اظلميني وانصفيني واحكميني
بالمؤبد في سجن حبك وراضي

مدمنٍ زينك وكلك مبتليني
وكل عشقٍ قبل عشقك فعل ماضي

يالجمال اليعربي ياعذاب المتقين
خافي الله فيني وخافي الله فالسماء

ماذبحني بعد عودش سوا رمشٍ وعين
صوبت قلبي وجعله بذمت من رما

جيتش وقلبي سليمٍ ولي عقل ذهين
ورحت اردد ويل حالي على عذب اللما

احسني فيني ترا الله يحب المحسنين
يايهوديه اسرتي قُليباً ملسما

ياغناة الحال والدار يالدر الثمين
يانظر عينٍ لغيرش مطاولها العمى

فوق زينش والتغناج لش طبع رزين
لاطمه شوط المزايين لامنه احتمى

ان حضرتي تلتوي لش رقاب الحاضرين
كنش الحاكم وهم شعب معلن الانتما

ياجميله صدق والله مانتي تستحين
تسرقين القلب بالله قولي لي لما

سارقه لكن ماتشبهين السارقين
فعلش بدين المحبه ماهو بمحرما

والله ان مالش شبيهٍ بوسط المسلمين
وفاليهود وفالنصارى ومن خلق ونما

سلمت لك روحي وشفتك غناتي
وبعت العمر لاجلك ولو راح يفداك

وارخصت لاجلك مابقى من حياتي
كله لاجل عينك وشوفة محياك

انا طلبت الله بكل امنياتي
وكل امنياتي اقضي العمر وياك

وعديت اقسى ظروفي ومعضلاتي
من خوف تحرمني وصالك ولقياك

وحفظت حبك بين روحي وذاتي
وعشقت ديرتكم وربعك ومرباك

ياثورة جنوني ولحظة سكاتي
ياسري اللي ماقدر حد يقراك

شفتك تفاصيلي واجمل صفاتي
وماخترت غيرك جعلهم من فداياك

ضيقك يضيقني وسبب شتاتي
ويجمع شتاتي ضحكك ان قاطع حكاك

من ضيق صدرك والله اني احاتي
ياجعل ياخذني من الضيق ماجاك

صحيح ماعلم يوم حزت وفاتي
بس جعلها تاتي قبل يوم فرقاك

من مدرسة سود الليالي تعلمت
درسٍ حروفه والمعاني ثقيلات

ماكل قبله يمِّتٍ لو تيمّمت
حتى لو انك عارفٍ الاتجاهات

وماكل مسلم مسلمٍ لك لو اسلمت
لو ربك وربه إلآه السماوات

حتى القريب اللي معه طحت ثم قمت
من عقب ماكنتو معا صرتو اشتات

ولاتقول بسلم دام ذي المره سلمت
لاتحسب انها كل مره سلامات

خلك حليم وميزتك كثرة الصمت
الصمت حكمه في حضور السفاهات

وان قلت في الاسهم بساهم وساهمت
ساهم بسوق الطيب مابه خسارات

تلقى النشاما يمتك وين يممت
شيكٍ رصيده عز نفس ومقامات

جمعت لك مما عرفته وقدمت
نصايحٍ تمت على تسعة ابيات

البارحه ليلي ثقيل وسهرته
وانزاح نجم الليل والهم مانزاح

همٍ لاجى بين الضلوع وسترته
ستر الهنوف اللي بلا شال ووشاح

ياوقت وش عذرك لشخصٍ كسرته
ليه اتّعمد طيحته يوم ماطاح

ليتك مع الطيب تعين ونصرته
يومك مع الرديان طيب وسماح

ياغيم برقك لاح لي ماسبرته
مزنك تعداني ولو بارقك لاح

تبرق وترعد والمطر مانثرته
وياثقل سحبك بالمطر لكن شحاح

ياطول صبرٍ فالرجاوي صبرته
كله لاجل من شوفته عيد وافراح

وخابت رجاوي خاطري ماقدرته
وعزالله ان قلوبنا ماهي صحاح

واصبحت شخصٍ ثانيٍ ماعرفته
وانا عرف نفسي ضحوكٍ ومزاح

تغيرت نفسي وضحكي هجرته
ومن راح قلت الله معه لحق من راح

من كنت اخاف اني اخسره ..!!خسرته
" وعقبه ماوالله همني خسر وارباح "

قلبي اللي من هوى الخفرات تايب من زمان
لين جيتي ياسمو الزين والطف من حضر

وعاف قلبي توبته يالله عليك المستعان
وانطرب مع صوت ابو نوره ولحن اسمر عبر

كنت اضن ان قلبي الماخوذ له صمام امان
لين جابه نظرة اللي زينها موتٍ حمر

كيف اقاوم حسنك الفتان ياعذب الثمان
وكيف اقاوم ضحكتك والثلج من تحت الجمر

طلتك فيها الفخامه والحلا والعنفوان
الله اللي ميزك بالزين من بين البشر

ساكته وعيونك تسولف لي بسحر البيان
والسحر في عينك اللي عندها علم وخبر

عيدت بي قبل عيد الفطر من دون رمضان
عيد عشاق هلاله هل في خمسة عشر

ساعةٍ فيها اجتمعنا صدفه بذاك المكان
بركها وابرك نهار جابكم وابرك شهر

ياللي تقول النظر فالوقت خله بعيد
مالي ببعد النظر ودي ببعد السفر

من مقعدي والله اني ماني بمستفيد
ياكون ضيق النّفس والخافي ادها وامر

ودي بسج النّفس مع كل قرم وعضيد
خوة نشاماً سواياهم تشوق النظر

اما رقينا الرجم بمقلمات الحديد
اللي بنياتها ماهي تزيد العمر

نسلى وتسلى الخواطر بالقنص والقصيد
وكلاً يماري بفعلٍ يستحق الذكر

ولا نحرنا الخلا في عرق ولا مديد
ارض بكر ماوطها الا الظبي والمطر

جمعى معزه وعز وكل رايٍ سديد
وبريةٍ ريحها يجلا العمس والكدر

الطيب واهل الجمايل راس مال ورصيد
شيكٍ رصيده يزود ان بان نقص الدهر

الوقت والناس وظروف الزمن لاجديد
حتى السما والبسيطه والشجر والحجر

حنا عبيدٍ بنفنى كون رب العبيد
من عظمته جل شانه حار فيه الفكر

نصوم ونصلي ونخشى نهار الوعيد
ونطلب من الله يرحمنا نهار الحشر

ترا السهر ماهو دليلٍ لعله
بعض الليالي جوها حيل رايق

والنوم بعض احيان سترٍ لخله
ماهو كلامٍ كذب واخذ الحقايق

سهرت باجمل ليل فالعمر كله
ورقدت بدري ليلة الصدر ضايق

بنيت حلمي يوم انا بسن عشرين
وخليت عمري في سبيله رهينه

وعانيت منشانه وذقت الامرين
وكنها عسل صافي وحن ناحلينه

اضيق من وقتي ومن وضعي الشين
واذا ذكرته قلت فدوه لعينه

شفته تفاصيلي وكل العناوين
وصار الوطن والمنطقة والمدينه

وصار الغلا والشوق والقلب والعين
واهم حاجة في حياتي ثمينه

ويومه تحقق صرت مثل المجانين
قدام عيني واسأل الناس وينه

كن دق قلبي فالصدر والشرايين
ضرب المطر فخيام بدوٍ قطينه

اثر القدر مابين حكم وقوانين
والحظ طايح يبغي اللي يعنه

عدا العمر من فوق سن الثلاثين
وحلمي قبل مايكون واقع يازينه

رسمته بعيني ورود وبساتين
وشفته بعيني قبر ضحكة حزينه

يانفس بعض احلامنا اللي تمنين
اذا تحقق صار هم وغبينه

ليته بقى حلمٍ بقلبي له سنين
انشهد انه اجمل وحن حالمينه

ليته بقى غايب وحن صدق مغلين
اخير من حاضر وحن مرخصينه