عباس
صاحت البدويه
يمه باوع ليه
زينب العلويه   .....  بناظرك حطها

عباس
انت هسه اسماها
ابقى دوم اوياها
لو خطر حاطاها   .....  بخيمه حاوطها

يبو الغيره والغيره
اسم خالس الديره  ...  ابوفاضل

الك فاطمه تناطر
وفه ينملي العاشر  ....  ابوفاضل

يالبوفه واعدني توّك
خنگ شنق  اخنگ عدوّك
وهي الحرب  يوليدي جوّك
*****
عباس
هذا يوم الخوه
خوتك بي حلوه
وانت اصلا تچوه  ..... وهيبة معروفه

عباس
هُدهُد وماتنكض
وجهي باسمك ابيض
الخاصمك يترضرض   ......  عظمه من خوفه

ابد ما نصه اجناحك
خزر صاير اسلاحك  ......  ابوفاضل

هلا بنخوتك يبني
يالبطوله شيمني  ......  ابوفاضل

انه الحچي لبگلبي يمك
يمن فطن يالتفهم امك
فده الخيم خل يجري دمك
*****
عباس
لو تصير امرادم
لاتخلي ابن آدم
ماتطلع بي دم  .....  موّت بچفك

عباس
احرگ اهل الباطل
يبني وانت الكافل
يالابد ابد متجامل  ....  خصمك يعرفك

لعب سيفك تلعبه
وشكو عايل تادبه  ...... ابوفاضل

الخدر ساكن بفيك
كسر ظلمته ابضيك   ..... ابوفاضل

انه الجبت اعظم بطوله
ولد شهم كله فحوله
ابو الفضل رب الرجوله
*****
عباس
ياعجيد الساده
واخوتك هداده
يالتهابه القاده  ....  وتكتل عيونك

عباس
امدلهمه وخل تمطر
ورف لوائك وانشر
عالخيام اموكّر   ....  خل يشوفونك

انه رايده احسينك
ضوه يگعد بعينك ....  ابوفاضل

فقط سيدي اتگله
ونعم آمر وسهله  ....  ابوفاضل

النهر الة لازم تجيبه
تره المحب يخدم حبيبه
يمن صرت عونه ومُجيبه
*****
عباس
هايه آخر كلمه
يا امير الهمه
راح اضل مهتمه  ....  توصل اعلومك

عباس
بالعطش لاترحم
والجحافل تنطم
واليسولف ابكم  ....  يصبح بيومك

اذا بابي سديته
الك گلبي وديته  ....  ابوفاضل

يضل داير اوياكم
يرد گلبي ملگاكم  ....  ابوفاضل

واذا اجت ليك المنيه
سلم على اوليد الزچيه
وگله الوفه من امي بيه    . 

احمد العبادي

ريح الليالي تلچم جروحي للغاضريه
ودلالي شايل شوگ ومصيبه لبن الزچيه

عمري صار   دمعه الة
والخضار   بس كربلة
كل نهار    بي حرملة
وكل مسار   طف انملة

شگد احبك صرت  ...  حسين
باسمك اتسودنت  .....  حسين
يلي ضامي متت  ....  حسين
بجرحك اتعذبت  .....  حسين
*********
كاس المصيبة مُر وشربته ونزلت دموعي
صرت بخيالي ارسم حوافر تسحگ ضلوعي

ما اروح   الا واجي
بالجروح   شابع بچي
عندي روح  ثگلت حچي
من انوح   بحزني انتچي

من اطيح بصعب    .....  حسين
جوه جنحك اطب  ......  حسين
ياللي حبك حرب  .....  حسين
و وعره گاع الدرب  ....  حسين
*********
من الريشه اترف چفك عرفته وترحم عبيدك
عتبي اعله كلمن ماسك دموعه  وينزف وريدك

انت خيل   فوگك اجت
غمها حيل  كلمن رضت
يمسي ليل   عاللي بقت
بلايه حيل   واتغربت

انت جرح الزمن  ....  حسين
اختك بلا وطن  ....  حسين
لستري خدرك ثمن  ....  حسين
ابچي لازم اذن  ......  حسين
*********
يبقى سؤالي دوم اعله بالي بنبرة حزينه
شنهو الجنيته من عدنا حتى تعطف علينه

للسيوف  منطي ولد
رسمه اشوف  مثل الشهد
بلا چفوف   عندك سند
بالطفوف  طگه العمد

شدعوه هلگد عطف  ....  حسين
يالنهر والجرف  .....  حسين
اسمك بكل حرف  .....  حسين
رحمه شال و لطف  .....  حسين
*********
اعله فراشي واسمع صوتك يگلي آنه حبيبك
ماهد چفوفك  لو عني تبعد يم بابي اجيبك

ياغريب   صوتك جرح
يالحبيب   شابع ذبح
ياتريب   ليل وصبح
شگد عجيب  شالك رمح

راح اضل منكسر  ....  حسين
لجلك وللخدر  ....  حسين
بگلبي اشعل جمر  ....  حسين
حد ختام العمر    .....  حسين   . 

احمد العبادي

نزلة زنجيل:

هلا باللي لطم... واللي گلبه انهضم
ارد اسمع الأصم ... اذا دمامي دگ

وفي زنجيلي ضل .... الي صاير اهل
على كوكب زحل ..... من رفعته انطبگ

زنجيلي كل هويتي .... بي عالي يبقى صيتي
من اللطم حميتي .... ياحيدر مدد

ويه المواكب امشي ..... ودمعاتي تملي رمشي
للخدمه انطي كلشي .... وماهم بأحد
*
شحلو ثوب العزه ..... على كلشي جزه
بالعُمر فارزه .... تفرز اهل العشگ

من يلبسه الطفل ..... گلبه حُب يشتعل
من اللطم مايمل ..... بجرحه گلبه يدگ

ثوب العزه اليلبسه ...... اسود فلا يحسه
لنه ينقي نفسه .... الثوب ابيض يحس

والراية من ترفرف .... حيره وشنو اوصف
كل الاماني تغرف ..... وتضوي الشمس
*
ياشباب السلف .... الغيره صوت وهتف
ويه اهل النجف .... بلطمة وحده نضل

حد طلوع الفجر .... النعي مستمر
وماندور اجر .... المهم العمل

موكب يتبعه موكب ..... خلي الظهر يحدب
وين اللذي يعزب .... بجروح الخيم

الوگفة فشل لونها .... زينب بعد حزنها
وبعده ألم متنها ..... وياضيم الألم
*
والله جدر الطبخ .... رحمه دومه يضخ
صخامه كلمن يطخ ..... يلگه خير ورزق

واللي يجري الدمع .... لو يدگ الضلع
ظلمته توج شمع ..... ويملي دربه الصدق

الرادود ابو مصيبه .... بصوته الحزن يجيبه
وچي فاطمه قريبه .... تحط صوته بذهب

عمي الخدامه عالم .... توبة الابونا آدم
لولا الخدامه ماتم ..... كل معنى الادب
*
الشوارع تضج .... والخلايق تحج
بكربلاء عدنا حج ..... كل محرم تره

احنه شيعة علي.... نبچي لابن الولي
ال بقى منولي .... وعنده طلعت مره

مثل النخل وگفنه .... وصَفّن دول لطمنه
انشدت بعد حزمنه..... شيفلها الحزم !

صرختنه عالي حسها .... محد گدر يمسها
اللطمه انفهم درسها .... تضل مصنع زلم .

احمد العبادي

شجره النواعي  والجذر  يُبقى  تُراث اهلنه
وكلما نسمعه تشتعل وسط الگلب خيمنه
ميزه بحچي فطرة گبل لو هل اله دمعنه
من ينزل نحس الفرس  دايس على عضمنه

حلوه المواساة الگبل چانت
ماتوا اهلها وهي ما ماتت
ادخل محرم حتى لو بالعيد
هايه القصيده اعليه  لو فاتت

(ياشهر عاشور مامثلك شهر)

بهذا البيت دموعي تهمل
بگد ويلات ظهور الهزل
يجرح زينب چان الدرب
وصار اثگيل اعليها الحمل
*********
من اول صياري اسمع ابيات
تخليني اسافر للغريبات
ودليلي بنص خرابه وياهن يبات
واشاركهن نواعيهن على المات

انه طير البواچي الصار  عشه كل عزاء لحسين
مخنوگ بحياتي هواي  على الهدم صبرها البين
غريبه راحت اعله النوگ   وتتفرج عليها العين

(زينب ياغريبه)

على زينب  كل الدمع مانبچي لاي شي ثاني
على زينب  هضمة زلم  وكل شارب اللي يعاني
على زينب  چفوف الگمر صفگت غضب ويتاني

كفيل الخيام 
تجرحه السهام
ويجرحه المسير
التواليه شام
*********
مثل الندى من انعزل عن ماي الانهار
واصبح جمال وظاهره ونادر لمن صار
هيچ الخدامه تميزك  وتعلي مگدار

ايام العمر ويعدي لازم
وهنياله الگضت ايامه خادم
چم واحد رحل وبگبره نادم
وچم واحد ضوت گبره المآتم

(ايام ايام هاي الدنيا ايام)

هنياله العنده جرح
يضل نزفه ماينمسح
للضامي الشابع ذبح
والماخذ حيله الرمح
*********
گاع الطف تذوب الروح واويلاه  تمليني
من اعيالك ليش تروح  واويلاه  يحسيني

وسط اخيامك ذاك اليوم
بس المدمع گام يحوم
تگعد يم زينب وتگوم
تعرف روحك لامتدوم

(يامحلى الوداع بهل مسيه)

چان الوداع يبچي الخليقه
تتوسل اخته تريده دقيقه
يزود بقائه ويبطي برحيله
تدري السيوف تبدي رحيقه
*********
اكثر قصيده تخلي بينه اللوعه
وبيها المواسي ماتكف ادموعه
تسولف جرح عن زينب المفجوعه
الصارت عليها الونه هم ممنوعه
الشافت اخوها مهشمين ضلوعه

اعليها صاحوا زينب يلا للشام
وحيره هي شلون تعوف الاخيام
وعدها نسوة تحمل رضع ايتام
واليصيح ارجس وارذل ازلام

( يصيحون زينب طلعوها)
علويه وغرب
وياهضم الغرب
ياكل بالگلب  ياعالم

تطلع للسبي
لو حرگ العبي
زينب بت نبي  ياعالم

من تطلع تموت
والناگه تابوت
تطلع ركض ليش
الماطلعت صوت   . 

احمد العبادي

حي الله حياهم
بالحومه محلاهم
لحسين اهل غيره
ومأمن اوياهم

بالانصار... شد الظهر
بالانصار... شاف النهر
بالانصار... حس انتصر
بالانصار... يحچي الدهر

ابوسكينه استبشر ...  زلم عنده وعسكر ..  جبل
زلم بيها الغيره  ...  الة صاروا ديره...   و اهل
لحد هسه بيهم....  مواقف نحچيهم ....  مَثل
*********
مالبسوا ادروعه
والهوسه مسموعه
يحسين الاتماده
نكسرلك اضلوعه

بالگلوب  ...  حطوا خيم
بالگلوب  ....  غيره وألم
بالگلوب  ....  قسموا قسم
بالگلوب  ...  دم الا دم

يسووها امرادم  ...  ولايضل ابن آدم ...  عدل
اهل غيره ونخوه...  ومبادئهم خوه  ...  وعدل
يشيمون بالهده  ...  اديهم ماتهده  ...  وتمل
*********
عالخيل اذا صعدوا
رعدة غضب رعدوا
ومعناها خلصانه
الچفيه اذا شدوا

للحسين...  سووا درع
للحسين  ....  چنهم شمع
للحسين  ... صاروا ضلع
للحسين  ....  هدوا دفع

يهدون امدافع .....  منو الاول يطلع ....  منو
بالمزامط صاحوا  ....  لمن ميت جابوا ...  عدو
يبوفاضل احنه  ...  للحسين احسبنه...  اخو
*********
مغزل ذهب هُمه
كلهم وفه و همه
واحدهم الزينب
فدوه ونذر دمه

صناديد ..  مطروا رعب
صناديد   ...  واهل الحرب
صناديد   ....  جابوا غصب
صناديد  ....  مي الشرب

فرش فرشوا للحگ   ...  عدوهم لونه ازرگ  ...  جره
حچوا واهل الباطل  ...  جمعهم ضل جافل  ...  سره
النفشهن ريشاته....  نگص اجناحاته  ....  تره
*********
طينة وفة بيهم
ترهب اساميهم
جمعت علي وحمزه
دورة معانيهم

على الخيل  ...  لعبوا لعب
على الخيل   ...  نار وتشب
على الخيل   ...  كانوا حزب
على الخيل   ....  ماينغلب

چفوا گاع الحومة....  الخصم ذب اهدومه  ...  وشرد
الصغير الوياهم  ....  يشوفوا يلگاهم  ....  اسد
وانه الدوم ينشدهم...  وادور من عدهم  ...  مدد   . 

احمد العبادي

كلها تتاني تخلص العليله
وداع ،،،، وتسير
النوگ بأهلها

لكن تعطل ممشى الهواشم
دموع ،،، ورجاء
ونظره شثگلها

مچلبه بأبوها وتگله اموتن لو تبتعد
ولتگلي اردن بالسفره هايه ماظن ترد

وضل جاثي اعله اركبه وهي باديه
واعليها ضل يبچي وتبچي عليه
ولو شمها كتالة الحسره تجيه

وهسه بده ضماه
الماشي درب اذاه
عنده حچي ثگيل
ودمعه حزن حچاه
*********
ليش الزمان يدولب اهلنه
تصيح ،،،، ويشيل
من بيته ابويه !!

ويهل المحامل نزلوا المحامل
اريد ،،،، الرضيع
انطوني اخويه

يقهر وضعها وحسين ابوها عاش بجرح
شلون التحبه بالهيمه باچر يشرب ذبح

وجابلها عبدالله وهي تنوح
چي يدري من يضحك تشفه جروح
بس ويلي لو باچر عنها يروح

بعده طفل رضيع
عمره وسف يضيع
بنبله غفل تطيح
برگبة مثل ربيع
*********
تلوج بحزنها چنها اعله ناره
تسير ،،،، بدون
خيمة سترها

تباوع لزينب زينب اجتها
تگول ،،،، اشوف
روحچ قهرها

ياعمه ادري بخوفچ عليه وفكرچ شنو
بس الله اقوى ياعمه مني ومن العدو

مارادت تهضمها وهمها تزيد
شتگلها يمشوني البابه يزيد ؟!
شتگلها يربطوني بربطه حديد ؟!

ويمها بقت تدور
چنها عطر بخور
والها حچت كلام
اعليها يطش سرور
*********
ورجعت لابوهة تترجى رجعت
تريد ،،،، تروح
ويه الغوالي

ارحم رجفتي وخوفي عليكم
يماي ،،، عيون
گلبي ودلالي

وهنانه اجاها عمها وحضنها راعي الفضل
تطمني يعمي بعيوني ابوچ ويرجع عدل

وحسين يضم وجهه ودمعه يسيل
لحد هسه بضعونه عنده كفيل
بس باچر من يوگع موته ثگيل

بگلبه حمل خيام
وگلبه تجيه سهام
يعني سهم يصيب
الخيمه لمن ينام
*********
وعافوها گوه وغرب ضعنهم
بعيد ،،،، وتراب
ضيع اثرهم

وضلت تلوح بثنين اديها
وسلام ،،، تصيح
يارب سفرهم

وضايع فكرها ويه اثرهم ويه الضعن
تبچي وعلمها هناكه خوات اعليها بچن

والفارگ احبابه يبدي يشيب
يضل ينزف مايرهم جرحه يطيب
يضل عايش كل عمره گلبه كئيب

عنها مشت ضعون
منها خذت عيون
واللي مشوا دلال
بكسره لمن يجون .

احمد العبادي

ابچي لحد.... مايشتعل گلبك جمر
فرصه الدمع... لاينتهي بيك العمر
مامرتوي... من المجلس ولطم الصدر

باچر ترى... من تخلص سنينك تضل
وسط الگبر... تتلفت تدور أمل
غير العشگ... للضامي ماينفع عمل

لاتنطي فرصه الذنبك يگوه
ولتخلي جرحك ياخذ هدوه
طاح المخيم فوگ النسوه   ....  حسين

درب الحسين يعدل مشيك
حكمه ورزانه يضيف الحچيك
بس انت زود للطف بچيك    ......  حسين

محبوبك طحنوها ضلوعه
ويصبن لجل اخته دموعه
خل حُبك حُب مدمع نوعه
وكل يوم يمر بيك بلوعه
*********
دامك جسد ....  يتحرك الطم للسبي
وخل بالجرح.....  لسانك لونك تحچي بي
حافظ على  .....  حبك لاهل بيت النبي

الخدمه سر  ....  والسر امانه عد محب
من تنكسر  ....  احمد الهك وانتحب
عندك ترى  ...  نعمه وحذاري تنسحب

خلي الخدامه مرايه الروحك
من ماكو خدمه راجع روحك
ذنبك  تراب يغطي جروحك   .....  حسين

بدموعك ارسم صورة عاشگ
واتخيله حافر فوگك ساحگ
وفارگ لونها الخيل تفارگ     .....  حسين

كض نفسك والزهره تكضك
وبالمجلس خل يكبر حضك
من تغلط والناس ترفضك
المجلس مأوآك يحفظك
*********
بسرعه العمر  ....  يروح ويغافل كل بشر
واتعس بشر   ....  الماشي وفلا تارك اثر
واقصد اثر   .....  دمعه الگطع اترف نحر

اعظم جُرم   ....  الخادم يسوي لو ترك
حزنه ونسه  ......  دم الحسين اللي انسفك
هالدم الة  .....  عرش الله من فزعه ارتبك

لاتنسى ياهو الصاح اوليدي
بعدك رضيع وموتك بايدي
يارملة زيدي المدمع زيدي   .....  حسين

تخيل تصير اعليك الفزعه
وحدك تحير بياهو ترجعه
وياهو اليشب النار تمنعه    .....  حسين

حط نفسك بالهيمه بوحدك
وبس انت ولا ناصر عندك
وضمآن ومتلوع چبدك
وتلوذ النسوان بسدك
*********
خيط العشگ  .....  من ينگطع يرجع صعب
رايد  الزلم  ....  التحمل متاعب هالدرب
هذا الدرب  .....  بي كربله تحز الگلب

بي كربله  .....  بي جمره طاحت عالطفل
بي حرمله  .....  بي هوسة وجنود وچتل
هذا الدرب  ....  وهذا العشگ هذا الحمل

لو تلگه گاعك موش  احمالك
لوح السماء بجنح اخيالك
بالحب تسوي كلشي ابالك   .....  حسين

اخذ المدامع واهجر ناسك
حچي الغشيم يوجّع راسك
محد يعيش العاشه احساسك   ....  حسين

ومن توصل لحسين تگله
عن همك وهموم الرحله
شگد صعبه وماچانت سهله
چن ماشي اعله الشام بهزله
*********
ماتنهضم  ....  لوماكو حب ماتنهضم
مغزل حچي ....  تلگه القصايد باللطم
تغزل حچي   ....  بي حرگه تچويلك عظم

بوجهك اثر  ....  خلي وعلامة تميزك
عن البشر  ....  من عدها ربك يفرزك
عشگك جرح  ....  منطيك حتى يفززك

فز اعله جرحك بالك تغفه
طلعن خوات الكافل وسفه
شلون اعله هزله الكلهن عفه  .....  حسين

طب خاشع الصرخات المجلس
وزاعل ضواك وعيش الهندس
الطف ظلام وماجاب اي حس  .....  حسين

الظلمه البالمجلس شمسك
ولايعله اعلى الناعي حسك
خل حچيه المجروح يلمسك
وبالمجلس ضل راجع نفسك  .

احمد العبادي

لوالدها   _ اجت رقيه
تباوعله  _ على الوطيه
تضل تدعي _ بحزن سبيه
اين الطالب بدم المقتول بكربلاء

هالمنظر _ شلع گلبها
گاطعته  _ دمع دربها
كل دمعه _ جمر تصبها
اين الطالب بدم المقتول بكربلاء

للمنتظر ،، تشكي الم  ...  حسين
من الطعن ،، ماضله دم  .... حسين
من السحگ ،، صدره انگسم  ....  حسين

تحچي  ،،  تسكت وتبچي  ...  بنيه ماتحمل افراگ ابوها
شافت ،،  جثته وصاحت  .... نعمة الله ابد ما رعوها
*********
يالمهدي  _  ويايه باوع
لبصدره  _ شنهوه طابع
هم ميت  _ يسحگونه سامع  !
اين الطالب بدم المقتول بكربلاء

والدنه _ شكثر يحبنه
ومن صدره _ انوخذ عشگنه
مشتاگه  _ بقت خيمنه
اين الطالب بدم المقتول بكربلاء
ماينغفر ،،  هذا الذنب  ...  حسين
مات بامل ،،  مية شرب  ...  حسين
داروا عليه  ،،  كل الحزب  ....  حسين

راحت.. تشبگه وناحت  ... تحترگله غدت چنها خيمه
تحضن  ...  جثته وتصفن  .... چي بقه يمر صور بيها ضيمه
*********
ياجرحه  ...  بناظرها شاخص
بعد اصبع  ...  من ايده ناقص
وتشوفه  ....  بترابة غايص
اين الطالب بدم المقتول بكربلاء

گالتله _ اخذ اصبعي
وگوم اشرب _ من عيني دمعي
ولثارك _ كل عمري ادعي
اين الطالب بدم المقتول بكربلاء

من الخيم  ...  جايه ركض  ...  حسين
تلم جثته  ....  من الارض  ....  حسين
ليش انسحگ  ...  طول بعرض  ...  حسين

ذايب  ...  شافته وشايب  ..  شعره كله بكثر هم دليله
عرفت  ... دنيته اتطفت  .....  من يفكر بقه  بالعقيله
*********
ماتهده  ...  وتون لبوها
والعسكر  ...  ركض اجوها
جروها  ...  وحيل اضربوها
اين الطالب بدم المقتول بكربلاء

الترچية _ صارت باديهم
مايرحم  _ الم سبيهم
وياذي _ الگلب حچيهم
اين الطالب بدم المقتول بكربلاء

وصاحت  انه  ...  بعازة ابو....  حسين
اشتد علي  ...  سوط العدو  ...  حسين
وين الحضن  ....  وين الدفو  ...  حسين

عندي...  تگله يالمهدي  ....  وينك احضر بعد مالي حِيله
متني  .... لوعو متني  ....  گلي شنهو العمل والوسيله
*********
هالطفله  ...  جرح گلبنه
وياها  ...  ندعي بحزنه
بدمعتنه  ...  بالم لطمنه

اين الطالب بدم المقتول بكربلاء
كل شيعي _ وشكو مواسي
بدلالة _ جرحها راسي
والدمعه _ أمر أساسي

اين الطالب بدم المقتول بكربلاء
ماتت على  ...  طشت النحر   ...  حسين
طفله لچن  ... شابت قهر  ...   حسين
لمعنى العشگ  ...  تركت اثر  ...  حسين

طفله  ...  صعدت بهزله  ....  وبيها تفتر ارض بس شماته
وتشكي  .. يم رمح يمشي..   براس ابوها وعطش هد لهاته

احمد العبادي

يضيع _ اليعوف _ عزاء _ حسين
********
آنه عمري عايش عالدمعه ورحمة العزية
وحلمي كله رايد كون ابقه بنظرة الزچية
مالي حيله تايه لو هدت فاطمه ادية
هي جمره جابت لجروحي وابچي عالسبية

والدموع النازله
تحلها اكبر معضله
بس عجيبه كربله  ...  ماتنحل

بيها نسوان النبي
تمشي گوه وتنسبي
بلوه طاحت عالعبي  .... ماتنحل

بأنين _ تصيح _ نساء _ حسين
*********
كلشي عندي منبر  ومشچل دومي للمصيبة
ودمعي حولي داير  ماتاني فد نعي يجيبة
دموعه منه تنزل كل لحظه  المنذبح حبيبة
العنده حرمه تاهت بالصحرة وحايرة وغريبة

البس الاسود حزن
كل حياتي وابقه اون
عاللي عالعطشان ويون   ....  ياضعني

وغيراني هاللبس
رفعة من عنده التمس
واسمع الصاح بهمس   ....  ياضعني

حزين  _ يدور  _ نداء _ حسين
*********
ضوگ اضوگن الهم  من تنشف  عيني من دمعها
الدنيا غابة وآنه  ما اگدر احتمل وضعها
بلاية لطمة بيها اتذكر فاطمة وضلعها
آنه اشهگ الطف  والحومة  عايش بوجعها

كل كلامي عالجرح
ودومي انعه المنذبح
شويه مية ما تصح  ....  للعطشان  ؟!

السماء انفطرت
والقلوب انكسرت
عالمآسي اللي جرت  ....  للعطشان

يحيف _ سليب _ الرداء  _ حسين
*********
وكتي مني يمشي  مالحگ افتهم حياتي
باچر آنه ميت  والتبقى مني ذكرياتي
وحلوه لمن اسمع الوآدم تحچي عن صفاتي
هذا اسمه خادم نتذكره بكل عزاء يغاتي

حلوه لو مات الشخص
ومايذكرونه بنقص
عنه الوآدم تقص  ....  بس زينه

وزينة الزينة تره
الوآدم اللي تذكره
بلطمة ودموعه الجره   ....  بس زينه

جمال _ الحياة _ بكاء _ حسين
*********
آنه عشگي مجلس  واعتبره هو اهلي صاير
اخوه كلنه نلتم  ونّاصر  زلمه ماله ناصر
زلمه وحده باقي وتحيطه ولية الحوافر
وطفله يبچي رايد بس يرضع ضامي دمه فاير

طفله مارايد سهم
حرملة شو ما فهم
طشر من الرگبة دم  ... ياويلي

هالمصيبة  ماتفض
دايرة طول بعرض
بالسماء وبالارض   .....  ياويلي

ويريت _ اصير _ فداء  _ حسين  . 

احمد العبادي

كل الشوارب تقصده
سيد الرجولة توجده
يوم القيامه امجسده  _ فوگ العده

ابوفاضل _ ابوفاضل _ مدد
********
كل الزلم تمشيله  _  بابه وتصيح ادخيله
والماگصد لعتابه _ اعگالة يصبح شيله

چان الحسين يشيره  _ وبرايه متضل حيره
گول اسمه لمن تحتار  _ يغني اسمه عن الخيره

طينه صافي _ دومه وافي _ الگمر الگمر الگمر

عالي صيته _ وبحميته _ الگمر الگمر الگمر

البابه روح _ ينطي روح _ وغيره تبقى خالده
*********
من گبته تطلع شمسي _ بس حبه غير نفسي
كل عمره گاعد ميگوم _ ومن شافه گام الكرسي

ومن شافه عسكر لطفوف _ گدامه ذبوا لسيوف
ترعب عيون العباس _ الشافاها ماگام يشوف

يبس الدم _ من تقدم _ الگمر الگمر الگمر

چفه غيمه _ وطوله خيمه _ الگمر الگمر الگمر

بالنزال _ رعبه طال _ يرعد ابداً ماهده
*********
يهادد وابد مايسكت _ نهر الشجاعه و يكت
شبچة واجت عالسمچات _ من الشبچه ياهي التفلت!

فر العدو تلث فرات  _ وذبه اعله صوب الغيمات
يجرع عذاب العباس ! _ كلش خطيه المامات

جابت امه _ ارقه زلمه _الگمر الگمر الگمر

وحده عسكر _ صوته يزئر _  الگمر الگمر الگمر

كالفضاء _ كالسماء _ماكو حد يحدده
*********
يشتم قميصه يعگوب _ ورابط على گلب ايوب
وباسمه توسل بالله _ آدم لمن راد يتوب

الكافل بنت داحي الباب _  لوما رحمته احنه اتراب
حاكم على ارواح الناس   _  معتمده رب الارباب

بيده كلشي _ وامره يمشي _ الگمر الگمر الگمر

ولمقابل _ هذا جاهل _ الگمر الگمر الگمر

العطره ياس _ اهله ناس _ منهم الكون ابتده
*********
بشباچة علگت الروح _ وگتله بعد لاماروح
الا تشب بيه نار _ تحرگني لجل المذبوح

آنه ادري گلب العباس  _ كلش حنين اعله الناس
وباسم العقيلة الينخاه _ فوگه  يمطرها الماس

حلوه ناره _ للغياره _ الگمر الگمر الگمر

راعي جرحي _ وضاوي صبحي _ الگمر الگمر الگمر

بكل زمان _ بكل مكان _ آنه راح ابقه انشده  . 

احمد العبادي

لاتفتحلي بابك بس ** لتخليني ادگ غيره
الحيره حيره يم الناس ** وحلوه اببابك الحيره
اعيش بنظرتك مولاي ** وجرحك اغرگ اببيره
وجهي من رماد اخيام ** انرسمت كل تعابيره
يرب اسباب اليلطمون ** وغرام العاشگ تثيره
يراس اعله الرمح مشدود ** ويفييلك جنح طيره
************
على اعمالي اذا اتچيت ** اطيح شما ردت انهض
انه بختي بعزائك دوم ** يبو صدر الظلُم منرض
الدمعه المنك اتصب ليك ** ترجعلي السجل ابيض
گلبي برحمتك يحسين ** نفس غرگان حيل انكض
احب الشاله جرح النوگ ** والماشله حيل ابغض
ماناصفها زينب ليش ** كلشي لا زمن لا حض
*********
لتطلعني يامولاي ** من هاجس قصوري وياك
اعوذوا من الانه سويت ** خدمتي سيدي بحماك
يالمگابل نهر عطشان ** ويروّي الماي صار اضماك
بحرت ومركبي من اوراق ** والك اوصل گمت انخاك
يواگع من مهر عالگاع ** وجمر چنه التُرب لاگاك
بسبع حصوات ارجمه كون ** دليلي لو قبل ينساك
***********
فوگ الخوف خوفي يصير ** اذا لاسامح الله بيوم
بچيت وماكو بيه دموع ** واذا فوگي الجزع ميحوم
اخافن چي اعرف الحب ** اذا دام الدموع اتدوم
جفاء الدمعه من العين ** دلالة عن عشگ ملثوم
وانه المن عشگه روحه تكون ** وبچفوف العشگ ملموم
اتطشر اذا ضليت ** بلا دمعه السلب لهدوم
***********
يشمس وآنه تحتك ماي ** لتبخرني يامولاي
ابقعر الزجاجه ابقيت ** گبل لا عرفك آنه هواي
ماريد ارجع بعمري ** واريد اتحزم اعله الجاي
اصير اويه الضعن رحال ** ولدموع الطفل بچاي
ويمسحوگ السحگ ياريت ** موبعضاك لابعضاي
واجيب امي تون اعليك ** وتسوي عليك فياي .

احمد العبادي

جايك جايك بمدمع
ولهلي ما اريد ارجع
اريد الروحه روحه تصير
وروحي بعتبتك تطلع

جايك والجروح تهيج
مارايد حلول الضيج
رايد كون احس السوط
شنو آلامه بالتنديج !؟

جايك من طريق ابعيد
بس ماماشي بالتهديد
ياويلي على ال بالشام
اعتبروا سبيهن عيد

جايك جية الخجلان
زاير مرتخي وشبعان
ماتدفعني روس ارماح
ولا جوه الشمس عطشان

جايك يا گلب متعوب
ما فكر تطيح اذنوب
افكر مثلك من الگاك
اطيح اعله الوجه مگلوب

جايك ثوبي كله طين
ومتاني اللقاء يحين
حتى الطم عيوني اگبال
شباچك يبو الطيبين .

احمد العبادي

للسلطان علي ابن موسى الرضا:

يارحيم بكل گلب حب الحسين
وادخل الجنة اذا تمسكلي ادين
من ضريحك روحي تستسقي الغرام
وآنه اعمى وگبتك صارتلي عين

يا امام * گلبه ضام * للخيام *  هوايه جروح
ليك اجيت * توسليت * بيه ريت * يدوم النوح

يا ايها السلطان ارزقني الدموع
يا ايها العطشان كون اصرخ والوع
واتمنى اسمي يصير العبدُ الجزوع
*****
انت اختار المسافة والطريق
وانت حددلي اتجاهي والرفيق
آنه جثه وانت حاملها اعله اديك
وين ما تشمرني راح ارضى واطيق

ارتجيك * روحي بيك * دوم اجيك * مدنگ الراس
ياحنان * يا امان * يامكان * يفيض احساس

باسم الجواد انخاك ياجرح الجواد
خايف امل بيوم من لبس السواد
اشمر علي مولاي نيران ورماد
*****
ياغريب وتدري باحوال الغريب
سيدي خليني من عندك قريب
من فتات جروحك اشمرلي جروح
تفزز دموعي على دمع التريب

التريب * الغريب * السليب * الجوه الخيل
لجله كون * العيون * بلايه لون * وتبقى بليل

يالتكسرك مولاي نسمة كربلاء
وجبت العمر محزون وتقيم العزاء
وباذنك بعدها تدور صرخات النساء
***
عندي منهاج وعلي دومي مشيت
من احس بروحي بردت وارتخيت
يالرضا صوبك احط عيني واگول
فدوه لاتنهيني يالباسمك بديت

صنع اديك * وآنه ليك * يالعليك * ايامي تسير
الدليل * والسبيل * للذليل * البي تقصير

من الرضا التدبير للحب گمت اصيح
وعطفه عطف عباس باب اعله الذبيح
والباقي  بالاخلاص والمنهج صريح
***
يالرحمتك ماتحددها السطور
ولطفك الماينتهي اثلج صدور
لاتراويني صبح مابي عذاب
وبالمصيبة العظمى ارد ابقى ادور

بالعذاب * گلبي ذاب * واغتراب * مگضي اليوم
النساء * بلا رجاء * والعناء * يدور اغيوم

الركضت اخت لحسين مابين الرجال
الصرخة وجع اطفال من نغز النبال
ريت العمر خلصان المن عمري طال  !   . 

احمد العبادي

اجني وعالترب دم من اخوهن ضال
وويه الدم حچن وتشكن من الحال
********
اجني من السبي وبعده الدمه اعله الگاع
دم الضعنه مسبي مايروح بساع
وصاحن هالاجينه تطمنوا يسباع
بس بينه نقص نسوه وعُمر واطفال
********
اجني الكربله وانعادت المأساة
وحبات الرمل شو صارن مرايات
بيهن منعكس كل العذاب الفات
ومن عين السبيه اعله الرمل شلال
*******
وگفن عاينن وتذكرن لحسين
تحت دوس الفرس ويحرك الايدين
چنه يگول اركضن والحزن بعدين
اركضن لاتهد اعله الخيام ارجال
********
اجني ومن اجن متغيرات هواي
العبي حمره وگلب من عنده تايه راي
وطاحن عالترب واعليه يطشن ماي
وهني يصيحن يمن بيك العطش چتال
**********
بَچّن نوگهن لمن نعن والله
وحتى النوگ صاحن ويلي واويلاه
گبل الشام والطف هالضعن محلاه
بس هسه الضعن كل في وقاره انشال
***********
نعايات اجني وخازنات ادموع
ومو بس عالنعي اتطور الموضوع
بيهن روحهن گامت يناس اتموع
واجن يموتن من الهم نساء الآل
*********
ويفور الترب كلما نعيهن زاد
لن بدمه غيره المنكسر لُفاد
عاد الضيم كله هالضعن من عاد
ويذبح بالشهم هذا النعي لو طال .

احمد العبادي

هاي المرحله الماردنه نوصلها
وهاي المشكله المانگدر نحلها
كون سنينه الحلوات نسألها
فرگتنه الطويله  هايه تعقلها !
********
آنه اختك واجيت انعاك يحسيني
وعلى گبرك لطلع الروح من عيني
بس فراگك من الصار يآذيني
وعالموت شكثر فگدك يوازيني
******
وداعت ضحكتك يالبيها عمري يطول
علة موت گلبي بطيحتك معلول
شگد صيحنه  عنك تبتعد لخيول
بس صياحنه ضل يمشي للمجهول
*********
من شفتك قبر  صحت القبر محلاه
وصحت نزلوني يلا بالقبر وياه
الكل عمري يجي واركضله اتلگاه
يتلگاني ردته  هسه وين الگاه
*******
آخ شگد تعب مرانه يالمظلوم
خويه الصار بينه مايصير بگوم
نسوانك عليهن حرموه النوم
وبلايه هضم مامر عليهن يوم
**********
يحسين الحچي بگلبي ثگيل هواي
المهم هسه جبتلك هايه طاسة ماي
شكلك ضامي ضل يمشي الطريق وياي
گوم تروه ياروحي وامل دنياي    . 

احمد العبادي

علي بعد النبي _ هو خيرُ وصي
********
على قول النبي.... من يوصي بعلي
يعني هو الولي .... وغيره ماكو بعد

الخلافة الة _ هو راعي العُلا
عالي المنزلة _ ومايشبهة احد

وصى النبي بعلينه _ يعني القضيه لينه
خل تسمع المدينه _ بس حيدر ولي

شما سوت السقيفه _ حيدر يضل خليفه
والعترته الشريفه _ فدوه آنه وهلي
*********
على هو الصدگ _ گلبي باسمه يدگ
چان اذا يختنگ _ للنبي يهب هوى

بالحرب والشدد _ طه ينشد مدد
ياعلي المعتمد _ وللجروح الدوه

من ينشده حبيبه _ بسيفه النصر يجيبه
في طلة المهيبة _ العالم صفن

حيدر عجايب الله _ واعليه الهة صلى
محد دنه ووصلة _ شما دار الزمن
*********
النبي بالسمه _ حدده الفاطمه
شافه خوش ازلمه _ وماكو غيره الكفو

بالكلافة يشع _ وللرسالة درع
بصغره كلش سبع _ وبامره داخ العدو

ياهو اللي مثله خاطَر _ نايم يواجه الشر
روحه الحبيبه معبر _ ماهمه الخطر

روح الرسالة هو _ وگفاته بيها حلوه
وطه يشوفه تچوه _ وذراع واثر
*********
بحبه ديني اكتمل _ هو خير العمل
بالسمه شگد وصل _ اسمه جوه العرش

نعمة الله علي _ رحمة الله علي
قدرة الله علي _ وطاعه انس ووحش

الله اعله ارضه راده _ يتسلم القياده
ويعرفه بعباده _ ويحقق هدف

بس حقدوا الجماعه _ الماعدهم اي شجاعه
محد مقامه راعه _ ياويلي ووسف
*********
الرسول انقتل _ سمته ام جمل
وبعده حيدر ذبل _ من المصايب ترى

داره فوگه احترگ _ وابنه بالدم غرگ
وماكو خَيّر عرگ _ وانكر اعله الجره

ومرته انكسر ضلعها _ وماكف جري دمعها
وتالم الوضعها _ كل ليله ويون

ناح اعله حزنه آدم _ قام اعله طفله مآتم
كل القهر يعالم _ من كلمة وإن .

احمد العبادي

ظلمه المدينه _ السمه حزينه
وجرى دمعها _ احن حنينه

هاي ام ابيها _ ترجف اديها
يرحل تشوفه _ الگلبه عليها

موات النبي موات هالليله
وفاطم گاعده گدامه تبچيله
من يمشي علي يمشي ويتچيله
سموه والم سمهم هدم حيله

رسول الله انغدر
الرسالة في خطر
واهل بيت النبي
يتانيهم قهر
*********
شيسد فراغه _ رب البلاغه
الله اعله دينه _ صاغه صياغه

اي وآ محمد _ لو جفنك انسد
شحال الزچيه _ من الگلبه اسود

عگب هايه بعد ماضن اكو اصعب
لو مات النبي خد فاطمه يُضرب
وفدك ميراثها من عدها هم تُغصب
المدينة عگبه دار اوحوش ماتنطب

نبي الحق والعدل
اذا ما ضل عدل
السقيفه تبتشر
وسعاده لكل نذل
*********
روحه عليله _ ويدري برحيله
بنيته تعاني _ بقصه طويله

قصة هضيمه _ حُرمه يتيمه
يوگع ابنها _ بابشع جريمه

الماتگدر على فراگه اهل بيته
الچانت لليتامه سفره خاچيته
الامين الصادق المعروفه تسميته
راح يموت راحت منه عافيته

العليه صلى العرش
قريب اعله النعش
اعله حاله منهضم
الانس ويه الوحش
*********
وهي المصيبه _ وكلش عجيبه
بآخر وداعه _ روحه غريبه

من عنده تنفر _ اصحابه وتقر
ان مايوصي _ بل هو يهجُر

باخير ايامه زادت كلش الغربه
لان متعوب منه اتبرت الصحبه
ونسوا كل الحچي لنگال بالخطبه ( خطبة الوداع)
علي اعلينه ولي گالوا فلا اننصبه

مُدبر مقتله
ومُخطط كلشي اله
يقتلون النبي
وتهج العايله
*********
شعُظم الرزيه _ ابو الزچيه
الهادي الخليقه _ جته المنيه

وناحت خديجه _ وصارت حريجه
بگلب اليحبه _ وماشي بطريجه

لبن عمه علي ضل ينحب بحرگه
يگله وياي ضل ويرجع يشبگه
انه البعدك غريب ومنوخذ حگه
وعلي بيتي يطه الوادم اتحرگه

يطه انتظر
اندعيلي بالصبر
اذا زينب مشت
تحت سوط الشمر .

احمد العبادي