حفلنه ابهالمسه لطه وصادق ( ج الصادق )
وأنا ابحبي لهم أقسم وصادق ( من الصدق )
وهنيّاله اليحب طه وصادق ( وصدّق )
كلام المصطفى وجعفر سويّه

أبو فاطمة

استشهاد السيدة الزهراء عليها السلام

فاطمه .. وينه عن قبر النبي صاير ضريحچ
فاطمه .. بلچه عنده نسچب الدمعه وننوحج
وكل محب فوق القبر * يلطم اعليچ الصدر
-----.....-----
من بعد طه محمد . أمست الدنيا حزينه
فارقت فاطم أبوها . واظلمت أرض المدينه
اغصبوا حقها ابجساره . وكسروا اضلوع الأمينه
وانسطر خدها ي ويلي . وما رعوا فيها نبينه

والأسف .. حيدر امقيّد صفه ابقيد الوصيّه
والأسف .. من وقع محسن ي فاطم عالوطيّه
نادى قلبي منفطِر * يلطم اعليچ الصدر
-----.....-----
من رحل طه انهضمتي . ومن قبل چنتي أميره
ما غفت عينچ ي فاطم . منّچ اضلوعچ كسيره
والدمه تجري ي ويلي . من سقط محسن غزيره
وعن علي تخفين خدّچ . والضلع خافي مصيره

عالمه .. انتي ابحيدر إذا ايشاهد ضلوعچ
عالمه .. ومن يشوف العين ملطومه ينوحچ
بعدچ امنين الصبر * يلطم اعليچ الصدر
-----.....-----
من بعد ذيچ المآسي . وانتي محزونه وكئيبه
امن المرض منحول جسمچ . من عظم ذيچ المصيبه
ولغصب حقّچ تعنّى . يعتذر ماحد يجيبه
لنّه رب الكون أغضب . واغضب الهادي حبيبه

ينصلي .. في سقر من يوصل ابيوم القيامه
ينصلي .. ويفرح الكرّار من يبلغ مرامه
حيدر ابيوم الحشر * يلطم اعليچ الصدر
-----.....-----
من قرب موتچ ي فاطم . حيدر اتضعضع كيانه
روحه شايلها اعلى چفّه . والقلب ما هو ابمكانه
الدهر ما راعى حقّچ . وما رعى حقّه زمانه
رحتي والدنيا كئيبه . وحيدر امفارق حنانه

مظلمه .. الدنيا في وجه الوصي بعدچ ي فاطم
مظلمه .. والدمع فوق الوجن بالحسره ساجم
وبيده يحفر لچ قبر * يلطم اعليچ الصدر
-----.....-----
من دفن حيدر جنابچ . منهو يمّه لچان حاضر
خل نعرفه وخل نسأله . قبل ما تعمى النواظر
كل محب ودّه ايتعرّف . وينه قبر الزهره صاير
بلچه يبرد له غليله . وتبتهج بلچه الخواطر

فاطمه .. كل محب وده ابشغف قبرچ يشوفه
فاطمه .. وينعى بسمچ والقبر لهفه يطوفه
وماكو للشيعي عذر * يلطم اعليچ الصدر

محمد عبدالله الحدب
١٤٣٦/٥/٢٠هـ

في استشهاد الصديقة الزهراء عليها السلام

يا علي .. هذا جبريل ارتفع صوته ينادي
يا علي .. من ورا الباب اعصروا بضعة الهادي
والملايك لاطمه .. فاطمه يا فاطمه
-----*****-----
على الزهره ابحزن بادي . ملايك في سماها اتنوح
أمين الله الوحي بيها . على خده الدمع مسفوح
غِدا ينعى ابأسى فاطم . وبچى لصوته القلم واللوح
ينادي يا علي البضعه . قلبها امن الوجد مجروح

يا علي .. فاطمه ابفضه انتخت وانته المحامي
يا علي .. ندري ابقلبك يبو الحسنين دامي
والمدامع ساجمه .. فاطمه يا فاطمه
-----*****-----
يا علي الأملاك خرّت . نايحه ابوضع السجود
من وقع محسن ينادي . يمّه يا سر الوجود
عفتي يا يمّه جنينچ . ليش مو قلبچ ودود
ليش يا يمّه الحنونه . ينحرم عمري الخلود

يا علي . شبلك اعلى القاع ضاعت أمنياته
يا علي . عايف المحسن يابو المحسن حياته
سابح ابفيض الدمه .. فاطمه يا فاطمه
-----*****-----
جملة الأملاك تنعى . وبالسمه نصبت عزيّه
وانبياء الله ابجنانه . تبچي الحال الزچيّه
وطه يم حيدر تعنّى . يقلّه ابعبره شجيّه
فاطمه اعلى القاع خرّت . والدمه منها جريّه

يا علي .. فاطمه ابلوعة قلب عاشت كئيبه
يا علي .. اتصارع امن القوم لوعات المصيبه
والمواقف مؤلمه .. فاطمه يا فاطمه
-----*****-----
يحيدر بالسمه دمعه . ابحروف اللوعه مرسومه
يهل دمعه البدر بيها . وتون بالحسره انجومه
بعد ما طاحت البضعه . وضلوع البيها مهشومه
وأظن باب الأسى حاير . دمعته ابصدره مكتومه

يا علي .. صاحت الزهره ولا تسمع بچيها
يا علي .. ومحسن الخر عالثرى ينحب عليها
يمّه ليتچ سالمه .. فاطمه يا فاطمه
-----*****-----
ابوجودك منهو يتصوّر . يحيدر تنهضم فاطم
عمرها چالورد لچن . ذبل من فعلة الظالم
تموت ابغصه يا حيدر . وقلبها بالأسى ناقم
ياويلي ماتت الزهره . وعليها ينحب العالَم

يا علي . ماتت البضعه وفنت زهرة عمرها
يا علي . ومنهو غيرك بالأسى عفّه قبرها
والضلوع امهشّمه .. فاطمه يا فاطمه

محمد بن عبدالله الحدب
١٤٣٦/٤/٢٢هـ

في ذكرى استشهاد السيدة المظلومة المقهورة فاطمة الزهراء عليها السلام

وسفه قالوا فاطمه محّد عصرها
وكسرة اضلوع الطهر نكروا خبرها
وما سقط منها جنين * باعتقاد الظالمين
****......****
على بنت النبي جاروا . مو مرّه ولا مرتين
وسافه الزهره ظلموها . لاقت هالظلم من وين
عليها بس رحل طه . صبّوا بالحقد نارين
ولفت هذا الدهر زمره . تنكر كسرة الضلعين

ما كفاهم روّعوا بنت الرساله
والنبي قالوها ميورّث عياله
وميّت ابقبره الأمين * باعتقاد الظالمين
****......****
تجاسر يضرب البضعه . ذاك اللي هجم عالدّار
يروّع عترة الهادي . قصده وتفنى الأطهار
يريد المرتضى ايبايع . وقال وسمعته الأشرار
وإن بنت النبي ابّيته . والهادي لشب النّار

شبّوا ابّيت الوصي نار السقيفه
وانكروا قول النبي حيدر خليفه
ينطفي النور المبين * باعتقاد الظالمين
****......****
على بيت النبي هجموا . وقلب أم الحسن مرتاع
وبعد ما شبّوا وعصروا . وكسروا للبتوله اضلاع
خذوا حيدر علي امقيّد . وراسه امنكّسه للقاع
دروا بوصية الهادي . وصارت هالنعاج اسباع

من بعد ما طاحت الزهره الزچيّه
قيدوا حيدر علي ابقيد الوصيّه
يذعن ابمدّ اليدين * باعتقاد الظالمين
****......****
لفتنه ابهالزمن زمره . تتجاسر على الأطهار
يقولون ابجسارتهم . منهو اللي هجم عالدّار
صعب بنت النبي تهضم . في حضرة علي الكرّار
وضلع ما كسروا للزهره . وما صابوا الوجن بسطار

نكروا عالزهره العدو ابحقده لفاها
منهو يهضم فاطمه وحيدر يراها
ويسمع الزهره ابونين * باعتقاد الظالمين
****......****
مثل ما قالوا البضعه . ما شافت ظلم عدوان
حضاره هالزمن توجب . من بعض البشر نكران
أخاف الدنيا تتغيّر . وتجور ابحقد لازمان
وتصير الزهره تاليها . مو بنت النبي العدنان

خوفي ينسون النبي وبنته الزچيّه
والحضاره تستوي خير البريّه
الحضاره ابلايه دين * باعتقاد الظالمين
****......****
أبو فاطمة الأحسائي
١٤٣٨/٥/١٦هـ

استشهاد السيدة الزهراء عليها السلام

آنا مؤمن في غيابك . وانتظر يوم الوصول
يبو صالح وبحسامك . تاخذ ابثار البتول
قلبي بالهم منفطر * وبالمآسي ينتظر
-----*****-----
قبل يومك يبو صالح * قلب كل مؤمن اتخبره
جمر يالمهدي يتحسّر * يبچي لحالة الزهره
على كسر الضلع چنه * من اللوعه ألف جمره
وعيونه ابكثر نوحه * عِمَن من يهمل العبره

كل قلب نار ابغيابك . مثله قلبك يلتهب
تعب من ينطر ظهورك . كل وقت دمعه يصب
وقلبه ذاب امن الصبر * وبالمآسي ينتظر
-----*****-----
يبو صالح ضلع فاطم * بالباب انكسر تدري
وعليها الزمره من غارت * صاحت وسفه يا عمري
ومحسن عالعتب طايح * وادموم الصدر تجري
وعلى الباب ابحقد دارت * نيران العِدا تسري

كم ضلع منها تكسّر . وانته عالم بلجره
وبالصبر أوصى نبينا . تدري جدّك حيدره
يصبر لهتك الخِدر * وبالمآسي ينتظر
-----*****-----
لجل محسن يمهدينا * ولجل عمّه الطفل نارين
نار ابمهجة الزهره * ونار ابقلب أبوك احسين
يمته تطلع ابسيفك * تطفّيها ينور العين
لجل تبرد حرارتها * مهجة فاطم اويا احسين

فاطمه الزهره يمهدي . تنطر الصيحه ابعجل
والحسين ابكربلاءه . ينتظر يوم الأمل
والطفل فوق الصدر * وبالمآسي ينتظر
-----*****-----
غدا جمر الغضى قلبك . لجل كل محنه يتعذّب
مثل كل مؤمن ابحسره . صبح قلبك جمر يلهب
ومثل دمعاته يا ويلي . دمع عينك أسى ينصب
ومثل ما يطلب النصره . أمرك تطلبه امن الرب

غيبتك طالت يمهدي . وذابت ابحسره المهج
كل محب مثلك يغايب . يسأل الباري الفرج
كل حشى أصبح جمر * وبالمآسي ينتظر
-----*****-----
إذا قلب المحب ينسه * مصابك من كدر مسّه
أظن قلبك يمهدينا * ما يسلى ولا ينسه
لأن قلبك جمر صاير * فاقد مهجته ونفسه
إذا تتذكّر الزهره * لازم تذكر الرفسه

ما أظن تنسى يمهدي . فاطم وكسر الضلع
والجنين اللي تصوّب . ولجله حيدر منفجع
وقلبه بالهم منشطر * وبالمآسي ينتظر

محمد بن عبدالله الحدب
١٤٣٦/٥/١٨هـ

في ذكرى استشهاد السيدة الزهراء عليها السلام ( خطاب الحوراء لأمها عليها السلام )

فاطمه انتي لجراحات القلب بلسم
واسمچ ابلوعه أذكره وقلبي يتألّم
يُمّه من بعدچ يصير ** جنحي بالدنيا كسير
*****.....*****
زينب آنه يالوديعه وقلبي مفطور
من سمعت ابّاب ضلعچ صار مكسور
والدمع يُمّه اعله خدّچ شفته منثور
ومحسن ابدمّه نظرته وچنّه منحور

يُمّه قلبي من نظرتچ تستعر ناره
وانرسم ضلعچ يزهره ابعيني وآثاره
ومن وقع خويه عفير ** جنحي بالدنيا كسير
*****.....*****
يُمّه من شفتچ وقعتي ابعتبة الباب
قلبي حسّيته ي يُمّه ابعصره منعاب
يُمّه يا زهره اعله بابچ ضلعي انصاب
ومن قبل عاشر محرّم هالقلب ذاب

ذايب اقليبي يزهره وسالت ادمومه
والچبد يُمّه ابمصابچ زادت اهمومه
ومن كسر جنح الأمير ** جنحي بالدنيا كسير
*****.....*****
أدري يا يُمّه ابحياتچ شدّه وتزول
العمر بعد الـمُمجّد يُمّه ميطول
وسفه يا يُمّه كيانچ صار منحول
وزهرة اسنينچ وسافه صابها اذبول

من رحلتي امن الدنيّه أنعى يالزهره
وضلعچ الدامي أذكره وانحب لكسره
وسفه يالبضعه أصير ** جنحي بالدنيا كسير
*****.....*****
والله يالزهره ابحياتي روحي تنعاچ
وچنّه قلبي من رحلتي رايح اوياچ
شويّه لو قلت ابلساني يُمّه أهواچ
ودمعي ويّا اخواني يجري من فقدناچ

من يمر يُمّه خيالچ أجري الدمعه
واذكر الهادي يوصّي ابّنته البضعه
ومن بعد بنت البشير ** جنحي بالدنيا كسير
*****.....*****
يُمّه من رحتي حياتي صارت اهموم
والقلب جمره أحسّه وجرحه مالوم
ودمعي يا زهره لـمماتي يبقى مسجوم
وقلبي من بيت الرساله ابحسره محروم

أبقى من بعدچ حزينه ابلوعه وبحسره
وبالدهر أفقد سروري وافقد العتره
وادري من يوم الغدير ** جنحي بالدنيا كسير
*****.....*****
أبو فاطمة الأحسائي
١٤٣٨/٥/١٠هـ

لذكرى استشهاد الوديعه فاطمة الزهراء عليها السلام

فاطمه .. يمتى قبرچ نعرفه ونوصل مزاره
وبالدمع .. نبني فوقه قبّته ونرفع مناره
ويّا مهدينه نصيح * وبالدمع نبني ضريح
****~~~****
انتي يالزهره بجلالچ للموالي مدرسه
ودّه يوصلّچ وينعى فوق قبرچ بالأسى
لكن بجنح الليالي حيدر أخفى مؤنسه
وخلّى دمع الشيعي يجري وينتحب صبح ومسا

يا علي .. انته أخفيت القبر واحنه ابتلينه
نسألك .. ودنه نوصل بالعجل قبر الأمينه
وننعى والمدمع يسيح * وبالدمع نبني ضريح
****~~~****
يبتشر قلب الموالي لو ذكر أمّ الحسن
فاطمه هيّه الولايه وهيّه آيات السنن
وهيّه سوره امن السماحه وهيّه باب المؤتمن
وما مثلها بهالعوالم انوجد في هالزمن

نعترف .. لولا فاطم ما خلق ربنه البريّه
وبالأسى .. حقها شيعتها تون تلقى المنيّه
ويحزن الكون الفسيح * وبالدمع نبني ضريح
****~~~****
من تمر اعلينه جمعه نرفع ايدينه بذكر
نطلب امن الباري حاجات انتظرناها عمر
يعجّل الباري لمحمّد حجّته ذاك الأمر
وطلبه يا ربّي نوصّل بالعجل قبر الطُّهر

فاطمه .. نطلب الباري بمدامعنه الذروفه
وبالفخر .. نجتمع حول القبر حسره ونطوفه
وكل قلب يمسي جريح * وبالدمع نبني ضريح
****~~~****
يا بتوله يمتى يطلع خاتم الآل بعجل
ياخذ بثارات جدّه لبلعطش وسفه انقتل
وياخذ بثارچ يفاطم والجنين اللي انجدل
وياخذ بثار الأيمّه من علي خير العمل

ننتظر .. صيحه من جبريل تسمعها العوالم
وبالعجل .. نمتطي هام السحب لاجلچ يفاطم
ونسعى ويّانا المسيح * وبالدمع نبني ضريح
****~~~****
ننتظر مهدينه يطلع بيده يحمل رايته
يقصد لطيبه يزورچ والدموع بوجنته
وتمشي ويّاه بسكينه يالزچيّه شيعته
ومن تجي لقبرچ تذكرچ والضلع وٓيْ كسرته

مو عجب .. لو يموت الشيعي لاجلچ يالوديعه
وينتهي .. لو سمع مهدي العصر ينعى الشفيعه
واقف بقربچ يصيح * وبالدمع نبني ضريح
****~~~****
يالوديعه من نوصّل قبرچ اويا المنتظر
نهتف باسمچ يفاطم والنّدا يفتّت صخر
وبالدمع نبني مناره من يصب مثل المطر
وقبّه حمره امن المآسي وبيها آيات وسور

بالدمع .. نكتب اسمچ عالأرض واعلى المناره
وكل محب .. لله يسجد بلّغه الباري الزياره
وشاهد بعينه الضريح * وبالدمع نبني ضريح
****~~~****
أبو فاطمة الأحسائي
١٤٣٨/٤/٢٠هـ

في ذكرى استشهاد السيدة الزهراء عليها السلام
حوار بين الإمام الحسن وأمه عليهما السلام

يُمّه يزهره اشهالمصيبه الحلّت اعليچ
ما ظنّتي عندچ عدو ابهالدنيه ياذيچ
ابحقّچ يعرفون * يا زهرة الكون
اليطلب امن الله الرضا يا زهره يرضيچ
*****•••••*****
يالزهره الحسن آنه * ودهشني يُمّه المنظر
هجوم الزمره روّعني * أشوفچ يُمّه ما أقدر
ومثل بابچ ي محزونه * قلبي بالجمر يسعر
وعنّچ وينه يا فاطم * أبونه اللي فتح خيبر

منهو الجسَر دارچ يطبها والوصي اهناك
بويه الذي من هيبته ترتجّ لافلاك
يفنونه يرْدُون * يا زهرة الكون
اليطلب امن الله الرضا يا زهره يرضيچ
*****•••••*****
ي زهره المصطفى وصّى * بيچ وبالوصي بعده
وبس ما غمّضت عينه * بزغ كل ظالم ابحقده
لفوچ لدارچ ابغاره * ونبينه ما نشف لحده
يطلبون الوصي ابّيعه * واشوفه دمعته ابخدّه

كلّ العجب حيدر يقودونه بلفقار
وماكو اله من شيعته وانصاره نغّار
قادوا الوصي اشلون * يا زهرة الكون
اليطلب امن الله الرضا يا زهره يرضيچ
*****•••••*****
ي فاطم لو تأمّلنا * روايات النبي كثره
يقول المصطفى عنّچ * انتي الطاهره الزهره
ونتي أمّه وي روحه * وبضعه نابضه ابكتره
ولا راعوا العِدا فضلچ * ي نور الهادي والعتره

يام الحسن كسروا لچ العدوان ضلعين
وبعدچ يرضّون ابحقد اضلوع لحسين
ولطموا لچ اعيون * يا زهرة الكون
اليطلب امن الله الرضا يا زهره يرضيچ
*****•••••*****
ي بنت المصطفى الهادي * ي ريحة طينة الجنّه
ي كوثر جنّة الباري * اليحچي الذكر عنّه
روايات النبي ابحقّچ * يقولون البشر سُنّه
يقول المصطفى فاطم * بضعه يا خلق مِنّه

انتي البتوله الطاهره بارينه يرعاچ
ابتفّاحه من جنّة عدن يا زهره سوّاچ
ابسر الله يدرون * يا زهرة الكون
اليطلب امن الله الرضا يا زهره يرضيچ
*****•••••*****
ملايك ربّي يا زهره * عندچ بالشرف تخدم
شرفها كل وگت تنزل * تجيچ لدارچ اتسلّم
وحي بارينه يستأذن * عليكم والعِدا تهجم
عجب كل العجب والله * يقولون الهجم مسلم

اللي هجم دارچ يوصفونه بلاسلام
وان كنتي في دارچ أبد ما ضرّه اقدام
وبصدره لضغون * يا زهرة الكون
اليطلب امن الله الرضا يا زهره يرضيچ
*****•••••*****
أبو فاطمة الحدب الأحسائي
١٤٣٧/٥/٢٥هـ

قصيدة في استشهاد السيدة الزهراء عليها السلام
على وزن وطور قصيدة السيد عبدالخالق المحنّه

مر بيه لو طيف .. مشتاقه لعيونك
صار الدمع كيف .. يالغالي من دونك
عذبني الغياب * يا أغلى الاحباب
----------------
القصيدة
يا حيدر شلون .. مهضومه واتصبّر
عيني يلطمون .. وهم ضلعي يتكسّر
والمحسن انصاب * يا داحي الباب
*****•••••*****
يحيدر بنت ابوها آنه ويعرفوني
وحيدة والدي البضعه يسمّوني
وبعد طه النبي كِلْهم يخلّوني
حزينه اواجده وبعده يهضموني

يا حيدر القوم .. ما راعوا اوصيّه
حاطتني لهموم .. من هجموا اعليّه
شذكر من امصاب * يا داحي الباب
*****•••••*****
يحيدر وضعي لا تسألني وش حاله
ضلوعي امكسّره ودموعي همّاله
لطمني الما يخاف الله ولا بالى
ولا راعى النبيّ المصطفى وآله

الضلعه مكسور .. يا حيدر اشحاله
ظل قلبه مفطور .. ودموعه همّاله
من فعل لاصحاب * يا داحي الباب
*****•••••*****
يحيدر يا علي ابدنيايه شمسويه
أنه بنت النبي الوصّى النبي بيّه
ذنب مالي وعدّوي يهجم اعليّه
كسر ضلعي اوقعت ابلوعه مغشيّه

وصّى النبي وقال .. حفظوها هالزهره
وعصروني في الحال .. بس ما وصل قبره
ومنّك فلا هاب * يا داحي الباب
*****•••••*****
بعد كسر الضلع يابا الحسن تدري
نبت مسمار بابك في وسط صدري
وغدت نار الحقد وسط القلب تسري
ونزف دمّي وخلص من هالدهر عمري

بابك يبو حسين .. أذّاني مسماره
ودمومي صوبين .. من فعله تتجارى
ومنّي القلب ذاب * يا داحي الباب
*****•••••*****
أنه البضعه ورحيلي يا علي قرّب
أحس روحي وفؤادي ابهمّه يتعذّب
أوصّيك ابنيني والقلب يلهب
حسن وحسين أبو اليمّه وبعد زينب

بولادي لصغار .. يا حيدر اوصيتي
باچر بلا اخمار .. تتغرّب ابنيْتي
تبقى بلا احجاب * يا داحي الباب
*****•••••*****
محمد عبدالله الحدب
١٤٣٧/٣/٢٩هـ

في ذكرى استشهاد السيدة الزهراء عليها السلام ( حوارية مع ابنتها الحوراء زينب عليها السلام )

آنه ام الخدر والعفه واحجاب
تدريني وديعة داحي الباب
من عنّي ترحلين ** چني انظر احسين
سابح بالدمه مرمي اعلى لتراب
*****,,,,,*****
قلبي امن الحزن والآه مفجوع .. يا زهرة نبينه
من اذكر ي يُمّه امكسّره اضلوع .. منّچ يا حزينه
أكتم لوعتي وتفضحني لدموع .. يا نور المدينه
وابديها لعلي وبصوت مرفوع .. بويه اشصار بينه

يا يُمّه بعد خير النبيّين
ضلعچ ينكسر أنظر له بالعين
واسمع دوم لونين ** چني انظر احسين
سابح بالدمه مرمي اعلى لتراب
*****,,,,,*****
قلبي من نظرتچ بالحزن ذاب .. يا سوري وعمادي
شفتچ حايره ومعصروه بالباب .. من جور الأعادي
يا يُمّه الضلع من عندچ انصاب .. وتصوّب فؤادي
وآنه ابحسرتي ظل دمعي سچّاب .. واصفج بالأيادي

يا يُمّه القلب من شوفتچ ذاب
ودمعي اعلى الوجن بالحسره سچّاب
خوفي بس تروحين ** چني انظر احسين
سابح بالدمه مرمي اعلى لتراب
*****,,,,,*****
يُمّه من نظرت النار بالدار .. وقليبي ابمصابه
وشفتچ حايره ما بين لأشرار .. وبهم وكآبه
ومچتوف ابحبل حجّة الجبّار .. ودمعه بانسكابه
نكّس راسه حامي الحمى والجار .. مابين الصحابه

قلبي يالوديعه حرقته النار
بس شفت الحطب جابوها للدار
ومن شفتچ تلوجين ** چني انظر احسين
سابح بالدمه مرمي اعلى لتراب
*****,,,,,*****
بيّه من بعد عيناچ تدرين .. شفت آنه العجايب
قلبي من نظرت اخواني ميتين .. صار ابحسره ذايب
وراس المرتضى انظر له شطرين .. من عظم النوايب
ليتچ عالهزل يُمّه تشوفين .. بنتچ بالمصايب

يا يُمّه الدهر راواني لهموم
وانظر اخوتي تسبح بلدموم
من عينچ تغمضين ** چني انظر احسين
سابح بالدمه مرمي اعلى لتراب
*****,,,,,*****
راسي من مصايب هالدهر شاب .. يا يُمّه انظريني
وقلبي لو صخر بعد الأهل ذاب .. تشهد لي سنيني
ذوّبني البعد وفراق الأحباب .. ورافقني ونيني
ضمّيني ابكتر يُمّه بلتراب .. خلها تغفى عيني

آنه اخت البطل بو الغيره عبّاس
ما مثله شفت في الشيمه والباس
بس توقع الچفّين ** چني انظر احسين
سابح بالدمه مرمي اعلى لتراب
*****,,,,,*****
محمد عبدالله الحدب
١٤٣٧/٥/٢٢هـ
بو فاطمة الأحسائي

استشهاد السيدة الزهراء عليها السلام

يجدّي هاليوم تجي لك بالأسى فاطم
ملطومة العين دمعها اعلى الوجن ساجم
منها . كسروا ضلعين * وتسعر . بيها نارين
بالأسى فاطم
.....*****.....
حسينك يا أبو البضعه حسينك
يجدّي اليوم بالمهجه أكلّمك
أريدن أشرح الموقف وأعلّمك
عن الزهره الغِدت ياجدّي أمّك
ظلمها من بعد عيناك خصمك
وبقت بعد الهضم ويلي تحشّمك

بس غابت الروح يجدّي هجمت اعلينه
زمرة ملاعيين قصدها شلون تذّينه
هِجمت . عالميامين * وتسعر . بيها نارين
بالأسى فاطم
.....*****.....
أنه ابنار الغِدت تسعر يجدّي
أريدن أوصف ال( عالزهره ) يسدي
لفت زمرة ظلم للدار تحدي
علينه امن الحقد نيران تبدي
تمنّيت ابعجل تنفطر چبدي
ابحياتي لفاطمه والروح أفدي

أتمنّى مرّات يجدّي الموت يلفيني
ولا أبقى لليوم أشوف الزهره تشجيني
منها . لطموا العين * وتسعر . بيها نارين
بالأسى فاطم
.....*****.....
تمنّيتك يجدّي الهادي تحضر
تشوف البضعه بالآهات تُعصر
ابصدرها ويلي المسمار أثّر
ومحسنها على الأعتاب من خر
تشوفه شلون يالهادي تعفّر
وبحبال العدا قادوه حيدر

وسفه ورا الباب نشوف الزهره تتألّم
وحيدرنه بحبال يجدّي شلون يتوسّم
ماله . بعدك امعين * وتسعر . بيها نارين
بالأسى فاطم
.....*****.....
حال الزهره بالحسرات يشتد
تنادي والدمع يجري على الخد
أيادي الشر عليّه اشلون تمتد
وأبويه الهادي المختار أحمد
وأنه البيّه وصايا اهواي ردّد
أبد لا تظلموا بضعة محمّد

نسمعها بالآه يجدّي الزهره تتحسّر
ابنيني أوصيك بعد عيناي يا حيدر
منّي . قرّب البين * وتسعر . بيها نارين
بالأسى فاطم
.....*****.....
ظلّت تنتحب بالآه فاطم
ودمعها عالوجن يا حيف ساجم
تناجي الخالق الرحمن دايم
يربّي ارحمها شيعتنه يراحم
ولا ترحم يربّ الكون ظالم
وأريدن ياخذ ابثاري القائم

يجدّي اليوم تجيك الزهره ولهانه
وقليبي ملهوف وتسعر آه نيرانه
جاتك . قرّة العين * وتسعر . بيها نارين
بالأسى فاطم

محمد عبدالله الحدب
١٤٣٦/٣/٧هـ

لذكرى وفاة السيدة فاطمة المعصومة عليها السلام

آنه الزچيّه فاطمه ولفاطمه جيت
من وصّلت قم ابحزنها الها تعنّيت
......••••......
ابكل بلد عندي ضحيّه وبيها اولاد
وكل الرزايا شيّبت راسي ولفّاد
منهم ضحايا ابكربلا ومنهم في بغداد
( وكلهم عليهم نوّحت والجيب شقّيت )
......••••......
آنه الوديعه اللي شفت بالدنيه آلام
أم العقيله اللي سبوها ليلدة الشام
واولادي شافت كم هضم من جور لأيّام
ومن كسرة ضلوعي ولطم عيني تأذّيت
......••••......
مات الرضا وآنه الحضرته وقت لوداع
وشفته يويلي بلحظة افراقه ولنزاع
وشفت الجواد ابنه لطم هامه ولاضلاع
ايقلّه يبويه امن المدينه لدفنتك جيت
......••••......
فارق علي أرض المدينه ابعزّه وامجاد
حوله بناته والأهل كِلْها ولاولاد
وسَمّه عدوّه ابن الخنا المأمون في الزاد
ولاجله لفيت ابكسرة ضلوعي وتعنّيت
......••••......
لا لا تلوموا فاطمه من سمعت الناس
تعزّيها بمصاب الرضا وتلطم على الراس
وحقها لون ماتت وفاضت منها الانفاس
ما شافت ابن أمها بعد ما فارق البيت
......••••......
لهفي عليها فاطمه المعصومه ويلاه
قصدت أخوها لمشهده بس ودها تلقاه
لكنها سِمْعت بالخبر والناعي ينعاه
وماتت من اللوعه وعليها بحسره ونّيت
......••••......
أخت الرضا ما شافته وخمدت لها انفاس
ما شافته فوق الثرى ابخيل العدا انداس
وبنتي الوديعه حسين نظرت له وعبّاس
وشافتني جنب حسيني وبدمّه تحنّيت
......••••......
أبو فاطمة الأحسائي
١٤٣٨/٢/١٩هـ

وفاة السيدة فاطمة المعصومه عليها السلام

يخت الرضا ما ظنّتي شفتيه مذبوح
وجدّچ نظرته اعلى الثرى بدمومه مطروح
وما شفتي چفّين * مقطوعه لحسين
وراسه نظرته اعلى الرمح يا فاطمه ايلوح
.....*****.....
آنه زينب النظرت احسين عالغبره
دامي جسمه ومرمي وسفه امدلّل الزهره
شفته يالمعصومه دمّه يجري من نحره
والخيول الأعوجيّه رضّضت صدره

اتقرّبت يمّه ابدمع يجرح الوجدان
ربّي تقبّل من بني ياسين قربان
شفت الدم ايسيل * وترضّه الخيل
وراسه نظرته اعلى الرمح يا فاطمه ايلوح
.....*****.....
آنه شفت احسين جنبي امهشّمه اضلوعه
والقلب منّي يجر لوعه ابأثر لوعه
ونتي ما شفتي الرضا وچفّينه مقطوعه
وما سمعتي امن الأخو ونّات مرفوعه

ما شفتي طفله اعلى الصدر مقطوع لاوداج
وما شفتي خنصر منقطع من چفّه وهّاج
وما شفتي لچفوف * مثلي بلطفوف
وراسه نظرته اعلى الرمح يا فاطمه ايلوح
.....*****.....
من سمعتي مات أخوچ وفارقت روحه
متّي ونتي ما سمعتي ونّه من نوحه
وآنه شفت العيله يمّي كِلْها مذبوحه
وروحي ما راحت وهي ابهالحاله مجروحه

بس ما سمعتي بالرضا غابت لچ انفاس
وآنه نظرته ابكربله مذبوح عبّاس
والسهم بالعين * ومقطوعه چفين
وراسه نظرته اعلى الرمح يا فاطمه ايلوح
.....*****.....
من وصلتي لقم وشفتي اعلام منشوره
والخبر جالچ وصرتي ابلوعه معذوره
چبد أخوچ امقطّعه وبسمومه مسعوره
وآنه چبد احسين شفته ابسهمه مشطوره

ما شفتي قطعه امن الچبد منزوعه بسهام
وما شفتي اخوچ اعلى الثرى ابعلّته اينام
يوم لهوى وطاح * وجسمه امتلى اجراح
وراسه نظرته اعلى الرمح يا فاطمه ايلوح
.....*****.....
بالحزن فاطم قضيتي وصرتي ابغربه
في البعد صاير ضريحچ والبشر قربه
وكم مناره ابهالضريح اتنوّر وقبّه
وآنه يا فاطم ضريحي يشتكي الغربه

مثل الرضا صاير ضريحچ فاطمه اجنان
وآنه ضريحي ابلا بشر يمّه ولا اخوان
ودموعي صوبين * منّ اذكر احسين
وراسه نظرته اعلى الرمح يا فاطمه ايلوح
.....*****.....
محمد عبدالله الحدب
١٤٣٧/٣/٢٣هـ

خير الاعمال الصلاة على محمد وال محمد

اللهم صل على محمد وال محمد

اللهم صل على محمد وآل محمد وعجل فرجهم

لذكرى استشهاد الصديقة فاطمة الزهراء عليها السلام

شايل انوار المدينه . لو شمس فوق النعش
يا علي لا تقول فاطم . ماتت أم اثمنطعش
وچنّك ابهالليل حاير * تدفن الشمس ابمقابر
.....•••••.....
ابفقد فاطم حزينه تبچي الاكوان
ودمعك اتصبّه يحيدر چنّه نيران
واضحت الدنيا يحيدر صرخة أحزان
وعالم الأملاك ينعى ويبدي اشجان

أظلم الكون وتغيّر . من رحل نور الشمس
ومنكسر ضلع الثريّه . من هجم ذاك الرجس
وانته يابو حسين صابر * تدفن الشمس ابمقابر
.....•••••.....
يا علي كل من يشوفك تهمل ادموع
يعرفك بعد الزچيّه وطه مفجوع
لاچن العالم ابحالك صار مصدوع
لنّك ابنعش الزچيّه حاني لضلوع

دمعك العلخد مسيله . لو على الوجنه جمر
وعالنعش ياهو التشيله . الخلّه ظهرك منكسر
ومتّخذ هالليل ساتر * تدفن الشمس ابمقابر
.....•••••.....
ماشي ابهالليل شايل أمّ لحسين
ويّا أصحاب المودّه مقصدك وين
قاصد الروضه الشريفه ابدمعة العين
لو ضريح الهادي قاصد تخفي لونين

للبقيع ابدمعه قاصد . تدفن الزهره ابشجن
لو تسير ابنور فاطم . تدفنه ابجنة عدن
مختفي عنّ النواظر * تدفن الشمس ابمقابر
.....•••••.....
هاذي بنت الهادي طه اشلون تنضام
وينكسر منها ضلعها ابزمرة اجرام
بعد أبوها الچان خيمه عاشت أيّام
منهو قال اللي ظلمها يعرف اسلام

انلطم خدّ البتوله . وانكسر منها ضلع
يعني عين الزهره صارت . تبچي من دم مو دمع
وانته بعد الزهره حاير * تدفن الشمس ابمقابر
.....•••••.....
يا علي ندري البتوله ماتت ابنوح
بالقلب ويّا صدرها يا علي اجروح
ودنه بس نعرف قبرها ونقصده انروح
بلچه انخفّف حزنها بالبچي انّوح

وينه قبر أمّ الأيمّه . دلنه يا حيدر علي
تدري امن انزور فاطم . همنه كلّه ينجلي
جاوب المكسور خاطر * تدفن الشمس ابمقابر
.....•••••.....
أبو فاطمة الأحسائي
١٤٤٠/٥/١٠هـ

في ذكرى استشهاد الزهراء عليها السلام

يابا الحسن مثل الشمس رد البتوله
ما تنظر اعله وجنتي الدمعه هموله
وظلمه ترى الدار * يا حامي الجار
.....*****.....
زينب الخلتني أمي . واحچي وياك ابألم
اموادع أمّ احسين خلّف . بويه بقليبي سهم
چنت أشوف الدنيا حلوه . وما لقيت ابدهري هم
وبعيون الزهره أنظر . كل أمل صوره ارتسم

واليوم يابويه ابسهم مفطور قلبي
والدنيا أمست مظلمه وماشوف دربي
بالدنيا شلصار * يا حامي الجار
.....*****.....
بويه وين الزهره أمّي . ما تسلّي وحدتي
ما تجي تسمع ونيني . وتسمع اونين اخوتي
وتمسح الدمعه يبويه . من تسيل ابوجنتي
ماتت الزهره يحيدر . وخلّفتني ابغربتي

الزهره ماتت والدهر خيّم ظلامه
وخلّتنه يابو المجتبى ابحيره يتامى
محتاره الأفكار * يا حامي الجار
.....*****.....
بويه لو تنظر أحوالي . والله اتفطّر صخر
من فقدت الزهره وآنه . طفله محنية ظهر
عيوني لو تنظرها حمره . بويه من طول السهر
كم ليالي اتمر عليّه . وما أنام امن القهر

بعد الزچيّه يا علي شفت الأذيّه
چن الجرى لمّي الطهر جاري عليّه
من هجمت أشرار * يا حامي الجار
.....*****.....
بويه قلبي اعله الزچيّه . تعلى بالهم دقّته
والدهر جنّي أسمعه . ينعى أمّي ابونّته
والحسن دايم أشوفه . ودمعه صابغ وجنته
ومن أصد لحسين أنظر . فوق خدّه دمعته

قلب الحسن مفطور بويه ابهالمصيبه
وحسين يصرخ وين زهرتنه الحبيبه
وين أم لاطهار * يا حامي الجار
.....*****.....
طابت اجروحك يحيدر . لو نسيت أم الحسن
ما أظن تنساها لحظه . وهيّه لقليبك سكن
يا علي تدري البتوله . ليّه واخواني سكن
وتدري بفراق الزچيّه . خلّى بقليبي شجن

يالردت ابامره الشمس رد الوديعه
بعد الزچيّه فاطمه شفت الفجيعه
اوما نشفت اعبار * يا حامي الجار
.....*****.....
أبو فاطمة الأحسائي
١٤٤٠/٥/٢٨هـ

قصائد وفاة السيدة الجليلة أم البنين عليها السلام ( من الإرشيف ) 👇🏽