

فل يُصلبوا بالجذع يبن البتول

فحينها لن يرو مِنك الخلاص

يا خاتم الهواشم…فل نسمع البشائر بصلب اهل السُقف
بِذكرك المُداهِم…ستغرق الكواسر لِــموتِهٰا تَنجرف

وصلّة وأداها واعلنها الثورة امن الكوفة
شيضل يا طاغي والمهدي امفرعلها اچفوفة
حل وكت الساعة باذن الله الثار ايرد بيدة
وتلگاها السيفة ي ارگبهم للحد مصفوفة


٤
يا داعي الله العجل يا هُمام

الصبر قد حال الى الانتقام

فنسري بالشرك لحين الهلاك

ونحنُ انصارك جُندَ القيام

يا سيدي المُطالب…قد قامت العوابس لنصر يوم الوعد
مقاومة وكتائب…من لُبّة المجالس تدعوك عدة وعدد

الدم يا مولانة ما يغلة ونشرب فنجانة
الخادم بالغيبة يمحمد ثارك عنوانة
ابشر تلگانة غزاية وبيها انشد راية
كل خادم بينة شيردة الروج بميدانة



علي الفيصل

موطن هيامي…عالم غرامي
دمعي وعذابي…فحوة كتابي

يا ثار الله

١
بأول حضوري ابمجلسك…بالدمعة گمت اتنفسك
واشتم هوى الله ابصبحك

كسرة غصن ما تنجبر…لو ما بچيت الجرحك

أول محطات العشگ…اليحب حضرتك يختنگ
لو يمر طاري الرمحك

حسراتة تلسع بالجمر…لو سمع مقتل ذبحك

عشگي وكلامي…كَـوَن عِصامي
منبع دموعي…ذابح شموعي

يا ثار الله


٢
مثلك ولا شايف قبل…الروج اعلة جرفك ينعدل
يهدة اعلة مرسى اشفافك

خدك ترف مثل الندة…ومو وردة رمحك طافك

آخر وطن للحب نحر…فيض الدمة ابريعة انتشر
ذابح خضار اوصافك

(اسم الله) ليش الوحدة…وبس الله بالطف شافك

بُعدك خِصامي…وحِزنك تمامي
منهج حياتي…ابجرحك مماتي

يا ثار الله

٣
من اوسع اوطان الغرب…گاداني حِزنك والگلب
يلهج عفاف آثارك

تاخذني من ناسي الهلك…اشتم رحيق ازهارك

يا ميسم الحُب والحرب…سهم الطفل چان الدرب
للعاقل اليختارك

وارجع واگلك بس الك…روحي وونسها ابنارك

راهب شعوري…واحچي ابقصوري
رغبة عيوني…تِمسح جِفوني

يا ثار الله


٤
يا ضامي يالحضنك غِطة…سهم اللي ما صابك خِطة
باحساسي شو صاباني

چم مرة ياخذني الذنب…وگلبك علية ايتاني

صاحب سمو الحُب نبع…من عندة ابد ما ينشبع
وين الگة مثلك ثاني

گوة المصابك انجذب…وصار العشگ عنواني

ياخذني گلبي…ادري اعلة تعبي
حِزنك حبيبي…صاير مُجيبي

يا ثار الله




علي الفيصل

١
شلون حالي
من أشوفن كلها تمشي وآنة حاير

شلون حالي
الشوگ يكتل يمتة الك اتسمة زاير


ابروحي القوافل والصور تنهب شكو بعيني
ضحكة وضوى وليل وعشگ گصرهن اسنيني
ابساحل جمالك سيدي ابكل تعبي رسيني
لذة العشگ گالوا هجر والهاجر يآذيني

روحي ابشحت ضوى
اتريدك . وي كل هوى…روحي

روحي. يا سيدي
اتگلك. خُذ في يدي…روحي



٢
خذني يمك
ياحبيبي گلبي ضايع من چفوفك

خذني يمك
تلگة روحي تحسد الطير اليطوفك


يا ثامن وأول عشگ بأسمك يسُلطاني
عطفك غزة اعيوني وخطف باحلامة وجداني
زوارك اتحضروا الك واحد ورة الثاني
وتنضك علي ديرة هلي شي باقي بمچاني


چا ليش. هذا الندم
ما ازور. حتة القدم…چا ليش

چا ليش. كل مرة اضلّ
مشتاگ. ما بيه عَگلّ…چا ليش



٣
ابروحي صفنة
ابلاية واهس گصرت كل المحاچي

ابروحي صفنة
اتريد خاطر ينجبر ملگة وبواچي


ابداعة علي يا سيدي الوحشة خذت حيلي
لا زايرك حتة استقر لا مستلذ ليلي
اليهظمني اليزور ويجي وعن دربة يحچيلي
يكسرني موقف وانحني وجرحي اليتچيلي


أنخاك. فك حيرتي
امن الناس. لم فشلتي…أنخاك

انخاك. حطلها حل
مولاي. لو انسأل…أنخاك



٤
هية بلوة.
أنوي ازورك والگة كلشي اگبالي يعرض

هية بلوة
التمشي ربعة وهوة يبقة ادموعة تِنفض

أنوي ويعطلني أشكثر عنك يمعشوگي
مرة الاهل مرة الزمن غير الذنب فوگي
تدري ابغرامك مو سهل يبسهن اعروگي
واصل ابحالة امن التعب لو انت لو شوگي

لحسين رحت ابهظم
مولاي ارزقني قُم…لحسين

لحسين. لمن رحت
چاغير. بالهم متت…لحسين




علي الفيصل

غازي الطف سواد وخوف وابعز الضحى اتعتم
يمكن بيرغ العباس فوگ المشرعة غيم


١
يا دورة عياي امچيد من عيها النفل يجفل

شروة اسيوفها امن الطاح وانت اتدور الممحل

ما تعرف سواد الجيش لو حرثة زرع سنبل

صوفرها الزلم عباس يوم العالنهر عَـزّم


٢
امن اصدور الخيم شرشاب فز اعلة الخدر ينغر

طبهم طبة اجويريد بس موتهم امن الحر

شاهين الهواشم حام واعلة اگلوبهم وَكّر

الشارد لو ابسرب الغيم من چفك فلا يسلم



٣
دولة امن المراجل بيك يا سور العلى المضطك

طوفانك صرير اغيوم وبيازة زلم ينفك

اخشوم الگابلتك عود هم بيها الهوة يشرك

لو شم الهوى اعلة الگوم وكت الموزمة امحرم


٤
خل تسبط عربها اليوم شارب عالدواير رَف

بارية زلم عالگاع ضل يطبگها صف ابصف

شو من طبهم العباس لن زمر الحرايب كَف

ختكف المراجل عود لو جرناسها اتحزم




علي الفيصل

درب اگلوب
بيه تلگة الهلا اوية الريح ما تسمعها مِنّ إلسان
درب بيه التعب بس شوگ
واليوصل العشگة ابلا تعب خسران
وسواجي امن الدلال امفرعة مد الشوف
تگصر يمهن النهران
درب اگلوب
يبعد شوگك ايضيگ هوااك اعليك
تگرب تنكسر تتمنى ما خلصان
واجاك فلان
اجاك ابدمعتة اعلة احسين ما جاي اعلة حچي افلان
اجاك العاف روحة وبالدمع سهران
الما يشتهي الماي وللدرب عطشان
فضلك جازي واشهد بيه
جبتني اشتم هوااك وايقنت مولاي
سلطان الرضا والزايرك سلطان



درب الاگلوب
طريق مولاي علي بن موسى الرضا ع 🪬



علي الفيصل

١
اجاني الصوت
حسبالي هلي جوني الغربتي اتشيل الاجنازة
يويلي الموت
خلاني ابحسرتي اعلة اخوتي ومحتاجة عكازة

ذَبُلَّ الفؤاد تأمُلاً و الموت لا مِنهُ مَفر
حورائكم يا سادتي في شِدةً تدعي القمر
حُزني علىٰ نَعشي اللذي تَحديهُ اكتاف البشر

التابوت كون ايشيلة عباس
وامكدر ومهظوم يا ناس
ليش الغرب همة اليشيعون
چا وين هاشم رفعة الراس

ترضونها
يا هلي ايشيلونها الغربة فوگ امتونها…وينة عباس

محرومة
ومن متت مهظومة ابلوعتي ومندومة…وينة عباس

،،،،،،،،،


٢
يصد عالباب
حلمي الما حضة ابعينة ويريدك بيه تمر ليلة
هجر وتراب
يرافگ جدمي واعيوني ابمماتي وشح الايشيلة


شح المُعين لغربتي وعجافهم بلغ المُنى
بخلاف هاشم محملي والعمر والنعش انحنى
ما ذَنبي إن لم يرتفع رأسي على رأسُ القنى

مال النعش والمحمل اخلاف
خدر الصعب بالبال ينشاف
هية المصيبة الناس الاغراب
حتة الجنازة من ايدها اتخاف

اعلة چتافهم
گوة من مشيولة چن ضياع الچولة…وينة عباس

يا ويلي
الغربة نهبت حيلي وياهو اليتچيلي…وينة عباس
،،،،،،،،،



٣
ابجناح الشوگ
وديت الدمع صوغة ومراسيل الهجر دمعة
فرگتك طوگ
دارت عالگلب ديرة حِزن ما منهة خط رجعة

بعُد المنال بمُهجتي فتناثرت عطشاً وآه
بجِروف نهر العشق سال الدمعُ والنحر ارتواه
فالموت طالِبُ كُلَ مَن زآدَ الخِناقَ علىٰ هَوآه

ضاگ النفس والموت شراي
وين الغريب المالة حماي
ابتشييعي اشوفن طفي ينعاد
ولجنازتي ما احصل الماي

بحساسي
الطف وصل لانفاسي وياهو يمسح راسي…وينة عباس

وبنوحي
هاية زينب ماتت وين هاشم صاحت…وينة عباس
،،،،،،،،،،



٤
ابوداع الروح
وأجر آخر نفس واشهگ ولاضن منك الجية

جفاك ايلوح
وين اليلهب ابگلبي وجفاه يخنگ هوة الرية

هذا وداعي يا اخي ختم الحكاية مُبهمة
ذا منتهى عطش اللقاء فاستقبليني فاطمة
فترى العيونَ الى الوداع في عبق شوقي مُفعمة

متهنية من موتي لفاني
شي راح اشوفن بيه اخواني
چمدوب انطرها المنية
وصوت الخيم بعدة باذاني

لهنانة
وكافي من الدنية الربطتلي ايدية…وينة عباس

آخر شي
ميتة بس مشتاگة ذابح اسمي افراگة…وينة عباس
،،،،،،،،



علي الفيصل

١
عادة المرة لمن تِحل ساعتها
اچـتاف اهـلها التفزع الشيلتها
الاستثگلت عيشتها عگب اخوتها
الشام واهلة استثگل اجنازتها

مو هينة
يا عقيلة هاشم أجروهة الوادم…الاتشيل النعش

محرومة
ليش حتة بموتچ چن خشب تابوتچ…هم لاحة عطش


٢
اتشيعها وادم ضحكت ابماضيها
من طب ضعنها والحبل بيديها
الشام كل ذرة رحم ما بيها
الشام زينب كل وكت ياذيها

تسمعهم
ماتت المسبية هية لو مو هية…الطبت للقصر

ما يرحم
چان حتة اترابهم اگشر امن السانهم…ليگصر العمر



٣
والبچت دم اعيونها الواليها
شو بس علي السجاد يبچي اعليها
الماي بالطف ما شِفة ابغاليها
بالشام بالتغسيل شح تاليها

يا ويلي
الهد اخوچ وحيلة رد عليچ الليلة…عند المغتسل

يا زينب
الماي هينة اطلابتة الكلفة اخوچ وعازتة…وعازات الاهل



٤
مشتاگة زينب ماتت ومشتاگة
والشوگ نارة تلهب وحراگة
عدها امل بالموت يحضة املاگة
وية اخوها الموتاها افراگة

التتذكر
رمح اخوها وضيمة من سروا بالهيمة…ابلا والي وعلم

تستاحش
حسين اخوها وعينة وكافل وچفينة…او فَيّ ذيچ الخيم



علي الفيصل

١
لابو السلطان شدينة حزمنة ورفعنة وياها راية
طريقك ما انعوفة اولا عشگنة إلى ما لا نهاية
الدلال البلدرب ضيع تعبنة والگبتك ضماية

سواجي امن العطف
درب ما ينوصف
الخدم يابو الرضا
ابطريقك تنعرف

ابعشگ ذيچ المنارة نوينة اعلة الزيارة الك يابو الرضا
مواكبنا وخدمها الك خفت جدمها وملو كبر الفضا



٢
عهد برگابنة وبالدم كتبنة المسيرة الكاظمية
والك بگلوب موش السان صحنة اجوك الرافضية
جسر بغداد نَـوّخ من زحفنة انحنى امن الجعفرية

الگلب گبل الجدم
على ادروبك يهم
عشگ ماضن هوة
ترة ابدربك نشم

يراعي اربع مناير الك بدموعي اسافر واهيم بحضرتك
وطن للمالة ديرة تحل أكبر چبيرة وتشيم طلبتك



٣
يا قاضي حوائجنة وأمرنة نجي لو ما اجينة
گضت والسالفة استوها بگلبنة اذا بسمك نخينة
الك مولاي ل اللوحة عهدنة بمواكبنة ومشينة

الك هذا العهد
الى يوم الوعد
نضل بزيارتك
ومشينة للابد

وحق درب السبايا ترف تبقى الروايا ويضل هذا العشگ
نضل ابهذا حبُك ركض نهوة اعلة دربك ركضتة المحترگ



علي الفيصل

٢٨ رجب سنة ٦٠ هـــ خروج ضعن سيد الشهداء ع وآل بيته وبقاء السيدة ألجليلة أم البنين ع والسيدة العليلة ع


١
المدينة
ضلمة ابلا ضواكم…خنگة ابلا هواكم
شحيحة عشرة لآچن هااكثر متواجد الماي

المدينة
شني نفعتها هية…ومضاربكم خلية
وبس آنة ودمعتي وحسرة ام عباس وياي

بعدني استاهد اعيونك وطن للغربة الابروحي
وبعدني اشما عثر گلبي ايتگوة ابحزنة واجروحي

أدركتُ في عينيكَ سُر سَكينتيْ
وديارُ قلبي في هواك ودمعتي
مُرَ ألفُراق أسَلَنيّ يا والدي
ذُبحَ ألوِداد ولا وِصالَ لِمُهجتي

أنة الطير البقة اجناحة ابأثر ضعنك
هيچ الله والحگنة
ضِل ما ضَلّ أثر وابروحي احسنك
ملاك امفارگ الجنة
عطر منك بقة وبأنفاسي اجيسنك
اموتن من اشمنة




٢
ألمدينة
التجافيها العشيرة…ختشوفلها ديرة
كلشي ابلا هلة ايموت التعاشر روحة غربة

ألمدينة
الما شافك صبحها…خل تفتح جرحها
وتشرع للهوى الدمعة وتعيش ابحالة صعبة

چنت يمي وخذاني الشوگ چا بفراگك اشتلگة
آنة أول غريبة ابدار اهلهة اتدور الملگة

ما ذنبي إن لَم أرتقي ظهر الجمال
حتى امنياتي لم تُشد مع الِرحال
مالي ومالَ الهَجرُ لَستُ بِقادِرةَ
إنَ الفُراقَ أشَدَ مِن مرضٍ عِضال

هلي حملتوا بس للضيم وانة أدري
أموت وانة مشتاگة
ازغيرة آنة وحرامات ألزم ابظهري
شي ما جبتوا لَيّ ناگة
الراح وراح وياه صبري وعمري
ترة ذباحي أفراگة




٣
ألمدينة
الأتوادع وطنها…يُستصعب سكنها
دار أحزاني دارك بوية صارت لمن امشيت

ألمدينة
ما يرحمها گلبي…دلتني اعلة تعبي
امن اوميت ابچفوفك للوداع وعني اجفيت

ما چنت أدري هيچ تروح جدامي وتجي اتگلي
آنة الشيباني اجفاك دون الناس الابحلي

ذابَ الفؤادْ تأمُـلاً هَلّ مِن مُعين
يُمحي دموعي الساكبات مع الأنين
أيَسرُ قلبك حالي في هذا الجفاء
ما لذ عيشًُ بعد هَجرِكَ يا حُسين

بيش اتهنة عود ابدنيتي اخلافك
بس ابوجهك اتهنة
درتلي الضيم كلة ابدورة اچتافك
ومامش حيل اشيلنة
رحت من يمنة وانت امفطرة اشفافك
يالامهدم خواطرنة




٤
المدينة
بوية اتريد اهلها…ابرايك شنهي حلها
ترجع لو نجي الطفك غرايب لو سبايا

المدينة
ضكت بوية صدري…ما جارعها عمري
ردتك ما ردت بوية عطش مو انتة ماية

شابت صفنتي اعلة الباب وانة انتظرة مرسالك
مرة اتلوع اعلة اجفاك مرة اتلوع الحالك

أين أستقرت يا حبيبي بِك ألنوى
لا زِلت في قلبي وقلبي قد جوى
تأتي ألطيور بلا رسائل للديار
حتى أتى ذاك المُخضب مِن طِوى

عرفتك نايم اعلة الرمضة واعيونك
تعاين عالضعن گوة
افتهمتك ما خذتني ابرحلة اضعونك
خاف اتحير اببلوة
سمعتك ما ردت صوت اليسحگونك
اسمعة ابصدرك اشسوة



علي الفيصل

١
تعب وافراگ وامكاون دمع ينزل عتب سكتة
وسواجي امن الحزن بالروح تخنگ يا هوى الردتة
الضوة وذاك الدرب والليل يلچمن بية حتة انتة
الطف فرهدنة اهل وامتون عساها ابحضة وابختة

ضيمي ثجيل وگوة اجرعة
والدرب كلة احسين گطعة
ينسبي ويشبع موت واحبال
ثاري اليعوف اخوانة صرعة

نايبتي كلفة احيود وامتون
ميتلي عون وفاجدة العون
ماضن بعد تنشاف بالعين
للناگة خواني ايتمشون

الله ولحد فرهدوا كلشي امن ادية
وسفة مو علوية صار اسمي سبية


٢
عطش ملگة وسوالف شوگ بية وناري ما تطفة
واليفارگ متن عباس راسة اعلة الهزل يغفة
الياخذ روحة ميل النوگ صارت راحتة الوگفة
يصفن وامن اليندسون يعاين دمعتة ابصفة

گادونة گوة ومالي نشاد
چا يمتة يفزع خال الاولاد
صارت امغالب آخ وادموع
غير الاخو الهالساعة ينراد

فجة الذبح سوالي فجة
خلاني اروح بناگة عرجة
باگوا الخوة وراح الاحسين
وصار الضعن بالسوگ فرجة

امنين اجاني السوگ وانة الهاشمية
وسفة مو علوية صار اسمي سبية


٣
من ضيمي اشبعد يا ليل اشضل من هالعمر گلي
العمر للغربة ما مريود مريود العمر لاهلي
الدرب يا روحي درب الشام حملي امن التعب حملي
درب لليختنگ ما بيه واحد عالهوى ايدلي

اموازة النفس جرتة بجفاكم
واتعثر ابجرتة وراكم
چم صبح طر وانتم مبعدين
ردوا لاخيتكم شجاكم

هاا يهلي بيش الآه تنزاح
گلب اليفارگ عيب يرتاح
واتنوع بعيني اعلة الادروب
تلفون بس روس اعلة الارماح

كلفة اسمع تالي عمري (انة خطية)
وسفة مو علوية صار اسمي سبية


٤
برد شر الهزل والليل خذن لوني وخذن حيلي
گبل عباس اذا داريت سبع فدوات يغديلي
انحنيت اگبالة بس ما گام چا ياهو اليتچيلي
هلي ليل السبي اشچمدوب اگلكم هذا مو ليلي

اتفطر حياطين الخرابة
ونتي وتعب گلبي ومصابة
يهل الطلايب ما تفزعون
الليل عد زينب اطلابة

الشام مو بلوة بلاوي
كسارها اگلوب العلاوي
ميتة وراكم كون يحسين
ما فوخت گلبي النعاوي

انعة ما الطم لان مچتوفة ادية
وسفة مو علوية صار اسمي سبية




علي الفيصل

١
بوية گوم…كلشي غربة اخلاف صوتك
بوية گوم…شلون أصدگ صار موتك

انت ابو الكل اليتامة اشلون تقبلها اضل عگبك يتيمة
الدنيا مدري اشضامتلي وانت رايح وين وامخلي الهضيمة

بوية اريد الموت من هسة الية
ولا اموت وانة مچتوفات ادية
بوية ادري الضيم ما يرحمني ساعة
عاد اموت وانة اميرة مو سبية



٢
بوية گوم…ابنومك اشخليت بية
بوية گوم…اوداعتك زينب خطية

انة متعودة اعلة فَيـّك لا اتخليني الشمس ذيچ الصحاري
ليلك الساتر الدنيا وانة باچر طالعة ابنص الظهاري

ناخيتك بوية من هسة اعلة دهري
الينكسر مو خاطر الينكسر ظهري
عاد وياك العمر لو راح فدوة
مو ايروح من الخرايب تالي عمري




٣
بوية گوم…عين گلبي اعلة المصيبة
بوية گوم…لا ايگلولي الغريبة

انة مو مالت امفارگ انة مال اعيونكم تحرس دلالي
مالي حيل ادروب كلفة ولالي حيل افراگكم يهدملي هالي

ابعازتك يالما ترد الابگلبة عازة
الغربة باچر توصل الحد الجنازة
باچر ايگولون زينب وين اهلها
يعني جرت نفسي من تمشي اموازة



٤
بوية گوم…غيبتك ياهو اليحلها
بوية گوم…روحي حگها اتريد اهلها

باچر هواي المصايب وانة وحدي اشچم گلب يراد لية
الخنگة تاخذني وتردني امن الصبح ل الليل عندي المغربية

بوية ياهي اتهون مو كلهن كلافة
وانة حيل امدللة والليل اخافة
باچر ايثگلن علية وحيلي رايح
الدرب خلصتة هضم موش المسافة




علي الفيصل

١
نبنيها نبنيها أكبور البقيع ان شاء الله نبنيها
نبنيها نبنيها وكون المناير للسمة انعليها
نبنيها نبنيها لو عَجل الله ابفرج مهديها

لو ثار ابو صالح شايل الراية
يعلن عالبقيع اتصير مشاية
وابكل نايبة انسوي اربعينية

غرقدنا نذهبة والملة ايشوفة
وتجي الخدام كلمن رافع اچفوفة
زاير لأبو محمد عاگد النية



٢
عناية عناية نبني الانهدمن بالذهب عناية
عناية عناية واطينة چلمة وبيهة شدة راية
عناية عناية انخلي البقيع اشراع للوفاية

من توصل الخدام الحُسينية
ومن نبني صحن للمرة البدوية
تعرفون ابو فاضل شني امربينة

ما نستنكر وهالمرة نبنيهن
وحگ ارواح دم الخدم نطيهن
لو عارض دربنة الموت يلگينة



٣
نحييها نحييها مشاية الزهرة وعلي نحييها
نحييها نحييها چلمتنة گطع ارگابنة اليشريها
نحييها نحييها غصباً على آل أسعودها انسويها

من يثرب المكة اهناك تلگانة
انحج ونخدم ونلطم ابممشانة
و مجالس عامرة ابنص الوهابية

وتنطي أم البنين الخادم ابشارة
هلا ابخادم اوليدي الجاي من دارة
متعودة تعزب ابصحرة بدوية



٤
نگظيها نگظيها عتبتنة وية ارجاسكم نگظيها
نگظيها نگظيها والگاع لازم ترجع الراعيها
نگظيها نگظيها أرض البقيع ابدمنة ما ننطيها

باچر لو نهض بالأمر قائمنة
ودخولياتنا اتطب ومواكبنة
وللزهرة نهوس حدر گبتها

ذيچ الساعة لو كض راي ميدانة
والثار الهواشم عآت اعنانة
گلي اجمالهم شتفيد ساعتها



علي الفيصل

١
قصة حب دمة غالي حُب مثالي وعجيب
عشگ الله نهرة ضامي ابلا محامي وغريب

يا دنيا التحلة واسمع صوتة بالطف هل مُناصر
يشهر السيف ويثبت نصرة الدم والمناحر

السلامُ على
ضعن الله وخيمة الحسين
نحميها ونقسم بيمين
دم الحب اعظم اليقين حُسين

قام في الطف نداء العاشقين
نحنُ أنصار الخيام الثائرين
و لنا التأريخ يشهد بالولاء
فوجدنا الحُب في ركب الحسين



٢
فحوة حبنة وغرامة وكل هيامة الحُسين
اشمحلة الموت ابقرارة وإنتصارة المُبين

احلى شي بالطف لگينة اليحب ما عندة غاية
والله فضلنة ابخلقنة وشلنة بالعاشر رواية

السلامُ على
كعبتنة ابحُجة الغرام
وشيبتنة الفارس الهُمام
وقائدنا وسيد السلام…حُسين

نحنُ مَنّ قِدوَتُـنا ذاك َالكفيل
فَرأينة الموت في الحُب قليل
سوف نفدي الآل نحراً ودماء
عندما يشتد في الحرب الصليل



٣
كل شايب بينة نادة اعلة السيادة السلام
عشنة من دون العباد احنة الجهاد ابغرام

ما بينة السيفة يرجع سالم ابلا دم لغمدة
انكيف لو طگها يشتد بالحومة إرجوزة وحدة

السلامُ على
صيحتنة ابساعة القتال
وضربتنة الدكت الجبال
انصارك سووا المُحال…حُسين

نحنُ أرباب ميادين ألحروب
فترى ألشمس إذا غضنا تذوب
فالى الموت قرار المُعتدين
أين ما ساقت بهم تِلك الدروب



٤
الينصر يدرك مماتة اهناا حياتة ومُناه
يا سُلطان الشهامة الدم غرامة هوااه

يحسين الدم ضريبة كلمن ايشوفك سبيلة
أنحور الانصار الفدتلك وداعة اعيونك قليلة

السلامُ على
كلمن ناصر غمض اب اديك
مِن گلبك سيدي وإليك
تستاهل ننذبح عليك…حُسين

نحنُ سَبعينُكَ قُلنا عَنّ يقين
قد وجدناك ملاذ الحائرين
نشهدُ الحُبَّ سِراطاً مُستقيم
فترانا لِسراطك سائرين



علي الفيصل
ألبصرة-ألواحد من ذي القعدة
#بسم_الساقي_١٤٤٦_هــ