كلها تتاني تخلص العليله
وداع ،،،، وتسير
النوگ بأهلها

لكن تعطل ممشى الهواشم
دموع ،،، ورجاء
ونظره شثگلها

مچلبه بأبوها وتگله اموتن لو تبتعد
ولتگلي اردن بالسفره هايه ماظن ترد

وضل جاثي اعله اركبه وهي باديه
واعليها ضل يبچي وتبچي عليه
ولو شمها كتالة الحسره تجيه

وهسه بده ضماه
الماشي درب اذاه
عنده حچي ثگيل
ودمعه حزن حچاه
*********
ليش الزمان يدولب اهلنه
تصيح ،،،، ويشيل
من بيته ابويه !!

ويهل المحامل نزلوا المحامل
اريد ،،،، الرضيع
انطوني اخويه

يقهر وضعها وحسين ابوها عاش بجرح
شلون التحبه بالهيمه باچر يشرب ذبح

وجابلها عبدالله وهي تنوح
چي يدري من يضحك تشفه جروح
بس ويلي لو باچر عنها يروح

بعده طفل رضيع
عمره وسف يضيع
بنبله غفل تطيح
برگبة مثل ربيع
*********
تلوج بحزنها چنها اعله ناره
تسير ،،،، بدون
خيمة سترها

تباوع لزينب زينب اجتها
تگول ،،،، اشوف
روحچ قهرها

ياعمه ادري بخوفچ عليه وفكرچ شنو
بس الله اقوى ياعمه مني ومن العدو

مارادت تهضمها وهمها تزيد
شتگلها يمشوني البابه يزيد ؟!
شتگلها يربطوني بربطه حديد ؟!

ويمها بقت تدور
چنها عطر بخور
والها حچت كلام
اعليها يطش سرور
*********
ورجعت لابوهة تترجى رجعت
تريد ،،،، تروح
ويه الغوالي

ارحم رجفتي وخوفي عليكم
يماي ،،، عيون
گلبي ودلالي

وهنانه اجاها عمها وحضنها راعي الفضل
تطمني يعمي بعيوني ابوچ ويرجع عدل

وحسين يضم وجهه ودمعه يسيل
لحد هسه بضعونه عنده كفيل
بس باچر من يوگع موته ثگيل

بگلبه حمل خيام
وگلبه تجيه سهام
يعني سهم يصيب
الخيمه لمن ينام
*********
وعافوها گوه وغرب ضعنهم
بعيد ،،،، وتراب
ضيع اثرهم

وضلت تلوح بثنين اديها
وسلام ،،، تصيح
يارب سفرهم

وضايع فكرها ويه اثرهم ويه الضعن
تبچي وعلمها هناكه خوات اعليها بچن

والفارگ احبابه يبدي يشيب
يضل ينزف مايرهم جرحه يطيب
يضل عايش كل عمره گلبه كئيب

عنها مشت ضعون
منها خذت عيون
واللي مشوا دلال
بكسره لمن يجون .

احمد العبادي

ابچي لحد.... مايشتعل گلبك جمر
فرصه الدمع... لاينتهي بيك العمر
مامرتوي... من المجلس ولطم الصدر

باچر ترى... من تخلص سنينك تضل
وسط الگبر... تتلفت تدور أمل
غير العشگ... للضامي ماينفع عمل

لاتنطي فرصه الذنبك يگوه
ولتخلي جرحك ياخذ هدوه
طاح المخيم فوگ النسوه   ....  حسين

درب الحسين يعدل مشيك
حكمه ورزانه يضيف الحچيك
بس انت زود للطف بچيك    ......  حسين

محبوبك طحنوها ضلوعه
ويصبن لجل اخته دموعه
خل حُبك حُب مدمع نوعه
وكل يوم يمر بيك بلوعه
*********
دامك جسد ....  يتحرك الطم للسبي
وخل بالجرح.....  لسانك لونك تحچي بي
حافظ على  .....  حبك لاهل بيت النبي

الخدمه سر  ....  والسر امانه عد محب
من تنكسر  ....  احمد الهك وانتحب
عندك ترى  ...  نعمه وحذاري تنسحب

خلي الخدامه مرايه الروحك
من ماكو خدمه راجع روحك
ذنبك  تراب يغطي جروحك   .....  حسين

بدموعك ارسم صورة عاشگ
واتخيله حافر فوگك ساحگ
وفارگ لونها الخيل تفارگ     .....  حسين

كض نفسك والزهره تكضك
وبالمجلس خل يكبر حضك
من تغلط والناس ترفضك
المجلس مأوآك يحفظك
*********
بسرعه العمر  ....  يروح ويغافل كل بشر
واتعس بشر   ....  الماشي وفلا تارك اثر
واقصد اثر   .....  دمعه الگطع اترف نحر

اعظم جُرم   ....  الخادم يسوي لو ترك
حزنه ونسه  ......  دم الحسين اللي انسفك
هالدم الة  .....  عرش الله من فزعه ارتبك

لاتنسى ياهو الصاح اوليدي
بعدك رضيع وموتك بايدي
يارملة زيدي المدمع زيدي   .....  حسين

تخيل تصير اعليك الفزعه
وحدك تحير بياهو ترجعه
وياهو اليشب النار تمنعه    .....  حسين

حط نفسك بالهيمه بوحدك
وبس انت ولا ناصر عندك
وضمآن ومتلوع چبدك
وتلوذ النسوان بسدك
*********
خيط العشگ  .....  من ينگطع يرجع صعب
رايد  الزلم  ....  التحمل متاعب هالدرب
هذا الدرب  .....  بي كربله تحز الگلب

بي كربله  .....  بي جمره طاحت عالطفل
بي حرمله  .....  بي هوسة وجنود وچتل
هذا الدرب  ....  وهذا العشگ هذا الحمل

لو تلگه گاعك موش  احمالك
لوح السماء بجنح اخيالك
بالحب تسوي كلشي ابالك   .....  حسين

اخذ المدامع واهجر ناسك
حچي الغشيم يوجّع راسك
محد يعيش العاشه احساسك   ....  حسين

ومن توصل لحسين تگله
عن همك وهموم الرحله
شگد صعبه وماچانت سهله
چن ماشي اعله الشام بهزله
*********
ماتنهضم  ....  لوماكو حب ماتنهضم
مغزل حچي ....  تلگه القصايد باللطم
تغزل حچي   ....  بي حرگه تچويلك عظم

بوجهك اثر  ....  خلي وعلامة تميزك
عن البشر  ....  من عدها ربك يفرزك
عشگك جرح  ....  منطيك حتى يفززك

فز اعله جرحك بالك تغفه
طلعن خوات الكافل وسفه
شلون اعله هزله الكلهن عفه  .....  حسين

طب خاشع الصرخات المجلس
وزاعل ضواك وعيش الهندس
الطف ظلام وماجاب اي حس  .....  حسين

الظلمه البالمجلس شمسك
ولايعله اعلى الناعي حسك
خل حچيه المجروح يلمسك
وبالمجلس ضل راجع نفسك  .

احمد العبادي

لوالدها   _ اجت رقيه
تباوعله  _ على الوطيه
تضل تدعي _ بحزن سبيه
اين الطالب بدم المقتول بكربلاء

هالمنظر _ شلع گلبها
گاطعته  _ دمع دربها
كل دمعه _ جمر تصبها
اين الطالب بدم المقتول بكربلاء

للمنتظر ،، تشكي الم  ...  حسين
من الطعن ،، ماضله دم  .... حسين
من السحگ ،، صدره انگسم  ....  حسين

تحچي  ،،  تسكت وتبچي  ...  بنيه ماتحمل افراگ ابوها
شافت ،،  جثته وصاحت  .... نعمة الله ابد ما رعوها
*********
يالمهدي  _  ويايه باوع
لبصدره  _ شنهوه طابع
هم ميت  _ يسحگونه سامع  !
اين الطالب بدم المقتول بكربلاء

والدنه _ شكثر يحبنه
ومن صدره _ انوخذ عشگنه
مشتاگه  _ بقت خيمنه
اين الطالب بدم المقتول بكربلاء
ماينغفر ،،  هذا الذنب  ...  حسين
مات بامل ،،  مية شرب  ...  حسين
داروا عليه  ،،  كل الحزب  ....  حسين

راحت.. تشبگه وناحت  ... تحترگله غدت چنها خيمه
تحضن  ...  جثته وتصفن  .... چي بقه يمر صور بيها ضيمه
*********
ياجرحه  ...  بناظرها شاخص
بعد اصبع  ...  من ايده ناقص
وتشوفه  ....  بترابة غايص
اين الطالب بدم المقتول بكربلاء

گالتله _ اخذ اصبعي
وگوم اشرب _ من عيني دمعي
ولثارك _ كل عمري ادعي
اين الطالب بدم المقتول بكربلاء

من الخيم  ...  جايه ركض  ...  حسين
تلم جثته  ....  من الارض  ....  حسين
ليش انسحگ  ...  طول بعرض  ...  حسين

ذايب  ...  شافته وشايب  ..  شعره كله بكثر هم دليله
عرفت  ... دنيته اتطفت  .....  من يفكر بقه  بالعقيله
*********
ماتهده  ...  وتون لبوها
والعسكر  ...  ركض اجوها
جروها  ...  وحيل اضربوها
اين الطالب بدم المقتول بكربلاء

الترچية _ صارت باديهم
مايرحم  _ الم سبيهم
وياذي _ الگلب حچيهم
اين الطالب بدم المقتول بكربلاء

وصاحت  انه  ...  بعازة ابو....  حسين
اشتد علي  ...  سوط العدو  ...  حسين
وين الحضن  ....  وين الدفو  ...  حسين

عندي...  تگله يالمهدي  ....  وينك احضر بعد مالي حِيله
متني  .... لوعو متني  ....  گلي شنهو العمل والوسيله
*********
هالطفله  ...  جرح گلبنه
وياها  ...  ندعي بحزنه
بدمعتنه  ...  بالم لطمنه

اين الطالب بدم المقتول بكربلاء
كل شيعي _ وشكو مواسي
بدلالة _ جرحها راسي
والدمعه _ أمر أساسي

اين الطالب بدم المقتول بكربلاء
ماتت على  ...  طشت النحر   ...  حسين
طفله لچن  ... شابت قهر  ...   حسين
لمعنى العشگ  ...  تركت اثر  ...  حسين

طفله  ...  صعدت بهزله  ....  وبيها تفتر ارض بس شماته
وتشكي  .. يم رمح يمشي..   براس ابوها وعطش هد لهاته

احمد العبادي

يضيع _ اليعوف _ عزاء _ حسين
********
آنه عمري عايش عالدمعه ورحمة العزية
وحلمي كله رايد كون ابقه بنظرة الزچية
مالي حيله تايه لو هدت فاطمه ادية
هي جمره جابت لجروحي وابچي عالسبية

والدموع النازله
تحلها اكبر معضله
بس عجيبه كربله  ...  ماتنحل

بيها نسوان النبي
تمشي گوه وتنسبي
بلوه طاحت عالعبي  .... ماتنحل

بأنين _ تصيح _ نساء _ حسين
*********
كلشي عندي منبر  ومشچل دومي للمصيبة
ودمعي حولي داير  ماتاني فد نعي يجيبة
دموعه منه تنزل كل لحظه  المنذبح حبيبة
العنده حرمه تاهت بالصحرة وحايرة وغريبة

البس الاسود حزن
كل حياتي وابقه اون
عاللي عالعطشان ويون   ....  ياضعني

وغيراني هاللبس
رفعة من عنده التمس
واسمع الصاح بهمس   ....  ياضعني

حزين  _ يدور  _ نداء _ حسين
*********
ضوگ اضوگن الهم  من تنشف  عيني من دمعها
الدنيا غابة وآنه  ما اگدر احتمل وضعها
بلاية لطمة بيها اتذكر فاطمة وضلعها
آنه اشهگ الطف  والحومة  عايش بوجعها

كل كلامي عالجرح
ودومي انعه المنذبح
شويه مية ما تصح  ....  للعطشان  ؟!

السماء انفطرت
والقلوب انكسرت
عالمآسي اللي جرت  ....  للعطشان

يحيف _ سليب _ الرداء  _ حسين
*********
وكتي مني يمشي  مالحگ افتهم حياتي
باچر آنه ميت  والتبقى مني ذكرياتي
وحلوه لمن اسمع الوآدم تحچي عن صفاتي
هذا اسمه خادم نتذكره بكل عزاء يغاتي

حلوه لو مات الشخص
ومايذكرونه بنقص
عنه الوآدم تقص  ....  بس زينه

وزينة الزينة تره
الوآدم اللي تذكره
بلطمة ودموعه الجره   ....  بس زينه

جمال _ الحياة _ بكاء _ حسين
*********
آنه عشگي مجلس  واعتبره هو اهلي صاير
اخوه كلنه نلتم  ونّاصر  زلمه ماله ناصر
زلمه وحده باقي وتحيطه ولية الحوافر
وطفله يبچي رايد بس يرضع ضامي دمه فاير

طفله مارايد سهم
حرملة شو ما فهم
طشر من الرگبة دم  ... ياويلي

هالمصيبة  ماتفض
دايرة طول بعرض
بالسماء وبالارض   .....  ياويلي

ويريت _ اصير _ فداء  _ حسين  . 

احمد العبادي

كل الشوارب تقصده
سيد الرجولة توجده
يوم القيامه امجسده  _ فوگ العده

ابوفاضل _ ابوفاضل _ مدد
********
كل الزلم تمشيله  _  بابه وتصيح ادخيله
والماگصد لعتابه _ اعگالة يصبح شيله

چان الحسين يشيره  _ وبرايه متضل حيره
گول اسمه لمن تحتار  _ يغني اسمه عن الخيره

طينه صافي _ دومه وافي _ الگمر الگمر الگمر

عالي صيته _ وبحميته _ الگمر الگمر الگمر

البابه روح _ ينطي روح _ وغيره تبقى خالده
*********
من گبته تطلع شمسي _ بس حبه غير نفسي
كل عمره گاعد ميگوم _ ومن شافه گام الكرسي

ومن شافه عسكر لطفوف _ گدامه ذبوا لسيوف
ترعب عيون العباس _ الشافاها ماگام يشوف

يبس الدم _ من تقدم _ الگمر الگمر الگمر

چفه غيمه _ وطوله خيمه _ الگمر الگمر الگمر

بالنزال _ رعبه طال _ يرعد ابداً ماهده
*********
يهادد وابد مايسكت _ نهر الشجاعه و يكت
شبچة واجت عالسمچات _ من الشبچه ياهي التفلت!

فر العدو تلث فرات  _ وذبه اعله صوب الغيمات
يجرع عذاب العباس ! _ كلش خطيه المامات

جابت امه _ ارقه زلمه _الگمر الگمر الگمر

وحده عسكر _ صوته يزئر _  الگمر الگمر الگمر

كالفضاء _ كالسماء _ماكو حد يحدده
*********
يشتم قميصه يعگوب _ ورابط على گلب ايوب
وباسمه توسل بالله _ آدم لمن راد يتوب

الكافل بنت داحي الباب _  لوما رحمته احنه اتراب
حاكم على ارواح الناس   _  معتمده رب الارباب

بيده كلشي _ وامره يمشي _ الگمر الگمر الگمر

ولمقابل _ هذا جاهل _ الگمر الگمر الگمر

العطره ياس _ اهله ناس _ منهم الكون ابتده
*********
بشباچة علگت الروح _ وگتله بعد لاماروح
الا تشب بيه نار _ تحرگني لجل المذبوح

آنه ادري گلب العباس  _ كلش حنين اعله الناس
وباسم العقيلة الينخاه _ فوگه  يمطرها الماس

حلوه ناره _ للغياره _ الگمر الگمر الگمر

راعي جرحي _ وضاوي صبحي _ الگمر الگمر الگمر

بكل زمان _ بكل مكان _ آنه راح ابقه انشده  . 

احمد العبادي

لاتفتحلي بابك بس ** لتخليني ادگ غيره
الحيره حيره يم الناس ** وحلوه اببابك الحيره
اعيش بنظرتك مولاي ** وجرحك اغرگ اببيره
وجهي من رماد اخيام ** انرسمت كل تعابيره
يرب اسباب اليلطمون ** وغرام العاشگ تثيره
يراس اعله الرمح مشدود ** ويفييلك جنح طيره
************
على اعمالي اذا اتچيت ** اطيح شما ردت انهض
انه بختي بعزائك دوم ** يبو صدر الظلُم منرض
الدمعه المنك اتصب ليك ** ترجعلي السجل ابيض
گلبي برحمتك يحسين ** نفس غرگان حيل انكض
احب الشاله جرح النوگ ** والماشله حيل ابغض
ماناصفها زينب ليش ** كلشي لا زمن لا حض
*********
لتطلعني يامولاي ** من هاجس قصوري وياك
اعوذوا من الانه سويت ** خدمتي سيدي بحماك
يالمگابل نهر عطشان ** ويروّي الماي صار اضماك
بحرت ومركبي من اوراق ** والك اوصل گمت انخاك
يواگع من مهر عالگاع ** وجمر چنه التُرب لاگاك
بسبع حصوات ارجمه كون ** دليلي لو قبل ينساك
***********
فوگ الخوف خوفي يصير ** اذا لاسامح الله بيوم
بچيت وماكو بيه دموع ** واذا فوگي الجزع ميحوم
اخافن چي اعرف الحب ** اذا دام الدموع اتدوم
جفاء الدمعه من العين ** دلالة عن عشگ ملثوم
وانه المن عشگه روحه تكون ** وبچفوف العشگ ملموم
اتطشر اذا ضليت ** بلا دمعه السلب لهدوم
***********
يشمس وآنه تحتك ماي ** لتبخرني يامولاي
ابقعر الزجاجه ابقيت ** گبل لا عرفك آنه هواي
ماريد ارجع بعمري ** واريد اتحزم اعله الجاي
اصير اويه الضعن رحال ** ولدموع الطفل بچاي
ويمسحوگ السحگ ياريت ** موبعضاك لابعضاي
واجيب امي تون اعليك ** وتسوي عليك فياي .

احمد العبادي

جايك جايك بمدمع
ولهلي ما اريد ارجع
اريد الروحه روحه تصير
وروحي بعتبتك تطلع

جايك والجروح تهيج
مارايد حلول الضيج
رايد كون احس السوط
شنو آلامه بالتنديج !؟

جايك من طريق ابعيد
بس ماماشي بالتهديد
ياويلي على ال بالشام
اعتبروا سبيهن عيد

جايك جية الخجلان
زاير مرتخي وشبعان
ماتدفعني روس ارماح
ولا جوه الشمس عطشان

جايك يا گلب متعوب
ما فكر تطيح اذنوب
افكر مثلك من الگاك
اطيح اعله الوجه مگلوب

جايك ثوبي كله طين
ومتاني اللقاء يحين
حتى الطم عيوني اگبال
شباچك يبو الطيبين .

احمد العبادي

للسلطان علي ابن موسى الرضا:

يارحيم بكل گلب حب الحسين
وادخل الجنة اذا تمسكلي ادين
من ضريحك روحي تستسقي الغرام
وآنه اعمى وگبتك صارتلي عين

يا امام * گلبه ضام * للخيام *  هوايه جروح
ليك اجيت * توسليت * بيه ريت * يدوم النوح

يا ايها السلطان ارزقني الدموع
يا ايها العطشان كون اصرخ والوع
واتمنى اسمي يصير العبدُ الجزوع
*****
انت اختار المسافة والطريق
وانت حددلي اتجاهي والرفيق
آنه جثه وانت حاملها اعله اديك
وين ما تشمرني راح ارضى واطيق

ارتجيك * روحي بيك * دوم اجيك * مدنگ الراس
ياحنان * يا امان * يامكان * يفيض احساس

باسم الجواد انخاك ياجرح الجواد
خايف امل بيوم من لبس السواد
اشمر علي مولاي نيران ورماد
*****
ياغريب وتدري باحوال الغريب
سيدي خليني من عندك قريب
من فتات جروحك اشمرلي جروح
تفزز دموعي على دمع التريب

التريب * الغريب * السليب * الجوه الخيل
لجله كون * العيون * بلايه لون * وتبقى بليل

يالتكسرك مولاي نسمة كربلاء
وجبت العمر محزون وتقيم العزاء
وباذنك بعدها تدور صرخات النساء
***
عندي منهاج وعلي دومي مشيت
من احس بروحي بردت وارتخيت
يالرضا صوبك احط عيني واگول
فدوه لاتنهيني يالباسمك بديت

صنع اديك * وآنه ليك * يالعليك * ايامي تسير
الدليل * والسبيل * للذليل * البي تقصير

من الرضا التدبير للحب گمت اصيح
وعطفه عطف عباس باب اعله الذبيح
والباقي  بالاخلاص والمنهج صريح
***
يالرحمتك ماتحددها السطور
ولطفك الماينتهي اثلج صدور
لاتراويني صبح مابي عذاب
وبالمصيبة العظمى ارد ابقى ادور

بالعذاب * گلبي ذاب * واغتراب * مگضي اليوم
النساء * بلا رجاء * والعناء * يدور اغيوم

الركضت اخت لحسين مابين الرجال
الصرخة وجع اطفال من نغز النبال
ريت العمر خلصان المن عمري طال  !   . 

احمد العبادي

اجني وعالترب دم من اخوهن ضال
وويه الدم حچن وتشكن من الحال
********
اجني من السبي وبعده الدمه اعله الگاع
دم الضعنه مسبي مايروح بساع
وصاحن هالاجينه تطمنوا يسباع
بس بينه نقص نسوه وعُمر واطفال
********
اجني الكربله وانعادت المأساة
وحبات الرمل شو صارن مرايات
بيهن منعكس كل العذاب الفات
ومن عين السبيه اعله الرمل شلال
*******
وگفن عاينن وتذكرن لحسين
تحت دوس الفرس ويحرك الايدين
چنه يگول اركضن والحزن بعدين
اركضن لاتهد اعله الخيام ارجال
********
اجني ومن اجن متغيرات هواي
العبي حمره وگلب من عنده تايه راي
وطاحن عالترب واعليه يطشن ماي
وهني يصيحن يمن بيك العطش چتال
**********
بَچّن نوگهن لمن نعن والله
وحتى النوگ صاحن ويلي واويلاه
گبل الشام والطف هالضعن محلاه
بس هسه الضعن كل في وقاره انشال
***********
نعايات اجني وخازنات ادموع
ومو بس عالنعي اتطور الموضوع
بيهن روحهن گامت يناس اتموع
واجن يموتن من الهم نساء الآل
*********
ويفور الترب كلما نعيهن زاد
لن بدمه غيره المنكسر لُفاد
عاد الضيم كله هالضعن من عاد
ويذبح بالشهم هذا النعي لو طال .

احمد العبادي

هاي المرحله الماردنه نوصلها
وهاي المشكله المانگدر نحلها
كون سنينه الحلوات نسألها
فرگتنه الطويله  هايه تعقلها !
********
آنه اختك واجيت انعاك يحسيني
وعلى گبرك لطلع الروح من عيني
بس فراگك من الصار يآذيني
وعالموت شكثر فگدك يوازيني
******
وداعت ضحكتك يالبيها عمري يطول
علة موت گلبي بطيحتك معلول
شگد صيحنه  عنك تبتعد لخيول
بس صياحنه ضل يمشي للمجهول
*********
من شفتك قبر  صحت القبر محلاه
وصحت نزلوني يلا بالقبر وياه
الكل عمري يجي واركضله اتلگاه
يتلگاني ردته  هسه وين الگاه
*******
آخ شگد تعب مرانه يالمظلوم
خويه الصار بينه مايصير بگوم
نسوانك عليهن حرموه النوم
وبلايه هضم مامر عليهن يوم
**********
يحسين الحچي بگلبي ثگيل هواي
المهم هسه جبتلك هايه طاسة ماي
شكلك ضامي ضل يمشي الطريق وياي
گوم تروه ياروحي وامل دنياي    . 

احمد العبادي

علي بعد النبي _ هو خيرُ وصي
********
على قول النبي.... من يوصي بعلي
يعني هو الولي .... وغيره ماكو بعد

الخلافة الة _ هو راعي العُلا
عالي المنزلة _ ومايشبهة احد

وصى النبي بعلينه _ يعني القضيه لينه
خل تسمع المدينه _ بس حيدر ولي

شما سوت السقيفه _ حيدر يضل خليفه
والعترته الشريفه _ فدوه آنه وهلي
*********
على هو الصدگ _ گلبي باسمه يدگ
چان اذا يختنگ _ للنبي يهب هوى

بالحرب والشدد _ طه ينشد مدد
ياعلي المعتمد _ وللجروح الدوه

من ينشده حبيبه _ بسيفه النصر يجيبه
في طلة المهيبة _ العالم صفن

حيدر عجايب الله _ واعليه الهة صلى
محد دنه ووصلة _ شما دار الزمن
*********
النبي بالسمه _ حدده الفاطمه
شافه خوش ازلمه _ وماكو غيره الكفو

بالكلافة يشع _ وللرسالة درع
بصغره كلش سبع _ وبامره داخ العدو

ياهو اللي مثله خاطَر _ نايم يواجه الشر
روحه الحبيبه معبر _ ماهمه الخطر

روح الرسالة هو _ وگفاته بيها حلوه
وطه يشوفه تچوه _ وذراع واثر
*********
بحبه ديني اكتمل _ هو خير العمل
بالسمه شگد وصل _ اسمه جوه العرش

نعمة الله علي _ رحمة الله علي
قدرة الله علي _ وطاعه انس ووحش

الله اعله ارضه راده _ يتسلم القياده
ويعرفه بعباده _ ويحقق هدف

بس حقدوا الجماعه _ الماعدهم اي شجاعه
محد مقامه راعه _ ياويلي ووسف
*********
الرسول انقتل _ سمته ام جمل
وبعده حيدر ذبل _ من المصايب ترى

داره فوگه احترگ _ وابنه بالدم غرگ
وماكو خَيّر عرگ _ وانكر اعله الجره

ومرته انكسر ضلعها _ وماكف جري دمعها
وتالم الوضعها _ كل ليله ويون

ناح اعله حزنه آدم _ قام اعله طفله مآتم
كل القهر يعالم _ من كلمة وإن .

احمد العبادي

ظلمه المدينه _ السمه حزينه
وجرى دمعها _ احن حنينه

هاي ام ابيها _ ترجف اديها
يرحل تشوفه _ الگلبه عليها

موات النبي موات هالليله
وفاطم گاعده گدامه تبچيله
من يمشي علي يمشي ويتچيله
سموه والم سمهم هدم حيله

رسول الله انغدر
الرسالة في خطر
واهل بيت النبي
يتانيهم قهر
*********
شيسد فراغه _ رب البلاغه
الله اعله دينه _ صاغه صياغه

اي وآ محمد _ لو جفنك انسد
شحال الزچيه _ من الگلبه اسود

عگب هايه بعد ماضن اكو اصعب
لو مات النبي خد فاطمه يُضرب
وفدك ميراثها من عدها هم تُغصب
المدينة عگبه دار اوحوش ماتنطب

نبي الحق والعدل
اذا ما ضل عدل
السقيفه تبتشر
وسعاده لكل نذل
*********
روحه عليله _ ويدري برحيله
بنيته تعاني _ بقصه طويله

قصة هضيمه _ حُرمه يتيمه
يوگع ابنها _ بابشع جريمه

الماتگدر على فراگه اهل بيته
الچانت لليتامه سفره خاچيته
الامين الصادق المعروفه تسميته
راح يموت راحت منه عافيته

العليه صلى العرش
قريب اعله النعش
اعله حاله منهضم
الانس ويه الوحش
*********
وهي المصيبه _ وكلش عجيبه
بآخر وداعه _ روحه غريبه

من عنده تنفر _ اصحابه وتقر
ان مايوصي _ بل هو يهجُر

باخير ايامه زادت كلش الغربه
لان متعوب منه اتبرت الصحبه
ونسوا كل الحچي لنگال بالخطبه ( خطبة الوداع)
علي اعلينه ولي گالوا فلا اننصبه

مُدبر مقتله
ومُخطط كلشي اله
يقتلون النبي
وتهج العايله
*********
شعُظم الرزيه _ ابو الزچيه
الهادي الخليقه _ جته المنيه

وناحت خديجه _ وصارت حريجه
بگلب اليحبه _ وماشي بطريجه

لبن عمه علي ضل ينحب بحرگه
يگله وياي ضل ويرجع يشبگه
انه البعدك غريب ومنوخذ حگه
وعلي بيتي يطه الوادم اتحرگه

يطه انتظر
اندعيلي بالصبر
اذا زينب مشت
تحت سوط الشمر .

احمد العبادي

دخيل النام بفراش النبي بليلة
الشرس من گد رعبها ينهدم حيلة
الرسالة بلا علي چا طاحت بميلة
الدين يطيح حيدر يركض يشيلة

ابد ماهم بالاسيوف
علي بافعاله معروف
عبد بالشدة ميعوف ... شحال الشدة هايه في رسول الله

الكُفر ضل منه مصدوم
شلون وجايه هالنوم
وقتل فوگه بده يحوم .... كفو منك علي صايح عرش الله

علي ادخيله ... علي احچيله ... يشيعي كلشي لبگلبك

علي ناصر ... علي قادر .... يقرب روحك الربك

علي غيره ... علي سيره ... تترسه بالفخر دربك
*********
اهو ظهر الرسول وصارمه الباشط
وعلى مود النبي كل فارس يزامط
على سيفه شرط من الصغر شارط
ابد مترد اذا مو من دمه ناگط

الحبيبة قرة العين
يسويها ابو حسين
ينام امچانه مرتين ..... وثلث مرات لاعشره وبعد اكثر

علي مايرهبة الموت
ولاكثرة علو الصوت
علي فاتح حلگ حوت .. ومُخلص يونس وماخذ گلب لاشتر

علي الاشجع ... علي الاروع ... علي الماتشبهة اشباهة

علي التچوة ... علي القوة ... وابو الوگفة ومدد طه

علي الغاية ... وهو الراية ... الگمر بالحومة شالاهة
*********
توكل يامحمد گله وتطمن
وراك گلوب احبابك فقط يمشن
السيوف تلوحك بطخه تره يحلمن
اذا لاحنك آنه چا بعد المن !

توكل وآنه بگفاك
وتره تلگاني وياك
دليلك آنه واحماك .... وانه نورك اذا فوگك اجت ظلمه

انه الحاضر فلا غيب
الي من الله تنصيب
تشيب الناس ماشيب .... وانه الكل ناس تُخلق انوجد رحمه

علي لامع ... علي راجع ... علي ماينتهي ويخلص

علي قائد ... علي زايد ... يزيد بكلشي ماينگص

علي ذخري ... علي شعري ... وانه اطلب عونته بكل نص
*********
حفظ دم الرسول وفرح الأُمة
علي من يوم يومه منوجد رحمه
ابد ماشفنه والله بغيرته زلمه
لجل دين العدل كلش رخص دمه

بدون سلاح وينام
بمكان مترس ازلام
تشيل سيوف واسهام ... دخيلك ياعلي اشايل گلب انت !

دخيلك يا ابو تراب
يالبچفك شلت باب
اعجزت توصله الاصحاب .. يالبافعالك البي خسه سودتنه

علي علة .. بگلب ثُلة .. گلبهم منترس خسه

علي صامد ... علي واحد ... وابد ماينخلق نفسه

علي طيبة .. علي هيبة ... علي باسمه حچت خرسه
*********
الاسلام العلي مديون كل عُمره
وتبوس القبلة جبهة والد الزهره
وشرط يشكر علي ال بالحجة والعُمره
وترى ماعنده دين الگال ما شكره

اليشكره اكمل الدين
علي عاجن شكو طين
علي احساب اللي ميتين .. السؤال اعله الصلاه هم يعني عن حيدر

الصراط بايده مولاي
وانه الگاضيها دنياي
اصيحن ياعلي وياي .... اريدنك تضل حتى اخدم المنبر

علي الهمه ... علي الخدمه .. تجي من عنده للخادم

علي برفعه .. على السبعه ... اليحصره بمرتبة واهم

علي اكثر ... علي اكبر .. چبير وعالي عالوآدم .

احمد العبادي
https://t.me/afoopf

أسير الموت
وهمومك الك تابوت
تباوع للخيم وتموت
تفكر بالعطش وتموت
تدور عن اخو وتموت
تشم عبدالله من نحره وحسافه تموت
وحدك باقي بين الجيش
ماعندك ظهر يحميك
رايح للحرب عطشان
ومچلبه الفواطم بيك
مگلوبه القلوب اعليك مگلوبه
يعادونك ذنب واعليه محد يطلب التوبه
ذبحوا اكبرك مولاي
وعباسك وگع عالماي
وانت المقتلك مشاي .. يمتى تبين الحوبه !
تتلمس تراب الگاع وتشوفه
هم يرحم جسد مطروح ؟!
وتگل للشوچ هم ترحم خدر مذبوح ؟!
هم ترحم جدم يركض مخافة ونوح
جدم من الجمر مجروح
جدم حرمة تنادي بصوتها المبحوح
شگل للنار حتى من الخيام تروح
تصبر نفسك وعينك نهر يحسين
ماتگدر تضم سر وفضيحه العين
يالمحزم عليك بكل عذابه البين
ومحد عاملك بانصاف
لا مره ولا مرتين
ضلع الزهره من شافك بچالك دم
ماعندك سگف والدنيا تمطر هم
وگلب الگاع من گد ضيمك اتهشم
يالتحشم عرب مابيهم اليهتم
يوجه العيد
صاحت امك اعله الطف بعد شتريد
مايكفيك باقي بهالمعارة اوحيد !
وصاحت چي تباوع عالجروح تزيد
اريد تقل جروح اوليدي لا ماريد
لجروحه يمر بلسم
يالرادك ذبح من راسك لرجليك
باچر لو نوايا الشوم گربت ليك
من توگع خلاف الناس كله اعليك
ياهو اليگطع المنحر
وياهو اليسلبك بالبر
وياهو اليگدر يسوي نقص بايديك
يبو الوگفات شو ردولك الوگفات
بوگفة خيل فوگك وشبعت ارفسات !
مو وسفه الك وسفات
وآدم ماشية بدرب العمى وداسوك
تطلب رحمه ضليت وفلا رحموك
لاهضموك
هضموك بحرگ بيت الخدر هضموك
هضموك بركاض اختك غصب هضموك
شگد اذوك
تهج نسوانك تباوعهن يخلوك
تجيك من الخيم عطابة الكاروك
يافص الذهب وبنص ترب طموك
مارحموك .

احمد العبادي
https://t.me/afoopf

ورى الباب
بقت فاطم تتاني مُغيث ، وشعل ناره الدليله خبيث
ورى الباب
تنوح الطاهره وتريد ، يضل چف الاعادي ابعيد
ورى الباب
قيامة قامت من النوح ، وطفل من الرعب مطروح
ورى الباب
الدماء السايلات هواي ، ومرة حيدر تدور راي

ليش الزچيه هجموا اعليها
چا هي حرمه وشنهي بيديها
وبيا ذنب يسقط جنين الها
وبيا ذنب وآدم تبچيها

ام الحسين وحسين انكسر ليها
ام الحسين يبچي جوه رجليها
ام الحسين متچتف محاميها
*********
ورى الباب
عيال الزهره وسط الدار ، وعليهم جايه تركض نار
ورى الباب
اجه الطف واجتي النوگ ، وگلب زينب بقه محروگ
ورى الباب
انسمع صوت البچي والآه ، و ولافاد العدو وياه
ورى الباب
يزيدون العصر وتزيد ، الزچيه ال ون وابد متهيد

نزلت دموع الزهره يا ويلي
كون الحزنها ينهدم حيلي
وكون بنواعي ابدي مصباحي
واعله النواعي ينختم ليلي

دار الرسول وبناسه احترگ داره
دار الرسول محد راعى مگداره
دار الرسول واعليه شَنّوا الغاره
*********
ورى الباب
يفضه الزهره الحگي تصيح ، احس روحي اويه جسمي تطيح
ورى الباب
واجت فضه وتشوف الحال ، مرة اعليها تهد ارجال
ورى الباب
مصيبة اعليها ناح الكون ، وانه من اسمعها ميت كون
ورى الباب
عظيمه امصيبة الزهراء ، وبده من عدها عاشوراء

هاي المصيبة العُظمى لجروحي
المن عدها ابدي وابچي مذبوحي
بباب المخيم يشتعل گلبي
بباب الزچيه تشتعل روحي

من الزهره نار ونار من الخيم بيه
من الزهره نار تبچيني اعله مسبيه
من الزهره نار ترسم للجرح نيه
*********
ورى الباب
تگله الزهره آني وگال ، وإن وعاند الچتال
ورى الباب
السفيه الماله قيمه وجاه ، بعذابة الزهرة شبعت آه
ورى الباب
بحربهم شارك البسمار ، جرحها وانحسب غدار
ورى الباب
يصيح آه بگلب محروگ ، العليه باب الخشب مطبوگ

ماريد اكثر حچيي ماينفع
كون الاكثره اعليها بس مدمع
وتبقى عقيدة روحي وآمالي
يصلب عدوها المهدي من يطلع

لابد يعود لابد يرجع الغايب
لابد يعود وقاتل فاطمه يحاسب
لابد يعود وشُعلة من الغضب جايب .

احمد العبادي
https://t.me/afoopf

برحمة سيدي مچلب
چف عطشان كض الحْب
حبيته وبعد ماحب
وبعد للدنيا ماحَسب
اجيه خيمه وعلى اعتابه غرام تشب
و الله شكثر يمه الهوى طيب
يعزبلي بهدوء البال وبدمعه تربيني
ولعزوبيته ماتوصل اعزوبية امعزب
برحمة سيدي مچلب
غريب ومن يجي مسافر يمه مايحس غربه
كل احنه عطشناله  وهو الساقي والجربه
ازوره وارجع البيتي موكلي نقص بيه
جسمي وياي بس روحي تبقى مچلبه بالقبه
من صغري وعرفت حسين
رحمه الكل شخص مذنب
والراحه بمشينه وياه
من دونه الدرب مُتعب
انولدت وامي تتمنى
تسميني باسم موكب
وعشت ورگه ضعيفة حال
وشما هوية فوگي اتهب
برحمة سيدي مچلب
صار جناحي وبزوده احلق  عالي واتقدم
وصار احلامي وبطفه  شما اصفله اتحلم
ومن دونه  صرت اعلم
آنه شما گلت اگدر اگدر عالفشل واندم
بحسين الحياة الوان وسوده تصبح بدونه
والنور التشوفه الناس نابع من ضوه عيونه
وهذا الكون لو تدرون
هو بالاصل كونه
واتحير تفاصيله
ومن لونه العرش لونه
الحاله هايه عشناها وباوعنها شوف العين
تتغير حياتك من تحب حسين
والتغيير حيل هواي
بحيث اتگوم تبچي من تشوف الماي
وتضل باي درب تمشيه
تتحله بأدب مشاي
وردك لا ارادي يصير من اختك تطلبك شي
تدگلها الصدر وتگول ابشري وآنه الچ وفاي
بشخصك كربله اتاثر
وبدمع العشگ تكتب
برحمة سيدي مچلب
الله شوسع صدره
اذا واحد يريد بيوم يتركه ويعبر الغيره
هم برحمته يعبره
ويضل فاتحله مية باب ويبعثله نسايم شوگ
ترجعه الوعيه وتغيره
وعاليرجع فلا يعتب
برحمة سيدي مچلب
مي ساخن على جلدي وگع مره وذكرت النار
بچيت هواي ساعتها وصرت متوتر ومحتار
خفت والهده گلبي حسين
خفت والصفى فكري حسين
خفت واللي زرع بيه امل ثاني وجود حسين
على المچوي ثلج يسكب
صبح هو الگشر واللب
حبيبي ودومي اله اندب
برحمة سيدي مچلب   . 

احمد العبادي