الشاعر محمد الجماسي

عمة شنهي اليوجعك حاچيني
متنك الياذيك هَم ياذيني
عمّه حگك لو تون
يوجع إصواب الـمتن
مثل عمتك بالحزن گضّيت عمرك
ــــــــــــــــــــــــــــــــــــــ
عمّه يالكاظم ونينك شگ إذاني
وذكّرتني بالشمـر من سلبّاني
آنه مثلك بالغرب محّد اجــاني
والخرابه هم سجن نفس المعاني

عمّه اصبر لا تسد اعيونك
عندي خِبره خل اداوي امتونك
جايبه الجرحك دوه
تربه من طف نينوه
ليش عمّه ابلا ضوه گضّيت عمرك
ــــــــــــــــــــــــــــــــــــــ
عمه شفت برگبتك حز السلاسل
واذكرت ذيچ الرگاب الدمهه سايل
خلصت العركه واجاني الشمر شايل
راس الإحسين وبعد راس أبو فاضل

خل ألفّن رگبتك بالشيله
بيهه عطر الـمحّد امفيّيله
من لگيتك عالجسر
طاح مني نص عُمُر
بين سندي والشمـر گضّيت عمرك
ــــــــــــــــــــــــــــــــــــــ
عمّه سوط الضاربك ضاربني نفسه
تبچـي من دم لو تشوف امتوني هسه
من ضَربهُم طاح نصّ اچتافي احسه
وظهري يوجعني وعلي لليوم اهيسه

والشمر اذاني بحچـاياته
ظهري صاير خشبه من طگّاته
فكلي بابك خلّي اطب
جيتك وطول الدرب
ليش اگولن بالغرب گضّيت عمرك
ــــــــــــــــــــــــــــــــــــــ
ادري بالهم فاطمه المعصومه عاشت
عنهه تبعد هيچ حكمة الله شائت
مو سبيّه ولا جثث بالـهيمه عافت
راس ما شبگت ولا عالنحر ماتت

ظلت ابدار الستر محفوظه
مو سبايه وبالقصر معروضه
نظرة الشامت جبل
وگصتي شط أمن الخجل
ابلا عشيره ولا أهل گضّيت عمرك
ــــــــــــــــــــــــــــــــــــــ
عمّه هم شايف مره من مستحاهه
اتطيح من الناگه لو شافو عباهه
هيه واثمانين تتراكض وراهه
عمّه بالنسبه الي انته إبنفاهه

حرمه ماعندك مشت مسبيّه
اخمسطش عامك قياساً بيّه
تنحسب نقطه ابّحر
بس تظل عالي القدر
مثلي كل يوم ابسفر گضيت عمرك
ــــــــــــــــــــــــــــــــــــــ
أنته راهب وآنه يالكاظم عقيله
متت بالسم وآنه ميته أعله الهزيله
أنته معصومه عفت وآنه العليله
اشگد تشابُه رغم فترتنه الطويله

والقصر نفس القصر والصوره
والخرابه تشبه الطاموره
امصليه وآنه جالسه
يالصلاتك مدرسه
والحزن تتنفّسه گضّيت عمرك

محمد الجماسي

#اللهم_عجل_لوليك_الفرج

11.1K viewsedited 04:13