https://youtu.be/wxbUShuNf4U





اخوتي الأعزاء ممكن اشتراك ولايك للفيديو ليصلكم كل ماهوه جديد
خادمكم على الشاوي

دستورهای سفارشی

نزله لقمر العشيره العباس ع


اشهدُ ان العباس . . ساقي عطاشى كربلاء
____________________
گوم هد وطش ضواك *=* انهد وراك ،
ياگمر تارس سماك *=* احنه بحماك ،
حيل يتوچه اعله حيل *=* اعله اليعيل
اليوم اريد نخلي كون *=* الطف هلاك ،
يابو طول الخيمه ،== ، وانا فوگك غيمه ،
امشينه خويه اعله الفرات
-- نخلي جرفه بضيمه
اشهدُ ان العباس . . ساقي عطاشى كربلاء
____________________
انطيني چفك خويه گوم *=* أأمرني گول ،
تريدني منين ابدي گول * = وحته اصول ،
بصاية الكرار اروح ، == وبيه روح ، ،
حسين ياشمس النهار *=* الما تزول ، ،
ياشمس مغربنه . ==. يا عشگنه وحبنه ،
محله هذا التعب كونه ،
-- عشگك متعبنه ،
اشهدُ ان العباس . . ساقي عطاشى كربلاء
________________________
گوم خل اشتم هواك *=* وشم هواي ،
جيب جربه تريد ماي *=* بعيني ماي ، ،
گوم شد چفية ابوك *=* وبعد اخوك ،
راح اهد صوب الفرات *=* وكض گفاي ،
خل نهد بالرايه . ==. كون فَرد حچايه ،
انجيب ماي وخاف باچر ،
-- تعطش المشايه ،
اشهدُ ان العباس . . ساقي عطاشى كربلاء
________________________
خل نسيّر عالفرات *= نچمله ماي ، ،
يابس من چفوفي هاي *=* يظل وراي ،
ارسم اعله الجربه روس *=* برجلي ادوس
گاعي گاع الطف سماه *==* صارت سماي ،
چم سمه تلوح ايدي . ==. حيلي من اعضيدي
بكل مچان چفوفي عايف ،
-- وارسم بچف ايدي ،
اشهدُ ان العباس . . ساقي عطاشى كربلاء


- علي مهدي المالكي ،

كأني بالسيده زينب راحت لابي الفضل وتگله بلسان الحال :
اعيونك من اجيتك ..... لاحظني ؟؟
اشو لا چف شبگني ..... لاحظني ؟؟
سهم اجفاك چبدي ... لاحه ضني
وفطر گلبي ونبض ماعاد بيه ...

ابو فاطمه الطائي

نعي
زينب اتودع ابا الفضل ((ع)) مفجع


ما اگعدك يالنمت بالعافيه
جيتك اركض للوداع وحافيه


افراگك شلون بغربتي اتحملهه
والله لوبيدي اموت بكربله


هاي ما جتني وحسبت احسابهه
زينبك شمر الیگود ارچابهه


تدري باختگ ماتغمظ عيونهه
وناگتي شفت العده ايحضرونهه


مو هذيچ الناگه والهودج تره
ما تلوگ الهاي تصعدهه مره


باچر اتسوي العده اليحلالهه
واختك اتشوف الشماته اخيالهه


عمت عين المشرعه وجروفهه
الخلت ازنودك تطيح اچفوفهه


هاي قسمه امفصله ومقسومه
انسبي ونايم تضل بالحومه


انت لو موجود ما واحد دنه
ولا تشوف العين خيمه امدخّنه


خويه مجبوره اودعك رايحه
ماتت احلامي وقريت الفاتحه


✍بقلم خادم الحسين ع
الشاعر رعد الچريخي

الخيم مهيوبه وبنصهن علم چان
ودليلي بخوف يتوجل عِلم چان ( عرف)
عگب عباس ادورلي على امچان

العبايه وخيمتي احتركن عليه

الشاعر رعد الجربخي

نمت وعله النهر ياخوي وصياط لعده بضهري
اول تالي اركض جيت ظاع بنص زلم خدري
اطلع بت علي بنص جيش فتر تالي علي دهري
شوفك علترب مطروح
يعافيتي وسلوت روح
_

واعثر ونهض واندب محد يكصد يحامي
البيهه مدلله وهسه تفهرد كلشي بخيامي
جنت تمسح اثر لجدام هسه مجويه جدامي
صيوان العشك محروك
من دونه لخدر مخنوك
_
ركضت وعيونهم تنضر والسان النذل يشتم
وتايه جم طفل بلبر غطه جدمه لون الدم
ياريحت علي عللكاع طايح جسمه متخذم
مكطع خويه يلمملوح
جسمك كله شوفه جروح
_
يلمدلل خواتك كوم طبت بلخيم اجناب
العبايه الضمت الورده غطاها دمع وتراب
كمر ليل بسمه لخيمه ضلمت من كفيلي غاب
طايح عنهر مسحوك
لينه تدري جابو نوك
_
يمك وسفه طكني صوط ماتنهض تحاميني
علمتوني اثر ياخوي ساكت ماتحاجيني
اول تالي زينبكم شمر عل هزله سابيني
شسولفلك شتم وصياح
من اصديت خويه طاح
__
الخيمه الجانت تلمنه صارت بس رماد بليل
تضيع اطفالي من عندي ودروها بحوفر خيل
شيب راسي بعدك كوم حدب ضهر مامش حيل
وعمري تعده الخمسين
مابيه تصدلي العين
____
طشروها ضلوع حسين مصبوغه الحوافر دم
صدر ضمني كله حساس خيل دوسه وتهشم
كوم نهض يبعد اختك جيش البيه ضل يشتم
ياشرون وعليه يصيح
يضحك ولعليل يطيح



#الشاعر_مسلم_الحلفي
#عشق_ولاية_علي
https://t.me/h_ameer2

((مولاي الحسن مع مولاتي رمله))


نذر يا رمله هذا وليدي منذور
العمه حسين من يصير عاشور
حرس واباب الخيام
نذر منذور جسام
-----------------------
من حسّ على جبينه الندى وصارت چبيره العله
صاح عله زينب بالدمع عندي وصيه الرمله
يم راسة گعدتّ وانچفت تشبه شجون الدله
تگله احوالي من حالك
يبعد اهلي شتهيالك
وصيني وأنه اگبالك..... يبونه يالحسن

يبونه وچنك مسافر
يبو سنيني وحلم باچر
تصارع گوه وتكابر ....... يبونه يالحسن

جرح البيه حاصر شوف العيون
وداعاً والصبح يارمله مدفون
وصيتي التالي الايام
نذر منذور جسام
----------------------------------------
رمله بدمعها الماسكت ذكرى وجرح تبچيله
يوصيها وبچبده عطش حسين (الابو) من الليله
باچر اذا تبدي الحرب بحنةّ عشگ حنيله

حنة وداع وعاطفه
حنة سوالف فلسفه
گلتلة ياراعي الوفه ..... يبونه يالحسن

گلتلة والچلمه ترف
ردت بحضورك من نزف
وايدك تحطها عله الچتف ...يبونه يالحسن

بحضورك ياامامي وردتك تشوف
من إيصول أبنة بيوم الطفوف
بطولگ يوكف ولآم
نذر منذور جسام
--------------------------------
گصريله ثوبي للحرب وهم لامتي حضريها
وسيفي وحيازيم العشگ بخصرة عدل شديها
مهندم اريدة بالحرب حته الحرب يچفيها

گلتله صار وراضية
ياسيدي ويالعافية
انه الكلامك شارية..... يبونه يالحسن

انته حياتي ودولتي
يالساكن بنص صفنتي
بياچف اودع دمعتي..... يبونه يالحسن

يالماشي بدرب ماضنك تعود
عگبك حته روحي تلبس اسود
ابشرك بالجرح نام
نذر منذور جسام
-------------------------------
وبدمعه عيونه حچي وين الگمر يحسبني
وگلاله عونك يالاخو ابشر يمالك عيني
اسمعني هايابو الفضل گلاله لتوصيني

زينب اعز من رايتي
زينب أخيتي وعمتي
چّفيني فدوه وهامتي .....يبونه يالحسن

موجربه اجيبلها نهر
انه المليك المقتدر
سهران اضل طول الدهر....يبونه يالحسن

وكفو يحزامي يمدللّ ابونه
ياعباس هذا حسين اخونه
انته وجاسم حزام
نذر منذور جسام
---------------------------------
ودار النضر لام الخدر هايابعد عافيتي
هايابعد كلشي المضى ونفسي البگلبي وريتي
ياخوية دربالچ جمر من فزعو وركضيتي

والخيل اجتچ مسرعه
وعباسچ عله المشرعه
وينزف كفاله مدمعه.... يبونه يالحسن

وتگله يانبض الگلب
فدواتك يلمني الترب
يادربي ويضيع الدرب....يبونه يالحسن

تغمض ياعطر باجي من اهلنه
عگب چفك بعد ياهو اليلمنه
ونشفوك بس بالاحلام
نذر منذور جسام




عبد زينب
محمد الابراهيمي

رايح ينبضات العشگ
يا يمة باچر لو صدگ
من تمشي يا لون الندة
گبل الخيم ابدي احترگ
____
من گد الامتانة الصبح.… يتشگگن رجلية
ع الگاع باچر تنچفي………حنتنك والحنية

يمنشف انجوم سماي
شاغت محاچينة هواي
ما تنترك چنك ماي

گالوا زغير اعله العرس
بس تارس اعيوني ترس
بس اليعرفك يرغبك
هو انت هم مثل الصدگ
_
لا تترك اجفوفي الامس. عرگت بخت يم ايدك
وعيوني التصب مستحة . مو تدري بيها تريدك

توجعني دورة مگفاك
خذني ارد اطيحن وياك
لا تنسة ما اتناساك

وعيوني التنگط بچي
حدر الرمش نگعت حچي
دنگت والشيب انتچة
راس اليدنگ هم عثگ

بس انت عدي والوكت… طالبني بيك طلابة
يبني يجاسم لو متت … باچر اشد عصابة

باچر يوازيك الموت
واحنة بدواوين نفوت
باچر يخنگون الصوت

مامش عرس باچر سبي
وتدمّر اتراب العبي
باچر چفافيك الخضر
بالخيمة ينسحگن سحگ
_
باچر يخربون العرس…… وامك تكض عوچية
واشموعك تموت بهوة…… وتابوتها الصينية

باچر يدوسنها الخيل
وامك تدوّر ع الحيل
ايشور ترة بچيي الليل

يوليدي بي حوبة الدمع
ويعثر الطفة الشمع
شيلحگك انت لو طحت
طبع الدمع ما ينلحگ

باچر يعورني الهجر……… و ايد الحزن تچهبني
نيشانك وثوب العرس…… باچر ترة ايغثنّي

بسيوف طولك ينباگ
واهدومك اترسها اشباگ
حظني يرف من اشتاگ

يا بعد شوغات العمر
شيعوضة لو مات البزر
ماكو هلاهل لا فرح
عرسك ترة ضيجة خلگ
____
علي هادي الخزعلي

اسهر واتعب جنت الليل // وتالي تعبي تسحكه الخيل
لا هلهوله _ تلوك الطوله _ لا مبروك ولا عالخير
/////////////////////////////
بشفافه جان ايظمهه الي _ وين الحجايه الترفه
امنيتي اسويله عرس _ الماحنه اصبع جفه
جانت ابالي الخيمته _ العباس بيده يزفه
وحسين كاشخ لبن اخو_ وبعرسه واكف وكفه

جاسم تستاهل مبروك// بس اركض خلي يذبحوك
عمك حاير _ بيوم العاشر _ عمك مانراظهه يحير
/////////////////////////////
الحنظل طلع طعمه حلو _ بس فركت ابني المره
انسه السهر انسه التعب _ وماانسه ذيج العشره
مرتاحه العدهه بس ولد _ اتريد بس اتكبره
وانه عكسهن كبرت _ والخيل داست صدره

بخدوده الحافر مطبوع// وماظلت عد ابني اظلوع
طعنه وحافر _ جسمه شصاير _ ظل ينازع مثل الطير
/////////////////////////////
لابس اعمامة والده _ جاسم شاب وجنه اهلاال
بنفاسه ريحت كربله _ بجفوفه شمرت خيال
وبطارف اعيونه الزعل _وتوقعو لحسينه شكال
بالخيمه اكعد واطمئن _ ذوله مابيهم رجال

كضت الدله كض السيف // ومر اعليهم مثل الطيف
كف اردانه _ وكلهم انه _ ابن المادنك للغير
/////////////////////////////
المخنوك ومضيع الهوه _ اشوه تره من همي
ياخيل مو بسج سحك _ وصلن اعظامه يمي
تشوفنه بهدوم العرس _ بجروحي كافي تلجمي
ناديته جاسم ها عدل _ تحنيت صاح ابدمي

يا عريس ابلا صحبان// يوليدي بعدك عطشان
شموعك يطفن _عيوني يعمن _عمري يخلص بس تفكير
/////////////////////////////
للخيمه اجه بعينه الزعل _ طاح ابن عمه الاكبر
تشابكنه تبارينه الذمم _ كال انطي لازم منحر
بلا راس من جابوه الي _ يكتل هذاك المنظر
كلبته شو كله جرح _ شو جسمه كله مكسر

ياهو الشايف منكم شاب// ينزف دم بنحره تراب
طلعت روحه _ هواي اجروحه _ كلبي كلولي شيصير
/////////////////////////////
محسوده التخلف ولد _ وبالأخص مثل اوليدي
جان الصبح لمن يفز _ يدكنك يحبني بايدي
اشبر ابطوله كل وكت _ جاسم فرحتي وعيدي
من عكب عينه وظحكته _ عالناكه امشي بكيدي

يسالن بيه العلويات // جسامج لو كلبج مات
هوه اكليبي _وحركت شيبي _ شاب وليده وبعده ازغير
/////////////////////////////
تمت _ علاء الزيدي

(لمولاي القاسم ع) ... محرم 1442 هـ

رايح ...التارس الدنيا بحلاته
رايح...وطفن شموعه امهاته
عريس راح وكاشخ ويا محلاه
دم الحرب جسام بالطف حناه

يحكل عيون امه بموته محتام
اتلكنه ملكه وداع من شبكنه الاسهام
حط راسه بحضن امه اوصه جسام
يكلها اريدن رمحي شمعه يروح لشام

يلتارس الطف بضحكته
بس بجي مقسومه زفته
انطفه شمعه بكلب عمته

باقي ...بس حلم بلخيم خله
باقي ...يا عزيز بكلـب رمله
تتمنى تكضي العمر لو بس وياه
دم الحرب جسام بالطف حناه
ــــــــــــــــــــــــــــــــــــــــــ
الكمر لو مات كون اتشيعه النجوم
وجاسم من اتبده طوله التمت الكوم
بجسمه ماكو اثر باقي اله ملجوم
حسين من شافه يذبحه يطيح ويكوم

تباوع حسين لخيامه
رجـع يلطم عللهامه
مات اليعزب العمامه

طايح ...يلتفت ويصيح يمه
طايح ...الكاع ما تكدر تلمه
العباس هد حسين بس ما خلاه
دم الحرب جسام بالطف حناه
ــــــــــــــــــــــــــــــــــــــــــ
بقت رمله بالخيم تدعيله وتنوح
فزت عالصوت رد جسام مذبوح
ركضت لشكبت ابنها الماخذ الروح
لجن رد جسام عاري امطرز اجروح

امجان ماكو بي تشمه
تلولي كعدت رمله يمه
كطع كلب حسين عمه

رملة...اكباله كعدت والله حيره
رملة ...تصيح لا مو هو غيره
ابني كمر يا سيف هذا الطفاه
دم الحرب جسام بالطف حناه
ــــــــــــــــــــــــــــــــــــــــــ
وين اكو ماي بضهاري يموت عطشان
وجها من تدنه يمه تكول قران
لعبت الخياله حيل بسجمه ميدان
هيه تنشك الرساله بيد عميان

كام يشم انفاسه كوه
خربو كحلته الحلوه
ضل يصيح حسين يسوه

شحاله ...بصحره نام تبده حيله
شحاله....الدم ترس ثوبه و شليله
بصحره تجوي الكاع والدم غطاه
دم الحرب جسام بالطف حناه
ــــــــــــــــــــــــــــــــــــــــــ
حلمه جان من الطفوله يكبر بساع
حته من حسين يمشي يصيرله شراع
عيونه من تصفن عليهن ورك نعناع
امه ما متهنيه بي اتهنت الكاع

حنته مشتاكه ليده
وامه عن شوفه بعيده
اكبالها حزو وريده

شايل ...جن لكو مكتوب عده
شايل...حرز شايل اسم جده
يا علي مكتوب شافه وشكاه
دم الحرب جسام بالطف حناه


كرار فاهم الخفاجي

جسام يالجاسم دليلي
يالعگب ابوك انت خليلي
يايمة وين تريد ...فكدك تراه امچيد
حيلي انت لا ترحل يحيلي
________________
يسباح اليكظ الگلب خاف يطيح
ويا شمعت زماني العمت عين الريح
حيرة بفركتك ما يطلع التصريح
كلبي اوكف يصيح و عقلي روح يصيح

محتارة اودعك للمنيه
لو تبقة يمي تباري بيه
امفكرة لزماني تكون ...بالظلمة الية اعيون
يا گمر رملة اليضوي ليلي
__________________
يمة افراك وجهك مو عليّ بالهون
وادري الگوم يمة الجتلتك يردون
شيظل بالحيل لو شفت التعب مطعون
لجن ملزوم تكصد للحرب يالعون

لو بيدي جا ضحيت دونك
شحمل واشوف يعذبونك
خاف الجمال يروح .... وينترس تعبي اجروح
وتتوسط الجمرة بغليلي
_________________
طلعت وروحي طلعت مني وتماشيك
رايح للتعب يا عمت عيني اعليك
عطشان ومشيت وماكو ماي ارويك
وسموم الهوى حار وبالجبد ياذيك


روح المنيه تريد دمك
ما تدري بيك ارويحت امك
سلب الروح اجفاك.... بلكي الذبح ينساك
يبزغرك محلي شليلي
___________________
كبلك علي الاكبر طاح والدم سال
وبواجي امة ونعاوي تفطر الدلال
من تطيح ايسدي اعلية نفس الحال
وعلى عمك اثنين اولاد والله اثگال

شفتة انهطر من طاح الاكبر
وينهطر لو طحت انت اكثر
ينكسر كسرت عود .... مو هيّن المفگود
يا عيني عالمفگود سيلي
____________________
متبطعة اعيوني برسمك المفتون
لو يرحل جمالك كون اعمي اعيون
حر الصحرة يرسم فوك وجهك لون
وضربات السيوف تغير المضمون

مضمون حسنك لو تغير
ومضون دم وعطش يظهر
لو شفت دمك ساح ....اترس الخيمة اصياح
والخيمة توكع من عويلي


حسين حيدر الموسوي

#قصيدة_شور
#لشجاعة_القاسم_ابن الحسن ع


- يا سلام الله على الحنه البديك
_________________________________
دايخه الخياله من صوت الرعيد
القاسم وهوس بشوباش العرس
حاط الحنه اعله سيفه ومن بعيد
گطع صيت الهوه وضحكات الضرس

- هلا بالعاف المخيم وانتفض
- هلا الگل العمه ظل مالك غرض
- راح اعاند بيهم اعناد المرض ،

يا هله بعريسهه == الدنيا صيف يجيسهه
ترس چفه وظلت = الحرب فارغ چيسهه
- يا سلام الله على الحنه البديه
_________________________________
هلا بريحانة الطف ابن الچريم ،
صال وانفتحت شهيته اعله الحرب
شال جيش الطف حطب لجدور ابوه
يولن السهلات اجه الزلمه الصعب ،

- هلا برس الغيره ضهضاب السمه
- هلا بريحة فاطمه وبت فاطمه ،
- هلا يا شداد راس الموزمه ، ،

يا مصوگر بيهه = روسهه ورجليهه ،
هلا بصيت القاسم = بكيفه شاخ اعليهه
- يا سلام الله على الحنه البديك
_________________________________
ما ايثني حچاية الحد مثل ابوه
اجه بمبدء انما النصرُ قريب ، ،
الضربه لازم لو تصيب ولو تخيب
ورمي القاسم لو يصيب ولو يصيب

- هلا بحطاط الحروف اعله النقط
- هلا الفحط جيشهه ورد ما فحط
- راح واعله ازلامهه بكيفه انشرط ،

يا امتون النيبه = شاب هيبة شيبه
هلا بعرس الحومه = بصغره وبترتيبه
- يا سلام الله على الحنه البديك
_________________________________
يعوفهه الما تارسه عيونه اكيد
ابن شيخ وحصته الصيد الكلف
وين ابو الراس الچبير اليبدي بي
حاسبلهه وما امتيه بالعرف ، ،

- ادخيل صولاته ليطيحن كالمطر
- سافر بروس الزلم ذاك السفر ، ، ،
- راح چمل ماي لعيون النهر

- الحرب شدت حيلهه = تتعب يتچيلهه
كطع نسل حروفهه = تسكت ويحچيلهه ،
- يا سلام الله على الحنه البديك


- علي مهدي المالكي

ليلة مولاي القاسم ع

الهيل شايل شوگ وسوالف خظار
ايطشهن ابروحي واشمنهن هوى
لو كشخ بالصاية تسجدلة النجوم
ابكسرت الوجنات ايضيّع الضوه

يوليدي ،، يالمخجل الليل
بنفاسك ،، يالمدوخ الهيل
بضحكاتك ،، النسيم يعيش
وهدومك ،، امزهبتهن حيل
يوليدي ،، يا جسام
،،،،،،،،،،،،،،،،،،،،،،،،،،،،،،،
الورد يتمايل عشگ وكت الصباح
والشمس تغبش تبوسة وتبتسم
ترف بس بيه من يطگ عرج الزعل
الزلم من خزراتة تردم بالزلم

اشمحلاتة ،، والعيون اوساع
يشوفونة ،، چن غصن نعناع
ومن ايدة ،، الشرد ريال
ليشوفة ،، ايذب هدومة بساع
يوليدي ،، يا جسام
،،،،،،،،،،،،،،،،،،،،،،،،،،،،،،،
معبد اسنيني اطوفنة ابهيام
ابجمالة اشوفة چن كسرة فجر
وحتى سطراتة مبخرهن بخور
معدل ودرعه يركا اعله الصدر

مستناس ،، وللحرب يهوة
وبجفوفة  ،، العرك يسوة
العريس ،، كسر خشم الجيش
وفرحانة ،، بهيبة الحلوة
يوليدي ،، يا جسام
،،،،،،،،،،،،،،،،،،،،،،،،،،،،،،،
شايل ابگلبة الي اجمل حنين
وطن عمري بضحكتة يفطر ورد
ثنه اردانة ويهز ايدة عنده عيد
الهزبر اعلة الصيده متونس يهد

بعيونة ،، يگنص من ايصيد
وابخدهم ،، تلگا سطرت ايد
اليشرد ،، من خزرتة يموت
صاگرهم ،، بالمطارد حيد
يوليدي ،، يا جسام
،،،،،،،،،،،،،،،،،،،،،،،،،،،،،،،
افيش يا نسمة هواك ابريَتي
ينتعش بيها يظل هرش الگلب
يمة گامت الزلم تهمس همس
چنهم من الخوفة شابعهم ضرب

ضنوتي ،، يگطف الانفاس
بالحرب ،، يشبة العباس
يا روحي ،، عاشت ايمينك
للكوفة ،، شردتها الناس
يوليدي ،، يا جسام

محمد جهاد الحطاب

نعي اليوم الثامن من محرم
ليلة القاسم
**
وياك وياك اشماله الموت ما ياخذني وياك
فركاك فركاك سلاني يجاسم حيل فركاك

ما يردون ما يردون بعد ايس يكلبي ما يردون
يكطعون يكطعون ابد مو من عوايدهم يكطعون

اعزاز الاولاد اعزاز الاولاد ييمه وداعت الله اعزاز الاولاد
تنراد تنراد وكت الضيج دوم الولد تنراد

وتوادعينه وتوادعينه كظيناها بجي وتوادعينه
صارت حزينه وصارت حزينه وحشه بيوتنه وصارت حزينه

الما مخلفات الما مخلفات الله ايعين كلب الما مخلفات
والولد مات والولد مات بعد شلي بحياتي والولد مات

سهرت اهواي سهرت اهواي عيني اعليك يبني سهرت اهواي
وتضيع ارباي وتضيع ارباي اشلون تعوفني وتضيع ارباي

بشيلت امك بشيلت امك تعال اتغطه يبني بشيلت امك
وحيل اشمك وحيل اشمك اريد اشبك عليك وحيل اشمك

الوكت ذبني الوكت ذبني عكبك عينك ييمه الوكت ذبني
بالبيت يبني بالبيت يبني ضلت ريحتك بالبيت يبني

بوكت الغروب بوكت الغروب مو زين الونين بوكت الغروب
والله متعوب والله متعوب كلبي امن المصايب والله متعوب
*******
الشاعر
تحسين الخفاجي

مجموعة ابو ذيات على لسان رمله ام القاسم ((ع))

بـچـت مـن سمـعـت العدوان.. حــنــاي
بـهـيـمـه وگـمـت احـن يالولد.. حن ناي
ابـدمـك بالطـفـوف اصبـحت.. حــنــاي

ونـصـبـت بــيــوم نــيــشــانــك عَـزيــه

====================

بــنــات الــنّــايــبـــه بــالــعــيــن.. لاحن
ولا يــنــفـــع ونــيــن اعــلـــيــك.. لاحن
الــســيــوف الــلاحـتـك بـحـقـاد.. لاحن

دلـيلـي وگـــوم تــلــگــه جــروح بــيـــه

===================

اشـتـكـيـت وأمـري للـبـاري.. وحــسـبـي
وطـلـع مـگـلـوب كـل ضني.. وحــسـبـي
يـجـاسـم جـرحـك بـگـلـبـي.. واحس بي

الــمـــوت اهـــون ولا بُـــعــدك عــلــيـــه

=====================

اطـفـي ابــيــش نــار الــدهــر.. لو شاب
گــلــبــي وبـالـحـزن مــعــذور.. لو شاب
افــز وتـــرخـــص الـدمــعــات.. لو شاب

يـــمـــر واذكـــر شــبــاب الـغــاضــريـــه

=================

✍ بقلم خادم الحسين ع
الشاعر رعد الجريخي

{نزلة لمولانا القاسم ع }

طلع شباب امن الخيم ... كومي يزينب هلهلي
——————————
طالع بدر لا مو بدر قرص الضوه ايكنونه
كلما عطش يحله و بعد يحله الزعل بعيونه
وجها مثل وجه الحسن نشاف الكرم بجفونه

جاسم نعم جاسم حيد ... طر حومته بهيبة علي
——————————
طب جاسم الحومه بعزم سيفه الزلم لاواها
و من الجهات الاربعه يهجم تفر خلاها
صال وطوه الكاع وبعد يوم الحشر سواها

( اني انا شبل الحسن ) ... صاح الطفوف تزلزلي
——————————
بشسع النعل ساوه الزلم واعليه تباوع اهله
لو ما امر رب السمه منهو الذي يوصله
راس انطبر طاح البدر بدمه تحنت رمله

وام الولد فوك الولد ... طاحت وادمعتها تهلي
——————————
عاف العرس طفه الشمع بعمر الورد ايامه
وجم جاسم بهذا الوطن يبجن عليه احلامه
لحفظ الديانه استشهدو اهل الدمع والقامه

والله يصبره الفاجده ... بهاي المصايب تبتلي
——————————
جاسم لبس ثوب الجفن والعمه صار الناصر
وجم جاسم ابثوب العرس ضحه النفس عالساتر
جان وكبل عام الرحل بهاي المجالس حاضر

وامه البقت تبجي وتون ... وتنادي هدمو منزلي


علاء عبد الحسين الكربلائي

يا حلاتك وانت نايم
مهنه بالنومه يجاسم
انت العزيز ابن العزيز العن عليه
يا امانه وضاعت بوادي المنيه
اه يجاسم اه يجاسم اه يجاسم اه يجاسم
*******
يا حلاتك وانت نايم وسط تربان الوطيه
نايم ودمك يلالي طايح وعينك عليه
ولله ماقدمك لوني ماشفت هاي الوصيه
بساعة الشدة يخويه جاسم اوليدي هديه

بدرع اخوي انت شحلاتك
اكثر من ابني غلاتك
ومن رحت للحكومه بس افرك بديه
يا امانة وضاعت ابوادي المنيه
اه يجاسم اه يجاسم اه يجاسم اه يجاسم
******
كلبي مايحمل اشوفك هيج مرمي عالترب
نفس شوغة علي صارت بيه ودموعي تصب
وانا شحمل موش وحده هواي شوغات الكلب
بصف علي الاكبر وضعتك يا محب وبصف محب

ماكو منك وبصفاتك
ياكحل ناضر خواتك
عليك وي زينب بواجينه سويه
يا امانه وضاعت ابوادي المنيه
اه يجاسم اه يجاسم اه يجاسم اه يجاسم
********
عاين الامك يجاسم اشلون ملجومه وتون
وانت نايم وهيه تبجي وخيم اعليهه الحزن
وانا اصرخ ها يجاسم هسه احس مات الحسن
عيوني من كد البواجي اشعر عيوني انعمن

لجلي بايع كل دنيتك
ما اجيت وياي ريتك

فكدك الوحدك يعمي اكبر رزيه
يا أمانة وضاعت بوادي المنيه
اه يجاسم اه يجاسم اه يجاسم اه يجاسم
*******
بعد الاكبر من ذبحني وكلبي من امصابه ذاب
هيج اول مره ينكع ثوبي من دمع المصاب
انت ياجاسم نهيته َكلبي وزداد العذاب
هو هيج ايحس بذيه كلمن ايفاركله شاب

الله لا ينطي الفجعني
ومن ضرب راسك وجعني

والفكد مثلك يعاشر بس اذيه
يا امانه وضاعت بوادي المنيه

اه يجاسم اه يجاسم اه يجاسم اه يجاسم
***********
عمي هو افراك وجهك بالكلب جرحه يمس
بجرح راسك لمن شفتك كوه جريت النفس
هو هيج الفكد مثلك ميت بروحه يحس
وانا ميت لمن شفتك دامي من ضرب الرجس

والطبر راسك يغالي
فتلي كلبي وشلي حالي

دمك التارس مكانك عالوطيه
يا أمانة وضاعت ابوادي المنيه
اه يجاسم اه يجاسم اه يجاسم اه يجاسم
************

عقيل سلام الزيدي

بندرية ليلة مولاي القاسم ع

الليلة حنتَّة وباچر يذبحونة
عريس الولد واهلة يلمونة
عريس الطف ..عريس الطف
**
ابيوم عرسة جاسم امطشرينة .. واويلاه واويلاه
گلبو اصواني العرس يم عينة .. واويلاه واويلاه
حرگو الحنة وهذيج الصاية .. واويلاه واويلاه
خاطر ايحرگون گلب اسكينة .. واويلاه واويلاه
ومن الخيل جاسم هدلت امتونة
الليلة حنتَّة وباجر يذبحونة
عريس الطف .. عريس الطف
**
جابة عمة ويمسح اعويناتة .. واويلاه .. واويلاه
امن الترايب للخيم زتاتة .. واويلاه واويلاه
من وصل باب المخيم شايلة ...واويلاه واويلاه
امة طلعت تركض وعماتة .. واويلاه .. واويلاه
متغير الولد شو منخطف لونة
الليلة حنتَّة وباجر يذبحونة
عريس الطف .. عريس الطف
***
ابو طول الحلو ذابل عودة ... واويلاه واويلاه
امن الشموس امحرگات ازنودة .. واويلاه واويلاه
والمصيبه التوجع امة اهواية.. واويلاه واويلاه
واحد امصوبة ترة اعلى اخدودة .. واويلاه .. وايلاه
ابدمة اتغسل وودروهن اعيونة
الليلة حنتَّة وباجر يذبحونة
عريس الطف .. عريس الطف
****
ابني راح اتصيح رملة امن ايدي .. واويلاه واويلاه
الجان كلشي وجان حتة اعضيدي .. واويلاه واويلاه
ثوب زفتك راح ادفنة ابروحك .. واويلاه واويلاه
هاي جبت اسكينة گوم اوليدي .. واويلاه واويلاه
اشلونة اوية الذبح ما راهم اشلونة
الليلة حنتَّة وباجر يذبحونة
عريس الطف .. عريس الطف
*
موش شمعة خيمتة شعلوها .. واويلاه واويلاه
اعمامتة الحلوة ترة لبسوها .. واويلاه واويلاه
وخلو امة تصرخ وما هادت .. واويلاه واويلاه
اهدوم زفتة بلخيم دافوها.. واويلاه واويلاه
بعدة ازغير مو مالت يشيعونة
الليلة حنتَّة وباجر يذبحونة
عريس الطف .. عريس الطف

الشاعر علي العبادي