الامام العباس ع


قل هو العباس محراب الوفاءِ .. وهنا الوفى صلى لهُ
لحسينٍ قالَ افديهِ دمائي .. بدمي أفي دمائهُ
باللهِ قالَ تَوكُلي ... وهو ينادي ياعلي
              اني انا العباس
 . . . . . . . . . . . . . . . . . . . . . . .

بال(قل هو الله احد ).. اقسم وأنه ادري بهالقسم
(والفجر ِ. وليالٍ عشر ) .. متمسك ابجفه العلم
(والشفعِ والترِ ) قسم .. بالعهد وفه وانطه دم
معراجه نحو الإبا .. وب(قاب قوسينِ ) ابتسم

قابَ قوسينِ دنا نحو الحسينِ .. متبسمٌ في وجههِ
طالب الأذن ليفديه اليدينِ .. ويفتدي بعينيهِ
واتضح الأمر جلي ... وهو ينادي ياعلي
              اني انا العباس
 . . . . . . . . . . . . . . . . . . . . . . .

يا قمراً عطائهُ .. كعبة وفه وبيها نحج
أعطى حسيناً روحهُ .. كال العذب من دونه مج
بدرُ المحاسنِ وجههُ .. ومن شوفته اتذوب المهج
اسمُ الولاءُ والوفا .. صارن سوه اويه اسمه نهج

وقفَ بينَ الاعادي كالمناره .. والسيفُ في يمينهِ
صولةٌ والجيشُ قد بان انكساره .. وعليٌ في جبينهِ
وصوتهُ إذ يعتلي ... وهو ينادي ياعلي
              اني انا العباس
 . . . . . . . . . . . . . . . . . . . . . . .

رايته الخضراء مذ  .. رفّت عواصف عالعده
مكسوفةٌ شمس الضحى .. من شاهدت نوره بده
اتاهُ نهر العلقمي  .. ضامي ويريد ايبرده
كفيهِ فلكاً سارَ في .. امواج اميه الصاعده

إنهُ البدرُ ومن صلبِ الكواكب .. بنورهِ زالَ الدجى
الفارسُ ابنَ الفارسُمن الَ غالب .. وصار أبواب الرجا
يانفسي منه فسألي ... وهو ينادي ياعلي
              اني انا العباس
 . . . . . . . . . . . . . . . . . . . . . . . .

خضراءهُ غارت على .. جيش ال اميه وجحفله
كإنما الحشرُ غدا .. يم الشريعه ابكربله
مذ شاهدوه قد أتى .. بالواقعه وبالزلزله
( وأخرجت اثقالها ) .. ضربة يمين المرجله

جاءَ من خيامهِ ذاك النداءِ .. صوتُ حسينٌ جاءَ لهُ
انما العباسَ نبراسَ الفداءِ .. فخرٌ كانت فعالهُ
للارضِ قالَ زلزلي ... وهو ينادي ياعلي
              اني انا العباس
 . . . . . . . . . . . . . . . . . . . . . . .

إذ قطعوا يمينهِ .. ما همه كطعة يمنته
وقطعوا شمالهُ .. عالجود احنى جثته
بعينهِ مسكَ السهمْ .. خافن يصوب جربته
ما هدّهُ كلَ الجرى .. طيحة جربته الهدّته

مذ هوى مفضوخُ رأساً بالعمودِ .. وبِلا كفٍ لما هوى
اصبحَ طعماً لأسيافِ الجنودِ .. تبكيهِ ارضُ نينوى
بكائُها إذ يعتلي ... وهو ينادي ياعلي
              اني انا العباس
 . . . . . . . . . . . . . . . . . . . . . . .

أتى الحسينُ مسرعاً .. حاچا  ابكسرة خاطره
الآن قلت حيلتي .. وتشمتوا بيه تره
اخاهُ والظهرُ انكسر .. وحط ايده فوك الخاصره
فوقَ اخيهِ قد هوى .. وقبّل اجفوفه ومنحره

قالَ أتركني اخي جنبَ الفراتِ .. اطفالكَ تشكوا الضمى
قل لهم للجودِ افنيتَ حياتي .. قبلَ الماء سَكبتُ الدما
من زينبٍ لا عذرَ لي ... وهو ينادي ياعلي
              اني انا العباس
 . . . . . . . . . . . . . . . . . . . . . . .


خادم أهل البيت عليهم السلام
عمار العيساوي الكربلائي

الحسين والعباس ع


هاي آخر مره تشوفك عيني
بينك حال الموت وما بيني
انته اعله الشاطي وكاسر ظهري
بعدك لحظات وينحز نحري
. . . . . . . . . . . . .

اجيتك للنهر ياخويه بالحسره
ابصدري ارماح فكدك خويه متكسره
اجيت وشفتك ابيا حاله عالغبره
صريع ابلا نظر لا يمنه لا يسره

من اتعنيتك صرت ابحيره
وقبّلت اجفوفك يابو الغيره
ترجف جفينك والدم يجري
بعدك لحظات وينحز نحري
. . . . . . . . . . . . .

يخويه النبله لمن صوبت عينك
بيش اتجرها مكطوعات جفينك
اباب الخيمه انه واسمع ونينك
النبله امسممه بس الله اليعينك

هاي النبله اتمنيت بعيني
وريت المكطوعات ايديني
بفكدك حسيت بقلة صبري
بعدك لحظات وينحز نحري
. . . . . . . . . . . . .

احط راسك بحجري ولا ترد راسك
انه ادري اشكد رقيق ومرهف احساسك
خلّيك اعله حجري تخمد انفاسك
ليش اعله التراب ايغيب نبراسك

راسك وعضيدك حطه ابحجره
ليش اترد راسك فوك الغبره
يلي امشاركني بروحي وعمري
بعدك لحظات وينحز نحري
. . . . . . . . . . . . .

امن المس طبرة العامود أنه ابأيدي
اتمناها بيه الطبره يعضيدي
يخويه ايعز عليه سالم اوريدي
وانته كبلي خويه تموت فوم ايدي

كون آنه الكبلك يتولوني
بسيوف وبرماح ايوذروني
هذا المكتوب اعليه وادري
بعدك لحظات وينحز نحري
. . . . . . . . . . . . .

بخيمنه جم طفل جم طفله تانينه
شجاوب لليكول العطش ماذينه
شكل الها اذا سألتني اسكينه
جا وين الكمر عباس جا وينه

خويه ايحيرني اليسأل عنك
وخايف لا واحد يسمع ونك
اطفال وما تتقبل عذري
بعدك لحظات وينحز نحري
. . . . . . . . . . . . .

اودعك خويه بعدك ادري يولوني
انكسر ظهري بغيابك همه يدروني
بسيوف وعواسل من يوذروني
يخويه بخيلهم عمداً يسحكوني

وراسي ايرفعونه برمح العالي
ونبله المسمومه ابنص دلالي
بهالحال الربي امسلم امري
بعدك لحظات وينحز نحري
. . . . . . . . . . . . .

خادم اهل البيت عليهم السلام
عمار العيساوي الكربلائي

رملة والقاسم ع


يالرحت عن عيني راح اتسله بطيوفك
حسره ظلت بيه اشوفن حنة اجفوفك
ابني ذابت شمعته .. ويه حركت خيمته
. . . . . . . . . . . . . . . . .

الفاكده شاب اتعرف لوعة عذابي
هي بس الوالده التعرف مصابي
ابني عمر اربعطعش ورده ابحسابي
ترف ابني وادري ما يحمل عتابي

هاجس ابكلشي احسه عايش ويايه
بدمي يجري وصار نبضي وشوف عينايه
كلبي سكتت نبضته .. ويه حركت خيمته
. . . . . . . . . . . . . . . . .

انه ظهري اعله المهد ياما حنيته
هرش جبدي جاسم ابدمعي سكيته
شفته يكبر جنت اظن ثمري جنيته
اكبال عيني اتهدم الحلم البنيته

عشت احلى ايام عمري بوكت تربيته
والنعم يبني التعبئه وياك وفيته
وفي من دم ركبته .. ويه حركت خيمته
. . . . . . . . . . . . . . . . .

حاسبه للموت بس احسبته اليه
ما حسبته ياخذ اوليدي امن اديه
وينه اليحب راسي كل صبح ومسيه
باللحد ومعطر احضان المنيه

الموت لو ماخذني اليه وعايف وليدي
اعليه فكدت اسنين عمري وفرحتي وعيدي
بوجهي ماتت بسمته .. ويه حركت خيمته
. . . . . . . . . . . . . . . . .

راح اصبر روحي يوليدي بغيابك
راح اكعد يمه اسولف وي ثيابك
الخاطر حسين اقبلت يبني ابمصابك
انه مو ندمانه بس حزني المصابك

شيل راس امك ييمه ابكطعت اوريدك
وللحسن وديله شمعة عرسك بأيدك
عمك اسعي النصرته .. ويه حركت خيمته
. . . . . . . . . . . . . . . . .

هاي اخر كلمه من عندي استمعها
فاطمه اعله حسين يبني امسح دمعها
كافي هم امصابها ولوعة وضعها
من تون الونه تلجمها ابظلعها

سجل اسمك بالشهاده ولا تعز روحك
وروح يم الزهره يبني تضمد اجروحك
وكلبي عوفه بحركتها .. ويه حركت خيمته
. . . . . . . . . . . . . . . . .

خادم اهل البيت عليهم السلام
عمار العيساوي الكربلائي

ميمر .. للقاسم ع


سيف النصر من دم وريدك حده
واتخير الابطال من تتحده
لحسين بالك شمر يوصل حده
ذخر الابن .. يوم المحن
وانته البقيه امن الحسن
والعنده عم مثل حسين يا دنيا يترجاها
. . . . . . . . . . . . . . . . .

يامن الهاشم بالمراجل عينه
بهاي الحرب لحسين عمك عينه
بكطعة ركبتك للحسن گر عينه
من تلتمس .. بدر وشمس
ذكرهم ابصولات امس
سيف الحسن بي صولات التاريخ ما ينساها
. . . . . . . . . . . . . . . . . . . .

رايتك خلها ابأيد خل سيفك بيد
والصاف طبعه ايلكط احيايه البيد
لكطهم وفرسانهم خل تبيد
نار الغضب .. زادت لهب
خلي العده لنارك حطب
من تشتعل نارك غيض ياهو اللي يتحداها
. . . . . . . . . . . . . . . . .

بيض الصوارم لا ترد من سلها
لاكي السمر لا تشتكي من سلها
هالعده لازم ينكطع منسلها
هاي الحرب .. صد وظرب
والكثره معروف اتغلب
تالي النصر مو للسيف الدم رايته علاها
. . . . . . . . . . . . . . . . . . .

عمك ينادي ومهجتي ماردها
دون ابو اليمه شوفتك ماردها
جيوش العده يبني ظهر ماردها
سيف النصر .. بي ينكسر
ماردها والعسكر تفر
كابلها بسم العباس وبيا علي اتلكاها
. . . . . . . . . . . . . . . . . . .

فخر الهواشم يبني يا جاسمها
هاي الحرب همها اجه وجا سمها
ماريدك الا وهامتك جاسمها
يا كل هلي .. لترد الي
ودمك اخبطه بدم علي
الاكبر وگر عين عيني وهاي يا جاسم الارجاها
. . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

نزال .. او . فتحت عزة .. القاسم بن الحسن ع


يمه رايح .. سيفي بيميني ودعائج درع اليه
يمه رايح .. عمي واجب نصرته بالغاضريه
. . . . . . . . . . . . . . . . . . . . . . . .

يمه كبل الواجب آني اتطوعتله
عمي رباني وابن اني صرتله
ريت مو فدوه الف فدوه رحتله
يمه واني بكطع نحري اتقدمتله

يمه رايح .. طفّي شمعات العرس هاي المسيه
يمه رايح .. عمي واجب نصرته بالغاضريه
. . . . . . . . . . . . . . . . . . . . . . . .

يمه حضريلي الجفن مو ثوب عرسي
نفسي لا مو بالعرس بالموت نفسي
ديني وحسين اصبحوا عنوان قدسي
ويه ابوي الحسن هاي الليله امسي

يمه رايح .. على الكوثر التقي بحامي الحميه
يمه رايح .. عمي واجب نصرته بالغاضريه
. . . . . . . . . . . . . . . . . . . . . . . .

العمي اني اتقدمت بالطف فدائي
وي علي الاكبر اريد انزف دمائي
بايعت عمي واله مطلق ولائي
هاشمي المنبع تراني وكربلائي

انه رايح .. العمي يختم كربلائيّي الهويه
يمه رايح .. عمي واجب نصرته بالغاضريه
. . . . . . . . . . . . . . . . . . . . . . . .

خل تشوف الناس ثمر ارباج يمه
ابنج ايوافي الربه من يفدي عمه
واني منج رايد تكولين جلمه
روح الله وياك كوليها ييمه

انه رايح .. ورخصتج صك الرضا يمه عليه
يمه رايح .. عمي واجب نصرته بالغاضريه
. . . . . . . . . . . . . . . . . . . . . . . .

يمه ادعي وليدج ايحصل مراده
الموت وي حسين يا يمه سعاده
للمنيه طالع ابعزم واراده
اثنين هنّه لو شهاده لو شهاده

انه رايح .. يمه واسي ابدمي فاطمة الزجيه
يمه رايح .. عمي واجب نصرته بالغاضريه
. . . . . . . . . . . . . . . . . . . . . . . .

يمه كل يوم المسه علكيلي شمعه
وابنج افتخري ولا تجرين دمعه
لا تندبيني اذا صوتج اسمعه
ينكسر كلبي عليج وهذا طبعه

انه رايح .. للحسن . كولي اذا عندج وصيه
يمه رايح .. عمي واجب نصرته بالغاضريه
. . . . . . . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

ليلى والأكبر ع



فراكك يالاكبر يسلب الروح . ورمح الفراك اتكسر ابصدري
وداع الابن ويه الام اجروح . و وياك احسّن ودعت صبري
آه .. بحسراتي كلبي محترك
آه .. يالبيك دلالي يدك ..... يالاكبر
. . . . . . . . . . . . . . . . . .

يالساكن عرش كلبي يفتشت عيني يايمه
اودعك بس وداعك موت موش اوداعك ابجلمه
يانبضة فؤاد امك يا دنيايه والبسمه
ياشريان عمري البيك يفتر عالكلب دمه

ما حسّبت تبعدنا الايام . ذاخرتك انه الكبري يوليدي
ما حسّبت تنباك الاحلام . وانه اقدمك للذبح بيدي
آه .. وشلون عني تفترك
آه .. يالبيك دلالي يدك ..... يالاكبر
. . . . . . . . . . . . . . . . . .

يصبي النظر ياهيل يوجه المصطفى جدك
يريح الجنه يا قداح يبستان الورد خدك
اروح وياك . تمشي وياي بكيفك بس اظل عندك
اخذ روحي شلي بالروح والمن عايشه بعدك

نحرك ييمه اتقبله السيوف . ومسامر الطعنات بجروحك
متعني ليك الموت ملهوف . رايد تشابك بالاجل روحك
آه .. ورماح شابكتك شبك
آه .. يالبيك دلالي يدك ..... يالاكبر
. . . . . . . . . . . . . . . . . .

يالطولك شبرته اشبار لحد ما شاب حسيتك
ولحد ما ميزت طولك وعجنت ابروحي شخصيتك
تكبر وانه اكول ازغير امس بالمهد ناغيتك
امس فوك ايدي من تغفه يريح حسين شميتك

ما شبعت عيوني النظر بيك . ولاني اشبعت من جلمة اليمه
ولاني اكتفيت اسمع محاجيك . وكوس البعد سدد علي سهمه
آه .. وموادعك اصبح صدك
آه .. يالبيك دلالي يدك ..... يالاكبر
. . . . . . . . . . . . . . . . . .

اصبر روحي بوداعك واحبس دمعة اجفوني
بين الحسره والتنهيد ذابت مقلة عيوني
بين الويل والياويل ضاعت حيرة اظنوني
اصبر روحي لو اصبرك جبل هم وعلى امتوني

لو انه اصبرك اصبر شلون . ولو صبّرت نفسي منو يصبرك
هاك اخذ كلبي واخذ العيون . واخذ العمر يبني فده العمرك
آه .. روحي بوداعك تنمزك
آه .. يالبيك دلالي يدك ..... يالاكبر
. . . . . . . . . . . . . . . . . .

روح انته فده لحسين وافدي نحرك ابنحره
واسي حسين وانه البيك اواسي فاطمه الزهره
ويّه حسين يا يمه ويّه سيوف التوذره
جسمك خلّه يتوذر وسيل ادماك عالغبره

ماريد يبني سالم تعود . وحسين ابوك يروح مايسلم
كون انته كبله ابروحك اتجود . ومن كبل دمه يسيل منك دم
آه .. حسين الوجد درب العشك
آه .. يالبيك دلالي يدك ..... يالاكبر
. . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

رقية وعلي الاكبر ع



يمي ما رايح وانه اشتاكيتلك
خويه كلي اشلون اذا حنيتلك
ادري هالروحه طويله
وادري جيتك مستحيله .. شلون اذا حنيتلك
. . . . . . . . . . . . . . . . . . .

رايح و ودعتك الله يالملكت احساسي
اليوم اريدنك يالاكبر ما تحبني براسي
رايده اتضمني اعله صدرك لحد كطع انفاسي
رقيتك ياخويه وانته عزوتي ونوماسي

استوحش اغيابك واحس بعيوني
مو دمع جمره وتشب بجفوني
حالي من حال العليله
وادري جيتك مستحيله .. شلون اذا حنيتلك
. . . . . . . . . . . . . . . . . . .

غمضت عيني واشوفك جسمك اموذرينه
وشفت ابوي حسين اجالك والجدم ميعينه
بين خطوه وخطوه يعثر جدمه ويبجينه
نار فكدك جنها تسعر خويه بيني وبينه

ياما كتلك خذني بس خليتني
يا ضحكتي هسه شو بجيتني
النايبه اعليه ثكيله
وادري جيتك مستحيله .. شلون اذا حنيتلك
. . . . . . . . . . . . . . . . . . .

خويه تصفه الحومه وتظل عالترايب دامي
وانه اتنخه واصيحك من تشب اخيامي
خويه من حرك المخيم جمر يجوي اجدامي
لو تظل يمي يخويه وعن خيامي اتحامي

خيامي لو تحرسها من يدناها
هيبتك حيدر و وجهك طه
المصطفى انته سليله
وادري جيتك مستحيله .. شلون اذا حنيتلك
. . . . . . . . . . . . . . . . . . .

نسمة اعذيبي يالاكبر ريّتي امتنانيتك
روحي من الموت ترجع لو نفس شميتك
انه خيتك وانته نبضي يالاخو سميتك
وادري من حظن المنيه تردلي لو ناديتك

طفله واشعر ينعصر دلالي
من يمر طاري المنيه اكبالي
وانه من علتي نحيله
وادري جيتك مستحيله .. شلون اذا حنيتلك
. . . . . . . . . . . . . . . . . . .

خويه وين تريد اخذني ارجوك لتخليني
خذني اشاكف بالسهام ابيسرتي ويميني
الطبره يتلكاها راسي والدمه اتصك عيني
وروحي نتقاسمها خويه بينك وما بيني

من اكلك روح تطلع روحي
تبقى . حال حسين زاد اجروحي
مدمعي ميجف مسيله
وادري جيتك مستحيله .. شلون اذا حنيتلك
. . . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

عبد الله الرضيع والرباب ع



تعال . حظني اتوسلك عبد الله يبني
تعال . شبسرعه ونويت اتروح عني
ست أشهور عمرك
وانه سنين انطرك
تاليها غبت عن عيني يبني
. . . . . . . . . . . . . . . . . . .

حضرت المهد من اسمعت جاي
وحسيتك ابسرّي تسولف وياي
وحدي وابتسم .. يقضه مو حلم
تناغيني بهداي
تسولفلي وتناغيني كبل ما تنولد يبني
وجبتك بلسم الدنياي لو جرحت تطيبني

اجيت . وانه ويه النفس مشتركه وياك
اجيت . ومسرور الكلب يمه اعله ملكاك
اتبسم ليه ثغرك
وانه سنين انطرك
تاليها غبت عن عيني يبني
. . . . . . . . . . . . . . . . . . .

اذبل من تنام ويكبل الليل
ومن تفتح عيونك يرجع الحيل
تغفه . انه صمت .. تكعد وفطرت
يالريحتك هيل
شهور مساهره بليلي اعله مهدك وانكسر ظهري
واشوفك تكبرك بعيني اعله عمرك كاسرت عمري

اشوف . كل يوم انته تكبر تحله بالعين
اشوف . من رصعت اخدودك مبسم حسين
ريح الجنه عطرك
وانه سنين انطرك
تاليها غبت عن عيني يبني
. . . . . . . . . . . . . . . . . . .

ما حسّبت يبني الطف يتانيك
وبشربت الماي الموت يشريك
رايح ترتوي .. راجع ملتوي
والدم يغطيك
ترف نحرك يناغي الموت وكام ايغازل النبله
واحسها النبله ملهوفه عميه ورايده اتقبله

تجيك . وتقبل النحر بس قُبلة الموت
تجيك . تلمس منحرك وتعدي وتفوت
ظل مذبوح نحرك
وانه سنين انطرك
تاليها غبت عن عيني يبني
. . . . . . . . . . . . . . . . . . .

يمه من الالم بيك الكلب شاط
لو من العطش كطعت الكماط
من كد الضمه .. اتهم اعله الدمه
بالركبه من حاط
حاط الدم ركبتك حين النبله كطعت اوريده
ورسالة دمك امن حسين الربك تنرسل بيده

سماء . حفظت دمك وما حفظته الكوم
سماء . رادت تنطبك عالكاع هاليوم
يالحيرني امرك
وانه سنين انطرك
تاليها غبت عن عيني يبني
. . . . . . . . . . . . . . . . . . .

من ايدي رحت ما ترجع اردود
واعطيك العمر كله البس السود
ترجع شي صعب .. بس يبني الكلب
يتأمل اتعود
سود انصبغت اثيابي وراسي ابيضّ حزن يمه
وكلبي من الحزن معصور وفكدك يولدي همه

عيون . اصبيهن يولدي ذاب امن الدموع
عيون . مدمعهن جمر من بين الظلوع
ريت اسكنت كبرك
وانه سنين انطرك
تاليها غبت عن عيني يبني
. . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

زينب ع يوم العاشر


اكظي المسيه ابلا اخو عجيبه
راح امشي سكته الجثته السليبه
و اوصل واشوفه ابيا وضع
مكسور منه اشجم ظلع ..... حسين
. . . . . . . . . . . . . . . . .

صار الظلام ولملمت ايتامي
وشلون انام حسين مو كدامي
امشيله ما اترك اثر لاجدامي
بلكي الدموع اتروي جبده الضامي

متوجيه بمتون الاجل اديه
وتمشي اعله راس النايبه رجليه
وعيوني ماكلها الدمع
مكسور منه اشجم ظلع ..... حسين
. . . . . . . . . . . . . . . . .

اه والم نوح وحزن وصلته
من شفته مجفي اعله الوجه عرفته
دون الضحايا امن الكفه ذَبِحته
هواي الحوافر راكضه اعله جثته

خاف اشبكه وخاف الجمه ابشبكتي
من شوغتي اتهز الارض حسرتي
بيا حال شفته منصرع
مكسور منه اشجم ظلع ..... حسين
. . . . . . . . . . . . . . . . .

يمه اكعدت بسته ابكطع وريده
بس اربعه من شفت اصابع ايده
مجروح وادري معاتبي يزيده
ما كتله رد . وانه اشكثر اريده

ما عاتبت ادري العتب اذيه
كافي اذيته وكسرته ابأخيه
البدر الهواشم منصدع
مكسور منه اشجم ظلع ..... حسين
. . . . . . . . . . . . . . . . .

طعنه اعله طعنه وطبره فوك الطبره
وصدره تعمّدت خيلهم تكسره
هواي الخيول . اجروحه كلش كثره
ما تمحي اثر شمر الخنا اعله صدره

لمن تربع عالصدر تعمد
بغضاً يرفسه بحيدر ومحمد
وشفت الوريد المنكطع
مكسور منه اشجم ظلع ..... حسين
. . . . . . . . . . . . . . . . .

راح ارجع الايتامي بالبريه
ماعدنه خيمه اتلمنه هالمسيه
خافن تفز مستوحشه رقيه
كون انه يمها وتلتجأ اليه

بنت الاطايب تنعرف هويتي
ام المصايب اصبحت كنيتي
فراك الاخو ما ينجرع
مكسور منه اشجم ظلع ..... حسين
. . . . . . . . . . . . . . . . .

خادم اهل البيت عليهم السلام
عمار العيساوي الكربلائي

السلام عليكم
اخوتي اللي يحتاج لحن لاي قصيده يتفضل خاص وياخذ لحنها
نسال الله لنا ولكم التوفيق
عسى ان يكون هذا العمل حسنه في سجل الزهراء عليها السلام

حضور الامام الحسن ع ليلة الوداع



ليلة وداع وسهرت العين
مرت صور بعيون الحسين
خيّال شافه اتعنه بلثام
متعني ليه من ظهر الخيام
. . . . . . . . . . . . . .

واكف ابظهر الخيام حسين وبكلبه الشجن
دار عينه اعله المدينه وللمدينه كلبه حن
شاف لن خيّال اجاله معتني من ارض الوطن
واقترب من فك لثامه لن طلع خيّه الحسن

تلكه الحسن مخنوك بالعبره
اسهام المصيبه اتكسرت ابصدره
اتلكه العضيد وكلبه محتام
متعني ليه من ظهر الخيام
. . . . . . . . . . . . . .

كعدوا ابسد الخيام والحسن سولف دمع
وسولف اهوال المصيبه وكام يشرح بالوضع
عالهمس زينب اجتي تريد منهم تستمع
استقبلوها اخوتها يمهم والشمل جن منجمع

والحسن گل لحسين يعضيدي
لو حي بعدني افديك بوريدي
بس انه عفت وياك جسام
متعني ليه من ظهر الخيام
. . . . . . . . . . . . . .
خويه جسام ابعهدتك قدمه قبلك للذبح
خل اشوف اثياب عرسه بدم ركبته تتشح
وكون كبلك انه اضحي ودم وريدي ينسفح
كون والكون الكلتها ادري متداوي جرح

كون بالطف حاضر وياكم
ودمي اخبطه ابمسفح ادماكم
ولا خلي زينب لحظه تنظام
متعني ليه من ظهر الخيام
. . . . . . . . . . . . . .

كاموا حسين وعضيده وزينب وياهم مشت
وصلوا الخومه وعيون الحسن عبره اتفجرت
بهالمكان حسين خويه جن اصد جثتك هوت
بهالمكان انظر الجثتك بالسيوف اتوذرت

وزينب تغص بالاه واللوعه
والحسن ما يتمالك ادموعه
اليبجي اعله اخو ما لحظه ينظام
متعني ليه من ظهر الخيام
. . . . . . . . . . . . . .

راحوا الصوب الشريعه والحسن جل الجدم
وانحنه وثكلت عبرته ولزم خاصرته ابألم
اهنا احس ظهرك تكسر وانه احس حيلي انهدم
هنا كمر هاشم يطيح وينكطع جف العلم

وهنا يزينب يوكع الكافل
من هسه ودعي اجفوف ابو فاضل
ايكلها استعدي الحرك الخيام
متعني ليه من ظهر الخيام
. . . . . . . . . . . . . .

ايكلها يا زينب خيمكم باجر اتمسي جمر
وباجر اخوانج يزينب روسهم فوك السمر
يختي من هسه استعدي وحضري نفسج لليسر
اتحزمي بهيبة ابوج وهيّئي اسلاح الصبر

ويحسين كله بكسرة الخاطر
ننتظرك ابدمك تجي باجر
عن جسمك احنا نشيل الاسهام
متعني ليه من ظهر الخيام
. . . . . . . . . . . . . .

خادم أهل البيت عليهم السلام
عمار العيساوي الكربلائي

عشگ المجالس


قانون المجالس .. للعالم مدارس
عشك المجالس من عشك راعيها
جم عابس ابعابس تواجد بيها
. . . . . . . . . . . . . . .

كلمن ذب قميصه . للمجلس تحضر
يعني بكلبه عابس . ويه اللطمه يحضر
والعاشك امامه . وحبه بكلبه يزهر
لكل مجلس تحزم . و وسّم صدره الاحمر

الحب ابكلبه آيه .. وحاضر عن درايه
يدري المجالس فاطمه اتباريها
جم عابس ابعابس تواجد بيها
. . . . . . . . . . . . . . .

اليحضر للمجالس . وبعيونه المدامع
جون اليلزم ايده . واللي يسنده نافع
والنُصرة امامه . بهاي الجيه قانع
بتطهير الضماير . تتجله المقانع

الخادم طبعه واضح .. واسلوبه التسامح
الخادم ذنوبه ابخدمته ايزكيها
جم عابس ابعابس تواجد بيها
. . . . . . . . . . . . . . .

ايثار وتفاني . كل مجلس ضروفه
ولو خادم تعثر . ابحب الكل تحوفه
و واحد ويه الاخر . متجانس تشوفه
اخوه وبالخدامه . ماي ابسد جروفه

تربيت المنابر .. على جبر الخواطر
منبر حسين اعقولنا ايوعيها
جم عابس ابعابس تواجد بيها
. . . . . . . . . . . . . . .

هاي الخدمه واجب . للي يحب امامه
حسين انطانه كلشي . متوفّي الخدامه
واليخدم خدمته . ترفع من مقامه
ترفع صيته دنيه . وبيوم القيامه

سلطان ابزمانه .. وربنا يعلي شانه
ابكل مجلس اتحس جنه داخل ليها
جم عابس ابعابس تواجد بيها
. . . . . . . . . . . . . . . . .

خادم اهل البيت عليهم السلام
عمار العيساوي الكربلائي

#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



____________
لمن يجد صعوبة بالحن اطلبه من
@moatmed2

موشح .. استقبال محرم


الناس تترقب گُرب عاشورها
والمواكب كلها تنطر دورها
 . . . . . . . . . . . . . . . .

هالسنه بعاشور ما ندري شيصير
خدم ونتاني اشاره من الأمير
شهر ساواها الغني ويه الفقير
الفقره تنطي الاغنيا امن اكدورها
 . . . . . . . . . . . . . . . . . . . .

هالوباء الحل علينه امتحان
شوف نفسك وين انته بيا مكان
مثل عابس لو مثل شمر وسنان
الأقنعة تطيح ويبين زورها
 . . . . . . . . . . . . . . . . .

كون نعرف منه ابو اليمه اشيريد
فرصة هاي انراجع انفسنا ونعيد
حسين بعده امصوب اسهام و وحيد
ويرفض الذله ونكر دستورها
 . . . . . . . . . . . . . . . . . .

الخدمة مسؤولية لازم نوعه زين
مو فقط نلطم ونندب يا حسين
على الباطل كون مثله ثائرين
وكلمة الحك ما نغير طورها
 . . . . . . . . . . . . . . . . .

خلي كل شاعر يركز بالكلام
يشوف يا كلمه التي امزعله الإمام
خاف ذل زينب بعد حرك الخيام
وخاف عن زينب يكشّف نورها
 . . . . . . . . . . . . . . . . . . .

كون كل رادود من يسمع اجاد
يصير باخلاقه مثل بين العباد
لا يخلي الخدم موضع انتقاد
يصير حمزه ويقتدي ابمنظورها
 . . . . . . . . . . . . . . . . . . .

لو ثبت وضعك وخادم من صدك
وبمحبت حسين ظل كلبك يدك
روح يم شباجه واطلبها بعشك
ردنا للخدمه كبل عاشورها
 . . . . . . . . . . . . . . . . .


خادم أهل البيت عليهم السلام
عمار العيساوي الكربلائي

#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



____________
لمن يجد صعوبة بالحن اطلبه من
@moatmed2

#ويبقى_الحسين





ملمع .. شهر محرم


شهرٌ بكاهُ زمزمُ ... والأرض تبكيهِ دمُ
فيهِ طغى جبروتُها أُمية
وحسينُ نالتهُ بهِ رَزيّة
. . . . . . . . . . . . . . . . .

بهذا الشهر واجب حِزن كل الخليقه
سيف الخديعه انسل على وجه الحقيقه
شهر الدمع شهر الهظم وافضل طريقه
بحزنك تشارك هالشهر وتصبح صديقه

وحيُ الأسى جاءَ لنا ... وحِدادُهُ قد اُعلِنا
وحيُ الاسى قد اعلَنَ الأسية
وحسينُ نالتهُ بهِ رَزيّة
. . . . . . . . . . . . . . . . .

بهالشهر يعگوب النبي ابيضّت عيونه
ويوسف ابّير واخوته همه الرمونه
وحسين الله ايعينه ابنه يذبحونه
وكبال عينه الاكبر امن ايوذرونه

يعقوبُ يدري انهُ ... لازالَ حياً ابنُهُ
اما حسيناً قابلَ المنيه
وحسينُ نالتهُ بهِ رَزيّة
. . . . . . . . . . . . . . . . .

شهر وعلى كل الرسل مرت رزيه
وافتده اسماعيل ابكبش و رد الابيّه
وحسين قدم للذبح ابنه وأخيّه
وارتضى الدينه عيلته تمشي سبيه

شهرٌ قضى قُربانُه ... طفلٌ صغيراً سِنَّهُ
ونالَ حزنَ الشهرِ من رقيه
وحسينُ نالتهُ بهِ رَزيّة
. . . . . . . . . . . . . . . . .

بهذا الشهر اهل الاخدود اهل الجريمه
للنبي ابراهيم اضرموا ناراً عظيمه
برد وسلم من الله بس بالطف اليمه
نار العده ما خلت اعله ايتامه خيمه

وكأنَ نمروداً عتى ... بالشمرِ للطفِ اتى
ودمٌ جرى بالشيبةِالزكية
وحسينُ نالتهُ بهِ رَزيّة
. . . . . . . . . . . . . . . . .

بهذا الشهر فرعون اخذ جيشه اعله موسى
بس نجه موسى بالبحر واتمم طقوسه
واشتره ايزيد اشكد ذمم ناس ابفلوسه
وجهز جيوش الشام تجنيده ونفوسه

وانتهت الحربَ هُنا ... والرأسُ عالٍ بالقنا
بينَ النواويس ِ والغاضريه
وحسينُ نالتهُ بهِ رَزيّة
. . . . . . . . . . . . . . . . .

بهذا الشهر طه النبي كسروا فؤاده
وعالزهره رد كسر الظلع والطاغي عاده
حيدر علي بهذا الشهر اعلن حِداده
والمجتبى الذبح السبط ينشر سواده

وزينبٌ تبكي دما ... وقلبَها متألما
لكربلا كانت هيَّ القضيه
وحسينُ نالتهُ بهِ رَزيّة
. . . . . . . . . . . . . . . . .

خادم اهل البيت عليهم السلام
عمار العيساوي الكربلائي


#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



____________________
لمن يجد صعوبة بالحن اطلبه من
@moatmed2

#ويبقى_الحسين






گعدة ..ام البنين ع


عز اعليه شوفك يالغبت عني
اون بسمك وبلكت تستمع وني
مكتوبه بوصيتي .. لترجع هديتي
هديتك روحي يبني وخادمه اقبلني
. . . . . . . . . . . . . . .

كبل لا تمشي سألتك يبني هم ترجع اليه
وانه عالباب انتظركم من وكتها الهالمسيه
وانلجم دلالي لمن اسمعت بسم الغاضريه
للملگه اتأمل واحسب ساعات
يلي اعله دربك علمت عيني اتبات
ريت بغيابك انحسب عالاموات
حتى ابغيابك اخلص امن الحسبات

ريت الموت اخذني يبني من دونك
وأنه امضحيه اب بنيني فدوه لعيونك
يانوماس بيتي .. لترجع هديتي
هديتك روحي يبني وخادمه اقبلني
. . . . . . . . . . . . . . .

اتندمت يبني ابرحيلك واشكثر ظليت اعاني
ليش ما رحت ابظعنكم مارحت مدري شجاني
والحزن موتني يبني والدمع بعدك عماني
عودت ليلي اينوح وانه انعيله
وبأمل باجر كمت اعيش الليله
واتوجه الشكوة اليفكد حيله
للباري يوليدي و اون واشكيله

ادعي الباري يبني وتنتخي اجروحي
دون حسين يا ربي اخذ روحي
ومن تكرب منيتي .. لترجع هديتي
هديتك روحي يبني وخادمه اقبلني
. . . . . . . . . . . . . . .

يستبد ابرايه كلبي يريد لارض الطف يجيلك
لكن امضيعه اثركم منين يوليدي اعتنيلك
انطيتك افلذات جبدي فدوه بالطف اتغديلك
بكاف ها يا يايمه وبعين وصاد
امحصنتك وقدمت يبني الاولاد
يفدونك بالارواح يابو السجاد
هيج اعله لحظه واصد لن ظعنك راد

نذر ازرع ورد بدروبك وريحان
لو سالم اشوفك ترد للاوطان
يا عنوان صيتي .. لترجع هديتي
هديتك روحي يبني وخادمه اقبلني
. . . . . . . . . . . . . . .

بخدمتك كظّيت عمري وخدمتك تاج القداسه
يولدي وكلمن يخدمك كل وكت مرفوع راسه
اسمك يعلي مقامه محبتك ترهف احساسه
واحساسي لايب يمه خافك متعود
عطشانه عيني الشوفتك يالموعود
هاجر ربيعك وايبست مثل العود
ومن غير شوفك بيمن اهروشي اتجود

استاحش اخلافك من اطب للبيت
شلي بعمري بعدك يمه لو ما جيت
يالتفهم قضيتي .. لترجع هديتي
هديتك روحي يبني وخادمه اقبلني
. . . . . . . . . . . . . . .

تعودت عالباب اتاني بلكي من احبابي رجعه
واسمعت ناعي المنيه واتبعت صوته اللي ينعه
لن شفت بشر ابن حذلم يذرف امن العين دمعه
يا بشر كتله اشعندك امن الاخبار
كال الله عظم اجرج اعله الاقمار
وعباسج ابطف كربله اعظم ايثار
كتله الخبر بحسين سولفلي شصار

كال حسين بالطف انكطع نحره
والخيل بحوافر هشمت صدره
وتعالت بجيتي .. لترجع هديتي
هديتك روحي يبني وخادمه اقبلني
. . . . . . . . . . . . . . .

بهالخبر مشتعله روحي وعيني تبحث عالظعينه
ارد اواسي ابحزن كلبي زينب الرجعت حزينه
وخاف الجمها امن اكلها وين اخوج حسين وينه
يحسين حزنك لامك اصبح جلباب
ما انسه موقف بالوداع اعله الباب
حبيت راسي . بغيبتك راسي شاب
ياريت كبلك انه بسهام انصاب

ياريت انذبحت ابكربله ورتاح
فراك الروح عندي اهون امن الراح
يالخاتم هويتي .. لترجع هديتي
هديتك روحي يبني وخادمه اقبلني
. . . . . . . . . . . . . . .


خادم اهل البيت عليهم السلام
عمار العيساوي الكربلائي



#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



____________________
لمن يجد صعوبة بالحن اطلبه من
@moatmed2

لمن يجد صعوبة بالحن اي قصيدة اطلبه من
@moatmed2

اي قصيده تعجبك انسخه
وارسلها ع المعرف ورح نكون
بخدمتك 😭😭

مسبيه رحت يحسين للشام
اسهر ليلي خوف وعيني متنام
جنت امدلله وهسه احرس ايتام
ما ظلت احلام ..
     . . . . . . . . . . . . . . . . .

بعيني دمعي مذبوح .. بيّه ابكدك اجروح
الشماته حجيهم يكطّع دليلي
ينشد وينه عباس .. شمر ويشمت الناس
وانه طاري اسمكم يموتلي حيلي
اكسّر عبرتي وحسرتي بظلوعي
وانه املك اسلاح دعوتي وخشوعي
وحيده اسيره كلامي بدموعي

يبو اليمه امن اصد راسك المكطوع
يرف كلبي ويفر من بين الظلوع
حلم مدري حقيقه الراس مرفوع
ما ظلت احلام ..
     . . . . . . . . . . . . . . . . .

هيمه والرمل حار .. سبيه وكلبي محتار
وعطش ارض الطفوف ترك جمره بيه
طريق اطويل ومشيت .. جلوس اليوم صليت
وبعد نار الخيام جويها بأديه
السهر ماكل اصبي عيوني وعماني
ودمعهن عالخدود يخويه جواني
الدهر ظالم وياي خلص عمري اعاني

مجتوفه بحبل للكوفه طبيت
زمن جانت الكوفه تصير الي بيت
توجهت لعلي وبحركه ناديت
ما ظلت احلام ..
     . . . . . . . . . . . . . . . . .

يخويه بالدرب ذاك .. يظربون ابيتاماك
وانه حامي عنهم وشكف بالسياط
شفت حرمه على النوك .. دمعها بحسره مخنوك
لنها الرباب وتلولي للكماط
تلولي للكماط تظنه ولدها
تحاجي وتناغي ودمعها اعله خدها
ويلي عليها انذبح طير سعدها

ظنت فوك اديها يغفه وينام
بعد شحجي اعله رمله ابفكد جسام
وليلى ويه الاكبر فكدت احلام
ما ظلت احلام ..
     . . . . . . . . . . . . . . . . .

بعد الكوفه للشام .. اسيره وكافله ايتام
يبو الاكبر هناك تزيد الرزيه
عيد وفرحه وطبول .. اسال ناسها تكول
انتصرنه بحربنه على الخارجيه
ويلي يكولون علي خارجيه
ويلي الشماته يصدون عليه
ويلي ويلي اخيتك سبيه

الشام اعيده منتصرين عالدين
وعنك خارجي يكولون يحسين
الشام وكربله ذبحني مرتين
ما ظلت احلام ..
     . . . . . . . . . . . . . . . . .

دخلنه لمجلس ايزيد .. يخويه وحركتي اتزيد
انه بنت امير الارض آنه الاميره
المحد شافلي اخيال .. اطب ديوان الرجال
منو ايزيد وانه ادخل مجلسه اسيره
مقام الثره ايزيد مقامي الثريه
جدي محمد وجده اميه
يحسين انه اختك انه الهاشميه

بلغة حيدر خطبت وخرسه الحلوك
رداء العزّة تدري بس الي يلوك
بس لمصيبتك كل عمري مبيوك
ما ظلت احلام ..
     . . . . . . . . . . . . . . . . .
خادم أهل البيت عليهم السلام
عمار العيساوي الكربلائي

لسان حال السيدة زينب ع وذكرياتها مع الحسين غ



اغفه اعله صوت النايحه واصحه بونيني وهمي
وشتنفع ايام العمر لو ما اشوفك يمي
حرام .. يوم اليمر ماشوفك
امام .. ومطرزات احروفك
      . . . . . . . . . . . . . . . .
للحومه اذكر من شطت جسمك ابد ماشفته
بس كومة اسهام ابجسد گد الرمي اموذرته
من شفت خنصر يمنتك شلته ابأديه وبسته
وحين اعثرت لن منحرك اسم الله يكول اسمعته
مقام .. جسمك وكلبي ايطوفك
امام .. ومطرزات احروفك
      . . . . . . . . . . . . . . . .
صديت عيني المصرعك حين احركوها اخيمّك
ابلا راس شفتك من كمت توكع وذر من جسمك
خطوات و اردود اوكعت بالغيره ينزف دمك
كلبي على ايتامك ركض بس روحي ركضت يمك
سهام .. ما تفتهم معروفك
امام .. ومطرزات احروفك
      . . . . . . . . . . . . . . . .
يوم ١١ صار السبي حادي الظعن نخيته
وديني لحسين امن امس عطره فلا شميته
مَرني اعله جسمك وانظره ابيا حال خويه الگيته
عاري على الرمله ابشمس بدمع الحزن غطيته
سلام .. مجبوره روحي اتعوفك
امام .. ومطرزات احروفك
      . . . . . . . . . . . . . . . .
ابدرب السبي واتذكرك من  جدمتلك مهرك
وصتني اشمك فاطمه ابنحرك كبل حز نحرك
بستك ابصدرك وادري بالخيل ايتهشم صدرك
حبيت راسي واطلعت سلمت للرب امرك
خصام .. بين العذب وجروفك
امام .. ومطرزات احروفك
      . . . . . . . . . . . . . . . .
موقف كطع كلبي ومرد جبدي وبگه يبجيني
من شفت راسك بالطشت ويزيد عينه بعيني
يظرب اشفافك بالعصه متقصد ايأذيني
وبشفافك اشخله العطش شتحمل يبعد سنيني
انام .. واصحه انه بس بطيوفك
امام .. ومطرزات احروفك
      . . . . . . . . . . . . . . . .
لو كبلك ابذاك الحجر مصيوب خويه اجبيني
ولو كبلك ابحر الرمل مرميه وموذريني
وانذبح من كبلك وانه بخيل العده امهشميني
بعدك شتنفع دنيتي وجتالك اليحديني
ختام .. انطي العمر لو شوفك
امام .. ومطرزات احروفك
      . . . . . . . . . . . . . . . .
خادم أهل البيت عليهم السلام
عمار العيساوي الكربلائي

بالشام وخرابتها .. طفله تحاجي عمّتها
وراس حسين يسمعهن .. يهل دمعه اويه دمعتها
           . . . . . . . . . . . . . . . . . . . .
عمه اتكلها وين حسين خل اشكيله حالتنه
هذا البيده شايل سوط رايح راد موّتنه
اخبرنّه اليسميني من يندهني اميرتنه
اميره وبالخرابه اتبات تعال وشوف نومتنه
جمعونه بحبل واحد .. النايم نومته كاعد
تشكي وعالرمح راسه .. مفجوع المصيبتها
            . . . . . . . . . . . . . . . . . .
ياعمه ارد اكل لحسين عن نار الهظم بيه
يم حايط خرابتنه بنات ايعاينن ليه
والدمعه بطرف عيني وهنّه ايضحكن اعليه
يكولن وين ترجيتج امضيعتها يمسبيه
من شافني متحفيه .. يهمسن كالن اخطيه
ماعدها ابو الطفله .. حتى ايواسي لوعتها
             . . . . . . . . . . . . . . . .
تكلها ابعبره عمّتها تعالي ونامي ابحظني
اجتها اتكلها غطيني لحّد يستمع وني
امتدت والدمع عالخد ومن عدها الظهر محني
تكلها شبيج عمتها تكل الها انلجم متني
عمتها تصبّرها .. بس مكسور خاطرها
نامت شافت الوالد .. طيف ايحلي نومتها
              . . . . . . . . . . . . . . .
بالطيف اعتناها حسين فزّت حيل ملهوفه
تبجي وتعله صرختها تريد الوالد اتشوفه
تريد اتشبكه مشتاكه تريد اتقبل اجفوفه
تريده ايظمها ابوها حسين وبيها ايأمن الخوفه
اصبح بالخرابه اصياح .. وكام ايهوّس الذباح
وليل النايبه طوّح .. عالطفله ابمنيتها
        . . . . . . . . . . . . . . . .
صوت الحق وصل ليزيد وظل كاتم على انفاسه
يسأل بالخرابه شصار لمن صاح حراسه
كلوله رقيه تريد ابوها الطفله حساسه
كلهم وبكلب قاسي ودوا الطفلته راسه
لمّن بالطشت شافت .. راس الوالد اشصاحت
صاحت يانظر عيني .. ويا روحي ويمهجتها
           . . . . . . . . . . . . . . . . . .
احتظنت راس ابوها وصار هدوء وما بعد تنحب
لحظه ولن علي السجاد من الطفله يتكرب
لكاها ميّته اعله الراس ناده عمه يازينب
طفله وما هي حمل افراك ولا تحمل ظرب لا سب
خلنه اليوم ندفنها .. الخرابه تكون مسكنها
عام وانتي بارض الشام .. تواسيها اعله وحدتها
. . . . . . . . . . . . . . . . . . . . . . . . .
خادم أهل البيت عليهم السلام
عمار العيساوي الكربلائي