🇩🇪 Xabar berganimizdek, Kambag‘allikni qisqartirish va bandlik vaziri Behzod Musayev boshchiligidagi delegatsiya Germaniyada xizmat safari bilan bo‘lib turibdi.

Bugun O‘zbekistonning Germaniyadagi elchixonasida ushbu davlatning yirik ish beruvchilari bilan davra suhbati bo‘lib o‘tdi.
Unda vaqtincha xorijda ishlash istagida bo‘lgan hamyurtlarimizni Yevropaning eng rivojlangan davlatiga ishga yuborish sohasidagi hamkorlikni kengaytirish masalasi muhokama qilindi.

Uchrashuvda Germaniya iqtisodiyoti Sharqiy qo‘mitasining malakali ishchi kuchi bilan ta’minlash masalalari bo‘yicha spikeri Enriko Rule hamda mahalliy 32 ta ish beruvchi qatnashdi.

Alohida qayd etildiki, Germaniyada tashqi ishchi kuchiga ehtiyoj ortib bormoqda va hozirgi kundagi hisob-kitoblarga ko‘ra yuk mashinasi haydovchisi, hamshiralik, mexatronika, sanoat, gastronomiya, yo‘l qurilishi kabi sohalarda 130 000 dan ziyod ishchi yetishmayapti.

Muloqotda germaniyaliklarning talabidan kelib chiqib fuqarolarimizga nemis tilini o‘rgatish uchun shart-sharoitlar yaratish, kasb-hunarga o‘qitishning nemis modelini joriy etishga qaratilgan qo‘shma loyihalarni amalga oshirish tashabbusi bildirildi. Qolaversa, Germaniyada talab yuqori bo‘lgan mexatronika, logistika, elektrotexnika, santexnika, mashinasozlik, ishlab chiqarish, qurilish, mehmonxona va restoran biznesi kabi 20 ga yaqin soha bo‘yicha o‘qituvchi va trenirlarni tayyorlash taklif etildi.

O‘zbekistonning ishchi kuchi, xorijda ishlash istagida bo‘lgan fuqarolarining kasbiy va til o‘rganishlari uchun yaratilgan shart-sharoitlarga bag‘ishlangan taqdimot ham bo‘lib o‘tdi.

Uchrashuv davomida yangi istiqbolli loyihalar ustida qizg‘in muhokamalar va mavjud muammolar yechimi borasida muzokaralar olib borildi.

Sayt | Telegram | Facebook | Instagram | Youtube

Berlinda Oʻzbekiston va Germaniya oʻrtasidagi migratsiya toʻgʻrisidagi bitim muhokama qilindi

Oʻzbekiston Respublikasi Kambagʻallikni qisqartirish va bandlik vaziri Behzod Musaev ushbu kelishuvni muhokama qilish uchun federal hukumatning migratsiya shartnomalari boʻyicha maxsus vakili Janob Shtamp bilan uchrashdi.

Uchrashuvda Ichki ishlar vazirligi, Mehnat vazirligi, Sogʻliqni saqlash vazirligi va federal bandlik agentligi vakillari ishtirok etdi. Oʻzbekiston va Germaniya oʻrtasida mehnat migratsiyasi toʻgʻrisidagi bitim konsepsiyasi ikki mamlakat tomonidan taqdim etildi.

Konsepsiya Oʻzbekiston Respublikasi Prezidenti Shavkat Mirziyoyevning Germaniyaga davlat tashrifi va kansler Shols va federal prezident Shtaynmayer bilan uchrashuvidan soʻng ishlab chiqilgan.

Kelgusida ushbu shartnoma oʻzbekistonlik mutaxassislarning Germaniyaga migratsiya jarayonini osonlashtirish va ikki davlat oʻrtasidagi mehnat migratsiyasi, kasb-hunar taʼlimi va kadrlar tayyorlash sohasidagi hamkorlikni yanada mustahkamlashga qaratilgan.

Suhbat konstruktiv va doʻstona ruhda bo‘lib o‘tdi va loyihalarni amalga oshirish uchun koʻplab imkoniyatlar mavjudligi taʼkidlandi.

Sayt | Telegram | Facebook | Instagram | Youtube