AfroRead

ሰርቶ ለመጠናቀቅ ከ20 አመት በላይ የፈጀው "ይሁን" አልበም ሊለቀቅ ነው።

በበርካታ መድረኮች ላይ በአስገራሚ ድምጹ የነዋይ ደበበን ሙዚቃዎች አሳምሮ በመሥራት የሚታወቀው ድምጻዊ ካሳሁን እሸቱ (ካስዬ) ለ14 አመት ያህል የለፋ የደከመበትን ይሁን የተሰኘውን አልበሙን የፊታችን አርብ ጥር 17/2016 ዓ/ም ለአድማጭ ያደርሳል።

ይሁን አልበም 15 ትራኮች ሲኖሩት ከ15ቱ ውስጥ ሶስቱ ሙዚቃዎች በተለያዩ ሀገሮች በመንቀሳቀስ ክሊፕ ተሰርቶላቸዋል።

ሙዚቃው ለአድማጭ የሚደርሰው Kassahun Eshetu (Kasseye) በተሰኘው በራሱ የዩቲዩብ ቻናል ነው ተብሏል።

በእዚህ የሙዚቃ ስራ ላይ በግጥም እና ዜማ ብሎም በቅንብር ቴዲ አፍሮ (ቴዎድሮስ ካሳሁን) መሰለ ጌታሁን ሚካኤል ሀይሉ (ሚኪ ጃና) ራሱ ካሣሁን እሸቱ (ካስዬ) ፣አቤል ጳውሎስ ፣ካሙዙ ካሳ ፣መሀመድ ኑርሁሴን እና አበጋዙ ክብረወርቅ ሺዎታ ተሳትፈውበት አጣፍጠው ሰርተውታል።

የእዚህ ሙዚቃ አሳታሚና አከፋፋይ በበርካታ የኪነ ጥበብ ስራዎች ላይ የራሱን አሻራ ያስቀመጠው ኪነት ፕሮዳክሽን መሆኑ ተገልጿል።

እዚህ ለመድረሴ የጋሞ አባቶች ምርቃት የመንገዴ ጠራጊ ነው ብሎ የሚያምነው ካሳሁን እሸቱ ተወልዶ ያደገው በውቧ የመዋደድ እና የመከባባር ተምሳሌት በሆነችው አርባምንጭ ከተማ ነው።

ትልቅ እንደሚሆን በትንሿ ልቡ የተሳለበት ህጻን በጊዜው እጅግ ስመ ጥር በነበረው በአያቱ ጠጅ ቤት ውስጥ ይከፈቱ የነበሩትን የተለያዩ የሀገረሰብ ሙዚቃዎች እየሰማ የመዋዕለ ህጻናት ትምህርቱን ይማር ነበር ኋላም ወደ አንደኛ ክፍል ሲዘዋውር የሙዚቃ ኮከብነቱን ጀመረ፡፡

በጊዜው ማግኘት አስቸገሪ የነበረው 99 % ነጥብ የሙዚቃ አርአያዬ ብሎ የሚጠራውን የአንጋፋውን ድምጻዊ የንዋይ ደበበን ‹‹እሸት በላሁኝ›› ዘፈን አሳምሮ በመጫወቱ የሙዚቃ መምህሩ ደስ እያላቸው ሰጡት።የቤተሰብ ድጋፍ ብዙም ባይደረግለትም በህጻንነቱ የጀመረው የሙዚቃ ፍቅር እንዲሁ ሊለቀው አልቻለም እና አብሮት ያድግ ነበር።

ስለዚህም የንዋይ ደበበን ሙዚቃዎች እያንጎራጎረ አርባምንጭ ላይ በየክበባቱ እያዞረ ህብረተሰቡን ማዝናናት ጀመረ ። ከድምጻዊ ታደሰ በቀለ፤ከጋዜጠኛ መሳይ ወንድሜነህ እንዲሁም ከኮሜዲያን ታረቀኝ ካሳዬ ጋር በመሆን በአርባንጭ ብርሃን ፀረ-ኤድስ ክበብ ውስጥ በፈቃደኝነት ኪነጥበባዊ ፕሮግራሞችን ያቀርብ ነበር።ከዛም 2ኛ ደረጃ ትምህርት ሲገባ በከተማ በሚገኙ የግል እና የመንግስት ተቋማት ለምሳሌ MG(ሙላቱ እና ጌትነት) በተሰኘ የከተማው ባንድ ፤ወጋጎዳ(ወላይታ፤ጋሞ፤ጎፋና ዳውሮ) በተሰኘ ባንድ ውስጥ ከኪቦርዲስት ሀይሌ በርሄ ጋር በሁሉም የደቡብ አካባቢዎች በሙዚቃ ተሳትፏል፡፡

ኋላም ይሳተፍበት የነበረው ብርሃን ፀረ ኤድስ ክበብ ፤የዞኑ አስተዳደር፤የመንግስት መ/ቤቶች፤የትምህርተ ቤት መምህራኖቹ በጋራ ትልቅ የሽኝት ፕሮግራም አዘጋጅተው ለተሸላ የሙዚቃ ሀይወት መዋጮ ሰብስበው ከከድምጻዊ ታደሰ በቀለ ወደ አዲስ አበባ ላኳቸው።

አዲስ አበባ ከመጣ በኋላ የሙዚቃ ህይወቱን የጀመረው ቦሌ አካባቢ በሚገኘው ላየን ክለብ ከላፎንቴኖች ጋር በተዘጋጀው ፕሮግራም ላይ ነበር።ሲቀጥልም ሐረር መሶብ የተባለ የምሽት ክለብ ውስጥ ለ6 አመታት ከብዙዎች እየተማረ እና እየተዋወቀ ቀጠለ።

በ1997 ዓ.ም በኢቫንጋዲ ፕሮዳክሽን በተዘጋጀው ታሪክ ተሰራ በተሰኘው አልበም ውስጥከአብዱኪያር ጋር በመሆን የጋሽ ጥላሁንን ዜማ ከማይክል ጃክሰን (you rock my world) ከተሰኘው ዜማ ጋር remix አድረገው የሰሩት ስራ ከህዝብ ጋር በደንብ አድረጎ አስተዋውቆታል።

ከዛማ በአንቲካ ባር እና ሬስቱራንት ውስጥ በድምጻዊነት ተቀጥሮ ለ 6 ዓመታት በተጨማሪም በመሳፍንት ቤት ለ5 አመታት በሙዚቃ አሳልፏል።በ1998 ዓ.ም ከታዋቂ የሙዚቃ ፕሮዳክሽን ካንፓኒ ጋር አልበም ስራ ለመስራት ውል ቢፈራረምም ከሪከርዲንግ ስራ በኋላ በተለያዩ ምክንያቶች ውል በመቋረጡ አልበሙ ከፍጻሜ ሳይደርስ ቀርቷል፡፡

እነሆ ከብዙ አመታት ድካም እና ጥረት በኋላም ታላላቅ የሙዚቃ ሰዎች የተሳተፉበት <<ይሁን›› የተሰኘ የሙዚቃ አልበሙን በሙዚቃ ጉዞው ውስጥ አብረውት ለተሳተፉት ቡተሰቦቹ፤አድናቂዎቼ እና ወዳጅ ዘመዶቹ ሁሉ እንካችሁ ብሏል።እያደመጣችሁ ተዝናኑበት፡፡

454 viewsAfroRead Marketing @Gizuf Digital Service LLC, 14:11